Bibi - 15

Chapter - 15

Pi Maduhi nui sawng chu ka en a, Saitluanga a rawn tawng khan mak a tihzia alang reng a. Tunah erawh a nui leh daih. Saitluanga chu hmel hlim sangin a en a, "Ee,i lo let leh ni maw? Bdi hi ka lo hrilh mek a. In lamah rawn kal hmasa se chuan a that ka ringa, thil ken tur eng eng emaw a awm a, ka pi damdawi mamawh vel a hre ber dawn sia " a ti zangkhai vah mai. A inthlakdanglam rang lutuk chuan min ti hamhaih a, ka din ngaiin ka ding ngawi reng ringawt. 

"Keiman ka ko anih kha" Saitluanga'n a ti leh hmuka, a hmel-ah danglam awm lo mah se a tawng a bung leh lutuk a, hriat a nuam vak lo. 

"Nia, hei a lo sawia. A pawi lo,  kan keng kim thoin ka ring" a ti leh a. A tawng pahin a thil rawn ken ho a en kual pah a. Saitluanga tawng bung vut mai chu ngaipawimawh ang pawhin a awm lo. 

"Bd, khatah khan ka phone ka kalsan em? " Saitluanga'n a rawn ti a. Ka dinna bula thil dahna chu a rawn kawk a, ka en nghal vat a.

"Hei hi mi? " tih pahin phone lo awm chu ka lek kang a, a bu nghut. 

"College lamah i tlang dawn nge i haw leh dawn? ' a phone khawih mawlh mawlh pahin a ti leh a. Pi Maduhi a bia tih ka hre thiam tho. 

" Haw leh phawt ang, Angela-i tukin chu a tap laklawh leha, insiam pawh ka la insiam mumal lo" zangkhai tak bawkin a ti leh a. Thil kan dahfel lai khan a mood a uih vei nen, tunah chuan a ka pawh zen ila min seh lovang tih tur a ni leh daih tawh. 

An inzui chhuah hnuah ka thu hnawka, kan boruak kha ka zo lo. Pi Maduhi mize mak lutuk khan minti hamhaih a, ka awm a ti nuam lo nge ka hlau ve hrim hrim zawk pawh ka hre tawh lo. 

"Bd.. " Piin min rawn ti a, ka phu deuh zawk mai. A la muhil reng emaw ka tia, kan tawng thawmah khan a lo harh ni ngei tur a ni. 

Ka pan phei vat a, a kut rawn lekchhuah chu ka vuan nghal a. Min rawn en a, " Mama a haw tawh em ni? " a ti tham chhal mai. 

"Aw, a kal deuh chiah a. Pi Maduhi a lo kal bawka" ka ti a. 

"Mama chu zan riak turin hrilh ang che" a ti leh daih. Pi Maduhi hming ka sawi chu ngaipawimawh ang pawhin a awm lo. "A lo kal ve a ni maw? " Tih tal min zawh ka ringa, min zawt eih lo. 

"Aa, keimah pawhin ka riahpui thei lutuk ang che. Chhun lamah office kal a ngai thin sia, tibuai lo ang" ka ti vat.

"Aww,in pahnih in inriak ang chu ka ti" ka beisei loh tawpin a ti awlsam et. 

"A ngai lo ang"  rang zetin ka ti a. 

"Eng nge maw ngai lo i tih le? A awm ve kha ka duh alawm" a ti ta khauh. Diktak chuan Saitluanga nena room zim lutukah hian riah duh ka duh loh avangin ka tawng tur pawh ka lo ngaihtuah fim hman pek lo. A tupa ania, kei aiin a let tamtakin a riahpui a duh ang tih te chu a lan chian vei nen... 

Thil ei tur an rawn ken ka ei tir a, ei luih a tum viau nangin a ei thei meuh lo. A bula hna ka thawh tirh phat atanga a mizia ka duh em em a awm nual mai. Kum upa tak a ni tawh chung hian nuam lo deuh chung pawhin damdawi leh chaw hi a ei hunbiah chuan ei ngei ngei a duh a. Harsa ti chung pawhin a ei theih ang ang a ei ziah. Engkimah hunbi a ngaipawimawh a, a that laia a in uluk tur zia ka ngaihtuah fo a, thatchhe deuh tan chuan chenpui a har khawp ang. Ka kal tirh phat atangin hun a vawn dik zia ka hre nghal a, Pi Maduhi'n a hriatna a chak tawk tawh lo a tih kha chu pawm lo tak ka ni tawh. 

"Mama chu phone teh, keiman ka lo be teh ang. A ring khan dah la" thil a ei zawh hnuah a ti a. Riak tura a duh thu kha ka la hrilh ta miah lo. 

Pi phone atangin ka phone a, rang zetin a rawn pick a. 

"Aw, Pi... " a rawn ti nghal a, a aw hriat a hahdamthlak ngang mai. 

"Zanah rawn riak ta che. Tihtur i nei em? " a ti nghal a. 

"Ka lo tum dawn nia. Eng nge i an? " a rawn ti dam leh thlup. 

"Ka zia vak lo. Tlemin ka chau deuha, zanah chuan lo kal ang che aw. Bdi tan hian min han chawikual vel a har ang. A derthawng si a" a ti leh duaha. Ka nui ringawt. Midang awm miah lo chuan ka tan a har thin viau reng a, a tar tawh viau nangin a ruhrel a lian a, keilah nu te tak ni lo mah ila lian han tihtur ka ni lem si lo a, a thlamuang lo pawh ka dem lem lo. 

"Um, ka lo kal dawn nia. Pi, inleng ka nei lawk a. Mamawh i neih chuan Bdi khan min lo hrilh mai rawh se. Ka dah ania" a rawn ti leh a. Pi hian a tute zawng zawngah an unau hian a ngaina bik a. A tu hmeichhia te ai pawhin a ngaina zawk a. Zep pawh a zep lem lo a, midang pawh hian thik enah an en lo niin ka hria. Anni unau hi chu a chenpui te annih mai bakah nu leh pa tel lo a an tleirawl lai atanga a enkawl anni a, tu en pawha en mang loin a fa en a, a atchilh em em tih a sawi fo mai. Chutiang bawkin Saitluanga te unau pawh hian an ngaina a, an ngaihven em em reng a, mipa annih avang hian an Ngaihtuah tih an sawi ve reng lo a, mahse an awmdanah an duat tih hai rual a ni chuang lo. 

Chawhnu lamah Saitluanga ni, Nu Saipuii a lo kal a, a fanu Remsangi a lo kal ve bawka. Ei tur an rawn keng teuh a, kan inhmu fo tawh bawka, min rawn be nghal bawrh bawrh mai. 

"Bd, zan riak tur hi engtin nge in rel dan? Zanin hi kohhran hmeichhe lam thil pawimawh, ka kal ngei ngei ngai a awm a. Mami hi a riak thei a, abak chu ka rawn riak char char thei thung anga. Mahse, engtin nge Maduhi hian a tih le? " a ti a. 

"Mama rawn riak turin ka tih kha. Bdi nen min riahpui se, Remi nen nakinah in la rawn riak anga" Piin a ti a. 

"Ee, chuti chu a tha alawm. Maduhi hi nau pawm ania, atan a harsa thin a. Mipa leh hmeichhia riah an phal angem aw??" Nu Saipuiin a ti tha ve mai. 

"Phal ang ka ring, a hmaa ka thiannu nau nei ka riahpui pawh khan an pa nen alawm kan riah" Remsangi'n a ti awlsam et. 

"A tha hlei hlei anih chu. I Pitei te nupa pawh an la riak duh thei a" a ti leh a. Saitluanga nena kan riak tur chu ngaimawh thamah an dah lo tih achiang mai. A awm ve reng, kei leh Saitluanga sawi zawm chu ngaihtuah pawh an ngaihtuah pha lo ang. 

"Pitei riahpui te chu Api hian a duhawm lo em maia" Nui chungin Remsangi'n a ti a, Nu Saipuiin a fanu mitmeia a khap lai chu ka va hmu fuh a, Remsangi'n min rawn en a. Lai angreng fe hian a nui a, ka nui ve ringawt. 

"Bdi a awm alawm. Ani hi a awm chuan midang lo riah angai lo" Pi-in a ti a. 

"Aaa, ani chauh a riah ngar ngar chuan a chau lutuk dawn asin, zanin bak chu kan nufa-in kan rawn riak tawh anga, Mami a hman loh pawhin zan dang zel pawh keichu ka riak char char thei ka tih kha. Zingah erawh min rawn thlak hma thei se, hna ka kal ve angaih avangin ka haw tlai thei dawn lo a. Maduhi tak pawh kartawpah chuan a rawn riak duh maithei asin" Nu Saipui-in a ti leh a. 

"Duhawmi riahpui ka duh lo reng reng mai, awmzia a nei lo. Duh leh Sangberi pawh lo riak se a pawi lo zawk" Pi-in a ti hlur mai. 

"Khaia, ka nu.. I ti ho em mai. Bakah, lo ngaihtuah duh mah ta che. Kan rawn rel fel thlap zel mai ang" Tlawn pah titihin Nu Saipuiin a ti leh a. Kei mihrang daih awm laia Pi Maduhi emaw an chhungkaw hnai vai hrim hrim, Pi in chutianga a ti chu a duh lo tawp ang tih ka hre thiam. Pi-in thildang a sawi hmain an chhungte damlo chungchang a sawi zui ta daiha, Pi pawhin a sawi zui ta bik lo. 

Dar 5 velah an haw a, an haw hnuah lo kal an awm leh nak naka, a then chu ka hriatsa tawhte an ni a. A then chu ka vawikhat hmuhna te anni thung. Chhungkaw lian leh hung pangngai tak anni bawka, Pi ber damdawiin han lut ta chu an rawn lang nghal sup sup mai. 

"I phone kha a ri ania" Toilet atanga ka chhuah veleh pi-in min lo ti a. 

Ka phone dahna ka pan phei a, ka charge laklawh avangin phawi chuang loin min rawn call tu ka en a. Saitluanga a lo ni a. Thil pawimawh a awm anih ringin ka call back nghal a, a ring rei hmain a rawn pick nghal a. 

"In buai deuh em ni? " a rawn ti nghal vut.

"Aih, toiletah ka lo awm a. Eng nge ni ta? "

"Chaw i la ei awm si lo a. Eitur enge ka rawn ken ang che? " a rawn ti leh a. Zawhna pangngai, ngaih loh lama ngaih tur awm miah lo ni mah se ka lai deuh roh tho pek. 

"Engmah angai lo. Lo kal an awm nuala, thil an rawn keng hlawm a" alangah erawh ka ti a. 

"Ok, ka pi khan mamawh a nei em? " a rawn ti tha ve mai. 

Pi hnenah thil ken tur duh a neih leh neih loh ka zawt a, " Ka tarmit lo keng rawhse" a ti vat. 

Saitluanga hnenah ka hrilh leh a, " Um.. Engmah i duh lo tak tak maw?" a rawn ti leh a. 

"Duh lo e, ka puar lutuk. Saikima a lo kala, Chicken Biryani a rawn kenga, chu pawh chu kan la khawih lo" ka ti leh a. 

"Ok, a that chu. Ka rawn kal har tawh lo ang. Nih phawt" a ti vut a. Ka chhan hmain a off a. Chhan let vak ngai chi sawi lo mah se a dah rang teh vut lutuk chu ngei zetin ka phun hlak ringawt. 

"Tu nge ni? " Pi-in a rawn ti a. 

"U Mama.. " ka ti fan raih ringawt. 

An chhungte zawng zawngin "Mama" Tiin an ko a, Santi leh Na-i pawn an ko ve tho a. Amah ka la ko miah lo a, a hming sawinaah erawh chuan an chhungte bulah  "U Mama" Tiin ka sawi a, midang bulah erawh chuan "Saia" ka ti thunga. Lawmi nena kan sawi erawh chuan koh dan mawi tih vel lam alang ngai lo. SAITLUANGA a ni tawp mai. 

Darkar khat dawn a liam hnuah a rawn thlenga, paper Bag hian ei tur a rawn khai tun maia. Pi-in a lo be nghal siam siama, eng nge a ken a zawt a, ' ei tur anih hi. Zanah kan ei duh takin ka tia" a ti a. Kan awmna room hi mahni in a awm ang deuh kan ni a, eisiamna tur room, mi pakhat tana chet nuam tawk tur leka zau hi a awm a.Fridge lian vak lo a awm tel bawka. Pi mutna room nen inzawm vekin a karah darthlalang an dah a. A zim hle nangin chet a  awlsam phah viau tho. 

Lawmi'n min rawn call a, kan chanchin min rawn zawt a. Tukin ka kal dawn khan riah nghal inring ka nih avangin riak turah min rawn dah nghal tawp. Ka chhungte bulah pawh hian Pi nena kan inkar ka sawi fo a, tuna a damlo ka riahpui tur pawh hi extra deuha thawk angah pawh min ngai bik lo. 

Pi a khua a sik a, damdawi ka pe a. Reivak loah a chhawk a, a muhil zui a. Puan ka sin that tir hnuah tihharh hlau takin kalsawn a. Saitluanga Chair a phone khawih chunga a thu chu ka melh zawka. Pi a men lai kha chuan nuam lo tihna pawh ka nei lem lo a, a muthilh takah chuan ka zam chhia chu a ni deuh ber. Mahse, ka zam tih a hriat ka duh lo bur.

"Khumah khan mu la, chhuatah hian ka lo mu ang" a ti sup. 

"Ngai lo.. Khumah mu zawk rawh, khum bulah khan mutna ka phah anga, a harh pawhin ka hre hma zawk ang" ka ti a. 

"Khumah pawh mu la a ko harh tho ang che" a ti leh tlat. 

"Aih, tah hian mu zawk rawh. Chhuata mut kha ka tan a harsa lo zawk ang" Ka ti ve thung. A thutna atangin a rawn tho a, a zi mar a.. A hmelah chuan nuihza hmel a lang a, a pi atanga a chhawm, a mitmeng lian leh zahawm zet chu a tizim a, min rawn en a, hetiang hian min en thin lo se ka duh... Ka chhungril thleng hian a hmu tlang theiin ka hre thin a, ka duh lo... 

"Chhuata mut angai hleinem, Ka pi khumah khan ka lo mu ang. Khum pakhat zawkah hian i mu dawn nia" pangngai takin a ti leh a. 

"In tawt lutuk ang. Khumah hian mu rawh" ka ti a. Kan tawng ring ngam vak bawk si lo a, kan inbiak dan chu a nuihzatthlak angreng viau. 

"Tihdan ka hria, chhuatah mu ve ve ila... " a ti leh thut. A hmel lah chu a lang thutak ta riau lehnghal.. 

"Teuh lo" Rang lutuk hian ka ti a, za zeta a nuih takah chuan ka thaw huai mai. A ti tak tak lo ang tih ka hre tho nangin ka awm a nuam lo nghal vek tho. 

"I va han hlau em em, ka ei dawn che emaw iti mi? " Nuihza insum tih hriat zet hian a ti leh a. "Ka hlau lo" ti dawn ila ka awmdanah ka hlauh zia alang vek a, insawifiah tum awmzia a awm lo tih ka hria. 

"Hlau ve bawk ang chu.." Ngaihsam hmel zetin ka ti liam puat.

"Achang hi chuan i lawmawm thin, dawtsawi lem lo hian tlang tak hian thil i sawi mai zel a... " a ti leh daih. 

"Lawmawm lai tak pawh chu a...Pawn lamah ka va chhuak harh lawk dawn ania" ka tihzawm a. 

"Um, va chhuak la.. Mahse, kal hla lo la.." a ti tha ve mai bawka. 

Stepah ka chhuk thlaa, Damdawiin pawnah ka chhuaka, Damdawiin chhung a reh deuh raih tawh laiin pawn lamah erawh chuan mi an lo la thahnem phian mai. 

Gate pawnah ka chhuak pheia, pawn boruak dai deuh dak chuan min ti harh sawng sawng in ka hria. Saitluanga nena kan inbiak dan kha ka ngaihtuah let a, innel lutuk ang maiin kan awm a. Phone-ah zantin inbe mah ila atakah khatiang a innel khan kan titi khat em a. Kan awmdan kha ka nuihpui lo thei lo.. 

"Bd.. " Min rawn ti thut a, ka nui tawp nghal hmak. 

Rang zetin min kotu ka en a. Mipa pakhat ka bul lawkah a lo ding reng chu niin. Keimahin ka lo ding nui vur vur awm sia, ka mawl hmel ngawt ang. 

"Min ko em? " ka ti ringawt. 

"Yes, ko chiang e.. Min la hria em? " ati zui a. Ka hmuhna ka ngaihtuaha, rei ngaihtuah ka ngai lo..

"U Zothana..."  Ka ti chhuak nghal a. 

A bu nghat a, a hmeltha takah chuan nui hmel alang a. A lang nelawm sarh mai. 

"Tlaiah khan damdawiinah in lut tih ka hre ve chiaha, naktuk lamah ka rawn kal mai ang ka tia. Mahse, kan thian pakhat damlo serious deuh mai a awma.Hei kan rawn kal leh ta tho sia. Mahse, nangni kha chu rawn luh an phal ka ring tawh lo deuha, Saitluanga kha chu ka lo kal tih ka hrilh ta tho a" a ti nghal zung zung. 

"Coffee in ila, nge kan lut chho thei angem? " Amah bawkin a ti leh a. 

"Serious deuh anih loh chuan an phal pawh ka ring tawh lo. An strict ve riaua" ka ti a. 

"Um, aniang.. Helai hi chu an strict viau ania. Anih chuan Coffee in pahin saw laiah sawn thu ila.. " a ti leh a. Vawihnih kan inhmuhna chauh ala nia, thian tha ang maia min kawm nghal bawrh bawrh thei chu mak ka ti viau. 

Kan kal hmain "Zothan... " Saitluanga aw hian a rawn ti a. Zothana a hawi nghal vat a, kei erawh tul lo zetin ka lai leh deuh tlat a. Muangchangin ka hawi ve ta chauh. 

Kan lam pana Saitluanga rawn kal phei chu ka en a, " Engvangin nge maw a chhiat loh em em mai ni? " tih ka ngaihtuah a, hmelah chuan ani aia tha sawi tur hi Mizo zingah pawh chhiar sen loh an awm ang. Zothana pawh hi a tha fe zawk. Mahse, duhthlan tur nise Saitluanga hi midang zawng zawng aiin ka thlang ang tih ka chiang. Hna tha tak nei, mahni inenkawl thei bawk si anihna lam ai chuan amah tawp hian min hip zawk tih ka inhrechiang em em a. Ama landan sawifiah nan lah hian fak vak ngai loin MIPA tihah hian a chiang tawk em em bawk si. Lawmi'n a buaipui em em lai khan buaipui chhan tur ka hre ve lo a. Mahse, tunah chuan buaipui loh ka tum pawhin ka thei lo chu a ni ber tawh. 

"In lo inhmu a ni maw? " Kan bula rawn din ve pahin a rawn ti leh a.  Min rawn en a, ka lo en reng chu min rawn hmu a, ka hawi sawn vat a, mahse a nui suk ka hmu hman tho. Amah ringawt ka ngaihtuah a, en chin tawk ka lo hre pek lo atin ni. Huiham... Kum 30 velah ka lai tha leh ta vel chu ania.... 

"Pi a lo harh palh takin ka lo han chho ange" ka ti vat. 

"Coffee chu... " Zothana'n a lo ti ve nghal zat. 

"Nidangah nimai se... " Nui chungin ka ti a. Ka awmdan thawveng deuh harh mai chu ka inhrethiam bik lo. Saitluanga ka en duh lo lui tlat bawk. 

"Ok.. Ka hre rei viau ang aw" Nui chungin a ti a. "Keipawh mawle. Ka thing deuh ngar ngar maithei che ania" Nui chung bawkin ka ti let ve a. Kan inmangthaa, ka kalsana. Tul lo zetin ka hnungzang a hik deuh cham cham mai. 

Pi a lo la muhil a, ka hmai ka phih a, chhuatah mutna ka phah sawk sawka, ka mu ta than. Saitluanga lo let hmaa muthilh ka duh vei nen, ka mut a chhuak eih lo hrim hrim. 

Thawm dim zetin a rawn lut a, ka mutna bulah a ke pen a tawp chat a, ka thaw tha ngam lo.. A kalsawn thawm ka hriat rualin ka zawi nghal hnawk thei hial. Eng chu nge ka hlauh pawh ka hre chuang lo. 

Khumah a lawn tih ka hre thei a, a reh ta thap. Mahse, reiloteah ka phone a rawn nghawr dat a, thawm nei lo thei ang berin ka phone ka en a, amah Saitluanga msg a lo ni a. Ka open a, "Enge Zothana nen khan in lo sawi? " Tih zawng. Eng chu nge maw sawise min tih le? Khalaiah Pi Thurochhiah kan sawi a ring emawni? 

"Kan sawi teuh" tih ringawt ka thawn let a. 

"Ka fiamthu lo ania" a rawn ti leh a. 

"Keipawh... " ka ti let ve zat. 

"Ka bialnu mipa dang nen, afala an awm hmuh ka duh lo" 

Ka chhiar zawngin ka lungphu a rang nghal dut dut mai. 

"A chiang em? " Tih a rawn thawn leh a. 

"I bialnu chu hrilh la... " 

"Bibi... " 

Ka thaw tha ngam lo..Mahse, min chhaih leh pawh a ni thei a. Lo chiai vak ka duh lo. Kan inbiak danah kan innel thawkhat tawha, pu leh hnathawk anga inbia kan ni tawh bawk lo a. Chuvangin ka duh chu sawi ngam tur niin ka inhria. 

"I bialnu ka ni em ni? "  tih ka thawn let a. 

"Yes" 

"Chutiang pawh ka lo hre lo a.. " ka ti leh a. 

"Lo hre tawh rawh. Ka bialnu i ni a, i bialpa ka ni bawk. Achiang em? " a rawn ti leh a. A rawn sawi danah chuan a confi leh lutuka, chhan let mai dan tur ka hre lo. 

"Midang an awm anih chuan sawi la.. " A rawn ti leh a. 

"Mki... "

"A tawp tawh. I hun a intan mek tawh zawk" a rawn ti leh a. 

"Ka lo ngaihtuah ang"

"Ok... Yes tih chhanna ka hmuh ngei ka beisei ania. Chuan, first kiss pawh nghah rei loh ka duh"

Ka phone ka daha, che loin ka mu a. Pi in min ko riah ka harh leh ta chauha. Sana ka en a. Zing lam dar 3 a lo ri tawha. Pi tui ka intir a, khum mawng lama mu turin min ti a, ka hnial a, mahse "mu mai rawh. A zau em mai" a ti tlat. 

Kan thawmah Saitluanga a harh ka rin laiin a harh miah lo a. An zinnaa a chau kha ala reh fel lo nge a harhvang lo hrim hrim ka hre lo. 

Ka phone ka en vang vanga, engvangin nge kei hi min duh? Dinhmun inpersan ber kan ni tih a hre lo em ni? Zawhna tamtak zawh tur ka nei a, Mahse ka mitthlaah Pi Maduhi a lo langa. Kei leh Saitluanga sawizawm pawh nuihzatthlak a ti anih kha. Sawizawm loin kan inkawp tih a hriat hunah engtin nge a awm ka hre duh ta tlat. Zalen taka Angela-i chungchang ka sawi theihna tur pawh a ni thei a.Eng nge ka tih tur ka hria... 

"YES" tih ringawt Saitluanga ka thawn a. Inngaihtuah nana hun mamawh tam lo ber pawl ka ni ngei ang. Mahse, pawi ka ti lo. ... 

Note : Mifel ka lo ni😄😆 An inngaizawng tan ek ek a. Tin, he Story hi Vai serial ang mai a ni dawn tlat. A tawi thei lo, a sei dawn chiang bal. Enge Kasauti-ah pawh Anurag-a nu kha kum 100 aia tam a dam alawm mawle🤣🤣🤣 Achangtupa leh changtunu hian KHUP THUM han hmu thak thak teh se😂😂😂

Chuan, fakna hi click ka phal aw☺