Bibi -33(Last chapter)

 Bibi - 33 (Last Chapter) 

"I hmangaih lo maw? " Mak ti lutukin ka ti lawi rat mai. 

"Um, hmangaih lo. Mahse, keimah vanga a nun kha chhe vek niin ka hriaa. Ka mawhphurhna hlen zo lo anga ka inngaih vangin ba nei angin ka awm reng" a ti leh a. 

"Eng ba? " ka ti halh. 

"Atan mipa hmasaber ka ni a. Unau anga ka en lai khan abak-in min lo en a. Ka hre reng chunga ka incontrol zo lo kha ka tisuala. Ka tihchhiat vang khan neih ngei ngei ka tum bawka. Mahse... " a ngawi ta daih. 

"Sawi i duh ngai si lo va. I hmangaih lutuk vangah ka lo ngai a" ka ti sap. Ka khup ka tuna, ka kut suih chungin ka thu a. Sir zawngin Saitluanga ka en kar bawk. 

"Ni lo e, Kan inkawp reng laia mipa dang fa a pai khan ka induhtawkna a ti chhe veka. Engtin nge a tihtheih tih ka inzawt tlut tluta. Ka theihtawpa ka care chunga a chesual thei kha amah ngei achhan zawh ka duha. Ngaihdam dila ka hmaa tlawm ngawih ngawih turin ka duh bawka. Mahse, engmah chutiang a ti lo, tih a hnekin a bibo hmaka. A bo hlen dawn emaw ka tih hnuah ka fa anga pawm tur in loh theih lohin ka chet chhuah leh angai ta thunga. Achhan chu a fa paina khan fa a nei dawn tih pawh inhre loin a thihsan ta tlata.  Ka fa a ni lo tih hre tu chu pali chiah an awm. Ni lo, Muansangi nu nen Panga kan ni leh si ang. A Lehkhathawn-ah khan ka fa anih loh vanga harsatna min siam a hlauh thu leh a nu pe turin min ti mah se Tea te nupa hian enkawl an duh em avangin an kutah ka daha. Mi zawng zawng hian Saithanga tuchhuan niin hria se tiin mualphona zawng zawng ka paltlang pui a. Nun pangngai nei tura ka duh avangin a nu chanchin sawi chhuah fo hi ka duh lo va, ka peih tawh lo hrim hrim bawk" a ti ta duah. 

Sawi tur hre loin ka melh tlawk tlawk ringawt. Ka hriat duh kha chhanna ka hmu a. Thawveng hawk tur ka nih laia ka thawveng chuang si lo hian min tibuaia. Zawh belh leh tur ka hre tawh bawk si lo. Diktak chuan chhanna ka hmu vek tawh a, sawisel tur pawh a awm hek lo. 

"A danglam thut chhan i hre duh a, nichina ka hrilh che ang khan a tihsual kha danglam pui tham alawm. Mahse, a mizia kha danglam thut a ni hleinem. Muangchangin a rinawm lohna khan a thlak danglam  hret hreta, chumi hnuah vantlang hriat khawpin a talbuai zui ta anih kha" a ti dam leh thlup. 

"Lala-i hi engtin nge tih i tum? A pi chu i pe dawn em? Maduhi enkawl i phal tawh si lo a" ka ti sap. 

"Dawn lo.." Luhlul hmel zet hian a ti nghut. 

"U Maduhi te nupa hian awlsam takin an pek che ka ring lo. Kha lehchen an lo enkawl tawha" ka ti leh a. 

"Nu leh pa nihna ka pe hleinem. Ka fa anih angin duh chuan ka laksak thei" a ti chang rut. 

"Court-ah kal ta se" ka ti leh talh. 

"Eng dan mah tanchhan tur an nei lo. Vawiinah Zothana ka bia anga. Tihfel ngai a awm anih chuan ka tifel ang" a ti leh nghut. 

"Um... Nun zalen, sava ang maia duh duh lama thlawk kual a, a nuih hun leh tan hun tur pawh ama duhthlanna ni ve se ka duh ber" ka ti leh sap. 

"Kan pahnihin kan enkawl anga. Chutiang chu a nei mai ang. I enkawl duh lo te anih loh chuan..? " a ti leh a. 

"Ka rilru i hria alawm" ka ti sap. 

"Hria e... Min then pawh pawiti lo khawpin alawm i awm" a ti hluk. 

"Chu kher chu ka awih lo e a" Ka ti tak nangin inrem thei lo ila chuan inthen pawh ka ngam ang tih ka hria. 

"Ka pi leh Lala-i vanga min nei hi i ni hian ka hre fo mai" a ti leh hmuka. Amah niawm lo takin a inringtawk lo hmel phian bawk. 

"I a em mai a" Ka ti hap ringawt. 

A nuia, " I bulah chuan at zeuh zeuh angai. Anih loh chuan i luhlul lutuk" a ti sup.

"Ka luhlul lo... " ka ti tawk. 

"Lo kal mai teh.." tih pahin min rawn pawta. Ka thut danin a zir bawk si lo nen ka bawh phei titiha. Ka nui nghal hak bawk. 

Inhnuaia ka zuk chhuk chu Pi Maduhi tlanchhuak tur ka va hmu hmana. Khawiah nge a kal dawn ka hre lo. Kan room a Lala-i kan muttir hnuah khan a lo la chho ta miah lo a. A rawn ngaihven hek lo. Saitluanga awmdan vangin a rawn chho ngam lo nge a lawm lo ka hre thiam lo. Chawhnu lamah Saitluanga'n Lala-i thawmhnaw thenkhat kan roomah a la chho a. Maduhi awm laia lak a tha ang ka ti chu a nui mai mai.

Lala-i rawn harh veleh eitur a lam nghal a, mut a ning tawh bawk nen inhnuaiah Saitluanga'n a paw thlaa. Chokaah Na-i a lo awma. "Khawnge Santi? " ka ti a. 

"Ka hre miah lo. Chhun thingpui in dawn pawh-in ka hmu tawh lo" a ti awlsam mai. 

Lala-i eitur ka siamsaka. A ei hnem viau. A ei zawh hnuah Saitluanga nen bawk inchung lamah an chho dun leh a. Nidangah a buaipui ngai loh tehreng nen a nel em em tho. 

"Bawihtei thawmhnaw hi tu nge khawih a? " Chokaa rawn luh pahin a rawn ti a. 

"Kan pa-in a a la chho a" ka ti a. 

"Riahpui in tum tihna mi? " a ti leh a. A aw a dam thlap. 

"Aniang... " ka ti ringawt. A hmel pawr deuh fap bakah a mitmeng a dul ruih bawk. 

"Na-i, khawnge Santi hi? Bawihtei mutna vel tifai tura ka tih kha a lo la ti miah lo a. Eng nge a tih a? " a ti leh a. A awki ala ngai reng. 

"Ka hre lo... Nichin atangin ka hmu tawh lo" a ti awlsam et. 

"Khawiah nge maw a kal le? Duhai hi chuan a khawsa mah mah" a ti nghauh. 

"Bawihtei chu a harh tawh mi? " Min rawn en pahin a ti leh a. 

"Um, thil a ei zawhna ala rei lo" ka ti a. A inhera, engmah sawi loin a chhuaka, ka va thlek zuia, inchung lam pana a chho chu ka en zuia. An room a kalpelh danah Lala-i hmu tura kal a tum tih ka hre thiam. 

Na-i nen tlai chawhmeh siam tur kan thian duna, Santi lah a reh veng veng mai bawk. 

"Insuk ka han seng lawk ang aw" Na-i'n a ti a. 

"Ka han seng zawk mai ang. Roomah phone ka dah a, lak pah ka duh" ka ti a. A bu nghat.. Diktak chuan Maduhi leh Saitluanga an inbahbuai ka hlau a, han chhoh ve ka duh vang a ni zawk. 

Inchungah ka chho a, kan room Kawngkhar lam hawn ka tum chu pangpar dahna lama tawngri ka hriat avangin inchung zawl lam ka pana, Saitluanga inchung hungna nghengin a lo dinga, Pi Maduhi a thu thung. Eng emaw ka hriat ve tul lem lo an sawi ringin ka tawlhhnunga, an tawng hre thei turin bang nghengin ka ding zui zat. Ka rin ang ngeiin Pi Maduhi'n a sawi ta chiah reng bawk. 

"Nimin khan ka remti lo chung Bdi'n a phurchhuaka, a nuam lo sa bawk nen nizanah a khua a sika. Khawsik satliah angah ka ngaia" a ti chu va tel ve mai ka chak zek zek.

"Engpawhnise keiman mawhphurhna ka la lo hi ka thiam loh ania. Ka lo enkawl ve tawh ang. Keimah chauh ka ni tawh lo bawka" Saitluanga'n a ti daih. 

"Angai hleinem" Rang zetin Maduhi'n a ti vat. 

"Tea nen hian fa neihdan ngaihtuah ula... Mahni fa ngei enkawl rawh u" a ti leh tlat. 

"Kan thei lo alawm. I hriat kha" Maduhi'n a ti a. 

"Khawvel thiamna a sang tawha. Theih loh a awm lo. Sum lam chu lungngaihna tur a awm lo" Saitluanga'n a ti leh hmiah.

"Ka lakah i lawm lo niin ka hria. Mahse, kha leh chen ka enkawla, tun ataka i lawm lo hi ka hrethiam lo" a ti ve ta tlat. 

"Ka lawm loh thu ka sawi ka hre miah lo.. Ka sawi zawk chu ka fanu anih angin tunah chuan ka enkawl ve a hun tawh a. Chu chu tha takin ka sawipui che niin ka inhria" a ti dam thlup.

"Anih chuan a nausen buai laia enkawl i peih loh vang maw min lo enkawltir? " Kha zet hian Maduhi'n a ti a. Ka rinaiin Saitluanga a hlau lo. 

"Ka enkawl peih loh ka sawi ngai ka hre lo. In nupa khan min ngen nasa tih i hria ang. Diktak chuan a sen zual lai a pawmtu chu nang ni loin ka pi zawk anih kha.Ka pi khan enkawl lo mah se keiman ka enkawl hreh reng reng lo. Min ngen nasat em vanga enkawl inni a. Nu leh pa nihna erawh ka pe phal ta lo che u a. Chu pawh i hriat kha" Saitluanga'n chiang fek fawkin a ti leh a. Pi Maduhi'n a thusawi a dawnsawn dan ka hre chaka. Mahse, ka va inlan ve ngawt a rem der si lo. 

"Min enkawltir i duh loh  chhan hi Bdi vang niin ka hria. Ka pi a rawn enkawl tirh phat atang khan angaizawng che a. A nei ta hial che a,tunah Bawihtei enkawl pawh ka thei dawn ta lo chu ania" Tah aw deuh tuau hian a ti a. Ka khawng nghal lah mai. 

"Bibi tihsual a awm lo" Saitluanga'n a ti vawt ruih. 

"Bdi leh Muansangi hi an che zia a inan zia hi ka hai hleinem. An hmelah inang lo mah se an nundan a inang lutuk. A lo kal tirh atanga a thlavang i hauh zel pawh kha Muansangi nen i ngaihpawlh angah ka ngai thin renga. A lo dik anih hi" Pi Maduhi'n a ti leh phei chu ka hre sual emaw ka ti zawk. 

"I hre sual anih chu. Muansangi pathum belhkhawm khan Bibi chanve pawh a phak lo. Engpawhnise tun atang chuan ka fanu hi Bibi nen kan enkawl ang. In nupa awmdan hi in chingfel ula, Santi leh Tea inkar pawh hi chingfel la. Puih i ngai anih chuan ka pui hreh reng reng lo che" hnial rual loha khauh hian Saitluanga'n a ti leh a. A rawn kal phei thawm ka hriat rualin Inhnuai lamah ka chhukthla nghal vat. 

"Khawnge thawmhnaw chu? " Maktih hmel deuh hian Na-i'n min lo ti a. 

"Ka la seng lo. Lala-i bulah ka awm leh lawka" ka ti ta ngawt. 

"Ih maw, u Santi hi a roomah  a awm ka ringa, ka va en a. A awm miah lo a. A thawmhnaw pawh a awm lo" a ti a. Saitluanga rawn lut chuan a sawi tawp lam a rawn hre hmana.. "Eng thawmhnaw maw awm lo? " a rawn ti ve nghal ngawt. 

"Santi mawle... Chhun atangin kan hmu tawh lo a" ka ti vat. 

"Maduhi'n a tir chhuak a ni lo maw? " ati a. Tui in tur a lachhuak paha. 

"Tir lo aniang. Amah pawh khan khawnge a awm a tia. A room ka va en anga, biak lo tum chhin la" ka ti a. A bu nghut. 

A room ka va en a, Na-i sawi ang tak tak khan a thawmhnaw hmuhtur a awm lo. Khum a insiamfel thlap bawk. Chokaah ka phei leha. "I be thei em? " ka ti a. "Aih, a pick lo... Eng eng nge awm lo? " a ti ve a. 

"A awm lo vek zawk. Ama pual ang chu a awm lo vek. A haw animai angem? " ka ti thut. 

"Engmah sawi lawk awm bawk si lo a haw ngawt chu a awm lo angreng" a ti ringawt. "Tea kan call ange" a ti leh a. A call zui nghal a.

"Eee, chuti nimaw? Eng nge harsatna a neih a? Engmah sawi lawk a awm si lo va. Tun thla hlawh pawh kan la pe si lo" Saitluanga'n a ti chu ka thawveng huai mai. Chanchin engmah hriat loh ngawt kha chu ka hlauthawng lo thei lo. 

A phone a daha, min rawn en a. 

"A nu a dam lo a. Vawiinah an khaw lam kal tur Motor a awm remchanga, a haw anih chu. Kan buai vang khan a lo sawi hreh aniang" a ti a. 

"Khai aw.. A va zia lo tak" ka ti hap.Lala-i buai khan kan buaia, midang kan lo ngaihven miah lo ve bawk atin ni. 

"A gpay tho a, thla ala tawp chiah lo nangin hlawh hi a kimin kan thawn ange. A thawmhnaw a ken vek danah lo kal leh a tum lo a ni ang" a ti leh a. Ka bu ringawt. 

"Na-i, nang chu haw lam kha lo ngaihtuah ve rih suh aw" Nui chungin a ti a. Na-i lah chuan " Ka u fanu hian awmna tur a duha, u Santi a lo kal tawh dawn loh chuan a lo awm thei angem? " Phur hmel deuh hian a ti ta daih. Saitluanga'n min rawn en a, a hmelah chuan nuihzatna alang theia. 

"U Bdi hi zawt la, a remtih chuan a lo awm thei animai" a ti awlsam et. 

Door bell a rawn ri a, Na-i kawngkhar hawng turin a tlan vata. Lawmi nen an rawn inzui luta, lo kal a tum kha ka hre chhuak leh chiah. 

Saitluanga nen an inbe luama,Zothana be turin room lamah a chho a, Lawmi nen sitting roomah kan thu thung. Ka rin ang ngeiin Papuia nen an chungchang a ni a. Nutei'n a pawm theih ngang loh vanga then mai a duh thu leh a khawngaih thu hlir a sawi a. Thurawn pek ka tum lahin "ka dinhmun i hrethiam lo" a ti zel bawk si. Darkar khat zenzawn a awma. Mahse, engmah sawifel pawh kan nei chuang lo. 

Ka mutui lai au thawmin min tiharha, tho loin ka ngaithlaa, inhau thawm niawm tak ka hre leha. Kan room hi pawnlam atanga thawm hriat a har ang bawkin pawn lam thawm pawh achhung atang hian hriat a har tho. Hmeichhe tawng ei ka hriat chu Pi Maduhi aw ang riauin ka hriaa,Saitluanga tihharh hlau takin ka tho a. A harhvan tehlul nen nizan a mu mumal lo bawka, a mutui ngang mai. 

Room pawnah ka chhuaka, thawm lo chhuahna lam ka ngaithlaa. Inhnuai lam niin ka hria a. Inhnuai luh thlakna kawngkhar ka hawnga, thawm engmah a awm lo a. Mahse, Saihminga te room inhawng ka va hmu a. Minute khat vel chauh ka ding hman ang tihah mipa phun bul bul thawm ka hre leha. Damlo an awm nge mawni? Zanin chaw kan ei lai lah khan Saihminga kha a rui phual a, tunlai zu a in nasa deuha, a pumin a zo lo nge mawni? 

Stepah ka chhukthlaa. Maduhi te room ka pan pheia. "U Te, damlo.. " ka ti hmana. Khum nghenga Pi Maduhi hnar thi sung chunga lo thu leh Saihminga'n a lo din chilh run mai ka va hmuh avangin ka hamhaih vek. 

"Awi, ti nge? " ka tum aia ringin ka ti nghal a. 

"Hei, midang pawh an lo kal hi. I duh leh kut min thlak leh la, chuti taka Awmpui hurherh tlanbo i lak nat chu le" Pi Maduhi'n hmusit tawpkhawk tihhriat tak hian a ti a. A hnar thi sung mai chu a kut hnunglamin a hru a, a sam a thur huang mai bawk si nen alandan a rapthlak ngang mai. 

"Tawng suh.. I na lutuk palh ang" Saihminga'n a ti bul hmuk. Santi chhuah vangin an inhau buai anih ka ring. 

"Ka tawng awm em mai. I mize thing lutuk thupmawi reng renga nun hi ka ning tawh" Pi Maduhi'n a ti leh hmiah. 

Saihminga kut a phe zawka, Pi Maduhi a thle nghal lawng mai. Keimaha tihchi niin ka hre lo. Hmanhmawhin kan room panin ka tlana, Saitluanga nen kawngkhar bulah kan intawk a. 

"I lo awm si lo a" a ti sup. 

"Kal ang. Buaina a awm ania" Tih leh a bana vawn ka ruala, " Eng nge? " a tih chu chhang loin stepah ka pawtthlaa. Pi Maduhi te room lam ka pan puia. An room kan pen lut chu Saihminga'n Pi Maduhi nghawngah a lo reka. Saitluanga a dawk phei nghal zawka. Saihminga kawngah a va kuaha, a thehsawn nghal lawp bawk.

"Saihminglian, Eng mihring nge i nih a? " a ti nghal thawt a. Kei erawh Pi Maduhi thaw tha thei lo chu ka lo buaipui thung. 

Khum nghengin ka thuttira, duhthawh lutukin boruak a hip kawk kawk a, a mittui a tla phung a,a hnar thi a nuai pherh nuaia, an lo inchaina lamah a kawr  a tet a. Thleng thla lehnghal lo ila chuan thilpawi zawk a thleng ngei ang tih ka hria. 

"Eng nge thil awmzia sawi teh u" Thupe aw hian Saitluanga'n a ti a. 

"Hmeichhe rapthlak lutuk anih hi" Saitluanga'n a ti chhum hmak. 

"Chutiang ka zawt lo che. A reng rengah Hmeichhe kutthlak tawk leka nep maw ilo nih a? Mipa i ni na nge? " Saitluanga'n a ti a. 

"Amah kha zawt rawh. Engvangin nge kut a tawrh? " A ti bung leh vat.

"In zahpuiawm lutuk" Saitluanga'n a ti leh a. 

"Inthen nghal ka duh" Maduhi'n a rawn tichhuak nghal vaka. A rawn tihdan tehthut chu ka lo beisei lawk lo lutuka ka phu nasa ngang mai. 

"Inthen maw? Ve lutuk che hian" Saihminga'n a ti a. Saitluanga'n a khap nghal vat. Mahse , Pi Maduhi zawk a rawn pawngpawrh ve ta chiah. A tho chhuak a, puih ka tum chu ka kut a vaiper nghal lawp. Saihminga chu kut zungtang sai ngar ngarin a kawk a. 

"Ka then dawn che. Nang zu ngawlvei, ruihtur hmuh apiang rui thei, mahni awmpuite pawh it a mutpui zel thei hi ka nei peih tawh lo che. Engmah thiam nei lo, chhungte zara inla lian satliah, mi zinga thupmawi che hi ka ning tawh. Ka awm lo anga, I mualpho nitin ang" a ti ta phiar phiar mai. Rapthlak ti lutukin ka en reng ringawt. 

"Khanglang che chuan.. " Tih leh Saihminga'n chet a ruala, mahse Saitluanga'n a pawm bet nghal hmiah. A u tha hneh ngang hek lo, a u in a kuah bet chungin Maduhi a rawn en a. 

"Duhi, min thup mawi lo.. I tihsual laka inhumhimnan min hmang tih theihnghilh suh" a ti thawt. Pi Maduhi ka en a, a hma lawka chapo tawpkhawka dak ar kha a lo meng khup lap tawh. 

"Ka sawi dawn em? Ka sawi chuan i him dawn lo" chan tha chang inti takin Saihminga'n a ti leh a. 

"Sawi rawh, I duh duh sawi rawh. Mahse kut min thlak avang hian ka mantir dawn che" a ti leh vak. Ka inringlawk hle nangin ka phu leh tho. 

"Eee, Tu nge an mantir zawk kan en dawn nia. Mama, I lehkhathawn... " a ti chiah chu Pi Maduhi a vir zawka. Saihminga leh Saitluanga inman bet chu ava bawh rawka. An tlu nghal a, Pi Maduhi'n Saihminga ka hup a tuma, Saihminga'n a samah a tham ve thung.

Saitluanga'n "Eng nge maw in tih le? " a ti thawt. Chet lak ve nachang reng reng ka hre lo. 

Saitluanga a rawn tho a, Pi Maduhi mi a ang maia tal buan buan mai chu a pawmkanga, Saihminga chu che miah lo turin  vau bawk. 

Pi Maduhi thei leh thei lo a tal laih laih chu ka en a, eng thil nge sawi a hlauh em em kha ni ta ang? 

Saihminga a rawn tho tuih tuiha, thutthleng a pana, a thu thla hnawka. A sama inkek chungin a kun ta reng. Pi Maduhi erawh awmze nei loin a tal vak vak a. Saitluanga'n a pawm bet hneh ngang si a. A rei deuh hnuah phei chuan a chau ta aniang, a tal peih tawh lo. 

Khumah Pi Maduhi a thu a. Kawngkhar ngengin Saitluanga a dinga, kei Dressing table bulah ka thu thung. 

"Hetiang hi kan thleng tawh ta sa sa a, Mama engkim i hriat a hun tawhin ka hria. Ka sawi anga, I nau hi min ngaidam thei lo anih pawhin ka sawisel ngam lovang" kan ngawih thap hnuah a rawn tichhuaka. A meng sen rum nangin rui hmel a pu tawh lo. 

"Sawi rawh.. " Saitluanga'n a ti nghut. Pi Maduhi ka melh zawka, hnuai lam a melh ngar mai.

"Muansangi lehkhathawn kha a nuin min pe a. Pek che ka tum laiin Maduhi hian a lo hawnga, lehkhathawn pakhat chauh a daha. A pawimawh zawk erawh a halral a" a ti ta dap. Ka beisei loh lutuk a rawn sawi takah chuan ka tho a, Saitluanga ka pan nghal vat. A bulah ka va dinga, a kut humruh tlat chu ka vawn sak nghala. Muansangi'n hre tura a duh diktak a hriat huna a thinthawk na lutuk tur tlema a ziaawm theih nan ka tawngtai ru mawlh mawlh bawk. 

"Saihming.. " Zawitein Maduhi'n a ti a. Mahse, Saihminga chuan ngaipawimawh hmel a pu lo. 

"Muansangi, Maduhi leh Mki te kha an thiannu Pasal nei tur thlah na Party naah an kala. Muansangi theitui in turah khan damdawi pawlh a ni a. Tah khan mipa an hmelhriat satliah nen an mu duna,Muansangi khan hrehawm a ti em em a. Mahse, a taksaa damdawi hnathawh vangin a inthunun thei lo. Engmah i hre chhuak lo va. Muansangi khan hrilh che a duh em em a, Damdawi kha tu pawlh nge a hre lo a, puh tur mumal a hriat loh chuan a thiante hian hrilh lo tur chein an ti si a. Zep ral mai theih an inrin laiin a rai taa. Tihngaihna hre loin a tlanbo a. A tlanbo hnuah khan a chunga thil thleng kha tihpalh ni loin tum reng vanga a thiante pahnih plan a ni tih  a hre chhuaka. Khatiang plan an siam chhan chu Mki hian hman atangin angaizawng tawh che a,Muansangi khan tihpui che tum siin amah nen in inkawp ta zawka. Chuvanga plan siam anni a. Muansangi khan a hriatchuah veleh rawn hrilh che a tum laiin a video kha an nei tih an lo hrilh leh ta si a. I hmel hmu ngam tawh loin a bibo a,a nu leh pa in an tuithlara..... "

Saitluanga insehruh nasa lutuk chu tihngaihna hre loin a kawngah nghet takin ka kuaha, a taksa khur nasa lutuk a reh thlengin ngawirengin ka kuaha. Saihminga emaw Maduhi zawk pawh an tawng eih lo a. Thawm ri takngial pawh an siam hek lo. 

Thla 4 a liam ta... 

Ka alarm riin min tiharha, rang zetin ka thuchhuak nghala. Mahse, Inrinni tih ka hre chhuak leh thut a. Ka mu tha leh a.. Saitluanga ka en a, bawkkup zawngin a mu a. A la mutui lutuk, lehlam ka va hawi leha. Kan khum bul chiaha Lala-i khum ka va hmu a. Ani pawh puan tlawhhlim vekin tui takin a lo la muhil a. Hlim zetin ka nui sak. 

Zangthalin ka mu leha. Thil kal tawh ka ngaihtuah a.. 

Thil rapthlak em em mai thlen zan khan Saihminga leh Maduhi kha Saitluanga'n a ngaidam a. "Hun kaltawh kan siamtha thei lo a. Phuba pawh ka la dawn lo, chunglam kutah ka dah ang" a ti thei ta tlat. Mahse, an nupa erawh suih zawm ngaihna an awm tawh lo. Maduhi pawhin a pasal sawisakna avanga mantir a tum bik ta chuang lo a. Saihminga pawh nun bul a tan tha leh meka, a lung a leng thei viauin ka hriaa. Ka khawngaih thina,mahse Maduhi erawh koh leh lam reng reng sawipui theih a ni lo. 

Maduhi pawh an inthen hnu atangin depression nasa tak vangin mu leh mal pawh nei loin a khawsaa. A hna pawh a thawk zawm thei rih lo a. Mak takin a kawm peih chhun tlemte zinga mi ka ni ta tlata. Eng emaw chang chuan min rawn be thina, rei tak tak a titi a. Mahse, a sawi ngai a sawi nawn tluk tluk zela. Awmzia a nei vak lo. Kha lehchen lo enkawl tu leh Nu anga a lo neih anih avangin Lala-i hian a sawi fo a, a awmna min zawt leh zauh thin a. Angai ve tho niin ka hriaa, hmuhtir chak chang pawh ka nei. Mahse, a taksa tereuhte a Maduhi'n meiziala a deh thinna ser tamtak awm ka hmuh apiang hian Maduhi ka huatna a zual thina, hmuh leh hi a phu reng reng lo tih ka ngaihtuah phah fo. 

Mki ka ngaihtuah a, nula hmeltha leh fel tak anga lang siin a nun chhungril erawh a bawlhhlawh tawpkhawk a. Eiruk thubuai vangin hna atangin suspend a ni a. An suspend hnu lawkah an pu ,kum 60 dawn a upa lakah sawn a pai zui a.Saitluanga'n Mki leh Maduhi chunga phuba a la duh lo kha chunglam in chiang takin a laksak niah ka ngai nghet hmak.

Saitluanga a rawn inleta, min rawn kuaha. A rawng meng zui nghala..

"I va harh hma ve" a ti sup.

"School kal ni emaw ka tia" ka ti ringawt.  A then suka, " In la fanu nei si" a ti hluk.

"I nei ve lo mi? " ka ti ve thung.

"Nei ve tho e. I inti ta tu em alawm, kei pawh min ngaihven lo" a ti leh a. Ka kawr hak a rawn zena.. Rang zetin a kut ka man saka..

"Eng nge? " a ti hluk..

"Doctor-in a phal rih loh kha" nui chungin ka ti a.

"Ninawm a... Rai tawh hlek suh" Tih pahin a mu sawna. Ka nui zui hawk hawk thung...

Ka inbengkanga, Saitluanga titau bur leh Lala-i tui taka muhil chu ka thlek tawn seka.. Khawvelah hian kei aia hlim hi zawng se an tam bik kherin ka ring lo. Mahse, ka ngaihtuahna kil khat luah rengtu chu mi hi an pawnlam landan ang hi chhungrilah an lo ni vek lo a. Pi Maduhi leh Saihminga pawh pawn lama nupa lungrual leh inhmangaih tak, chhungkaw zahawm em em nibawk si anni a. Mahse, an chhungril erawh a nget a, tutan mah awhawm an lo ni miah lo a. Social media vela nupa  inhmangaih nasa leh chhungkaw awhawm nazawng hi atakah erawh chuan inhmangaih lo leh chhungkaw belhchian dawl lo berte an lo ni leh tlat thin..

Ka mit ka chhinga.. Keimah anga fahrah pakhat, lainatawm tak a nun lo hmang ka chhanchhuak a, ka pi duhthusam ka puitlin niin ka inhre bawka. Ka fel famkim dawn lo a, sawiselna tur awm lo ka ni dawn lo tih ka inhriaa. Mahse, nu hrawn tha ber, ka fahrawn tana thiantha ber nih erawh ka tum ngei ang... Thian kan nih phawt chuan kan inkar buaina pawh a fel leh mai thin anga, ka bulah rilru tak tak sawiin a tah ngam ka duh ber a. Kan rilru zawng zawnga kan pawh theih tluka hlu an awm si lo a. Chutiang taka Lala-i hnaihtu NU nitur chuan ka inbuatsaiha, Pathian pawhin mal min sawm ngei ka beisei tlat bawk.

A TAWP TA🖤💜💙🤎🤍💛