Pindan -3

 Chapter -3

December thla kan chuangkaia, ka pa boral atanga thla a liam tam ang zelin kan chhungkaw boruak a nuam lo nasa zual zel a ni ber. A hma kha chuan ka nu hi midang inah Pathian thu sawiin a leng thina, tunah chuan kan in hi an awmkhawmna a ni ta mah zawka. A thiannu nen Ram an commission a, achang leh Speaker kan zui dawn tiin an zin thul. Mipa lamah chuan sawisep a kai hauh lo a, mahse kohhran a thlah tial tialna leh a Pathian thu lak dan dang ta vek chu thenawm te tan hai rual a ni tawh lo a.Kan inchhungah nuih ho dar darna tur a awm ta meuh lova. Ka mizia a inthlak hret hret a, kan inchhung boruak rit lutukin min ti mangang em em a. Ka nu vangin ka inkhawm ve pawhin thiante zingah ka inthlahrung ta duk mai. Ka u erawh chuan a tir lamah khan dodal ve viau mah se hun a kala, ngaiah a nei zui leh mai. "Puitling ania. Tha a tih tlat chuan sawi sawi mah ila awmzia a nei lovang. Tihian nung mai mai rawhse" a ti awlsam et.

Ka u ngaihdan ang hian ngaih ve mai ka duh laiin ka thei tlat lo. Ka pa ka ngai em em thina, ka nu lah chuan a awmdan sawisel tu ber ka nih avangin a hma zawng aiin min mil lo zuala. Ka thil tihfel loh pakhat lek pawh hmu se min hau hrep hrep a, mihring lak tlak lo leh mihring tling mang loah min chhuah erh zel bawk.

Vawiin hi kumin atana kan class kal tawp ber ni a ni a. Kan thianho a chaw ei chhuah kan tum a. Class banah in a haw tawh loin kan chaweina hmun tur kan pan tlang nghala. A hmun kan thleng chu kan thahnem deuh bawk nen kan ri chel chul maia. Lalmama fiamthu thawh kan nuihpui vak vaka, tunhnaiah chuan ka nuih hnem ber ni a ni hial ang.

"Saw, u Rsa te.. " Sawmi'n a ti thut a, a kawhna lam ka va hawia. A bialnu nen an rawn inzui lut mek chu lo niin. Thla khat aia tam ka hmu tawh lo.

 
"Hey, kawk vu suh, I a lutuk" tih pahin a kut ka nemsawn saka. "Awi, a ho e. Ka kawhhmuh che alawm mawle" a ti duh lek.

An thutna tur an rawn pan phei chuan min rawn hmu a, "Ehe, No-i te chu. In Dine out dawn law? ' min rawn ti a. " Aw, vawiin kan class kal tawpni a ni tawha. Kan inthlah dawn anih hi" Ka lo ti ve var. Sawmi a be leha, a bialnu u Tracy nen kan inbe luam bawk.

Hlim takin kan ri chel chula, kan thahnem bawk  nen kan thawm a na angreng a, mahse customer dang tamtak an awm ve a. Chung ho tana hnawksak lutuk nih erawh kan duh bik lo va. A awmtawk kan hre ve viau.

 
Rinmawia'n "Malhlu, vawiin atangin Matthew-a i hmu tawh dawn si lo va, a thlalak ilo tahpui vel ange aw" Min ti a. An nui ham hama, Ngaihzawng nei ngai lem lo,star vela la buai mai mai ka ni a. Matthew-a ka star zia hi chu atir lamah ka zep ve tak nangin an hre ta vek tho. "Bangah a thlalak lian tawk a tara, a thosilen chungah pawh a daha, mut pahin a be thin alawm" Samu-an a lo ti ve a. Midangin an lawm ngang maia, a sawi chu anih duh hmel bawk si, hnial ngaihna hre loin keimah ber pawh ka nui ve tlawrh tlawrh mai.

In ka thleng chu ka nu leh a thiante an lo awm hunga, Pathian thu an lo sawi luai luaia. Tumah be loin Roomah ka lut tlanga, ka inthlaka. Chhuah leh pawh ka tum lo. Hmai pawh phih loin ka mu a, kan thianho groupah ka lut a, in an thlen thu an lo report sap sapa. Ka thleng tih ka sawi ve a, kan thlalak an rawn dah ho ka download a, status ka update nghala. Thianho group a lut tawh loin Sawmi nen naktuka kan bazar dan tur sawiin msg thoin kan inbe leh a. Kan inbiak laiin Rosanga'n min rawn call a, "I haw tawh em? " min rawn ti a. "Haw tawh e, in haw tawh zawk em?  Kan haw dawn khan in la awm em tih pawh ka lo en miah lo che u a" ka ti nghal a.

"Nuam i ti em atin nih kha. Tak takin in haw hma khan kan haw a, kan haw laiin Sawmi nen khan Toilet lam inpanin ka hria" a rawn ti a.

"Anih chu a.. Enge min lo call a? "ka ti leh a. " Kan inbe khat em a. Hmuh pawh kan inhmu khat bawka. Kan inhmuh khat vang nge ni ka hmu cher riau  mai che a. I dam tha em? " a rawn ti leh a.

"Dam e. Ka indiet ve alawm mawle a" ka ti a. A nui nghal kur kura, diktak chuan ka indiet hauh lo. Ka rilru ipik lutuk hian ka engtihmah a titui lova, chaw ka ei tlem em em a. Nilenga ei mumal loh ni te ka nei a. Ka mu tha lo thin bawka. Thau vak ngaihna a awm lo.

"I nu eng nge a an a? " a rawn ti leh a, "A tha" ka ti ringawt. "Ka rawn kal khat lutuk a, hun ka nei lo ve bawk nen, remchang a awm chuan naktukah rawn kal ka tum ang" a rawn ti leh a. "Lo kal rawh, chaw te rawn ei la" ka ti a. "Nia, pawi miah lo" a rawn ti ve mai. Kan chhungkaw boruak engkim a hre vek a, kan hlim lem lo tih pawh a hria, mahse vawikhatmah ka la sawipui ngai lo. Mipa ngang a ni a, u en tak takin en mah ila rilru hahna te han sawipui chiam chu thil nuam tak a ni lo va, hmeichhia chu ni se a zia mah zawk ang.

Zing ka tho chu inchhung a lo hnawk nuaia. Zanah khan ka nu te kha dar engzatah nge an  haw darh pawh ka hre lo. An tlaivar tep maiin ka hria. Sitting roomah an thingpui inna no a lo awm nuaia, Ashtray-ah meizial bung a khat thura, chhuatah meivap a awm thluah bawk. An awmkhawm apianga an chet fo dan a ni a. Pathian thuawih inti hle si hi fai vang awm tak, an fai chuang lo tlat hi amak ka tia. Ka nu phei chu Pathian thuawih tha a intih viau hma khan a che a fel daih zawk.

Thinrim tunin in ka tifai a, thingpui ka chhuanga, lehlamah chaw ka chhuang bawka. In ka tihfai lai mekin ka nu a rawn tho a, a rawn tum nghal vuau mai. A thiante awm lai hi chuan a ka pawh zen ila min seh lovang tihtur kha kan chhungkua chauha kan awm hi chuan Sakawlh a ni leh daih zel.

"I u va kaitho la, nangin venthlangah Bawng ek bag zuk phur rawh" Min ti a.

"Amah chuan zuk phur se la, eirawngbawl laklawh lai nen, a buaithlak" ka ti nghat.

"A bawl zawm ve mai ang chu, keipawn ka bawl zawm thei. Zuk phurhna lai tur kha nangman i hre dawna. Vawiin chu thlai ho khi leitha pek vek ka duh, naktukah zin ka tum si"a ti leh duaha. " Khawiah maw i zin dawn? " ka ti a.  "Kolasib lamah lungphunna hmang turin kan kal dawn " a ti tha ve mai. Kolasib lamah chhungte kan neih pawh ka hre lo.

"Kolasibah chhungte kan nei mi? " ka ti a. "Nei nang, Thlarau lama keima chhungte annia. I chhungte a ni ve lo" a ti khera. Ka ngei ngang mai.

 
"Anih tak chu a, chhun pawh ka chhung peih lo ve" ka ti ve hmak.

Aman ka u a va kaitho a, kei vengthlangah bawngek phur turin ka kala. A ro vek a ni a, phurh hrehawm a ni lo. In ka thleng a, ka rin ang ngeiin ka chawhmeh siam sa bak kha engmah an lo siam belh lo a. Ka u in thutthlenga mu chungin phone a lo hmang a. Ka nu ka hmu lo thung.

"Chawhmeh hi lo siambelh ve la, amak thei em mai. Tihchin bak engmah ilo ti lova. Bai pawh siam turin ka dahchhuak sa reng si" ka ti nghal hlak hlaka. A phone biak lai la sawnin min rawn en a.

 
"Ka nuin siam ngai lo a ti anih kha, nge maw i rawn phun nghal ngawt le?"thinrim takin a ti a.  " Engmah a awm loh hi, eng nge siam ngai lo a tih a? Bai ka siam anga, in ei hlek lovang" ka ti a. Titau sawk sawi chungin behlawi hnah ka thian zui nghala. Ka u in a bialpa bula ka phunchiar zia a sawi zui nek chu ka hre renga. Ka thinrim et et mai. A Pasal pawh la ni hlei lo, chhungkaw buaina zawng zawng hrilh nghal ziah hi ka ngei ve thlawt.

Eirawng ka bawl zawh veleh keimahin chaw ka ei a. An duh leh midang chuan an duh hunah ei ve mai rawhse. Ka chaweina ka tihfai laiin ka nu a rawn lut a, " Ka chhuak dawn ania" ka lo ti nghala.

 
"Khawiah maw? Thlai ho leitha min pekpui ang chu ka tia" ati a. "Sawmi nen kan bazar lawk dawn. Ka kawrlum phiar tur la lei te ka ngai" ka ti a. "Mahni thu thu hian thil lo tum ve ngawt zel mai. I nau hi naktukah hruaichhuah angai dawn ania. Ka awm dawn si lo va, lo han hruai ang che" a ti duah. Chhan pawh chhang loin ui chaw ka siam sana, kan ui hi ui var buk chi a ni a. Ka duat em em a, ka buaipui nasa bawka. Ka nu leh ka u hian an ngaithei der lo thunga. Hauh lah kan inhauh phah tam tawh.

Sawmi nen Bazarah kan teikuala, secondhand te kan thinga. La zawrhna dawrah kan kal leh a. Ka kawrlum tur ka lei a. Sawmi'n lukhum min phiartir tur a lei bawk.

In ka thlen veleh Jerry-a ka zawng nghala. A kawr tur secondhand ka thinsak chu hakchhin tir ka tuma. Ka hmu zo lo va. Inchunga ka nu hnathawh naah a awm anih ka ringa, ka han en a. Ka nu a lo awm lo va. Jerry-a pawh ka hmu chuang lo.

Inah ka chhuk thla leha, ka u inbual zo lo chhuak chiah chu "khawnge Jerry-a hi? " ka ti a. "Ka nu-in Mamatea a pe" a ti ta mai. "Enga? Engvangin nge a lo pek ve ngawt a? " ka ti vak mai.

 
"Kawmthlangte ar a sehsak leha. Mamatea te lo kal lai tak a nia. Mamatea khan ka lo kawl ang a tia, a hawntir anih kha" a ti awlsam leh mai. Kei erawh ka thinrim lutuk ka puakkeh lo chauh thung.

Scooty chahbi ka laa, chhuah ka tum lai takin ka nu leh a thiannu an rawn inzui lut a, thinrim takin ka melh khai mai.

 
"I lo haw tawh maw? I ui sual lutuk vangin vawiin chu ka buai pherh erh maia. Mi ka pe ta anih kha" Min rawn ti nghala. "Eng nge pek kher angaihna? " Ka ti a, ka thinrim lutuk chu ka tah te lam lam a chhuak mai.

"I Pa Sanga te ar a seh sak leh a, zahthlak pawh a zahthlak zozai tawh. Ui vang mai maia thenawmte nena intihthiam loh ka duh lo reng reng" a ti hmawk hmawka.

"Inah ka thlung renga, pawi a sawi ngai hleinem. Ngah nge i lo chhuah a? " ka ti ve thung.

"I va han chhe er awr e aw. Mi hlauhna reng reng nei lo mai che" Min han ti daih pek.

"Ka va la lehnghal dawn" ka ti a. Kawngka lam ka pan nghala. A ang zui bawrh bawrh chu ka ngaipawimawh duh lo.

Mamatea hi ka nu nau fapa a ni a. An in ka va thlen chuan amah a lo awm lo va. Veranda thlang lamah Jerry-a an lo thlunga. Putea fanu, Sangkawki nena kan inbe thawm chu a lo hre thei aniang, a bauh nghal vak vak mai.

 
"A rawn hawn kha mak ka ti reng a ni. I phal ka ring lo sia, ka ni lahin a lo pe mai bawk si" a ti a. "Nia, phal nang. Ka pa min leisak kha ania, ka ui lutuk. Mamatea chu lo hrilh mai rawh aw, ka hawn leh mai ang" ka ti a. "Um, hawn rawh, ka lo hrilh ang. Eee, I u saw a rai ami? Hmanni ka lo kal khan a dul kha ka en a. Thau satliah loin rai a ang ka tia" a ti leh a. "Ka hre lo e a. Ka chik ngai lo reng reng" ka ti liam mai. Ka rilru erawh chuan rai pawh ni se mak ka ti lo. Ka nu chungchang kan sawi leh luama, ka Putea hi Kohhran upa a ni a. Ka nu awmdan hi a ngaithei lo em em a. Mahse, sawisel vanga danglam thei a ni lo tih a hriaa. Ka nu pawh hi a tha en vel mai mai.

In ka va thleng chu Rosanga a lo awm a. Nizana lo len paha chawei tura ka sawm kha ka hrechhuak leh chiah. Ka u nen  chawei dawhkan kilin an lo titi duna,ka luh ruala an titi a tawp daih avang chuan ka hriat ve an duh lo thil an sawi anih ka ring a. Ani hi chu u en a kan en ngang hi a ni a. Ka u pawh hian a thuruk eng eng emaw hi chu a hrilhfo tih ka hria.

"I lo thlenna a rei tawh em? " ka ti nghala. Jerry-a thlun tumin a chain dahna lam ka pana. "Rei nang, ka thleng fel deuh chiah" a ti a. "Chaw chu i ei nghal dawn em? Nge i hman leh lo? " ka ti a. A ei dawn tih a sawia, dawhkana Polythene dum awm chu eng nge a chhunga awm ka en a. Pa leh arsa a lo ni a. "Hei ilo ken ami? " ka ti nghala. "Aw, I soup siam ka ei chaka. Khilai bazarah khan pa an lo zuar a, a remchang em a. Arsa nena siam turin ka rawn lei anih kha. Mahse, chicken powder ti tam lo la, ka pum achiang lo tunlai chu" a tihzawm zat.

 
"I pum chiang lo kha chu a chhan ka hria" ka ti nghala. "Zu ka in lo e aw. Ka in lo rei tawh" a ti ve vata. Ka nuih a za ngang mai.

Eirawng ka bawl zuia, ka nu inchung atangin a lo chhuk tawha, ui ka va lakleh vanga thinrim awm pawhin a awm lo. Rosanga nen an titi a, ka pa pawisa lak tur chunchang an sawia. Rosanga hian Bank lamah hmelhriat a nei tha em em a. Sawrkar hnathawk hmelhriat tha a ngah bawka, ka pa hna chungchang leh pension velah pawh kan tangkaipui ngang mai.

Rosanga'n chaw a ei ve dawna, chaw kan ei rual ka ring a.Mahse, ka nuin "ka ei peih rih lo, lo ei ru mai ru"a ti leh tlat pek.

Ka u nen kan pathumin chaw kan ei a,kan eikham fel deuh chiah tihin ka nuin chhung inkhawm neih a rawt leh mauh pek. Nidangah pawh hian a duh hun hunah chhung inkhawmna neih a rawta, chawei dawna hmang mai loin mut dawnah te kan hmang thul, hnathawk se chawei hmaa han inbual fel mai a awm lova. TV a en a, a en peih loh tawpah chawei min siamtir a, achang leh zan reiah a insu vut vut a. Han sawisel hlek ila misual ka ni ngawih ngawih zel bawk si.

Rosanga haw tur ka thlaha, kan kawtah kan ding duna, " I nawm loh hmel riau ka tia, rilru hahna i nei em? " min ti deuh thut a. "Aih" ka ti rangvat.

 
"I nu hi a awmdan a thlak nasa deuh a, a lusunna hian a tibuai ve viau niin ka hriaa. I dawh deuh zel angai dawn ania"  min ti a. Chhang loin ka ner nak ringawt.

"I puitling ka ti che a, fak pawh ka fak viau che ania. I u aiin i puitling zawk mahin ka hria a. Chuvang ania dawh hram hram rawh ka tih che. Harsatna i neih chuan min lo hrilh zel la, ka dam phawt chuan min mamawhnaah chuan ka awm zel dawn ania"a ti leh charh charha.

"Tehreng mai. Nupui i neih hnuah pawh kan tibuai zel tho chein ka ring" Nui chungin ka ti a.

"Ee, a pawi reng reng lo. Chutiang tur atana u ni alawm ka nih. Eng hunah pawh ka tih chuan eng hun pawh a ni tawp mai" Nui chungin a ti ve a.

 
"Kal tawh rawh, a vawt si, ka lut duh" ka ti a. "Mi hi ning viau suh, ka vel mai ang che" a ti hluk.

Ka nu Kolasibah a zin a, a lo haw hun tur a sawi lova. Nidangah pawh hian a lo haw hun tur sawi lawk mah se a sawi hunah a lo haw ngai mang lo. Thlarau thawhdan azir zel anih hmel. Mama hostel atangin ka han hruaichhuaka, a thu thak maia. A hmai a bawl nasa a, a  cher ria thal mai bawk.

 
"Au Nu, ka hmai hi entir ka duh, a reh loh chuan inkhawm pawh ka peih lo. Ka zak" chaw kan ei laiin a ti a. Ka u hmundangah chaweiin a chhuak thunga. A lo haw hma ka ring lo.

"Kan inentir dawn nia,mahse pawisa ka nei lo sin. Ka nu dil la" ka ti a. "Naktuk zingah nimai. A ngai hnem dawn em? Bazarte ka duh a, ka dil nual dawn" a ti a. Ka nuih a tiza angreng thin. Angai awm zat tura ka rin ka hrilh a, "Sachek ka ei chak, aaa bawngsa chhum pawh ka ei chak tho. Lei ang aw, ka nu awm loh laiin siam ang" a ti leha. Ka nu hian Bawngsa a ei ngai lo va,sachek lek phei chu a duh lo zuala, ka pa khan a duh em avangin kan siam fo tho a, Bawngsa pangngai tawp kan hmeh chuan chaw kan rualin a ei loh phah ngai lo va, Sachek kan hmeh thung chuan kan rual loin chaw a ei thin. A ngaina lo hle chungin ka pa khan a siam lui fo a, ka nu a ngam loh viau laiin Sachekah kher hi chuan ka nu thu a zawm lo ve tlat thina, a damlai kha chuan kan ei nasaa. Tunah chuan a awm ve ta si lo va, Bawngsa lam hrim hrim kan lei ngai tawh lo.

Zing ka tho chu Kawngkapui a lo inkalh lova. Tu emaw zawk zawk an tho tawh anih ka ring maia. Tui ka luma, Jerry-a zuntir tumin ka kaichhuaka, step atanga ka chhuakthla kawngpui ka zuk thleng thla chiah tihin ka u leh a bialpa rawn inphur ka hmu a, a thawmhnaw hak atangin nizanah a lo haw lo tih ka hre thiam nghala, Kawngkapui lo inkalh loh chhan kha ka hre thiam ve chiah.

Be loin an awm lohna lam panin Jerry-a kaia, ka nu zin changa hetianga lo haw loh mai mai hi a neih thin avangin mak pawh ka ti tawh lo. Kumin atangin Sanday school pawl hniam lam pakhatah ziaktu atan an hmang ve tana.Piangthar viau lo pawh nise anihna vang pawhin hetianga awm tur hi a nih loh vei nen, mak ka ti thina. Sawisel chu ka la sawisel ngai miah lo.Mak deuh hian u zawk hi chu an dik lohna han sawisel tawp hi a lo nuam miah lo.

Ui ka zun tir zawha in a ka let leh chuan ka u ka hmu lova. A mu nghal daih anih ka ring, eirawng ka bawl zui nghala. Chaw ka chhum zawhah bawngsa lei turin kan veng Bazarah ka han kal zuaia, chawhmeh dang ka lei tel bawka. Mama'n a ei chak em avangin zinga hmeh hman tumin ka phit nghala. Sachek chu tlai lamah muangmara siam turin ka daha, a lo thawh chuan ka lo chhum hmin hman vek tawh.

 
"A van rimtui, Bawngsa ni em? " a rawn ti nghala. Aw ka ti chu a nui vur vur mai.

Mama nen in entir pahin kan bazara, in kan thlen chuan ka u leh a bialpa an lo awma. Dar li a ri tawh a, mahse eirawng a lo la bawl lo. Tui ka lum nghala, zanah KTP-in hla zir tur a ni a, tan huna thlen loh hi a nuam lo thin a. Hmanhmawh angreng takin ka che a. Mama pangpar leh thlai tui pe turin ka ti a, tirh nuam tak a ni bawka, phun nawi loin kal ve mai.

Rosanga a rawn lut hlawla, "A rim kha ka hriaa, ka rawn kal nghal. Mama hostel chhuah lawmna kan nei dawn tlata hriatna ka nei a" a rawn ti nghal bawrh bawrha. "Nia,Sachek a ei chak ber alawm. I ei ve nghal dawn nia, I lo kal dawn tih ka hriaa, ka siamkep sa vek che" ka ti lo ti ve et. Purun leh sawhthing vel rawt tura ka dah chu min lo rawt saka, kan veng mawng lama ram lei tur a hmuh thu a sawi mawlh mawlha. "I nu zawhchian ka duha, khulai vel khu a ram a buai em ka hre duha. A buai loh chuan ka lei ang ka tia, a hmun khu a thlang deuh nangin a hmun a rem a, a fal bakah thlai leh thei kung puitling sa a awm nual bawka. Ka nu leh ka pa duhzawng tak a ni dawna" a ti a. A hmun vel min hrilh zui mawlh mawlha, a lei theih chuan a that ka rin thu ka sawi ve a. Ka u in a rawn sawipui ve nghala, lei ngei ngei turin a rawn ti nghal chiam. "Lei theih chuan lei ngei ngei rawh, Farm house type deuh, chhawng eih uaih siloin i sa anga, compound zawng zawng i hung vek anga, a reh raih dawn bawk si, a van nuam dawn tak. Ka lo leng ngun ngawt ang" a ti chul mai.

"I lo leng lovang nang chu, Noi chiah len ka phal ang" a ti chu ka u a ner nasa mai.

"Phal lo mahla ka lo kal awm tho em maia" a ti a.

"Sirji, kha kha i tih zawhah lo thlak la, a so chuan lo off mai ru. Mama ka han tihpui lawk ang" ka ti a.

 
"A u hian lo ti mai rawhse, ka lo kal ve dawn" a ti a. A thil rawt lai ka u lamah a nawr pheia. Ka u lah a phun nghal hlak hlaka, Rosanga lah chuan engah a ngai lo.

Chawei kan siam laiin ka nu a rawn thleng hlawl mai. Zinga Mama nen an inbiak khan a lo haw dawn em tih a zawta, dawn lo a tia. Tunah a lo haw leh ta thut a. Chawhmeh lah a duh loh zawng ber kan la siam zui a.

"I lo haw dawn lo maw ka tia? " ka ti a.

 
"Eng nge ka lo haw loh ang? Ka duh hun hunah ka lo haw thei alawm, ka in anih hi" a ti ta daih. Ka zawhdan ki a hre reng a, chuti khera a tawng chu ka ngei ngang mai. Chhan ka tum lai takin,
"Zingah khan ka lo haw dawn lo i ti nih kha" Mama'n a lo ti a.

"Nia, lo haw leh angai anih hi. Hah nak laiin Malsawmhlui hi mi hi a lo ngaithei lo nghal thina. Thin hian a tuar lo tep zel" a ti leh duaha. Engtin nge maw ka ngaihtheih loh ni?

"Ka ngaithei lo che ka tia mi? I lo haw dawn lo maw ka tia ka ti mai alawm. Tehhrep zel a" ka ti nghat.

"Mi i zawh dan hi mei a nei alawm. I fa zawk emaw hi min tia" a ti leh zel. Rosanga a awm ve bawk si nen ka thinrim teh nangin ka insum a.

"Mei pawh nei se, ki pawh nei se eng nge pawi a? Lo ei ve nghal la, thil sawipui tur che ka nei ania" Nui chungin Rosanga'n a ti a. Dawhkan bulah a rawn dinga, "Awww, sachek alaw? Ka ei duh lo reng reng, rimchhe lutuk.Ma-i, I ei khamah artui min lo kansak rawh. Ka lo va inbual ange. Tui lum a awm em? " a ti zuia. Chhan pawh ka chhang peih lo. Ka u in a en saka, a tam loh avangin a lum belhsak nghala.

Rosanga nen chawei khamah ram chungchang ka nuin an sawi dun a, thleng ka sil sawk sawka, kawr lum ka hak belha, hla zir turin ngawi rengin ka chhuak ta daih, Mama hnenah bak ka kalna tur ka sawi lo.

Dar 10 velah kan banga, keimahin ka kal thlaa, ka nu vanga ka mood off lutuk kha chu hla zirnaah khan kan nui vak vak a, midang nena kan awm ho takah kha chuan a zia veleh ta mai. Kal pahin phone ka en a, Rosanga msg a lo awm vang a."i ban hunah lo sawi la, thil sawipui duh che ka nei" a ti a. Reply loin ka call nghala. Rei pawh a inring hmain a pick vat.

"Kan bang chiaha, eng nge? " ka ti a.

"Khawiah nge i awm mek? Hei ka haw dawn chiaha, ka rawn hmu lawk ang che" a rawn ti a. A tawng dan chu min hai emaw ka ti a.

"Hey, Sirji.. Keimah ka nih hi. Eng nge i sawi tum ka hre lo e a" Nui hak hak chungin ka ti a.

"Ka hria che lawm. Ka be duh che a, I awmnaah khan lo awm rawh, inah chuan ka lo kal kual hman tawh lo"a rawn ti leh ta tho. . Eng chu nge maw a hriat ni?  Thawklehkhatah hlauhthawnna ka nei ta thut mai...