Malsawmsangi - 3

 Chapter - 3

Hrilhhai angreng takin ka hawikuala, ka thawmhnaw ka haktir kha banga thawmhnaw khai naah a lo inkhaia, ka slipper a bun pawh ka pheikhawk dahnaah a lo awm fel thlap.

Ka phone ka phawrh a, ka call nghala. A tlang thei reng reng lo. Nizanah lah kalna chin sawi hlek loin a chhuaka, tukin pawh a chuti leh tho. Ka nu hian kan naupan lai atangin kalna tur sawi lo va chhuah hi a phal ngai lova."Vanduaina tawh palh pawh a awm thei a, in kalna chin hriat loh chu a mualphothlak" a ti thina, Ka pa hi ngawirenga chhuah bo nulh a chin avangin a hau a hau thina. Chuvangin khawiah pawh kal dawn ila In a awm apiang hnenah kan sawi zela.Engmah sawi hlei lova Malsawmi chhuak bo leh daih mai leh a khawsak dan pawlawh lutuk chu ka ngei deuh riau. Msg ka thawna,a kalna ka zawt a. Mahse chu pawh chu a deliver thei chuang lo.

Ka inbual zawhah chaw ka ei nghala, hna kal tura ka chhuah dawn thlengin a lo la let ta lo fo. Chahbi ka u te inah ka dah tih msg bawkin ka hrilh leh a. Hna ka kalsana, a awmna chin hriat ni bawk si lo nen ka rilru a nuam lo tun mai.

Nilengin Office-ah kan buaia, in ka thlenin khua a thim thet thet tawh. Malsawmi a lo awm tawh ka rin nen a lo la awm ta chuang lo fo. Ka u te inah chahbi lain ka lut kawi zuaia. A tlai tawh deuh bawk nen ka thu khawmuang lo.

Inthlak loin chawhmeh ka chhuang lum sawk sawka. Chaw erawh zingah khan pahnih eikhawp tura ka chhum avangin a thing a awm teuha. Dal kan sa a awma, dal zawk ka chhuang lum tho a, chawthing erawh tilum lem loin ka ei mai ang.

Chaw ka ei mawlh mawlh laiin Malsawmi a rawn lut hlawl mai.

"Khawnge i kal a? " Ka lo ti bul hmuka. A dinhmun harsat zia leh a nun a hmang pawlawh thang tih hre mah ila, ka inah a rawn thlenga, ka in atangin eng emaw palh tawk se ka mawhphurhna a sang dawn tih ka hai lo. Chuvang takin a khawsak danah ka lawm lova, ka biak dan pawh a dawngsawngtu tan chuan inthlahrun rawihna tham a ni.

"Zingah khan ka thiannu khan min rawn be thut a. Ka kalna tura tul vel min buaipuitu tur number min rawn pe a. Zing a va hmu nghal turin min tia. I la mutui bawk sia, ka kaitho duh lo che nih kha" a ti a. Ka biak dan bul leh chang fuk mai chu ngaipawimawh awm pawhin a awm lo. Thutthlengah a thu zawi thla hnaka, a hmai dang var pap leh a hmui duk deuhte, a mitkhur tla deuh dak te nen chuan minung ni loin mitthi a ang mah zawk. Khati khawpa hmeltha leh no nalh ve thin, hetianga a awm ta mai hi nun uluk loh hrinchhuah chhiat zia a lang chiang ngawih ngawih.

"I chin sawi loin i bo tawp zela. Khawpuiah hi chuan mi kan chikima. Tawhsual tawh palhte hi a hlauhawm ania. Ka phone tlang thei lo che a. Msg lah deliver thei lo" zaidam zawkin ka ti leh a.

"Ka phone a chhe daih" a ti liam vat.

"Engtik atangin maw? " ka ti deuh hu a.

"Ka chhuah hnu lawkah khan rawn biak che ka tuma, a lo thi daiha. A nung thei ta miah lova. A hma atangin a tha vak tawh lo sa a" a ti leh niah niaha.

"Engpawhnise chaw hi rawn ei ve phawt rawh. Ei khamah i inbual mai dawn nia" ka ti a. Hauh deuh nek ka chak viau nangin a pa pawhin a siamthat theih loh fanu hi keia hauha tha tur a ni lo tih ka hre ve tlat.

"Ka thawmhnaw pawh ka la ta lo law law mai. Naktuk tlaiah Guwahati-ah kan chhuk dawna. Zingah emaw chaw ei khamah ka kalpui turte bulah ka phei anga. Chuan, Guwahati atangin train-in kan kal dawn a" a ti leh siam siam.

"A that chu, zing anih chuan kan tho hma anga. Ka va thlah ang che, I phone a tha bawk si lova. I thiante phone number ka la nghal anga. Inbiak duh hun pawh a awm thei a. Chawei kham pawh nise hna kal pahin ka thlah kual thei ang che" ka ti duah.

"Nia, a remchang ang" a ti ve a.

Inkhawm turin ka chhuahsana, inkhawm banah U Ruati te inah kan lenga. In a ka hawin dar 10 a ri tawha. Malsawmi a muthilh tawh ka ringa, mahse thutthlengah lehkhabu chhiar chungin a lo mu a.

"I va inkhawm rei em em, i leng tlang zawk ami? " a lo ti nghala. Inthlak turin roomah ka lut a, ka puansin tur nen ka chhuak leh a. Thutthleng pakhat zawkah ka mu ve nghala.

"Tah hian ka riak ve mai dawn. Kan inhmu leh mai mai tawh dawn si lo va, titi a chakawm" a ti a.

"Awm hlen i tum tihna mi? " nui chungin ka ti a. Min chhang loin chunglam enin a mu a. A lehkhabu chhiar lai a khup a.

"Ka chanchin i hriat khan mak min ti em? " reife hnuah a rawn tichhuak thuta. Ka phone en lai atanga hawisawnin ka va en zawka, a mut dan ngaia mu tawh loin min lo melh reng.

"Eng chanchin? " ka ti a.

"I awmbo hnu a ilo haw leh hmasak ber khan mawle. Mi pasal kha ka lo ngaizawng a. Zu ka in mai bakah inchhungah buaina siam ka la ching zui tihte kha.. " a ti a. A zat vang pawh ni loin a nui a.

"Ee, khatiang lam kha maw i tih? Mak tih thuah chuan mak ti e" ka ti a. High school ka zawh hnuah Higher kal turin Aizawlah ka awm thlaa.Hostelah min dah a, Exam zawh chawlh a rei loh em avangin kan khuaa haw loin ka u te bulah hian chawlh ka hmanga, kum tawp School chawlha ka haw khan  Malsawmi leh Pu Sangpuia inngaihzawn thu ka hre nghala. Ruihtheihthil a ti tih ka hre lehzela. Hmeichhe harhvang, hlim thei tak leh ngainatawm, sport lam tithei tak ni chunga nu zem lawi si a ni a. Tleirawl hmeltha tak a lo nih bawk avangin kan khaw rawlthar ho khan an ngaizawng nasaa. Tlangval puitling pui pui thlengin an ngaizawng a. Chutihlaia mi pasalah pawh a nuhrawn unaupa nen khera an inngaizawng ta kha mak tih loh theih a ni lo. Kumah lah an inthlau em em a, a pa rual thuak a ni a. Nasa takin a pain a hrem a, kut a thlaka, a nuhrawn nen pawh an inbiak loh phah reng bawk.

"I hmelah khan mak i ti mai pawh ni loin i ti lutuk anih kha" a ti a. A nui zuia, "mak tih loh a har ve em alawm. I mizia hre chiang ka lo inti ve bawk si. Mi sawi hre mai mai phei chu ni ila ka awih teuh lo" ka ti ve tawl mai.

"A dik reng. Amak duh hian ka ring. Mahse, mihring hi a lo danglam theih khawpa. Achang chuan naupan that leha,mi pawisawi miah lo nih leh kha ka chak thin" a ti hap. Thil kaltawh sawi awmzia a awm lo tih ka ngaihtuaha. "I insawi lungleng dawn, thildang sawi ang" nui chungin ka ti ta daih.

"Ngai lo, zanin bak hetiang lam sawina hun kan nei tawh lovang. Chuvangin thil tamtak hrilh che ka duh a. Ni lo se chuan zanin pawh hi ka lo riak tawh lovang. Ka thiante bula riah a awlsam zawk daih" a ti leh ta tlat.

"I awmdan vel chu thi turte pawh i ang e a? " Nui chungin ka ti a.

"Ka lo thi tawh reng mai thei asin" Thutak fe hian a ti ve nghal zat.

"Enga? " ka ti bak hlur mai.

"I va han dawih tak, I upat tawh nen i lo huai deuh tawh ang chu ka tia" a ti a. A nui ta vak vaka, ka nuih a za ve miah lo. Hetiang lam hi chu ka thil ngainat loh zawng ber a ni a. Fiamthu nan pawh ka duh lo.

"I mood ti off vel lo maiteh a. Engtin nge thi ila tihian ka titi zuah zuah ang? ' thutak zawkin a ti leh a.

" Thihna leh thla tih vel hi chu ka sawi peih lo. I hre reng a" ka ti bak leh hluk.

"Nep sia maw.. Engpawhnise, ka awmbo chuan helamah engmah min phuartu ka nei lo bawka. Lo haw leh ka tum tawh lova. Chuvangin i hriat atana ka duh zawng zawng hrilh che ka duh" a ti leh charh charh.

"Sawi la, ka ngaithla reng alawm' ka ti a. Ka mood ala fuh chiah lo. A hmel da bul leh hmui duk chur mai te chu en nuam ka ti lo.Mithi hmel anih duh hmel tak tak tlat. Mipa tihtakah hlauh nei nih ka duh ngai lo,mahse Mithi tawh thla an hmuh thu miin an sawi hian ka hlau em em thin a. Naupanlai atangin hetiang hi hlauh zual chang ka nei lehnghala. Chu chu amah Malsawmi hian a hre chiang em  em bawk.

" Ka nu kha i la hre chhuak ve thin em? " a ti leh daih. Inchung enin a mu a.  Chet pawh a che lo.

"Zep loah chuan hre chhuak ngai vak lo" ka ti a. Kan thianho group a msg ho ka chhiar a, Kenny-an midang ho a lo hnehsawh kual leh mek a. Ka nui ka nui mai.

"Ka nu kha tun ang lai hi chu nise a thi lovang" a ti leh ringawt.

"Nia, thi kher lovang" sawi tur dang hre loin ka ti ve ngawt. Thiamna te a sang tawha, inenkawlna tur khawl changkang tak takte a awm tawha, a boral kher lovang.Mahse, ani kha chu rilru lam harsatna nei a ni a. Engtia han tihvak dan a awm lo mai thei. Bakah, a thih hun tura Pathian ruat anih chuan tunlai ang pawh hi nise a thi tho vang. Ka ngaihdan sawichhuaha,Malsawmi rilru tihnat sak kher erawh tul ka ti lem lo.

"Ka nu awmdan kha ka thiam ang anga ka chhui let hian Depression niin ka hriaa. Diktak chuan ka pa awmdan vanga rilru lam harsatna nei kha a ni bawka" a ti leha. Ka hre thiam chiah lo.

"I sawi tum ka man chiah lo. An inhau thin tihna mi? " ka ti deuh hu. Nupa inngeih tak an ni tih kha ka hriat ve dan a ni tlat.

"Hau lo.. Mahse, ka nu kha a tap ru nasa thin a. Ka la naupang bawk nen engmah tak tak kha ka lo hre thiam ve lo va" a ti leh halh.

"Ka pa leh Jenny-i khi ka nu thih hnu a inngaizawng an ni reng reng lo. In khuaa kan lo awm hnu lawk atang khan an lo inngaizawng daih tawha. Kohhran leh khawtlanga an inhmanna kha inphen nan an lo hmang a" a ti leh duaha. A thilsawi chuan a ti thinrim tihhriat takin a sehchilh deuh rap rapa. Keilah mak ti em em in ka ang phuau ringawt.

"Engmah kha ka lo hre thiam ngai lo alawm. Chuan, chu aia mak ka hrilh ang che. Putar tenawm zet kha ka ngaihzawn vang a ni lo. Amah zawk khan min khawihchhe hmasa a. Phuba ka la anih kha" a ti chang leh fak.

"Malsawm.... " ka ti ro hulh ringawt.

"Mak i ti ngawt ang ka ring" a ti a.

"Aw,mak ka ti" ka ti bawl. Sawi belh tur ka hre teuha, mahse eng ber nge ka sawi dawn ka hre thiam lo. Naupan lai atanga ka hriat a ni a. A nun a hman khawloh em em hnuah pawh dawt sawi a ching lo tih ka hria. Mahse, tuna a sawi kha chu awih tur a ni em ka hre tlat lo. Kha lehchen kan inkawm a, Pu Sangpuia'n englaiin nge a lo khawih chhiat hman ka hre thiam lo. Bakah, hetiang lam hi min hrilh vawikhatna a ni a. Ka haw changa mi pasal kawp a that loh zia ka sawi pawhin thildang a sawi daih zela, sawipui theih a ni ngai lo hrim hrim zawk.

"An unau hian ka nu leh keimah minti chhe vek a. Mi tenawm nu khi awm lo se ka nu kha a thi lovang. Ka pa pawh a tenawm, chuvang aniang an fa pawh mi phak lo anih tak khi. Pathian hian a hrem ve niin ka hria" a ti chang leh fak.

"Kan sual ang anga min thungrul tur nise dam zo kan awm nang" ka ti vata.

"A dik. Mahse, ka pa leh a nupui khi chuan hremna an dawng hma bik animai" a ti leh hmiah. Malsawmi pa leh u Jenny te fa neihchhun, pianphunga rualban lo mai ni lo, rilru lamah pawh mi phak lo ka mitthlaah a lo langa. Malsawmi sawi hi a tak tak anih chuan hremna an tawh vang anih ka ring ve ta deuh rum rum.

"An inneih atanga rei loteah khan Ramhuai Putar khian min khawih tana, hlauhna nen hun ka hmanga. Hlauhna a reh hnuah erawh chuan phuba ka la ve ta a. An nupa inthen si lo khian ka thu thuin an chhungkua khi an awm a, nuam ve deuh ania" a ti leh ham ham.

"Chutianga a khawih che chu a tirah i pa hrilh ta che" ka ti a. A phuba lak dan vanga nuamti hmel taka a awm chu rap ru deuh hian ka en a. A hmai a dang var pup bawk nen, ka thauah min man deuh tlat.

"Ka hrilh loh i ring em ni? Ka hrilh vanga ka hlawh chu dawtsawia inpuhna leh vuak hrep animai" Huat naa khat hian a ti ram hmak.

"A hma khan engmah tinge i sawi ngai loh a? " ka ti leh ngawt. A pain kut a thlak nasat zia pawh hi aman min hrilh lo mah se ka hre tho. A khawsak dan pawlawh em vanga a phutawk hmuah ka lo ngai mai zela. Mahse, ka rilru a dang ta.

"Hrilh che ka duh alawm. Mahse, ka la naupanga. Bakah, min thah a tum tlat zela" a ti leh halh.

"A khawih hmasak ber chein kum engzat nge i nih ang? ' nuam ti vak loin ka ti leh a.

" Kum 10 ka la tling lo" a ti zuai raiha. Kei erawh ka inhumruh nghek ringawt. A khawih hun awm a sawiah hi chuan naupang vei nei lo khawsakin kan la khawsa mai mai tih a chianga. Ka ngaihtuah leta, Malsawmi mize zawi ta riau kha a nu boral vangah ka lo ngai ve mai mai thin a. A lo ni reng reng lo tih ka hre thiam ta chiah.

"Khang hun laia ka mangan theih zia kha awwww. Inah khan a lo kal ngun si, ka pa te nupa lah khian an ring si, rin pawh kha a awm reng a" a ti leh sap. Sawi ve tur thlawt ka hre lo. Mahse, chhungrilah erawh zawhna hlir a ni a. Zawh hmasak ber tur ka hrethiam chuang lo.

"In inah khan ka awm ve chak thei ania aw.. Ka awm ve deuh lah khan nuhrawn fel ber nih tumin min rawn ko thuai thuaia. Aaa, ngaihven pawh min ngaihven ve tak tak mahna. Mahse, ka nu na taka siamtu anih vangin ka ngaidam thei lo. Ka ngaidam ngai lovang" a ti leh hmaka. A awah chuan huatna alang chiang em em bawk.

"Zawh tur ber che pawh ka hre lo" ka ti hul hak mai. Za lo tak hian a nui a, "I rilru tur ka hre thiam alawm. I rin loh dan daihin thil a kal ta sia" a ti a. "Nia" ka ti ro hulh ringawt.

"I muhil duh tawh ang. Muhil tawh rawh, ka hun tawn tuihnai lo zet chu tikhan i hre ta a. A hnu zel chu i hre vek tho tawha. Han sawi belh tur pawh a awm lo" a ti a. A puan sin a pawt tha nghal sat sat a.

"I thilsawi hian mut a tichhuak lo" ka ti a. Ka nui a, a then ve sak.

"Aniang,ka hnaih ber mipa i ni a.Ka rilru zawng zawnga ka pawh theih i ni bawka. Mahse chuti chunga hetiang thu i hre ta hi mak i ti ve khawp chuan ka ring" a ti tha ve mai.

"Nia, zawh duh che ka ngah mai. Ka hriat chak ber zinga pakhat chu engtin nge chutiang taka i laka che duh chu i kawp tak tlat si? " Inthlahrung angreng takin ka ti a. Min rawn en a, a nui leh sak.

"Min tichhe ta sa sa a, mipa dang kawp ai chuan ani kha kawp law law ila a awlsam ka ti mai. Ani lah khian mak takin tun thleng hian min la thlah thei bik miah lo va. Min neih te hi a duh alawm, mahse ka nei duh miah lo va. Engtin nge ruih turte hi ka hmuh a, pawisa ka neih i hre duh em? Amah hian min chawm vek alawm" a ti leh hmiah hmiah mai.  A sawi hnuhnun apiang hi mak ka ti belh zel hi a ni ringawt mai.

"Ka rui thle hnawp hnawp pawh hi min iai miah lo. Mak ve tak ania. Sex-ah lah hian a sang laileng khawpa" a ti leh a. Ka lo tim deuh chawih mai.

"I neih duh loh chuan thlah mai tur che ania" ka ti hul hak.

"Thlah mai ka duha, mahse pawisa neitu ania. Ka ui ve alawm" a ti duh lek. A awmdan leh a pain a ngaihven tawh meuh lo tih ka hriaa, pawisa mamawh petu atana Pu Sangpuia a duhna pawh ka dem lem lo.

"I awmbo tur hi a hria em? " ka ti leh a.

"Hria e. A phal lo nasa mai. Mahse, thlah ka duh ve tawha, an chhungkua pawh ka ti Hrehawm tawk tawha. Bakah, mipa hmangaih ka nei. Amah pawn min hmangaih" a ti chu ka melh deuh kawk.

"Bialpa dang i nei tihna maw?" Mak ti deuh hian ka ti a. Kan khaw lama kan thian dangten bialpa a neih an sawi ka la hre miah lo.

"Ka duhthlan ngei, mipa tak tak anga ka en theih ka tawng ve tihna anih chu " a ti ban chat.

"Kan khua ami tho maw? " ka ti a. A thle deuh baka,a sawi zawm zel dawn emaw ka tih laiin a mit a chhing ta daiha, che miah loin a mut dan ngaiin a mu mar at mai.

A ngawih rei tak em avangin a mut chhuak lutuk a muhil zui aniang ka ti a. Muthilh ve tumin ka tawngtaia, ka tawngtai zo light off tura ka tho tur chu Malsawmi a mutna thutthlenga mu lo va a lo thu kun run ka va hmu thut a, hma lamah a sam a ti thla bawk si nen ka phut nasat zia chu sawi hian a siak lo.

"Eng nge khatia i awm a? I mawl a mi? " Thinrim deuh hian ka ti vin hlur mai. Muangchang hian a rawn hawi chhuak a, a nui a.

"Ka zun a chhuaka, I tawngtai laklawh hmel sia, thawm ka nei ngam lo alawm" a ti duh lek. Rum deuh hian ka melha, nui kawr kawr chungin bathroom a pana. Ka vawm zui pawp chak ngang mai.

A rawn lut leh chu bak deuh hluk hian light off turin ka ti a."Thim veka mut hi i ching ngai lo emaw ka tia" a ti a. "Ching nang, mahse eng uar pawh ka duh lo" ka ti tha ve mai.

"Hmmm,ka off chuan a thim vek dawn asin" a ti leh a.

"A pawi lo, thenawmte hoin an on veka, parda kan zar lo bawka. A thim viau lo ang" ka ti a. Engmah sawi tawh loin a off a, a mutna lam pana a kal chu phone flash light-in ka chhun a. A mut fel veleh ka phone light ka off ve nghala, tawng tawh loin thian ho groupah inkhelhpui tur an awm leh awm loh msg-in ka va zawt a. Inkhelh inpeih at reng, Kenny-an "lo lut rawh, kan zo tepa. Kan khel ho nghal dawn nia" a rawn ti a. Inkhelh laklawh laia msg a rawn reply zut zut danah a thi tawha, a khelhpui te inkhel lai a thlir tih ka hre thiam mai.

"Roek... Ka bialpa chu ka hrilh ang che. Mahse, sawi chhuah ka duh lo ania" Malsawmi'n ka beisei loh takin a rawn ti chhuak leh thut. A tal sat sat reng tih ka hriat avangin phut erawh ka phu tawh lem lo.

"Sawi la, mahse i sawi hreh viau chuan hriat kher ka duh chuang lo ania" ka ti ve a.

"Nia, sawi hreh a. Mahse, hria la ka duh. Nakin lawkah loh theih lohin ila hre dawn tho a" a ti leh sap. Ka chhang lo a, a sawi hun ka nghak deuh tawp.

"Dina ania... " a ti chu a sawi zawi viau.

"Tu Dina maw? Kan khua nge khawdang? " ka ti a. Min chhan hmain kan khuaa Dina tih hmingpu ka hriat ho ka ngaihtuaha, ka pa te rual vel tur Pu Dina a awm a. A bak ka hriat chu an la nau angrenga, mahse kan khua hi a lian ve viaua. Ka hre fuh lo pawh a ni thei tho. Ka awmbo na a rei tawh bawk nen kan veng ho bak hi vengdang mi ka hriat chu kan rualpui leh aia u deuh anni tlangpui.

"Aw,kan khuaah an awm. A hmingpum chu Laldinsanga ania. I hre dawn lutuka, amah tih i ngaihtuah phak lo anih kha" a ti leh chu hmeichhe ho thil pehhel peih zia ka lo ngaihtuah daih.

"Ka hriat dawn chuan sawi mai la, ka ngaihtuah chiam peih lo ania" ka ti deuh nghut.

"Pu Sangpuia fapa Didina" a ti chiah chu mak ti lutukin ka ang deuh phuau ringawt. Apa nen mualpho laih khawpa inzui siin engtin nge a fapa nen an inngaihzawn ka ngaihtuah thiam phak lo...

PS : Thlahrang lam em em pawh a ni lo aw. Lo hlau su😁😁