Bibi - 8

Chapter - 8

Ka phone a rawn ri leh a. Ka lo inngaihtuah muk bawk si nen ka phu nasa ngang mai. Ka phone ka lakanga, min rawn call tu ka en a. Number ka save loh a lo ni a. Ka mood leh mi biak vel a inhmeh loh em avangin pick loh mai ka duh a. Thilmak hmu niawm takin ka phone ka melh reng ringawt.

A tawp a, phone khumah ka dahthla a. Ka dah thlak rual deuhthawin msg a rawn lut ve nghal a. Thil pawimawh a awm takin tiin ka la kang a. Notification atangin ka en a. "Hello" tih zawng..Open pawh Open loin ka phone ka dah lehnghal a. Ka rilruah Angela-i bak a leng mawlh lo "Kut a tuar" tih ri kha ka bengah a ri nawn tluk tluk a. Eng nge a chungah thleng ang? A nu in nge a pain kutthlak ang? Phone a tihchhiat vang khan an hrem em ni ang? Mahse, naupang mai ala ni a. Hau se,ti tawh lo turin hrilh mai se a tawk reng a. Damdawiinah kan kal atia. Na-i khan damdawiin lam reng reng a sawi lo. Mahse, thil a ngaihtuah vak loh vangin a hre lo ve thei tho. Chu pawhnise ti nge dawt an sawi kher? Saitluanga pawhin a fanu taksaa duk awm a hmu lo em ni? A hmu anih chuan hmangaih lo pawh nise naupang taksaah duk a awm vang hrim hrimin a zawt fiah tur a ni dawn lawm ni? Zawhna hlir zawhna hlir.... Chhanna awm sa, mahse chhangtu tur awm si lo. Ka hriat chhuah angai ang..

Che lo in ka mu mar at a. Eng emaw tal ngaihtuah chhuah ka tum a. Angtei tal kal zawm se tha tur tih ka ngaihtuah a. Ka ngaihtuah naah thil lo lang a awm. Ka thaw hawk mai. Engvangin nge Angtei kha kal zui tura a duh loh? ka thiannu a ni tih a hriat tak vang a ni ngei ang. Ka tho nghal hluai ringawt. Min ban a duh a, inremna lehkha vangin min ban thei lo tih a pasalin a hrilh pawhin tihdan a awm ang a la ti a. Ka hriat miah loh hian kei hi ka lo hnawk tan der anih hmel....

"Eng nge maw i hriat a i thawh hma leh tak le?! " Mak ti deuhin Nutei'n a rawn ti a.

"Tho hma turin min duh viau emaw tia" ka ti nghat thung.

"Duh e duh e. Mahse kum hei leh chen tho hma turin ka duh che u a. In tho hma ngai chuang hleinem" a ti leh chiam. Ka chawhmeh siam ho a en lawr a..
"Bal baiah Soda telh thin suh ka tih che kha. A hnang thluak thluaka, a tenawm" a ti leh hmawk hmawka.

"Telh loh pawhin a hnang thluak tho alawm" ka ti ve tlat.

"A inang lo lutuk. Khanghu buhchiar te, bal baiah te,sangha ek baiah te soda telh miah suh. I telh chak  ngang anih pawhin tin ther tiat chauh telh tur. A tui thei lo, khanghu phei chu a kha fuk mai ang ka tih fo kha" a ti leh duaha. Bai anih hi chuan Soda tel tura ka ngaih tlat thin avang hian keilah hian tlem tal ka telh talh thin a. A hrehrang nasa mai si. Min hau leh nge nge zel.

"A thunawn chu lawmin a khat tih zawng zawng hi i nei zo a. Thingpui i in dawn leh in la, kal vat teh ang" Patea'n a lo ti a.

"A thunawn lam a ni lo. Zirtir an ngai anih hi. Tun ang kumah pawh engmah hre thei lo chu mi mo annih hunah nu leh pa min ti mualpho tam mai mai dawn asin" a ti leh bawrh bawrh a. Ka bai chawhna fian a laa, tlem a hawp chhin a. Ka rin ang ngeiin a tui a ti lo.

"Awww, sawi teuh lo teh. Thil thiam lo tihte chu i sawi nen khan a inang lo em mai. Eirawngbawl an thiam lo pawh anih loh kha.An siam dan kha tui i tih loh vang mai mai alawm. Mo annih hunah te chuan an pasalte chhungkaw siam dan an zawm ve zawk ang chu. Ei siam reng reng hi tui ber leh tihdan dik a awm ngai lo. Kan ei than dan hi a tui kan ti ber theuh ania" Patea'n a ti leh charh charh a. Pa tawngduh tak a ni lo nangin Nutei hi hetiang hian dik deuh si, sawisel nisi lo hian a fuih lai ka hre fo thin a. A sawi dik ka ti thei em em bawk.

Pi te-in pana ka kal laiin Angela-i tan eng nge ka tih ang tih ka ngaihtuah kawng tluan a. Engmah ngaihtuah chhuah ka la nei chuang lo fo. Nizanah tlaivar dawnin ka ngaihtuah tawha, Angtei nen pawh msg in rei tak kan sawi dun leh a. Kan bangbo dun em em mai si. Police hnenah han report ngawt dawn ila a dik theiin kan hre bawk si lo. Tunah phei chuan a dam leh tawh a. A taksaah pawh engmah lang a awm tawh dawn lo a. Police pawn han bawhzui ngawt dawn se awmzia a nei lo mai thei a. Amah Angela-i tereuh lah hi ala naupan mai bakah thlamuang lo reng renga seilian emaw tihmai turin a tawng mawh em em a. A nu a hlauh zia ngaihtuahin engmah midang hian an zawh chhuah ka ring hlawl lo.

In ka thlen in Pi Maduhi'n nidang ang bawkin min lo be lehnghal bawrh bawrh a. Ka lakah hian eng rilru nge a put ang tih ka ngaihtuah zauh mai. Dawt a sawi chiang lutuk tih ka hriat vang nge ka hre lo. A hmeltha ka tih thin nen, rapthlak tihna ka nei ta tlat lehnghal.

Pi ala  muthilh avangin Na-i choka lamah ka pui a. Anni chhungkua hi zing chaw an ei hma lo viau a. Ka thlen hian eirawngbawl ka tihpui hman deuh ziah a. Angela-i hian chaw leh Bawnghnute leh artui kan a ei thin a.  Chawhmeh dang an pe ngai lem lo aniang. An ei tir ka la la hre lo.

Ankhapui bai tur ka lo then mawlh mawlh laiin Saitluanga a rawn lut a, ka va melh zawk a. Nimin a ka che chhe lutuk kha ka zak thar leh a. En rei ngam loin ka hawisawn nghal vata. Bakah, a fanu ngaihtuahna reng reng a nei lo hi ka thin a tirim deuh tlat a. Ka hmu chak lem lo.

"Na-i, thingpui min lo siam la. I buai loh chuan... " a ti a. Dinning room lam a pan tlang dawn emaw ka tih laiin a rawn kal hnai a. Min ep chiahin a rawn dinga. Ka thil tih lai ka en lui ngar mai.

"Hei hi eng nge kha? " tih pahin ka chawhmeh then lai a rawn khawih a.

"Ankhapui" ka ti tawi tak mai.

"Um, Ankhapui. Then a va buaithlak hmel angreng ve" a ti leh a. A hnah hi kan rawh uai sawk a, a kuang hi rawh hmain a chhungrila hrui ang deuh hi ka paih sa vek thin a. Then vel a buaithlak ve reng mai. Mahse, Saitluanga erawh "Nia, buaithlak ve tho" ti chauhin ka chhang.

"Ti khan i phel sa kha i bai tawp dawn mi? " a ti leh ta fo. Hetah awmpui nen an khawsa a. A hnathawhna lamah pawh Driver nen an awm a, mipa tleirawl pakhat, Lehkhazir a awmpui thin bawk a. Engmah a ti ngai pawh ni lo, eng nge maw min zawh sek ni?

"Dawn lo.. "  Ka ti leh ringawt. Ka chhan let dan chhum bung lutuk chu a mawi lo tih ka hriaa. Mahse, ka sawi zawm chak ngang lo.

"Engtin nge an siam thin a? Bai hi ka ei tam lo nangin hei kher hi chu ka duh ve a" Ka tawngkam tawi angreng tak chu haiderin a ti leh ta talh.

Na-i'n thingpui a rawn chhawpsak a. A kal sawn nghal dawn emaw ka tia. A la ding ta reng mai. Ka melh zawk a, chik zetin min lo melh reng chu niin... Min en hnai bawk si nen ka lai nge ka zak pawh ka hre thei lo.

"Rohmingsanga te nen in lo in cousin reng a ni maw? " a ti leh daih. A thilsawi chu ka beisei loh lam daih a ni.

"Cousin ti ila cousin chiah lo. Ka cousin te nen an in cousin" ka ti deuh duah.

"Ah, a va kual ve" Nui chungin a ti a. Ka sawi dan kha ka nuih a za ve tho nangin ka nui duh lo.

"Ka Nutei pasal te nen an inchhung hnaia" ka ti leh a. Kan chhungkaw chanchin hi ka la sawi ngai lo a. Ka Nutei te bulah ka awm tih erawh Pi Maduhi ka hrilh tawha. Bakah, ka hrilh hma pawh khan nu Biaksangi'n a lo hrilh tawh ka ring tho.

"Um.. Kan inkhel ho thin a" a ti tha ve mai. Rohmingsanga hi ka Patea u fapa a ni a. Kei aiin a upa hret a, mahse a upat na a tam lem lo. Badminton a thiam hle a, a tleirawl deuh lai phei kha chuan Mizoram aiawh pawhin a kal chhuak fo thin a. Kan inah hian a rawn tal tam ve a. Atan chuan thisen zawmpui ni lo mah ila min en hrang awmin a awm ngai lo a. Tawng duh leh nelawm tak a ni bawk nen keipawh hian ka ngai na ve viau bawk.

"Nimin khan ka hmu dun che u a. Tukinah ka zawt a" a ti leh a.

"Um.. " ka ti ringawt. Nimin khan a rualin ka kal a, Gate thleng min thlaha, chu chu a lo hmu aniang.
Engmah sawi zawm tawh loin a kalsawn ve ta hram. Ka thaw huai thei. Ka thawhhlim atangin khatianga thian ang deuh zawnga titi dun ang chi kha kan la nei ngai lo a. Inbe fo mah ila tuna kan inbiak ang kha ni loin kan inbe zawk zawk ang chauh a ni tlangpui.

Pi thawh hnu atanga chawhma chhung chu a room ka chhuahsan ta miah lo. A tho nuam lo a, a phunchiar bakah a thinchhe em em a. Mawng vawmba ang maia a mamawh pek zar zar angai a. Thingpui in tura Choka ka pan chu Chairah ka thu zawi thla hnak mai.

"I van chauh hmel ve" Na-i'n min ti a.

"Tlemin.. Vawiin chu a nuam vak lo a, a kawk kual nasa angreng a" Nui chungin ka ti a. A nui ve hak hak mai.

"Na, Angela-i hi a lo haw tawh em? Ka hmu khat lutuka ka hmu chak reuh" Tawngkam pangngai thei ang berin ka ti a.

"Vawiin chu a kal lo. An zirtirtu te chhung an thi an tiin ka hria" a ti tha ve mai. Ka thu mar a, ka thut na atangin sitting room lam ka va en a, tumah ka hmu lo. Ka tho a, pawn lam en tumin tukverh lam ka pan a. Ka hmuh theih chinah tumah an awm lo. School a kal loh ni em emah chuan roomah lo pawh hian a awm ve ka beisei a. Mahse, hmuh tur a awm lo. Ka thutna ngaiah bawk ka va thu leh a. Thingpui dahna Kettle, dawhkan chunga mi chu hmuhnawm tiawm takin ka en vang vanga. Eng emaw tal vawiin hian hriat belh ka duh a, thiam taka Na-i hi eng emaw tal zawh ka duh.

"Angela-i chu Roomah a awm amawni le? Naupang si hi a harh lo ka ti tawpa. Ee, a damloh lai khan a na ve hmel reuh sia Damdawiinah an kal pui hrim hrim em? " Titi satliah thei ang ber turin ka ti chhuak a. Ka rin ang ngeiin Na-i hmelah chuan ka zawhna vanga makti hmel a pu lo.

"Angela-i maw? An hruai pawh ka hre lo e a. Roomah a awm char char ka tih kha. E, u Mama lo haw khan Pu nen an inhnial lai ka hriaa. An sawi chu ka hre thiam vak lo a. Mahse, Angela-i vel niin ka hria.. " a ti liam puat puata. Kei erawh chu ka lungphu a rang nghal dawt dawt mai.

"An inhau maw? " Ngaihven lutuk anga lang si loin ka ti a.

"Inchunga insuk ka zar laiin an inbiak lai ka hria alawm. U Mama khan in enkawl zo lo te atia. Aaa, ka hre bik lo. Pi nge Angela-i nge an sawi" a ti liam leh mai mai.

Tawng ka tum lai takin Santi a rawn lut a, melh pawh min melh lo hian Na-i a rawn biaa. Ka awm ve tih hre lo ang mai in a khawsa a. Ka nuih a ti za zawk. Dik tak chuan Angela-i pawh luih a tum tuma ka lo dan avang khan min la mil lo tluang zel a. Pi Maduhi'n a thlavang a hauh tih a hai lo bawk nen a che vel a ngeiawm thei ngang mai bawk. Mahse, keimah min ti fawk anih lem loh chuan engtin tih ka tum hran lo a. Ka duh loh zawnga min nawr anih vaih erawh chuan Pi ten a thlavang an hauh tih vel mai mai chu ka ngaipawimawh lo ang tih ka chiang. A bakah chuan duhtawkin hawi pir se, duh leh van en pawhin kal char char se ka pawisa eih lo.

Pi a muhil a, inchungah ka chho a,  Na-i puanpho ho chu a ro tawh em tih ka enkual a. A ro apiang ka seng a, balbawm a dah saah ka dah lut a. Ka seng zawhah thir thutthleng then thei an dahah ka thu a. Ka ngaihtuahna ka kawm a. Na-i sawi ang khan an unau kha Angela-i vanga inhau an lo nih hlauh chuan Saitluanga hian a ngaihven ve tih na a ni dawna. A lawmawm hrim hrim mai.

Inchung kil, Saitluanga Room hnaih lam atangin thawm a rawn awm thut a. Ka hawi phawk nghal hra mai. Thawm awmna lam ka en a, ka beisei loh lutukin Far pot lian zet phen atangin Angela-i a rawn vak chhuaka. Min rawn hmu chu hrilhhai deuh niawm takin che loin a awm a. Min melh ran mai. A lo awmna tehdaih chu mak ka tih em avangin engmah sawi loin ka en ve a, mahse inngaihtuah harh thut in ka nui ta sak.

"Hetah i lo awm reng alaw?" Nui chungin ka ti a. Min chhang loin a ding tham tham a. Pot lamah a tawlh let leh a.Min en danah chuan min hlau niin ka hriaa. A awmdan chuan min ti hrilhhai viau.

"School i kal daih amaw ka tia. Kan inhmu khat bawk si, I damloh lai khan ka dam lo ve a" Nelawm thei ang ber turin ka ti leh a.

"Anu in biak che a phal lo" a ti ta khauh. Ka thu khawng nghal lah thung.

"I bulah ka awm chuan ka khua a sik leh dawna. Tuiah pawh ka tla leh dawn a. I bulah ka awm duh lo" a aw tham chhel in a ti leha. Chet pawh che lo leh mit pawh khap loin ka melh reng a. Ka thil hriat chu ka hre sual emaw ka ti hial. A che phat a, hmanhmawh em em in a tlan a. Inhnuai panna kawngkaah a tlan lut a. Chetna chang ka la hre chuang lo.

"Puanpho i seng alaw? " Saitluanga awin a rawn ti thut a. A lo kal thawm ka hriat loh bakah  ka thil tawn zawh chiah vang khan ka ngaihtuahna a nu but a. A rawn tawng thut chu ka phu nasa lutuka, ka ding chhuak nghal zawk mai.

"Eng nge a? Dik lo a awm em? " Angaihna hriat loh hmel deuh hian a ti leh hu a. A hmel a ngaihthat lohna lang chu ka hmu a, tihngaihna hre loin ka ban ka phar hluai a. Ka dah thla leh ringawt. Ka awmdan atthlak zia ka ngaihtuah a, ka zak ru ngang mai bawk.

"Engmah dik lo a awm lo.. Ka lo inngaihtuah muk em a" ka ti a. A thle buk a, a nui zui suk bawk.

"Angela-i kha hmanhmawh deuhin a rawn tlan thla a. Dik lo a awm emawni ka lo tia" a ti leh a. Angela-i hming a rawn sawi lan rualin a tawngkam kha ka bengah a rawn ri nawn leh a. Harsa ti ru zetin ka chil ka lem thei hram.

"Enteh... Ih... " Sawi mai dan tur hre loin ka ti a.
A rawn kal phei a. Ka hmaah tak a rawn dinga, chik lutukin min en a.

"Sawi rawh... " a ti nghet churh.

"Angela-i... " ka ti uk a, ka ngawi leh daih. A tawngkam kha ka sawi anih chuan amah zawk in tul lo tawpah hrem a tawk leh palh thei. A thilsawi kha a nu zirtir a ni a. Ama thiam loh a ni lo.

"Angela-i chu ti nge? " dawhtheihna tlachham hmel fein a ti a.

"Hetah a lo awm tih ka hre lo a. School a kal amaw ka tia" ka ti ta ngawt.

A kut kuangkuahin ka hmaah tak a ding a, ka melh zawka, a mitmeng fing lutuk chu ka en rei ngam lo.

"Dawtsawi i thiam lutuk lo chu anih hi tiraw" a ti ta sup. Ka beisei loh lam a sawi takah chuan ka hawichhuaka. A hma ang bawk khan min lo la en reng a, mahse hawisawn duh loin ka en lui ve ta zawk.

"I sawi awmzia ka hre lo" ka ti nghata. Angela-i hum ka duh na chuan ngai min awhtir leh titih tawh.

"I hriat kha.... I bulah a awm chuan a khua a sik ang a tih che kha. A tawngkam khan a thawng che anih kha" Thluk nei miah lo a mar hian a ti a. Insum hman loin ka thaw nghal hawk mai.

"Thupha ka chawi e. Zirtirna tha tak pek angai anih kha" amah bawkin a ti leh a. Ka chhanna pawh nghak loin a inher a, kalsawn tumin a pen nghal a.

Eng nge ka tih dawn tih lam ka ngaihtuah hman tawh lo. Rang lutukin a banah ka va man chawt a.

"Khawngaihin engtinmah ti suh. A thiam loh a ni lo. Naupang mai ala ni chung hian a nun hi hlauhnain a khat vek tawh ania"  ka ti chhuak nghal a. Ka aw a khur nasa em em bawk..

Note : Naktuk hi KTP kawnferen na lam hawi ve te ka rilruk a. Ka chawlh ka inring aw. Ka hawi ta lo anih leh ka chawl lo anga😃 chuan, blog a comment hi ka phone ka thlak avangin ka reply thei lo a. Ka like thei lo bawka. Blog a ka login na ka theihnghilh vang ania..Min ngaidam tawp mai ru aw😄😄