Bibi-30

Bibi - 30

"Ka fa anih vang ni hauhloin a naupanlai tangin naupang fel leh thuawih tak mai a ni a. An unau dang ho hrim hrim zingah pawh ngainat hlawh tak a ni a. Abikin Saia hian a duat em em a, an han puitling chho pawh kha an kum a inthlau viau nangin an inngaina bika. An In lamah pawh a va riak fo a. Keini nu leh pa kha chuan unau inngaina tak anni mai ang chu kan lo tia. Mahse, a rai ta hlauha, a rai atang khan zawi zawiin a danglama. A hrin meuh kha chuan danglam hneh tawh tak a ni. A hring thla chauha, a rawlbosan nghal deuh chu animaia" a ti leh dap dapa. Hun kaltawh chhuikir niawm takin a en ngai a en vang vang bawk. 

"Han sawi dan ber tur pawh ka hre lo va. I hriat duh lai min zawt mai zawk ta che" a ti leh a. Ka beisei phakbaka a lo inhawng chu mak ka tihrualin ka lawm bawk. Zothana'n a lo hrilh chian vang a ni tih erawh ka hria. 

"Saitluanga lehkhathawn tur kha a inziak i hre mial em? " ka ti a. 

"Hre miah lo mai. A inchar vek a, ka ta tur a ziah ang tho hi anih ka ringa. Mahse, engmah a rawn sawi zui ta lo leh min rawn ngaihven zui ahnekin min tlawhpawh lo hmaka. A fanu Maduhi'n a enkawl hi ka sawisel lo. Mahse,lehkhaah hian keiman enkawl tura min duh zia leh Saitluanga pawh a hrilh tih a ziak veka. Mahse, engmah danglam awm loin tisawn an la awm a. A chang chuan ka haw ve lek lek thina, mahse hei tunah ilo awm a. Rei rial lo a hriatchian i rawn duh hi ka lawm lutuk a, ilo kal hma khan ilo kal leh duh lo ang tih hlauin ka lo thaw dep dep maia" a ti leh dap dapa. Ka ngaihtuahnaah Saitluanga'n lehkhathawn engmah a hmu lo anih ka ring ta thut. A nu pawhin a fanu a tuithlar titih kha a ngaidam hmiah thei anih chuan engvangin nge Saitluanga pawh hian Muansangi kha mi awmtha duh lo a tih reng bik ang? Nge thuziak a inang lo zawk? 

"Lehkhathawn chu amah Saitluanga i pe em? Nge midang i pektir? " ka ti a. 

"Saihminga zawk ka pe a. Khanglai kha Saitluanga Mamit awm lai ania. Amah kha biak ka tum hian phone a la thei ngai lo va. Tea zawk ka pe a. A lo pe em tih ka zawh khan a pek thu a sawia" a ti leh a. Sawi leh mai tur hre loin ka ngawi rauh rauh mai. 

An in ka thlen khan dar 11 vel a ni a. Ka haw meuh chuan tlai lam dar 3 a ri tawh. Midang chimbuaitu nei loin kan inkawm a, thil tamtak min hrilh mah se ka hriat duh ber erawh chu Muansangi lehkhathawnah fiah takin ka hmu ta zawk. A titi dan atang khan a fanu a lo la sun reng  tih ka hrethiama, a chanchin sawipui peih apiang chu a pan ruak ruak duh hialin ka ring. 

Muansangi lo khawngaihthlak zia ka hriatchian takah phei chuan ka tih loh tur leh ka kuang lo nawr anga inngaihna pakhatmah ka nei tawh lo a. Ka lainat em em a, hrehawm taka siamtu tu te nge sawi lo mah se rin ka nei tho tho. An thiltihsual hi ka man chhuaha, hei leh chen zalen taka an lo awm hi fiahna ka neih hun hunah ka duhtawk san chauh ang. Mo nasa leh midang nunhluia buai anga min ngaitu chuan min ngai zel se pawi tihna ka nei lo a. Midang vanga ka tihtur thulh ka duh hek lo. 

Haw tlang loin MCah ka lut kawia, Rohminga nau dawrah Lawmi'n coat ka duh tur chi a awm thu leh coffee rawng min lo hauhsak ve tawp tih min rawn hrilh vanga pengkawi ka ni a. Ka chhuah chhan tur Saitluanga ka hrilh lo hrim hrima, ka kal dawnah erawh Na-i hnenah ka bazar dawn tiin ka hrilh thung. Bazar hmingpu a kal ve si,engmah lei haw leh si loh aiah Coat tal lei ila a zia ang. 

An dawr ka thleng a, kan ri nghal hlut mai. 

"Awi, Bibi, pasal neih i va ngeih ve. I no surh mai. Ka ti tak tak" Thutak zetin a ti a. 

"Ka no sa ve hrim hrim zawk alawm" ka ti chu kan nui dun hawk hawk mai. Christmas ahnai tawh bawka, Bazara veivak an tam em em a, Dawrah pawh an buai viaua. Nidangah chuan dawr nghak pakhat a chhawr thina, tunah chuan pakhat dang a lo chhawr belha, customer buaipuiin a naute pahnih an vir buai dun zak zak reng mai. 

"Inbuai si, thut rei ngam pawh a ni lo..ka lo ha chhin anga,ka kal leh mai dawn. Mahse,ka dar hi a hlai ve reuha, hak tawk awm tak hi ka ha tawk lo leh tlat zel" ka ti a. 

"Lawmi'n i ha tawk ang a tih kha. A confi lehpek lutuk" Nui hak hak chungin a ti a. An nula pakhatin coat uk, thui dik mangkheng a rawn la nghal vata, ka ha chhin a. Ka ta tura thui niawm takin ka fit thlap mai. 

"Kha i inhmeh zia kha.. I ta tur hrim hrim niawm tak a ni" phur fahranin Mahmingi'n a ti nghal hluai. 

"I sumdawng mi sia e" nui chungin ka ti a. Mahse, sumdawn mi vang ni lo a ka inhmeh tak tak thu uar zetin a sawi leh teuh. 

"Bd.. " Min rawn ti a. Ka hawi leta, Zothana a lo ding reng. 

"Aah, nang maw? In bazar em ni? " ka ti ve vat. Muansangi te In ka panna lama kal paha kan inbiak bak kha kan la inbe leh loa. Ka kalna chungchang pawh zan lamah ka hrilh ang ka ti chauh kha nia. 

"Bazar ti ila Laptop ka siamtira, ka lam a" Tih pahin a bag-ah lai a beng thak. Mahmingi nen ka hmelhriattir nghala.

"I haw tawh dawn mi? " a ti a. 

"Um, ka lo tum meka. Engin nge i kal? " ka ti ve a. 

"Scooty ka kenga, parking lam pan ka lo tuma. Chhuk rual ila" a ti leha.

Inhnuai lam panin kan chhukthlaa. Kan lut thlakna floor kil sirah chuan ei tur an lo zuara, ka thil ei chak leh ngainat chi hlir ka hmuh chuan ka riltam zia ka hrechhuak chiah. 

"Thil ei lawk ila, I duh em?" Ka ngaihtuahna hria niawm takin a ti ta hlauh. 

Thutna tur an remah chuan kan thu duna, eitur ka chah zo chu a nui nghal huk huk mai. 

"I ei zo thei dawn mi? " a ti zuia. 

"Bawng pum khat pawh ka ei zo thei mai thei" Nui chungin ka ti ve thung.

Eitur an rawn dah hmain kan titia, ka rin ang ngeiin ka kalna lam chungchang min zawt ta chat. 

"A sawi nuala, a fanu a sun na tawpa, ka lainat lutuk" ka ti hap.

"Nia, a tuar khawp mai. I hriat duh i hrethei ta em? " a ti leh a. 

"Um, hria e.. " ka ti leh ringawt. 

"A lawmawm nasat chu. Pi khan a buaipuia, a vei khawpa. Mahse, ani tar chak tawh lo tan khan tih theih a tlem a. Eng eng emaw chu a hre hman a" a ti leh a. Ka tawng leh hmain ei tur an rawh daha. 

"Ei ila... I ei zawh vek theih chuan ropui ka ti ngawt ang che" Nui vur vur chungin a ti a. Ka hmaa eitur inrem tlar dal chu a khu vat vat hlawma, a tui hmel takzet. 

"Ka ei zo e' tih pahin ka plate ka nawrsawna. A nuih a za ngang mai. Eitur a chah tam ve lo bawka, a chanve vel ka ei lai khan a ei zo fel der tawh. 

" Kan Saitluanga hian a chawm tha lo che a ni ngei ngei ang" Nui huk huk chungin a ti a. Ka nui ve ringawt. Ka purse ka phawrha, mahse ka pek hmain Zothana zawkin min pekkhalha. "Pe duh suh, ka treat ang che" a ti ta tlat. 

Parking kan panthla dun leha, ka ngaihtuahnaah nichina a tawng dan kha a lo lang thut a. Ani pawh hian eng emaw chen chu hriat a neih ka ring ta tlat. 

"Enteh... Thil ka zawt che anga, I duh leh min chhang anga, duh leh min chhang lo anga" ka tichhuak nghala. Mak tih hmel deuh hian min en hu ringawt. 

"Muansangi leh Saitluanga chungchang hi hriat i nei teuh tiraw? " ka ti ta phawng. Min en loin hmalam a en a, ka zawhna khan a thawng em pawh ka hre thei lo. Aaa, thawng pawh ni se a tilang chuangin ka ring lo. A hna avang hian thildang pawh zep angah dawn lutuk tlat a, zawhna awm ang lo pui pui a dawng fo dawn tih lah achiang reng. 

"Engtizawngin nge min zawh? " a tih takah chuan thil tul lo pui pui ka lo ngaihtuah hmanhmawh chu ka nuih a za angreng. 

"Ka sawithiam chiah lo. Muansangi nu-in a rin zia che ka hmuh khan eng emaw tal inzawmna inneih ka ring ve tawp" ka ti leh ringawt. 

"A hranpa tak chuan inzawmna a awm lo a. Mahse pi khan Angela-i angaihpawimawh em avangin Muansangi nu nen kan inhmuh fo angaia. Inhmu fo ta chu min ringngam ve aniang" a ti dam thlapa. Eng vangin nge Piin va hmu tura atih ka hre chaka, mahse aman a sawi si lo va, han zawh leh talh nuam ka ti lo. 

"Ka sawitur a ni chiah lo maitheia. Mahse, I thil buaipui hi i pasal hian a hriat chuan a lawm vak ka ring lo a. Chuvangin hriat chhuah i nei anih pawhin sawi chhuah dan leh a hun tur i thlan thiam angai viauin ka ring. Pi nen pawh khan aruk takmeuhin kan buaipuia. A rin ber nimahse Saitluanga hi engmah khalam kha chu kan hrilh ngai lo" Thutak zetin ati leh a. Saitluanga rilru ka hre chiang tawk tawha. Fimkhur tura min tihchhan zawh kher ka mamawh lo a. Engmah sawi loin a thusawi ka pawmpui tih lantir nan ka bu nghat ringawt. 

In ka thlenin ka Scooty ri hria niawm takin Lala-i a rawn tlanchhuak nghal vata. Scooty ka hun fel chuan ka bul a rawn thleng phei der tawh. 

"A-ma, eng nge min lo hawn? " a ti nghala, min lo zawh ka rin avangin a lawm tur ka lei haw nual. 

"Inchhungah kan en dawn nia aw. Kha, hei hi khai la" tih pahin chips ka dahna polythene ka pe a. Phur zetin ala nghal vat a. In lam panin ka hmaah a tlan zui nghal dat dat mai. 

Living room thuttlengah ka thilhawnsak ho a bun chhuaka, nuam ti em emin a ti ti bial biala, zawhna min zawt pah reng bawk. 

A ngainat em em chips ka leisak chu a laa, min hawntir a, tuiti em emin a ei nghal a. A kawrlum hak rawng, Eng lar lam chuan a vun a ti ngo zuala, alang thar sar mai. 

"A-ma, zanah Apa Mama te an inkhel dawna. Ka kal ve dawn asin" a ti leh siam siama. 

"Chuti maw? Min hruai ve ula" ka tifiama. A hmelah chuan phurna niawm tak a lo langa. 

"Nia, anu ka hrilh anga. Apa pawh a kal dawna. Ih maw, apa Mama chu Pa Remfela nen an tang dun maithei a. Lehlam chu ka hre lo a" a ti leh a. Ka nuih a tiza ngang mai. Inchhunga an sawi a hre ve anih ka ring mai. 

"Ehe!!! Saidingpui, engvangin nge chips ilo ei a? " Pi Maduhi'n thinrim zetin a rawn ti a. Engmah pawh kan sawi ve hmain a rawn kal pheia, a phihthlaksaka. Living room a dust-bin kan dahah a vawm lut nghal daih. A rawn tihdan chuan min khei zak nangin Lala-i avangin thinrim lo turin ka infuih ru mawlh mawlh. Naupang awm laia inhauh buai ka duh lo bura. Bakah, a tul hun hmaa lo inhauh hian ka thil hriat duhna kawngah minti sukuk zo vek thei tlat. 

"Keima thiam loh ania. Ka rawn hawnsak bakah ka khehsak nghal a. Aman min dil pawh a ni lo" tim hmel takin ka ti a. Mahse, ka chhungril erawh a sahal huam huam thung. 

"Amah zawk hi vawitam ka hrilh tawha. Chips ei loh tur, a hang lutuka i ngeih lo ka ti ngun lutuk. A reng rengin lo haw apiang hi thil min lo hawn em a ti ziaha, hei pawh hi ka hau ngun tawh" a ti leh hmawk hmawka. A awmdanah chuan thildang a a thinrimna Lala-i chungah a hrithla a ang ka ti ber. Ei a phal lo anih pawhin tha taka laksak mai tur ania. Phihthlasak mai pawh duhtawk loin a paihsak leh zel kha a uchuak ve tlat. Bakah, a hang lutuka angeih lo tih phei kha chu ka awih zawng a ni rih lo. Niminah pawh amah ngei hian chawei naah a hmehtir thlap. Ka hawn anih vanga ei tir phal lo bak a ni nek lovang. 

Lala-i tap ring ngam si lo insut faih faih chu ka en a. Nu tan fa thunun hi a awm renga. Mahse a tawk chin a awm ve a. Bakah, nu hrawn anihna hi keimah hian ka lo hre lutuk deuh pawh animahna le. Nu tam zawkin an fate an thunun fo dan tho a ni ang. Ka rilru kal dik lo laklawh vang hian ka lo la na mai mai zawk a ni mai thei. Mahse, a tih thin dan hi chu ka lo tuar tawh thil anih avangin keimahah ka inchan a, ka la na lo thei chuang lo.

"Eng nge a? A hlim viau khan ka hre sia, tinge a tah leh tak? " Saitluanga'n a rawn ti ve teh tlat. Lala-i ringawt ka lo ngaihtuah bawk nen arawn luh lai ka lo hre lo hrim hrim. A rawn kal phei chu ka va melh zawka. Min en ve loin Lala-i a en a. Lala-i thutna bulah a dinga. 

"Chips a lo ei peka. A pum hian a zo lo a, ei loh tur tih ka hrilh fo sia. Thu a awih thin lo a" Pi Maduhi'n titha inti hmel fe hian a ti a. 

"A ei fo emaw ka tia" Saitluanga'n a ti leh nghut. Eng chu nge maw a hriat le? Nidangah Lala-i chungchangah ala inrawlh ngai eih si lo. Inrawlh chu sawi loh, ka sawi ve a duh loh vanga tun thlenga la inbe tha duh lo kan ni zawk ania. 

"Um, ei thin e. Nimin khan a pum a sawisel a. Ka cousin, naupang Doctor kha ka biaa. A chips ei thin hi ei tawh lo turin a tia" a ti leh zat zat. 

A thilsawi chuan Saitluanga a hneh em tih en niawm tak hian nui sawngin Saitluanga a en a, mahse "Chawei dawn hnaiah hian in ti tap thina. Chaw a ei tam loh phah viau zel ania" a ti leh ta tlat. Mak ka ti lutuk-in Saitluanga ka melh reng a, keimah ang bawkin Pi Maduhi pawh a thawng ve niin ka hria. 

"Le,nangpawh tap lo la, thildang ila neih teuh kha, khang kha ei rawh. I tah chuan zanah an hruai ve dawn lo che ania" Lala-i en chungin a ti leh a. Mi a ang maiin ka inthing nawk ringawt. 

Pi Maduhi kal tau sawk sawk chu chawh ti ru zetin ka en a, ka nuichhuak teuh ngang mai. Lala-i ka en a, Saitluanga thusawi awihin sweet a hmuam pang panga. Naupang tihtakah engmah hre hmel pawh a pu leh tawh lo. 

"Lo kal rawh, min inthlakpui la" ka ti a. Phur takin a rawn tho a. Inchungah kan inzui chho a, Saitluanga erawh thatchhe zeta thu chungin phone a en a. Min be lo va, ka be bik hek lo. 

Ka inthlak laiin khumah ka phone a en a. Amahin a nui leh kar kar thin a, achang leh a tho a, an tihdan a zir a. Hmeichhe naupang ti dek leh luhlul zet, nelawm lo tak kha chu a ni reng bik lo. 

Bathroom-ah ka hmaiphih tumin ka luhsana, ka lut chiah tihin miin an rawn call a. "A-ma, miin an lo phone che" a rawn ti nghal lang lang. 

"Um, lo chhang rawh. Ka hmai ka phih laklawh" ka ti a. A be thawm erawh ka ngaithla pah renga. Loudspeaker-ah a dah avangin a rawn be tu chu Nutei a ni tih ka hre thei a. Thil vei chi tihtakah naktuka kan chaweikhawm tur bak a rawn sawi ka ring lo. 

Roomah ka lut a, Nutei leh Lala-i an lo inbe ve nasa maia. Lala-i'n min hmuh veleh "a-ma a lo kal tawh a" a ti ve ngei. Ala naupan ngaihtuah hian thil nachang a hre phian zel. 

Nutei nen kan inbiaa, ka rin ang ngeiin chaweikhawm a rawn sawi a. Kal hma turin min rawn tia. "Saitluanga ka be vek tawh a. Nangmah be tur chein min ti kher a. Lala-i kha rawn hruai ngei ngei rawh" a rawn ti nghal bawrh bawrh. 

Kan inbiak laiin Saitluanga a rawn luta, Lala-i'n a lo ko vat. Saitluanga hian a duat ngai lo a, angaihven ngai hran lo bawka. Mahse, biak chu a be ve fo thoa. Lala-i pawh hian a chenpui reng na na na chu a nel em em reng tho. 

"Apa Mam, A-ma hming i hria em? " Intithei zetin a ti a. Saitluanga'n min rawn en a, ka dar ka tisang zauh ringawt. 

"Hre nang, I hria mi? " a ti tha ve mai. Phone ka charge a, ka charge zawhah  ka hmai ka hru hula. A ro lutuk loh nan moisturizer ka hnawih leh a. Ka mitsirin Saitluanga leh Lala-i inbia chu ka melh palh reng bawk. 

"A-ma hming chu Bibi ania. Keimah chauhin ka hria ania aw" a ti leh a. Ka mengphar awk mai. Hetah hian tuman Bibi min ti ngai lo a. Min kotu ber Saitluanga lah hian midang hriat laiin BIBI tiin min ko ngai der si lo. 

"Ehe, I va hre ve. Tu nge hrilh che a? " a ti a. "Apiin a lo phone a, I nu Bibi a awm em a tia. Ka hre lo tep alawm" a ti leh ngial. A tawngkam puitling vel lutuk chu ka nuih a tiza ngang mai. Saitluanga pawh a nui ve hawk hawka. An pafaa an inkawm chu mittla dawnin ka en a. Ka mumang a ni lo tih ka inhrilh nawn sek bawk. 

Lala-i chawei tura Santi-in a rawn koh hma chuan Saitluanga nen an inkawm ta reng. Saitluanga'n a phoneah Roblox game a download ve a. Kan phone atangin Lala-i'n a khel a. Chawei tura an rawn koh pawhin a tum nghal bar bara, mahse Saitluanga'n thupe deuh taka a tih takah chuan a zia a thlak veleh nghal mai. 

Lala-i awm loh hnuah erawh kan boruak adang leh ta daih. Thawmhnaw nawh tur ka dah khawm ka la chhuaka, ka nawt peih vak lo nangin tihtur ka duh tlat. Kan inhauh tuk atang khan tha takin inbe vek tho mah ila sex hman chu hnai lo tak a ni. Kuah takngial pawh kan la inkuah leh lo. 

"Khawnge vawiin i kal a? " Kan ngawih ren rawn hnuah a ti sup.

"Bazarah... " ka ti liam puat.

"Eng nge i leia? " a ti leh a. Nidangah ka thil lei angaihven ngai der si lo. 

"Coat ka lei a" Alangah erawh chuan ka ti tha ve mai. 

"Um... Naktuk kha i nutei khan kal hma turin a duh che a" a ti leh a. 

"Nia, min rawn call" ka ti tawi fel leh than. Mahse, min biak zel a duh niin ka hriaa. Mak chu ka ti tho. Inbe mang lo leh inpawh miah lo a awm hi a ning ve ta deuh nge mawni? 

"Ni 24ah Bazar ila... " a ti leh a. 

"A tawt awm em mai" ka ti ringawt. Bazar kal tura insawm hi kan boruak chu tha se mak ka ti lovang. Mahse, kan pahnih inkar chhe lutuk vangin amak zo vek tho. 

"A hlimawm ve mai mai alawm.. " a ti tha leh mai. 

"Zanin chu lo kal ve la, Lala-i te pawh an kal dawn a" amah bawkin ati leha.

"Kal turin min duh tak tak em? " ka ti nghat. Chhan ka tumdan pawh a ni chiah lo va, mahse ka lei ka veng zo lo. 

"Um.. Duh e" a ti tawi tuk. Sawi leh tur hre loin ka ngawi ta rauh rauh. 

"Maduhi awmdan kha ka lo hmu a" Thluk nei lo zetin a ti mar ut. Rang zetin ka hawichhuaka. 

"Maw? " ka ti ringawt. 

"Lala-i eitur a laksak leh a paihsak kha Choka atangin ka rawn hmu a" a ti leh nghut. 

"Ti nge chu chu? " Ka ti lawi rat mai. 

"Ilo haw hma lawk pawh khan khatiang chips kha a ei renga. I pek kha a duh lo hrim hrim anih hmel" a ti bung vut.Eng emaw sawi tumin ka ang ziaua, mahse ka chip leh ta daih. Min ngaitheih loh zia sawi chiam ka chaka. Mahse, ka sawi ta lo. 

Christmas kan hmang liama, kum thar pawh kan chuangkai taa. Saitluanga nen kan inkar la tha em em lo mah se a hranpa taka inhauh kan nei leh ta lo a. Hunpui kan hman chhung khan kan chhungte ve ve lakah kan che tha ve ve a. Kan duty kan hlenchhuak tha viau ka timai. Mahse, Lala-i chungchang erawh tlai khat bak kha sawi zui a nei leh ta chuang loa. A ngaihven zui tura ka ngai kha beiseina awmze nei lo a ni leh ta tho. 

Kan nun pawh danglamna nei em em loin nitin angai angin a kal ve bek bek a. Hna kan tan leh tawha, Decemberah khan vawt ka tih tawh tehreng nen January phei chu vawt na thak thak tak a ni. 

Haw pahin Nutei te ka tlawh kawia. Lawmi chauh a lo awm a, "B, hei hi i hawn tur.Ka nu khan in ta tur a tiin ka hria" Tih pahin Lawmi'n dawhkana Balhla awm a kawka. 

"Min rawn hrilh alawm. Inah pawh a awm tho asin le"ka ti a.

"Kan huan ami ania. In ei ve atan a duh aniang" a ti awlsam leh mai. 

In ka thlenin Nu Saipuii a lo awm a. Ka ni ve tur a ni tawh tih ka hre reng nangin kan inneih tirh atang khan koh dan thlak hi harsa ka ti tawp. 

"Eng nge i rawn tih? " Ka ti a. 

"Ka lo leng khat em a, ka rawn tlawh mai mai che u mawle. Hei, haw ka lo tum tawha" a ti a. 

"Aaa, chaw ei ve nghal la" ka ti ve thung.

"Ei lo vang. In lamah nu ber awm lo chu an buai thin" ati deuh tlat. 

Kan titi luam hnuah a haw a. Ka balhla hawn te ka hawn then tir veleh chhawnga. A lawm thiam ngang mai. 

Room a ka awm laiin Saitluanga a rawn haw a, a hmel dur khup maiah chuan thinrimna a nei tih ka hre thei nghal mai. Thutthlengah a bag a thehthlaa, chak zetin Tukverh lam a pana, tukverh a hawnga, a awmdan chu Ransa hliam tuar thinrim a ang ka ti ber. 

"Thil dik lo a awm em? " Ngawih reng aiah ka ti a. 

"Eng nge ka ni bulah i lo sawi? " a ti hmuk. A sawi awmzia ka hre lo.. 

"Eng nge ka sawi anga? " Angaihna hre lo zetin ka ti ringawt. 

"Nupa inkar buaina hi pawn lamah thlen loh tur asin. Nupa bawk hian kan chingfel thei veka" a ti leh a. A sawi awmzia ka la man pha chuang lo. 

"Engmah i sawi awmzia ka hre lo. Ka hawin a lo awma. Kan titi satliah bak engmah kan inkar ka sawi ka hre lo" ka ti vin ve ta thak. 

"Muansangi chanchin ilo sawipui tih ka hriat loh ring suh" a ti  vawt ruih. 

"Ka sawipui niloin kan sawi ve ve. Chupawh vawi hnih khat bak ahming kan lam lo" ka ti ve hmak. 

"Ka nunhlui i buaipui hian eng nge  hlawkna i neih ang? " a ti leh hmuk. 

"I nunhlui ka buaipui hran lo. Muansangi chungchang phei chu i sawi ngai loin ka hre vek" ka ti ve leh hmiah.. Ka sawi zawh rualin a thaw nghal hawka. A hmai a tuai nghal pawk mai. 

"Engvangin nge min neih a? " a ti ro hulh.. A zawhna chu ka beisei loh lam anih avangin ka haw hak thung. 

"Pawisa vang nge i lakah hian ka hriat lohin tihsual ka lo neia, Phuba lak tur i nei zawk? Theihnghilh ka duh em em nunhlui min hriat nawn tir i tum reng hi ka hre thiam thei lo che" Beidawn hmel lutuk hian a ti chhuak leh hrawih. 

Mipaah pawh inti pa ve tak, induhtawk leh ngeng em em thin kha a mangang ve ta niin ka hriaa. A awmdan chuan eng emaw ti takin min fana, ka khawngaih ta tlat.... 

NOTE : Zanin chu dah loh mai ka tum zeta, mahse tihtawp thuai ka duh tawh si avangin zan khat lek han awl leh kha ka ui tawha. Hmanhmawh angreng takin ka ziak leh sawk sawka. Thawnthu inla lawn fu chiah lo leh ziah sual  a awm maitheia. Zan dang ang bawkin min lo hre thiam leh hram hram mai ru.... 

Mit hi a pheeeee em em a ni. Ka lawm e☺