Bibi - 16

 Chapter - 16

Zingah Pi Maduhi a rawn lang hlawl, nidang ang bawkin a pawnlam landanah chuan nu hlim thei leh kawm nuam tak a rawn ni leh a. Mahse, ka chhungril hian a pawh thei tlat tawh lo a. A mizia hi sawifiah theih si loin rapthlak ka ti tlat tawh.

"In mu thei maw? Vawiin chu Nute Sangberi kha lo kal a tuma, ka awm nileng hman ang a tia.Doctor ka biaa, test eng eng emaw neih ngai a awm a. Mahse,Nutei leh Bdi an awm chuan anni damdawi  chinchang hria annia. An ngaihtuahawm lo ang. Zanah ka ni a rawn riak thei hmel bawka. Bdi pawh zanin chu i hahdam vang vang thei ang" a ti nghal zung zung a. Rorel fel vel hi chu a thiam zawng tak niin ka hria a, a mizia chu engpawhnise, inchhung enkawl na na na hi chu tlin tak a ni.

"Thingpui ka rawn keng a, Na-i lum hi a tui thin ka tia. In rawh, I chau awm si" min ti zui nghal a.

"Kan mu tha a, engmah hahthlak a awm lo" ka ti ve vat.

"Damdawiin hi chu boruak hi a nei ve roh a" a ti leh a.

"Nia, mahse Pi hian riak tura min duh chhung chu ka riak thei ang" ka ti awlsam leh mai. Min ngai ve em em tu a ni a. A duhdan anih phawt chuan tihhlawhtlin sak hram hram ka duh.

"Zanin pawh riak la chu ka duh viaua, mahse Mami a lo riah theih chuan i hahdam dawn nia. Naktuk zan lamah i rawn riak leh anga" Pi-in a ti  charh.

"Zanin chu ka ni leh Remi rawn riak se. Naktuk zanah ka rawn riak leh ang" Midang kan tawng leh hmain Saitluanga'n a lo ti ve vut. Nizan khan chhan tha tawk nei ka intih avangin "yes" ka ti vek tawha, mahse khua a var hnuah hian awlsam riauin ka inhre leh hnuhnawha, ka awm a nuam leh tawh lo. Saitluanga lah chuan ka chevel min en zui reng tih ka hriaa, tul lo em em in ka zam ru tlat a, ka inthlahdul thei ngang lo.

"Ka ni a riak thei tho a, Bdi leh ka ni riak mai se a tha ang chu" Pi Maduhi'n Saitluanga hnenah a ti a.

"Riah ngar ngar chu a hahthlak ang. Bdi nen kan riak rual zel anga, kan inchhawk zangkhai vek ang" a ti mar ut.

"Ni e, a tha viau tho mai" Hmel hlim sangin a ti tha ve mai. Mahse, a mitmeng-ah chuan a hmela nui hmel lang chu a nuihzat vang a ni lo tih alang reng.

"I haw nghal ang tiraw? " Saitluanga hnenah a ti leh a.

"Nutei chu lo thleng phawt se. Bdi hi ka thlah nghal law law ang" a ti awlsam et.

"Aaa, chhun lam chu ka awm tlang ang ka lo tia" ka ti vat.

"Ni e, awm law law se. Test neih tur a awm nual sia" Pi Maduhi pawhin a lo ti ve a. Saitluanga pawhin a hnial zui lem lo.

An pahnihin an haw ruala, an haw hnuah pi eitur ka pe a. Dar 10 rik hmain Nu Sangberi a lo kala, amah chauha lo kal loin Saikima nen an lo kal a. A rawn thlah ringawt emaw ka tih laiin " U Maduhi khan test tur a awm nual a tia. Ka pi hi amah hruai kher ngai a awm palh takin vawiin chu ka rawn inpe nileng dawn" nui chungin a ti a. Ani hi an ka hmuhtirh phat atanga an chhungkaw zinga danglam bik ni a ka hriat nghal kha a ni a. Ka hmuh apiang hian hmel hlim lo leh mood fuh vak lo ang hian ka la hmu ngai lo. Ka nel em em a, kan titi nasa thei viau bawk.

Kan buai viau ta tak tak. Saikima nen kan buai dun zak zaka. Mahse, vanneihthlak takin Pi hruai ngai engmah a awm lo hlauh. Naktuk lamah erawh amah check ngai thil a awm dawn thung.

Pi awmna room kan pan hmain Gate pawna restaurant-ah thil ei a rawt a. "Roomah khan entur a awm nual asin" ka tih chuan a nui mai. "Awm rawhse. Vawiin chu cheat day atan ka hmang law law anga, thaupui nghal hnawk theih tur ka ei dawn" a ti duh lek.

Restaurant-ah kan inzui lut a, mi an lo tam phian a, thutna awl awmchhun, bang kil lam ami kan pan phei a. A kil deuh nangin a nuam angreng viau tho.

"I fel reuh ka ti" Nui vur vur pahin Saikima'n min ti a. Angaihna hre lo fein ka melh ha ringawt.

"Ka pi hi kan naupanlai atanga khirh tawngkhawng ania. A sual pawh ni lo hian a tawngkam a no lo bawk si. A chet theih loh hnu phei hi chuan a tawrhhlelhawm zuala. Rei i enkawl hi ka ring lo khawp a" a ti leh a. Fel mintih chhan ka hre thiam chiah.

Ka ngaihtuah naah Saitluanga a lo lang a. Hetiang deuh bawk hian a pi chungchang min hrilh kha ania. Tumah hian ka enkawl rei an lo ring lo chu anih hi maw.

"Um,atir lamah kha chuan tlemin a har ve alawm. Haw chuang lo la" Inthlahrung angreng deuh hian ka ti a..

"Huatna tur a awm hleinem. Ka pi khirh zia chu tlang hriat alawm" a ti awlsam et.

"A that lai chuan a khirh ve ang ka ring. Tunah pawh ala in uluk em mai. Ka kaltirh khan a tawngkam hi ka hre thiam lo thin a, min hau emaw ka ti zel a. Mahse a lo ni miah lo a. A rilru chhungril hi a lo tha tawp a" ka ti duah.

"A rilru chu a tha thlawt. A tawngkam bul deuh paltlang peih chu mi vannei annimai" Nui chungin a ti leh a.

"Hmanni chu ka nauin a sawi chhuak che a. An lo len laia i mizia a rawn hmuh khan ka pi nen inang a ti tlat che u a lo nia. Ka ngaihtuah hian keipawh inang ka ti ta riau che u a. Nangpawh hi i Boring hmel ang ai hian kawm i lo nuam a" Nui huk huk chungin a ti leh a. Ngei deuhin ka en a, "Ka boring hmel na pawh ka hre lo e a"  ka ti hlak.

"I Boring hmel alawm.. Mahse, I boring lo.. I fel bawk aniang ka pi bulah sawisel theih i ni lo. Pasal tha deuh zawnpui che a tum mek" a ti zui leh a.

"I ninawm e a' tihvak ngaihna hre loin ka ti ringawt.

"Pasal a zawnpui che chuan pathlawi un uluk tawk a zawnpui ngei ngei ang che" a ti leh a. A nui zui vak vaka, putar pui tawh,lerh deuh deuh an sawi hian ka ten em em zela. Chutianga Pathlawi un leh lerh deuh nena min sawi zawm zawng ringawt pawh chuan ka lo ten nghal ringawt.

Thildang kan sawi zawm leh hmain ei tur an rawn daha, kan ril a lo tam dun ngang aniang, kan ei nghal mawlh mawlh mai.

"I la ei belh duh em? ' ka plate nawrsawn mek min rawn en pahin a ti a.

"Aih,ka puar lutuk. .ka rilru a hmanhmawh deuh tawha, I nu in rei min lo ti tawh mai thei a" ka ti a.

"Teuh lo mai, ka nu leh ka pi te chu an inhau renga, an inngai lutuk" a ti liam puat. Eitur a order belh lehnghal zat.

"Ka lo han chho hmasa ang..An lo buai anga, rei min lo ti viau thei a" ka ti leh talh.

"Amak tet tet thin. Pawi lo, ka thil order hi kan pack tir ange" a ti ve ta hram.

Pi Room kan thlen-in a lo muhil a,"khawsik sang over lo a nei a. A awm hi a hnawk deuh riau bawka" a lo ti a. Nurse hnenah a sawi thu leh damdawi an rawn pe tih te a sawi zui leh mawlh mawlh.

"Bd, in tihfel thawkhat chuan haw la, Mama pawh hi haw law law se, keichu i ni te lo thlen hunah ka haw anga" a ti leh zung zung.

"Haw zawk la, an lo thlen huna haw pawh a pawi lo" ka ti a.

"Ngai lo, I chau tawh dawn lutuk.. I phone kha a eng zuk zuk mai" a tih zawm a. Ka phone ka bula ka dah chu ka en vata. Saitluanga'n min lo call a lo ni a. Hna a kal dawna min rawn hrilh bak kha kan la inbe leh miah lo.

Ka phone ka laa, room atangin ka chhuaka. Pi chungchang min rawn zawh ka ring tho nangin midang awm laia biak ka hreh thar ta tlat ..

"Hello... " ka ti a, ka tawng dan lah chu tleirawl inla no ka la ang phian zui.

"In la buai em? " a rawn ti dam thlup.

"Aih, hei test kan ti zo a. Result lam nghal chi ho kan lam nghal bawka" ka beisei aia zangkhai mah hian ka ti a.

"A that chu. Amah enge a an? "

"A muhil a, khawsik tlem leh awm hnawk deuh hian a awm a. Mahse, angaihtuahawm lo" ka ti vat.

"Um... I chau tawh em? " a rawn ti leh sup.

"Aih, chauhna tur pawh awm lo.. "

"Derthawng hmel hle si hian i strong reuh sia" a ti leh supa, hriatnuam tak hian a nui zui a. A tawngkama duatna ri chu hai rual a ni lo. Min hmu thei lo tih hre mah ila min ti lai nghal ngawih ngawih tho.

"Nutei a haw tawh mi? " amah bawkin  a rawn ti leh a.

"Aih, keimah zawk hi haw turin min tia. Saikima hnenah min tlah turin a ti a" ka ti a.

"Kima a lo kal ve maw? " Thluk nei lo fe hian a ti mar ut.

"Um, Pi Maduhi khan test ngai a awm ang a lo tia. Chu chu a rawn kal a" ka ti tha leh mai.

"Ok, a tha.. Chutia Nutei a awm theih dawn chuan ka ni te chu nghak duh lo mai rawh. Kima'n a thlah theih lai che khan haw la. Inah hahdam vang vang rawh" a rawn ti duah.

"Pi harh hun ka nghak dawn mawni ka tia. Mahse, a remchan lai hian haw pawh a pawi lo..."

"Yes... Nidangah chuan ka thlah hman tawh ang che. Vawiin chu meeting pawimawh a awm nual a.. Kima kha tlanchak lo turin ka lo ti ang. I thlen veleh min lo hrilh la" a rawn ti leh a.

"Chutia tih kher angai lo e a" ka ti nghauh.

"Eng chu? " Angaihna hre lo hmel deuh hian  rawn ti hu.

"Saikima mawle... Biak kher angai lo"

Ka sawi zawh rualin a nui huk mai.

"A nuihzatthlak loh ania" ka ti leh hmak.

"Sorry... Anih chuan ka be lo ang" Nuihza insum aw zet hian a rawn ti leh a. Engmah sawi tawh lo in ka off ta daih.  Over leh lutuk maia.. Eng nge Saikima hnenah khatiang mai mai sawi a tulna tur? An chhungkaw ho hian la hre lo se ka tih nak laia....

Pi harh hmaa haw ka hreh viau nangin a harh hun tur hriat a ni si lo a, hreh angreng takin ka hawsan a. Motor an rawn keng emaw ka tih laiin Bike zawk a lo keng chu niin. Thui pawh kan tlan hmain Saitluanga'n tlamuang turin ka lo hrilh ang a tih kha ka hrechhuak nghal der. Mi zawng zawng tlanpelh a tum emaw tihmai turin a tlan a, Jam karah pawh a inzep zung zung maia, ke a kal si loin ka hah tluan parh.

Nutei'n chanchin min lo zawt nghal a, "Thingpui in la, inbual rawh. Chawei hma chu i duh leh muhil la, tihtur em em a awm lo ang'a ti a. Thingpui min rawn siamsak nghal a. Thingpui in pahin Nutei archaw tur atana behlawi kuang no chan mek chu ka en a. Ani ang hi mi nu anni ve angem tih ka ngaihtuah a. A tawng bawrh bawrha, tihtur nei lo a awm thiam mang lo a ni bawka. Lawmi nen hian inchhung chet engkim min tihtir a, thiam loh kan neih a duh lo a. Buhthlei pawh kan nulat tak tak hmain kan thiam vek. Mahse, zing thingpui min siamsak a, hna kal a kan chhuak hi kan haw veleh thingpui kan duh leh duh loh min zawt a, min siamsak a. Eirawngbawl nise amah a awm anih chuan tel ve zel a duh a. Chawei tur mikhual nei ila kan ei vek hma chuan a ei ngai lo. Chawei thleng seng thlengin a lo tel ve a. Nula pahnih kan awm chung hian kan siamsa ei a thut mai mai a tum eih lo. Nu taima em em a ni chung hian a fate min duatna leh hmangaihna hi a nasa lutuka, kan hah hi a hlau ngawih ngawih ni hian ka hre thina. Nu tak bula seilian ni lo mah ila, Nutei leh Patea vang hian mi vannei ber zinga pakhat chu ka ni tho tho.

Ka thlen thu msg-in Saitluanga ka hrilh a, a rawn reply pawh nghak chuang loin ka inbualsana, ka inbual zawh veleh khumah ka lawna, ka muhil nghal chu a nimai.

Chawei dawnah Mama'n min rawn kaitho a. Ka la tho a thelh zui.

Zanah Nutei inkhawm turin a chhuaka, Patea kan inbul chiaha damlo kan turin a kal a. Mama roomah lehkha zir turin a lut a. Kei leh Lawmi sitting Roomah kan awm a. Tv kan on reng nangin phone kan khawih san ve ve.

"Vawiin chu naupang an harh zual nimaiin ka hria. Ka au chau zo, mut mai ka duh" a ti nang nang a.

"Mu la, keichu ka muhil thei pawhin ka ring lo" ka ti a. Saitluanga msg ka chhiar a, insum hman loin ka nui nghal hak mai.

"Eng nge a? I at hmel nasa aw" a ti hlak.

"Ka a deuh alawm' ka ti liam mai.

" Nizanah tu nen nge inriaha? " a ti leh a.

"Saitluanga... "

Ka sawi zawh rualin phur lutukin a khek nghal raih mai.

"Chuan eng nge thleng? "  a ti zui a.

"Eng nge thleng se i tih a? Tenawm viau suh" ka ti hmak..

"Awi, tenawm lam a ni lo. In mu mawl tawp tihna mi? " a la ti ta fo.

"I mak mang e. Hei leh chen ka nula tawha, mut mawl tawp hi a him ber ka tia. Ka mu mawl tawp mai"

"I ninawm... Eng emaw tal chu a thleng ang? " a ti leh talh.

"Um.. Thleng e... "

"Sawi vat ta che"  a ti ham ham mai.

Nizana Saitluanga nena kan inbiak dan tlangpui ka hrilha,ka sawi laklawh lai laiin "I yes nghal em? " a lo ti hmanhmawh. A zawhna chhang loin ka sawi zawm a, "Ka yes ta ngawt kha zingah ka ngaihtuah let a. Easy ka inti leh hnuhnawha, bakah Saitluanga min bem dan lah kha bem em em pawh ni in ka hre lo leh a. Ka inchhir leh deuh titih" ka ti a. A kut a beng thak...

"Engtia inngaihzawn tan nge i lo beisei a? Karkhat vel zantin in inbe tawha, a care zia che pawh alang vek a" Uar zetin a ti tawk tawk.

"Ka hre thiam chiah bik lo... Mahse, a ho riau hian ka hria"

"Huiham... Kum khat vel thian anga Inkawm hnu a midang thik vel hnu a inngaihzawn kher i beisei tihna mi? Nge midangin Saitluanga'n a star che tih an hrilh kher che i phut? " a ti leh chiam... Chhang loin ka ngawi vang vanga, a sawi dik tho mai.. Engtia han inngaihzawn tan nge maw ka lo beisei ni?

"Mipa puitling, mahni duhzawng sawi tlang pawp ngam tawh a ni tihna ania. A pehhel de de lo kha ka duh chi tak" amah bawkin a ti leh a. Awlsam riaua ka lo inngai kha ka zia ta deuh hawk.

Ka mut hnu lawkah Saitluanga'n min rawn call a, dam thlup a min biakna chu rilru nuam zetin ka ngaithlaa. Ka muthilh lai pawh ka hre lo..

Zing ka harh veleh phone ka en nghala, nizana min mangtha na msg leh tukin a min rawn wishna a lo awm kalh.. Nui chungin a msg ka chhiar nawn a.. "Morning, Bibi.. I hnar nasa si" Ka nui chhuak nghal hak mai.

Dar 8 pelh hretah damdawiin ka thleng a. Ka rin loh takin Pi Maduhi te nupa an lo awm a. Nu Saipuii te nufa an lo haw tawh thung. Zan lam an mu thei em tih ka zawt a, an mut theih thu leh khawsik a awm leh a, damdawiin a chhawk hnuah a muhil a, muthilhna ala rei lo an ti a. Pi muhil hmel chu ka en a, na nei hmel pawh a pu lo a. Mahse, ni hnih zen zawn chu khum a thawhsan ta lo chu ania.

"Kuhva ka keng emaw ka tia. Ka keng lo anih hi, ka zuk lei lawk teh ang" Saihminga'n a ti a. A chhuak zui nghal chu animai. Pi Maduhi nen kan han awm ta chu achhan ka hriat si loh hian ka thlamuang lo ru nghal teuh a, eng emaw hriat nuam lo hre tur angah ka inngai deuh tlat bawk.

"Vawiin chu ka pi hi test eng eng emaw neihpui ngai a awm hmel a. Amah hi khawih chet vel a huphurhawm deuha, kan nupa-in kan lo kal leh ang" Tha takin a ti a. Tawng loin ka bu ringawt.

"Engmah tithei tawh lo mah se damdawiin a awm ngai em anih loh kha chuan a zia a. Palai tirh tuma intintuah lai a lo ni nen, damdawiin han luh leh chu a buaithlak tak tak a ni" a ti leh a.

"Palai maw... ? " ka ti ha mai.

"Um, u Mama hi nupui neih a duh tawha, inneih har lutuk chu buaina atam atia" a ti leh a. Ka hresual emaw tiin ka en a. A hmel thutak zetah chuan fiamthu a sawi lo tih alang chiang lutuk..

Mahse, eng nge a awmzia ni ang? Kei min nei turin palai a rawn tir dawn lo tih ka hria. Achhan pawh nizan hmasa lawkah chhanna ka pe a. Innei tura inbuatsaih chi kan ni lo. Anih chuan Mk-i.....

Note : Hmeltha ho, naktuk atangin office kan sawn turah kan insingsa tan dawna. Ka dah ang ka ti ngam lo tlat mai, hmelthat reng duh lai hian hmelthat reng hi a lo har khawp a🤣 ka rawn dah thei ta anih leh kan inthawng deuh thut thut dawn tihna animai. 

Chuan, click kha phal zel a ni aw☺

Tin, "Pasal nei tawh rawh" Min ti ringawt thin te hian, nula Senior han nih hian min tur ut ut thei emaw an ti aniang😝😜 min tur lo, nuam kan ti aw🥱