Bibi -29

 Chapter - 29

Ka thisen a rawn lum tial tiala, ka hamhaihna a kiang ve tual tual thung. Ka naupanlai atang khan humhimtu nei lo ka nih avangin keimah ka inhumhimnan pawisak nei loin ka che fo tawh thina. Ka thinrimna a nasat ang zelin ka hlauhna pawh a kiang thin a. Kha nun kha ka tlansan tawh emaw ka tih laiin a lo ni reng reng lo. 

Saitluanga hmel dur khupa a ding chu timna nei map loin a mitah tak ka en ve siah. 

"Khawi lai atangin nge ka sawi tan ang? " Inringtawk lutukin ka ti dam thlap mai. Ka awmdan chuan a barakhaih ve deuh emaw tihturin a hmel a danglam zawka, mahse rei a ni lo. Thinrim insum hmel a pu lehnghal mai. 

"I duh duh atangin sawi rawh" A ti chang hmuk. 

"Tamtak sawi tur ka nei lo. Ka sawi tur neih chu Muansangi kha a tleirawl lai atangin hmeichhe fing fel tak a ni a. A nulat hnuah pawh a smart em em bawka. Heihi a hre tu apiangte sawi dan a ni. Mahse, inchhungkaw zingah chuan hmeichhe awm tha duh lo leh dawtsawi ching anga sawi a ni"  timna nei miah loin ka tichhuak piap mai. Ka thusawi chuan a deng na thawkhat bawk a ni ang, a hma aiin a lang hlauhawm tawh zawk. Mahse,pawi ka ti lo. Ka ti laklawh tawha, a tawp thleng law law ka duh zawk. 

"Chu zawng chu em ni sawi tur i neih? " A hmel nena inhmeh lo khawpa dam hian a ti a. Mahse, a hlauhawmna a nep phah chuang eih lo. 

"I fanu hian a nu a chhun a, dawt sawi mai mai aching iti dawn anih chuan ka pawm lo. A nu kha hmeichhe fel tak a ni si a. A luhlul viau hi chu achhun zawk che a ni ang" ka ti leh hmiah. 

"Midang nuna inrawlh peih lutuk nih hi a zahthlak asin" a ti ta daih. 

"Ka nun paltlang tawh ang nun kha an nei tih ka hria anih phawt chuan ka inrawlh zel ang" ka ti leh hmak. Ka sawi zo chu awihawm loh lutuk hian a nui chhuak nghal hawk mai. A awmdan inthlak thut chuan minti hamhaih a, ka melh reng ringawt. 

"Nang chauh hian harsatna i tawk emaw ti lo teh. I naupanlai anga nung ve tamtak an awm ania. Inla danglam duh lutuk suh" Hmusit tih hriat em em hian min rawn ti a. A thusawi chuan min deng dawt nimai hian ka hria. Ka paltlang zozai kha ani hi a zawng zawnga ka share awmchhun a ni a. Chutichung chuan min la nuihsawh thei ania!!!! 

"Saitluang" ka ti thei tawk. Thildang sawi leh tur pawhin ka tawng ri chhuak zo tlat lo. 

"I tuarna kha sawi nep sak che ka tum lo ania. Mahse, mahni chauh dik bera inngaia, midang nuna inrawlh fo hi a fuh lo. Vawitamtak Lala-i chungchangah pawh inrawlh lo turin ka ti che a. I awih duh lo a, awih ahnekin a nu chanchin thenga i sawi hi a dik lo" a ti leh duah. Ka awmdan hrehawm lutuk chu hreawm pawhin alang lo. Chu chuan min ti pakhauh tha veleh ta chiah. 

"Inrawlh luih ka chak i ring em? Diktak chuan In chhungkua hi mihring chengkhawm ni ula buaina ka nei lo ang. Thla pawh ka awm tlin hmain mihring pangngai zinga thleng awm lo tak tak a thlenga, chu chuan min tibuai anih hi" ka ti ve leh a. Ka awah pawh chuan ka hmusit hle tih alang chiang viau. 

"Mihring lo maw? Anih chuan eng nge kan nih a? " a ti vin thawt. 

"Ramhuai" ka ti leh hmiah. 

"Ramhuai pasalah inei anih chiah chu" a ti duh lek. 

"Ni e, mahni fa pawh hmangaih lo chu mihring ini thei lo" Haw lutukin ka ti tawk mai. 

"I hriat kha a tlem hle ania. Fimkhur rawh" Chang zetin a ti bung vut.

"Tlem reng e. Mahse, I fanu an enkawl dan hi chu ka mit hian a hmu ve thung" ka ti veleh hmak. 

"Anih chuan nu hrawn tha ber nih beiseiin pathlawi min nei tihna mi? " Deusawh lutuk hian a rawn ti leha. A hmel landan pawh ngeiawm tak a ni. Mahse, a tawngkam ngeiawm mai mai inhneh tira, tlawm ka tum lo. 

"Enkawl ila chuan nuhrawn tha ber ka ni ang. Mahse, I enkawl duh miau si lo va, eng nge ka tih ang? " ka ti nghauh. 

"Maduhi kutah hian a him tih ka hriaa. Ka duhtawk, lo inrawlh suh" a ti leha, a aw a chang beng bawng viau.

"Nia, Maduhi hi i ring bawka. I lo nei zawk lo a ni. Nge i nau hi ilo thik ru viau zawk? " tih leh nuih ka ruala. Ka nuihzat vanga nui ni lo mah ila ka tilui thei. He chhungkua nena kan inzawm hnu hian nuih dan chi hrang hrang pawh ka thiam hnem ta tih ka ngaihtuah zauh. Mahse, Saitluanga hmel rum ul mai chuan ka ngaihtuahna ala peng lehnghal vat. 

"Lalbiakdik,eng nge i sawi kha i hre chiang em?" a ti nghal hmuka. Chhang loin ka dar ka tihsan khum zauh duh lek. 

"Engmah hriat i nei lo. Hun kaltawh ka nei ang bawkin i nei a. Kal tawh chu kal tawh a ni a, sawi sek a tul tawh lo. Enkawlna tha tak a dawng ka tih chuan duhtawk ve mai rawh" a ti leh hmuk. 

"Nia,chuvang takin Muansangi chungchang pawh ka zawt ngai lo che. Mahse, ka hriat dan leh insawi dan inpersan lutuk kar hi ka vei.A hmaa fel tak, fel ta lo thut kha achhan hriat tuma beih kha i tihtur ania. Chhuichhuah tumna i nei miah lo phei hi chu i nep ka ti" ka ti leh sak sak. 

Ka thilsawi chuan a deng na lehpek tih a inhumruh nasat danah ka hre thei a. Mahse,engmah sawizawm tum tawh lo niawm tak hian a che vut a, kawngkhar lam a pan ta daih. Ka che ve nghal phat mai. Rang lutukin Kawngkhar lam panin ka tlana, ka thlen khalha, Kawngkhar nghengin ka ding zui nghala. Ka hmaah tak a rawn ding ve nghal chu  a nimai. A lian bawk si nen min melh chhuk run a. Hlau miah loin ka melh ve ran thung. 

"Kalsawn rawh" a ti vawt ruih. 

"Ka dal che law? I duh leh chhuak la, inhauh buai lai tlansan kha ka ngaihdan a ni lo" ka ti ve tlat.

"Sawi tur ka nei tawh lo" A ti hmuk. 

"Aah,keiin ka nei alawm" Luhlul zetin ka ti ve tlat. A ner deuh nawka, a hmelah chuan kan thilsawi leh keimah chu min ning ngawih ngawih a ang ber.

"I ring ruh tereuhte kha ka titliak chak lo ania" a ti bung vut. Ngaipawimawh lo zetin ka din dan ngaiin ka dinga. Tharum tel lo chuan min kalsawn tir dawn lo tih a hrethiam ang. 

Min rawn hnaihchilh thut a. Min pawtsawn nghal dawrha, inring renga lo awm nimah ila kan inlenhleih lutuk a, ka per dawrh tho mai. Kawngkhar a hawnga, a chhuak zui nghala. Ka che phata, kawngkhar ka locked ve hmiah. A duh leh Pi Room-ah riak mai rawhse. Mutna tur a awm vek tho. 

Muhil thei loin ka let ka leta, thla khat em pawh inneih hmaa han mut hran ngawt mai chu mumangah pawh ka mang pha lo. Kan innei anga, harsatna pawh awmse kan inpui tawn zel anga, inhau buai em em loin kan hlim viau ka lo beisei a. Mahse, nupa nun hi chutiang ngawta awlsam anih loh zia ka hre thiam ta der mai chu ania. Duh ai chuan ka hre thiam hma lam mah mah a ni. 

Saitluanga nena kan inbiakna zawng zawng kha ka ngaihtuah leta,ka awmdan kha hmeichhe nasa tak nen danglamna ka nei lo. Ka duh loh lamah chuan ka lo nasa ve hle tih ka ngaihtuah chhuaka. Kan inhauh chhung lah khan engmah sawifiah tak tak si loin kan intawng el khum dun vak vak nimaiin ka hriaa. Kan thilsawi ho ka ngaihtuah let vang vanga, ka duh ber Muansangi chungchang kha chhanna min pe lo a. Lala-i enkawl zui tumna lam phei chu a sawi ri eih lo. Midang nuna inrawlh lutuk anga min chhuah  kha ka hrechhuaka, kha kher kha chu a dik tih ka hai lo. Mahse, inrawlh lo thei loin min siama, ngawi mai mai ila a fel thlup angin alang anga,chhungril erawh a kap reng ang. Ka awm hma pawha fel lo sa vek, an lo enliam mai mai ka enliam ve thei lo hi keimah ka indem duh bik lo.Diktak chuan ngawihbopui atan chuan a lian tham ka ti ve tlat tho. 

Ka menchhuah rualin khua a lo var tawh tih ka hre theia. Sana ka en a, dar 6 leh minute 10 vel a lo ni tawha. Darkar hnih vel chu ka muhil ve hman tihna nia. Muthilh miah loh ai chuan a zia hrim hrim.Ka lu na vangin ka bek tawn tawnah min kher ngar ngartu awm ang mai a ni a, ka hnar ping lutuk vangin ka thaw tha hleithei lo bawk. 

Peih lo chungin Tukverh hawn tumin ka tho chhuaka, ka tho chhuak chiah chu ka lu a rawn hai a, ka pai nghal dawrh a. Rang zetin khumah ka thu thla leh vat. Zirtawp zan atang khan mut that ka la nei miah lo a. Nizan bik phei chu ka tlaivar thuak a, ka taksain a zo lo tih ka hre thiam mai. 

Ka thut deuh vang vang hnuah ka zia ta deuha, ka tho chhuak leha.Tukverh lam ka pana, boruak tha hip tur awm se ka zia mahna. 

Ka inphihfai hnuah inhnuaiah ka chhukthlaa. Na-i amahin a lo awm a. Ka lut min hmuh veleh min lo nuih nghal var var mai. 

"Thingpui ka lo siam ang che aw" a ti lo nghal a. 

Ka inchak miah lo nangin "Pawi miah lo" ka ti ta tho. 

Thingpui tui hmel tak min rawn chhawpa, a khu hlat hlat bawk. Ka thutna atangin pawn lam ka hmu thei a, ka va en chiah chu Saitluanga Gate-ah a rawn lut ve chiah ka va hmu a. A inkhelhna thawmhnaw leh a exer lakna zawng zawng Roomah a awm vek a. Mahse, Pi Roomah dah a lo nei a ni chek ang. A dress-ah leh lan danah chuan exer la zo hlim a ni tih hai rual a ni lo. 

A rawn lut thawm ka ngaithla kara, ka hawi let chuang lo. Inchungah a chho tlang tih ka hre thei a. Room ka hawn leh hawn loh a han en dawn nihmiang ka timai. 

Thingpui ka in laiin Santi a rawn luta, kan han inchenchilh tak tak hnu hian zing a tho hma ngai vak lo tih ka hre ve a. Inchhung chet tam zawk lah Na-i hian a khawih vek bawk a. Tichunga an duat hluau reng mai hi ka hre thiam lo. Mahse, inchhungah hian engmah sawisel tumna ka nei tawh lo a. Kei la awm rei lo, engkim la zir tan hian sawi ve loh a him tih hi ka ngaihdan a ni tawh. Mahse, Muansangi chungchang erawh hriatchhuah ka tum tho tho dawna, a laklawhah tawpsan ka tum eih lo. A duh duh chuan min dodal rawhse.

Maduhi leh Lala-i an rawn tho a, Lala-i'n min hmuh veleh ka bula thutnaah a rawn thu nghal that mai. 

"Thingpui i in duh em? " ka ti a. 

"In lo mai rawhse. Vawiin bak Scool an kal tawh dawn loa. Kan tho hma lo bawk sia, chaw ei nghal mai rawhse" Pi Maduhi'n a rawn ti a. Chhang loin ka ngawi reng. 

"A-Ma, engtikah nge Roblox kha ka khelh leh ang? " Min en kiau chung hian Lala-i'n a ti a. 

"I duh hun hunah le. Mahse, tunah chuan chaw ei a hun a" ka ti a. 

"Nia, chaw ei phawt rawh. School banah i khel dawn nia. Bd, I va hritlang pik hmel ve" a tihzawm zat. 

"Ka sinus a zual pek anih hi" ka ti tha ve mai. 

"Anih kha... A hrehawm duh awm mang e. Ka thiannu pawh hian sinus a neia. A khawngaihthlak thei tawpa" a ti leh bawrh bawrh. Santi hnenah Lala-i chawei tur siam turin a ti a. A biak danah chuan ngaihbel tur takngial pawh a awm lo. 

Ka tho a, pawnah ka chhuak pheia. Pawn boruak vawt var mai chuan ka nuam lo lutuk pawh a tizia deuh hawkin ka hriaa. Lut leh mai loin ka awm ta deuh reng. Ka lu na leh rit luk vangin U Masangi hnenah ka nawm loh vanga chawlh ka ngaih thu ka va hrilha. "Ee, chawl rawh. A pawi reng reng lo, tunlai chu kan buai vak loh hi. I eng nge na a? Result alang tan der em ni? " a rawn ti fiam hluta. Kan nui dun bawk bawk mai. 

Chawei hma chu Roomah ka let leh ta miah lo. Hna kal ka tum chuang lo nangin chhuah tho erawh ka tum a. Kan In lamah va muthilh ka duha, bakah ka kal lo tih Saitluanga'n a hriat ka duh lo bur. Insiamthat tum chuang lo, a tihtur ni a ngaih vanga min buaipui ka duh lo. 

Chawei laiin Maduhi eng eng emaw sawiin a tawng siam siama. A khat tawka ka chhan bak chu Mipa pahnih an tawng lo hrim hrim. Chawei kham veleh inchungah Saitluanga a chho lehnghala. Tuktin insiam rual ziah kan ni a. Chho lo a awm reng chi niin ka hre lo. Bakah, kan boruak a tha lem lo tih midangin an hriat ka duh lo hrim hrim. 

Roomah hreh ru zetin ka lut a, kan thawmhnaw dahna leh incheina room hi kan room chhungah tho room hran siin a awm a. Kawngkhar a khar loh avangin chutah chuan a awm tih ka va hmu thei a. Roomah ka lut tih a hriat loh ka ring lo, mahse a rawn hawi let lo hrim hrim. 

Ngawirengin Bathroom ka pana. Ka inkalhkhum hnuah ka thu vang vanga. Lo kal hman se ka tih tehreng nen ka chhuah leh chuan Tukverh bulah pawn lam enin, kekawr ipte zen chungin a lo ding a, ka lut thawm hriain a rawn hawi nghal vut. 

"I nawm vak loh chuan hna kal angai hleinem" a ti hmuk. Ka inthup viau chungin a lo hre leh tho. 

"Nawm loh ka sawi em ni? " ka ti hmak. 

"I sawi loh pawhin ka hria. Mahse, Nuam i intih leh i thu nitehse" a ti leh nghut. Chhang loin thawmhnaw dahna room ka pan pheia, ka lut a, mahse kawngkhar ka khar lo. Ka thawmhnaw hak tur ka en kual nghal dan dana. Diktak chuan tunah pawh hian mut thlawp ka chak ru ngawih ngawih. 

"Tuirialah Minister Prog hmanpui turin ka kal dawn a" Ka hnung mai atangin a rawn ti a. Min en reng tho ringin ka bu satliah mai. 

"Ka rawn hma vak lo maithei" a ti leh a. Chu pawh chu tawng loin ka bu leh mai. 

"Min be peih lo viau nangin harsatna i nei anih chuan msg ilo dah dawn nia" a ti leh nghuta. Ka hawi let chuang miah lo nangin  ka thil tih lai ka chawl a, a kalsawn thawm leh room kawngkhar a hawng ri leh a khar ri bakah a pen thawm hla tial tial chu ka ngaithla a. A pen thawm a tawp takah chuan ka mittui a rawn tlaa, tuikhuah sah hawk ang mai hian ka tap chhuak nghal hawk mai bawk. 

Ni a liama, kar a liam leha. Christmas thlen nan ni thum chauh a awm tawh. Zan khat bak kha Saitluanga a riakchhuak leh ta lo a. Zantin khumah a mu ve ziah nangin min sik hlau niawm takin a sirah a mu a. Kei a sirah ka mu bawka. Inhnaih em em siin kan inkar erawh mel tamtak a inhlat ang mai a ni thung. Midang hriat lai leh hmuh lai chuan buaina nei angin kan awm lo ve ve a. Tha takin kan inbiaa, Mizo chhungkuaah hian midang bula nupa incare hliau hliau te kan lo ti ngai lo thanga. Hei tak hian kan nupa kar fuh lo pawh thup mai a ti awlsam phian. 

Ka duh loh naah chuan mifel ka ni lo tih ka inhrechiang tial tiala, ka tum tawhah bansan mai mai chi ka nih loh zia pawh ka inhre thar zel nimaiin ka hria. Kan chengho rei ang zelin Lala-i min ngainatna pawh a ni telin a zual ve zela. Midang mitmei ven vanga hlatsan ka tum eih lo. Tha ka tih angin ka nung tawp a, Saihminga leh Santi vanga buaina neih ka tum tawh hek lo. Muansangi chanchin ka hriat theih dan tur ka buaipui ru renga, mahse tumah amah han hre tha lutuk ka tawng tlat lo. U Masangi lahin a sawi tawh chin bak kha hriat zui vak a nei lo a, a thian kawm thin te lah chu Maduhi leh Mki bak sawi tur an awm lo.Anni hnen atang hriatfiah tum chu a atthlak tih ka hai lo. Atirah kha chuan Rinawmna zawh ka tum a, mahse ka ring zo lo leha. Saitluanga thianpa Zothana pawh ka ring zo chuang lo. 

Tum khat ka Bazar kal naah Pi ro chungchanga an rawn ber Zothana nen kan inhmufuh a, thil kan ei dun a. Pa kawm nuam leh rintlak tak a ni bawka. Ka ngaina viau sa a. Kan titi na lamah Saitluanga nu chhungte lam ka zawt thawi mai maia. Ka rinaiin a lo hre thaa, Muansangi pawh a lo hre viau mai. Tu te nge annih a sawi takah chuan an mahni tak hre lo mah ila an dawr hming ka hriaa. Nutei nen Fridge kan lei dawn pawhin an dawr atangin kan lei tih ka la hria. 

"I pi lo kha chuan Muansangi hi an buaipui zui lo a. Tinge nangin i rawn buaipui ve tak? " a ti a. A tarmit phena a mitmeng fing zet chuan min en uluk ngang mai bawk. 

"Ka piin a lo buaipui maw? " Ka ti ha mai. 

"Um.. Buaipui e" a ti leh a. Engvangin nge Piin a buaipui ka hre thiam lo. 

"Ka zawt che tih hi midang hriat ka duh lo ania aw" ka ti sap. 

"Tehreng mai.. Keipawhin hre lo se ka duhpui che" a ti leha. Ani hian eng emaw tal chu hriat a neih ka ring ta tlat. 

Chhuak turin ka insiam mawlh mawlha. Saitluanga erawh kan veng ho buatsaih, Badminton tournament khelhna lamah a kal tawha. Amah hian 35+ zingah a khel a, zan lamah final an khel dawn a. Chhun lamah eng eng emaw tihtur an nei a, abuatsaihtu zingah a tel avanga kal anih ka ring mai. 

Scooty ka khalh chhuaka, ka Kalna tur lai tak ka hriatchian loh avangin Zothana ka be paha. Dawhthei takin min hrilhfiah zela. Ka kalna tura a sawi, building sen chul deuh rup bul ka thlen thlengin min hrilhfiah tluan zak.

Kawngkhar ka kik kauh kauha. Minute khat vel a liam hnuah an rawn hawnga. Nu pakhat, kum 60 bawr vel tur hian min lo dawngsawnga. A hmel a nelawm sarh mai. 

Inchhungah kan inzui luta, thutna min kawhhmuh hnuah "Saia nupui maw i nih? " Min ti a. Ka bu nghat.. 

"Kei hi Saia Pu nupui ka nia. A nu u chiah nupui. Muansangi kha kan fanu a ni a" a ti dam thlap. 

"Zothana khan i hriat duh te min rawn hrilh thawi thuak thuak tawha. Ka hriat ang ang hrilh tur che in Zothana khan i rintlak tih min rawn hrilh a. Ih e, Ka fanu chungchang kha kei chuan sawi harsa ka la ti reng maia. A harsatna ka lo hre lo kha hrehawm ka tia" a ti zuai raih mai. 

"A harsa ngawt ang" ka ti sap.

"Um..A boral hnu lawkah khan a thian pakhat hian ka lehkha tur min rawn pe a. Saia ta tur hi pakhat a tel bawka. Ka lehkha tur min pek leh Saia lehkhathawn kha Mami ziah ve ve a ni a. Saia kha ka pe a. A ziak kha a chhiar lo emawni le ka tia. Kei chu ka chhiara, ka fanu kha ka lainat thar em em thin a" a ti a. Sawi harsa a tihzia ka hriaa. Tim angreng takin a kut ka vawnsak a. Nghet zetin min lo vuan let ve vat bawk. 

"In inneih te khan min sawm ve beiseina nen kan lo thlir renga, engmah kan hmu ta lo a. Kan pa a lo boral tawh bawk nen, kan inzawmna hi a chat ta tak tak anih hi ka ti ve taa. Mahse, Zothana'n Saia nupuiin min hmu duh tih a rawn sawi khan mak ka tia. Eng nge i duh ang aw ka lo tih laiin Mami chungchang hriat duh i nei tih a rawn sawi a. Mak ka lo ti khawpa" a ti leh a. Ngai a awh leh ta deuh tih ka hriaa. A kut ka vawnna ka thlaha. Ka thu ngil auh mai. 

"Hriatthiam loh ka nei a. Tu te mai pawh hian Muansangi kha hmeichhe smart tak an ti a. Mahse, mi tlemte hian hmeichhe fel lo tak angin an sawia" ka ti chhuak halh ringawt. 

"Um, I chhungte chuan fel an ti lo ang ka ring" a ti vata. A nui zui sak nangin a mitmengah chuan a nuih a za miah lo tih ka hai lo. 

NOTE : No Edit...In tan hian ka va thawkrim em😝 insuk seng leh zar reng renga buai nilen chuan han ziah RIL viau leh LUNGRUN  vel har tak a ni🤣

Lo chhiar liam nawk nawk teh u.. Tin, Comment hi ka chhiar vek zel a, ka lawm thei vur vur lutuk😄Ka lawm e.. Eeee, ka YouTube Channel kha lo subscribe zel ula, He Story caption-ah hian Channel link ka rawn dah dawn nia.