Malsawmsangi - 4

 Chapter - 4

"Eng nge ani berkher chu?" Mak ti em em in ka ti a. A thim avangin a hmel ka hmu thei lo va, ani pawhin min hmu thei bikin ka ring lo, mak ka ti lutuk hi min hmu thei ngat se chuan mak a ti letling zawk hial ang.

"Kan damlai hian Pathian hian kan tihsual hi min hrem angem? Nge kan thih hunah chiah min hrem ang? " a ti leh daih. Kan thilsawi lai nena inzawmna a nei lo lutuk.

"Ka hre nang, chungte chu Pathian thu thu animai. Eng nge ani berkher chu? " ka tihzawm zat.

"Phuba hi kan lak tur a ni lo va. Pathianin a la ang tih ania. Keichu keiman ka laa. Mi chhungkua ka tibuaia, ka inhriaa. Mahse, pawi ka ti lo" a ti leh a. Didina chungchang ka zawhna min chhang chuang lo.

"Pawi i tih loh ber chuan i thu alawm. Nih leh Pu Sangpuia'n a hria em? " Ka ti chu ka sawi zawh rualin a tlak karh mai.

"Hre tehreng mai. Midangin an hriat hmaa hrechhuaktu alawm. Eksek, reiloteah thildang ila hria anga. Mak i ti viau ang" Thutak lutukin a ti leh a.

"Zanin hian mak tak tak min hrilha, mak tihbelh leh tur pawh a awm ka ring lo ve" ka ti fan ruih.

"Nia, awm vak tawh lo. Mahse, mak tihah khan mak ber a ni zawk ang" a ti leh halh.

"I rai te anih ngawt loh chuan mak tur dang a awm lovang" nui chungin ka ti a.

"Rai pawh ka rai mahna.. Tak takin ila hre vat mai ang. Muhil tawh rawh" a ti leh daih. Thil sawi uk siin a sawi tluantling tha duh bawk si lo. Mahse, a mizia ka hriaa, zawt zawt mah ila min hrilh duh chin bak ka zawtchhuak dawn lo tih ka hre ve tlat.

Ka ngaihtuahna kawmin ka mu mar auha. Ka mut a chhuak eih lo... Malsawmi pawh thawm nei loin a mu a, a muhil angem ka hre lo. Thil tamtak ka ngaihtuah kuala, Malsawmi hi kawng thenkhatah hre chiang bertu ka ni hial maithei a, a mize inthlak danglam tial tial pawh kha a pa leh a nuhrawn vangah ka lo ngai a. Inchhungah a chuang em em a, chuvang chu niin ka lo hre bawka. Mahse, ka lo hre thelh duai a lo ni. Thil tamtak hriatpuitu awmchhun angin ka lo inngai thina, mahse a nun lehlam hi ka lo hre miah lo tih zanin hian ka hre chianga. Thian tha ber hmingpu siin thian nih hi ka lo tlin lo viau tih ka inpawm ta thlap. A harsatna ka hriatpui loh a tam zia leh a nun lo khawhar zia ka ngaihtuah kual zela. Ka lainat zual ta viau mai bawk.

Ka phone ka hmet enga, dar zat ka en a. Naktuk a lo ni der tawh. Ka zun a chhuah avangin thawm dim takin ka tho a. Ka va zunga, ka mu fel leh deuh chauh tihah Malsawmi a rawn khuh kharh kharha... Tihharh ka hlauh vei nen a lo harh tho aniang.

"Lalro, i muhil lehnghal em? " a rawn ti zui nghala. Kan naupanlaia min koh dan awki chiah hian min ko a.

"Aih" Ti ringawtin ka chhanga.

"Thil pakhat chiah ka hrilh leh lawk ang che, nakinah ka chanchin engpawh hria la, Ramhuai Putar Sangpuia khi a bul tum tu a ni tih i lo hre reng dawn nia. Chuan,naktuk chu min thlah leh duh lo mai rawh. Ka lo theihnghilh a, kal hmasakna tur kan nei a. I thawh hma pawhin ka lo chhuak maithei a" a ti sap. Pu Sangpuia telna tur a sawi chu a awmzia zawhfiah ka tum zeta, muthilh ka mamawh tih ka hriat avangin engmah ka zawt ta lo. Kan tawng laklawh anga, muhil mumal loin ka awm zankhua mai ka hlau a, hnaah kan buai lai tak a ni bawk si a. Chhunah inthlahdahna hun a awm dawn tlat lo va, chuvangin muthilh ka mamawh.

Kawngkhar kik dawt dawt ri avangin ka harha, rang zetin ka thuchhuak nghal a. Khua a lo var tawh a, tukverh atangin ni zung a lo inkap lut raiha. Ka inah hian nizung rawn inkap lut tur chuan zing dar 8 vel anih phawt angai thin.

"Pate, tho tawh rawh. A tlai tawh ania" Lawmtei aw hian a rawn ti a, kawngkhar a rawn chum leha.

Kawngkhar ka va hawnga, Lawmtei uniform ha fel thlap hian a lo ding al a.

 
"I tho har lutuka, I dam lo aniang kan tia. I dam lo em ni? " a ti nghal zat.

"Dam e, nizan ka inkhel rei lutuka" ka ti a. Inchhung lam ka pana, min rawn zui lut a.

"Apa a khua a sika, schoolah min han thlah hman angem?  Kan insiam vek tawha" a ti leh a. Chhang loin ka phone ka en a. Dar 8 leh a chanve a hnai tawh tih ka zuk hmu a. Lawmtei chhang loin Malsawmi mutna ka zuk en a. A lo awm tawh lo va, a puan sin pawh a awm lo. Room lamah a dah anih ka ringa. Mahse, kawngkhar kha chhunglamah ala in kalh a. Anih chuan roomah a insawn lut a ni ngei ang. Kal hmasakna tur nei inti si thawh a hai ve tho aniang.

"Min thlah hman dawn em? " ka chhan mai loh avangin Lawmtei'n a ti leh a.

"Aw, hman ang. Mahse chaw pawh ka la chhum lo a, kal vat ang u" ka ti a.

"Eirawngbawl lo mai rawh. Kan inah lo ei thla la, a awlsam zawk" a ti rang vat.

Hmai pawh phih loin kan inzui thlaa. Ka u nizan atanga a khua asik thu leh a mut mumal loh dan vel u Mawii'n min lo hrilh nghal mawlh mawlha.

 
"Nang leh nang lo ang takin i mu rei ve a. I dam lo ve emawni ka tia. Naupang hi thlah an ngai bawk sia, ka rawn kaihthawh luih tir che anih kha" a ti leh bawrh bawrha. A fate ho chaweina hnawk a thianfai pah mawlh mawlh bawk.

"Dam e, ka inkhel rei deuha" ka ti a. Diktak chuan nizan chu ka inkhel ta miah lo. Ka inkhelh tumna boruak kha Malsawmi thusawi khan a lan hneh lutuk.

"Inkhel tih mai mai, a tul lo em mai. In men rei phah bawk si. Thil tul lo tak a ni" a ti hmawk hmawk.

"Nu, Lahmingsanga hi a tap leh tawh ania" Lalrini'n a ti lang langa.

"Eng nge a tah a? Hmanhmawh ta che u. Khi dar 9 a ri mai dawna. In tlai vek dawn asin. Lalhmingsang, tap lo khan i bag rawn la teh. Lawmawm, Hlutei bag kha rawn keng phei la" a ti leh zung zung.

Hmingsanga'n tap chungin thiamthu a sawi zuah zuaha, Lalrini insawithiam a lo tum bawk. Hlutei lah "kan bang har angem?" tih ringawt a buaipuia. An ri le lu maia, nu ber a vin tak tuar tuarah chuan phelh deuh phungin kan kal thei ta hram.

School khatah vek an kal bawka, a awlsam phian, ka rin aiin motor a tawt lo hlauha. Mahse, haw lam erawh jamah reivak lo ka tang thung.

"Thawh i hai bawk si, hetah chaw ei rawh. Tunah i ei dawn nge i inbual hmasa dawn? " Ka u nupuiin min lo tinghal a. Ka u pawh a lo thuchhuak peih tawha, a hmelah erawh a la nuam vak chuang lo tih alang thei.

'Ka han chho phawt ang"  ka ti a. Min chhan letna pawh ngaihsak tawh loin ka chhuaka, ka in lam panin stepah ka tlan chho nghala. Malsawmi'n eirawngbawlna chang a lo hre ve chek ang chu.

Kawngkhar ka pawt hawnga, Malsawmi ka hmuh ka inringa, a lo awm lo.

"Malsawm,i la tho na nge? " tih pahin room kawngkhar ka kik a, ka nem paha. A lo inkalh lo va, ka nem zawngin a inhawnga, ka dak lut chu khumah pawh a lo awm chuang lo. He nu tak hi chu aw.. Ka hawi kuala, khum a inthlep tha thlap a. Mutna hnu khuar takngial pawh a awm lo va. Nizan lamah a riak ve tih rin ngaihna awm lo khawpin a sulhnu hmuh tur a awm lo. Call ka tum a, mahse a phone a chhia tih ka hre leh chiaha.Ka awm lo tih a hre reng awm sia, a chhuak tawh dawn anih chuan lehkha tal pawh dah se, anih loh pawhin ka u te tal lo hrilh tur ania. Chenpuitu tan chuan a khawsak dan ho lutuk hi chu mil a har ve det ang.

Ka intleuh zuaia, insiamsain chaw ei turin ka chhuk thlaa. U Mawiin chawei min siamsak a tuma. "Ngai lo, tihian thlengah ka mamawh tur ka suak khawm mai ang" ka ti a. Thlengah chaw leh chawhmeh ka suah pawlha. Dal leh kan pakhat a awm chuan duhtawk zel chi ka lo ni bawk nen, chawei hi chu ka awlsam ve zawng tak a ni.

"Ar chaw ka pek lai khan Inchhungah khan hmeichhe tap insut ri niawm tak kha vawikhat hi fiah mang loin ka hriaa. I mikhual nu aniang ka tia. Thil tla ri chhawk kha a awm leh bawka. A intipalh aniang ka tia. Ka va lut a, tumah lah chu an lo awm lo. Zawhte dum lianpui mai a lo awm a. Dawhkana no awm kha a ti tla a lo nia" Chaw ka ei laiin u Mawii'n a ti a. Ka chaw thial lai ka tawp nghal chawt mai.

"Tumah i hmu lo amaw? " ka ti nghal hu.

"Hmuh tur pawhin tumah an awm hleinem. Zawhte lah Tukverh atangin a zuangchhuak daih lehnghala" Ngaihsam takin a ti liam puat.

"Tap ri ka hria i ti maw tia" ka ti leh a.

"Zawhte kha a hur aniang. Zawhte hur hram ri hi tap ri nen a inang alawm" a ti leh mai. Nimin piah lawka zawhte dum lian zet ka hmuh kha ka hre chhuaka, tunhmain ka hmuh ngai pawh ka la hre lo.

"Tukina zawhte ka hmuh chu a lian khawpa, min lo melh kura, ka va hmu thut kha min ti phu zawk alawm.Tu zawhte nge mawni dawn ni? Taka, khawiah nge i mikhual nu pawh chu a awm a? A awm leh tawh lo zawk nge? Ka la hmu lo reng renga. Mikhual  nei i inti ve bawk si" a tihzawm leh duah.

"Chhunah a chhuak alawm. Phaiah hnathawkin a kal dawna, chung vel chu a buaipuia. Vawiinah an chhuk dawnin ka hria" ka ti a. Ka ei zawm leh mawlh mawlh.

"Anih tak chu.. Ee, tlaiah i lo haw pahin i u damdawi lo lei haw teh. I hman angem? " a ti a. Damdawi lei tur a sawi zui nghal teuh.

Tukdang aia ka tlai deuh avangin hmanhmawh takin ka inkhalhchhuaka, jamah pawh a inzeh theihna apiangah ka inzep zel a. Nidanga ka thlen hun pangngaiah chuan office ka thleng ve thei mai.

Nilengin Malsawmi min rawn biak hun ka chang a, mahse hna ka ban thlengin min rawn be ta miah lo. An kal ta ngei em pawh ka hre lova. A awmdan en khan zanah pawh a rawn lang leh thut mahna.

U Ruati te inah zanah kan leng a, Kenny-an inkhel tura min nghah laia ka lut leh si lo a thinrim zia a sawia. Dawt tlem a telh zui a. Sawma leh Zama'n an lo fuihpawrha, tawng ve na hun pawh ka chang mang lo. An duhtawkin  min hau hi a ni ngawt mai. Vanneihthlak takin U Ruati'n thla hmasa a boral ta Pu Siama nupui ngaihzawng neih thu a sawi chhuaka, kan titi a inthlak ta hlauh. Tlangval awmkhawm e ti loin vengchhung chanchin danglam deuh hi an hre thei em em maia. Kei tak hi chuan ka hre vak lo zawk thina. Vengkhat tlangval 10 aia thahnem zawk mah inkawm khawm kan ni a. Kan phaktawka kohhran leh khawtlanga inhmang ve kan lo ni hlawm bawk nen, kan thianho thawm hi a lian ve riaua. Zama lah a phunchiar a, engahmah lawmna nei lo emaw tihmai tur a ni a, a ei loh zawng nula chu khawngaihthlak thei tak anni.

Rinai takin ka mutui a, ka vei deuh bawk aniang ka mumangah Malsawmi ka hmu a. A awmdan tur sawi mumal lo a chhuah mai mai a ching chu tha lo tiin ka lo hau a. A tihfo danin engahmah min lo ngai lo lehpek.

Ka harhin dar 7 a lo la ri lo deuha. Ka tho nghala, eirawng ka bawla. Tlai lam ami tur ka siam kep a. Ka inbual zawhah Lawmtei te unau thlah turin ka chhuk a, an lo la insiam peih lo va. Nidang ang bawkin u Mawii a lo ri leh chel chul tawha. A fate a vin kuala, Lawmtei'n Hlutei sam a lo phiarsaka. Hmingsanga leh Lalrini an lo invel tap leh bawk.

"Lalrinmawi, enge i nau i velh reng a? I ninawm zozai lutuk" U Mawii'n a ti vin thak.

"Ka vel lo bawk e a. Amahin a tap ringawt anih kha"  Lalrini'n a ti vin ve hlar mai bawk.

"Amahin a tap ngawt lo vang a. Inhau buai reng ringawt mai. Lalhmingsang, nangpawh tap pur reng suh. Chhe pei puai lutuk. Buai inti zual lutuk" a ti leh tun tuna.
"Tumah hian kan ti buai zual pawh a ni lo. Anu hi chu amah tawp hian a inti buai" Lawmtei'n zawi tein a ti sapa. A sawi dan chuan ka nuih a ti za ngang mai.

Hnaah ka buai nileng veleh ta viaua. Bank a thawh hi chu office danga thawh aiin kan buai bik deuh emawni ka ti thin a. Tunlai khawvelah hi chuan hmingchhiat a awl em em tawha. Chuvangin min dawrtute ti lunghnur lo thei ang ber tura kan awm angai nasa zual tawha. Nui nileng lo mah ila a chauhthlak thei viau mai.

Kan thawpui pakhat fapa piancham lawmnaah kan office hoin chaw kan va ei ve a. Kan kal hma thei lo viau chungin kan inthlahrung chuang lem lo. Chawei khamah kan thu khawmuang leh a. In ka thlenin dar 9 a hnai thuak tawha.Sawma leh Zama pi Chhingi dawrah an lo awma. Ka haw min hmuh veleh rawn len tumin min rawn zui ve nghala, ka u te inah ka lut kawi zuaia. Inleng ka neih dawn avangin thut pawh thu loin ka chhuahsan lehnghala. Inchhung ka lut fel chiah tihin ka nu in min rawn call ve chiah bawk.

"Aw, Nu.. " ka ti nghala. Thuttlengah ka bag ka daha.

"Chanchin i lo hre tawh em? " a rawn ti nghal tawng.

"Eng chanchin maw? " Angaihna hre loin ka ti hu.

"I la hre lo amaw? Nichin lawk khan Malsawmi ruang an chhar a" a rawn ti ta mai.

"A ruang an chhar a? " ka ti nghal vaka. Sawma leh Zama phawk zeta min en tu chu ka melh tawna. "Tu nge? " An ti rual thawta, chhang loin ka ban ka vai kual thuak ringawt.

"Chhar e, Pu Khawtea te kawmthlang kawrpuiah khan ania. A lo chhe hman deuh tawha" a rawn ti leh chu mak tihna hlirin ka khat vek. Niminah ka in luah atangin a chhuaka, a chhuak kha kan khaw lamah han hawin thi nghal pawh nise chhiat viauna hman ala awm lo reng reng.