Bibi - 20

 Chapter - 20

"Awi,berkher a" Pi Maduhi'n a ti a, a nui zui vak vaka,min hmuhsit dan em em chu ka kawchhung a fan ka timai. Chhan dan tur ngeihawm deuh ka ngaihtuah a, mahse Saitluanga'n ka rilru hria niawm taka mitmeia min rawn khap ka hmuh rualin ka ngawi leh ta zawk.

Pi Maduhi za awm taka la nui vel chu en duh loin Nu Saipuii ka en a, Min nuih ve chiam hlauin ka tirilah ka khur a, mahse "Aaa, thil ni thei a ni tlat. Anih hlauh chuan a va tha dawn lehzel em aw " Vertherna tel miah lo a nui hawk hawk chunga a tih chuan ka thaw nghal huai mai. Pi Maduhi nui hmel reh riai riai chu nuam ti em em in ka en a, chawh han tih em chu dikin ka hre lo, mahse a awmdan nuam lo hmel zet chu ka lawmpui tih ka hrilh chak zek zek.

"Kan chhuk dawn mi? " Saitluanga'n min rawn en chungin a ti a. Chhang loin ka tho nghal vat a, rang zetin kawngkhar lam ka pana. Saitluanga'n min rawn zui ve nghala, Pi Maduhi'n huatna nen min en zui dawn tih ka hre chianga, ka hlauh vang ni loin ka hnung a za mur mur maiin ka hria.

"Eng nge khatia tih kher pawh chu a tulna? " ka ti nghat.

"Tul ve e" a ti bung vut. A hmel ngeng angreng takah chuan a mood a fuh chiam lo a ang viau.

"Thil hi a buaithlak" ka ti leh hap tho. A mood fuh vak lo mah se ngawih mai a harsa ka ti ve tlat.

"Buaithlak emaw iti anih kha, Hmeichhe ho hi chu tul lo sawi hian alawm inbuai thin. Ngaipawimawh lo la a tha animai" a ti leh nghut. A sawi dik tih ka hria, mahse hmeichhia kan ni tlata. He kan zia, eng eng emaw sawi duh tlatna hi a bo thei dawn lo tih pawh ka hre tel tho.

Nurse la naupan hmel tak, hlim hmel sanga min lo chhawntu hnenah chuan "Ka pi kan hmu duh a. Kan pahnih hian kan lut rual thei em?" Saitluanga'n a ti a.
"Aa, pahnih luh rual chu kan phal lo a. A hran ve ve in lut mai ula"  zaidam leh inthlahrun hmel takin a ti a. Saitluanga'n min rawn en a..
"Nangmah va lut mai la, i hreh em? " a ti sup.

"Hreh lo e , mahse nangmah kha a lo hmuh duh che ka ring zawk a" ka ti tha ve mai.

"Aih, keichu hmuh theih hun dang a awm leh mai dawn a. A hmu duh che tih a sawi ngun tawh a, va lut la.. Tah hian ka lo nghak ang che" a ti dam leh thlup.

Nurse ka zui a , ICU chhung ka lut chu kan training lai ka hre chhuak vang vang mai. Pi khum min kawhhmuh a, thawm nei mang loin ka pan phei a. A khum bulah ka va ding a, che loin a mu a, a hmel landanah chuan na nei hmel pawh a pu lo.A bula ding an awm tih hria niawm takin a rawn meng a, a rawn thle a, min rawn hmu a. A mitmeng chau em em ka hmuh rualin ICU hi damin a chhuahsan ka lo beiseina a bo nghal vek. Eng emaw a sawi a, mahse a oxygen hipna vang chuan a tawng ri ka hre thei lo.

Ka bula nurse ding chu ka en a.. "Reilote biak in phal em? Min be duhin ka hria" ka ti a.

"Aw, phal e.. Kan pi hian oxygen hi a ning thin a, vawiin chu a zia deuh bawk a kan hiptir mang lo a. Nichin deuh atang khan a hip leh chauh a, ka'n phelhsak ange" Nui var var chungin a ti a. A hip chi ai chuan hnara vuah mai theih kha hmang se a zia angem aw tih ka lo ngaihtuah ve mai maia. Mahse, damdawi Inah a awm a, kei aia let tamtaka thiam zawk ten an enkawl a. Tha zawk tur chu an hre em em ang tih ka hria.

"Bd... " zawi tein a rawn ti nghal a. A aw chau leh tham tiak mai chu amah nen a inhmeh lo ngang mai.

"Aw, keimah... I nuam deuh tawh em? " ka ti a. Khum bulah thutna ka pawt hnaia, khum si chetin ka thu a, puan ka keua, a kut zur tep chu ka vuan nghal a. A theih anga nain ka kut a rawn hmer ve nghal a. Mahse, hmer ni lo a rawn vuan ve hrim hrim nen danglamna a awm vak lo.

"Ka zia lo deuh chu anih hi. Thil hrilh che ka duh a" a ti leh a. Hah hmel deuh hian a thaw deuh halha, mahse a thawk dan a pangngai zui leh mai.

"ICU atanga i chhuah hunah pawh kan sawi dun thei tho asin. Tunah chuan hahdam deuhin awm la" ka ti a.

"Aih, ICU atang hian damin ka chhuak dawn lo. Mama pu hian nizanah pawh min rawn hruai a tum a" a ti a. A chawl leh rih a, tawng tawh lo mai se ka duh a. Mahse, a tum tawh chu a tum tlang dawn tho tih ka hriaa, tawng lo tura hrilh awmzia a awm dawn lo.

"Thih hi ka hreh lo, mahse Lala-i ka ngaihtuah em em a, nangman lo enkawl rawh" a ti leh sep a. Ka ip chawih mai. Engtin nge Pi Maduhi hnen atangin ka laksak tehlul ang??

"Mama hi lo nei rawh. I pi thi mek hian chu chu ka ngen che anih chu" a ti leh a.

"Pi... " ka ti ringawt.

"Ngaihzawn loh neih chu a harsa ang. Mahse Mama pawhin neih che a duh a... " Sawi zawm thei loin a ngawi leh rih a, ka lungphu rang leh ring lutuk chu midang lo awmhnai deuh se chuan an hre thei hial ang ka ring.

"Lala-i i enkawl theih dan tur chu Mama neih kha a ni a, i ngaihven em em tih ka hria. I nei ang tih Min tiam rawh" a rawn ti leh a. A aw a zawi em em a, mahse a mitmeng fing tak mai chuan chau hmel takin min en a. Ka chhanna a nghak reng tih ka hria.Pi hian kan inkawp tih hre lo mah se innei tura min tihna hi inngaizawng karah chuan awlsam taka chhan theih tur anga lang a ni a. Mahse, chhan mai dawn chuan a harsa ru leh tlat lawi. Saitluanga nen kan inngaizawng ve mek chu ania. Mahse, eng chen nge kan daih dawn ka hre lo. Kan inkawp tan hun ngaihtuahin inneih sawi nan ala hma lutuk. Amah Saitluanga'n a piin min nei turin a ti tih kha chu mi  hrilh ngei a. Mahse hmanhmawh taka tih chi pawh a ni lo a, bakah a pi awm lo zui ta se kan inkawp na pawh hi awlsam takin a chat leh maithei. Pi vang a ni lo tih Saitluanga'n min hrilh mah se a lo ni reng thei tho.

Pi ka en a, ka chhanna nghakin beisei nei takin min lo en kiau. Ama insawi dan takah a thi mek a ni a, ka ngaihtuahna sawi chhuaha,a rilru tihah zawnga thildang lo sawi kual hun a ni lo tih ka hria. Duhthawh zetin Boruak ka hip lut vang vanga. "Ka nei ang.. Ka tiam che" ka ti ta nge nge. Ka chhanna a hriat ruala a hmela hlimna lo lang nghal chuan ka hnuk a ti ulh a, ka mittui a tlak loh nan ka mit ka khap nghal sawk sawk bawk.

"Ka lawm e. Ka ring sual lo ang che tih ka hria ania. Khawi,Oxygen kha min han hiptir teh u" a ti a, a sawi zawh rualin a rawn khuh nghal bawrh bawrh a. Rang zetin nurse a rawn tlan phei a, a chetna tur ka lo kian nghal vata. Min rawn en a, " A thaw a hah leh deuh anih hi, ka'n buaipui ange. Hlauhthawn tur a awm lo ania" a ti a.

Pi thaw hah ti ziawm tura a buaipui chu en thei loin Kawngkhar lamah ka tawlhchhuaka, kawngkhar piah deuha Saitluanga lo ding chu a ka pan phei a, min rawn hmu ve nghala. Min rawn pan ve a, ka kut a rawn vuan nghal chat.

"A tha lo leh deuh em ni? I va dang ve' a ti nghal a. Ka lu ka thing ringawt. Kan piaha thutna awm lamah min kai phei a. Ka thu thla nghal hnak mai.

'Tui ka va la lawk ang. Ka rei lo ang" Tih leh kal a rual zui nghal chu animai.

Tui bottle kengin a rawn let leh vat a, ka bulah a rawn thu a. Tui bottle min pe a, ka in nghal khawlh khawlh a. Eng ber khan nge minti chau pawh ka hre lo.

"I zia deuh em? " a ti a. Ka bu nghat.

"Thih tha lo deuh i tawng emaw tihmai tur in i var vek maia" a ti leh a.

"Engmah chutiang a awm lo. Ka lo chhuah dawn khan a thaw a hah deuh a, chu chu nimai" ka ti a.

"Um.. Nizan pawh khan a thaw hah lutuk kha ania kan buai deuh na. Eng nge a lo sawi a? " a ti leh a. Chhang loin ka hawi kuala,kan piah deuhah thu an awm ve tho nangin kan tawng an hre phak lo ang. A khat tawka vei an awm reng chungin min rawn ngaihven tu an awm lo.

"Lala-i enkawl turin min duh" ka ti hul hak.

"Chuan... " A ti a, mak ti hmel pawh a pu lo.

"Inneih a sawi" ka ti leh tawp.

"Ok... " a ti leh mai. A awmdanah chuan a pi sawi tur engkim hre sa a ang mah zawk.

"Ngaihtuah hah suh. Engkim hi hunin ala rawn her chhuahpui vek dawn a. Lo ngaihtuah hah vak kha awmzia a awm lo ania" a ti leh a. Ka bu leh nghauh ringawt.

Cabin a kan let lehin Nu Saipuii leh Saikima te unau an lo awm a. Nu Saipuiin "In zuk hmu thei maw? Maduhi te kha an haw ta anih kha. Hei Kima ten eitur an rawn kenga, kan lo ei meka, in ei ve nghal duh em? " a lo ti nghal mawlh mawlha. Saikima bula thutna awlah ka thu ve nghala, nidang ang bawkin nelawm takin min lo nuih nghal var var mai.

An unau ho an titi khawm laih laih a,ngawirengin ka thu a, min bia anih lem loh chuan engmah sawi ve tur ka hre lem lo. Pi natna chungchang an sawi a, Nu Saipuiin "tun tum chu a tlin lo dawn ni hian ka hre thin a,tunhma lama ala neih ngai loh, asthma te a nei tel ta tlata" a ti zuai raih.

"Bd, nang i hre thiam deuh anga, eng nge amah i hmuh dan? " Min rawn ti thut a.

"Ka hre thiam chiah lo" ka ti ringawt. Dam a tum loh thu leh a pasalin rawn hruai a tum tihte kha chu sawi leh chi-ah ka ngai lo.

"Sangzuala kha chuan hmasawnna a awm lo a ti deuh tawp maia. Bakah, a kum a tam ve tawha, engmah tithei lo a lo ni tawh bawk nen, kal hi chu a duh tawh zawk maithei" Saitluanga'n a ti ve a. Reilote chhung chu an mahni ngaihtuahna theuh kawmin an thu ngawi thapa. Mahse, Nursein hmanhmawh tura a rawn koh tak thutah chuan an che nghal suau mai.

A thawk dan a buai zual thut a, a thawchhuak zo dawn lo emaw an tih hnuah a rawn thawchhuak leh a, mahse a awmdan enin beisei tur a awm lo tluk a ni.

An chhungte an lo thleng zut zut a. Awmdan tur hre loin Cabinah ka thu mawl tawpa. Khua a thim hnai tawha, Msg in kan chanchin Lawmi ka hrilha. Ka haw hun tur ka hriat loh thu ka hrilh tel bawka. An chhungte zingah tu nge ka nih hria an awm nual tawh nangin min hre lem lo an awm ve nawk tho a. Chutia ka lo awm ve ta reng chu mak ti a tu nge ka nih min zawt chawt chawt an awm bawk.

"Bd, kan chin hi a hriat si loh a. In lamah Na-i leh Santi an awm a. Kima nen hian lo va phei ula, in kha a tul ang ang in lo va singsa mai dawn em ni? " Nu Saipuiin min ti a.

"In tih dan dan kha nimai" ka ti vat.

"Mambawihi kha In lama phei tur chuan ka ti tawh tho a. Saizami pawh kha a haw a, lo kal leh a tum in ka hriaa.Mahse,helama lo kal loin Inah phei mai se. Hetah chuan puitling kan awm tho bawk a" a ti leh zung zung a. Nu chanchangin engkim a rel zung zunga, a nu thichhawnga a leh reng laia rilru fim a hmang thei tlat hi fakawm ka ti ru ngawih ngawih.

Saikima nen In lamah kan phei a, Saitluanga ka hmuh loh avangin msgin ka awmna ka hrilh a, in kan thlen hnuah pawh a la seen lo a. A-ni leh Patea awm tho mah se In a chenpuitu anni a. An buai ber lo thei lo.

Kan theih ang angin inchhung kan singsa a, mahse Room bang vel thiah theih loh vek anih
avangin han tihchiam tur a awm vak lo. YMA hruaitu an lo thlenga, thenawm hnai an rawn lut khawm bawka. Saikima te unau ho awm tho mah se In neitu tu emaw ber awm se ka ti tho. Saikima te lah helai venga cheng annih loh avangin hriat an nei mang lo a, inleng lo dawngsawng tur pawh an awm mumal lo.

"U Maduhi hi ka call mai dawn mawni le, inleng an lo lut ve reng a, bakah In chhung hi mahni thu a lo khawih tawp chu a buaithlak tlat' Saizami'n a ti nang nang a.

" Nia, lo haw mai se. Sawtah te chuan midang an awm teuh tho a" Remsangi pawhin a lo ti ve a.  Angela-i rawn kal phei chu ka va hmu a, Santi lah a virbuai ve bawk avangin tuman an ngaihven hman lo anih hmel.

"Lala, helamah hian lo kal la" ka ti a. Min rawn en a, Tim deuh hmel a pu nangin a rawn kal hnai ta tho.

"Chaw i ei tawh em? " ka ti a. A lu a thing nar nar.

"I ril a tam tawh em? " Ka ti leh a.

"Aw, anu a awm lo a. Au Santi-in engmah min la pe si lo a" a ti ve mai.

Choka lamah ka hruai phei a, Na-i hnenah ei tur a awm leh awm loh ka zawt a. " Aw, awm e. Chaw pawh ka chhumbelh leh meka" a lo ti vat.

"Lala-i zawk hi ania. A ril a tam a" ka ti a.

"Pek ala ngai lo" Santi-i aw hian a rawn ti a. A rawn tawngna lam ka hawi phei nghal vat a. Min en loin tur zet hian Angela-i a en a.

"A riltam in eitur a rawn zawnga" ka ti hmak.

"A ei ala hun hleinem. Lo kal rawh, ka tifai dawn che ka tih kha" a ti leh hluk hluka, ka ngaihdan a pel leh ta tlat.

"Vawiin angah hian hunbi thlap thlapa thil tih chi pawh a ni hleinem. Engpawh thleng thei ania, ei se a fel mai zawk" luhlul chhuahin ka ti ve leh hmiah.

Min hnial zui ngam chiah lo niawm tak hian lungawi lo hmel zet hian a ding a, ngaipawimawh duh loin eitur ka siamsak zui ve hmak thung.

Angela-in chaw a eikham fel hman chiah tihin Pi Maduhi a rawn haw a. Inleng lo awm ho chu a rawn be nghal a, chanchin an lo zawt chu zangkhai takin a chhang nghal zung zung bawk.

"Bawihte, chaw i lo ei em? Santi a eifel tawh em? " Santi hnenah a ti nghal a.

"Aw, ei tawh" Santi-in a ti hul hak mai.

"Bd, nghah ngawt ngawt hi animaia. Duh leh va haw rawh, chanchin danglam a awm ta anih leh in call a harsa lo ania" a ti leh zung zunga.A duhnaah hi chuan fel tak a ni.

Taxi ka chang ang nge Lawmi ka ko ang tih ka ngaihtuaha, zan dar 8 dawna Taxi han chan chu ka chak vak lo. Lawmi koh mai ka tum a, "Ka va thlah ang che. Keipawh haw zuai ka duh" Saikima'n a rawn ti ta hlauh a.

In ka thlenin Rohminga a lo awm tehmiala. "Chaw ka rawn ei a, I lo awm si lo a. Sawi tur ka ngah tehreng nen ka lo tia" Nui chungin a lo ti a. A sawi tur awm ka rin hriat thei mai.

"Eng nge ni i sawi tur neih chu han sawi teh. Hman zanah palian deuh mai a lo leng a. A bialpa emaw ka tia, hei a reh zui daih maia" Nutei'n a lo ti hmanhmawha. Ngei zetin ka melha, Lawmi leh Mama an nui vak vaka, Patea angaihna hre lo hmel deuhin a bengngawng nuih ve hui bawk.

"Eheu, ka rin aiin a va che rang si ve" Phur surh hian Rohminga bawkin a ti leha.

"Tu maw? ' Ka ti a, ka hre lo lui tlat.

" Pathlawi zuna uai hi a na ania aw. A reng rengah kan inphur min hmu satliah mai mai khan duh aiin chanchin hriat duh a lo ngah kha amak ka tia. Mahse, a rawn bawhzui rang em mai, a lo awm ve reng anih chu"  Tifuh inti em em hian a ti leh a.

"A fel hmel khawp kha a. Eng nge i pi chu a chanchin? " Nutei'n minti leh a.

A awmdan ka hrilh mawlh mawlha. "Chaw ei la, inring renga awm i ngai anih chu" a ti leh a.
" Keipawh kal ve ka duh tak asin. Chanchin danglam deuh a awm chuan min lo hrilh ve rawh aw" Rohminga'n lo ti ve vuta. Kan sawi mek chu a hming sawi lo mah ila mi thuhmun kan sawi tih alang reng.

"Midang daih emaw insawi tih laiin Saitluanga emni in sawi a? " Patea'n a ti a. Engmah sawi loin kan inmelh kuala, intiamrual niawm takin kan nui ta vak vak.

Ka inbual laiin Saitluanga'n a lo phone a, ka hmuh veleh ka call back nghala. Chanchin tha lo lam a rawn sawi belh hlauin ka thin a phu dep dep a, a pick hma reilote pawh minute tam a liam hmanin ka hre mai.

"Hello.. " pangngai takin a rawn ti a.

"Ka inbuala, ka lo hre lo a. Ka msg kha i hmu tho ang chu ka tia. Eng nge in an? ' ka ti nghal duah.

" A hniam hret hret a, zanin kan tlaivar zo angem ka hre lo le" Awki pangngai rengin a rawn ti leh sup.

"Pi Maduhi khan haw mai tur in min tia. Chaw i la ei lo em? " ka ti leh rih.

"Eng eng emaw chu ei e. Ril a tam vak lo a" a ti leh mai.

"Um, chanchin danglam a awm chuan min lo hrilh la.. " ka ti a.

"Hrilh ang... Hahdam deuhin lo awm la, engmah hi kan thu a awm lo a" a ti mar ut.

Ni hnih lai khawl hmanga a nunna an chelhsak hnuah Doctorin kal mai tura an duh chuan enkawlna zawng zawng a  titawp anga, a kal thei ang tiin a hrilh a. Mahse, Saitluanga'n a phal lo bur. Ni 3 pumhlum ICU a awm hnuah, ni lina zing dar 3 velah a mar an hmu zo ta lo a. Na-in min rawn call a, thinthi a mu lo tihtakah ka harh nghal kawka. Lawmi ka kaitho a, kan pahnihin Damdawiin lama kal loin Pi te inah kan kal tlang a. A zual tirh khan inchhung kan singsa deuh vek tawha, inring renga awm anni tawh bawk nen tih tur em em phei chu a awm lo.

Ruang an rawn thlenpui in khua a var lek lek tawha. Pi zual hnu atangin Saitluanga leh Nu Saipuii hian reilote an inbual chhung zawk tih loh chu Damdawiin an kalsan ta miah lo a. An lusun nen, Saitluanga pawh alang pawr fap mai. Kan inbe tam zual em em a, Damdawiinah khan nghah tlawk tlawk bak tihtheih a awm si lo a, msg in kan inbe nasa zuala,inbe nasa na na na chu kan inngaihzawn chhung hi rei la ni lo mah se kan inzawmna leh inpawhna erawh inngaizawng rei tawh ang mai kan ni thung.

Pi vui ni atangin nitin an Inah ka kal a, Saitluanga vanga kal ni loin Pi tana ka tih theih tawk tih ka duh vang a ni a. Vawiin hi a ruang thlak atangin ni 5na a ni a. Sunday alo ni bawk nen inleng an la awm laih laih a. Vawiin bak chu kal ka tum tawh lem lo. Nitin Mki a rawn kal zat zata, thingpui sem leh eirawngbawl thlengin min tihpui ve vek zela. Chhungkaw hung tak leh thenrual ngah tak anni bawka, thingpui sem pawh hna a tling takzet. Awmkhawm zingah Saitluanga'n min rawn ngaihven bik tih a thup ngai lem lo a, Saikima phei chuan min fiam zuk zuk a chinga, Mki pawhin min rawn ngaihtuah bik tih a hai ka ring lo. Mahse, a lo kal a thulh duh chuang miah lo.

"Bd, i buai zak zak thin hle mai"  Chokaa Remsangi nen thil kan silfai laiin Nu Sangberi'n a rawn ti a.

"Aaa, buai bik lo e. Kan vaiin kan buai ho vek alawm" ka ti vat.

"Ka nu chu i ngai ve dawn hian ka hria. In enkawl rei viau lo mah ula in inawm nasa em maia" a ti leh a.

"Nia, a khawharthlak dawn khawp mai" ka ti ve a.

"Han sawina hun ala ni chiah lo maithei a. Mahse, a remchan lai chu a ni tho a. Mami hi zirzawm leh a tuma. Dawrah hian rintlak, mahni ta anga en thei hi ka duh a. Chinchang i hre sa vek a, kan dawr lamah min rawn pui thei lawm ni? " ka rin loh takin a ti a. An dawr len zia ka hriaa. Wholesale leh retail a pe an ni a. An buai em em a, an hnathawkte hlawh pawh a chhe thei lo hrim hrim.

Chhan ka tum lai takin Pi Maduhi a rawn lut ve a, pi boral bawrah hian an inah ka che tla tam em em a, ani pawh hian min be bawrh bawrha. Min mil lo em em ang pawhin a awm leh ta miah lo.

"In va han buai thin tak, a lawmawm mang e aw" a rawn ti a. Nu Sangberi'n a lo tuihnih ve vat bawk.

"Mak ka tih deuh a awma. Bdi hi ka zawt ang ka tia, hun ala awm lo lutuk a. Ka pi i hmuh hma lawk khan Doctor nen kan inhmu a, hma a sawn thu leh reiloteah ICU atanga an sawn chhuah mai a beisei thu kha a sawia. Mahse, i zuk hmu zo kha a biak theih loh zui ta kha ania. Ka pi nen khan thin tithawng thei insawi em? " a ti duah.

"Chutiang engmah kan sawi lo... Reilote kan inbiaa,chu zawng chu animai" Tha takin ka ti a.

"Um, anih chu.. Doctor kha chuan thil tha lo, amah shock deuhtu a awm thut anih kha a ring a. A awmdan tehthutah khan a sawi ang kha a ni ve thei tlat a " a ti leh a.

"Bd, i hmuh lai khan engtin nge a awm a? " Nu Sangberi'n a ti a.

"Danglam a awm lo. Nurse hnenah khan oxygen phawi lawk pi khan a dil a, reilote an phawi a. Kan inbiak laiin a phawia, tlema a hah deuh khan a khuh zui a, kan vuah lehnghal a" ka ti a. Ka sawi zawh rualin Pi Maduhi a tho nghal hluai mai.

"Chu chiah chu anih chu. Awi, a va han pawi tak. Tinge maw in phawi kher kher le?" tah aw hian a ti a. Angaihna hre lo em emin ka en a. Remsangi nuam lo ti hmel taka min en tu leh Nu Sangberi makti hmel em em a min en rengtu chu ka en tawn a. Engvanga mak ti hmel deuh a min en nge maw an nih le???

Ka harh chhuak thut..LALPA, ka pi kha keimah vanga thi angah an ngai tihna anih chiah hi...

"Eng maw in sawi kha? " Saihminga'n rawn luh pahin a rawn ti a. A nupui inhru chawt chawt chu a en a.

"Bdi leh ka pi an inhmuh khan oxygen an phawi a.. A buai zui ta anih hmel a" Pi Maduhi'n a ti a. Ka khawng vek nimaiin ka hria.

Saihminga'n min rawn en a, a mitmeng lian leh sen rum mai chu ka en tha ngam lo. "Eng nge a awmzia ni a? Engvangin nge i phawi a? " Nelawm na tel miah lo hian min rawn ti a. Ka chhang dawna, ka chhang maithei lo.

Saitluanga a rawn lut ve ka hmuh rualin ka thawchhuak nghal hawk mai. Kan lo awmdan tehthap chu mak tih hmel deuh hian min rawn en kuala, mitmeiin thil awmzia min rawn zawt a. Ka lu ka thing ringawt.

"Mama, Bdi hian ka pi kha a zual hma khan a hmu a, a oxygen kha a lo phawisak anih chu" Thinrim insehruh teuh chung hian Saihminga'n a ti a.

"A van zia lo tak em aw" Ni Sangberi'n zawi angreng takin a ti sap. A sawi ring lo nangin ka bengah chuan ring tak a ni tho.

"Patea leh ka ni ka hrilh angai ang. Fimkhur loh vang liau liau a ni tlat" Saihminga bawkin a ti leh a. Ka hawichhuak ngam tawh lo. Khu ral vek thei ila ka ti ber...

"Ka pi khan a be duh a, Nurse hnenah ka pi zawkin phelh turin a ti anih kha. Tah khan Bdi thiam lohna ka hre miah lo mai" Saitluanga'n ka beisei loh lutukin a rawn ti ta tlat. 

Ka hawichhuaka, Saitluanga ka en a. Min lo en ve chiah bawk. 

"A dinhmun en pawhin khatianga ICU a awm chu phawisak tur an ni lo... " Saihminga'n a ti leh a. 

"Duhtawk rawh. Thilsawi kual dan thiam deuh an awm hian kan thil hriat dan an tibuai duh viau ania. Ka pi dinhmun kha chu Sangzuala ngeiin kan pahnihin min hrilh kha. Bdi hi tu emaw ten a tisual anga lantir an tum anih hmel e" khauh zetin a ti leh ta tlat.

 A aw a ring hran lo a, thinrim ang pawhin a awm lo. Mahse, mi a nileng lo tan chuan amah hnial zawnga lo tawng ve ngamna chi a ni lo tih alang reng tho...... 

NOTE : KA VAN ZIAK TUI TAK, HE THAWNTHU CHAPTER ZAWNG ZAWGAH CHAPTER 20 HI KA ZIAK TUI BER😉

Mak ve deuh chu, Saitluanga leh Bdi hmel ang tur hi tun thlengin ka la mitthla thiam lo🤪