Bibi -17

Chapter - 17

"Naupang anni tawh lo a,bakah inzui rei lutuk hi awmzia vak a awm lo. Anni pahnih phei hi chu nghah lehchuan tur nei lo an ni a" Ka ngaihtuahna hria niawm takin a ti leh a. A hmel hlim zet chu ka en zawka, mi innei tur ni loin,ama pasal neih tur sawi ang mai a ni. 

"Kan pa chu a va rawn let har ve mawle" a ti leh a. Ka hrawk ro vek chu tihreh tumin tui ka in a, mahse ka in lai reng pawn a ro tho. Pi Maduhi titi mawlh mawlh chu ka ngaithlaa, min biakna pawh tha takin ka chhang veka, mahse ka rilru erawh hmundangah a awm daih a. Saitluanga biak ka duh tut tut. Thil engpawh hi hriatchian phawt hnu a ngaihdan siam ka duh thin a. Tunah pawh hian ka hrechiang anga, nupui neih a lo tum tak tak anih chuan sawi leh tur awmloin a tawp tihna animai. 

Saihminga a rawn let a, kuhva a rawn thial lut nuau nuau a, engtiklai pawh hian a ei emaw tihmai tur a ni. "In ei duh em? Bd, kuhva i ei ngai em kha(h) ? " Min rawn ti a. Nikhatah pakhat pawh ei loh ni nei fo khawpa ei tam lo ka ni a. Mahse, tunah tak hi chuan ka tawt lutuk tihreh nan kuhva rah thial pawp pawp ila a zia ang. 

"Ka lo ei ang.. " ka ti a. A rawn thehphei nghal a, ka lachhuaka. Ka seh sawm rang ngang mai. 

"Kal phawt ila, chaw ei khamah kal lehnghal kan ngai dawn sia" Pi Maduhi'n a ti a. 

An kal hnu lawkah Nu Sangberi a lo kal a, niminah a rawn awm nileng tawh sia, a lo kal leh ka beisei tawh lo. " Naktukah ka zin dawn a, vawiin chu la rawn awm leh law law ang ka tia. Ka zin rei dawn angreng sia " a rawn ti nghal bawrh bawrh. 

Pi a rawn harh a, nu Sangberi nen kan tho rual thawt. 

"Min kam kang teh u, Bd.. Ka hmai hi min han tihfai sak teh" a ti a. Khum ka herhsang tur chu Nu Sangberi'n " Ka lo ti ang. A hmai phihna tur lo siam zawk rawh. Ka nu, I ril a tam em? Mampuii'n i arsa duhdan khan a siamsak che a, ka rawn ken che ania" a ti leh zung zung. 

"Ka hmai hi tifai phawt se ka lo ei ang e" a ti a. Damdawiin kan luh hnu hian a langah na em em nei lo mah se a tawngkam chhuak atang hian a nuam lo tih hai rual a ni chuang lo. 

A hmai ka tihfai saka, Nu Sangberi'n a eitur a lo buaipui thung a. A hranpaa na nei em em lo anih lai kha chuan a hmai tihfai lai te hian a titi a, achang leh min sawisel thin a. Mahse, tunah chuan ngawi rengin a dawh hle hle ringawt. 

"Dahsawn tawh teh, ka ei peih tawh lo" tlem a ei hman tihin a ti a. 

"Awi, i va ei tam lo tak. Chhete ei belh leh la" a ti a. 

"Ka duh tawh lo.. Bd, damdawi min lo laksak teh, ka khua a sik nge ka hre lo. Vawt ka ti ur ur mai" a ti leh a.  Damdawi pe mai loin a khawsik leh sik loh ka en hmasaa, a lo sik tak taka. A sang viau bawk. 

Keima thu a damdawi pek mai ai chuan tiin Nurse ka va ko a. Min rawn zui nghal vat a, a check zung zung a. "Hei hi lo pe la. A chhawk nghal maiin ka ring. A hriltlang hi damdawi in pe tiraw? sugar in check em?  a ti nghal zung zung a. Kan pek thu ka hrilh a, " A zia mai ang.Harsatna inneih chuan min lo ko mai dawn nia" a ti leh a. A la naupan hmel tehreng nen a fel ngang mai. 

Damdawi a ei hnu lawkah a chhawk a, mahse a khuh ngun ta viau. A hrawk a hnawk em em a, a muhil deuh reng mai bawka. A awmdan chuan ka rilru a tinuam thei lo. 

Pi Maduhi te nupa lo thlen hnu atangin a zia ta deuh a. A mah a nawm deuh lai chuhin kan tihtur ang ang kan ti zung zung a. Ani leh ni lo ang takin a phunchiar lo em em a, zawhna pawh a zawt peih meuh lo. Tlai dar 3 velah ICU ah kan indah lut ta nge nge a. Ka phili buai deuh bawk nen Saitluanga lo thlen lai pawh ka lo hre lo a. Cabin ka va luhin nu Saipuii nen an lo inbe meka. Pi vangin rilru mumal ka pu lo viau a, mahse Saitluanga ka hmuh rualin a nupui neih tur kha ka hrechhuak nghal tho. 

"Bd, zanin riak turin i inring tiraw? " Nu Saipuii'n min lo ti nghal a. 

"Aw, inring e" ka ti a. Saitluanga'n min en reng tih ka hre ru  kar. 

"Ka nu ICU-ah a awm leh ta sia, zanin chu kei leh Mama kan lo riak leh zawk mai ang. Keihi ka tlin chin chinah chuan riah ka duh a, in a ka awm pawhin ka muhil thei tak tak lo a. Hetah hian awm law law ila ka hahdam ang" a ti leh mawlh mawlh. Fanu mal a ni a, a rilru tur ka hre thiam. 

"Mama, min thlah kual hman em? Chaw ka ei anga, riak turin ka rawn inring nghal anga" a ti leh a. 

"Driver a awm a. Tea te nupa kha haw se ka duh bawka, hetah ka lo la awm anga. I rawn thlen hunah ka haw veleh zawk anga' Saitluanga'n a ti ve thung.

" A rem dan dan kha animai. Bd, inveng kan tlan tlang dawn tho sia. Lo haw ve nghal a rem ang chu" a ti leha. Sana ka en a, dar 5 a pel hret a. ICU-ah Pi ber a awm tawh sia, haw hman lohna pawh ka nei lem lo. 

"Bdi chu la awm rawhse. Nakinah Driver in a va dah mai ang" Ka chhan hmain Saitluanga'n min lo tawngkhalh leh a. A nupui neih tur chungchang kha ka zawh duh tlat avangin a rawtna chu pawi tihna ka nei lem lo. 

"A pawi chuang lo. Ka hmanhmawh chuang lo a" tha tak in ka ti ve mai. 

"Anih chuan Mama nen in lo awm anga. Midang pawh hi tih tur a awm em em chuang lo a, haw hlawm se" a ti leh zung zunga. An tan chuan hnathawktu mai ka ni a, Saitluanga nena kan pahnih chauha kan awm tur pawh ngaimawh thamah an ngai lo anih hmel. 

Haw tur ang ang an kal fel a, a reh ta duak. Saitluanga'n a chhungte ho haw tur a thlaha, keimah chauhin ka awm ta ran mai. Cabin zau lemlo tak chu ka thlir kuala, ICU kan dah lut tih an hriat rual khan an rawn lang nghal tuam tuama, room zim teah hian kan inhnawhkhawm a. Tihfai vek sen ni hek lo, an thil eina leh in na, dispo cup ruak a let rum maia. Chhuat kil lamah nihawi chi khehna kawr a baw nuai bawk. 

Carbage bagah bawlhhlawh ka khungkhawma, ka theih ang angin ka tifai a. Ka tifai zo chiah tihin Saitluanga a rawn lut a, tul lo zetin ka insangmar nghal teuh mai. 

"An va che hnawk hman ve" A ti dam thlup. 

"Nia.. " ka ti ringawt. 

"Ka lo thlen tirh atang khan min hel deuh ngar ngar maia. Misual deuh te pawh ka ang alawm le" a ti leh a, a nui zui hawk a.

"I lo thlen lai pawh ka hre hleinem.. " ka ti nghat. Ka tum loh tawpin ka aw-ah chuan titau ka la ang hrep zui. 

Ka kut sil tumin bathroom ka pan a, tui ka herhhaw zo ka hawichhuak chu ka hnungah a lo dinga. Bathroom zim nen, ka dindanin a zir bawk si lo. Kan inhnaih lutuk a, kan insi lo chauh a ni ber. 

"Eng nge? " ka ti ringawt. 

"Sawi la... Ka lo ngaithla ang" ati dam thlup. A kekawr ipte zenin a dinga, a awmdanah chuan ka sawitur nghak mek hi a ang a. A hmelah erawh chuan angaihtuahnaah eng nge awm a hriat theih loh. A Collar T-shirt, va thianghlim zet chuan a tilang hang zual  deuh bawk nen, a landan a ngeng ngulh mai hian ka hria. 

"Eng maw ka sawi ang? " ka ti nghat. Ka hawilet a, ka kut ka silzui nghal daih. Nichin kha chuan hun a awm veleh ka zawt nghal ang ka tia, mahse hun remchang a awm meuh chuan sawi mai aiin ka titau deuh ta tlat zawk. 

"I lawm lohna kha mawle.. Sawi la, I thawl hawk mai ang" a ti leh a. 

"Chutiang a awm lo.. " ka ti leh tlat. 

"Maduhi'n thil tul lo a sawi leh tihna mi? " a ti leh nghut a. Ka rin loh deuha Pi Maduhi a rawn sawi takah chuan ka kutsil lai ka chawl det. Mahse, engmah sawi lo in ka silzawm leh mai. 

"Engmah chutiang a awm lo. Ka lo kal ang, kalsawn la" ka ti a. Zam miah lo ang mai hian a mitah tak enin ka ding a, kan insanhleih ve deuh avangin ka dak deuh titih. 

"Tawngkam hriat nuam vak lo hman hi nuam a ti ve a. I lakah ngat phei chuan nuam  a ti zual tih ka hai lo ania" a ti mar ut a. A kalsawn zui a, tukverh bulah a ding a. Pawn lam a en nghal vung vung a. Ka kur ka hruk hul pahin ka ngaihtuah a, Pi Maduhi mizia a ngaipawimawh lo emaw ka tih kha a lo hai lo tih ka hre thei a. Anih chuan Angela-i a enkawl dan leh Pi laka a rilru put hmang hi a hai kher in ka ring ta miah lo. 

"Tukin khan nupui neih i tum hnai tih a sawi a" hreh ru zetin ka tichhuak ta hram. 

Muangchangin a rawn in her a, Pi khuma ka lo thu mar auh chu min rawn en a. Min chhan dan tur nghakin ka thaw a chham lo chauh thung. 

"A sawi dik anih chu... " a ti nghet churh. Inring hman lo in ka thaw hak a. Ka rilruah "a tawp" tih a ri nghal tluk tluk a. Hollywood star te zinga thleng tawk lek, inzawmna reilo lutuk ka chungah a thleng ta chu ania. Ni lo, anni ai mahin ka chunga thleng hi a rang zawk ang. 

Awmze nei lo zetin ka nuichhuak nghal hak mai. Ka nuihchhan erawh min zawt ta se sawitur ka hre miah lo ang tih ka hria. 

"Ka neih tur min zawt dawn na nge? ' a ti leh sup. Tawng loin a ka dar ka ti sang zauh ringawt. 

" Min zawt phawt la' a ti leh nghut.

"Zawh i ngai hleinem. Tupawh nangmah hre tu chuan kan hria ang chu" ka ti a. A zat vang nimiah loin ka nui sang thei tlat chu mak ka inti zawk. Ani erawh Tukverh nghengin a dinga, awihawm loh khawpin a hmel alang dam thlupa. Min chhaihkual vel dan lawmawm lo lutuk chuan amahah engmah effect a nei lo tih a chiang reng. 

"Awmze nei lo a thutlukna siam nghal ngawt chi i ni lo in ka hria" a ti leh a. 

"Nia, chuvang ania ka zawhfiah che" ka ti ve ta hmak. A duh chu min hrilh mai se, ka zah dan tur ngaihtuah lo leka min han chhaihkual belh chuan min ti lawm lo a ni tawp mai. 

"Ka pi hi damtha se, nupui neih ka duh thu hrilh ka tum sa a. Chu chu nizanah ka naute nupa ka hrilha, ka neih tur ka hrilh lo thung. Maduhi'n a lo hrilh tak che vang khan Mki neih ka tum tihna a ni reng reng lo. Ka pi hian a hma khan nangmah hi nei turin min lo ti tawha. Mahse,hmanlai hun leh thawnthu ang maia nangmah lam pawh rawn eih lo a neih ngawt  che ka tum loh thu ka pi ka hrilh a. Thil hi ka hrilh hma che hian a nih loh dan tur hian i lo hre fo dawn anih chuan ka duh lo hle ang"  a ti ta duah. A sawi dan teh duah chu amah nen a inhmeh lo lutuk. Bakah, a thil sawi chuan min thawng lutuka, sawi mai tur hre loin ka thu mar auh ringawt.  Aman min duh vang leh min lo ngainat ve vang pawh ni loin a pi vangin min lo bem mai mai tih ka hriatna chuan ka induhtawkna a ti che lawih mai bawka.

"Anih chuan min neih ilo tum ve ngawt tihna maw? " tih leh ngeiawm thei ang bera nuih ka ruala.Mahse, ka awmdan ngeiawm zet chu engahmah ngai hmel a pu tlat lo. 

"Rem i tih phawt chuan tum e" a ti nghut. 

"Ka duh lo.. " ka ti ve hmiah. 

"Ok, i duh loh chuan tihluih theihna che ka nei hleinem" 

"Pi vanga min lo bem hi ka lawm lo" tih leh nuih ka rual leha,ka chhungril na vung vung chu ka nui hmela hliah ka tum a ni ber. 

"Ka pi vang a ni lo. Ka duh ve reng che. Min hnar bik lo tih ka hriat khan ka pi damlai ngei a inneih rawtpui che ka lo tum hrim hrim a. A rang em a, Phone atanga sawi chi niin ka hre lo a. Hmaichhanah sawipui che ka duha, hun kan nei rih lo mai zawk a" a ti dam leh thlap. 

"Ka awih lo... " 

Ka tho a, kawngkhar lam ka pan nghala, mahse ka hawng chiah chu a rawn nem khar lehnghal pawpa, kawngkhar nghengin a ding zui nghal a. A hmelah chuan kalsawn tura tihchi a ni lo tih alang reng. 

"Eng nge titura min duh?" a ti sup. 

"Kalsawn turin ka duh che"

"Ka kalsawn chuan min ring ang tihna a ni em? " a ti ve thung. 

"Ring lo.. "

"Anih chuan Ka pi in nei tura min tih thu che kha ka hrilh lo thei reng che tih i hria em? Ka pi chungchang sawi tel lo khan ka sawifiah theih loh i ring tak tak em? " a ti leh a. 

"Min hmusit ka ti ve thlawt" ka ti ringawt. 

"Hmusit... Chutianga ilo ngai chu pawi ka ti. Hmusit tur che in eng nge ka nih a? " Thutak em em hian a ti leh a. 

"In hnuaia thawk, mi satliah... " 

Ka sawi laklawh laiin ka hmui a rawn khawiha. 

"Chutiang a midang hlutna teh thin te chu ka ngaina ngai lo. Minute khat pawh mahni nunna pawtsei thei lo ka ni a. Ka anpui mihring te hi ka tan chuan angkhat vek anni. Chutiang chiah chu ka pi hnen atanga zirtirna kan dawn thin a ni a. Kan chhungkaw zingah hniam taka lo en che an awm anih chuan pawi ka ti" a ti duah. 

A thusawi chu ka ngaihtuah a, dawt a sawi lo, an hnena ka thawhhlim atanga tun thleng hian Saitluanga te unau hian kei, Na-i, Santi, An Driver... Kan vai hian hmusit leh ngainep zawnga min tih ka la hre ngai lo. Hrawn hrehawm ber zawk chu Pi Maduhi a ni zar zar a. Min hau dawt si lo a min khei fek fek tu pawh amah zel ala ni. 

Ka kawngah a rawn kuaha, amah si chetin min pawtbet a.. Ka lungawi hma lutuk angem tih ka ngaihtuah a, mahse engtia han awm tur nge ka hre lo a. Mipa rintlak ni a ka hriatin hetiang khawpa insawifiahna min pek hnuah hian chance pek chu a phu ka ti ve tho bawk. 

Kan awm mekna hi hmun fianrial satliah ni loin Damdawiin a Cabin pakhat a ni tih ka ngaihtuah thut a. Ka tal nghal laih a, mahse min thlah duh lo. 

"Mi an lo kal ange" ka ti hap.

"Lo kal pawh nise kawngkhar an rawn kik mai ang" a ti leh hmiah. 

Ka tawng leh hmain ka khabeah a rawn vuana, ka en chho a. 

"Mipa tha ber ka ni thei lo ang tih ka hria. Mahse, min nei anih phawt chuan ka theih tawpin ka venghim ang che. Tuna inneih i duh lo a, ala hma iti anih pawhin ka nghak thei che. Mahse, ka kum a tlem tawh lo tih erawh min hriatsak la... " 

A rawn kun hniama, a hmui lum ham hamin ka hmui a rawn si a, a rawn nawr kau zui a.. 

Note : In fel sia, han fel loh deuh tum pawh hian fel loh hi ka zak deuh tlat tawha😄 hna lamah kan buai ve deuh bawk nen, hunawl hmuh chhun chhunah ka type paha, hei reilote chhiar daih chu a lo tling ve leh hram e. 

Zanin chu an inngaizawng ta vel tawpa. Tlema han ri deuh thak tur khan keimah lam hi ka ri thak hman ngang lo a, an inhau buai vel ta lo mai🤣🤣🤣