Malsawmsangi - 5

 Chapter - 5

"Bawiha, ka tawng i hre thei em? " ka nuin a rawn ti leh a. Ka inthing nawk mai. 

"Aw, hre thei e. A va mak em em ve !!!" ka ti a. Ka hrawk a ro vek a, ka tui a hal nghal huam huam mai bawk. 

"Nia, mak tak a ni. Nidangah pawh a bo vang vang fo a. A lo haw leh mai zela. Tun tum chu heti hi a ni ta maia" a rawn ti leh a. A awah chuan a lungchhe hle tih ka hre thei a. Keipawh ka hnim ruih mai. 

"Midang kut a tuar vang em ni a ruang chu a chhiat a? " ka ti a. 

"Kut tuar anih leh nih loh lam pawh ka la hre bik lo. A lo nam nasa tawha. A tawih uih rim vang a a ruang pawh hi hmu lek alawm an nih. Tiang taka rimchhia leh ruang chhe hman chu thawhtan ni a in a chhuahsan khan a boral nghal aniang. Vawiin zirtawpni a ni tawha. Kawr hnaih a awmten thil uih rim chu an hre fo a. Pu Vunga kel hi khawlaiah an chhuah leh dum dum thina, chu chu kawrah a tla anga, a thi emawni an tia. Mahse a rim a na ta lutuk kha kawrah an zuk lut thlaa. Kel ni loin Malsawmi zawk hi a lo ni ta reng mai sia" a rawn ti leh duah. Sawi ve tur ka hre lo. Chuti taka chhe hman, rim an hriat fo anih chuan zan hnih ngawt ka lo riahpui kha Malsawmi thla a ni tihna nge mawni? Mahse, amah ngei pawh khan a la thi lo tih a sawi a. Min nuih mai mai kha ania.

Ka nuin a ruang police lamin an buaipui dan leh Post mortem turin an tih thu te a sawi zuia, an lumen anga. Naktuk dar 10ah an vui dawn tihte a rawn sawi leh luam.

"I lo haw turah ka ngai che a. Mahse, zingah lo chhuak mai rawh aw. Zan zana lo kal kha tih theih a awm tawh chuang lo em mai. Hahdam deuh khan awm tum hram hram la" a rawn ti zui leha. Malsawmi nena kan inkawm nasat zia a hre chiang bawka, a thih thuin min deng thut mai chu min ngaihtuah em em tih ka hai lo.

Ka biak zawh veleh "Bawiha, Tu nge thi a? " Sawma'n a lo ti vat. 

"Kan khaw lama ka thiannu mawle. Naupanlai thianthian ti ila tun thlengin kan la inbe pawp tha a. Ka haw pawhin ka la kawm ber tho ania" ka ti a. Pangngai taka sawi ka tum viau nangin ka aw a lawi rut tho. 

" Khaia, a va zia lo ve. A ruang an chhar tihna mi? " a ti leh a. Ka nu nena kan inbiakna ka hrilh nghal mawlh mawlha. Nizan leh zan hmasa hetah a lo riak tih erawh ka sawi duh lem lo. Diktak chuan thil fel lo a awm tlata hriatna ka nei a. Chuti taka a ruang a lo chhe hman leh keiin zan hnih helaia ka lo riahtir si kha sawichhuah rih loh a finthlak tih ka hai lo. 

"Tunah kal nghal i duh em? I Duh chuan ka zui ang che. Naktuk hi office chawlh a ni tho bawka. Engmah tihtur hmanhmawhthlak ka neih ka ring lo" Sawma'n a ti leh a. Zama pawhin min zui thei tih a lo sawi ve vat bawk. 

"Khaw kar kawng tlanchhung a rei vak lo va. Zingah ka chhuak chho mai dawn mawni ka tia" ka ti zuai ruih. 

"I tihdan dan. Mahse, keichu zanah hian chho mai ila ka ti. Kan tlaivar nghal anga. In khaw nula te pawh lumen naah kan han melh tai ang chu le..Duh leh keini chu naktuk tlaiah kan chhuk leh mai anga" Zama'n a ti a. Malsawmi an hre ngai pawh ni lo, chuti taka min ngaihpawimawh sak chu ka lawm rualin mak ka ti viau tho.

"Ka lawm viau nangin min zui duh lo mai ru. Ka chhungte em pawh a ni lo va. Thian kan ni mai chauha, intan a buaithlak" Inthlahrung takin ka ti a. 

"A ho lutuk. In khaw kalna hun remchang a nimai" an ti a. Lo kal ve ngei an tum khawp.

Thianho groupah an han sawi khawm nak naka, Kenny-an lo kal ve a duh a. Rem an han ruat zung zung hnuah zan kal an ti tlu a. Ka u te hnenah kan khuaa ka thian pakhat boral vangin kan zan chhoh dawn tih ka zuk hrilh a. Kalpui ka nei dawn tih ka sawi nghal a. Ka nu ang bawkin zinga kal mai tur in min lo ti ve a. Mahse, thian ka nei dawn tho bawka. Zan kal mai kan duh zawk thu ka sawi chu min hnial lui lem lo. 

Ka nu ka call a, ka thian dangte nen kan zan chhoh dawn tih ka han hrilh a, thian ka nei dawn tho tih hre mah se nu na na na chuan min ngaihtuah ngang mai. Kan khaw lama ka thianten ka chho dawn em tih min rawn zawt sek hlawm a. Rindiki phei chuan  tap tuauin chho vat turin min rawn ti a. Rindiki hi kan inbul maia awm tho an ni a, naupanlai atanga Inkawm tho kan ni chungin Malsawmi ang em chuan ka kawm tam lo. Mahse, Malsawmi nen erawh chuan hmeichhia ve ve an ni bawka an inkawm nasa a. Ka awm loh hnu, Malsawmi mizia a danglam viau hnuah pawh khan an inkawm loh phah lem lo. Nula puitling tak tak an nih hnuah erawh duhzawng a inan loh tak em avangin an inzui tam ta lo deuh thung.

Zing lam dar 1 velah kan khua kan thlenga. Kan tlanchhung zawng khan ka rilruah thildang a leng lo. Kawngsirah te khan Malsawmi thlarau lo ding reng tur angin ka suangtuah kawngtluana. Mahse, beiseina beidawnthlak bak a ni lo. 

Kan inah kan lut hmasaa. Kan in atangin Malsawmi te in kawt eng ut mai chu ka han hmu thei a. Min hnawh ul tu awm ang maiin ka tawt up up a. Ka na tih ka hai lo. Mahse, mipa ka ni a. Hmeichhia ang maia tah vak vak erawh ka tum lo. Tum pawh ni ila ka thei chuang lo vang. 

Kan inah kan veng thalai an lo awm nuala. Mitthi in nen kan inhnaih bakah eichawp dawr nei kan nih avangin mamawh lam an awm reng a. Muthilh ngaihna a awm lo ang tih ka hria. Ka chhungte awm ang ang hnenah ka thiante ka hmelhriattir a. Ka pain min zui vanga an lawm zia a hrilh luam. Kan intihfai thuak thuak hnuah Malsawmi te inah kan chho a. Kawtah Ruattea a lo thu a. Min hmuh veleh min rawn pan nghal vat. 

"I lo thleng thei maw? Zingah emaw i lo chhoh dawn ka tia. In tluang em? " Min ti nghal a. Ani hi Malsawmi te kawmchhak lawkah an awm a. Hmanlai atanga inthenawm thin, inrual khat vek kan ni a. Malsawmi nena kan inkawm bik ang hian inkawmbik chu an awm ve thliah nangin a huho a inkawm dual dual thin kan ni vek tho. 

Kan tluan thu hrilh pahin ka thiante ka hmelhriattir a. Inchhung lamah ruang bula thutna awl a awm tho avangin kan inzui lut a. Thutthleng dawhzawm chunga kuang lo awm chu ka melh tlawk tlawka. A ruang a chhiat tawh vangin kuangah an khung nghal a. Hawn an phal lo tih alang thei a. Ka chhungril a na vung vung a. U Jenny-i a rawn lut a, min lo hmuh veleh uar em emin a tapa. Mahse, kei erawh a tap ka hmuh rualin ka lungchhiatna a kiang nghal hlauh. Malsawmi zir loh chu ni tho mah se amah vanga nun chhia hi anihna lai a awm tlata. Huat pawh ka haw ru ta riau. 

Kan tlaivar a. Rindiki'n tap fap fap chunga Malsawmi kuang a chul a chul chu en hrehawm ka ti a. Malsawmi pa leh Jenny erawh ka hmu tui ngang lo. A pa phei chu khawgtlangah zah a kaia, a fanu pawh ama zara a thih hnu thlenga mawi mai mai a ni tih phei chu ka hai lo. Mahse, a fanu pawngsual anih laia awih duh lo tu anihna chuan min ti thinrim et et zawk. 

Vui zawh hnuah kan in lamah kan awm a. Huana lakhuih leh ser ka thiante hawn turin kan zuk lo a. Naktuk sunday ni lo se chuan haw an peih loh zia an sawi nang nang.Rawngbawltu annih hlawm avangin han haw loh ngawt phei chu a theih chuang lo. 

Mitthi an awm hian zan hnihna hi nu leh pa zan atan kan khua hian kan hmang thin a. Ka nu leh ka pa an kala, ka u hmeichhia pakhatin dawr a nghaka. Mut hma ka duh viau nangin Rindiki hmuh ka duh a, ka call a. Inkhawm an bang fel deuh chiah a lo ni a. Kan in atangin a hla lem lo bawka, ke in an inah ka phei a. A nu leh pa khawhar inah an lo kal ve tho a, a u te chhungkua hna vangin khawdangah an awm bawk nen, an lo reh thiap mai. 

"Malsawmi chu damchhungin nun nuam a hmang lo va. A ruang lah chhar mai mai a ni lehzela. Ka lainat lutuk" a ti hap. 

"Engtik nge i hmuh hnuhnun ber? " ka ti daih. 

"Kar hnih vel chu a liam tawh ang. Inah a lo kala, phai lamah hna a thawk dawn tih vel min rawn hrilha. Tha ka lo ti lutuka. Chu bak chu ka hmu tawh lo. Ani hi chu a zia a dang ve em a. A kal dawn tih min hrilh mah se a kal hun tur sawi lo in a kal leh daih tawh aniang ka lo tia" a ti kauh kauh mai. 

"Nia, a zia hi chu a dang ve khawp mai. Nih leh Pu Sangpuia nen an la inkawp em? " ka ti leh a. 

"Kawp turah ka ngai. Mahse, phaia chhuk te a sawi rik takah kha chuan thlah a tum aniang ka ti deuha. Keibak hi kawm em em a nei lo chungin Pu Sangpuia chungchang hi chu sawipui viau a har khawp mai" a ti leh duah. Hei hi chu keipawhin ka hriat dan a ni a. Thildang sawipui teuh mah ila  pu Sangpuia chungchang kha chu a sawi tha duh ngai tlat lo. 

"A lo kal asin" ka ti thut a. Phawk zetin min rawn en a. 

"Engtikah maw? " a ti ha. 

"Nimin piah khan... " ka ti chiah chu a mengphar awn awn mai. 

"Engtin nge chutiang anih theih anga? A ruang pawh a tawih tan tawh a, a rim chhe vek tawh bawk anih kha" a ti chul mai. 

"Ka fiamthu anih kha.." Nui chungin ka ti a. Ka rilruah erawh zawhna ka rilru a awm reng kha a chiang tial tial niin ka ngai thung.

"I ti awmang lo em mai. Mi te reu reuin an hria ange" a ti bak hlar mai. Ngaipawimawh lo hmel fein ka nui leh a, mahse ka chhungrilah erawh chuan mak tih leh hriat duh ka ngah ting mai thung. 

"Pu Sangpuia lo kha bialpa dang te a nei ve reng reng em? " ka ti leh a. 

"Neih awm pawh ka hre lo. Chutiang a hrilh che mi? " tiin min zawt leh a. 

"Hrilh lo ve. A lo neih ve takin ka ti mawle. A thuhrimah a thih chhan kha a rui tlu sual angah an puh ta deuh ber em? " ka ti a. 

"Ka hre lo.. Mahse, chu bak han puh tur a vang ve e" a ti a.  Thil pakhat hriatchhuah zawk ka nei a. Ka sawi nghal dawn zeta, mahse sawi chi niin ka hre leh lo va. Ka ngawi ta reng. 

Muhil thei loin ka tal sek a. Zan hmasa ka tlaivar chian em avangin zanin chu ka muttui viau ka ringa. Mahse, a teuh lo mai. Rindiki te in atanga ka haw veleh ka mu nghala, tunah dar 11 a pel tawh a, mutchhuah chu khawiah hi a ni ringawt. Ka mit erawh a khama, a thip thum thung. 

Thil tamtak ka ngaihtuah a, Malsawmi ruang awmdan en khan ka in a lo kal Malsawmi kha mi nung a ni lo tih ka pawm angai. Pawm duh lo engang mah ila a ni thei lo hrim hrim. Mahse, engtin nge khatianga mi pangngai taksa pu leh danglamna awm map si lo khan a lo kal theih si? Min hrilh duh angah vanga lo kal chu a ni tih achianga. "Ka chungah engpawh thleng se Pu Sangpuia hi a bul tum tu a ni ang" a tih kha ka ngaihtuah nawn tlut tlut a. Ka hminga min koh ri ka hriat tawpna lo ni ta kha kan naupanlaia min koh dan thin a ni a, a nu boral hnu atanga nun buai zia leh a thihdan lainatawm tak te nen khawngaihna avangin ka mittui a hnam ve sawk maia. Chutihrualin thil pakhat chiang taka ka hriat tak chu, ka in a lo riak kha engtikawngmahin Malsawmi tak tak a ni thei lo tih ka hre chungin a thih hnu hian hlauhna emaw rapna lam ka nei zui ta reng reng lo. 

Thawhtanah thlan siamna lamah ka kal ve a. Chawhnu lamah Aizawl lam panin ka chhuk thlaa. Kawng tluanin Malsawmi bak ka rilruah a awm hleithei lo. A ruang lumen zan atanga vawiin thleng khan Pu Sangpuia ka hmu nitin a. A fapa Didina erawh vawikhatmah ka hmu ve lo. An inngaizawng anih si chuan lumen zan te khan awm ve awm a ni a. Nge a pa bialnu anih zia khawtlangin an hriat avangin a nu in kal a remti lo zawk ni ang?? 

Ka u te inah chaw ka ei a. Ka u pawh a lo dam tha leh tawha, Malsawmi ruang an chhar dan vel min zawta, ka u te chhungkua hi kan khua atanga Aizawla an pemna rei tawh mah se kan khaw lam mi hi kum upa lam chu a la hre deuh fura. Malsawmi tak hi chu an pem hnu a rawn awm an nih avangin a hre vak lo va. Malsawmi pa thung erawh chu kan in a rawn chuangkai reng reng anih avangin ka u lo kal chang pawhin kan inah a hmu fo a, chuvangin a inti hre tha ve viau thung. 

Ka thiante ho inkhawmbang an rawn leng a. Kan titi nak nak renga. Mahse, ka mut hma duh an rin avangin rei awm loin an haw ta dial. 

Kawngkhar inhawng ri niawm takah ka harh zawka. Thawm a awm zui em tih ka ngaithlaa. Engmah chutiang a awm lo. Ka phone ka bana, dar zat ka en a. Dar 10 a ri tawha. Reivaklo chu ka muhil hman a lo ni a. Ka zun a chhuah deuh avangin zung turin ka tho a. Sitting room leh choka inkawp chu light ka off loh avangin a eng iar a. Tumah an awm lo va, kawngkhar pawh a inkalh tha thlapa. Ka harh chhan kha kawngkhar inhawng ri niin ka hre ve ngawt a, a lo ni lem lo. 

Ka mu leh chu reilote phone ka khawiha, mahse ka mut a chhuak lutuka, ka muhil zui chu animai.

Ka inlet thawka, khum piah lawka plastic a siam, stool chunga Malsawmi lo thu ka va hmu nghala, min lo nuih a ka nuih let ve a. A hmeltha tak leh a vun nung sar mai te chu a la ngai reng a. A sam dum hlap leh ngil tha tak pawh a dar chenin a tan rual hmaka, chalsam a nei bawk. 

"Min hlau em? " a rawn ti a. 

"Hlau nang. Ka velh thin Malsawmi kha i nia" ka ti ve a. 

"I dawih zia ka hre ve renga, ka thi tawh tih i hre reng chunga ka lo kal tho si hi i hlau maitheia. Mahse, ka hmu duh tlat che a" a ti leh niah niaha.

"I thi tih ka hriat khan ka hlau tawh lo zawk che" Ka ti ve vat a. Mak ti niawm tak hian a mengphar deuh awk thung. 

"Lalro, ka damlai pawh khan nangmahah bak hian  beiseina ka nei meuh lo thina. Ka thih hnuah pawh nangmahah bak beiseina ka nei chuang lo fo anih hi.. Hmanzana ka sawi kha ila hre reng em? Ka chungchang engpawh i hriat chuan Tarhura a inrawlh ang ka tih kha" a ti leh dap dap a. Nichin lawka a hmel hlim sang kha thinrimna hian a thlaka, a mit a sen ruma. A landan pawh hmuh a nuam ta vak lo. 

"Rui lum hlum angah min ngai vek a. Ka pa ngei ngei pawh khian chutiang chuan min ngai duh nia, a rapthlak asin" a ti leh hrawka. 

"Duh duh chuan lo ngai se a pawi hleinem. Enge pu Sangpuia chuan tel ve na a neih a? " ka ti ve thung. 

"Lalro, I rai anih loh chuan engmah thil mak dang a awm lo i tih kha ila hria em? Kha tak kha ania mak tak tak chu ni ta. Ka rai alawm, mahse ka fa nena khawvel eng hmuh min phalsak loh avangin khalai kawr thuk takah khan min paih a... " a tih lai mekin kawngkhar an rawk kik a. 

"Ka va hawnsak ang" tih leh thawh a ruala. 

"Hey, a chi nang. Tuman an hmu thei lovang che" ka ti chu min rawn melh kawka. Ka hlau lem lo nangin ka mur deuh uai tho. 

"Ka va hawng anga, min hmu thei em i hre mai ang" Induhtawk hmel zetin a ti leh a. Room kawngkhar a hawnga, a chhuak zui chu ka thlir a. Kawngkhar a hawng thawm ka hre zui a. Thawh ve nghal tumin ka ke ka ti che a,mak deuhin ka ke ka leng rualin ka ke artuiin khum ka khawng thuaia, chiang mangkhengin ka harh nghal a. Ka thuchhuaka, Tun lawka Malsawmi thutna lam kha ka va en a. Ka bag ka dah bak thildang a awm lo. Ka hawi kuala, Malsawmi nena kan inkawm lai khan harh reng chungin ka kawm emaw ka tia, a ni hauh lo tih ka hre thiam nghal a. Harh reng chunga kawm ni ila ka ke artuia khum ka khawn rual khan muhil harh thut angin ka awm dawn miah lo. 

Khua lah chu a var vek tawh emaw ka tih laiin a lo la var hek lo. .