Malsawmsangi -7

 Chapter - 7

Engmah sawi loin kan ngawi deuh thapa, min chhan dan kha ka rin lawk dan tho a ni nangin ataka han hriat chuan rilru a tibuai map tho. 

"Malsawmi kha a sual em em bik lo ania" Ruattea'n a ti zuai raih. 

"Nia,bakah a boral hma sunday zan khan a thiante sawi hmang chuan zu a in lo anih hmel a" ka ti ve vat.  Min chhang loin a ngawi vung vung a. Choka lama u Jenny awm chu ka va melh zawka,a eirawngbawlpui nu nen an inbe mawlh mawlha, kan thilsawi ngaihven awmin a awm lo. 

"Ni e, a sual viau chung khan that ve na lai tak chu a nei ve ang. Mihring te chu mi zawng zawngin sual minti ngai lo va. Thenkhatin sual min tih laiin thenkhatin sual min ti lo ve bawka. Ani pawh kha mihring ve tho ania. Chutiang chu mi ngaihdan tur alawm. Tin, chenpuitu tan lo chuan a buaithlak zia hriat pawh a har ang" a ti dam dupa. Kei erawh chu ka chhungril a na vung vung thung. A fanu chungchang a sawi duh danah chuan sawisel ni si loin hnawk a lo ti em em niin ka hriaa. "A thi tawh bawka, kan hahdam ta" a ti niberin ka hriaa. Ruattea ka va melh a. A hmelah chuan a lungawi lo tih ka va hmu thiam mai. 

"Thian a nei fel em mai che u a. Tihian a boral hnuah pawh inla rawn ngaihven zela. A lawmawm. Mahse, min hrethiam ula, keini chhung hi chuan tihian ngawi ila, tuar dam ila kan duh ta ber mai" a ti leh a. Tawngkam vin leh hriat nuam lo hmang miah lo mah se min chhan danah chuan engmah hmalak zui an duh lo va, a tawp tih ka hre thiam tho. 

Ngawirengin Ruattea nen kan verandaah kan thu duna. Kan melh ngai kan melh dun tlawk tlawk a ni ber. 

"Khi mi a pa khian engmah a lo ngai thutak lovang ka tih kha" Kan ngawih vang vang hnuah a rawn tichhuak a. 

"Kan hrilh hre tawha, a tawk mai alawm. Aman hma lak a duh lova. Keimahni hian kan la mai ang chu. A pawi hleinem" ka ti a. Min rawn en a, " Chutia tihchi a ni dawn mi? A chhungte berin an duh lova. Keini nen thisen inzawmna pawh kan nei lo a. A chi loh lutuk" a ti rang vat mai. 

Chhang loin ka ngawi rauh rauha, tihdan tur awm thei tur ka ngaihtuaha, Malsawmi nu chhungte lam tal awmse tha tur. Mahse, a naupanlai atang khan a nu chhungte rawn ngaihven tu an awm ngai pawh ka hre lo va. Tunah hian pawngpaw zawn ngawt chi niin ka hre bawk si lo.Malsawmi pa ka ngaihtuaha, Engvangin nge a fanu, a thisen zawm ngei thihna a ngaihpawimawh loh theih? Eng anga lo sual pawh nise a fanu a ni a. Thih dan pangngai lova a thi ni a a hriat chuan dikna duhin a bei tur a nih laia "tuar dam kan tum" a ti sek mai kha ka hua. A fanu kha misual ber pawh nise a nunna kha a hlu ve tho asin le.. 

"Tihdan ngaihtuah teh, nang i khawhawi pawh a zau deuha. Thian han rawn tur mi pangngai deuh pawh i ngah zawk ang" Ruattea'n min ti leh a. 

"Tihdan chu a awm thei anga. Mahse, a pa berin a rem ti lem lo em a. Min ti hnual a, min ti hmingchhia te a tih ka hlau deuh a" ka ti a. 

"Ni ve tho bawk si. Tinge a mawl viau mai le. A lu chang a lian ringawt mai" a ti leh hmuk. A sawi dan chuan ka nuih a tiza angreng viau. 

"A fanu hi a lo hmangaih reng reng lo anih hi a" a ti leh a. Malsawmi ka In luaha a lo kal thu leh kan inbiakna tam zawk kha ka hrilh veka, mahse pawngsualtu leh Didina nena inzawmna an neih thu te kha chu ka hrilh tel rih lo thung. A rai tih phei kha chu mumang anih avangin sawi enah pawh ka en rih lo. Khang zawng zawng kha a pa phei kha chu ka hrilh chuang lo bawka. Keiin ka hriat ve hma daih atang tawha Malsawmi khan pawngsual atawk tih a hrilh chunga awihsak duh lo tu a ni a. Tunah hian hrilh mah ila a sawt ka ring lo hrim hrim. 

"Hmangaih ve tho ang. Mualpho zual an duh lo ni turah ngai ang" tiin ka rilru ni lem lo takin ka chhanga. 

"Mualpho tih mai mai. A ho em mai. Malsawmi thla miin an hmu an hmu a, tumah a tina ngai chuang lo a, a chhungte khi chu hlauhawm zawngin tihthaih se, hrehawm deuhin siamse ka ti" ati leh chu ka nui nghal huk mai. 

"Hahdam tum phawt ang. Thil dik lo chu Pathianin a hre veka. Lanchhuah hun pawh a la awm ang. Thil tha zawk lo thleng tur nghak phawt mai ang" ka ti a. Lungawi lo angreng takin a phun nang nanga, mahse ka tan tak tlat avangin ngawih a thlang ve ta nge nge. 

Zanah ka inkhawm a, inkhawm banah Rindiki te inah bawk ka leng a. Rindiki nu leh pa an awm bawka. Thil eng emaw mai mai sawiin kan titi a. Rindiki nu leh pa mut hnuah Rindiki nen Malsawmi chungchang bawk kan sawi dun leh a. 

"A thla an hmu fo hi mak ka ti tak tak tawh. A thlarau hian hahchawlh theih loh chhan a nei anih ka ring tlat" a ti niah niah. 

"Maithei.. Ani aia misual kan tih zawkte pawh an thi a. An thla an hmu kher lo a" ka ti ve a. 

"I hmu ve lo tak tak maw? " a ti leh a. Uluk angreng tak hian min en rana. 

"Hmu nang. Enge ka hmuh ngawt ang? " Duhdah angreng takin ka ti a. 

"Ka hre lo. I hmuh rinna ka nei thut zela. Midang hriattir duh a nei anih chuan nang aia hrilh tur zawk hi a nei lo hrim hrim" a ti leh ta tlat. 

"Hmu maithei.. Tak takin kan thianho zing ami pawh ni lo, a damlai pawha a kawm ngai loh te hlirin an hmu a. Thil hrilh duh nei si nangmah te hi rawn hmuh zawk tur alawm" ka ti chu a ner vak. 

"I hmu leh duh si na nge? " a tawng hmain ka ti a. 

"Ka hmu chak lo. Mahse, a, chungah eng nge thleng chu ka zawt chak" a ti hul hak mai. 

"A boral hma khan naupai chungchang vel sawipui a nei che em? " ka ti leh a. 

"Naupai maw? Aih, chutiang lam kan sawi miah lo. Ti nge a? " a ti deuh ha mai.

"Hman zanah ka mumangah ka hmu a. Mumang a ni nangin a tak ang hian ka ngai deuh tlat a. Tah chuan ka raia, mahse ka fa nena khawvel eng min hmuhtir phal loin khalai kawrah khan min paih a ti a" ka ti chu a hmai a dang lawp lawp mai. 

"Mumang anih avangin han buaipui chuk chi phei chu a ni lo va " ka ti leh a. Mesaka thil min rawn hrilh kha ka hrilh bawka, a mengphar awk awk maia. Mahse, a boral tih ka hriat hmaa ka in a a lo kal thu kha chu hrilh chiah ka ngai lem lo. 

"Dik lo hi a awm chiang lutuk. A pa bulah sawi ila, chhui pawh a lo duh ve reng thei a" a ti chu ka nuia. 

"Tlaiah khan Ruattea nen kan sawi alawm. Awmzia a awm lo" ka ti deuh hmuk. Ka sawi zawng pawhin ka thin a rim deuh tun mai. 

"Awmzia a awm lo a? Eng nge a awmzia? " angaihna hre lo tak hian a ti a. 

Kan inbiak dan leh min chhan dan beidawnthlak zet kha ka hrilh a, a inpetruh nasa mai. 

"A van mak em em. Engtin nge chutianga rilru a put theih a? Keini mihrang zawk pawhin hriatchian kan duh laia engtin nge chutianga a tih theih a? Enteh, Malsawmi hi fa lak te a lo ni lek lo maw? " a ti thut mai. Chutiang zawngin vawikhatmah ka lo la ngaihtuah ngai lo. 

"A awihawm loh em maia. A pa a en em kha" ka ti a. 

"Nia, ni ve tho. An lu pawh a lian" Nui chungin a ti a. Ka nui ve huk huk bawk. 

Malsawmi boral atangin thla a tling dawn hial tawha, mahse vawikhatmah mumangah takngial pawh ka hmu tawh lo. Hna ka thawh buai viau lai leh ka muthilh lai tih loah chuan ka rilruah a awm reng zel a. A boral dan engmah chhuizui a awm lo leh keimah pawhin hma ka la lo kha ka tihsual a ni em tihte ka ngaihtuah vak vak a. Atir lamah kha chuan Ruattea leh Rindiki khan chhuizui ngei an duh avangin kan inbe chamchi a, mahse a pa vangin engmah ka ti ngam ta lo a. Kan inbe khat tial tiala, kan khaw lamah pawh a thla an hmuh thu sawi a awm ta lo va. Zawi zawiin Malsawmi pawh theihnghilh a ni dawn tih ka hai lo. 

Ka mutui lai tiharh tu awm ang maiin chiang lutukin ka harh a. Thawhphan pawh ka nei lo. Ka room light a lo in on a. Ka mut dawn kha  ka off emaw ka tia, off loin ka muthilhsan a ni ngei ang. 

Ka inlet a, ka beisei loh lutuka ka sira Malsawmi lo mu zangthal at chu ka hmu thut a. Ka phu nasa lutuka insum hman lo in ka au thawta, ka tawlhsawn nghal dawrh bawk. 

Hmel dur deuh khap hian min rawn en a, a thuchhuaka, bang nghengin a thu a. Kei erawh chu lukham nghengin ka thu mu a. 

"Nangpawn min hlau ta ni maw? " Ngaihnobei lo zet hian a ti zui a. Vawikhat tal hmu leh duha buai buai siin ka hmuh meuh chuan ka rap ru ta riau a. Ka thauah min man a, ka hmulthi a ding ar ar mai. 

"Min hlau suh. Ka ti na dawn lo che, bakah ka damlai pawhin min hlauh ngai loh kha" a ti leh a. A hmel dur deuh khap kha a bo a. A awki pawh a dam ta deuh. 

"I lo awmdan teh thut kha min ti phu mai zawk. Hlauh thuah chuan ka hlau lo che" ka ti a. Za lo zet hian a nui a. 

"Min hlau chu anih kha. Mahse, a pawi lo. Ka sawi duh hi ka sawi anga, tun bak chu kan inhmu nawn tawh lo vang" a ti leh a. Ka bu ringawt.

Ka room kawngkhar kik dawt dawt thawmah ka harha, ka tho mai dawna. Room a lo thim thap tih ka hre chiah. Malsawmi nena kan inkawm chhung zawng khan light a in on vek a, min kalsan fel hlawta, light ka off leh lai pawh ka hre miah si lo. 

"Bawiha, I harh em? Rawn hawng teh" Ka nu aw hian a rawn ti a. 

Khum atangin ka chhuk a, light ka on hnuah kawngkhar lam ka pana. Ka va hawng chu ka room kawngka bulah ka nu a lo dinga, mangang hmel a pu deuh bawk. 

"Eng nge a? " ka mit nuai chawt chawt pahin ka ti a. 

"I rum nasa lutuka, kan room atang pawhin a hriat theih vek alawm. Eng nge thleng a? I nuam lo em ni? " a ti nghal mawlh mawlh. 

"Nuam e. Ka rum tih pawh ka lo hre hleinem" ka ti a. Ka roomah ka lut a, min rawn zui lut a. 

"I au ri niawm tak ka hriaa. I reh deuh vang vang hnuah i rum ta vak vak maia" a ti leh a. Malsawmi ka hmuhtirh khan ka au deuh thawt tih ka hriaa, mahse a hnuah kha chuan a thilsawi ka ngaithla ta char char kha ania. Chutianga han rum chiam tur in Malsawmi a bo na a la rei lo a, muthilh lehna hun pawh a la awm lo. 

"Ka awm chungah ka ban ka dah aniang" ka ti ringawt. 

"Aniang, min ti hlauthawng alawm" a ti leh a. Ka rizai tla lek lek chu a dah tha a. 

"Aaa, hlauh tur a awm nang. Va mu rawh, engmah buaina ka nei hleinem" ka ti vat a. 

"Rilru i tinuam lo thin alawm. Kawngkhar kalh tawh suh, lo luh mai theih bawk si loh kha, rilru a hah em mai" a ti leh a. 

A chhuah hnuah tukverh bulah ka dinga. Kan kawmthlanga taitaw kung zar du mai chu thla engah chuan a lang chiang angreng a. Rannung hram chiah chiah ka ngaithla paha. Tunlawka Malsawmi thilsawi kha engmah ka la theihnghilh lo va. Kan inkawm laia light in on vek, ka harh hnu a lo thim te, ka rum ri ka nuin a lo hriat te chu a vaiin ka ngaihtuaha, mak a awm lo. Malsawmi pawh kha ka hmu tak tak lo va, mumang angin kan inkawm zawk tih pawh ka hria. Mahse, mumang anih rualin thil lawi lo mai mai a ni lo tih erawh ka pawm thlapa, zawlnei tawngkam takin inlarna ka hmu te pawh ka ti ve thei ang chu. 

Zingah ka pa thingpui in laiin a bulah ka va thu a. Ka pa hi zirtirtu anih mai piah lamah a strict em em a. Schoolah chauh ni lo, inah pawh min enkawl khawng em em a. Kan upa ber, tlema kan unaua buaipui ngai ve deuh ber pawh hian ka pa chu hlau tak a ni. Hetiang taka pa duh khirh leh inchhunga Pa nih tlin tawpkhawk anih avang hian kan zah em em a. Mahse, kan duh sawi ngam lo khawp erawh chuan kan hlau ngai lo. 

"Naktuk zingah maw i chhuk ang? " a phone khawih pahin min lo ti a. 

"Aw, ka tum a. Pa, thil pakhat ka sawipui duh che a" ka ti a. 

"Eng thil maw? " a ti bul nghut. 

"Malsawmi thih dan hi chhui zui ngai ka tia. Reitak ka ngaihtuah tawha, FIR ka theh lut mai dawn mawni ka tia" ka ti a. Min chhang loin "Ka fapa hi a chiang lo" tih melhin min melh reng. 

"I thilsawi kha i hre chiang em? " reife hnuah a ti muang fan ruih mai. 

"Aw, hre chiang e. Atirah khan ti tur ka nia. Mahse, ka huaisen tawk lo va" ka ti leh a. 

"Eng nge chutianga tih i duh chhan? " a ti leh a. "A tul lo lutuk" a tih ka rin laia ka tih duh chhan min zawt chu ka thaw huai mai. 

Midang an awm hnai lo bawka Mesaka nena kan inbiak dan leh Malsawmi thil min hrilh kha ka hrilh a, "kawrah khan min paih" a tih kha chu ka sawi tel lo. Naupang anih laia pawngsual a tawh dan leh a pawngsual tu thlengin ka hrilha. A boral hma khan nau a pai tih ka hrilh a, naute pa pawh Didina anih thu thlengin ka sawi fai ta vek. Ka sawi zo chu ani leh ni lo ang takin  makti awm takin a thaw deuh huai mai. 

"Chutiang a lo ni a ni maw? Mahse, amah Malsawmi ber a boral tawh a. Mithi khin chu a awlsam asin, nang lahin a dik ngei tih fiahna i nei miah si lo va" a ti charh. 

"Nia, nei lo. Mahse, tihdan a awm ang. A bo hma chiah chawlhni zan khan Mesaka te nen an lengchhuaka, an haw dawnah Pu Sangpuia a hmu dawn tih Mesaka a lo hrilh a. Chuan, a boral tirh khan Chawlhni zan a a chhuak kha a lo haw ta lo tiin thu kha an sawi ngei bawka"  ka ti leh duah.  Ka pa tawng leh hmain ka nu a rawn lut a,ka pa hnenah a vawk pakhat dam lo a awm thu a rawn hrilh nghal mawlh mawlh. 

A kalsawn leh hnuah ka pa nen kan thilsawi ngai kan sawi zawm leh a. "Dikna a hmuh theih chu a hlu bera, mahse ti lo mai la ka duh khawp mai. Mi chhungkuaah buaina i thlen lek a ni dawn a" a ti ban churh. 

"Anni chu an inrawlh duh hleinem. Chuvang takin keiman ka tih angaia. Bakah, inrawlh duh loh chhan an nei anih ka ring tawh zawk. Thil tamtak hian Pu Sangpuia a kawk thei dawn a. Chu chu an  hre sa a ni ang" ka ti veleh a. 

"Um, nih pawh a ni ang. I duh tlat si chuan han ti phawt mai la. Thenawm tha ni thin kha hmuh chu kan inhmu tui vak dawn ta lo anih hi" Min hnial zui loin a ti ta hlauh. 

"Eng maw a tih dawn a? Enge in lo sawi a? " Ka nuin a rawn ti thut a. A lo awm hnaih leh lai ka lo hre miah lo. 

"Malsawmi chungchang chhui zui a duh anih hi" Ka pa zawkin a ti a. 

"Eeeee, chutiang enge nangin i lo tih ang? At so reng reng suh" Thinrim deuh hian min ti nghal tun tun mai. 

"Buan buan a che. Puitling a ni ve tawha, tha a tih ang chuan tirawhse" Ka pain a ti leh tlat. 

"Eng nge maw tha ang le? An duh leh a pa ten chhui se la. Nangin i lo tih angai reng reng lo.Nangpawh hi chutiang te engahnge rem i lo tih pui a? " a ti leh hlawk hlawk. 

" Vak vak zel che hian a. Puitlingin rilru fim taka an ngaihtuah chuan eng nge ka dan ang? FIR theh luh mai mai pawisa chawina pawh a ni hleinem. A duh chuan thehlut mawlh rawhse. Lo sawi nawi reng reng suh" khauh angreng tak hian ka pa in a ti a. Ka nu lungawi lo lutuk ang hlak hlak chu ngaipawimawh lo deuh hian sitting roomah a va thutsan ta daih. 

Zanah Ruattea nen kan inhmu a, thil tamtak kan sawi duna, Rindiki pawh kan thil tum kan hrilh ve a. A hlauthawng deuh nangin min support em em tho. Zingah Ruattea nen kan hmingin FIR kan theh lut a, kan rin ang ngeiin tlai lam a lo nih chuan kan khuaah titi ber a ni hman tawha. Phone call ka dawng inzawm zut mai bawk. 

Ka phone ka en reng a, ka pick ang nge pick lo ang tih ka ngaihtuaha, a tawp a. A rawn ri leha, a tawp dawnah ka pick ta nge nge. 

"Hello... " ka zamna tilang miah lo tura pangngaiin ka ti a. 

"I thil tih hi eng nge a awmzia? Min va han zah lo em em ve. Hnukkir leh vat ang che" Malsawmi pa-in thupe aw em em hian a rawn ti a. Ka thaw hawka, nilenga ka lo beisei leh nghah ruk reng nimahse ka zamna erawh angai reng. Amah ka hlauh vang erawh a ni lo va. Buaina min siamsak thei dawn tih ka hriat avanga ani hi paltlang huphurh ka ni zawk. 

Note: Min ngaidam ru, YouTube lamah a tawp tawh avangin helamah post ka ngai tih ka lo theihnghilh peka😁