Malsawmsangi

 MALSAWMSANGI - 1

Ziaktu - Maengi Ralte

Faifuk rut rut chungin ka In luah lam panin ka tlana, hlawh lak ni a ni bawka ka mood a fuh ngang mai.

Muangchanga tlan aia chak deuh taka tlan nuamti zawk ka ni a. Mahse, tunlai chu Petrol lak tur avanga, off chunga tlan theihna apiangah off zel angaia. A lakna tur sum awm mah se Petrol zawk leitur a awm chuang tlat lo.

Kan veng pen thlak dawna traffic point awmah kan tlan hun nghakin ka dinga. Traffic police cher lam, tul vak lo va vin vak vak reng mai chu ka en vang vanga. Thuawih lo an awm vang pawh ni lo,a vin vak vak reng mai chu hahthlak duh dawn hian ka lo hre khawpa. Mizo tluka Traffic police ngaipawimawh zawk hi North east-ah hian kan awm ka ring lo. Heti chunga an han sual viau zel hi chu mak ka ti ve deuh thin. Mahse, pal luih talh tum an lo awm pawh a ni ange. Keiin va hriatpui thu awm hek suh.

Tlan tura min rawn hui veleh ka dawkchhuak zawka, kan veng lam kawngah ka tlan thlaa. Khati khawpa Traffic point tlanpel tura hmanhmawh si kha kawngchhuk lai ka tlan tan tur chiah chu ka off a,hmanhmawh lo em em in ka tlan thla leh ta thung. Mahse, ka inluah chhak lawkah Motor insu an lo awma. Mahni in lang rengin jamah ka tang ta reng mai thung.

Darkar chanve vel ka tang tawha, kan la tawlh sawn eih lo. A insu a te an lungawi thei ngang lo aniang, Traffic police an ko a, chu chu kan nghak thup a. "Kan In a hnai tawh tho" ti a Bike kawngsira hun ngawt tum pawh ni ila hmun awl a awm lo. Chhuk zawng leh chho zawngin kan insi chho vek a. Hmun awl pawh awm tehreng se han lak leh tho angai dawna. Hla lutuk ni lo mah se In thlen tawha han chhuah leh hi a peihawm miah lo.

Motor intlar thup kara kan veng nula senior, U Ruati lo kal chho ka zuk hmu thut a, min hmuh ve hlauin lehlam ka hawi nghal vat.A tawng ring thei si, a zak bawk si lo, sahdah ka hmuam ngai miah lo tih a hrereng chungin mi zingah sahdah min dil chut a chinga, lo inlak chhiatloh ve nen a hit lo thei tlat.

"Ehe, Lalromal, I tang ve law? " ka hlauh ang ngei ngeiin a rawn ti ta lung lung. En duh loh tlat chi a ni tawh si lo a hreh ru zetin ka en a. Mask ka vuah avangin tul miah lo a ka nuih vel angai lo chu ka lawm.

"Tang ve anih hi. Khawnge i kal dawn a? " Tha takin ka ti let a.

"Biakinah ka zuk kal lawk dawn. I Mawza bal zet kan Inah a awm ania. I sahdah bur pawh" Ka hlauh ang ngei ngeiin a ti leh lung lung.

"Ka ta a ni lo bawk aw. Sawma ta anih kha" Rang zetin ka ti nghal vata.

"Awihawm loh loh, I mawza alawm mawle. Rawn la vat rawh, anih loh chuan kan paih dawn. A uih si" a ti leh a.

"Kal teh a" ka ti bak hluk ringawt. An In hi kan thian ho lenkhawmna ber a ni a. Amah hi kan rim pawh a ni chuang lo. Kan innel bakah kan infiamna thei em em a, kei hi thiante zingah chuan tawngduh ve tak ni mah ila zakzum angreng deuh si ka ni a, chu chu ani hian a hai lova, a biktakin mi zinga min tihzah hi a nuam tih ber pakhat a ni.

Minute 10 vel kan din leh hnuah traffic police an lo thlenga, an rawn chingfel nghal thei ta hlauh. Mahse, kan lo inhnawh tawt hnem hman lutuk a, tlan nghal zung zung erawh a har a. Kan insiamrem chhungin khua a thim titih chu a ni ta der.

Ka in luah hi ka Pa u fate In a ni a. Anni hian kawngpui an leh a chung chiah an luaha. Keiin a chung zawla Assam type a an sak ka luaha. Bungraw dahkhawmna tura an sak a ni a.Ka luah duh ka tih takah khan rinawm deuh zawkin a siam thaa. A lian vak lo a, mahse parawl tan chuan a tawk reng. An inchhung atanga kal loin gate hran ka nei a. Mahse, ka hna kal dawn leh haw lamah an in ka lut kawi ngei ngei thung.

"Jamah i tang ve em? " Ka u nupuiin min lo ti nghal a.

"Tang rei rap. Chu pawh mahni in lang reng lehnghal" ka ti a. An vaiin min nuih tlawrh tlawrh mai.

"Pate, enge min lo hawn? " an fapa kum 6 mi vel, thau chum buang maiin min lo ti ve seka. Ka bag a rawn keu a, eng emaw tal min lo dil leh dawn tih ka hriat sa avangin rum-pum ka ak a, a zuk hmu a. "Rum pum bawk, ka ei duh lo e a" a ti a, a hawi tau ta ngut.

"I va han zak lo mai mai e aw. Ei suh, kan ei vek ang. Pate, Pe reng reng suh" a u in thinrim deuhin a ti nghal hlak hlaka. Kan naua lah hmui kawh vuin a thu tum buau thung.

"Eng nge i duh a? Pi Chhingi dawrah va la mai rawh, Patea'n a lo pe dawn che ti la" Ka ti a. Chawplehchilhin a hmel a danglam nghal a, hlim takin a zuang tho a. Mahse, a nu a rawn te veleh ta thung.

"Lalhmingsang, ka vaw dawn che ania. Romal, pe suh. Thil pawh hawn tawh suh, hawn sak ang ang lawm taka lak tum reng reng lo. I Patea hian a duat khawlaw zo che anih hi. Pawisa pawh kha pe miah suh,... Eeee, tah I tum vel alaw? Han tap vaih teh, ka vuak belhchhah ang che. Khawnge ka tiang dah that kha" A ti zui buan buana. Hmingsanga ka en a, tap ngam chiah si loin a men puai maia, ka khawngaih rualin ka nuih a tiza ngang mai bawk.

"Pate, chaw i ei nghal dawn em? " Lawmtei'n min ti a. Ani hi an fa upa ber niin a tleirawl ve tan ek ek tawha. Nu zem leh hmeltha tak mai a ni a. Ka thiante ho hian nula thuai thuai se an tihzia an sawi ngun khawp mai.

Ka ei loh tur thu ka hrilha, ka in lam pan turin ka chhuak zui a. Ka in luah ka thleng chho tep tihin zawhte dum lian zet ka hmaah tak a rawn tum thla thut maia, ka phu nasa lutuk ringawt. Zawhte bera pawh chu hmuh zui tur awm loin a putbo zui daih a. Put bo hman lo se chuan a chak lo khawp ang.

Inchhungah ka lut a, ka bag ah lai pawh dah chuang loin thutthlengseiah ka tlu zal nghal a. Ka phone ka en a, kan thianho groupah Zama leh Kenny-a an lo inhnial mek a, nidang ang bawkin Sena'n Zama a lo on bawk a. Ka chhiar pahin ka nui vur vur mai.

Chaw ka ei laiin kawngkhar an rawn kik a, ka thiante zinga tuemaw ber annih loh chuan ka u te chhungkaw ho zing ami ni tura ngaiin duhdah angreng takin lut turin ka au a, mahse a inhawng mai tlat lo. Ka au nawn leh a, a la inhawng ta chuang lo fo.An rawn kik leh a, ka zaidamnain a tlin tawh lo. "Lo lut rawh ka tih chu mawle" ka ti hlur mai. Mahse, tumah an rawn lut chuang lo.

Phun nuah nuah chungin kawngkhar lam ka pana, thinrim ru deuh tak chungin ka nem hawng deuh pawpa, tupawh lo awm se tauh bur thei turin ka ti a ni mah zawk. Kawngkhar a inhawng a, ' lo lut ta che u" Ka ti zui a. Mahse, a reh thiap mai. Ka va dakchhuaka, ka hmuh theih chinah tumah an awm lo. Ka u nupuiin pangpar leh thlai a chin ho awmze nei takin a rem kual dula, chung ho pawh chu ka hmu thei veka, pangpar kara ding an awm em tiin ka thlek kual a, tumah an awm chuang lo.

Inchhung lamah ka phone a rawn ri a, ka phu zuk. Kawngkhar khar tawh chuang loin ka phone ka pan pheia, ka nu a lo ni a. Ka pick nghal vat.

"Chaw i ei tawh em? ' a rawn ti a. Fapa naupang ber leh hrisel lo thin tak ka nih avangin ka chhungte hian min duat em em a, keipawh hi mahni a hna tha tak neia ka awm hnu leh ka awmhran ve hnu pawh hian ka la puitling tak tak thei lova. Ka chhungte lakah pawh ka la pangchang em em bawk.

"Ka ei mek a, in ei tawh mi? " Ka ti let ve a. Ka chawei lai ka thawhsan chu ei leh tumin dawhkan ka kila, mahse ka eichak  tawh tlat lo.

" Ei kham deuh chiah, midang chuan an la ei a, i thiannu Malsawmi hi tun hnaiah a buai leha, a pa in thunun deuh a tum a, a duh lova, in atangin a chhuaka, Khalamah te a rawn chhuk em? " A rawn ti duah.

"Chhuk nang, engtikah nge in atangin a chhuaha? " Ka ti ve nghala.

"Tunkar tir lam a ni awm e. Kei phei chuan ka lo hre ve mai lova. Vawiin khan a nu-in min hrilh a, a ngaihtuah viau niawm ania" A rawn ti leh a, ka ner nawk mai. A nuhrawn hian a ngaihven tak tak ngai lo tih ka hre chiang ve em.

"A lo kal lo" ka ti ringawt.

Kawngkhar lamah thawm a rawn awm leha, ka hawi phei nghala, kan sawi lai mek Malsawmi lo ding ka va hmu chu mak deuh maiin ka phu deuh zuk mai.

"Nu hei a lo.. " Ka ti chiah chu Malsawmi chuan rawn luh pahin engmah sawi lo tura minti niawm takin a lu a rawn thing nawk nawka. Keipawhin sawi zawm loin ka ngawi ve hmiah.

"A lo kal tak leh i lo sawi ve hrim hrim anga, ei zawm leh rawh" Ka nuin a rawn ti a. Rang zetin ka off nghala, ka thutthleng neih ve pakhat zawka Malsawmi thu chu ka en nghala. Thisen nei lo niawm takin a vun a dang lapa, thla hmasaa kan khua a ka haw a ka hmuh kha ka hmuh hnuhnun ber a ni a, tun ang em em hian a la cher lo.

"Engtikah nge i lo chhuk a? Tehhlawl che chuan" ka ti a.

"Vawiinah.. " a ti ringawt. Englaimaha tawng tam ngai lo, hmeichhe ngawichawi leh inthlahrung em em a ni a. A nungchang inthlak ta vek hi mak tih loh a har. Mahse, Kei chuan a inthlak chhan ka hre chiang a. Mak ka ti lem lo.

"I rawn bo nasa em? Thingtlang ho hi chu khawpui in thlen hian in zam hma si" ka ti chu a ner nang.

"Bo mai mai lo, thil ka hre rei thei alawm. I hre lo mi? " a ti leha. School kan kal laia a thiamtheih zia ka la hre reng.

"I bo loh chuan a that chu,chaw hi rawn ei ve nghal rawh, bawngsa roast ka nei ania" ka ti a.

"Ka ei peih lo. Inbual ka duh zawk" a ti a. A tho nghala, engmah bag takngial pawh a rawn keng bawk si lo. Roomah Towel ka va laksaka, "Engmah i keng bawk si lo a. Kekawrte thlakna tur pawh i nei nang. Eee, lo inbual rawh. Inhnuaiah kekawrte an zuar teuh tak alawm. Ka zuk la ang, thawmhnaw chu ka thawmhnaw i ha mai dawn nia" ka ti zung zung a. Ka nuin in a chhuahsan a rawn ti zo chauh a, engmah a nei dawn lo tih ka hre ru kur.

"Zuk la la, ka hak tawk i hre dawn si lo a. A size hran hran lo la mai rawh" a ti tha ve mai bawk.

Ka chaweina ka seng fela, parawl chawei tih takah a belin ka inchhawp deuh veka, seng leh pawh a harsa lo. Ka chhoh huna sil turin thleng erawh ka kalsan thung.

Hmeichhe kekawrte leitur ka zuk zawt chu an hawi phawk nasa ngang mai.

"Ka thiannu a lo kala, engmah a keng bawk si lo a" ka ti a, an awih duh chuang lo.

"Nang hi nupui i ru em ni? Tlaiah pawh chaw i ei duh miah lo a" Ka u nupuiin min ti a. Ngaihzawng pawh nei hawt lo nupui ru tura min ngai chu ka nui a. Ani lah a thutak tawlh tawlh bawk.

"Ru mai mai lo, ka thiannu ka tih kha, kan khuaa mi, a haktawk pawh ka hre lo a. A size pangngai deuh kha pathum vel ka lo keng chho ang" ka ti a.

"Ka lo chho ve dawn" Lawmtei'n choka lam atangin a rawn ti nghala. A nau chiah Lalrini lah a thlengsil lai dahin rawn kal ve a tum bawk. Ka thiannu ka ti kha an awih ngang lova, Tu nge lo kal an hre chak tlat.

Nui rawi rawi chungah min zui chho a, inchhungah kan lut a, Bathroom kawngkhar pawn lama lo inkalh chu ka va hmu nghal a. Room lamah a awm anih riringin " Mali"ka ti nghala. Mahse, chhangtu awm loin a reh thiap.

Roomah ka va luta, a lo awm miah lo. Khumah Towel a lo awm a, ka chhuak lehnghala Lalrini'n "khawnge a? " a lo ti vat.

"Ka hre lo. Dawrah a kal lawk aniang" ka ti a. A lo luh tirh khan phone a charge a, a keng em tih ka en a. A lo awm lo ngei.

"Ka hmu chak asin le" Lawmtei'n a ti nang nang. Helai ka luah tan atangin kum hnih dawn a ni ve tawha, kan khaw lama ka thiante hian min rawn thlen chilh fova, mahse Malsawmi hi chu vawikhat a lo kal zuai bak a lo la kal nawn leh miah lo.

Ka u nupuiin a fate vin angreng taka a rawn koh takah chuan hmanhmawh fein an unauin an tlan thla a. An chhuak tur chuan an lo chho leh dawn tih an la rawn sawi ta hram. Ka nuih hi an tiza thin.

Ka thut deuh vang vang hnuah pawh Malsawmi a rawn la let ta chuang lo fo. Ka call lahin a tlang thei der bawk si lo. Rilru nuam lo teuhin ka awm a. Ka zuk kal chhung reilote a lo kalbo daih na tur khawpa pawimawh chu engtak ni ang maw?

Zung turin Toilet lam ka pana, ka zung zo ka chhuak leh tur Chuan mak tih riau ka nei ta tlat. Tlaia ka haw khan tui Bucket hnihah ka dah khat sa a. Hman lohin ala awm tlat, Bathroom chhuat pawh a hul phaka, a inbual miah lo nge mawni le?? Hmanhmawh deuhin ka chhuaka,khuma Towel awm ka va en nghala. Ka khawih chu hnawng eih pawh awm loin a lo ro vek. Inbual miah loin a chhuak leh lawi si anih dawn hi a.

"Romal... Bawiha, I awm em? " Kenny-an a rawn ti lung lunga. Rang fein room atangin ka chhuaka, meizial tan tumin Gas a lo kap alh mek. Mitmei ven tur awm lo ngang hi ka ni a, ka thiante hi chu ngampa tak anni.

"Khawnge i kal dawn a? Ku Ruati i rim dawn mi? " ka ti nghala.

"Dawn e, an thingpui han insak ang. Zan khatah vawi khat tal min hauh loh chuan amah Ruateki zawk khi a muhil thei lovang" a ti zuia, a nui kur kur bawk.

"Zanin chu ka lo kal ve lo mai dawn mawni? " ka ti a. Malsawmi a lo let leha ka lo awm loh chuan dik dawnin ka hre lo. Mahse, Kenny-a bulah hi chuan mikhual nula ka nei tih a thawi pawhin sawi ka tum lo. Awmzei nei loin dawt tlem phuahbelhin min chhaih leh nasa dawn em mai.

"Ho mai mai. Inah engmah tihtur i nei lo. Kal ang" Thawvengin takin a ti liam puat. Hnial awmzia a awm ka ring vak lo.

"Bike i rawn keng em? Ken min phurchho teh. Vawiin lah chu Khilaia Motor insu buai deuh vang khan kan tang renga, U Ruati biakin kal tur a lo kal a, sahdah min rawn dil chut peka. Tu nge maw an inah Mawza theihnghilh ni? I mawza rawn la rawh, a uih ala ti zuia" ka ti chu a nui nasa ngang mai.

"Nau, a va han timing lo tak, amah lah a zak dawn si lova e.. I va han khawngaihthlak em" a ti a. A nui zui chiam chiam bawk.

U Ruati te inah kan chho a, kan thlen hnu lawkah Hmingsanga leh Mak-a an rawn thleng veleha. Zan dang ang bawkin kan inhniala, kan infiama, an naute an muttir tawh tih pawh ngaihtuah loin kan nui vak vaka.Mahse,ka riluah Malsawmi a rawn awm leh thina, kan chhuah hma khan ka call tlang thei lova, tun thlengin msg pawh a la deliver lo. Ka inah min lo nghak reng angem aw tih velin min tibuai a,ka nui ve bawk bawk tak nangin in lamin min kap ru deuh run tho.

U Ruati'n vawi thum aia tam mah haw tawh tura min tih hnu leh thingpui hang no 2 ngawt kan in hnuah, hmun min phiah hnan tak sawk sawk avangin kan haw ta hram. Inkhel en ila chuan ani hmunphiat mai mai khan min hnawt haw chuang miah lo ang.

Inah ka chho a, ka in kawta ka u te thlai leh pangpar awm ho chu ka thlek thuak a, Malsawmi a lo awm ka rin vang a ni a. A lo awm lova, ka in pawh angai ang angin a lo la inkalh bam bawk.

Mut hmain meizial ka zu leh riha, Pawnah ka ding a. Ka u Dragon fruit lawh tur a awm leh awm loh ka en duk duka, a sen tan tuih tuih tawh nangin a la sak vek. Meizial ka zuk zawhah inchhungah ka lut a. Mu turin ka intintuaha, Choka lam eng tithim loin ka mutna room erawh ka tithima, hetianga lehlam engin a tih en ve deuh riai ruai chunga mut hi ka duhdan a ni hrim hrim. Khumah ka lawn a, Tawngtai tumin ka mit ka chhing chiah tihin Kawngkar lamah ri rak a awm a. Mi an lo lut tih hriat takin pen thawm ring vak lo ka hre zui a.Kawngkhar ka kalh vek emaw ka tia..Tawngtai lam a lang tawh lo.

Hmanhmawh takin room kawngkhar ka hawnga, ka rin loh takin thutthleng seia Malsawmi lo thu ka va hmu a. Min lo nuih var var mai.

"Ehe, eng nge awmzia? Khawnge i kal daih a? " ka ti nghal a.

"Ka thianten min rawn call thut a, ka hmanhmawh lutuka, ka phone ka charge ve lah kha engmah a lo incharge mumal lo va. Ka chhuah hnuah ka rawn be dawn che a, a lo thi daiha. Ka rawn be thei lo che nih kha" Inthiam lo hmel takin a ti niah niah. A phone charge tumin ka charger vuahsa lam a pan phei nghala.

"I lo bo daih a, minti buai tep alawm. Nih chuan inbual pawh i inbual hman ta lo em? " ka ti leh a. Tawng loin a bu nghauh.

"Tunah inbual mai rawh. Kekawrte pawh ka u te zawrh ka zuk laa. Helamah hian a awm" ka ti nghal zung zung.

"Hmelchhe viau mah la i va fel thei e aw" Tih pahin a nui a. "I chhe fe, inbual vat mai rawh. I uih rum rumin ania ka rin" ka ti let ve nghal a. Naupanlai atanga inkawm, inngam tak leh inhrechiang em em kan ni a. Kan inkarah hian inngaihzawnna tih vel hian hmun achang eih lo.

Roomah a rawn lut a, Towel leh kekawrte a rawn laa. Ka thawmhnaw a hak tura ka pek nen inpawmbawr tan chunga room a chhuahsan tur chu thil hriat chhuah ka nei thut.

Ka haw pah khan Gate ka kalh tih ka chiang, tin ka In kawngkhar pawh chhung lamah ka kalh ngeiin ka hre bawka. Mahse, ani hi a lo lut thei tlat!!!

Note : Han dah veleh phawt ila.. YouTube lamah chuan zankhatah chapter 1- 2 hi ka dah zawma, ngaihthlak atana a tawi deuh vang a ni a. Blogah hi chuan zan khatah chapter - 1 zel a ni ang aw. Youtube lama ngaithla tura inphut vang lam a ni lo tih kha min lo hriatsak dawn nia. 

Chuan, he thawnthu hi a sei lutuk lo anga. Tin, Love story lam a ni chiah lo bawk ania☺