Pindan -4

 Chapter -4

"Eng nge a? Kan inah khan ka kal hnuah buaina a awm tihna mi? " Hlauthawng takin ka ti a.

"Ni lo ve. Lo awm rawh, kan inhmuh hunah i hre mai ang. Hlauhthawnna tur lam a ni lo. Ka dah ania" Nui chungin a rawn ti a, ka thaw deuh huai mai.

Ka dinna bula insak  mek veranda thim laiah ka dinga, kan in leh Biakin inkar hi inhlat lo mah se in pahnih chauh a awm avangin alang fal ve tlata. In pakhat zawk lah sak lai mek a lo ni bawk nen, kawng pawimawh lai tak ni siin a reh angreng viau zel thung.

Rei pawh ka din hmain kan in lam atangin Motor a rawn tlanchho a, ka dinna chhak deuha a ding chu ka han thleka, Rosanga Motor a lo ni a. Min rawn call a, pick loin a motor lam ka pan chho a. Motor kawngkhar darthlalang ka kik kauh kauha, a rawn hawi nghal vata.

 Glass a down a, "lo lut rawh" a ti zui a.

 
"Eng nge a? I haw dawn chiah nge helai hnaiah i lo kal leh zawk? " Ka ti a. "Lo lut phawt mai teh' min ti daih.

Ka thu lut a. Motor a tinung zui nghal chu phawk angreng fe hian ka en a. " Khawnge kan kal dawn a? " ka ti deuh hu a. "Khawiah vak mah. Hmun reh deuh laia din ka duha. Helai chu a ualau em a" a ti awlsam mai.

Kan veng leh veng thenawm inkar, in awm tam lohna laiah kan ding a.
"Thil sawipui che ka duh a, In Inah chuan a remchang lo riaua. Bakah, I nuin kan inbia tih hre lo se ka duh bawka" a ti dam thlupa.

"Engthilah  maw? Phone pawn i sawi thei lo mi? " ka ti a.

"Thei tho a, mahse a rem chiah lo ka tia" a ti leh mai. "Anih leh ila haw miah lo nge kan veng bul hnaiah ilo kal leh zawk? ' Ka ti leha.

" Ka la haw lo.. I nu nen kan titi a. . Ka biakduh chhan tak che ka sawi hmain i hriat tur pakhat chu, I u hi a rai ania aw" a ti a. Ka phu zawk mai. Ka cousin Sangkawki sawi kha ka hre chhuak nghal a. A ring dik reng chu lo niin.

"Chuti maw? A hrilh che mi? " Makti deuh tak hian ka ti a. "Aw, tlaiah khan a sawia. Zanin khan i nu chu ka hrilh tawha, a thinrim viau nangin a pawm thiam angreng khawp mai" a ti a. "Anih tak chu" ka ti ban charh ringawt.

"I u chu engpawh ni se, nangmah lam hi sawipui che ka duh a, midang hriat loha titipui che ka duh" a ti leh a. "Eng thilah ber maw? Hna min pe dawn mi? " ka ti vata, a lu a thinga. "Chulam a ni lo.. I hriselna chungchang zawk ania sawipui che ka tum"a ti leh a. "Eng vangin maw? Ka hriselnaah harsatna ka nei hleinem" Ka ti a.

 
"A tha alawm.. Mahse, I rilru a hah tih ka hai lo ania. Zep tum duh suh, I cher a, I thu a, I lang pawr a, I hlim lo tih ka hria. A chhan ka hre lo nangin inchhungkaw boruak vang anih ka ringa. I nu nena in han inchhan dan atang khan ka rindan a sual tam lovang tih ka hre nghal a" Min hre chiang takin a ti dam dapa. Sawi mai tur hre loin ka ngawi rauh rauh mai.

"I nu khan a ngaihtuah che a, zan i mu tha lo a, awmze nei lova zan khua a vei tlaivar tumte i nei a ti a. Anxiety leh Depression te hi i lo nei reng em mawni ka tia. In entir la thain ka hria" a ti leh a.

 
"Chutiangin ka awm lo e a" ka ti hlak.

 
"I awm aniang, I nuin a sawi bakah i u pawn a sawi a. Awmze nei lo a thinrim a, ni hnih laite tawng mang lo a i awm thin te pawh an sawia. I taksa pawhin a tuar tan tih alang reng a, hetiang chu a tha lo" a ti lehzela.

 
"Ka rilru chu a hah thin ngeia, ka nu vangin ka ipik a. Ka zep lo. Mahse, chutiang an sawi ang chuan ka awm ngai lo" ka ti leh hmak hmaka.

 
"Aw le, engpawhnise, inentir la ka duh. Ka kalpui ang che, mihrang deuh pan pawh angai lo. Azama bulah kal phawt ila" a ti leh a. "Ka duh lo" Ka ti a, ka nu leh ka u ka ngei ngang mai. Ka nu vanga ka mood off em em chu a tam mai. Mahse, tlaivar khawp khawp a ka awm leh midang tana hriat tura ka teivel chu ka hre ngai lo.

"Engpawhnise, I nu leh i u khan nangmah hrilh lo tur chein min ti a, ka sawipui che tih sawi lan ka duh lo ania. Chuvang ania a hrana ka hmuh duh che. Min rawn call pawh khan nangmah i ni tih hriat loh turin ka bia che nih kha. Chuan, mi hi i hlat ta lutuk a, I rilru hahna pawh min share duh miah lo a. Min hrilh chin hi chu nei la eng kawng emaw tak chuan ka pui thei tur che ania" a ti leh a. Engmah ka hrilh loh avangin a lawm vak lo tih ka hria.

"Rilru hah tihah khan chutia phili pui chi pawh a ni lo va. Han sawi vak dan a awm lo a" ka ti leh ringawta. "A dikna chen a awm ang. Chutihrualin i nu nundan leh chhungkaw thil hi i thlakdanglam ngawt thei lo a. Ngaihtuah vak vak suh. Hahdam deuhin awm tum la, anih loh chuan i ipik tual tual mai ang.Chumai bakah, I nu awmdan i manganpui ang bawk khan nang pawh an manganpui ve tho che ania" a ti dam leh thlup a.
"Kan lo invei tawn vel mai mai anih chu a" ka ti deuh hmaka. "Niang chu. I pa boral hnu atang hian i danglam nasaa, hmana ka Naute kha midang i ang daih tawh" a ti leh daiha.
"Ka danglam ve bawk ang chu. Thil thleng a tam tawh em mai" ka ti leh ringawt.

 
"A dik tho mai. Eee, a lo va tlai tawh ve. I chhungten an lo ngaihtuah ang che. Haw teh ang" a ti a.

Kan in lam pana kan tlan laiin a ram leitur kha ka nu a sawipui ta em tih ka zawta. "Sawipui e, a lo ngaihven anga. A fel chuan tunkarah ka lei ang. Min zuk enpui la, in sak dan tur te kan sawi anga" a ti a. "I over sia aw.. Ka in intur pawh a ni ve lova, eng nge ka sawi ve ngawt ang? Duh leh u Tracy hruai la"  ka ti a. "Ani chu kan inneih tak leh chhungkaw nu a la ni dawna, nang chu anni aia pawimawh, pawimawh chin awm lo i ni reng tawh. I nihna hi hre reng la a tawk" thutak angreng tak hian a ti a.

 
"Awi, ka lal si zia chu. Nupui sual deuh i neih chuan ka mak sak vel ang che. Nuam hi ka va ti dawn tak" Nui vak vak chungin ka ti a, ani pawh a nui ve huk huk mai.

Kan in chhak deuhah ka chhuka, Kein ka chhukthlaa. Hla kan zir ban atang khan darkar chanve aia tam a lo liam hmana, ka chhungte pawh an lo mu reh diak tawh.

Ka mala rawn ben deuh thawr pahin "Malsawmhlu, eng nge hetah i mut a? Min ti hlau mai dawn alawm" Ka nuin a ti nghal bawrh bawrha, ka tho vata, ka mutna chu ka en a. Kan veranda thlang lamah ka lo mu reng chu niin. Ka taksa a vawt veka, ka hnar a ping ngang mai bawk.

"Hengah te mut tur em ni? Khua a vawh tehreng nen, awm loh loh hian i awm mai" Min ti leh tun tuna.

"Ka mu tih pawh ka inhre hleinem mawle" ka ti ve hlar mai.

 
"I hriat loh chuan engtin nge maw i mut ang le? Nang hi i zia viau tawh emaw ka tia, I la tho a reng zawk nge mawni? " a ti nang nanga.

 Naupanlai atanga thawh at hrat tak, zanlai laia bual harh chuk chuk ngai ka ni a. Ka upa tial tiala, a reh ve zela. Englai atangin nge ka thawhat ngai tawh loh pawh ka hre tawh lo.

Inchhungah ka lut a, vawt ka ti lutuk a, ka khur deuh bauh bauha. Thingpui in ka tum a, " Engmah ka la siam lo. Tui pawh ka la lum lo. Ka tho ve chauh anih hi. Tui kha lum la, thingpui chhuang nghal rawh' a ti a. Ngawirengin a sawi angin ka ti a. Ka tih zawh veleh ka room-ah ka lut a, khumah ka lawn nghal a. Mahse, rei pawh ka mut hmain min rawn ko leha. "I va mu leh ngawt em ni? Nunphung mumal reng reng nei lo mai che" min rawn ti bawrh bawrha. Chhan pawh ka chhang lo, ka mut ngaiin ka mu a. Ka nu thingpui siam thawm ri rawk rawk ka hre zui a. Ka mut a chhuak pawh a ni lo. Ka chau deuh ngulha, ka luak a chhuak deuh hlui a, a vawt ka ti lutuk bawk nen, muthilh tum lam aiin mut ve hrim hrim chak vang a ni zawk.

Ka nauin min rawn ko thawmah ka thuchhuak nghal thut a, mahse zan a lo ni ta daiha, a thim vek bawka. Ka phone lak tumin ka dap kuala, lukham hnuaiah a lo awm a. Rang zet hian ka la vata, ka hmet eng a. Dar zat ka en chu zing lam dar 3 a lo ri tep tawha. A vawt bawk si nen ka mu leh a, ka inkhuha, mahse hriatchhuah ka nei leh a, ka tho lehnghala. Mama min ko ri avanga harh ka ni a, thawm a awm leh awm loh ngaithlain ka thu deuh vang vanga. Rannung hram ri leh kawmthlangte ui bauh ri bak thawm engmah a awm lo.

Ka muhil leh mai thei tawh lo a, ka phone ka en a. Ka mit a thip avangin en rei thei loin ka dah leh a, thlasik lai anih avangin khua a la var har deuh dawn si nen muthilh leh ka tum a. Mahse ka room kawngkhar inhawng thawmah ka meng nghal zawka. Jerry-a a ngur nghal chhar chhara, khum bul a switch awm ka hmet nghal a, ka hmeh en rualin ka room kawngkhar a inkhar nghal dawt bawk.

Mama ka ngaihtuah chhuak leha, a muhil thei lo emaw a dam lo anih hlauhthawnna ka nei thut a, ka tho nghala. Mama room lam ka pan pheia, "Au Nu, eng nge a? " ka hnung lam atangin a rawn ti thuta. Ka phu zawka, ka hawi let nghala. Inkuah khawr hlan hian a lo ding a. "Min ko ri ang deuh ka hriaa, ka rawn en dawn che a. I nuam lo mi? " Ka ti nghala.

 
"Ka ko lo reng reng che. Ka zung alawm a" a ti bung vata.
"Ka hre sual anih dawn chu, min ko ang tlat hian ka hriaa, ka harh phaha" ka ti leh niah niaha. Min koh loh thu bawk a sawi leh vat.

Ka harh leh chuan khua a lo var tawha, vawt ti zeta inkuah khawm deuh tat chungin chokaah ka pheia. Ka nu a lo tho tawha, hriatchhuah ka nei nghal zawka. Zingah khan verandaa ka mu min rawn kaitho sia, engtin nge ka harh khan zan a lo nih leh daih si?

"Zingah khan min kaitho em? ' ka ti a. Chair ka pawtchhuaka, Dawhkana thingpui dahna kettle a lo dah chu ka ban nghala.

"Kai tho lo" a ti bul hmuk.

"Min kaitho amaw ka tia, verandaah ka lo mu te khan ka hria" ka ti leh a.

"Mawl mawl suh,khum atangin a ni lawmni i rawn thawh a? A reng rengah zing  a la nih hi. Eng zing nge maw i sawi ni? " Thinrim deuh hian min ti a. Eng nge maw a thinrim leh tak vak kher ni??

"Inchungah ka chho dawn ania, chaw ka chhum hmin tawha, a dang kha siamtur lo en rawh. Chhunah thlan cheina tur vel leiin i u nen va chhuak ang che u" a ti zui leh duaha. Ar chaw tur chawthing leh antam kuang chang a chan ho kengin inchungah a chho a, ka thingpui in tur dai thak khawpin ka inngaihtuah ve thunga. Ka nu min rawn kaihthawh lai leh ka mut leh lai te, Mama nen kan inbiakna te kha mumang ni tur chuan a chiang mah mah.

Chaw kan ei laiin ka nu in ka u hnenah sawn man thing tura kal turin ka Putea leh ka ni Pasal a tir dawn tih a sawia. "Ehe, I rai alaw? Sunday school zirtirtu ve si a va zahthlak" Mama'n a ti bal bala.
"Zirtirtu a ni hleinem, secretary alawm" Ka nuin a ti a. "Chu pawh nise, a zahthlak tho alawm" ka ti ve nghata. "Zahthlak tho mah se a nih tur ang ang a ni vek tawha, sawi sawi angai lo. Huaisen taka paitlang ngam hi a hlu ania. Fa loh vanga thlawi lo mai mai rawngbawltu zingah pawh an tam ang chu. Kohhran te zawng a tawp em mai" ka nuin a ti leh hmawk hmawka,Sawi dikna lai chen nei mah se ka u tan pasal nei lo a lo rai chu thilsual anih loh hmel bik hian ka hre khawpa,inchhungah pawh inthlahrun angai lo tih alang renga,ka nu ka ngei a, hnial phei chu ka hnial duh chuang lo.

"Au nu, tinge nizan khan i teikual sek a? A chang leh thlanglam verandaah i zuk chhuka, achang leh ka room bul lawk lawkah i rawn kal kuala. Eng nge i tih a? " Mama'n min ti a.
"Awihawm loh loh, nangmah zawk anih kha, min ko emaw ka tia, ka rawn enfiah mai mai che ka tih kha" ka ti a. Ka chaw ei lai ka eizawm mawlh mawlha.

"Chutiang ka hre lo e a. I tei seka, ka nin zia che chu" a ti ta daih. Ka chawei lai chawl meuhin Mama ka en a, "I zung zo nen kan inbiak reng kha, I hre lo amaw? I tho a mi? " Ka ti a.
"A teuh lo em maia. I vei peih lutuka, minti mutui lo veka. Zung turin ka tho lo hrim hrim. A vawh nen nen eng nge i tih reng reng a? " a ti leh bai baia. Engmah ka hrethiam lo.

"A tho a anih kha i u kha. Naupanlai ata tawh a heti chuk chuk reng maia. A ninawm tak tak ania" Ka nuin a lo ti a.

"Ka tho a ngai tawh lo em maia" ka ti hlur mai.
"Tho a si lo ngah nge zanah i vei i vei si? Minti muhil tha thei ngai lo reng reng. I ninawm lutuk, room kawngka i khar ri chawrh chawrh zel bawk si' ka u in a lo ti bak ve hlur maia. An vaia an tan rual takah chuan ka tho a ni turah ka ngai ve ta deuha. Mahse, ka awih chiah chuang lo.

Ka u nen bazarah thlan cheina tur kan va leia. Christmas a hnai tawh bawka Bazar a tawt ngang mai. An ri luih luiha, kal chak theih pawh a ni lo.

Zanah ka inkhawm a, ka hawin ka u bialpa te lam palai an lo awm a. Tukinah ka nuin sawn man thin tir a tum thu a sawia. Mahse, mipa lamin an rawn kal khalh a. Sawn man pek lam ni loin inneih lam an rawn lenpui a lo ni a. Ka thaw deuh huai mai.

"Kumthar tirah inneih ti ila a tha ang. Kumin chu i pa boral kum a ni a, ruangchhuah kuma pasal lo neih kha a fuh lovang. I pa awm lo hi chu pawi ka ti mang e. Nang lah ilo rai a, ka lung a zing, invai hian ka thaw inti pik. I pa kha i lo sun lo hian ka hre em mai che" ka nuin palaite haw hnuah ka u hnenah a ti bawrh bawrha, ka u a ngawi kara, phone a khawih paha. Ka nu hauhna chu a ngaipawimawh lo hmel khawp maia. Ka dem vak lo, ka nu berin atirah ngai lap deuh leh a paitlang ngam avanga fak zawngin a tawnga, ka u tan chuan a ngaihthatthlak ve bawk a ni.

"I pu pawh ka la hrilh lo va, hrilh pawh ni ila engmah a tithei chuang lovang. I ni zawk bawkin ro a rawn rel leh anga, tihfel hunah rawn der ila a awlsam zawk ang. Naktukah i Putea lo phei se la, ka sawipui ang" a ti leh a. Engamah hmaa ka pa chhungte a kal kan ngawt chu ka ngaihdan a ni ta lo.

"Sawn man thing turin Pa Peka leh Putea kaltir i tum a, tunah ka pu te engmah sawipui an ngai lo i ti leha, an hre leh vek dawn tho a. An lawm lo zawk ange" ka ti a.

"Lawm lohna tur a awm lo, an sum sengin pasal kan nei dawn pawh a ni lo. Kan tihfel hunah hria se a tawk" Khauh zet hian a ti a. Ka ngaihdan a ni lo laklawha, ka phun zui nang nanga. " Eng nge maw i sawi nawi khanglang le? I nu ka nih hi, ka duh duhin ka ti ang chu. I fa zawk ang mai hian i thu hian min dah tum teivet suh. Ka hne zozai lutuk che. Ka duh leh ka hrilh anga, ka duh loh leh ka hrilh lovang. Ka thu thu,I ni Rami i chhuna, i pawngpawrh em em reng mai" Minti ta tun tun mai. Chhan dan tur hre teuh mah ila ngawih a hun tih ka hriaa. Hnial zui chak lutuk vanga tawt up upin ka ngawi ta reng.

Pathianni a ni a. Chawhma ka inkhawma, inkhawm ban hnu lawkah Putea te nupa an lo kala. Tlai chaw ei nghal tur anni a. Ka nuin a ko tih ka hre thiam nghal mai.

"A pu te lam i hriattir tawh em? Inneih lam thleng thlenga sawi tur kan nia. Anni lam pawh awm se a dik ang' Putea'n a ti a. Ka nu ka melha, chawh ka ti rilru peka, mahse ka inthiam lo leh deuha. Chawh han tih em chu dikin ka hre lo.

" Hrilh lem nang, nangmahni ka rawn ko phawt che u anih hi. Duh leh nakina hrilh animai" Ka nuin a ti a. Mahse, Putea ngaihdan a ni bau lo. "Keiman a pu chu kan bia ange. A nu lamin kan lo sawifel ngawt hi a nihdan tur a ni lo " a ti leh ta tlat. Ka nu pawhin a hnial zui ta bik lo.

Putea leh ka pu an inbiaa, an inbiak hnu rei vak loah ka pu leh Pa Peka an lo thleng nghala."Ka pa, Nizanah ka rawn bia ang che ka tia, I rilru a hah ka hlau leh sia. Zanriah ei nghal ang che u aw. Kan tihkep vek che u ania. I tha reng reng em? Tunlai kan inhmu khat sia"a lo ti zung zung a. Ka ei lo lutuk a, ka ner vak ringawt.

Inneih hun tur atana tha an tih an sawi ho a. Man ei tur thlengin an sawi nghal veka. Hmaih palh an lo awm chuan tih belh zel turin an ti bawka. Ka nu pawh ka pu te lam rel ngai lo ang hmak a ni.

"I pu hi chu a zia, I Pa Peka zet zawt hi chu ka hne ania. A theih tak emaw hi a tia, I Putea pawh nghak loin a duhdan a sawi zawt zawt kha. A inti fing si" an haw hnuah a ti leh ta chiah renga. Chhan enah pawh ka en lo.

"Keichu Pa Peka hi a fel ka ti, a bright bawk si. Christmas hmain Reiekah min kalpui dawn lehnghala" Mama'n a lo ti a. Ka nu a ter nghal at mai.

"I tum tum hian thil lo tum ve ngawt zel suh, min rawn ta che. A mawl pawh hi i mawl ka ti" a ti chiam a. " Em em a, mawlna pawh a ni mawni? " ka ti hlaka. "Lo tawng suh, midangin i nau kan zilh laiin lo tawng tawh reng reng suh" min ti a. Ka ngawi nghal hmak mai. Thui tawk a sawi zui a, Mama tan pawh nuamti taka kal ngamna tur chi a ni tawh lo.

Veranda thlang lamah a chhuaka, a rak leh hlut a "Khai aw.. Malsawmhlu, I uicho hian ka far kung a nek thlu ania. A la tliak zui" tih leh Jerry-a tlawh a ruala, Jerry-a hlau lutuk a beleuh thawta, a rawn tlan luta, ka kapkar a rawn chuha. Ka nu in ala duhtawk lo, ka kapkara a awm chu a rawn tlawh leh a. Jerry-a hlau tal vel chuan min bawhthlu a. Kan ri rum rum mai.