Pindan -1

 Ziaktu - Maengi Ralte

Tui ti takin chaw ka ei meka. Ka u leh ka nau an dan pangngaiin chawei chungin an inhnial a, ka nu chawei tur in a rawn thu ve a. Ka u leh ka nau inhnial mek titawp turin a hau nghala. An pahnihin ngawi ta mai lo chuan thiamthu an sawi ve ve a. Vin taka ka nuin a hauh zui takah chuan an ngawi dun ta reng.

Ka pa a rawn thu ve a. Ka melh zawka, Pa cher sang tak, zang kul deuh,chal kawlh tle hlarh mai a ni a. Ka thianten " Zo Gandhi " Tiin an ko fiam thin a. Mi ngaihah chuan pa nelawm lo leh tawngkam pawh bung thei tak a ni a. Mahse, ka nu a ngam loh zia chu kan unauin kan hriaa. Ka nu a at loh em vanga kohhran leh khawtlangah pawh pa langsar tak ni thei a ni a. Inchhungah erawh pa rorel thiam lo leh nep tak, "I nu tih dan dan" ti zel tu a ni.

"Rawn ei ve vat thin ta che. I hna kal tlai hlauin hma takah kan tho a, eirawngbawlin kan buai em em a. Chawei siam hnuah pawh ei mai loin i thu khawmuang leh reng zel a" Ka nuin a ti hmuar hmuara.

"Ka la hman lo alawm mawle, ni lo se ka ei ang chu, Mama, engtikah nge i result a chhuah dawn? " Mama hnenah a ti zui nghala. Mama'n bung nghat hian "naktukah' a ti a. " I fail vaih chuan Hostelah i lut nghal ang, I hria em?" Ka nuin a lo ti ve nghala. Mama ka va en a, a tum buau. A pass hi ka ring lo nasa mai si. Lehkhazir aia Motor siam nuamti zawk a ni a. Lehkha lah chu a thiam thei lo mai pawh a ni lo, a tui hian a tui lo bur.

"Mal-i, nang class i kal dawn em? I kal dawn chuan i pu dawrah Tuboh dahchho ang che" Ka pain min ti a. Ka bu ringawt. "Tuboh helai atanga kensak ngai tur khawp chu enge maw ni thin le? Lalduata te pawh an awm renga, an hman duh chuan rawn la ang hmiang. Fate hi an nei ve bawka, chhawr tangkai reng reng lo. Hmuni dei duai lah khi a pasal thleng khian a fa pawma, i farnu te hi chu an huai ka ti dawn nge an mawl ka ti dawn ni? " Ka nuin a ti tun tuna, ka pa a ngawi kur. Ka nuin chawei chungin ka Ni Hmuni leh Ni Tei a rel zuah zuaha, ka ni Hmuni te hi ka pu te In hnuaiah an awm a. Pasal ngam ve tak mai leh ka Pu te inah ro la rel ching tak a ni a. Ka nuin a rel pawh a awm viau, mahse ka pa ngawi duk chu nep ka ti angrenga, a farnu te thlavang hi ka rin ai hian a hauh lo thin.

Eng emaw tal a sawi ringin ka va melh zawka, Insum hman loin ka nui nghala, rum takin ka pain min rawn en a. Ka nuih a za zual zel.

"Nang hi nui thut thut zel suh, mi ang lo ang mai" Ka nuin min ti hluk. Ka nu ka melh a, ani pawh chuan ka nuih a tiza zual. Diktak chuan an landan chu inhmu ve ngat se an nuih a za ve tho ang. A beng pahnih chu kan ui beng ang maiin a tung sei a, a khup zula. A mit a meng bial kiaua, a chalah a tarmit a la dah zui, a chawei mek chu bar loin a leiin a liak a. Nuih loh theih a ni lo.

"Ka beng dawn che mawni le?enge i nuih vak vaka? " Thinrim taka min en chungin a ti leh a.

 Thawklehkhatah ka nuihzatna a reh nghala, ka nu hmel pawh a pangngai ta daih, Ka pa pawh vawk hmel anga ka hmuh kha a lo pangngai leh vek tawh.

Thleng ka sil zawh veleh ka insiam nghala, Week lai anih avangin kal loh aia kal mai mai ka ni a,infiam na lam engmah tui nei lo, thawveng ve satliah, suangtuahna rama chen hrat tak, thil ngaihtuah tawh lama ngaihtuah ngut ngut thin leh midang hmel pawh ni tura ka duh anga hmuh mai ching tak ka ni a, ngaihtuahna avanga nuih thut thutte ka ching em em bawk. Ka insiam zo room atanga ka chhuak chu ka nuin min lo hmu a. "Awi, I incheina kha a mawi lo leh lutuk. Va inthlak leh rawh" Min lo ti nghal chiama. Ka u bathroom atanga rawn chhuak chiah pawh chuan thing min tih zia a rawn sawi nghal vak bawk. An inang nufa sia e..

"A tlai tawh, inthlakna hun a awm lo"  tih leh Kawngka lam pan ka ruala, "I va han thing tak, college-ah min be hlek suh ang che" ka uin min tizui chiama. Engahmah ka ngai duh chuang lo.

Ka thiannu nen kan inphurchhuaka, ka pu te dawra tuboh dah tur ka la ken theihnghilh daih zuia. Duh leh ka u in inti no tawkin a bialpa bike hnunga chuang pahin rawn keng ve tawh mai rawhse.

Kan thian hoin kan ri laih laiha, ka nu leh ka u in thing min tih nen tuman ka incheina mawi lo an tih thu min hrilh lo.  Bawp khawkherh at chungin  Matthew-a tlan kual vel chu hmuhnawm ti em em in ka en a. Ka thiante rak chel chul chu ka ngaihven lo, a rei hnuah phei chuan an reh ta thiap.

Inkhel a zo a, Matthew-an min rawn pana, tui bottle ka lo pe nghala. A rawn thut ve hmain tui a in a, kan college-ah a lar em em a, Basketball a thiam mai piah lamah lehkhazirna lamah pawh a thiamthei lehzel a, an chhungkua an lo khawsa thei bawk nen a langsar larh maia. Mahse, amah hi tupawh kawm thiam leh mi ti zawk zawk lo, zaidam leh chapo lo tak mai a ni a, a dinhmunah hian mipa dang awm se an chapo khawpin ka ring.

"Hey, tinge tikhan i en ngur ngur a?" Sawmi'n min nghawk sawk pahin a ti a. Ka suangtuahna atangin ka harh  nghala, Sawmi sawi ang tak takin Matthew-a leh a bialnu lam ka lo melh reng chu niin. Zak em emin ka hawisawn nghala. "An rawn hmu lo hlauh che a, I vannei, I awmdan amak thei em mai. Mit tla dawnin i melh zel maia" a ti leh sar sara. Tim angreng takin Matthew-a te lam ka va en leh a, a bialnu tui bottle a lo pe let mek lai ka va hmu a. Awii, a bialnu pek tui a in lai khan keimah angah ka lo inchan pek a lo ni. A ho thin teh e.

In ka thlen veleh ka nu in ka tuboh theihnghilh vangin min lo hau nghala, "ka u pawh khan lo dah ve mai se, ka theihnghilh tih inhriat reng te chuan " Ka ti a. "Nangte chu scooty i kenga, I u nen in inang lo. I u te chu midang ruala kal ania, duh dan danin a awm thei hleinem" a ti hlawk hlawka. "Awi, a duh dan danin a awm lutuk, a duh loh dan thleng pawhin a awm thei ang. Chutiang khawpa inthlahrunna tur awm lo chu a ni" ka ti chiam peka. Min chhan vak dan tur hre loin ar chaw pe turin min ti daih.

Ka thian pakhat, Rosanga'n hna thawh tur Mail-a min rawn thawn ho ka checka, darkar hnih velah ka zawh theih mai ka ringa. Ka u nena kan room hi a vaia ping vek loin chung lam tlem hi net in a inpinga, light on reng ka u in a nin thin avangin a rawn mut hma ngeia zawh hman ka duh. Ka thawk ta char chara, mah se ka rin aiin a rei ta tlat. Ka rin ang ngeiin,
"Malsawmhlu, light kha on reng suh,i duh leh sitting roomah va thawk rawh.Ninawm lutuk" ka u in a ti hluk hluka, ngawirengin keiin ka hna thawh zawh chiah ka save ve thung.

Ka hmai ka va phiha, tonerin ka hru leh thuak thuaka, night cream ka hnawih leha, ka mu ta than. Rosanga hnenah ka zawh tawh thu leh ka thawn tawh tih ka hrilh a, msg a seen lo. A zin lo tih ka hriaa, a party leh hah hah tawh pawh a ni mahna. Amah Rosanga hi ka thian ka ti nangin kei aia upa fe a ni a. High school ka kal laia kan Sir thin a ni a. Ka mize dangdai tak vang leh lehkha ka thiamna avangin min hrechiang ta thuaia, min hau ngun em em nangin min duhsaka, min nau en zuia, tun thlengin kan inpawh ta zela.Higher ka kal laiin ani hi chuan hna a bansana,Sumdawnna a bei zuia, mawngzawm pui fuh tak mai a nei aniang, a hausa ta hluai. A zin reng renga, nupui la nei lo tih takah a lerh zek bawk. Mahse, keinen hi chuan inngaihzawnna lam hawiin kan Inkawm ngai lo a, nau tak tak enin min en a. Kan inah pawh a lo kal awl lo bawk. Inhlawhna tur class kal paha thawh tur ka duh ka tih avangin an hna pakhat min khawihtir thina. Kartin hlawh min pe a, college ka kal tirh atangin keimah ka intum ta zar zar. Ka chhungte ka ti hautak lo teh chungin ka nu lawmna erawh a tling zo lo, a fanu rangkachak, nitin pocket money a la pek ziah ngai, no leh inchhunga hmantlak loh zet aiin min la hau nasa fe reng tho a. Ka awm mai mai pawh hi thil tisual ang char char ka ni.

Ka mutui lai ka harh thut a, ka harh chiang leh lutuk chu enge min tiharhtu hriat tumin ka beng ka chhi nghala. Ka room kawngkhar chik thawm ka hre nghal zat. Tu nge lo lut ka va en a, tumah lo lut an awm lo. Mangchhia man ching, tah chhuah chang nei fo ka nih avangin ka nuin min rawn enfiah anih ka ringa. Ngaihthat lohna pawh nei lem loin ka muhil zui leh maia. Mahse, ka mumang vangin thlan huh hluamin ka harh leh a, sana ka en a. Zing lam dar 4 a lo ni tawha. Nipui lai a ni bawka, khua a var har tawh lo ang tih ka hria.

Phone khawih pahin ka mu a, ka mut a chhuak tawh lo hrim hrim. Ka ngaihtuahnaah lah chuan ka mumang hlir kha a awma. Ka phone ka daha, mar atin ka mu a. Ka tleirawl lai thil thleng ka ngaihtuah  let leh ta vang vang.

Ka pa hna avangin kan insawn kual sek thina, middle school ka kal dawn kumah Aizawlah an sawn lut a, kan in hi a hnuai chiah kan sak lai a ni a. A satu vai mistiri ten an luaha, keini kan awm dawn takah khan hmanhmawh takin an siam tha a, ni deuh nei nuai chungin kan luah lut a. Kan in awmna veng, tuna kan chen zui zelna hi pemkhawm veng an tih ang chi kha a ni a.Aizawl vengah chuan a naupang pawl leh tlabirh tak a ni a. Mahni khawhlui tih dan lalian chi an tam em em a,veng inlungrual tak ni lem lo,ruihhlo tam em em na hmun a ni a. Kan tlangnel lo em em maia, kei phei chu ka tlangnel lo lehzuala. Ka nu hian helai veng khera inhmun kan neih avangin ka pa a hau nasa thei em em a. Tunah chuan kum 10 vel kan awm ve ta a. Kan veng pawhin hma a sawn nasa tawh a, mi hausa pui pui khawpui chhung atangin an rawn pem a. Pastor pension leh officer pension te, Thingtlang lam atang tein an rawn pem lut zela, sumdawnna hmun lian pui pui awmna veng kan lo ni taa. Kan awmtirh nen kha chuan Lei leh Van ang mai a ni tawh.

Kan awmtirh hian kan unauin veng pawnah school kan kal nghala,ka pain a hna kal pahin kan unauin Bike-in min thlah nghal ṭhina,haw lam erawh kein kan haw mai ṭhin thung.

Kan vengah hian kan awm hma daih a awm lut,khawsa thei pangngai tak an awma. An fanu nen hian kan inrual a, an lo khawsa thei fal deuh bawk nen kan rualpui ho hi a thunun viau maia. Amah boss anga ngai lem lo tu chu a hote nena tihduhdah mai te an chinga, School hi hmun khatah kan kala,a ṭhiante ho erawh chu kan veng Middle Schoolah an kal hlawm.Sande sikulah kan pawl a inang zela. School khata kal siin kan inkawmngeih miah lo thung.

Harsatna em em nei loin kum hnih lai a liam ve taa.Kan in pawh kan awmna lai tur kan sa zo a. Inchungah kan insawn tawha. Ka u in High school a kal ve ṭana,kei pawl 7 ka ni a. Ka nau erawh kan chhang a khat deuh bawka, pawl 3 a kal ve dawn chiah thung.

Hemi kum aṭang hian harsatna ka tawk ṭan ta a. Ka nau hi ka nuin kan veng bul lawka school an hawn tharah a sawna, middle school an la neih tel si loh avangin keimahin kan School hluiah ka kal angai taa. Ka school kalna aṭanga ka haw hian kan veng Middle school bul kawngah ka kal thla ṭhina. Kum dangah chuan ka u nen kan nih zel avangin engmah buaina ka tawk ngai lo. Hemi kum erawh hi chuan keimahin ka haw angai ta a, thla khat vel chu harsatna em em nei loin ka awma. Nikhat ka haw erawh chu Debbie te ṭhian ho hi ka kaltlangna tur lai kawngsirah an lo ṭhu ṭhapa, Debbie hi kumin aṭangin kan veng middle schoolah a insawna. Ka kal thla chu Ruatkimi hian min lo ko a. "Malsawmhlu" min lo ti a. Ka hming pum khera min ko chu ka ngei ngang mai. Ka dinga, "Eng nge ni?"ka ti a. "Engmah,ti nge i thau em em ka hre duh a' min ti a,a ṭhiante an lo nui ham hama. Engtinmah chhang loin ka kalsan ta daih.Mahse,min rawn zui ve nghala,ka hnung lawkah an kala, "A chawn len zia khu, sakhaw nei lo tan chuan biak tawp tham, Thingtlang naupang tihtakah a pawnfel lah a fual" tih angreng sawiin an nui vak vaka, ka hminga sawi loin "Kel-i" tiin an sawia. Engvangin nge Kel-i an tih hre lo mah ila keimah min sawina a ni tih ka hre vek tho. Kan in ka thlen hma chu kawng tluanin min zuia. Hawi let loin ka kal ngaiin ka kal miah miaha,mahse hlauh nei ang maiin  ka mawng a za kawng tluan thun.

Karkhat chhung chu nitin ka school ban apiangin ka hmu ta ziaha, min lo chang ṭhin tih ka hre thiama. Ka hnungah an kal ziaha,ka hriat phak chiah si lohin fiamthu an thawha,an nui vak vak zela. Tleirawl ṭan tir, engkim mai harsa tih hun lai ang kha a ni a, school ban hun hi ka huphurh ngawih ngawih zela. Ka nu leh pa bula han sawi em tur chuan min tibuai ngai bawk si lo a. Hrehawm thei tak a ni.

Vanneihthlak deuhin kawng dang awmna ka hre ta hlauh maia, tlemin a kual deuh nangin pawi ka ti lo a,kawng hi kan veng middle school paltlang loin a kala, kan Biakin bulah a chhuaka,kan Biakin hi kan in aṭangin minute tam kal a ni lo. Ni hnih chu thlamuang takin ka haw ta a. Mahse,ni thumnaah erawh chuan Biakin bulah Debbie te ṭhianho an lo thu ṭhap maia. Biakin bul hi dawr awm tamna lai anih avangin engtin min tih ka ring lo a. Mahse, ka lungphu erawh a rang hle tho.

An ṭhutna lai ka kalpel a, ka kalpel fel chiah chu min rawn zui nghala, ka hnung maiah an kala, "Thingtlang aṭanga lo awm, inla engemaw deuh,dawih deuh si hi hmanah kan vengah an lo awm tawha, a sam angil sia,amah lah chu a thau bawk si" Debbie'in a ti a, "I sawi chu ka hre mai, kan ṭhianho min lo ei lo vel tawpa. Ka vel chak lutuk,Debs,ka vel mai dawn mi?" Pakhatin a ti a. "Hun remchangah kan vel ang.Chawlhni lah khan amah vangin U Puii khan min haua, sahdah ka hmuam ru angin min lo sawi a,Sahdah thin thin nen, amah zawk kha sahdah a ang" Debbie-in a ti a. An nui vak vaka, Midang daih angin sawi mah se keimah min sawina a ni tih ka hre vek tho.

An sawi hre lo ang hmakin ka kala, ngeiawm tak taka an tawngkam leh min velh an chak zia an sawi te chu hre lo ang maiin ka kal zela. Mahse ka hnungzang thla hi a zatin a za vek thei.

Kan inbul thleng min zuia, khawih em chu min khawih ngam ta lo aniang. Insual ta ila a mal te te chuan ka hneh vek ang ka ring. Mahse, min sual rawn ka hlau ber.

Zan mut naah duhthu ka sama, an Boss ber Debbie chu engtin emaw tak awm se tiin ka ngaihtuaha, amah a awm loh chuan a hote chu engmah an ni lo anga, ka tan hlauh tur a awm lo animai. Ka mumang thlengin ka hmu zui a, ka mumangah chuan kan lo insuala, Pu Zama te insak mek, Septic tank khurah ka lo nam thlaa, kai chhuak tura min ti tawk tawk chu kaichhuak duh loin ka lo kalsan daih.

Zing hma tawkah ka nuin min rawn kai tho a, kan exam hun tur karleh mai anih tawh avangin lehkha ka zir nasa zual tawha. Lehkhathiamthei tak ka nih bakah ka zir peih ve viaua. Ka u pawh hi a thiamthei pangngai a, mahse ka nau tan erawh chuan tun atangin lehkhazir chu tahna animai.

Kan veng tlangau in thil a puang meka, hetianga fiah lo ruaia kan hriat hi chuan kan awmna lam veng hriat turin ala puang lo tih na a ni a. Mahse,ka nuin  engahmah hmain "Bengchheng su, thil pawimawh puan veleh bengchheng vak zel mai" Ka nuin vin zetin min rawn ti a, ka u nen scale inchuha kan inhau lai kan tawp nghal hmaka, mahse ka u in min rawn tlawh hrama, ka tlawh let tur rang mangkhengin a tlanchhe nghal daih. Thinrim deuhin Toilet lam ka pan ve bawk.

Toilet atangin ka chhuak chu ka nuin, " Malsawm, Tu nge Debbie Lalrindiki? Pu Biaka fanu khu a ni em? " A lo ti nghal a. Debbie hming ka hriat rualin ka lungphu a rang nghal dut dut mai.

"A ni em? Eng nge khatia mi en vung vung ringawt? Min chhang ta che" a ti bak hluk a, "Aw, ni ang. Debbie dang ka hre lo e a" ka ti a. Engvanga min zawt nge tih ka ngaihtuah laiin Tlangau chuan kan veng lam hriat theih turin a rawn puang ve nghal chiaha. Ka u nen mak tiin kan inmelh hel hawl mai.

"Debbie Lalrindiki, Pu Lalbiaktluanga fanu, kum 14 chu tukin khan Accident vangin a borala, vawiin chawhnu Dar khatah vui tur a ni ang" a rawn ti a. Mak ka ti ngang mai.

"Engtia Accident nge niang le? A pa Bike kha a khalh thin a, chu chu aniang a" Ka u in a ti a. Kan inhnuai luahtu Nu Mawii a lo lut ve chiaha, "Kan mitthi kha in lo hria maw?" a rawn ti lut nghala. Ka nuin kan lo sawi mek dan sawiin engtia accident nge niang a lo ti nghal vara.

"Nizan khan a thiannu te inah lehkha an zir a, Sangtluanga te  inah a ni nghe nghe awm e. Zan rei tawh lamah an haw a,  mahse in a thleng lo anih hmel a, a nu leh pa hian zingah a awm lo tih an hre chauha, a thiannu te inah a riak nghal aniang an tia,zawt nghal turin Sangtluanga te lahin phone an nei si lo a, tukin a Pu Zama zingkar hnathawk turin a zuk hmu a, an insak mek ami tur septic tank khurah a lo tla hlum reng antia" a ti chu mak ti lutukin ka ang phuau mai.

Ka nu leh Nu Mawiin a chetsual dan a an rin an sawi zui mawlh mawlh a. Ngawirengin lehkhazir awm takin ka awm a. Mahse, ka mumang kha ka ngaihtuah a, ka tirilah min mana, ka khur ka khur maia.  Tleirawl chaw duh hun lai tak ka ni a, thau pawh ka thau ve a, chutichungin chaw pawh tlemte bak ka ei thei lo.

Thla tamtak ka mumang vangin ka buaia, School ban ka huphurhna thin erawh an hotu nu Debbie a awm tak loah chuan an inkawm khawm ta vak lo a. Tumah min chang an awm ngai tawh lo a, thawven khat chuan ka thawveng taa. Mahse, Debbie accident dan tuman an hre lo a, an chhui chhuak lo chungin ka tih niin ka hre tlata, chu chuan ka nun a tibuaia, lehkhazir kawngah thleng ka tlahniam vek.

Final exam erawh tha takin ka exam thei a, Debbie boral atangin thla a liam tam ta bawka, naupang tihtakah ka theihnghilh ve ta tial tial a ni ber. High school ka kal a, High schoolah pawh nunphung pangngai ka zawh chho ta zela, hmeichhe harhvang, lehkhathiam leh nun thawveng hah lawi si ka ni a. Schoolah pawh ka lar ta laih renga. Mahse, Higher ka kal atangin ka nun a inthlak danglam leh ta tial tial a, hei hi a chhan pakhat chu ka mumang vang a ni a, Debbie ka hmu thin a, min lo um vak vaka, ka that niin a insawi thin bawka. Hun rei tak ka lo ngaihtuah tawh ngai loh kha ka ngaihtuah ta vak vak zela, ka harhvang loin ka inkiltawih a, mi zinga awm aiin inngaihtuah vak vak a, suangtuahna rama chen a, ka khawvel siamchawpa awm nuam ka ti a. Incheina ka uar lo a, ka thiam lo em em bawka. Chutihrualin keima tawkah ka nghal dan erawh a la ngai reng.

Ka room kawngkhar rawn ben pahin ka nuin min rawn ko a, ka lo inngaihtuah nasa bawk si nen ka phu zuk mai.

 
"Mali, Malsawmhlu, I harh tawh em? Rawn tho teh, Ration lak angai ania. In line angai dawn a, hmanhmawh angai " A rawn ti nghal a. Kan inah hian hman atang tawhin Ration hi keimah bakin lak loh tur tiin thu an pass aniang, ka lak loh chuan an inti thinrim a, an inhauh phah chiam zel.

Thingpui ka in a, ka in lai mekin ka nuin hmanhmawh turin min lo tur seka, ka pain a ning deuh aniang " A va mak tet tet e aw. Thingpui ala in mek kha, chung chung zela" a lo ti a.

"Chung chung lo, a chhun che a, tur fe loh chuan a hmanhmawh thei lo. Class kal a duh leh anga, i lo tan ve hman ziah mai, a buaithlak" a ti neka. Ka pa a ngawi ta hle hle a, keipawh thingpui inzo loin ka paiha, Ration card leh buhfai dahna tur ka laa, ka chhuak ta daih.

In line an lo tam em em maia, la lo a haw leh ngawt dawn chuan dikin ka hre lo va, kal leh tho ka ngai anga, tlaiah class banah ti dawn ila ka hman ka ring si lo. Week lai anih vang ngawtin a haw hma theih chuang lo va. Ka nu lah la tura beisei chi a ni lo. A buai zia sawiin phek tam fe faih zan a ang leh anga. Buaina mai mai.

Dar 9 rik dawnah ka la thei ta hrama, in ka thlen veleh chaw ka ei nghal sawk sawk a, hmanhmawh rilruk nak alaiin ka nu lahin ka thawh hma loh thu leh min kaihthawh hnuah pawh ka hmanhmawh chuan loh zia a lo sawi ve seka. Ka period tur mood nen a inmil ta bau lo.

"Ka rawn la vek tawha, eng nge sawi teuh ngaia? Ninawm lutuk, mi hi inchhiahhlawh chei a. In fa pawh hi ka ang ve lo" ka ti nghat. Ka chawei lai pawh ei zo loin ka tho ta daiha, ka ei bang zawng vawkchawah ka va chhung a.

"Tuman kan chhiahhlawh chei lo che. I rilru dik lo anih kha, I tih theih tawk bak kan tih tir lo che. Titau reng reng suh" Ka nuin min rawn ti a.

"Ka titau bawk lo" Ka ti hmuk. Ka chaweina thleng chiah ka sil a, a dang an dah chu sil ka tum lo reng reng.

"I heti tlata, I rilru hi a dik lo, I ni te i chhun a, I kawi ngil ngel lutuk. Thil titura ka tih che hian thinrim nan i hmang ziah hrim hrim hi a dik lo. Mahni thu thu a awm tum mai, I duh leh thawhchhuah i neih hunah i thuin i awm dawn nia" Min ti leh neka. Min hauh deuh apianga ka ni te ka chhun vang a ti ziah hi ka pa hian engtin nge maw a ngaihthlak liam theih thin ni?

"Min chawm tam lo em mai" Ka room pan pahin ka ti a. "Eng maw i sawi a? " a rawn ti vin thak...