Bibi - 5

Chapter - 5

"Hey, hahdam teh. Thil harsa deuh pawh i tuar dam mai thin kha" Lawmi'n min ti a. Ka thut ngaiin ka thu a, a thusawi chu hre reng mah ila ka ngaihven lo. Thil tamtak ka tawng a, nuhrawn tih duhdahna hnuaia kun thin, nun nuamsa lo ka ni. Mahse, vawiin a Pi Maduhi'n hnuaichhiah tak a min tawngkhum ang kha chuan ka puitlin hnuah hian tuman min ti ngai lo. 

"A hrim hrimin eng nge chutianga a tih ngawt che a? Dawrah pawh chuan eng nge an lo ngei ve ngawt che? " thinrim fein a ti leh a. 

"Ka hre lo. Ka tihsual ka hriat loh vangin anih hi ka thinrim" ka ti hmak. 

Damdawi ka lo va la kha a duh lo anih chuan tha takin min hrilh se ka pawm vek. Tihdan bik an neih vang pawh a ni theia. Mahse, an dawrah khan kan titi em em hran lova, ngeiawm taka khawsa leh kal tawh lo tura min duh hial chhan phei chu ka hre lo lehzuala. Min lo dawngsawngtu kha hmuh leh a va zawhfiah mai ka chak hial. Mahse, ka ti ta em lo. Bakah, an vai mai khan an tum deuh bur vek mai khan ka hriaa. A bikin Pi Maduhi mood a chhe zual a, Angela-i chaw ei muang deuh pawh kha a fianin a hnarah a khawn sak a. Angela-i tap ngam si lo kha ka lo khawngaiha, ka thinrimna pawh ka theinghilh titih a. Saitluanga te unau lah kha an lo haw tirh a room lama an lut kha an lo chhuak leh tawh hek lo. 

"Kei chu Maduhi hi ka ei lo" a ti leh hmak. 

"Ve ngawt a che. Hmuh pawh ila hmu lo a" Nui chungin ka ti a. 

"Hmuh angai hleinem. Nidangah ila rel ngai miah lo a. Mahse, vawiin a awmdan atang leh a fanu a enkawl khawng zia i sawi tawh atang khan ka ei lo bur" a ti leh hmawk hmawka. Chhang loin ka ngaihtuahna ka kawm a. A tir lam khan Angela-i kha a hrem nasa thei lutuk ka tia. Ka lainat ru thina, a nu tak anih loh vang aniang te ka ti hiala. Mahse, tun hnuah erawh a enkawl dan a khawng em a, thil a zirtir nasa bawk nen a enkawl tha ka ti leh ta viau lawia. Mahse, thla ka kal tling dawn tawh chung hian Angela-i hi biaka han chhawnchhaihna chance ka la hmu miah lo. School a lo ban veleh Santi-in a bual a, ei tur a pek hnuah roomah lehkha an inzirtir lehnghal a. Pawn lama han hawi khawthawn tir vel pawh Pi Maduhi hian tul a ti lo a. An awm tir mai mai ngai lo. 

"Thla a tawp dawn tho a. Bang leh mai rawh. Hna dang a tam em mai" a ti leh a. 

"Inremna kan nei tih kha theihnghilh lo ta la" ka ti nghauh. 

"Ni bawk si. Mahse, ngeiawm deuha a tih leh che chuan chhang let tawh ang che" a ti leh hram. Kan naupanlai atanga rualpui zinga huaiber thin a ni bawka. Tunah pawh hian a thin tertek hi a la sim tak tak thei lo. Bakah, keichu nu leh pa kar lo ka nihnaah hian lang si loin ka inkiltawih ru tlat a, chhungkaw pangngai a seilian te ai hian midang lakah pawh ka inphahhnuai thei zawk a. Midang hi ti let ve bawng bawng thei niin ka inhre thin lo. 

Gate ka luh rualin Angela-i school kal tur an rawn chhuahpui ve chiaha. "I lo thleng thei maw? " Pi Maduhi'n min lo ti a. A hmel leh awki zawng zawng nen chuan nimin a ngeiawm em em kha amah a ni ta lo emaw tih mai tur a ni. 

"Um, tukin chu kawng a thawl angreng a" nidang aia ka thlen hma deuh vangin ka ti a. 

"A tihzia hlauh chu. Keini kan zin chau deuh nen thawh kan hai a. Motor a tam phei chuan kan tlai mai ka ring a" a ti leh a. A school kalna hi Aizawlah chuan school lar ber pawl niin, fee a to em em bawka, an in atang hian a hla lehzel a. Naupang school lut tir kal nan chuan a hla mah mahin ka lo hre ve tawp. 

Inchhungah ka lut a, choka lama Na-i che vel thawm bak thawm dang a awm lo. Pi roomah ka lut tlang nghala, a lo la harh lo ve khiah. A damdawi ei a la hun lo deuh bawka tihharh hlau takin ka chhuak leh tham tham a. Kawngkhar dimtein ka khar a, mahse ka hnung lam atanga min ko ri chuan min ti phu nasa ngang mai. 

Ka hawi let a, ka hnungah Saitluanga a lo ding reng chu niin. Ka thawm dim lutuk kal vel kha ka chhe ngawt ang tih ka ngaihtuah zauh pek. 

"Aw... " a langah erawh ka ti ringawt. 

"A la muhil em ni? ' tha tak chuan a ti ve mai bawk a. 

" Um, a damdawi ei hun a la hla deuha. La mu se ka tia"

"A that chu.. " a ti tawi tuk.

"Hna i zawm nghal dawn maw ka lo tia" ka ti leh a. 

"Karthar atang law law-in" a ti leh a. A mood fuh leh fuh loh ka hre chuang lo nangin a tawngkam a tawi fel tek tawk em a, biak vak a duh lo anih ka ring ve tawp. 

Pi Maduhi a rawn lut  ve a. Kan ding dun chu min rawn pan phei a. "Bd, nichin khan ka hrilh hman lo che a. Vawiin hi ka pi piancham ania. Tlai lamah chhungkaw chaw ei khawm neih kan tum a. Engmah ei siam vel tih angai chuang lo nangin i awm khawtlai ve deuh thei angem? " a rawn ti nghal mawlh mawlh. 

"Theih lohna tur pawh ka hre lo" ka ti vat. 

"Anih chuan a that hlauh chu. Kan chhungkaw ho deuh hlir kan ni dawna. Tam pawh kan tam lutuk lo ang. Chim buai lutuk hi tha ka ti lo a, bakah Ka pi hi hmun danga han hruaichhuah chi a ni bawk si lo a. Inah hian timai ila kan tia" a ti leh a. Ka bu nghat tho nangin a tawngdan zangkhai lutuk leh a hlim hmelah chuan ka pi piancham ni loin ama piancham zawk lawm tur an ang tih ka lo ngaihtuah daih thung.

Chokaah kan inzui phei a. Saitluanga erawh dinning roomah a lut tlang a. Kal pahin Saihminga thil lo ei mawlh mawlh ka va hmu a. Nidangah chuan zing karah Gym a kal a, dawrah a kal tlang nghal deuh ziaha. Tukin chu thawh a hai  ve a ni ngei ang. Mak deuh hian Pi Maduhi hi "Pi" Tiin ka ngaihtuah tel zel a. Ka koh pawhin "u " mai loin ka Pi a. Saitluanga hian "min u rawh" a ti a, mahse ka mawl biak tawp zela. Saihminga phei chu " u " emaw "Pu" emaw tumna ka nei ngai miah lo! Ka riluah hian Saitluanga leh Saihminga anni deuh tlawng. 

"Na-i, u Mama ei tur lo va chhawpsak rawh aw. Keipawh ka rawn ei ve nghal ang" a ti nghal zung zung a. Dinning room lamah a phei  ve nghala, ngawirengin Na-i chawei siam ka tihpui a. A eitur chhawpchhuah sa ho Dinning roomah ka va chhawp phei veleh chhawng a. Vawiin tlai lam an hun hman dan tur Pi Maduhi'n a lo sawi a. Mipa pahnih erawh chuan ngawirengin an thil ei lai an ei mawlh mawlh thung.

Pi ei tur ka pek laiin Saitluanga a rawn lut a, piin a hmuh veleh a hmel a hlim nghal sarh mai. Tiang em em hian Saihminga hi a ngaihtuah ve pawhin ka hre lo. Saitluanga hi chu a duat zia hi chu hai theih a ni hlawl lo. 

"Pi, vawiin i piancham ania. I theihnghilh em? " a chaweina bula thut thlak pahin a ti a. Pi-in a en hau mai. 

"I theihnghilh ka ring reng a ni. Maduhi'n tlai chawei turin Patea te leh ka ni te chhungkua a sawm a" a ti leh a. Pi hmel han dur deuh khap chu a rei lo viau nangin ka hmu hman tho. 

"Birthday lawm rual pawh ka ni tawh hleinem mawle a" a ti bung  nghat. 

"Ah, I lawm rual leh tan mek zawk alawm. Nikumah kan lawm tawh bawk si lo a. Nalh tawkin Bdi hian a chei che anga" a ti leh a. Nui chungin min rawn en a, a har var rual that mai chu a nuih zawngin a lang a, a nui ngai lo ni loin a nui hmel ka hmu khat angrenga. Chutia muk run lo a a nui hmel chuan a landan a tidanglam nghal vekin ka hria. 

"Inchei ka duh mai mai lo e a" Piin a ti hmaka, Saitluanga ka en a, a nuih a za ngang mai. Keipawh ka insum thei bik lo. Naupang titau a ang em atin ni. 

Kan pahniha kan nuih tak hawk hawkah chuan "Eng nge maw in han nuih zat le? Mi bawl te hi intum khanglang em ni? " a ti chhar chhar a. A tar a tar hian a tawgkam a nuihzatthlak thei bawk si, ka nuih a za zual sauh mai. 

"Bawl chi i ni nang mawle. Nang te chu i fing em mai" Saitluanga'n nui huk huk chungin a ti leh a. Engtin tin emaw a thlem kual hnuah pi pawh a thinrim ta bik lo a. Kei erawh ka nuihza ka insum hleithei lo. 

Saikima a rawn lut hlawl a. Ani hi Saitluanga Pa chhang chiah fapa a ni a. Kan inrual vel viau ka ringa. Ka ringsual anih pawhin kum hnih khat bak a ni lo ang. A cousin dangte ang tho a Pa lian a ni a. Pian nalh lam buaipui tak a ni lehzel a, alang nalh thlup zel. Aizawl chhim lam kawngpui anah Cycle zawrhna changtlung tak a nei a. Amah hi nelawm leh tu pawh be vel peih tak, an mize mil tawka kawm thei vek ang chi kha a ni a, sumdawng mi nih pawh a inhmeh viau. Kei nen pawh hian vawi 3 chauh kan la inhmu nangin Saitluanga ai chuan ka nel ru zawk mah. Pi pawh hian a tu te zingah Saitluanga tih lohah chuan a sawi tam ber. 

"Tlaiah ka lo kal hman lo maithei a" Saikima'n Pi hnenah a ti a. 

"Eng nge tih tur i neih a? I inti sek leh dawn em ni? " 

A sawi zawh rualin Saitluanga a nui nghal hawk mai. 

"Inti sek dawn nang. Kalna tur ka nei a. Mahse, lo kal hram chu ka tum ang. Eng nge i duh rawn zawh che ka tum a" tha takin a ti a. Piin engmah a duh loh thu leh kal ngei turin a ti zui a. A thil eina vel tifai turin ka chhuahsan a. Ka chhuah laiin Saitluanga leh Saikima'n a pi an chhaih fiama, ka nui chhuak var var mai. 

Dar 3 velah an rawn thleng khawm tan a. Pi ka tihfai bakah inchhung tihfel vel ka pui a. Pi Maduhi hna a kal lo bawk a. Kan ri chel chul maia, tihtur a sem zung zung a, a mood a tha bawk nen Na-i pawh nidang ang lo tak in a hlim ve a. Nidangah hi chuan Pi Maduhi a awm chuan tihsual neih hlau reng reng hian a awm thin a ni ber. Vawiin lam erawh kan vaiin kan nui bawk bawk a. Mahse, nimin tlaia min tihdan kha ka hre chhuak nawn zing viau tho mai. 

Choka a kan awm laiin Sitting room lamah thawm a awm laih a, Darthlalang chhah zet indai danna atana an hman atangin ka va en a, hmeichhe pakhat, Jeans kekawr pawl dal lam,thawl deuh hnak leh blazer ha ka va hmu a. Pi Maduhi nen an inbe mek a. An bulah Saitluanga a ding ve bawk. 

"U Mama bialnu anih saw" ka beng bulah Na-in a rawn ti sa sa a. Mit khap lek loin ka en a, nu lian lam, pian nalh leh vun nung sar mai niin Saitluanga nen an ding dun chu an inhmeh lutuka, a bu ang thlap anni. 

"A chhe lo tawp" ka ti chhuak halh mai. 

"Dik chiah. A inchei nalh thei bawk si" Ngaisang tih hriat takin Na-i'n a ti leh a. Ka dem lo, ka tleirawl lai nise amah anga nalh nih ka chak ve dawn tih ka chiang bal. 

Midang an lo thlen belh zel a. Dar 4:30 hunserh a ni a. Hunserh hman hmain Saikima pawh a rawn thleng veleh hlawl a. Nimin a damdawi dawra ka hmuh nen khan an rawn  kal ruala, pi bula ka lo ding chu min rawn hmu a, min rawn nuih a. Min hriat duh pawh ka rin loh laia a awmdan vel chu Pi Maduhi hnena min lo rel ngawt dan nen khan inhmeh lo tak a ni. 

Hunserh a zo a, Pi chawei hmaa jection angaih thin avangin a room lamah kan innawr lut a, Saikima'n min rawn zui lut ve vut.

"Khawi ka lo keng ang" Tih pahin damdawi dahna bawm ka ken lai min laksak a. Pi ka chiu chu hnai teah a rawn bih ve a. 

"A va hmuhnawm awm ve" Saitluanga'n a rawn ti thut a. Ka hawichhuak tur chuan Saikima la ding mar si lo chu ka chalin a khabeah ka han tauh chawrh a. Ka te thawt a, ani pawh a 'awiah" ve thawt tho.

"Awi, Sorry " Ka ti a. Inthiam lo em emin ka en a. A khabe a tuai vut vut a, ka inrin hmain ka chal a rawn tuai a. 

"A na em? " a ti a. Ka lu ka thing vat. 

"Pi, ka lo nawrchhuak dawn che mi? Mki'n thil pek che a duh a" Saitluanga'n a ti a. A awm ve tih ka hre leh chiah. 

Ka che chhe lutuk kha ka zak a, tim daiin Saitluanga ka en a. " Ka lo nawr chhuak mai dawn mi? " ka ti a. Mitmeng nelawm lo zet hian min en a. 

"Angai lo ang. Tea nen khan tih dun tur in la neih ka ring" a ti fan ruih. Hmmmm, Eng chu nge maw kan tih dun ang ni? 

PS : Thla thar hlim leh thla tawp lam hi hnaah hian kan buai zual lai a ni ve thin a. Vawiin pawh ka rilru ka pe hleithei lo a. A ngaihnawm lo viau in ka ring😄 a kual a kual mai a ni🤣