Pindan -2

 

Chapter - 2

"College ka kaltirh atangin pocket money pawh min pe tawh lo. Ka intum vek" Ka ti bak leh hlaka, Roomah ka lut zui nghala. Ka sual zia sawia thinrim taka a ang vak vak chu ka hre pha vek nangin ka hre lo der a. Engvanga min hau vak vak zel nge anih pawh ka hre lo. Ka u angin ka hmeltha ve lo a, ka mize danglam deuh bawk nen hian min en hrang ni berin ka hria.

Scooty chahbi ka zawnga, ka hmu mai lo a. Ka pa hnenah chahbi awmna a hriat leh hriat loh ka zawta, "vawiin chu i u khan a keng anih kha" a ti a. "Engtin nge a ken a? A khalh thiam pawh ni bawk si lo" Ka ti a. "A thianpain a khalh dawn aniang chu. A thuhrimin i ta bik pawh a ni hleinem"  ka nuin min lo ti a. Min tihdan kher chu ka thin a khei ta zak mai. Ka nuam lo anih pawhin  "Nang bak khalh thiam an awm loh hi, I nau lah khawih zawngchhang lo se kan duh si, inkhalh chhuak hram mai rawh" a ti duai duai ziaha. "I ta bik a ni lo" Min han ti leh lawi si chu ka rilru a let nghal vang vang.

Ngawi rengin ka chhuaka, Kan in atangin Taxi stand hi a hla lem lo a. Chulam chu ka pan chho a, Sawmi ka call paha, "Ka hman tep" a rawn ti lang langa, "Taxi stand-ah ka lo nghak ang che. Vawiin chu Scooty ka keng dawn lo" ka ti a. "Aw le, ka lo kal nghal animai. Ka rei lovang" a ti a.

Taxi stand a thutchawlhna an siamah ka lo nghaka, ka thinur lutuk pawh tlem chuan a zia tawha. Sawmi bulah hian thil ka hrilh fo a, ka nu in min hau nasa thei lutuk pawh hi a bul hi ka vuina ber a ni a. Thian dang kawm ve tho mah ila midang chu ka hrilh ngai lo. Sawmi hi chu kan inah a lo kal tam em em a, ka nu in min hauh  nasat thin zia hi a hai bik lo va. Ka u lah a ei lo em em bawk.

College kan thlen veleh kan thian dangte hoin " Vawiin chu present zuai ila, Hlimen Parkah kal daih ang u" an lo ti a. "Vawiin chu Scooty ka nei lo a" ka ti a. "A ho lutuk, Lalthlamuana'n Motor a keng dawn alawm" Sangkawki'n a lo ti vata. Lalthlamuana hi kan  college piah lawka awm anni a. An in hi kan chawlhkhawmna ber a ni bawk.

Roll call zawh hnu lawkah Hlimen Parkah kan kal ta daiha, ka nu vanga ka lawm lo em em pawh kha thiante bula awm takah chuan ka hre chang leh tawh lo.

Dar 6 dawnah inah ka thleng ta chauha, mak takin ka nuin min hau miah lo a, mahse min hauh loh chhan ka hre ta thuai tho. Ka u pawh a lo la haw bik reng reng lo a lo ni a. Kan bang tlai ve hrim hrimah a lo ngai chu niin. Engpawhnise, a lawmawm reng reng mai.

Ka haw hnu feah a lo haw a, a la berh nuan zuia. "Nu, kan tlu a. Kan thianpa tluin min rawn su tlu tela, Scooty side glass lehlam a bung a. A rang deuh bawka" a rawn ti nghala.

"A va han mak thin, I keng ve dek deka, I nauin a uluk tehreng nen" Ka pa zawkin a lo ti deuh hluka.

"A ho mai mai, Scooty te chu a lei leh theih, amah zawk hi a na em tih pawh zawt lo a khatia lo tih tur a ni em mawni le? " Ka nuin a ti hmuka. Tun tum chu a ngaihdan a dik ka ti ve tlat. Mahse, keimah zawk ni ta ila ka pa sawi ang chiah kha a sawi tho chu ka ring.

Zanah Rosanga a lo leng a, kan inah a lo kal ngun tawh bawka ka chhungte pawh hian inleng uluk deuha lo kawm ngai angah an dah tawh lem lo a,ka pa phei hi chuan a ngaina em em a, fapa ang mai hian a en a, thil pawimawh deuhah pawh a thurawn lak chang a nei a, mamawh a neih pawhin a tir fo a, Rosanga pawh hi a phun nawi ngai lo. A hna min pek thar tur kan sawi dun a, kan sawi lai laiin ka nu in ka u accident thu a lo hrilh ve sek a, a khup pilh nin nian bak engmah na dang nei mang si lo chu a na thei ang ber turin a treat a, ka lo zak lek lek.

"Naktukah i hman chuan Bank min lo kalsak la, keimah hi ka zin dawn sia. Kan naute an awm tho nangin ka personal thil ania, buaipui la. I peih em? " Min ti a. "Peih tho e, mahse Scooty ka nei lo a. Taxi fair min pe la" ka ti a. "Khawnge in Scooty? " a ti hu. "Midangin an hmang ve duh thin a" ka ti a. Ka nu rawn meng raw chu ka hmu ru renga, ka tilui chak ve hrim hrim.

"Rs, I nau-i hi nang han hau teh, a upa tual tuala, a rilru a te tial tial maia, tukin pawh a che muang lutuk ka haua, a titau bur a, thinrim hian min chhang let vak  zel maia, kha tunah pawh scooty ka khalh tawh dawn lo a tih kha, vawiinah a u in a keng a. A lawm lo ringawt zel mai" Ka nuin a rawn ti a. A hmuh loh tur in a tawngdan ka zira, Rosanga nuihza lutuk insum hmel chu rum deuh hian ka melh vak bawk.

"In duat sual aniang chu. Hei, tunah chuan a tlangval ve tawha, keimah hian ka vaw pawp pawp mai dawn mi? " Nui put put chungin a ti a, ka ner khum vak.

"Tlangval ka ni lo ve" ka ti zui hlak. "Eh, ni dawn tak.. Nula nih i tum ve tawh tak alawm" Nghal zetin min ti leh a, Ka pa a lo nui huk huk a, Rosanga bulah hi chuan an thinrim rei thei thin lo.

"Ka scooty pakhat saw ka hmang ngai mang lo a, la phei rawh. I duh chen chen kawl la, Nanui a awm bawk si lo a. Sawtia dah reng chu a chhe mai mai. Kei lahin ka khalh peih si lo a. Zingah lo kal la, ka chhuah hmain rawn la rawh, Nge tunah kan va la ang? " a ti ta mai. " Ngai lo. Chutia mi lirthei lo kawl ngawt te chu a" ka ti a. "Ve lutuk che hian, kawl mai mai rawh. Keiin engatanmah ka hmang pawh a ni lo a. Mahlutei pawh hian khalh zir ve se a tha ang chu" a ti zui duaha.
"Nia, zir ve se a tha ang" Ka nuin a ti a, ka u lah chuan " Ka peih lo e a. Vawiinah kan tlu leh bawk si,ka hlau" a lo ti no hlawi.

"Two wheeler te chu khalh din alawm, amahin a ding thei hleinem. Khalhtu tel lo chuan a tlu zela, chuvangin khalh zir rawh. Chuti lo chu in tlangval hi ka ruksak che u anga, in hawi in hawi mai ang" nui chungin a ti leh a. Ngei em em hian ka melh ruma, engahmah angai lo.

"Tunah va la ila, zing i tho tlai thin sia, tuna kal a remchang ang. Inthlahrung vel lo mai rawh" Min ti leh a. Ka tana a fel em avang leh min ngaihtuah nasat thin zia hi ka thian hnaite hian an hre vek a, "I sugar daddy" Min tihfiam sak thin ka hre chhuak zawka. Ka nui chhuak nghala, angaihna hre lo deuh hian min rawn en a. "Eng nge? ' a ti a, a bengngawng nuih ve ringawt.

Ka hnial deuh tlat nangin kawl tur in min ti tlata, a zan a zanin kan va la nghala. A nu leh pa an lo awm a, a nu lah chuan " Kawl daih rawh, an dah reng ringawta. Motor dahna a indaih lo" a lo ti awlsam ve then.

Mu chungin Sawmi nen Msg-in kan inbiaa, Rosanga scooty ka kawl dawn tih ka hrilh a,ka rin ang ngeiin " I sugar Daddy hi chuan a duat ve ngawt mai che " a rawn ti a, emoji  a rawn dah nui per chuai bawk.
"Tak takin a that hlauh chu, tikha chuan in scooty i khalh angai tawh dawn lo animaia. I nuin a tirh che pawn kal duh tawh reng reng suh" a rawn ti leha. Ka nui sak ringawt.

Hun a kal a, class pawh pangngaiin kan kal ve leh tawha. Rosanga scooty ka la kawl ta zela. An mamawh leh mamawh loh ka zawh lah hian an mamawh loh thu bak a sawi ngai lo. Kan scooty ka khawih nawn leh ta reng reng lo a, ka lungawi lo satliah mai mai lo tih ka nu pawhin a hre thiam ve ta aniang, tul mang lo va min hauh sek a chin pawh a sim ve ta deuha. Ka u in scooty khalh a zir ve a, inbul hnai te te chu a khalh chhuak ve thei tawha. In ti no lutuk lo phei se chuan a thiam nal viau tawhin ka ring. Mama pawh ka rin ang ngeiin a faila, ka nuin Hostelah a dah lut chiang khawp mai.

Ka mutui lai ka room kawngkhar beng ri dawt dawtah ka harha, ka u in min lo ko vak vak chu niin.. Ka tho nghal vata, ka va hawng chu a lo tap pur mai. "Eng nge a? ' ka ti a. Hmanhmawh taka ka nu te room lama a tlan chu ka um zui nghala. Ka nu hian ka pa chhuata mu chu a lo buaipui meka, ka hamhaih ngang mai.

" Ti nge a? " Zawh bik pawh nei lo in ka ti a. "I pa hi a nuam lo anih hi, inhnuai te zuk ko la, Mahlua kha lo chho nghal rawhse, motor a khalh angai ang" Chiai deuh tih hriat tak hian ka nuin min lo ti a. Kal mai lo a ka la ding chu min rawn vin vaka, rang lutukin ka tlanchhuak nghal a. Kan inhnuai luahtu te ka zuk kai tho a. An nupain an rawn tlanchho vata,  hmanhmawh takin Pa Mahlua'n ka pa a puaa, Motor chabi kengin ka nuin a zui thla ve nghala. Kan inhnuai nu hnenah min lo awmpui tur in a ti nghal mawlh mawlh bawk.

An kal hnuah ka thu hnawka, engkim mai kha mumang a ang ka ti a, ka thaw a hah up up a, ka awm chhung a na em em bawk. Nu Mawii'n min kuaha, "hlauthawng reng reng suh, a tha leh mai ang" a ti mial miala. Ka awm chhung na vung vung avangin ka awm ka chum ka chuma, ka beng a kiu mum mum bawk.

An kal atanga rei vak loah Nu Mawii an rawn call a, che lo in ka melh renga. A hmelah chuan engmah a langchhuak lo. Phone a dah hnuah ka bulah a rawn kala, "Tu nge a? ' ka lo ti vata. " I pa Mahlua anih kha.. I pa chu a chawl hahdam ta anih chu, amak teh thut mang e tiraw, pa innei  ta lo chu ania" a ti a. Min rawn kuaha, "Tap miah lovang, ngah nge chutia a kalsan ngawt che u ni? " a ti a, mahse amah zawk a tap ta si...

Mi an lo pungkhawm a, kan in thiah theih lai lai an thiat rum ruma, engmah tih nachang hre loin ka thut ngaiin ka thu a, ka melh ngai ka melh ngawt ngawta, ka tap lo hrim hrim.

Engkim mai a thleng vut vut a, ka pa boral dan teh thut chuan min ti hamhaih em em a. Engtia tuar tur nge pawh ka la hre thiam thei lo. Sawmi ka bulah a awm chawta, min buaipui tawpa. Ka nu leh ka u tap vak vak chu ka awt em em a, ka tap thei miah lo chuan minti mangang a, ka luak a chhuak deuh renga, ka thaw a haha, ka beng a kiu reng mai bawka. Hrehawm tak a ni.

"U Rsa hi i be dawn em? Angaihtuah che sia, vawiinah pawh min lo  call ngun tawh lutuk" Sawmi'n a ti a. A phone a lek va va a.

"Ka be peih rih lo e.. Aaa, khawi ka lo bia ang" ka ti leh lawia, phone min rawn pek chu ka laa, "Aw, Sir... " awki pangngai takin ka ti a. Kan inhriatna kha kan zirtirtu anih vang a ni a. Thian ang leh unau ang maiin in en zui tawh mah ila "Sir" Tiin ka la ko ta zela, a duh lo viau thin nangin ka ti laklawh lutuk tawha, ka thlak ngawt thiam tawh lo a. Uang thuang deuh deuh hian ka ko a, amah pawh hian a sawisel duh tawh lem lo.

"No-i, eng nge i an? " A rawn ti a, min ngaihtuah zia a awah pawh ka hre theia. "Ka tha lutuk, ka ngaihtuahawm loh" ka ti ve vat. "Vawiinah lo haw nghal ka tuma, mahse ruang ka rawn nang hman dawn lo hmel tho sia, ka hna hi naktukah ka zo tawh dawn tho a. Ka lo haw ta lo a. Engpawhnise, huaisen deuh khan lo awm rawh aw. Nangmah ber kha i chak viau loh chuan i u leh i nau kha nangmah anga huaisen anni ve si lo va, I nu tan a hrehawm dawn lutuk ania" a rawn ti leh a. "Engmah pawh ka la ngaihtuah thiam lo" Ka ti ro halh ringawt.

 
"Um, ka hre thiam che alawm. Lo tap miah lo la, ka lo haw hunah ka bulah i tap vak vak dawn nia" a rawn ti leh a. "Nia, awm ve la ka ti " ka ti ta thlawt. "Keipawhin ka awm lo hi hrehawm ka ti, I pa tan fapa tha lo deuh ka ni ta anih hi" a tih laiin miin an rawn ko ti ka hriaa," Mate, ka dah phawt ang aw. Ka lo be leh vat dawn che nia" a ti nghal a. "Um,anih phawt le"ka ti sap.

Ka pa boral na chuan na takin kan chhungkua a nghawnga, pa ber hmun ruak zau tur zia hi lo ngaihtuah ve tawh thin mah ila ataka han tawn meuh chuan rapthlak tak a ni. Kan kawrawng vawng vawnga, hlutna kan nei ta lo emaw tihmai tur a ni a. Kei ngat phei chu ka pa khan a thiam ang tawka a duat bik ka ni ve a. Ka tap thei bawk si loh hian min hnawh a, ka nung lo niin ka hre thin hial. Sawmi leh Rosanga an tangkai tawpkhawka, ka pa boral atanga ni 2 liam hnuah Rosanga a lo haw a, an in lama a indah fel zuai hnuah a rawn kal nghala. Ka nu leh ka u in an lo tahkhum chiam a. Kei erawh chuan felfai takin ka lo dawngsawng thlap thei. Min ngaihtuah em em a, kan chhungte tak tak ai pawhin min thlamuan zawk hialin ka hria.

Mama hostel luh a hun leh tawha, ka nu in thlah a tuma, mahse a inti tlangval ve tawh nen a duh lo.
"I U Tea pawh chu a lo va thleng har ve mawle. Kan tlai mai dawn asin, motor hi tu emaw ber chuan khalh zir kan ngai dawn anih hi. Taxi tih zel ngai tur chu a buaithlak dawn tlat" Ka nuin a ti a, a sawi zo chiah tihin Rosanga a rawn lut ve chiaha.

"Ee, I lo kal hlauh chu a va tihzia em. Mama hi Hostel a lut leh tawh dawna, kan Taxi hman tur hi ka rin aiin a muanga, I han thlah lawk mai dawn mi? " a lo ti nghal a. "Teh ngawt a. A lo kal zuai chauh pawh a ni thei a. Taxi i ko sa veka, a zia lo em maia" Ka ti hlaka.

"A hman loh chuan ka hman lo a ti mai ang chu mawle, mihrang pawh a ni lo a. Ka lo ti buai ngam ve animai" Ka nuin a ti liam leh mai.

"Hman e... Mahse Motor ka rawn keng lo asin, Scooter ka rawn keng a" Rosanga'n a ti a.

"Awww, kan motor a awm alawm. Hei ka lo sawi meka, a pa a awm tawh si lo va. Mali tal hian khalh zir se a tha ang ka lo tih hi. Mali, I u Tea kha be teh, angai leh lo ti la" a ti zui leh bawrh bawrh.

 
"Ka duh lo e a, nangman be mai rawh" ka ti vata. "Eng chu nge maw i han duh loh thin ni? Be mai mai rawh" Min ti a, Mama roomah min luhsan daih zui.

Kan taxi biak fel sa hi kan kawmchhak pa a ni a. Kan innel pangngai a, mahse tunah hi chuan ka be hreh ngang maia. Ka biak loh chuan a dik thei bawk si lo. Hreh angreng takin ka call a, a pick thei lo a. Ka call leh tur chiah min rawn call backa.. "In hman tawh mi? Hei, Kulikawnah ka motor ke a chhiaa. Ka rei hmel riau maia. Midang ka lo biaksak mai dawn che u mi? A pawi em? " a rawn ti ta hlauh mai. Angaih loh thu leh kan Motor min khalhsak tu tur an awm thu hrilh tum ka ni tih ka hrilh nghala. Kei nge amah zawk lawm nasa ang ka hre lo hial.

"Nono,lo kal ve la. Kan let leh lamah Azama te inah kal zuai ang" a ti a. Chhunah ka pa thiante an lo lenga, thingpui lum velin ka buaia, eirawngbawl a hun zui leh bawk si nen ka la inbual lo a. Ka mawm deuh hmuar bawk si nen ka chhuak chak lem lo.

"Ka bal em mai, ka peih lo. Ka nu nen kal mai ru" ka ti a. "I bal leh bal lo kha tu nge maw hria ang le? Lo kal mai teh a. Kal kual dawn lo ila chuan i nu nena kal pawh a pawi lo va. Mahse,ka kal kual dawn sia. A ning ang" a ti a."Dik chiah, han kal rawh. Bazarah Bepui a awm chuan lo lei ang che" Ka nuin min lo ti ve chhen bawk.

"Rs, chaw ei turin ka ring che ania. I nu te hrilh rawh aw" A tizui leh a. Chaw hi a lo ei fo a, kan chhiattawh velah phei hi chuan tlai lamah a ei deuh ziah.

Mama te Hostel lam pana kan kal kawngah Rosanga'n a fiam a fiama. School a lo thawk thin, Zirtirtu hlui a ni bawka, han tih vel dan a thiam em em maia, kan bula a sawi duh loh, a bialnu chanchin te a zawtchhuak vek thei. Mama hi bawl nuam angreng tak, a buang mai a ni a. Thiante thu thu a awm chi a ni a. Mipa neihchhun leh piangtlai em em a ni bawk nen, kan theih ang tawk pawhin duat pawh kan duat ve viau.

Rosanga thianpa, Azama teinah kan kal kuala. Azama hi tlangval senior ve tho niin Rosanga ai chuan a nau hret maitheia. Rosanga thianpa ber anih avangin hriat pawh kan inhre tha ve viaua. Amah hi Psychiatrist a ni a, lar lutuk erawh a ni lo.

"I nu hi a muhil thei thin em? " Kan haw kawngah a ti a. 'Ka hre lo, muhil chu a tia" ka ti a. "Muttui viau chu a har ve ang. Nang i muhil tha em? Class lah hi i chawl rei tawh ka tia" a tihzawm a. Ka pa boral atangin karkhat a liam tawha, inleng kan nei neuh neuh reng bawk nen class ka la kal lova. Ka u erawh chu vawiin atangin a kal tan thung.

"Karthar atangin ka tan ang. Tunkar chho chu kan la buai ve deuh em a. Mahse , kar leh pawh hi ka nu kalkualpui ka ngai leh mai thei" ka ti a.

"Ka zin loh chuan ka kalpui hman ang ka ring. Mahse, ka kalpui a duh kher angem ka hre lo va" a ti a. "Duh awm e. Fapa upa zawk kha i ni ve a" Nui chungin ka ti a. "Nia, ka Naute ho hi in laktlak mang si lova" a ti a, a nui huk huk mai.

Ka pa boral atangin thla thum a liam ve tawha. Kan khua a la har dawn chauh nimaiin ka hria. Ka nu hian chawei dawhkan kil a peih lo va. Chaw te hi kan duh hun hunah kan ei vel mai maia. Ka pa boral atang khan hunbi kan nei ta meuh lo. Ka nu lah a hma ang bawkin ka ni te lakah a vui deuh renga. Ka pa chhungte lakah lawmna a hmu lo a ni ber. Ka pa boral atang khan kan kawmthlang a hmeithai pakhat nen an inkawmngeih thar a. Pathian thu an sawi renga, achang leh a thiannu te huanah an feha, an inzui nasa em em a. Rawngbawltu pakhat,pawlchhuak rawngkai thusawi an tuipui em em a, ka pa dam laia kohhran hmeichhe rawngbawlna ngaipawimawh lutuk thin khan sawisel te a ching chho a, inkhawm erawh ala peih viau a, pawlchhuak ang rawng pawhin a awm vak lo. Mahse, tunhnaiah hian Kohhran huang pela rawngbawlna lam a awn tial tialin ka hria a. Khak pawh kan inkhak ta zauh zauh.

"Zanin chu i nu Zuali te inah ka kal dawn ania. Home crusade an nei dawna. Ka zuk chhim ve teh ang" thingpui in pahin a ti a.

"Eng home crusade maw? " Ka u in a ti a. "Pu Vanlala a lo kal dawn a. Ani hi chu Pathian ring takzet tu a ni bawka. Ka ngaisang ania" a ti zui duaha. Pu Vanlala a tih hi Kohhran behchhan nei lo, pawlchhuak lam awn tlat leh kohhran bei bei mai a ni a. Ka ngaisang lo ngang mai.

"A ho e. Pawlchhuak lehnghal" ka ti nghauha. "Eng nge a hohna? Pawlchhuak tih mai mai, kohhran tihte pawh hi mihring din mai mai ve tho alawm. Pathian thu tak a awm lo" a ti ta nek mai.

"Em em a che" ka ti leh a.

 
"Eng nge em em na? Ka sawi dik alawm. Kohhran chhungah hian thutak aiin sumin thu a nei zawk. Kan kohhran upa te hi ka ngaisang lo teh ania. Mihring hre hru hlawm si" a ti leh chiama. Ka ngaihdan a ni bau lo. "Vak vaka" ka tawng hmain ka u in a lo ti a.

"A ho em maia, sawisual ka nei hleinem. Ngaihtuah ta che u. Pu Thangnema te pawh nikum maia lo awm annia. A nupui kohhran hmeichhe OB atan an thlang nghal ngawta, amah lah engkimah an hmanga. Sum an nei a, thawhlawm an thawh hnem tih hriat reng reng. Raldanga te an en dan nen a inhlat em maia" a ti leh hmawk hmawka.

"Raldanga te engtin nge maw en se i tih ni? Ruaithehna apiangah an kala, Pa pangngai hmel fu si tanpui ngai reng. Pu Thangnema te nen tehkhin chi a ni lo lutuk" ka ti ve hlak hlak.

"Tehkhin chi lohna a awm lo. Kohhran hi in Pathiana, nangni unau pawh hi in dang chuang lo. Meidilah in la tla dial tur ania" a ti leh a.

"Awi, em em a.. Ka pa pawh Tual Upa a ni a, kohhran upa te i sawi dan kha miin an hre reu reu ange" thinrim ru tungin ka ti leha.

"Eee, hre rawhse. I pa pawh kei vanga mifel anga lang anih kha. Kei ni lo midang nei se khatiang a ni teuh lo. Piangthar lo rawngbawltu a nih kha" a ti leh siah siaha. Ka u nen kan in en a, sawi tur reng reng kan hre tawh lo. Ka nu hi a lo kalsual takzet ta tih kan hre chiang hle ringawt mai a ni....