Malsawmsangi-8(last)

 Chapter - 8

"Ka hnukkir lo vang" Awki dam thlapin ka ti a. A thaw hrawk ri ka hre thei.

"Min zah lo hle mai. A tul anih chuan keiman ka ti thei. Nangni lo inrawlh angai lo" thinrim insum tih hriat tak hian a rawn ti leh a.

"Ka rawn vek che a. Tul i ti lo va, kei chuan ka thiannu thlamuang taka a chawlh theih nan ka tih angaia. Chuvangin ka ti ta ngeia. Chutianga hnukkir leh mai mai tur chi ka ni lo" ka ti ve hmiah.

"Romalsawm, ka fa rual lek i nih kha. Lo inngaihtuah ang che, min zah lo leh lutuk" a rawn ti vin ta thak mai.

"Ka aia upa i nih angin ka zah che. A bakah chuan ka zah thei tawh lo che. I fanu pawngsual anih laia awihsak duh lo tu i nih vang ringawt pawh khan ka zahna che a bo vek tawh. Ka thiltihlai min thulhtir  tum mai mai tur chuan vawikhatmah min rawn vau tawh suh" ka ti ve ta nek. Off nghal ka tum chu a rawn tawng leh avangin ka ngaithla leh rih a.

"Min tih hmingchhiat i tumna hi keipawhin ka khing let ve ang che. Chhungkaw mualphona min thlensak nasa lutuk" Thinrim em em hian a rawn ti leh a.

"I duh duh tirawh. Ka inhnukdawk chuang lovang" ka ti leh hmiah. Ka off nghala, ka phone thutthlengah ka vawm thla a. Kawngkhar bulah ka dinga, ka insehruh tlat bawk.

Rei pawh ka din hmain ka phone a rawn ri leh a. Ka ngaihven duh dawn lo zeta Police lam annih takin tiin ka pan phei a. Ka pa zawk a lo ni a, rang takin ka pick nghal vat.

"Eng nge i an a? " Ani leh ni lo ang taka tawngkam dam hian a rawn ti a.

"Ka tha.. Tun lawk khan Malsawmi pain min rawn bia a" ka ti a.

"Eng nge a rawn sawi a? " a ti dam leh thluam.

"Min rawn vau a ni ber mai. FIR kha hnukkir turin min rawn tia. Ka hnuhkir loh chuan intih hmingchhiat tumna anga case file a tum anih hmel" ka ti chu ka pa thaw huai ri ka hre thei a.

"Anih chuan i hnuk kir mai dawn nge? " a rawn ti vat.

"Aih, chutiang lam ka ngaihtuah lo" ka ti a.

"A tha. Thil reng reng chu bul kan tan tawh anih chuan a laklawhah tawpsan loh tur ka tih kha. Tikhan i hlawhtlin hma chu bei ang che" a rawn ti charh charha. Ka thiltih avanga min thlawp zawngin la tawng miah lo mah se a tir phat atang khan ka lamah a tang tih ka hriaa. Tuna min rawn fuihna phei kha chuan min thlawp tih alan tirah ka ngai a. Nasa takin phurna min pe.

Ruattea leh Rindiki ka call leh a. Harsatna an tawk em tih ka zawta, engmah chutiang harsatna an neih loh thu leh Malsawmi chhungte atanga call an  dawn loh thu an sawia. "In lo inkawm nasa fal em a, FIR thehluttu hmingah khan ka hming lang ve mah se nangmah bak tuman an sawi zui lo. Harsatna i mal tuar lek lek maiin ka hriaa. Zia lo ka ti khawp mai" Ruattea'n inthlahrung takin a rawn ti a.

"Engahmah ngai suh. Nangmah khan tel ve pawh duh lo mah la ka hmingin ka ti dawn tho tho a, thil thleng thei tur fel taka ngaihtuah chunga ti ka nia. Engpawh ka hmachhawn thei e" ka ti ve thung.

Thutthlengah ngawi rengin ka thu a. Malsawmi ka mumang a ka hmuh hnuhnun bera ka hriat tura min hrilh zawng zawng ka ngaihtuah leta, ka thin a rim tet tet mai.

"Didina fa ka pai tih kha tlaiah an chhungkua a an awm laiin Didina khan a lo sawia. Min neih an phal loh chuan phai lamah hnathawka ka awm tur kha min rawn zui a tum bawka. Chu chu nasa deuh maiin an chhungkua an lo intibuaia. An buai chhan erawh chu a pa vang ni loin a nu vang a ni a. A nu khan min neih dawn ai chuan intihhlumah a lo vaua. Chung zawng zawng chu Didina khan msg-in min rawh hrilh veka. Zanah inhmuh kan tum bawka. Chuan, kan inhmuh hmain Mesaka te nen High School tlangah kan lenga, kan len lai khan Pu Sangpuia khan thil sawifelpui turin min hmuh a duh tih msg bawkin min rawn hrilh a. Ka hmuh duh loh thu ka sawi khan engkim tha taka kaltlangpui a tum thu leh a fapa lama a tan thu te, a nupui hriat loha min tlanbotir a tum dante kha sawi a duh a tia. Mak ka ti deuh nangin Didina kha ka hrilha, ani pawh khan hmu turin min rawn tia.. Mahse, kan inhmuhna tur ka thleng khan a lo awm lo va, Didina hnenah a pa lo awm loh thu hrilhin call in kan inbiaa, kan inbiak lai takin na deuhin ka tukhumah an rawn vuaa. Abak ka hre zui lo va, min vawtu pawh ka hre lo. Ka harh leh chuan khalai kawrah khan ka lo awm a. A thuk em avangin ka chhuah theih ka ring lo va. Lawn chhuahna tur zawnga ka kalsawn tur khan ka taksa tak tak, nunna nei lo a let reng kha ka zuk hmu a... "a ti anih kha.... Ka hmai ka hup a, ka rum nghal kawk mai bawk.

" Chhuizui tura i beih chuan engmah chhui zuina tur a awm lo maithei. Kei mitthi ka nia, engmah ka sawi ve thei tawh lo va. Tuna kan inbiakna pawh hi fiahna a tling zo chuang lo vang. Police ho phei chuan an nuihzat ngawt ang che. Tin, Record vek pawh ni la naktukah chuan engmah i record kha i hmu tawh chuang lovang. Thil pakhat erawh chu a awm thei a, chu chu ka phone ania. Putara nena kan inbiakna zawng zawng kha a awm a. Phone kha i hmuh theih chuan a lawmawm ngawt ang" a ti leh bawka. Ruattea hnenah Malsawmi phone kan zawn hmuh a tul tih ka hrilh vek tawha. Mahse, kan la hmu zo lo. Khami zana Malsawmi ka zawh khan " Thlarau mah ni ila thil zawng zawng ka hre vek bik lo va. Mahse, kan inhmuhna kha Forest IB tlang thlang, far hmunah khan ania. Tah khan zawng ula in hmu maithei. In hmu lo anih chuan amah Tarhura khan a kawl tihna aniang" a ti a. A sawina hmunah khan kan va zawng vek tawha, kan hmu zo lo.

"In inhmu dawn tih hriain midangin an lo thlen khalh anga, an lo vawthlu zawk che a ni angem? " Ka tih lah khan midang rinhlelh a nei miah lo a. Tin, a ruang an chhar hnu a U Jenny-in thawhtan zinga a chhuak ti a a sawi pawh kha dawt chiang tak a ni tih a sawi tel bawk.

Ni a liama, hna leh Malsawmi case lamah ka buai zak zak renga, Malsawmi pain min vauna kha a ti ta lo ni tur a ni. Engmah chutiang lam sawi a awm lova. Mahse, kan khaw lamah erawh chuan ka chhungte u Jenny-in a lo tawng chiam maia, ka nu phei chu a thin a rim em em maia, mahse ka pain engmah sawi lo tura atih avangin engmah a sawi ngam chuang lo.

Police ho nen kan inbe renga, kan inhmu zak zak reng bawka. Mahse, rin ang ngeiin ka rinhlelh ber Pu Sangpuia erawh a insawifihlim thei ta vek. Mesaka pawh an kawma, a thil hriat engkim a sawia. Mahse, chu pawh chu Pu Sangpuia chuan dawt anih thu a sawi a, inhmuh an tum reng reng lo tiin a tang tlata,a insawifihlim zel thei tho. Didina biak ka duha,vawitamtak ka call tawh chungin a pick ngai lo a. Achang leh a tlang thei lo bawka. Kan khaw lamah ka awm tam a, hmuh ka tum thina. Mahse, hmuh turin a awm ngai lova. An in a va kal chi a ni lo tih ka hai bik lo va. Ruattea leh Rindiki a hmun nghak an ni a. An ni pawhin hmuh an tuma, biak pawh an tum nasaa,mahse an beidawng ve thak tho. A boral khan thawhtan zinga achhuak haw ta lo angin an sawi veka.Mahse,U Jenny-in a hmain Sunday zana a chhuak a lo haw tawh lo tiin a sawi lai ngei hre tu an awma. Beiseina sang tak nena ka lo awm laiin a hre tu an va zawhchian khan "ka hriatsual aniang" a lo ti ta daih maia. FIR ka theh luh hmaa ka va zawh khan a sawi lai a hriat thu chiang takin a sawia. Keilahin record nachang ka lo hre si lo. Rei pawh ni lo a a thu a zuk ta tlat chu ka thin a rim em em a, tihngaihna a awm chuang der si lo.

"Mala, kan case hi a hmawr kan bawk dawn hnaia, awmze nei thil kan buaipui lo hi a ang tlat maia" Davida'n a rawn ti a. Ani hi Higher kan kal laia kan classmate thin a ni a. Inkawm bik kan ni lo nangin kan inhre tha vek tho a. FIR ka thehluh dawn khan ka theh luhna tur Police station-ah khan a lo insawn lut chiah a. Kan case pawh amah hian min khawihsaka, theihtawp min chhuahpui tih ka hria.

"Anih tak chu mawle.. " Sawi tur vak hre loin ka ti ban chat.

"Theihtawp kan chhuah chuan kan hriaa, mahse inrinhlelh ber te an insawifihlim hneh nasa mai sia. Kawng hi a ping khawp mai" a rawn ti leh dap dapa.

"Um, ka hre thiam alawm" ka ti leh ringawt.

"Nia, a phone pawh kha kan chhui viaua, kha pawh kha a in off na a rei tawh em a. Kan beidawng titih der chu anih hi. Tin, an chhungkaw ho hi langsar si lo hian an tangrual ru tham mai hian alanga, in khuaah lah hian pa fel leh langsar laklawh anni lehnghala, a buaithlak khawp mai" a ti leh charh charh.

Ka mu meng kara, ka hlawhchham chiang lutuk chu ka thin a rim a, tihtheih ka nei lo lutuk leh Malsawmi laka ka inthiam lohna chuan min ti naa, ka ipik chuah chuah mai bawk.

Ka mitthlaah Malsawmi pa leh u Jenny an lo langa, Pu Sangpuia pawh ka mitthlaah a lo lang zela, an pathumin min nuihsawh niin ka hriaa, thinrim lutukin khum ka chum dawt mai. Kan khaw hoin an duh duha ka chanchin an sawi tur chu ka ngaihtuah a, pawi ka ti lo. Kan khaw pa langsar thiau anni a. Thenkhat phei chuan Malsawmi pa te nen tun hma lam atanga kan inhmuhthiam loh vanga tih hmingchhiat tum angah min lo sawi bawka. Ka chungchang chu engang pawhin sawi se ka pawisa lova, ka pa kohhran upa nihna thlenga an han khei ta erawh chu pawi ka ti thung.

Ka phone a rawn ri a, min rawn call tu ka en chu Davida a lo ni a. Zan zana min rawn be ta chu mak ka ti deuh viau.

"Hello.. " ka tih veleh chuan "I mu tawh em? A tlai deuh tawh nangin thil thleng hi a liantham em a. Ka rawn be lo thei lo che" Hlim sarh hian a rawn ti a.

"Eng thil nge ni ta? " ka ti tha ve mai. Diktak chuan beiseina nei lo em em a ka awm lai a ni a, ka chhungril thlengin ka hlawhchhamna avangin ka chau vek rih.

"I awih lo zawk ang. Helamah i awm lai anih chuan stationah lo kal thei la ka ti" a rawn ti leh a.

"Tukinah ka chhuk thla chiaha. Naktuk tlai lamah lo chhoh ka tum a" ka ti leh a.

"Um, anih chu. Engpawhnise i hlawhtling ta tih ka hrilh duh che.. Nichin lawk khan i rinhlelhpa fapa a lo kala, Malsawmi phone bo kha min rawn pek bakah thil tamtak min rawn hrilh a, nakin zelah pawh thuhretu nih a duh a. Tunah hian lock-up ah i mi duh ngei kha kan dah e" a rawn ti ta duah. A thilsawi chuan min deng dawt maia. Ka thuchhuak nghal hlawl mai bawk.

"I ti tak tak em? Engvanga mahni pa tihdik loh rawn puang nge anih? " Aw khur deuh hlawk hlawk hian ka ti thei hram.

"Tak tak a ni e. A sawi danah chuan Malsawmi nen khan an inngaizawnga,tlanbo an tum a. Nau thla khat mi a pai a ti bawk tak e. Mahni pa te ngei sual han puan chu a har bawk aniang. A thlan a tla phat phat maia. A thusawi hi a dik ngei em kan la hre lo nangin a rintlak turah ka ngai a. Engpawhnise,Nang zawng hman atang khan Pathian i ring takzet tih kha i nunah alang thina, tunah pawh engkim huama i beihna chu chunglamin a rawn chinfel sak leh dawn ta che anih hi. Hahdam deuh khan lo awm tawh la, vawiin tlaia ka rawn biak lai che a i awki zawi ruih mai kha chu hriat nawn leh ka duh tawh lo ania" Hlim tih hriat tak hian a rawn ti a.

"Ka lawm e, ka lawm takzet e" ka ti chul ringawt.

"Ni e, a lawmawm. Mahse keima hnenah ni lo, a pa sualna zep duh lotu fapa huaisen hnenah zawk lawmthu ila sawi dawn nia" a rawn ti leh a.

Ruattea ka call nghala, khawchhunga awm zawk ni mah se engmah a lo la hre lo va. Ka thu hriat ka hrilh chiah chu lawm avangin a au thawt mai. Zanin a beidawng taka kan inbiakna kha hlim taka inbiaknain a thlak taa. Hmeichhia ang maiin tawng kan inchuh nawk nawk reng mai. Chutihrualin, engvanga Didina chuan a pa tihsual rawn puang thut nge anih ang tih ka ngaihtuaha, kha zat biak kan tumna kha chhan a ni ngai miah si lo a. Tuna taka a rawn inlar thut mai chu mak tak a ni.

Sana ka en a. Dar 11 a hnai thuak tawha. Ka pa ka call a, Ka pa hi mu tlai ngai lo, tho hma tak thin a ni a. A mut a hun daih tawh ka ring nangin a harhvang em a. A pick theih tho ka ring. Ka rin ang ngeiin rei pawh a ring hmain a rawn pick nghal vat.

"Tea, eng nge ni? " Ngaihtha lo aw hian a rawn ti a.

"Pu Sangpuia an man.Police station lamah Didina'n a pa tihsual zawng zawng a va puang vek anih hmel" Zangkhai vah hian ka ti a.

"Ekhai, chuti maw? A va han lawmawm ve. Nichin lawk khan i nu in Malsawmi te in kawta police Motor ding reng a hmu a. Eng nge maw an tih kan lo tih lai mek ania" a rawn ti ve ta mai..

"U Jenny an rawn la ve aniang. Ani khan dawt a sawi chiang em a.. " Ka ti leh vat.

"Nih pawh a ni mahna. Tunah chuan in hlawhtling dawn ta aniang" Hlim hmel takin a rawn ti a.

"Ni e, Malsawmi pawh a hahchawl thei tawh ang. Chuan, naktuk zingah ka lo chho ang. A hma thei ang berah" ka ti zui a. Ka hlim zia leh phur zia a hre chiang bawka, nidanga ka zinchhuak leh haw tur hmanhmawh lo tura min chah ziah thin khan engmah a sawi lo.

Ka helhhawlh nasa lutuka, mut pawh ka muhil mumal lo. Khawvar fel veleh kan khaw lam panin ka tlanchhuak nghala. Nidanga ka hmuh reng reng thin kan khaw kawnga thil awm engkim mai chu an thar sur mai hian ka hriaa. Pawlsawm ka pass ni ai mahin ka hlimna a sang zawk hial ang.

Thil a inletling tak thawkah chuan mize nghet lo mizo kan nih zia  a lo langa. Pu Sangpuia leh Malsawmi pa leh u Jenny chanchin chhe lai an sawi bawih bawih ta maia. U Jenny phei chu Malsawmi'n in a chhuahsan hun a sawiah dawt a sawi avangin a chunga rorelna a  lekkawh angaih phah ta hiala. Malsawmi pa erawh chu engmah a tihsual an hmu lo bawka. Police lamin an la zet nangin an rawn chhuah leh a, an tan chuan vanpui a chim a ni ta ngawt mai.

Pu Sangpuia nasa takin insawithiam a tuma, mahse Didina'n fiahna a lo nei thlip thlep mai a. Kha zan, Malsawmi nena an inhmuh zan khan amah ngeiin Malsawmi a lo chhu thlu a, mi hmuh loha tuikawra paihtu pawh amah a ni a. Fiahna a awm lo tiin tang nasa teh mah se, engkim chiang taka hmu tu Didina a lo awm a. A mita a hmu mai pawh ni loin voice record nen lam a lo nei a. Malsawmi'n Pu Sangpuia a hmuh loh thu hrilhin Didina a va call a, an inbiak mawlh mawlh laiin Malsawmi a rak thawt a, phone a thlauha, mahse a in off si loh avangin thil tamtak Didina khan a hriaa, fing takin record nachang a lo hre hlauh mai bawka.

Pu Sangpuia'n phone a off hnuah Didina'n thil dik lo thleng avangin Malsawmi awmna lam panin a chhuak nghala, mahse a hmun a thlen hmain a pa Motor Forest IB lam atanga lo tlan thla a hmu a. A pa kalna apiangah a zui taa. A pain kawra Malsawmi a paih lai thlengin a hmu a, videoin a cover vek bawk.

A pa haw hnuah inah a haw a, engmah sawi loin zanah a video lak leh voice record neih zawng zawng pendrive-ah a dahchhuak veka, a tuk zingah a unaute chhuah hnu, a nu awm ve laiin a thil hmuh zawng zawng a sawichhuak taa. Mahse, a pa hian a pha fai veka, Didina inring lo lai vawthluin a kut a phuar saka. A roomah khami ni atang khan a kalh khum ta char char mai a lo ni a. Room chhunga a dah lai pawhin a kut phuarna a phelhsak chuang lo va. Thil ei dawnah leh a inthiar dawnah chauh a phelhthawl sak thina. Eitur pawh amah kherin a pe thina. A phuarna a phelh dul sak laia amah a beih let loh nan Didina nau a hruai tel thin thung.

A phone a laksak a, thil pawimawh thei tur zawng zawng a delete sak vek a. A phone pawh a kawlsak daih bawk. Kei leh Ruattea'n FIR kan thehlut tih kha a nau hnen atangin a lo hre veka. Khawchhunga kan than nasat zia leh a pa insawifihlim hneh zia te pawh a nau hian a hrilh zela. Police station a a kal zan khan a nu a inkhawma,a pa committee turin a kal bawka. A phir pui, a nau chiah nibawk kha amahin inah a awma. A pa khawsak dan tenawm lutuk ning em em tu leh a u lainat avanga hrehawm ti em em tu in engpawh huamin room atangin a chhuahtira, an unauin Police stationah a pa dik lohna an va sawi dun ta a lo ni.

"Ka pa a ni hi ka zaka, ka pianhlima ka lo thi nghal lo hi pawi ka ti rum rum thin. Hmana hmeichhe naupang duhawm leh hlim thei tak a pawngsual thin kha keimah ngei hian ka mitin vawi hnih ka hmu a. Kha hmeichhe khawngaihthlak kha a nulat hnuah kan chhungkaw hrehawmna siamtu a ni taa. Mahse, a chunga ka pa thiltih zawng zawng kha kan chhungkaw tawrhna aiin a rapthlak zawk. Ka ni ngeiin thil thleng zawng zawng a hre chunga a zep duh leh Mali hringtu pa ngeiin a fanu aia a nupui thusawi a ringa, a fanu a thlauhthla thei pawh kha ka la hre thiam thei lo. Vawikhat lek pawh a fanu kha ring se chuan kha hmeichhe hmeltha leh duhawm ber kha vawiin hian a la dam anga. Keipawhin ka pa hi ka pa anih avanga zahna hi hmanah ka tuar anga, vawiinah hi chuan ka tuar dam tawh zawk ang. A tawp bera ka sawi duh chu, mi hi a pawnlam landanah teh suh tih hi mitin hian hre nawn leh ila, ka pa anga vantlang zinga pa tha leh zahawm, chhungril tenawm tawpkhawk leh hmeichhe naupang pawh it a khawihchhe duh, mahni fapa pawh vantlang hmaa hmaiphihna tura thah pawh pawisa lo hi khawvelah tamtak an awma. Mi khawtlangah a inhman avang te, kohhran bel tu anih avang ngawtin mi tha a ni lo. Chuvangin tupawh fimkhur ila, Mali anga pawngsual lo tawk tawh, mualpho hlauh avanga rilru lama hliam nei tamtak te khan hlau miah loin lo penchhuak ula,nangmahni tichhetu kha timualpho rawh u. Chumi tura huaisenna an neih theih nan Mizo mipuite hian pawngsual tawk kan thlir dan pawh i thlak ang u. Chuan, in fate an pawngsual khan lo ngaidam tawh suh u. In fate rilru ser kha a nasa lutuk tih hrereng ang che u"

Didina a thutna lam pana a rawn phei chu hmuhnawm ti em em hian ka lo en a. Mi huaisen chawimawina hi tu nge pek tur tiin min zawt se chuan ani ngei hi ka pe ang tih ka chiang.

Malsawmi thlanah kan thianhoin kan thu thapa. Ngawirenga Didina thlan a kraws an phun vuana ding chu kan thlir thapa. Engmah kan sawi lo nangin kan zavaiin kan rilru a thilawm a inang vekin ka ringa. Thlifim rawn thawn chuan min rawn chhem heuh heuh a. Ka thutna thlanga bung kung lian zet awm chu ka zuk en a. A zar pakhatah chuan Malsawmi lo thu ka zuk hmu  a. A damlaia min nuih fo thin ang khan min rawn nuiha, ka nuih let ve bawk...

A tawp ta..

Note : He thawnthu hi ka thian pakhat, a naupanlaia pawngsual tawktu chanchin atanga lo pianga a ni a. Angaihnawm thei tur zawngin ka thiam ang angin ka her danglam ve a. He thawnthu lo chhiartu zingah naupanlaia pawngsual tawk, sawi ngam si lo a tuar tlawk tlawk in lo awm anih chuan huaisen turin ka chah duh che u a. Pawngsual tawk nih kha a zahthlak reng reng loh a. Pawngsual tawk nih vanga sex a chak lo angah inngai bawk lo ula, tenawm leh bawlhhlawh angah pawh inngai lo turin ka duh che u a.Tin, chhiartu zawng zawngte ka ngen duh che u chu kan chhungte leh thiante emaw khawchhung leh vengchhunga mi lar tak annih vangin an tihdik loh kha dik angah ngaihsak lo ngam theuh ila, huaisen takin dik lo chu dik lo niturin ke pen zel ila. Tin, he thawnthu hi pawngsual tawktu zawng zawng tan ka hlan e.. 

Ka blog rawn tlawhtu zawng zawngte lo damtha zel ula, thawnthu thar nena ka lo let leh hma chu zantin atan mangtha muttui vek ule🤎💜🖤💛