Malsawmsangi - 2

 Chapter - 2

"Engtin nge i rawn luh a? Gate ka khalh vek a, kawngka pawh ka kalh bawk si" Ka ti nghala. Min rawn en a... 

"Kalh la ka lo lut nang mawle. I a mi? " Nui chungin a ti a. 

"Ka kalh alawm a.. " ka ti rang vata. "I rui deuh zawk nge nang hi?" a ti duh lek. 

"Ka rui ngai ami? " ka ti ve hlur thung.

"Ka hre chuang nang. Mahni kawngkhar kalh leh kalh loh pawh hre hlei lo chu i rui aniang ka ti mai. Ninawm, ka inbual dawn. Puan sin tur a awm angem? Lum mah se puan sin loin ka mu thei lo" a ti leh duah. 

"Nei ve bawk e. Khumah hian mu rawh, keimah zawk thutthlengah khan ka lo mu ang" ka ti a. 

"Chutiang awm tak chu a ni" a ti a, a nui zui a. 

A inbual hlanin Puan thuah chuang dahna tura ka u nupuiin min pek, bawm kil li nei atangin blanket te ka lachhuaka, khumah ka daha, Gate kalh turin chhuah ka tuma kawngkhar a lo inkalh thlapa, a rawn luh pahin a rawn kalh anih ka ringa. A mize tha tak kha amahah hmuh tur awm mumal tawh lo mah se mi che fel thlep thlawp a nihna erawh a lo la nei reng anih hmel. Ka hawnga, inhnuaiah ka chhuk thlaa, Gate ka zuk kalh dawna, chu pawh a lo inkalh thlap tho. Awmzia hre lo zetin ka en a, a lo lut thawm ka hriat leh ka va biak inkar kha a rei lo hle sia, a zuk kalh hman tihna nge ni? Bangbo fein ka let chho leh a, a lo la inbual zo lova, thutthlengah ka mu a, phone ka khawih paha. Ka rin ai takin a inbual rei ta zek. 

Darkar chanve vel a liam hnuah a rawn chhuak ta hram, "Tui hi ka dah khat lehnghal dawn em? " rawn ti nghala. 

'Ngai lo, zingah animai. Inthiar naah khan hman tur a awm chuan a tawk mai" ka ti a. Thutthleng pakhat zawkah a thu a, a ke a hru a. Ka slipper a bun chu atan chuan alian lu hret. 

"Gate zuk kalh ka tuma, a lo inkalh renga. Kawngkhar pawh hi ka chhuah dawn khan a lo inkalh a.. Gate i kalh lo iti bawk si, I rawn lawnliam tihna mi? " ka ti a. 

"Lawnliam nang. Kawngkhar chu ka kalh ngeia, Gate lam chu ka van hrethiam bik lo ve. Zuk kalh leh tur pawhin chahbi ka hre si lo a" a ti deuh ha mai. 

"Ka u ten chahbi an kawl tho a, an kalh aniang. Ka u nupui hi a chimlim khawpa" Ka ti a. Min chhang lem lo. 

"Eng chen nge helamah i awm dawn? " ka ti leha. 

"Ka hre chiah lo. Ka thian pakhat hi phaiah inhlawhin a awm a. Tah chuan thawh ve ka inbeisei a" a sam hru nawk nawk chungin a ti a. 

"Um, a that chu. I pa i rawn ve hrim hrim em? " Nuam ti chiah loin ka ti a. 

"Rawn lo, rawn pawh ni ila chhanna tur ka hre sa vek tho a. Awmzia a awm lo" a ti deuh hmak. A mizia a thlak nasat tak viau hnuah hian a pa nen hian an inmil lem lo tih ka hria a. A bo deuh vang vang pawh hian a pa aiin a nuhrawnin a ngaihtuah mah zawk thina. Mahse, Malsawmi hian a pa aiin a nuhrawn hi a haw zawk fe tho. 

"Ni ve tho mai. Aaa, kum 30 i tlin lohna a tam tawh lo em mai. Chuvangin nangmah i in enkawl kha a tha" ka ti leha. 

"Nangpawh kum 30 ila tling lova, kum 30 chu ka la hlat ve em maia..Mahse, mahni inenkawl chu a tha ka tia. Chuvang ania phaiah kal ka tum..Ka mut a chhuak,ka mu mai dawn, tah khan mi mut i tum tak taka? " Minti leh daiha. A hmai dang lap leh a mitmeng ngui raih maiah chuan a pa nen buaina dang lian zawk an neih leh anih ka ringa, chaw ei mumal loin a awm leh reng tawh pawh animaithei bawk. 

"Um,ka kian ang che.I lo riah ve chhun chhunah. Chaw lah kha i ei ta si lo va" ka ti a. 

"Ka thiante bulah ka ei alawm..Nang hi chu i fel ve reuh ngawt mai. Hman atang khan nangmah chauh ni lo midang ngaihtuah hi i tihdan ala ni renga. Ti nge nula ho hian an rawn ngaihzawn luih luih loh che le? I zei lo lutuk zawk nge ni? " a ti zui duah. 

"Ve che a. Ngaizawng ka nei aw" ka ti ve ngawt.

"Khai,a va lawmawm ve. Tuai emaw an ti rum rum tawh che a. Ku Zalawma chu a fapa a tuai leh si lo va, a lawm ngawt ang' a ti leha. " I va han chhe zet zawt tak" ka ti a. Kan nui dun ta vak vaka. Kawm nuam tak leh ngainatawm em em a ni thin a. A mize nghal tak hi chu hria kan tam lo. Mahse hetiang mizia dam leh harhvang tak anga lang chung si hian a chhungrilah erawh pawisak a nei mang lo, a huai em em a, ruih tur a hmuh apiang a rui theia, Insualpui a nei fo mai bawk. 

Mu turin roomah a lut a, "Ka hna tur ka zuk zawm theih hma hetah awm ila a pawi angem? ' a rawn ti leh lang langa. 

" Pawi nang, awm rawh. Mahse, khawnge i thawmhnaw? " ka ti let a. 

"Ka thiannu te inah ka dah. Naktukah ka la ang" a ti vat. 

"Kalpui i ngaih chuan zingah tho hma la, anih loh chuan nilengin hnaah ka buai dawn ania" ka ti ve a. 

"Min kalpui lo mai rawh. Tihtur dang ka nei a, ka rei ang. Enteh, hetah ka awm tih hi kan khaw lamin an hriat ka duh lo ania. I chhungte pawh aw" a ti leh a. Ka nu khan min rawn zawt tho nangin chuti taka hrilh lo tura min duh chu nidang ang ngawt lo deuhin thil a thleng anih ka ringa. Tumah hrilh ka tum lo. 

Mu chunga kan titi leh luam hnuah ka tawng min rawn chhang mumal ta lo va. A muthilh a chhuak hle anih ringin ka be zui duh ta lo. Ka thiante ho nen Game kan khel ta zawka. Zan dangah chuan kan inbe pah lawng lawng thina, zanin chu mikhual ka neih avangin chutianga tih a rem lo. Kenny-a ngaihdan a ni lo va, a phun a phuna. Mike ka on phah chuang lo. 

Zing lam dar 1 vel thleng kan khelh hnuah ka out sana, anni erawh chu out an la tum lo. Eizawnna tha tak tak nei tawh anni hlawma, tlaivar pap pawhin khel se an eizawnna a buai phah ve lo va. Kei erawh ka eizawnna buai lo mah se zingah tumah eirawngbawl tura rin tur ka nei ve lova. Tlaivar tluk tluk thei ka ni ve lo. 

Muthilh mai ka inrin laiin ka muhil thei ta tlat lo. Malsawmi muhil hnar ri tlak tlak chu ka ngaithlaa. Riahpui ka neih khat avangin ka awm thiam lo pawh a ni maithei. Hun kal tawh ka ngaihtuah a, Malsawmi hetianga mi hnuaia a rem rem thawk tura a rawn kawhchhuak ve ngawt mai hi ka lainat a. Chutihrualin a mizia a that loh em vang hian tumah dem theih phei chu an ni lo. 

A pa hi High school zirtirtu a ni a. Ka pa pawh High school zirtirtu tho a ni a. Kan khuaa an rawn sawn hian kum 6 mi vel ka ni a, Malsawmi hi chu kum 5 a ni thunga. Kan inhnuai an rawn luaha. A nu kha nu hmelchhe lo tak, ngo fai vang mai a ni a. Mahse, a chhul cancer vangin Malsawmi kum 3 mi lek anih laiin a chhul an paih a,chuvangin Malsawmi chauh hi fa an nei a. A nu khan a duat em em a, a pa pawh pa hmeltha leh fit tak, infiamna ngaina tak mai a ni a. A nu aiin kum 10 dawnin a naupang thunga. Mahse, a nu a hmelthaa, a ngo bakah a intifai peih em em a, in upat hleih uchuak ang pawhin an lang lem lo va. Chhungkaw hlim leh nuam tak nimaiin ka hre thina. Malsawmi nen hian kan Inkawmngeih em em a, an inah leh kan inah chaw kan in ei chhawk zut thina, naupang tihtakah insual phat chang lah kan ngah. 

Kum 2 an awm tlin kha chuan a pa  kohhran leh khawtlangah a inhman avang leh High school zirtirtu a lo ni bawka. Kan khuaah a langsar pawl an ni der tawh. Mahse, vanduaithlak takin a nu kha a rilru a buai ta tlat maia. Atir lamah kha chuan kan hre thiam lo viaua. Nidanga min hau ngai reng reng lo kha min vin vak vak zel ta maia. Malsawmi pawhin a nu kha a tih ta riaua, achang phei chuan kut te pawh a thlak ta fo maia. A rei hnuah phei kha chuan a dam loh vangin Pangpar huan nuam deuhah a awm an ti a. Kei leh Malsawmi kha naupang ngang kan ni a. A dam loh vangin hmun nuam takah a awm niin kan ngai ve mai. Malsawmi'n a nu a awmbo hnu khan a ngai em em thina, a pa lah kohhran thalai leh khawtlangah a inhmang laklawh tawh si, kan inah khan a riak fo va, chaw pawh a ei fo. 

Kum 1 vel a awm bo hnuah a thi tih an rawn sawia. A kalbo ni atang khan Malsawmi khan  vawikhatmah a nu a hmu leh ta lo. A nu boral ni hian kan kawtah marble kan lo perha. Ka nu in inchhungah min ko luta, Malsawmi pawm chungin a tapa. Angaihna hre lo takin kan in en he haw a. Ka nu bakah ka u te an tah vak vakah khan naupang tihtakah achhan pawh hre loin kan tap ve ta chiam a. Mi an lo pungkhawma, Malsawmi leh a pa zin turin an insiama, Malsawmi nu a thi tih chu kan hre ve taa. Mahse, engtia han tih vak dan pawh kan hre chuang lo. 

Malsawmi nu thih hnuah Malsawmi ni in a rawn awmpuia, mahse a awm rei lo.Malsawmi pa te khua hi Kolasib a ni a. An khaw lamah ka nu te khan insawn an dil mai an ringa. Mahse, an insawn ta miah lo. Insawn a hnekin a nu boral atanga kum khat pawh la tlin hmain lung an phuna, an lungphun zo lo haw hnu lawkah kan khaw nula hmeltha leh fel, hman deuh a kan District a Chapchar kut Miss atana an thlan nen an innei ta daih. Tun hnu a ka nu te sawi ka hriat leh danin Malsawmi nu awmna kha TNT a lo ni a, a a hnu lawk atang khan Malsawmi pa leh u Jenny hi an inngaizawng niin sawi sep sep a lo awm reng tawh a lo ni a. An nu lung a phun zawha an inneih khan naupang tihtakah thla tam ral pawhin ka hre lo va. Mahse, an inneih khan Malsawmi nu thih atanga kum khat leh a chanve chu a lo liam ve hman tih ka hre leh tlaikhawhnu a. A nu kha a pa aiin a upa fe zawk tihte pawh ka len deuh hnua ka hriat chauh a ni a, an khua Kolasib tihte,a nu kha fanu mal, a nu leh pa in an boralsan a ni a. Malsawmi rawn ngaihven zui tur an awm lo tihte pawh hi tleirawl laia ka hriat a ni a. Tunah chuan kan inbul chiahah In an nei tawha, kan khaw mi hlun pangngai anni tawh. Kan chhungkua leh an chhungkua kan la intlawhpawh tha renga,mahse ka nu hian u Jenny hi a mil vak lova. A sawisel zauh zauh reng. Tun hnua ka ngaihtuah let hian ka naupan laia ka hriat dan kha chu a inkawkalh nuaia, mipa naupang tihtakah midang chhungkaw thil kha ngaihven tak tak nachang ka hre ngai lova, ka thil hriat engkim mai kha a chiang lo nuai zel mai bawk. 

Kan naupanlai hun ngaihtuah pah reng chungin ka lo muhil a. Ka alarm riin min tihharha, thutthleng ah ka mu khat deuh a, ka tan a tawi deuh bawk nen ka sil deuh urh thei. 

Chaw ka chhuma, Malsawmi erawh thawm ala nei lo. Chawhmeh thing siamsa ka neih avangin chawhmeh lam chu siam angai lo. Pawnah ka chhuaka, ka u nupui pangpar leh thlai buaipuiin a dan pangngaiin a lo awm a. Ka thawm hriaiin a rawn hawi a. "I tho tawh maw? I nupui ruk chu a la mu em ni? " a lo ti nghala. 

"Ka ru awkawng lo. Ka thiannu ka tih mawlh mawlh kha" ka ti vin deuh tuka. 

"Ka awih lo em maia. Nakinah i nu ka han bia ang" a ti leh a. 

"A tul lo em maia. Chhungkawm lam thilah buaina an nei deuh aniang. Phaiah hnathawkin a kal dawna, an la tifel chiah lova. An tihfel hma hetah a awm ve dawna, a pawi angem?" ka ti nghal duaha. A thil tihlai chawlhsanin min rawn en a. 

"Pawi pawh ka hre lo. Mahse, I u hnenah rawn sawi la. Helaiah kohhranah te i inhmang si a, thil hi a rik leh dan a mawi lo thin" a ti a. Ka u hi kan kohhranah Tual Upa a ni a. Ama hnenah emaw a nupui bulah nula awmpui lawk tur ka neih thu hi chu sawi ka tum saa, mahse rawngbawlna lam atanga ri mawi lo leh mi beng ti thlep thei anihna tur lam reng reng ka lo ngaihtuah phak lo. Amah Malsawmi nena kan inkar hi inngaihzawnna a ni lo tih ka hriatchian lutuk vanga ngaihtuah phak lo pawh ka ni mahna. 

"Nizan lah kha Gate i kalh lehpek lo emaw ka tia. Zanah khan a invaw ri niawm tak ka hriaa. Ka va chhuaka, a lo inkalh thlap sia" a ti zui leh mawlh mawlha. Makti deuhin ka hawi phawk nghal hru mai. 

"Chutiang thawm engmah ka hre lo reng reng. Dar engzat velah nge a? " ka ti a. 

"I haw hnu lawkah khan mawle. Ka va en chu a lo inkalh thlap a" a ti leha. Ar chaw tur chawthing a hmet zui mawlh mawlha, Kei erawh nizana Gate ka zuk kalh dawna a lo inkalh vek ka hmuh kha ka ngaihtuah leta, an mahni hian an lo kalh ni turah ka ngai kha ania. A lo ni miah lo..Ka u hian a kalh zawk anga, a nupui hian a hre lo zawk nge mawni dawn ni? Ka haw paha kalh ngeia ka inhriat lah kha Malsawmi khan ka kalh loh zia a tilang fiah veka. Ka u in a kalh anih ka ring ta ngawt. 

Chawei hmaa inbual ka duh avangin inchhungah ka lut a, Malsawmi a lo la tho lo cheu. Zing thawh hma lam hi a tuina a ni lo tih ka hriaa. Ka kaihthawh mai angai dawn tih ka hre bawk. 

Room khawngkhar kik pahin ka ko a, min chhang loin a reh vang vang. Ka kik nawn leh dat dat a, min chhang chuang lo. Chuti tak maia mu nghet chu engtia tih tur nge tih ka ngaihtuah a, kawngkhar ka pawt chhina. Vanneihthlak deuhin a lo kalh lo hlauh. Ka pawt kaua, ka dak lut nghala. Mahse, khum a lo inthlep fel thlap bakah Malsawmi reng reng hmuh tur a lo awm tawh lo. 

Note : Hetiang lam hi ka ziah vawikhatna a ni a. Ka hlau deuh roh a, mahse hlauhawm em em a awm pawh chu a ni si lo🤣