Pindan - 5

 Chapter -5

Thinrim lutukin ka tho a, ka nu mah ni se beih let loh ka tum lo. Mahse, vanneihthlak nge vanduaithlak takin Rosanga a rawn lut ta hlauh. 

"In va ri nasa rum rum ve"a rawn ti lut a, " Ânu leh au Nui an insual a" Mama'n a lo ti a. "Awihawm loh loh, a viau zel suh. Khaw nge i kal a? " Ka nuin awki pangngai hian Rosanga hnenah a ti zui zata. Kei erawh ka thinrimna thunun tumin ka insehruh fan fan thung. 

"Khulaiah khuan Azama nen kan rawn kala, rawn len luh pah a remchang em a" a ti a. Engmah ka la sawi ve loh vanga makti niawm tak hian min rawn en a. Nidangah chuan a lo kal hian ka lo phul hlut thina, zanin a lo kal ka be mai lo mak a ti tih ka hria. 

"Anih tak chu, thu ta che. Khawnge Azama pawh chu? " a ti zui leh a. "A lo chho tep ang. Thil a lei lawk anih kha" a ti a. Min rawn en leh thin chu ka hre reng chungin ka roomah ka luhsan ta daih. Ka nu anga nun lem, hmai hnih nei ka nih ve loh avangin ka thinrim chuan thinrim tawp, lawm pawha tider lo va lawm tak tak thin ka ni a, chuvangin pangngai taka ka biak theih ka ring lo va. Inthiarfihlim phawta, ka incontrol thei ta anih leh va chhuah leh mai ka duh zawk. 

Khuma ka mut vang vang hnuah Mama'n min rawn ko a. " Thingpui lo lum rawh " a rawn ti a. "Lo lum ve mai ula" ka ti let a. Mahse, ka nuin min rawn koh veleh takah chuan rik bur bur hun a ni lo bawk nen ka va chhuak a. Azama a lo awm ve tawha, min lo nuih sanga. A za lo tehnangin ka nuih let ve a. Thingpui ka lum a, ka ngaihtuahnaah Jerry-a a lo lang zawka. Ka zawng nghala, ka khum sirah a lo bawk chu niin, ka thaw huai mai. 

Ka rin loh takin ka mutui ta phiana, zing ka thawhin Rosanga a lo awm leh der tawha. Khawvawh em em laia chuti taka a tho hma chu mak ka ti viau. "I va tho tlai ve a, tiangte chuan pasal i hmu zo nang" Min lo tinghala. "A ho e, tunlaiah mi an tho hma vak vak tawh lo. Mo nih vanga khawvar ruala thawh nghal tur tihna pawh ni lo a" ka ti let ve a. Thingpui ka inthlit zui a. 

"I tawngthei zit zet sia. Vawiin eng nge i tih dawn? Bazar ila" a ti leh a. Ka chhan hmain ka nu a lo tawng ve a. "Va bazar ru, kumin chu pa ber awm ta lo nen, pakhat lo rai vei bawk nen, kan thawpik churh maia. Vah harh a tha ang. Rs, Mama pawh hruai ula" a ti zung zunga. Nizana kan boruak chhe zet kha hre zui awm pawhin a awm lo. 

Ka nu inchungah a ar chaw pe turin a chho a, thingpui in pahin Rosanga nen dawhkan kan kil dun a. "Nizan kha eng nge thleng a? " a ti a. "Engmah" ka ti rang vat. A nui a, "I van lo kal ve a" a tawng leh hmain ka ti a. "Nia, ka inkhel a. Ka rawn tlang zuai, I nu khan i u te inneih chungchang vel min sawipui a duha. Nimin lamah i pu te nen an sawifel tawh tho nangin. Bakah, kumin Christmas chu ka rawn hmanpui ang che u ka tia" a ti a. "A tha ngawt ang. A khawharthlak dawn hian ka hria, tunah chuan ka la ngaihtuah duh chiah lo" ka ti leha. "I khua a har dawn, nang phei chu i pa fa bik liau liau i nia" a ti dam thlapa. Kan in a rawn chuangkai tam hi chuan ka pain min duatbik zia leh ka ngai em em tih hre lo an awm lo. 

Ka pa ka ngaihtuah chhuahna chuan ka hnuk a tiulh a. A awm loh hnu a ka nu nen kan buai ngun tawh zia leh mi chuang ni a ka inhriat nasat dante, avai mai chuan mahni inkhawngaihna min siamsaka,ka mittui a hnai lutuk ringawt. 

"Nizana inbuaina ka hriaa. Ui vang tak tak a ni em? " zawi angreng tak hian a ti leh a. Ka melh zawka, chik takin min lo en renga, a hmelah chuan kan buaina engkim a hre vek tih ka hria. Ka nuin nge Mama zawkin hrilh ka hre lo. 

"A pangpar a lo nek thlu a, a titliak bawk aniang. Jerrya a tlawh vaka, ani hlau lah kha ka bulah a rawn tlana, a rawn tlawh leh kha Jerrya hlau lutukin min bawhthlu tel a" ka ti ta nge nge. Ka sawi zo chu a thaw deuh huaia, "Ui hi a ngaina lo tu tan chuan a buaithlak ve em bawk a ni. Engpawhnise, insum hram hram la, nangin ui i ngainat ang tho khan i nu pawn a pangpar angainaa. Chuvangin a thinrim ve animaia" a ti dam thlupa. Ka tawng veleh hmain ka u a rawn tho a. Rosanga a rawn hmu chu a ri nghal hlut a. Rosanga'n chhun lama bazar tura min rawn sawm thu a sawia. Ka uin "tihtur ka lo nei a. Ka kal ve chak asin le" a ti a. Diktak chuan khawiahmah kei ka kalpeih lo thung.

Dar 11 velah min rawn lama, u Tracy a rawn tel ve bawka. Hmeichhe tawng duh leh lu zo veh vawh, mi pawisawi zawnga tawng duh ni si lo a ni a. A awm ve hi chuan a hlimawm thin a. Kal lam atangin kan nui kan nuia, ka mood dik hleithei lo pawh a zia ta viaua. Bazarpui tawt lutuka kan han inzui kual vel takah phei chuan ka nu chunga ka lawm lohna pawh engmah ka hre zui ta lo. 

"Malhlu, In bazar ve law? " Ka beisei loh lutukin Matthew-an min rawn ti a. "Aw, nangni zawk? " Ka ti let ve vata."Ka nau ka kalpuia, a tawt bawk sia" a ti a. A nauin a rawn ko a, inbe leh tawh chuang loin min kalsana. A kal liam thlengin ka lai ngawih ngawih maia. Collegeah hmu nitin mah ila min lo hre ve tih reng ka hre loa. Ka thiante min koh dana min ko thei nghal leh min rawn be chat mai chu ka mumang emaw ka ti rum rum mai. 

"Tu nge a? " Rosanga'n a rawn ti su su a. "Kan college ami anih kha" ka ti ringawt. Chik fe hian min en a. U Tracy a hrilh ru a, an nuia. "Kan Naute hi a nula ve tak tak tawh dawn aniang a" Rosanga'n a ti leha. Lai zetin lei ka chhuahkhum zauh ringawt. 

Christmas a lo thlenga, ka pa boral atanga Christmas kan hman hmasak ber a ni bawka kan chhungte ho an lo lang zuta. Ka nu zawlpui te an awm tam em em bawka. Mahse, lunglenna hman awm mang loin ka u te inneihna tur kan buaipuia. Rosanga a rawn kal tam zual a, Sawmi pawh a lo kal deuh renga, Bazara Matthew-an min biak kha ka hrilh a, mak a ti ngang mai. 

"Meizial bung hi ashtray-ah paih thin teh u. Ashtray chhawp awmzia a awm lo em mai" ka ti a. Ka nu thiannu, Nu Biaki thutthlenga thu mu chunga phone hmang mek chu ka melh ram ram a. Ka nu nen an rinna lamah an rilru a inang a, Mamit lam mi a ni a, Christmas hmang tura a lo kal kha ala cham ta char chara, ka u Pasal neih a hmang tlang dawn anih hi ka ti a.Mahse,ka u pasal neih hnuah pawh ala awm ta zela. Haw tum awm pawhin ala awm lo a. Nu taimaa sawi tur a ni miah lo a , meizial a heh em em a, a awmna hmun apiangah meivap a awm nuaih zela, meizial bung lah a pen per mai mai fo bawka. Inchhungah rorel a tum ve sek mai bawk nen ka mil ngang lo. 

Ka nu a rawn lut a, a archaw dahna bucket sil tumin tui khawihna lam a pana,"Malhlu, I u ten tlaiah chaw an rawn ei dawn anih chu. I Pa Zama'n vawk a talh dawn a, I zuk la dawn nia. Ka be lawk tawh" a ti a. 

"Engtikah nge a talh dawn a? Tunah anih loh chuan chhunah class kal ka ngai asin" ka ti a. 

"I kal hmain i zuk la hman ang. A reng rengah class in la chawl emaw tia" a ti leha."vawiin atangin kan tan dawn ka tih mawlh mawlh kha. A talh har viau leh lo dah se, tlaiah ka zuk la mai ang" ka ti a. "Seventh-day anni lo mi? " Nu Biaki'n a lo ti ve a. 

"Ni e mawle, amah ber khan a eichak pek anih kha. Rai thil ei chak ngah lai tak ania, chubakah vawksa lo ei reng tawh tan chuti maia nghei chi a ni lo. A reng rengah hetiang hi chu khawvel dan ania, ei duh chu ei mai mai tur" ka nuin a ti duaha. 

"A ho e. A pasal te kohhran a hre sa veka, an dan pawh a hre tho a. Ei thiang lo chu ei loh mai tur" ka ti a. "Ei theih vek, kohhran rindan mai mai" Nu Biaki'n a ti a. " Pathian thu an hmuh dan animai alawm. Eng nge maw nangniin in lo sawi ve chiam le a? In rindan pawh kan sawisel bik tawp loh hi" ka ti hmak. 

"Keini rindan chu Pathian kan ringa, kohhran leh pawlah kan buai lo va, chu aia rinna dik a awm lo. I la hmufiah mai ang. Tunah chuan pawlah ila buai anih kha" min ti a. Hnial leh ka tum zuaua, mahse ka hnial hneh dawn chuang lo tih ka hriaa, ka ngawi leh ta daih. 

Vanneihthlak deuhin ka kal hmain a lak theih ta hlauha, ka zuk laa. Ka lak zawh veleh ka insiam a. Sawmi'n min lo nghaka. "I va tlai ve" Min lo tinghal a. "Ka buai alawm. Nang anga thawh veleh a hman nghal ka nih loh hi" ka tifiama. "I over e a" a ti hlar mai. 

A rawn chuanga, "vawiin chu i inchei riauin ka hria, Matthew-a chu a buai ve ngawt dawn anih hi" a ti leh a. "I va han chhe tak" Ka ti ringawt. 

College kan thleng a, kal tirh ni a ni bawka, kan tam lutuk lo a. Matthew-a hmuh tum a ka hawi ka hawi hnuah pawh ka hmu ta lem hlei lo a, a bialnu pawh ka hmu chuang lo. Kan thianho pawh kan la kim lo va. A kal chhun ho chu kan bengchheng leh viau. 

In ka thlenin ka u te nupa an lo awm a, "Tinge class in kal loh a? " ka tinghala. "Kal tirh ni ania, ka peih lo e a. Kal pawh an tam awm lo em mai" Ka u in a ti a. An pa erawh chuan game a khela, ka haw leh haw loh pawh a hre lo ang. 

Ka inthlaka, eirawng ka bawl zui nghala, ka nu te kalna ka zawta, "Damlo kan tawngtai dawn an tih kha, a lo let leh tep tawh ang. An kalna a rei tawh lutuk. Vawksa kha kang lo teh, chhum ka ei chak" a ti zuia. 

"In pa te pawl i hrereng sia, in pa kha a thinrim mai tur asin"ka ti a, " Ho e, ani pawn a ei ru ve tho " a ti duh leka. Ka nuih a za ngang mai. Class kal kan tam leh tam loh min zawt zui leha. "Tam vak lo ti ila ka rin aiin an thanhnem" ka ti tha ve mai. Ka u hi a final kum a ni a, exam hun a hla tawh lo va, a puar len lutuk hma a ni dawn bawka, a vannei phian mai. 

Dar li velah ka nu te thiandun an rawn haw a, an thianpa pakhat an rawn hruai haw tela, "Malhlu, I Pa Zoa hian chaw a ei ve nghal dawn ania. Chaw i chhum tawh chuan chhum belh la" a rawn ti a, ka tum nghal hmak mai. Ka nu thiante, a rinna ang zawm vetu ho hi tumah mil a lawi pawh ka nei lo. Chhungkaw nu leh pa ber ber te nisiin reitak tak an zin bo a, hnathawk mang lo va awm nilen mai mai lah an ngah, an len tawp na hmuna chawei mai mai an sam bawk si. Mil ka tum ngial pawh hian ka thei thin lo chu a ni e. 

Class pangngai takin kan kal leh tan tawha, mak deuhin Matthew-an min hmuh apiangin min be ziaha, kan la inhmufuh thei em em zui. 

Ka haw tur Rosanga changa ka din laiin Matthew-a a rawn ding ve a. " I haw tawh dawn mi? " Min rawn ti a. Min biak apiang hian ka lai ngar ngar zel a ni bera. Tha tak erawh chuan ka chhang ve thei mai zel. 

"Ka lo thlah dawn che mi? " Min ti leh phei chu ka mur vek hian ka hria. "Aih, ngai lo. Ka u a lo kal dawn a" Rang em emin ka ti a. 

"I u maw? Pasal nei tawh kha tiraw? " a ti a. Ka u thlengin a hria tih ka lo hre miah lo a, mak ka ti ngang mai. 

"Aih, kha lo zawk kha" ka ti vata. "U pakhat bak i nei tih ka hre miah lo a" a ti leh a. Ka chhan hmain Rosanga a lo thlenga, kan bulah a rawn ding a, "kal i la" a rawn ti nghala. Matthew-a ka en a. "Anih aw" ka ti a. A bu nghata, Rosanga scooty-ah ka lawn nghala. 

"Khapa kha Bazara kan hmuh kha ni em? " Rosanga'n a ti a. "Ni e, mi i va hre rei thei em em " Mak ti angreng tak hian ka ti a. "Nia, amah kha Basketball a khel thin tlatin ka hria. Khawi clubah nge a khelh thin? " a ti leh chu a khelhna ka hrilha, "Eee, chu ngei chu anih chu. Ka hriatna ka hre maithei tawh lo a. Makpa kan nei mi pangngai dawn e" a ti leh chu a helmet chhanah ka benga, a nui nasa ngang mai. 

Kan Exam a hun chho a, Mama Hostelah a la awm a, ka nu nen chauh kan nih nak alaiin ka nu inah a awm hman ta meuh lo. Thla khat dawn dawnte a zin bo a, inkhawm phei chu tul a ti lo bur tawha. Sumdawnna ka hriatpui ve phak loh buaipui angin a insawi chamchi a, ka pa pension a la a, inluahman kan dawng thla tin bawk nen khawsak harsa tur pawh kan ni lo chungin pawisa zawng hian a buaia, achang leh Nitin kan eikhawp alawm kan dil a ti leh lawia. A zin chhuak reng leh in a awmchang pawh rawn awmchilhtu,Pathian thuawih inti, thatchhe pui pui, mahni meizial bung takngial pawh ashtray-a dah peih lo, ka chauha Pathian ringtu ho vangin inah ka hlim lo a, sawisel ngam loh khawpin ka nuin a tan bawk si. Mahse, insum zawh loh tum ka nei a, ka sawisel leh zauh zel a.Kan awmdun chuan kan inbat hlek hlek reng a ni ber. 

Rosanga'n kan venga a ram lei tum kha a lei a. A lei fel chauh tihin in sak tumin a lai tan nghala. Hmun zawl tha sa anih avangin laih chiam angai lo a. Mahse, picnic spot puitham zet sak a duh avangin a ruahman dan a pui ngang mai. Swimming pool lian tha tak leh mizo hmanlai in anga cabin changkang tak si sak te a duh a, Party na tur hmuh awm thei turin hall tur lian tak sak a tum tel bawka. A ruahman dan min hrilh ve zela, a sak zawh vek hunah chuan a pui khawpin ka ring. 

"I sak zawhah chuan college ka zo hman anga, khutah khuan cinema hall siam la, ka lo enkawl ang" ka ti a. "I peih phawt a thu aniang chu, I ta vek tur tho ania. In la mihrang vak suh" a ti a. Ka ner nang nanga, "ka ta tur anihna a awm lo em maia. I over lutuk" ka ti hlak hlaka. 

"Ni e a, ka naute duat inia, I tan engmah ka ui hleinem" a ti awlsam leh mai. 

"No-i, I cher tawh e. Damdawi ei teh" a ti leh ngawta. "Cher hi a mawi zawk daih, thau te chu ka duh lo a ka indiet ve anih hi. I timak e a" Ka ti a. "Thau over chu a tha lo a, tunah hi chuan i cher mah mah a, I kuh the tawh ania. Thau khan i hmeltha" Thutak fe hian a ti leha. "Amak, thau ka duh lo.I ninawm" ka ti bak hlaka. 

"A thau hlei lo vang e a. Zan mut nachang hre bawk si lo" ka nuin a rawn ti hmuka. 

"Ka mu tha reng e a" Ka ti hmaka. "Awi awi awi, nizan phei chu minti mangang alawm. Zanlai laiah a te vaka, a roomah ka va tlan lut chu a thawmhnaw bawmah mihring an mu a ti tlat peka. Zingah engmah hre leh tawh ngai bawk si lo. Tun ang kumah pawh tho a chuk chuk reng hi ka ning ania. Rs, rilru kam Doctor panpui tur lo ngaihtuah teh, thlamuang pawh hian min awmtir thei lo" a ti leh zuah zuaha. Ka thawhat thin midangin an hriat mah ka hlau a, a sawi kher chu sual ka ti ngang maia. Ka ngei em em bawk.