Bibi - 32

 Chapter -32

"Ti nge i lo haw leh si a? " Sawi tur dang hre loin ka ti ringawt. 

"Nia... Puia fanu nizanah tukverh atangin a tla suala, " a ti tha ve mai.

"Khai aw...tunah engtin nge a awm? " Ka ti vat. Puia hi Saitluanga Driver a ni a, an inzui nasat bakah Saitluanga hian a ring em em a. A rin tluk zetin a duhsak bawk.

"An zai nghala, ICU-ah ala awm a. Motor pawh mamawhna an neih takin ka tia, ka kawltir mai" a ti dam leh thlup. 

"Anih chu...a zia lo ee. In i lo thlenna a rei tawh em? " Ka ti leha. 

"Dar 5 velah aniang.. " a ti a. A thawmhnaw hak chu ka en chianga, a inbual vek hman tawh tih ka hmu leh tlaikhawnu ta chauh. 

Ka thu chhuak, ani erawh chuan ka note bu a ken chu a beng thak thaka, ka thil ziah kha a chhiar angem tih ka ngaihtuaha, chhiar mah se pawi ka ti hran lo. A chhiar khan ka tan kawng a awlsam zawk theia. Inhauhpui chiam ai chuan kan pahniha kan tan dun a tul zia pawh a hre thiam maithei. 

"Ka thilziah kha i chhiar em? " ka ti ro halh. 

"Angaihnawm... Mahse, tunah chuan ka muhil chak. Chumi hnuah chuan i duh duh min zawt thei ang" tih pahin a tho a, Note bu dawhkanah a daha. Khum a rawn pan phei chu ka lo en mawl tawp. A rawn lawna, min si chetin a mu nghala, "Tho rih lo la, muhil leh lawk ang" ati sup. A awah chuan ngenna alang chiang ngang mai bawk. 

A darah ka lu ka nghata, a awmah ka kut ka daha. A lungphu a phut zawnga ka kut a nghawr dat dat chu ka ngaithla kara, hetianga inhnaih a kan mut lohna a rei tawh a, a muhil thaw ri pawh ngaihnawm ti takin ka ngaithla a, Atthlak zetin ka mittui a hnai lutuk mah mah. Mahse, hlim loh vang niloin lawmna mittui a ni a. Ka pasal ka lo mamawh zia leh abula ka him tih ka hriatna chuan min fana, ka rilru a no bawk. Ka tlawm tih kan sawi lo ve ve nangin inrem kan duha, chumi atan chuan kan rilru a inhmu em em tih ka hria. 

A muhil nghet ta viau nia ka hriat hnuah tihharh hlau zetin ka thawhsana. A chau bawk aniang, a chesawn eih lo. 

Ka inphihfai hnuah inhnuaiah ka chhukthlaa. Santi leh Na-i an lo awm a, thingpui ka duh leh duh loh min lo zawt nghal var. 

"Pawi miah lo" Tih pahin Chair ka pawtchhuak nghala. Ka thu a, ka phone ka check paha. Lawmi msg a lo awm dala. Ka open a , min biak a duh thu leh a rilru hah zia a rawn sawi teuh. Nimin ka kal khan a lo awm lo va. Nutei leh Mama lah khan engmah buaina an neih awm an sawi si lo. 

A msg ka reply a, tlai Office banah ka tlawh kawi ang tih ka hrilha,rang zetin a rawn reply a " Ngai lo. Inah khan ka lo kal zawk ang" a rawn ti tlat. 

Pi Maduhi a rawn tho a, a mu tha lo nge a mood ala uih tluang zel ka hre lo. A tum bura, 'ka mei rap se' ti ang maiin buai cho em em hian a hawi fi deuh hmak hmak bawk. 

"Eng nge Lala-i chu a an a? " a mood chhe zet haiderin ka ti a. 

"A tha" a ti bung nghet. 

Min puh tlat kha ka ngaihtuah leta, a nawm loh thu kha sawise ka phur dawn der si lo. A sual hi ka ti ve thlawt. Eng emaw hlekah min puhna tur hi a zawng ngar ngar emaw tihmai tur a ni. 

Saihminga a rawn tho ve chiaha. Nizan kha a rui nawi bawka, zing chhuah a peih lo aniang. Chokaah a rawn luta, fridge a pana. Tui ala chhuaka, a in nghal khawlh khawlh mai. 

"Bawihtei khi a khua a sik leh ania" Pi Maduhi hnenah a ti hluk. 

"Sik rawhse. Damdawi a ei duh hleinem" a ti hmak. A thilsawi duhdan chuan min dengdawt mai. 

"Ei duh lo pawhnise han pe lui la. Naupang thu thu a awm angai hleinem" Saihminga'n a ti leh hmuka. 

"Ka pe lui awm lo em maia. Tikhian awm se a hrehawm zia a hria anga. Nidangah a ei zat zat tawh mai ang" a ti leh hmiaha, pek a tum eih lo tih alang vek. Ka ngaihdan a pel ve ta tlat. Naupang hi hrem tul chang a awm tih ka hriaa, mahse hei hi chu inhrem dan tur niin ka hre lo. 

"Keiman pek ka han tum ange" tih pahin ka tho nghala. 

"A tul lo.. " Pi Maduhi'n a ti fiak thak. 

"Khawsik renga awm chu a tha loa, nu leh pa tan a har chuan ka pek theih mai ka ring" Luhlul chhuahin ka ti leh a. 

"A tul ka tih hunah ka pe ang. Lo buai suh, ka fa ania tul ka tih ang angin ka enkawl mai ang. Midang an lo tel ve ka duh lo" Kawlh zet hian a ti leh a. Min melh zam tum niawm takin ka mitah tak min en a, keipawh ka hawisawn duh bik der lo. 

"Ka han pe ang" Saihminga'n a ti bak hluk. 

"I duh leh han pe mawlh rawh. Khitiang naupang luhlul khi ka buaipui peih lo. Ka hne ve tawk" Ngeiawm zetin a ti leh a. A awki mai pawh ni lo, a hmel landan pawh a ngeiawm ngawih ngawih. 

"I tawng duhdan lah hi, mei nei tak tak hian i tawnga. I nasa lutuk" Saihminga'n a ti bak leh tuk. Enge an hriat ni? Midang kan awm ve tih pawh an ngaihven eih lo. Saihminga'n damdawi dahna box a hawnga, a hai zui nghal a. 

"Engtin vak nge ka tawnga? I enkawl peih loh ka enkawla, min la sawisel khanglang zui a" ala ti leh ta cheu. Saihminga chuan chhan tumna nei hmel a pu lo. Damdawi dahna box a hai kual ruk ruk renga. Pi Maduhi tawng dan khan a rilru chhiat zia a inpuang angah ka ngai ve hmiah thung.Mahse, an inhauhna hmun leh hun hi a dik lo. Chhungkaw mualphona a ni a, an hma ka ngaih vang pawh ni hran loin khap an ngai tih ka hria. 

"Awi a zia lo em mai.Insum teh u" ka ti a. Ka aw a ring lo nangin an hre thei ve ve tih ka hria. Maduhi'n tur zetin min rawn en a. 

"Lo tawng ve suh. Midang buainaa inrawlh hi a changkang lo ania" Thupe aw zet hian min ti chang fak. 

"Eng nge thleng a? " Saitluanga aw hian a rawn ti a. Kan hawi rual nghal thawt. A rawn lut tih tuman kan hre lo. 

Min rawn pan phei a, ka thutna bulah a rawn dinga. Maduhi leh Saihminga a en run. 

"Eng nge Bd-i inrawlh ve lohna tur thil awm a? " Biak bik pawh nei loin a ti hmuk. 

"Aaa, Lala-i mawle. Damdawi a ei duh lo a" Saihminga'n a nupui chhan nan ti niawm takin a ti vat. 

"Chu chu Bd-i thiam lohna eng nge awm a?Maduhi khan inrawlh lo turin a lo ti mek sia" a ti leh a. 

"Engmah a ni lo" ka ti vat.Saitluanga hmelah chuan pawisak a nei lo tih ka hmu ru kara. Buaina belhchhah ka duh lo.

Maduhi a tho  tharha, Saihminga Damdawi bawm kenga a ding chu a pan phei a. Damdawi a va zawnpui leh lawi si dawn nge ka hre lo. 

"Pe suh u. Keiman ka pe mai ang" Saitluanga'n a ti leh a. A aw a ring hran lo nangin achiang bengbawng viaua. Tunah khan engmah hre lo angin tawng mah se an inhauhna kha a rawn hre hman tho tih achiang reng bawk. 

"A luhlul lutuka, nizan atangin ka pe lui thei lo a. Tukin chu ka thin a tirim a" Maduhi'n a ti a. A tawngdan ki a thlak leh vek tawh. 

"Um, pe duh lo mai rawh. Ka lo pe ang" Saitluanga'n a ti leh a. Thinrim emaw lawm lohna nei ang pawhin a awm lo. 

"Roomah damdawi in dah em? " a ti leh a. 

"Dah lo ti ila ka leisa a zo a. Puitling ei tur hi a chanve angin pek ka tum a" a ti leh a. 

" Pe lo mai rawh. Eng damdawi nge pek chi ang? " Saitluanga'n min en pahin a ti a. Ka chhan hmain Maduhi zawkin a rawn chhanga. 

"Santi kha khawnge? Thenawm dawrah sawn a awm ang. Va lei rawhse" a ti a. 

"Roomah pawisa han la lawk mai la" Min ti a, ka tho nghal vat. 

Living Roomah Santi a lo awma, pawisa ka pe a, Chokaah ka lut phei leh a. Maduhi a lo awm tawh lo a. Ka chhuah rual deuhthaw khan a chhuak ve nghal mai niawm tak a ni. An unauin ngawirengin dawhkan an lo kil duna, thil pawimawh lo sawi dun mek an neih takin tiin Living roomah ka let leh ta zawk. 

Santi lo let veleh Saitluanga nen kan chho duna, Saihminga pawh a rawn chho ve nghal a. An nupa khum sir a Lala-i khum an hun lam ka pan pheia, a khumah ka thu thlaa,a khawsik en tumin a chal ka zuk deka, ka phu zawk mai. 

"Lala" ka ti nghala. A rawn meng chu a mitmeng a dik lo. 

"Damdawiinah kal ang" ka ti chhuak nghal pawp. 

"Maw? Ti nge a? " Saitluanga'n a ti hu. 

"A khawsik hi a sang angreng lutuk,a luak bawk anih hi" ka ti a. 

"A khawsik hi a sang thei hrim hrima. A luak kha chu nizan lam ami tawh ania, a mutna kha ka la thlak lo a. Damdawi kha ei se a zia mai ka ring"  Pi Maduhi'n a rawn ti a. 

A sawi zo chu a rawn kal hnaia, Lala-i chal a rawn khawiha, " Nidang ang tho anih hi. Khawi, Damdawi kha ka lo pe ang" Hlauhthawnna pakhatmah nei lo ang mai hian a ti leha. A awmdan chu ka thinin a tuar tawh lo. 

"Kal phawt a tha ka ti.. " Ka ti hmiah. 

"Kal ang, Bibi.. Damdawi kha pe la, Tea.. motor lo zuk ready rawh. Ka rawn pawm thla ang" Saitluanga'n khauh zetin a rawn ti ve a. 

Pi Maduhi'n "Kal pui vut vut angai lo ang...Nidangah pawh... " a ti leh chu Saitluanga'n a vin ta thawt. 

"Ka kalpui dawn ka tih chuan lo sawi buai suh" Thupe aw lutuk hian a ti a. Mihring chhia leh tha thliar hrang thiam chin tan chuan hnial ngam chi a ni tawh lo. 

Ka keu ang chawt chawta, damdawi ka tulha. Ka pe zo chu Saitluanga'n a pawm thlaa, a hnungah ka um thlaa. Pi Maduhi pawh a rawn kal ve leh ta tho. 

Damdawiin kan thlenga, an lo check nghal zung zunga, a khawsik sang lutuk a lo kaih titih a lo ni a. Nizanah a luak tih Saitluanga'n a sawi nghala, Nachhawkna-in an jectiona, reivak loah a khawsik a rawn ziaa. Ka thaw huai mai. Maduhi'n buaipui a tum viau nangin Saitluanga'n a phal lo bur.

Ka bula thu Saitluanga chu ka en a, ding takin Lala-i mu chu a en a. A hmelah chuan eng nge a ngaihtuah mek ang ka hre thiam lo. 

"I chau em? " Midang hriat loh turin ka sap. Min rawn en a, a mitmeng tak leh chiang zetah chuan mut a kham lo tih alang thei reng. 

"Chau lo e. Mahse, ka mut ala chhuak deuh" a ti sup. 

"Haw veleh mu leh mai la. Vawiin chu chawlh lak mai a tha anga" ka ti leh a. 

" Kal ka tum lo hrim hrim sa a" a ti awlsam et. Lala-i rawn tal chu rang zetin a kut a vawnsak nghal vut bawk. 

"Chawlh i lak chuan a that chu.. " ka ti leh sap. 

"Um, plan ka lo siama..I chawlh ve theih chuan Reiek lamah zuk kal ila ka tia" a ti leha. 

"Reiek-ah maw? " ka ti ha mai. 

"Um... Haw lama kan chaw eina tur pawh ka book ang ka tia. Mahse, Lala-i dinhmun en hian a rem chiah lo hmel leh sia" a ti zuai ruih. Lala-i bawk a en lehnghal vung vung mai. Kei erawh chhungril lawmna vangin ka then sak thung. Kan pahniha chhuah thawven chu ka chak ngeia, mahse Lala-i angaihtuah takzet niin ka hriaa, hei hian nasa takin min ti lawm zawk. 

"A pawi lo, hun ala awm leh mai ang " Ka ti dam thlap. 

"Saia" Mipa aw,tham chhel chhawl hian a rawn tia, a rawn kotu lam ka hawi nghal vata. Kum 60 bawr vel tur, chalkawlh tel tawl leh biangki ruh lian tak mai a ni a. Ka hmuh awm ka la hre lo. 

"Eee, Pu Sangte.. I dam maw? " Saitluanga'n a ti nghal hluaia, a dingchhuak zui nghal a. 

"Dam e, eng nge in rawn tih? Kha, in naute elaw? " a ti tham leh chhal. 

"Aw, ka fanu anih hi. Tukin a khawsik a rawn sang vak maia,luak nen a beia. Kan rawn lut rum rum anih hi" a ti leh a. 

"Khaia, tunlai chu khatiang kha a leng a. Damdawiinah pawh hian kan admit nual reng a. An lo luh belh zel bawka" a ti leh charh. 

"Anih chu mawle. Keini pawh hi admit kan ngai dawn nge dawn lo ni? " Saitluanga'n a ti veleha. Lala-i chal ka deka, a lo dai dak tawha. Kan kal hmaa a lo luak bak kha chu luak pawh a luak zawm ta lem lo. 

"Angai em lo turah ngai ru. An khawsik a zia nghal hi chuan ngaihtuahawm anni lo tlangpui ania. Hei hi tiraw innu kha? " Min en chungin a ti leh a. 

"Aw, Bd-i anih hi.. B, hei hi Pu Sangtea ania. He Hospital neitute zinga mi anih hi" Saitluanga'n a ti nghal thuaia. Min chibai tura kut a rawn pharchhuah chu ka vuan nghal vat. 

Vanneihthlak takin Admit kan ngai ta lo hlauh. Kan buai ta chuk chuk bawk si nen In kan thlenin dar 10 a ri titih tawha. U Masangi hnenah kan chanchin hrilh pahin chawlh ka ngai tih ka va sawia. Mifel leh midang hre thiam thei tak a ni bawka. Rilru nuam deuha chawl turin min lo ti leh thliam. 

Saitluanga'n Lala-i a la pawm ta zela. An roomah a pawm lut dawn emaw ka tih laiin a chhoh tlangpui ta daih. Pi Maduhi thaw hawk ri leh Saihminga insehruh teuh te chuan kan boruak ipik zia a tichiang tawk em em a. Mahse, pawi tihna pakhatmah ka nei lo. 

Ngawirengin chaw kan ei a, tumah kan tawng chak lo aniang, kan ngawi thap reng mai. 

Dawr kal turin Saihminga a chhuaka, Pi Maduhi erawh kal a tum lo anih hmel. Muk taka thil ngaihtuah nei niawm tak hian a thu a, a melh ngai a melh ngur ngur a. Ka hmuhtirh phat atang hmeichhe hmeltha leh smart, incontrol thei bawk nia ka hriat kha chu inthup mawina kawr mai mai a lo ni tih ka chiang tawk tawh. 

Roomah ka chho a, Saitluanga tukverh bulah pawn lam thlirin a lo dinga, ka lut thawm hriain a rawn hawi nghal vut. 

Khum ka pan pheia, Lala-i tui em emin a lo la muhil a. A puansin a tlawh hlim ka sin thattir laiin ka sirah Saitluanga a rawn ding ve a. Ka en a, " Mu ve la... I muthilh a chhuah kha" ka ti sap. 

"Nakinah animai... Tunah chuan biak che ka duh zawk" a ti dam thlup. 

"Aaa, hei kan inbe reng alawm. Nakinah pawh kan la inbe zel bawk anga" Nui chungin ka ti a, zawitein a nui ve nghala.. "Nghal thei si" a ti sup bawk. 

Thutthleng ka pan phei a, min rawn zui ve nghal a. Min si chetin a rawn thu a, ka kut a hum zui nghal vang vang mai. 

"A vawt reuh em mai. Puansin ang aw" ka ti a. Khuma blanket awm ka va la a. Thutthleng ban nghengin a thu a, a kapkarah ka thu ve a. Ka ngheng nghal ar ar bawk. 

"I muhil duh lo tak tak maw? " Ka ti leh a. 

"Aih..." a ti sup. 

"Anih chuan eng nge min sawipui i duh a? Sawi la... " ka ti a. 

"Muansangi chanchin sawi turin i huaisen tawk lo min tih kha a dik e" Reife angawih hnuah harsa tih hmel zetin a ti a. A awah chuan a inrintawk loh hmel em em bawk. 

Ka che sat sat a, amah en thei turin ka thutdan ka siamrem hmasa a, ka chhungrila phurna awm chu ka thup hleithei lo. 

"Engmah min zawt leh dawn si lo mi? " a ti leh a. 

"Zawh tur ka neih che chu Note buah ka ziak veka. I chhiar tawh kha" ka ti awlsam et. 

"Um.. Nia, ka hmu a.. Mahse, I dik lo tam zawk" a ti nghut. A sawi awmzia hre loin phawk zetin ka en a. 

"Eng nge ka dik lohna? " ka ti ha mai. 

"A hmasaberah chuan Lala-i hi... " a ti a, sawi zawm loin a ngawi leh daih. Khum lam a hawia, Lala-i muthilh leh muthilh loh a en niin ka hria. 

"Chuan... " Nghakhlel lutukin ka ti hmanhmawh. 

"Ka fa a ni lo.... " 

Sawi harsa a tihzia chu hairual a ni lo. A kutah ka vawnsaka, a hmai danglap mai chu ka en a. Diktak chuan he thil hi chu a sawichhuak ngei ngei dawn tih ka hriatsa avangin mak ka ti lo. 

"Chutiang chu anih loh ka beisei tlat..Tuten emaw an bum che niin ka hria. I lehkhathawn tur kha i hmu anih chuan tah khan Muansangi'n engkim a inziak ang" ka ti a. Ka sawi zawh rualin a thaw hawka. Chhungrila na a tawrh mek chu a hmelah chiang takin alang theia. Mipa rintlak, engkima rinngam ni mah se mihring anih ve tlat avangin na a tuar lo thei bik si lo... 

"Midang thusawi vanga buai chiam hi ka ti ngai lo" a ti ro hulh. 

"Anih si chuan engvangin nge Muansangi kha i theih lai khan i zawhfiah loh? " Tihnat belh hlau takin ka ti sap. 

"Ka zawng nasa alawm. Mahse, tlanbo chu zawn hmuh ngaihna a awm lo. A danglam vek chhan kha amah ngeiin min hrilh se ka duha. Mahse,hmuhtur a awm lo ta tlata. A thih hnuah Lehkhathawn kha ka dawnga, tah khan chiang takin a ziaka. Ka fa anih loh thu leh enkawl tura a nu pe turin min ti a. Mahse,ka fanu angin ka pawm tawha. Ka hnam hming ka pe a. A hming pawh ka piin SAIDINGPUII tiin a phuaha"  a ti  dam thlap. A awki a dam em em nangin a thinrim tih ka hre thei tho. A thusawi chu ka rin loh lutuk anih avangin sawi leh tur hre loin ka thu mar auha. Saitluanga ka melh reng ringawt. 

"Mahse.... " Reife kan ngawih hnuah ka ti chhuak hap. Eng ber nge ka sawi zawm dawn ka hre chuang lo. A thilsawi kha ka hre chiang a, mahse ka chhungril hian a pawm chuang lo. Dik lo awmin ka la hre tho tho. 

"Lehkhathawn kha midangin tidanglam ta se... " A mita en ran chungin ka ti a. 

"An tidanglam lo. A kutziak hrechiang bertu ka ni ang" a ti leh ta tlat. 

"Mahse.... Ni lo, ka awih lo" ka ti leh tlat. 

"Eng ber nge i awih loh? " a ti hul huk. 

"A vai khan... Dik lo awm lo nise a mizia a thlak thut dawn reng reng lo" ka ti leh a. 

"Kan inngaihzawn laia ka fa ni lo a pai kha dik lo chu a ni alawm. Kha aia bumna tenawm kha a tam lovang" a ti vawt leh ruih. 

"I thinrim a, ka fanu ngaihsak lo angah min ngaia, nangmah ngeiin eng emaw chhui chhuah tumin Muansangi nu i va hmu bawka. Mahse, I chhuichhuah tur chu ka hriatsa vek tho a ni a. I thiltih tam zawk hi i note bu saw chhiar kher ngai loin ka hre sa veka. Mahse, I thil duh titurin zalen taka dah che ka duha, chuvangin ka hriat loh der sak che. Mahse, keimah bik hi chu min hneh leh ta chu ania" a ti ta duah. Ka thiltih zawng zawng a lo hre vek tih ka hriat takah chuan ka inthlahrung leh hnuhnawha. Mahse, aman engmah min sawipui duh miau si loa, kawng dang ka nei lo. 

"Sawipui theih i ni si lo va, kawng dang ka nei lo alawm" ka ti nghat.

"Ka hria e...Ka nunah hian nang hian hnehna i chang zel thin alawm" a ti leh hluk. 

"Hnehna maw? Eng nge i sawi awmzia? " Hre thiam lo zetin ka ti a. Za lo zetin a then suk. 

" I luhlul em vang khan a nun atanga ka paihchhuah tawh,hriat nawn leh pawh ka duh tawh loh kha sawi nawn a, zak nawn leh turin ka tlawm leh ta anih hi. Mahse, min nawrluihna hian rah tha pakhat chu a chhuah nghal der tawh..Lala-i hi Maduhi kutah ka dah nawn tawh lovang" a ti leh nghut. 

"A hmangaih lo" ka ti tawl.. 

"Ka hria, nu-in a fa a enkawl dan tur tiin ka haider thina. Mahse, tunah chuan a hmangaih lo tih ka hre tawha. A rilruah ser ala siamsak loh hram chu ka beisei" a ti leh nghut. 

"Um... Beisei ang. Anih leh tinge Muansangi zia hre reng chunga Lala-i tihsual apiang hi a nu achhun itih thin si? " Ka ti leh a. 

"Muansangi kha fel leh fing, nun tha a ni a. Mahse, ama him nana dawt rang taka sawi mai thin a ni tel tih kha kei lo hre tu an awm anih pawhin tlemte anni ang" Inringtawk takin a ti leha. A hmelah chuan na tihna niawm tak alang zawka. Mahse, a rei lo... 

Ka en vang vang hnuah "I hmangaih tiraw? I la hmangaih reng em? " ka ti chhuak halh. 

Nui chungin a lu a thinga.. "Ka Hmangaih lo, ka hmangaih ngai lo" Thluk nei lo zet hian a ti a. Awih lo lutukin ka melh reng ringawt. 

NOTE : A tawp ta tih ka chak lutuk.. Mahse, a tawp dan tur a ni lo tiin min chhuahchhal leh char char dawn sia..