Bibi - 31

 Bibi - 31

"Engmah tihsual i nei lo" ka ti dam thlap. 

"Anih si chuan pawisa vang maw?" Na tuar niawm tak hian a tichhuak leh hrawk. 

"Ni chuang lo... " ka ti leh ringawt. 

"Ka hun kaltawh ringawt i buaipuia,thil tha lo tak ti ang maiin min chhui renga. Ka hne lutuk. Khawngaihin duhtawk rawh, ka ngen che" Beidawn hmel lutuk hian a ti leh a. A awmdan chuan inhauh emaw inhnial zui tura ka lo intih paukhauhna zawng zawng kha a tibo duak tawh. 

"Inmil lo renga awm hi nuam ka tih ring lo la..Ka hriat duh hi min tawmpui thei la chuan kan buaina hi a kiang mai tur ania. I duh si lo alawm" ka ti hap.

"Thil kal tawh sawi hian awmzia a nei lo ka tih kha, I siam tha thei dawn bawk lo va. Duhtawk la, kan buaina hi a fel zawk ang" a ti vawt ruih. A hmel landan pawh a dang leh ta daih. 

"I hun kal tawhah ka buai hrim hrim lam a ni lo. Ka hriat duh chu Muansangi chungchang zawk a ni ka tih kha. Dik lo awm lo se i fanu hi i nangman i enkawl ang. Ka hre chiang tawk che" Inringtawk zet hian ka ti ve leh hmiah. 

"Min hre chiang emaw ka tia, tuna i awmdan atang hi chuan min lo hre chiang miah lo zawk tih alang reng" a ti leh nghut. 

"Ni lo, ka hre chiang che. Muansangi chungchang sawi i duh lo niloin i ngam lo anih kha" ka ti leh tlat.

"Ngam lo maw? Eng nge ka hlauh

 ang? " tih pahin a nui hawka, a

 nuihdan erawh a ngeiawm lutuk

 a, hriat a nuam fahran lo.

"Aw,i hlau..I tihsual sawi nawn i hlau anih zawk kha" ka ti leh sak.Inti mipa tak, hlauh nei anga sawi phei chu duh miah lo tur a ni tih ka hriaa.Hetiang zawnga ka nawr hian ka tifuh zawk ang tih ka ngaihtuah chhuaka, ka lo ngaihtuah chhuak har mah mah zawk hi mak ka ti letling. 

"Biak che hi awmzia a awm lo" a ti ro hulh. 

"Nia, tlanchhe zel mai rawh" ka ti leh a, hmusit lutukin ka nui lui hak. 

"Ka tlanchhe lo" a ti tawi leh tuk. A tawng dan a pangngai vek nangin a kut a humruh nasat zia leh a kekawr ipte-ah a thun zui chu ka hmuh hmaih hauh lo.

"Nia, I tlanchhe lo" ngeiawm zetin ka ti nawn ve nghat. 

"Bansan tawh rawh. Ka hne tawh" a ti leh hmuk. 

A rawn kal pheia, kawngkhar a pana. Dan ka tum buai peih lo. Eng anga nasa pawhin dan tum ila ka sawipui thei tak tak dawn lo tih ka hre thiam vek. Kawngkhar pana a kal chu ngawi rengin ka en a. A bag a laa, Room chhuansan satliah a ni dawn lo tih ka hre thiam. Kawngkhar a hawnga, na zetin a rawn nem khar thuaia. Ka phu zawk bawk. 

Chawei hunah pawh a rawn let ta lo. Maduhi'n "U Mama kha a lo haw tawh sia, a chhuak leh mi? " a tih chuan "um, tih tur a nei leh lawk a" ka ti liam satliah mai. Floor hranah kan room a awm a, kan room lah pawn lam atanga thawm hriat harsa tak a ni lehzel. 

Sana ka en a, dar 11 a pel va tawh. Saitluanga a lo la haw ta lo a. Diktak chuan ka rilru a nuam tawh lo. Thinrima chhuak a ni lehzel bawk si nen thil tha lo thleng mai tur angah ka ngai deuh tlata. Ka ipik churha, khua lah a vawt vin tuk mai bawk si. 

Inchung zawlah ka chhuak pheia, inchung hungna thir kual bawhin ka dinga, kan In hi tlang lama awm a ni bawka, khawpui chhung lang thei a tama, ahnai aiin a hla lam an lang nalh mah zawk. 

Gate bula Motor rawn ding dawt chu ka en vata, ka rin ang ngeiin Saitluanga Motor a lo ni a. Gate hawng tura a rawn chhuk mek chu ka zuk hmu zui nghal zata. A rawn hawi chhoh palh hlauin ka tawlhhnunga, roomah ka lut zuia, khumah ka inthlawlh nghal vat. 

Room a rawn luh rualin a zu in rimin ka hnar a verh zak mai. Sinus nei nimahila a zual chang anih loh chuan rim hriatna nei lo tawp ka ni lo a. Ka awmdan pangngaiah phei hi chuan thil rim danglam hlek hi ka hre thei em em zawk. A rawn pen ri phei zela, ka mutna bulah tak a pen ri a tawpa. A rawn din hnaih takah phei chuan a rim a na ta viau. Zu hi in lo tawp a ni lo a, mahse kan inneih hnuah tun hi a vawikhat in ka hriatna chauh a ni a, a rim nat dan em emah chuan a in tam thawkhat turah ka ngai mai. 

Thawm awm loin a reh ta thapa, a kalsawn lo tih ka hriaa,min en reng anih ka ring bawk nen ka hmaiah rannung a vak emaw tihmai turin ka hmai vun a za mum mum mai. Ka muhil der laklawh tawha, harh anga lan leh tumna ka nei lo. Ka thil hriat duh kha sawipui duh em em mah ila tunah rih hi chuan inhauh buai leh ka peih tawh rih lo. 

A kalsawn thawm ka hriat rualin ka thaw nghal huai mai. A din chhung kha minute tam ni lo mah se reitak niin ka hre tho. Light a off a, khumah a rawn mu dawn emaw ka tih laiin a rawn mu ta miah lo a. Reiloteah hnar ri ka hre zui leha.Thutthlengah a mu tih ka hrethiam mai. 

Ka tho chhuaka, room light ka on ngam lo, a harhvang ngang mai si. Ka phone flash-light ka on a, a mutna lam ka va en a. Puan pawh sin lo leh thawmhnaw pawh thlak loin a lo mu a, a ruih reh hunah vawt a tihtur zia ka ngaihtuah nghala. Ka thoa, kan blanket sin lai pakhat nen ka pan phei tham thama. Tihharh hlau zetin ka sintira. Harh loin a hnar ngaiin a hnar tluk tluk a. Light pawh kha on ta vek ila a harh ka ring ta lo. 

Ka beisei loh takin ka mutui ta zek. A hnar ri tluk tluk kha hre lo turin earphone ka vuaha, naupanlai atanga ka zaithiam ngainat em em Backstreet boys ho album hmasaber ka ngaithlaa, an hla pakhat "As long as you love me" Ka ngaihthlak lai ka hriaa, abak ka hre zui tawh lo. 

Tho mai loin ka mut dan ngaiin ka mu a, Saitluanga thawm a awm leh awm loh ka ngaithlaa. Thawm awm loin a reh thapa, a chhuak tawh nge ala mu ka hre lo a. A ruih dan en kha chuan a pentawng anga, a lu a na ve viau ang. 

Ka inbengkanga, a mutna lam ka va en a, a lo mu tawh lo ngei. Ka blanket sintir kha thlep fel vekin a lo kalsana. A tho hma satliah nge a inkhel ang ka hre thiam lo. A thing rim nam hum huma inkhelh ai chuan a tlan pawh a nimahna. 

Ka phone ka hmet enga, mak takin note a lo in hawnga, 

"Hna thilah ka zin ania. Zanin kan riak ang. I la mutui sia, ka kaitho ta lo mai che. I inbual duh takin Geyser ka on sa bawk ania " Tih hi a lo in type thlap. 

Tho loin ka ngaihtuahna ka kawm a, kan inhmuhthiam loh atangin thla a tling thuak tawh tih ka ngaihtuaha. Innei thar hlim lehnghal tan chuan nupa inkar fel lo hi a hrehawm bik ngawih ngawih. Ka ngai em em a, ka bula a mu reng chung pawhin mel tamtak kar dana mu ang mai kan ni a. Ka hmu thei reng chung pawhin ka ngai ngawih ngawih tho. Diktak chuan Buaina hi ka siamchawp a ni a. Kan inngaihzawn tirh atang khan tiang chen chen boruak tha lo kan nei ngai loa. Kan inngeih lutuk kha a boring lek lek zawk hial ania. 

Vawilehkhatah buaina thleng lo thei reng hi keimah zawkin ka tibuai lui niin ka inhre nawn thuta, Saitluanga zin tur pawh tha takin ka thlahliam lo hial a. Keimah chiah ka inngaihtuah niin ka hriaa. Eng emaw palh tawk ta se engtin nge ka tih ang? Ka inchhir kumkhua tawh dawn. Tunah hian keimah zawkin ngaihdam dilin engkim tawpsan ila kan inkar a fel nghal vek thei renga, ti nge buaina ka siam luih tlat? Ngaihtuah buai miah loin Saitluanga ka call nghal a, vawi hnih chauh a ring hman tihin a pick nghal mai. 

"Hello.." a rawn ti dam thlup. 

Chhan tumin ka ang ziaua, mahse ka mitthlaah Muansangi nu a rawn lang thuta, ka laka beisei nei em em chunga min en lai kha chiang mangkhengin a rawn langa. Saitluanga chhang loin ka off leh ta zawk. 

Che miah loin ka mu a, ka awm dan kha mi a ang mai niin ka hriaa. Ka pasal ka hmangaihna vangin ka tlawm tih ka inpuang lo chauh chu ania. Kan buaina siamtha tura ngaihtuah chiang lo a ka chetna khan Muansangi nu beiseina ka tihchhiatsak lo chauh bawka. Chutiang bawkin a fanu a kalsan tak pawh hi  pa hmangaihna dawng tura ka beihna pawh a thlawn ka chantir hman thelh mai. 

Ni e, ka kal tawh chin ka ngaihtuah leta, bansan leh tur chuan ka kalthui tawh lutuk. Saitluanga nen kan pahniha tangduna kan beih hma loh chuan ka tawpsan thiang tawh lo. A lo haw veleh ka hriat zawng zawng tha taka sawipuiin a puihna ka dil anga. Ani pawh ka lamah a tangin min thlawp ve mial mahna. 

Room kawngkha kik riin ka ngaihtuahna ala peng a. Ka va hawng chu Na-i a lo ding al. 

"Eng nge? " Makti angreng takin ka ti hu. 

"U Mama'n min lo phone a, I that leh that loh en tur chein min ti a" a ti teh daih. 

"Maw? " ka ti leh ringawt. 

"Min lo biaa, a hmanhmawh hmel bawk sia. I dam lo niang ka tia, ka hlauhthawn zia chu a" a ti leh niah niaha. Ka call zuka, ka dah lehnghal vang kha a ni ngei ang. Min ngaihtuah tih ka hriatna chuan min fan a, ka nui lo thei lo. 

"Ka tha e.. Ka lo be dawn nia" ka ti  zangkhai vah. 

"I lo chhuk nghal dawn em? Thingpui ka lo siam ang che" a ti leh a. 

"Um, lo siam la.. Ka lo chhuk nghal animai" ka ti ve a. Roomah ka let leha, khum ka siam fela. Ka hmai ka phiha, tui lum ka herhchhuak mai mai pawh ka hlimpui vek. Nizanah kan inhaua, kan riak hrang tih lam khan ka rilru a luah eih lo. Kan inhau buai chung pawha min care na lam hian min luah hneh zawk. 

Inhnuai ka zuk chhuk chu ka rin loh takin Mki a lo awm teh tlat!!! Pi Maduhi best friend mah nise kan inneih hnu hian a lo kal ngai tawh lo. 

"Kan va inhmu khat ve, I dam maw? " Zangkhai em em hian min lo ti a. Biak dan turah ka lo buai ruk nen, amah zawkin min lo be hmasa chu ka thawl huai mai. 

"Aw, dam e. I dam zawk em? " ka ti let ve vat. 

"Ka tha e" a tih lai mekin Living Roomah Pi Maduhi a rawn lut a, "Kal ila... " a, rawn ti a. Ka awm ve tih hreawm pawhin a awm lo. 

"In chhuak dawn mi? " a awm dan ngaipawimawh duh loin tha takin ka ti a. 

"Aw. . Kan rei deuh ang" a ti leh mai. Santi a ko zui nghal a. Rang fein Choka atangin Santi a rawn dak nghal vat. 

"Bawihtei dar 8 rik hmain chaw lo eitir ang che. A bag ka siamfel saa, a form pawh ka dahchhuak vek a. Tiffin siamtur pawh ka sawi kha siam la" a ti leh zung zung. 

"U Tea a lo haw hman loh chuan taxi kan lo ko mai dawn em ni? " Santi-in a ti a. 

"Aw, rawn sawi la. Taxi ka rawn tir mai ang" thupe aw tak hian a ti leh a. 

"Ngaihtuah suh, ka awm tho a, ka lo thlah mai dawn nia" ka lo ti vat.

"Naupang school kal hun lai hi a jam nasa thina, I hnaah i tlai palh ang. Lo thlah tum buai lo mai rawh"  A ti deuh hmak. Ka hna tlai a hlauh vang a ni lo tih ka chiang ve tawka, min han biak vel dan lah chu ka mopui ni loin ka pasal nu niawm tak zawk niin ka hriaa. Mahse, a thiannu awmlaia min han tham loh vel kha ropui ta viauah angai aniang ka tia. Keilah a mopui ka ni satliah lo va, a best friend bialpa hlui nupui ka lo ni vei thlap a. A thentu leh duh lotu zawk lah Saitluanga a ni leh zel bawk si a, a theih ang angin phuba ala veah ka ngai hmiah. 

An kal pawh nghak loin Choka ka pansana, Na-i'n "I lo kal har leh ta sia, a dai veka hmana, ka paih daih. Adang ka siam leh mai ang" a lo ti nghal vat. 

Saitluanga call ka tum zeta,mahse tlawn deuh anga lan kha ka tlawmngaih leha,msg ka ka thawn ta zawk.  Ka msg a lo nghak reng emaw tihmai turin a seen nghal vat mai. Min rawn reply nghal vut a, ka tha em tih min rawn zawt a, "Tha e, Ti nge? " Tih ka thawn let ve nghala."I rawn call khan i tawng lo va, i reh vang vang sia" a rawn ti a. 

"Ka call sual che"tih ka tum zeta,mahse dawt a ngeiawm taka chhan kher tul ka ti leh lo. 

" I tawng ka hre thei lo ve tho a.Engmah dik lo a awm lo" ka ti ta zawk. Dawt a ni tho nangin tlemin ka inthiam deuh. 

"A that nasat chu. Ka nupui tereuhte,luhlul zet kha an rubo mai ang tih ka hlau ve a. Min ngai lo mah se ka ngai a" amah nena inhmeh lo takin a rawn ti duah. 

Hlim ru veng veng chungin a msg ka chhiar nawn ka chhiar nawna, keimah ang thoin min ngai ve tih ka hriatchian lehzual na chuan min fan raih raih bawk. Nizanah khati khawp khan inhau mah ila kan awmdan kan hne ve ve tawha, boruak siamthat kan duh ve ve tih ka hriaa. Intih eng emaw vanga lo inlak luhlul tlat ka tum bik lo. Kan boruak a that ang zelin ka thil hriat duhna kawngah hma ka sawn dawn tih ka hre chiang tawk tawh. 

"Mki a lo kal a" Biak leh mai dan tur hre loin ka ti a. Ka ngai ve tho tih sawi mai turin ka lai deuh tlat pek. 

"Eng nge a rawn tih a? " a rawn ti tha ve mai. Kan inngaihzawn tak tak hnu atanga vawiin ni thleng hian Mki lakah thikthu chhiat phahna tur ka la hmu lo hrim hrim a, ka chhaih fiam pawhin engahmah angai ngai lo. 

"U Maduhi nen an chhuaka" tih ka thawn leta..

"I duh leh In inah lo va riak phei la" a rawn ti leh daih. 

"Aih, ngai lo.. A vawt sia, riahsawn ka peih lo" ka ti a. Kan In lam ngaihchang nei fo thin mah ila haw leh tho tho ngai ka ni tih ka hriat avang hian riah ka peih buai lo. 

Lala-i a rawn tho a, Santi-in a buaipui nghal vat vat a. Pi Maduhi khan ka buaipui duh lo viau mah se a chawei ka vil a, a ei kham hnuah ha ka nawhpui leh thlap. 

School kal hunah pawh Saihminga ala rawn let lo a. Santi hnenah ka thlah tur thu ka hrilha, "Anih chuan Lala-i nu ka'n bia ange. I hruai dawn tih a hriat loh palh takin" a ti deuh kher a. Keilah ka sual a chhuaka, "Be duh suh. Ka hruaibo dawn hleinem" ka ti ve salh. Tawng zui ngam loin a ngawi ta renga, ka kal hnuah erawh a be leh thoin ka ringa. A biak leh biak loh hre tura Na-i han chah vel erawh ka indah hniam dawn lutuka, ka peih buai lo. 

Kan tlan pahin Lala-i a titi siam siama, a ban huna lam leh ngei ngei turin min chah nasa ngang mai bawk. 

In a ka let lehin Na-i chauh a lo awma, Bike a awm avangin Saihminga a haw tawh tih ka hriaa. Roomah a awm anih ka ring mai. 

"U Bd, I kal veleh khan u Santi khan Pi a biaa, ka hruaibo dawn lo itih te kha a sawia" midang hriat hlau niawm takin a ti sar sar a. Ka rin lawk sa anih avangin mak ka ti lem lo. 

"A hrilh chuan a that nasat chu" ka ti awlsam et. 

"Zinga u Mama'n min lo biak khan Pi Maduhi a awm a. Room atanga ka chhuk leh khan i u Bdi chu a lo inawkhlum em a lo tia. Mak ka tihzia chu a" a ti leh ta zel. Chu kher kher chuan minti thinrim ve ta zak. 

"Eng nge sawi a tum ber a? " pangngai thei ang berin ka ti a. Na-i bula thinrim awmzia a awm lo tih ka hria. 

"Ka hre lo e a. U Mama khan min rawn tir hmanhmawh sia, min lo ti tirh lai tak khan pi thingpui tur kha ka siam dawn chiaha. Mahse Roomah khan ka lo chho ta daiha,chu chu a thinrim aniang" a ti leh niah niah.

"Anih tak chu. Engahmah ngai suh, hei ka la dam luau hi" Nui chungin ka ti a. Thil ngaihtuah thui lem lo tihtakah za zetin a nui ve leh nghal mai. 

Keimahin chaw ka ei a, ka eikham thlengin Saihminga ka hmu lo hrim hrim. Chutiang bawkin Santi pawh ka hmu chuang lo. Chance an nei khat em a, an chance neih theih hun bawhpelh duh loin roomah Setana hoin sualna meipui an ai ho anih ka ring a. Thilsual leh tenawm anih vanga lo hlauhthawna, lo mangan vel kha chu ka kalpel vek tawh.Diktak chuan rai thei se rai hlauh se ka ti tawh zawk. Mahse, Saihming hi fa nei thei lo zawk a ni tlat a. Raina chance erawh a awm lo tih ka hre ve kar tho. 

Hna ban hnuah Inah ka pengkawia, Nutei khua a lo sika, nimina ka kal lai khan a lo awm lo a, ka tlawh ziah lo bawk nen amah nen tak hian kan inhmu khat angrenga. Min han hmu chu min hau nghal hluk hluk mai. 

"Pasal i neia, In lam i tlawh tha peih reng reng lo maia. I Patea pawh zah ve ta che. In lamah ka hrehawm thina,ka zalen ta ti niawm tak hian i reh vang vanga" a ti hmuk. 

"Niminah pawh ka lo kal kha..A hrim hrimin mahni In lamah kal sek loh tur kha iti ve sia" Nui chungin ka ti a. Mama nuih a za ngang mai. 

"Kal sek tih tur pawhin i lo kal hleinem. Saitluanga a fel em a, ani tal a lo kal fo zawk a" a ti leh a. 

"A lo kal thin maw? " Phawk angreng takin ka ti a. Ka tel loin a kal thin tih ka hre miah lo. 

"Kal ang chu mawle a. Mama hna dil tur pawh amah vekin alawm buaipui. I Patea'n huana a mamawh tur leitha nise a rawn dah vek bawka" a ti leh duaha. Ka tan chuan heng zawng zawng hi la hriat ngai loh vek anni. 

"Chutiang ka hre hleinem, engmah min hrilh bawk si lo" thiamchan tum ranin ka ti a. 

"Bibi, in pa hi ka ngaisang ania aw. Engmah a sawi a sawi ve lo, a ti tawp zel maia. Hetiang hi alawm Mipa pawhin 'Man' kan tih"   Mama'n uar fein a rawn ti a. A, fiamthu emaw tiin chhan let tumin ka va en a.Mahse,a hmelah chuan a fiamthu lo tih ka va hmu theia. Engmah sawi loin ka ngawi ta rauh rauh. . Mahse,Saitluanga ka ngaihtuaha,kan innghirngho chhung khan makpa fel tak anih a lo thulh eih lo tihna ania..Pa mak leh danglam hi chu a va ni chiang tak. 

In ka thlenin Pi Maduhi a lo thleng tawha. Lala-i ka thil hawnsak pek ka tum a, mahse ka hmu mai lo. 

"Khawnge Lala-i hi? " ka ti a. 

"A mu" a ti bak hlak. Zing atang khan ala fuh ta lo tluang zel. 

"Ooo, ava mu laklawh ve. A nuam lo deuh em ni? " A mood chhe zet haiderin ka ti leh a. 

"A khua a rawn sik anih kha. Zingah lah Scooty-in ilo phur lui talha. A buaithlak em mai" Min dem zet hian a ti a. Ka nghing deuh lawih thei.. 

"Awi, a va zia lo. A nuam lo sa tih ka hre si lo a.. " ka ti hman... 

"Nuam lo e. Hruai angai lo ka tih chhan pawh kha kha ania. Ka duh loh danah khan eng emaw awm turah i ngaih ve mai ka ring ania. Rinai hian thil i man lo thina. Aaa, eng em a ti lo ang" Ka tawnglai pawtchatin a ti leh hmak. Sawi leh mai tur hre loin ka en a, kan inbiak tirh phat atang khan min en loin a phone a la en ta renga. A tawngkamah lah min tham lo tih alang renga. Engtin emaw tala chhan let tumin ka ang zuau hmana, mahse Santi insuk seng pawm bawr luk chunga a rawn luh takah chuan ka ngawi leh ta zawk. 

Roomah ka chho a, inthlak loin khumah ka thu ren rawna. Saitluanga'n riak tura min tihna ka hnial kha ka inchhir vang vang mai. 

Chawei tura ka chhuk thlak lehin Na-i leh Santi chauh an lo awm a. Midang awmna ka zawta, "Pi Maduhi hian a ei tawha. Roomah a awm aniang" an ti awlsam mai. Saihminga lo nghah tur a ni em ka hre lo a. Sana ka en a, dar 7 a pel tawh bawk si nen, nghak loin ka ei san a. Ka ei laiin a rawn haw a, rawn ei ve nghal a tum leh tum loh ka zawta. Nidang ang lo takin a meng phi chuaia, "Ei ve nghal ang... Akhai, ka inbual leh si dawn" a ti nawi kual vel ta mai mai. Zu a in fo tih ka hre tho nangin tiang hian nidangah a rui over lai ka la hmu ngai lo. 

Room a ka chhoh veleh ka phone charge lai ka pan nghala. Saitluanga min lo call na a lo awm a. Msg a lo dah bawka. A msg ka hawnga, "kan riahna tur kan thleng dawn hnaia. Signal a tha lo viau a. Min be tlang thei lo ang ka ring" Tih a lo ni a. Ka reply a, a tlang thei lo ta ngeia. Ka call leha, ka call tlang thei lo. 

Tv ka en a, en chak zawng engmah ka nei lo. Ka off a, ka phoneah Game ka khela, chu pawh ka ning leh vat. Ka mut a chhuak eih bawk si lo a. Muthilh luih tuma ka mut ren rawn hnuah ka tho a. Note bu leh pen ka laa, a bul tanna mai tur hre loin vawi eng emaw zat ka ngaihtuah nawn hnuah ka ziak tan ta a. Ka duhtawk ka ziah meuh chuan dar 12 a hnai thuak tawha. Ham bai bai chungin khum ka pana, Saitluanga lukham pawm chungin ka mu a, reiloteah ka muhil zui chu a nimai. 

Min ti harhtu awm ang maiin thawhphan pawh nei loin ka harh thuta. Che loin chunglam ka en a, room a thim deuh khup nangin khua a var tawh tih ka hre theia. Mak takin min thlir rengtu an awm niin ka hre leh thuta, ka inlet nghal vata. 

Dawhkan bula Chairah chuan Saitluanga a lo thu a, ka Note bu a kenga. Uluk em emin min lo thlir reng.. 

Ka hmusual anih ringin ka mit ka khap sak saka. Mahse, a thut dan ngaiin a thu reng tho. 

"Good Morning, Miss B" nui chunga a rawn tih takah chuan ka hmu sual lo a, amah ngei a ni tih ka chiang ngam ta chauh. 

NOTE : Tawp lo leh chiah chiah😆 Achangtute in rel nasa lutuka, kan la tawp duh lo an tia🤣🤣🤣

Zanin chu ngaihtuahna ang chi kha ka ziak tam deuh hleka, a boring mai thei aw.... In duh leh min ngaidam su😆