Naruto -10

 Then - 10na

Ka nu thawm ka hriat rualin tawite ka let vata, kal phei chauh angin ka zai phei zui rat rata, a room a ka luh hmain Melo-i ka ko pah bawk. 

"In zo dawn tawh em? "ka ti lut nghal a, u Sangzela bathroom chhungah awmin Melo-in a kut a lo hru mek thung.

" Aw, kan zo chiah. A kut a sil mek" zang vah hian a lo ti a. An tawng ka hriat lai khan thawm dang engmah a awm lo va, an thilsiam tur an siam tak tak pawh ka ring hek lo. Melo-in thil sawipui duh a neih vanga ko lut a, chhuanlam siam mai anih ka ring hmiah mai. 

In kan thlen veleh ka intleuh nghal zuai a, ka inbual zawhah u Sangzela a lut ve leh a, a phone ri sek chu a tlai tawh bawk nen a pawimawh viau aniang ti rilru chunga ka en chuan number a save loh hi a lo ni a. Bathroom kawngka bula ding chungin " I phone hi ka lo pick dawn em? " ka tih chuan ' Tu nge? " a rawn ti ve thung."I save lo" ka ti leh lang langa, "lo pick la… " a rawn tih leh chuan ka pick nghala. "Sir, a fel vek tawh e" hello pawh ka tih hma hma hian mipa aw thum lam hian a rawn ti nghal dut a. 

"Hello… a nupui zawk ka nia. Kan pa hi a inbuala" ka tih takah chuan "Eee, Pi Arin, Buatsaiha ka nia. Pu hnenah khan naktuk ami tur kha kan tifel tawh tih min lo hrilhsak ta che. Prog pawh ka rawn thawn tawha" a rawn ti leh zung zung a. Buatsaiha hi kan vengchhung mi niin palian leh pian tha em em mai, inchai chak a ni a. Taksa sawizawi na lam bak atchilh nei vak lo, thluak aia tharum hmang thiam zawk kan tih ang chi hi a ni a. U Sangzela ngaisang tawpkhawk tu leh u Sangzela'n ek ei rawh pawh tise a ei duh ang tih tur khawp a ni a. Kan inah pawh hian a rawn chuangkai hnem ngang mai bawk. 

"Aw le, ka lo hrilh dawn nia" ka ti a. Atir lama a rawn tawng danah khan dik lo awm turah ka ngai hmana, mahse naktuk hi Badminton tournament tan hun tur a ni tih ka hriat avangin chu lam chu a rawn sawi tih ka hre thiam leh ta zawk. 

"Tu nge a? ' a rawn chhuah in a rawn ti nghala. " Buatsaiha, kan ti zo tawha, prog pawh ka lo thawn che a ti? " ka tih chuan ka rin ang ngeiin "Badminton tournament tur kha anih dawn chu. Tel ve tur in min duha, hun ka nei lo viau nen a buaithlak dawn khawp mai" a ti nung nung a. "A tirah chung te chu hrilh la" ka lo ti ve thuai. "Vengchhung hi chu an pangchang a, ho teah an lungawi lo mai zel a. A buaithlak alawm. Tikhan hnai deuhah fan inchhem tir thin suh, I hritlang leh tur ania. Ac on mai thin teh" a ti leh duaha. "Ac ka ngaithei lo" ka tih chuan "ngaitheih tum ve bawk la" a tih leh talha, min en lo bawka tiin lei ka chhuahkhuma. "Lei min chhuahkhum lo khan ka sawi awih mai mai teh" a ti leh a. Dressing table ah ka lo lang thei chu niin.

"Ngatinge thingpui kha in i phal loh a? Ka in ve chak nen nen " Hre chhuak thutin ka ti a. "In lo deuh la a tha alawm, thingpui i heh lutuk, I Doctorin min hrilh ania" a tih chuan awih lo em em hian ka en a. "Chutiang engmah a sawi lo e a" ka ti hmak. "Vawiinah min hrilh alawm mawle aw, ka la hrilh hman lo che anih kha. I test hnuhnung berah khan zunthlum kha a kawk sang riaua, insum theih chuan insum rawhse a ti ngei che chu ania" a ti leh a, a sawi dan chu a awihawm em em mai bawk nen han hnialzui vak dan pawh ka hre chuang lo. Ka pa hi zunthlum nei niin an thlah ho hian an nei veka, kan cousin zingah pawh naupang te te a zunthlum an awm nual tawh bawk. 

Zan hmasa ang bawkin min kuah chungin a mu a, a muhil tih a thawk danah ka hre thei a, kei erawh ka mu meng kar thung. Kan nupa kar tha ta thut hi ka la awmthiam lo va, chubakah hlauhthawnna ka neih nasat phah ting maiin ka hre bawk. Melo-i thilsawi kha ka bengah a cham reng a. Eng chungchang nge ka hriatchhuah tur awm kha ni ta ang? U Sangzela'n politics hi thildang zawng zawng aiin a thlang tih chu chiang sa a ni a, kei leh kan fa nen hian duhthlan tur ni se a politics khelh hi a thlan zui zel ka ring hial bawk. Mahse, Melo-i sawi hmang khan, "Arini leh Naute hian an tuar leh ang" tiin a sawia, Nau ka chhiat kha u Sangzela vang niin ka ring thina, "leh" Tih tawngkam a hman danah ka ringsual lo turah ka ngai ta.. Mahse, engatinge chuti taka fa neih a duh loh chuan tunah pawh hian engmah a tih si loh?  Tha taka pai ka duh thu kha sawi engang mah ila a duh a tihna a dal dawn lo tih ka chiang em em bawk si. 

Inleh pahin ka hmaiah a rawn khawiha. "I la muhil na nge? " harh chiang mang lo hian a rawn ti a, "um.. Ka ngaihtuahna a buai riau" ka ti sap. Min rawn kuah pahin ka hnute inkarah a hmai a rawn phuma. "Engatinge? Enge i hlauha? " a ti zui a. 

"Melo-i thilsawi kha ka hriaa, kei leh Naute chungchang kha" ka ti sap. "Maw? Chutiang a sawi em ni? " mak tih hmel deuh tak hian a ti a. "Um, room a ka rawn luh dawn khan a sawi a" ka tih chuan a ngawi vung vunga. "Roomah ka awm ve reng a, engmah ka va hre ve lo ve" a ti leh a. A inbengkang a, ka tawng tur min rawn fawp zui nghal zat bawk. 

U Sangzela office kal tura a chhuah hnuah muangchangin ka insiam ve tan chauh a, ka u tlawh ka duh avangin dawrah pawh rei awm ka tum lem lo. Ka naupai thla 4 chauh la ni mah se nu Sangi leh u Sangzela nu-in naute thil tur ngawt mai an buaipuia, ka nu awm loh lang miah loin Nu Sangi'n min buaipui a ni ber. Mahse, nu chu nu anni a, engang pawhin min buaipui nasa mah se an hmunruak hnawhkhah chi a ni chuang lo. Ka pa nen engmah buaina kan nei zui lo chungin ka chhungril atang hian ka hlatsan deuh tlat tawha, eng emaw changa a fa ni ve lo tur anga inngaih chang ka nei chho ta reng mai bawk nen, ka hmuh dan a dik hleithei tawh hek lo. Kan nupa nasa taka kan buai lai pawh a mahni in lam deng ngam mang lo va min siamtu anih avangin ka ngei rehthei tak tak hek lo. Kei aia u Sangzela an rin avang khan ka u lakah pawh hian aruk taka hel tlatna ka nei tawha, kan nupa kar thu bikah phei chuan engmah hrilh ka tum tawh lo bura, anni pahnih hnena vui thu thlen ai chuan Rempuia hnena sawi zel ka duh tawh zawka. Mahse, ani hnenah pawh a na zawng chu ka sawi chuang lo. Nupa kar thu hi chu a serious em maia, midangin min siamthat sak thei lo ang bawkin a tichhetu pawh mi pahnih kan ni zel tho. Mahse, a sual a chhuah tak tak lai kha chuan accident anga langa min thah mai hlauh chang te ka nei a, tu emaw talin thil thleng an hriat ka duh avangin Rempuia ka hrilh fo va, min khawihna duk cher chur te kha thla lain ka dahtha thlap thin bawk. 

Dawrah rei vak lo ka awm a, biak kual ngai ka biak hnuah ka u te in Taxi -in ka pana, vawiin pawh Driver pakhat zawk ala nawm theih loh avangin Taxi ka la a, duh chuan Driver dang u Sangzela'n driver dang koh mai tur an awm thu sawi mah se amah hruai tur ni lo, keimah min hruai kual tur a Sawrkar pawisa pek te lo chhawr ka duh hauh lo. Anihna takah chuan kan driver kawl lai pahnih hi ama hna bakah kan chhungkaw lam thil thlenga kan tihbuai nasat em avangin an hlawh bak keimah hian thla tin hlawh dang ka pekbelh ngei ngei a, Driver tana awmchilh hrehawm zia tur pawh ka hre thiam ve tial tial tawha. Tul lutuk lo, keimahni tih ve theih reng thilah phei chuan tihbuai ka tum ngai lo. 

An nula pakhat a dam loh avangin ka u a lo buai ve viau mai a, naute ka pawmsaka, a insuk sa a han zar pahin a dang a rawn seng thla a. A thlep fel leh zung zung. 

"Amut a chhuak tan anih kha. Khumah awm se a muhil mai ang" a tih chuan roomah kan inzui lut a. Khumah ka daha,a bulah thu pah deuhin lukhamin ka inkamkang ve bawk. 

"U Chhari khan a rawn be ve che em? " min tih chuan tawng loin ka lu ka lo thinga. "Nimin khan min rawn biaa, thla tharah haw mai a duh anih hmel a" a ti leh charha. "Chuti maw? A hma khan kumthrah a ti sia" ka tih chuan, "engtikah nge a tih a?" a lo ti vat."A rei veleh deuh tawha, a pa enkawl angai tih vel a sawia. Mahse, ka hmuh dan chuan nu Sangi awm hnu hian nuam a ti lo zawk niin ka hria a" ka ti leh maia. "Keipawh tiang deuh chuan ka hmu. Ka nu khan a duat bakah a dah lal em a, nu Sangi chuan khatiang khan a dah lal ve lem lo ang. A chhungte lah saw awm tawk an awm reng bawka" a ti deuh hmaka. 

"An awm belh leh tawh mi hmeichhe pakhat bak kha? " ka tih chuan a thle zauha. "Pathum lai an awm tiin ka hria. Pakhat chu nimin piah lawk atanga awm anih hmel a. I kal ngai lo mi?  Tinge engmah i hriat loh a? " Lawm vak lo aw hian min ti a. 

"Ka kal peih lo" ka ti nghat. "I mak e… Ka pa pawh a upa ve tawha, a khat tawk tal chuan tlawh ve rawh, amah chauh kan neih tawh hi" a tih chuan ka insum hman lehpek lo. "Amah pawh ka nei tawh hleinem, kei aia midang thlang ania. Ka engahmah a kal vak lo" ka ti bul hmak. 

"I mak em mai. Naupangchhia chhia pawh i ni tawh lo. Khatianga awm kha awmzia a awm lo lutuk. Ka pa hian zankhat mitchhin tawk se i lo ngaihsak tawk loh vangin i inchir viau mai ang. Chuvangin a damlaiin thinrimna dahthain va tlawh ziah tawh ang che" Thupe aw tak hian a ti a. "I tlawh reng tho a, a tawk mai alawm" ka tih leh chuan a rum nghata. "I pa fanu hi chu i va han ni chiang tak e aw. In luhlul si, dik in inti si.. A thurhimah nu Sangi phei chuan a ngaihven em em che a, lawm pawh i lawm lo em ni? " a ti leh hapa. 

"Lawm vak chuang nang. A mark that nan a ti ve mai mai a, a ho em mai. Hetianga min ngaihven ve bawk loh ten a tha nang. A fel vangah ngai suh' Ka tih leh chuan a nui haka. " I rilru hi chu a lian ngat ngat teh e. Pasal nei lo ngat la chu ka pa inchhungah zantin buaina a chhuak dawn anih hi. Hei vang hi alawm ka nuin a vei em em che" a ti leh duaha. "I ninawm, ka nu sawi suh" ka ti bak hlar mai. 

"Eng nge maw ka sawi loh ang le? Nau i neih dawn hnaiah phei chuan i la ngai dawn chauh" a ti leh talha. "Nau ka neih hma pawhin ka ngai reng, sawi tawh suh. Ninawm, mood i ti chhia" ka ti leh nghat. Diktak chuan u Sangzela nen kan intihbuai zual lai atang daih tawh khan ka nu ka ngaihna hi a zual tawha. Ka pa leh ka u in min rin loh zia ka hmuh hnu phei kha chuan ka nu ngai hian ka mittui pawh ka seng nasa. Ka rai leh atang ngat phei chuan ka nu ka mamawhna nasat zia ka hre chiang lutuk tawha, nu nei lo te ka khawngaihna a zual nasa lutuk ringawt. 

"Tinge u Sangzela nen kan inhauh khan ka sawi aia u Sangzela sawi zawk i rin tlata? " ka ti leh thuta, ka ngaihtuah chhuah rual khan ka insum thei leh tlat tawh lo. 

"Ka ring lo hleinem che" min en loin a ti a. "Min ring lo chiang em maia. U Sangzela pawh hian min deusawh nan tak a hman phaha, ka pa phei phei chuan rilru buai dahnaa min dah mai te a rawta. In mak hi ka la ti. Ngaihdam che u pawh ka la harsat tlat" zep hni hne loin ka ti leh tawl mai. Min chhang loin naute thawmhnaw ho a dahfel a, a dahfel zawhah khumah a rawn thu ve a. 

"Ka ring lo che ni loin i mizia ka hre chiang em a. Chuvangin u Sangzela thusawi ka awih alawm. I naupan laia thil thleng te kha i theihnghilh tawh em ni? " a ti zawi sap.

"Kha chu naupanlai alawm a" ka ti thuaia. A tlak karha, "a dik alawm. Mahse, I puitlin hnuah pawh i mizia i thlak chuang mang hleinem. Ka pa in thil a lei duh loh vang che a chawei lo va nikhat tawp i awm te khan kum 20 i pel tawh alawm. Ka nu vanga i lungawi lo, ni eng emaw zat phone i switch off te khan college i kal tawh kha. Khang zawng zawng hre tu tan chuan i thinrim control zo lo va nangmah leh nangmah i intihnat hi thil thar a ni hleinem" a ti leh dap dapa. 

"Ka thinrim in chaw ka ei duh lo emaw ka be duh lo che u anih pawhin keimah ka intih nat inhre ngai lo vang" ka ti ve hmak. "Um, maithei.. Mahse, ka pa Motor seat zaithlertu leh ka pa pawisa ru fo tu kha tu nge? " a ti ve leh zel. 

"A ninawm, khatiang leh u Sangzela nena kan inkar hi a inpersan lutuk. Ngaihpawlh lui suh" Lungawi lo tak hian ka ti a. "Aw le, ni e.. Tunah chuan in nupa kar pawh a tha tawh a, khatiang thil kal tawh sawi fo angai lo. In pa hian a duhzia che chu tlang hriat ania, that chhuah mai hi i tan a har lo ania" A ti dam leh thlapa. A awah chuan min duat ngawih ngawih tih ka hai lo. 

"U Chhari chu lo be ve hrim hrim la, duh se chuan awmpui mai la ka ti. Nau i neih hunah pawh ani tluk an awm kher lo vang" a tihzawm leh daiha. "Nula pahnih kan neia, mahse ka lo be ve hrim hrim ang. U Sangzela pawh sawipui angai anga" ka ti leh a. Thil hrechhuak thutin ka nutei thil min hrilh kha ka sawi chhuak nghala. A ner nanga, "An inngaizawng awm lo em maia. In pa hian midang a kawpsan che ka ring lo. Diktak chuan a hming tha a, party-ah mai ni lo, Minister zingah pawh a lar fal em a. Mi hian an bei an bei ang" a ti awlsam then mai. 

Dar 4 velah ka hawsana, ka rilru a insual deuh viau nangin ka pa te inah ka peng kawi ta nge nge a. U Chhari kawtah a lo awm a, min hmuh chuan a lo ri nghal hlut mai. 

Inchhungah kan inzui luta, mipa pakhat, kum 20 bawr vel tur hian chaw ei pahin phone a lo khawiha. U Chhari nen chokaa kan inzui lut pawh chu min ngaihven awmin a awm lo. 

"Thingpui in ang aw" a tih chuan ka aw zet tawh nangin u Sangzela sawi kha ka hre chhuak thut a, ka duh loh thu ka sawi leh lawi. 

"I pa a dam tha lo em ni? Ka u khan a lo sawia, thla tharah haw i tum atia" ka tih chuan, "Dam tha lo hran lo ve. An buai ve deuh avangin awmpui turin min rawn chah leh thina. Hetah kan buai lem lo bawka, ka haw ang chu ka ti mawle" Tha takin a ti a. Kan luh laia chaw ei mek kha living roomah a rawn phei a. Parda a inzar loh avangin ka thutna atangin dining room chiang takin ka hmu thei a. A chawei thleng takngial pawh a seng lo tih ka hmu kara, a khawsak dan chu mak ka ti thlawt. Ka naupanlai atanga ka nulat thleng, nun ho taka ka nun hnuah pawh mahni chawei thleng seng loin kan kalsan ngai lo va. Tihtur ngei ngeiah kan ngai zawk. Chawei phaha phone khawih te phei chu khawilamah hi a ni ringawt zawk. 

"Tu nge kha kha? " ka ti nghala. "Diktea anih kha, u Sangi nau fapa tho" a ti nghat. "A rawn riak mai mai nge? " ka tih leh chuan, "aih.. An awm ve deuh reng. Kha lo kha mipa pakhat ala awm bawka. Thani nen an pathumin an awm vek rih.U Sangi'n fa pawma a pawm te annia" a ti duah. 

"Anih chu, engpawhchunise a chaw eina a kalsan tawp maia, mak ka lo ti deuh" nui chungin ka ti a. A zat vanga nui erawh ka ni lo. 

"Awi, awi, awi… inchhungah hian engkim hi a letting vek tawh. I awih lo zawk ang. Chawei hunbi an nei lo va, mut hunbi pawh a awm lo. Nanga thuawih lo te kha chu engmah ilo ni lo.Eee,i nu Motor pawh an hralh daih asin" rawn kun hnai deuh chungin a ti sa sa a. 

"Eng motor ber? Motor lian nge a car? " ka ti vat. "Motor lian te chu i pain a hralhna a rei tawh alawm. Car kha kar kalta khan Rinawma'n a accident puia, a hlui tawh bawk si an tia. Siamthat nel nualin an hralh nghal daih alawm" a ti leh mawlh mawlha. 

"Tu nge Rinawma chu? " ka ti hmak, Nu Sangi nau fapa pakhat zawk anih thu a sawi chuan ka inhumruh a, ka chhungrilah thinrimna a alh hlep hlep a ni ber. 

Ka haw dawnah an khaw lama a haw hnuah an buai zui viau loh chuan kan in lama min awmpui a peih leh peih loh ka zawta, ka zawhna avanga a hmela hlimna langchhuak ka hmuh hmaih hauh lo. Mahse, "ka han haw phawt anga. Kan inbe leh dawn nia" Tiin kan inthlaha, diktak chuan u Sangzela engmah ka la sawipui loh avangin awm tura lo sawm ngheh nghal ngawt chu tha ka ti bik lo. 

In ka thlen veleh roomah ka lut tlang nghal a, inthlak pahin ka u ka call a, "Ka nu car kha an lo hralh daih ania' Phone a pick veleh ka ti nghal thawr. 

"Ka hria alawm, ngatinge chu chu i rawn sawi a?" arawn ti he haw a. 

"Ngatinge ? Hralh kher angai hleinem, ka nu sulhnu kan neih tlem tawh tehreng nen" Thinrim takin ka ti a, "Awww, chutiang tur a ni hleinem, a hlui ve tawh a. Khalh tur an awm chuang bawk si lo nen an hralh ta mai anih kha. Thil i ngaikawi leh thin a" a rawn tih chuan ka ngei lutuka, ka off nghal hmak. Min rawn call leh pawhin ka pick duh tawh lo. 

Kan in a thil thleng ka hmuh zawng zawng vang khan ka lung a awi lo ngang maia. Midang an chen ve tak vanga lungawi lo pawh ka ni ber lo va. Ka pa ka ngei zual ngawih ngawih a ni ber. Ka nu boral atanga reilote-ah nupui a nei a, rilru a dam loh sa nak laiin, nupui a nei chiah chu a nupui thu thuin a awm hi a ni ringawt. Nakinah phei chuan nu Sangi unau faten a in thlengin an la neihsak hial ta ve ang. 

"I va nawm loh hmel ve" U Sangzela'n min rawn tih chuan ka hawichhuak vata. A lo haw tih reng reng ka lo hre lo. 

"Nuam e.. I lo haw chiah mi? " Ka ti ve thuai. A bu nghuta, chik angreng tak hian min en a. " Dawr lamah buaina i nei zawk nge?" a ti zui leh a. "Aih, chutiang a awm lo. Eeee.. U Chhari an khaw lamah a haw dawna. A remchan chuan min awmpui la te ka lo ti ve ngawt a" ka tihzawm nghal zat. 

"Engtia haw in maw? Haw hlen turin maw? " a tih chuan  ka bu nghat. "I pain a remti em ni? " a ti leh a, "Remti aniang. Ka nu kha a ngaina a, ka nu pawn a duata, ka nu a awm tawh bawk si lo. Ka pa chuan a ui vak lo vang. Bakah, ka pain inah sawn engmah a rel vak hmel loh" ka ti deuh duaha. Ka thutna bulah a rawn kal hnaia, balcony hungna railing nghengin a dinga. 

"A lo awm duh chuan a tha alawm, inchhung khawsak rel hi chu i kutah ka dah a, tha i tih ang ang animai" tha takin a ti a. 

"Um, chuti anih chuan ka lo be chiang ang. Ka hmuh dan chuan ama duh vang reng a haw tur lam aiin inchhungah sawn nuam a ti lo niin ka hria. Tun hma angin an dah lal ta lo bawk si" ka ti leh a. 

"Um, anih tak chu.. A hma pawhin ka hrilh che kha, I pa chuan nu Sangi bak a buaipui lo ka tih kha. Chhari lam chu a care vakin ka ring lo" fan deuh ruih hian a ti a. "Aih.. Chutiang lam pawh a ni lo" ka ti leh lawi. Ka pa te inchhung awmdan sawi chiam ka hreh leh thut a ni ber. Ka pain ka haw leh a hlauh zia sawi fo mah se, keimah ngeiin ka pa inchhunga ka pawimawh ve tawh lohna sawi lan ka duh lo. 

"Ok.. Lut ila, thosi a awm ania. Zanin chu Tournament hawnna lamah ka kal dawna, I rawn kal ve duh em? " Tiin thildang a sawi ta daih. 

"Aaa, duh pawh ka hre lo" ka tih chuan a hmelah kal turin min duh tih ka hmu thiam nghala. "Lo kal ve rawh, vengchhung thiltihah chuan i lan tam ve a tha alawm. Miin an ngaisang che a" a ti ta chat. Ka ner deuh naka, " Tuman min ngaisang lo ve a'  ka ti bak hlak. 

"Ngaisang e, hmeichhe guitar perh thiam tak zaithiam bawk si i nia. Zai tawh rih lo mah la miin an hria che alawm" a ti lehzela. Kal turin min duh tak tak nge ama lan mawina a zawng ka hre thiam lo. Tunhnai chho a kan nupa kar tha thutah hian min care ve deuh ta hi chu a ti tak tak anga ngaihna nei mah ila, politics kaihhnawih anih hi chuan ama mawina tur a zawngah ka ngai zel tho. 

Chawei kham hnu rei vak loah hall lamah kan kal a, tan hun dar 7 tih ni mah se mi an lo la awm vak lo. Dar 7:30 velah kan tan thei ta hrama, hetianga  tan hun a tan chat chat loh hi chu mizo hian ngaiah kan nei nimai hian ka hriaa.. 

Ka rinlawk ang ngeiin u Sangzela te party ho zinga mi thenkhat an awm ve a. Politics hlir sawi lo mah se an titi dan ka ning tho tho mai. Helai venga an hmeichhe lam hruaitu, kum 50 bawr vel, lu zo veh vawh tak mai a awm ve a. Min tlawn hiam mai chu ka hne hluah hluah a ni ber. 

Dar 10 velah in kan thleng a, kan thlen hnu lawkah u Sangzela tu emawin an rawn call a. An inbiak danah chuan chanchin tha lo lam an rawn hrilh anih hmel viau. 

Thomas-an min rawn call a, a tlai tawh deuh bawk nen mak ti ru deuh takin ka pick up vata. 

"Za-rin, Champuii kha i hria tiraw? Ben-a te vocalist kha. A inawkhlum an ti" a rawn ti nghal mawlh mawlha. Mak ti em em hian, "Chuti maw? Engtikah? ' ka tum aia ring mah hian ka ti a. " Tun lawkah khan an ti. Mak ka ti rap mai" a rawn ti leh zung zunga. "Awi, a van mak em em. Niminah pawh kan thiante naute birthday lawm naah kan inhmu reng asin. Engmah harsatna nei hmel pawh  a pu lo. An inah mi a inawhhlum a? " ka ti leh duaha. 

"Aih, an zin anih hmel. An hna thilah vawiinah an zin chhuaka, hotel bathroomah an inawkhlum anih hmel. Lawk aw, Aruata'n min rawn call a, ka'n chhang lawk ang" a ti leh zung zung. 

Kan inbe zo chiah tihin u Sangzela lam ka hawi nghala, "enteh.. " ka ti hman chauh tihin amah zawkin, "Champuii a thi a" a ti nghala. A hmelah chuan chiai hmel emaw pawi tihna zawk pawh lang loin a ngai reng. 

"Aw, nia… Thomasa khan a rawn sawia, mak ka ti e.. A inawkhlum ati lehnghala" ka ti leh a. An inngaihzawn rinna ka neih ruk deuh tlat hi a bo tak tak theih loh avangin engtin emaw tal amahah danglamna ka zawng ru a. Mahse, engmah danglamna a nei lo.

"Nia, amak khawp mai. Pu Hlua anih kha min rawn hrilh tu. A nun a nuam viau emaw tih laiin rilru lam buaina a nei nge ni? Bma chuan engmah danglamna a neih awm an hriat loh thu a sawia. Zanriah ei tura a chhuk har avangin han koh a tuma, a han hmuh in a lo la lum a ti nghe nghe a" a ti leh duaha. Thomas-a ai chuan thil thlen dan a hre chipchiar zawk deuh. 

"A zia lo em mai. An in lamah i kal dawn em? " ka ti a. "Aih, vengkhat kan ni lo bawka zanin chu a hriat loh der theih ang. Duh leh naktuk vuinaah ka kal anga. I kal ve duh ang chu nangpawh" a ti awlsam leh mai. "Um, nia ka kal ve duh ang. Ka thiante ho pawh hi an kal ve duh ka ringa. Duh leh an mahni ho rualin ka kal zawk anga. Zaimi tan eng emaw tihtur an lo siam takin a remchang ang" ka ti ve a. "Nia, a pawi lo" a ti ve mai bawk. Ka thiante ho a ngaitheih loh zia ka hre tawha, biak pawh ka be tam tawh lo. Mahse, inhau lem lo leh buaina nei lo a kan awm mawp mawp atang khan tlemin kan inbe tam leh tana, inah hi chuan an lo kal ngai meuh lo va. Mahse, dawrah chuan min rawn tlawh zauh tum a awm thung.

U Sangzela muthilh hnuah pawh muhil ve maithei loin zaimi te awmkhawmna group ka en reng a. A ruang an rawn chhuahpui tawh thu Bena'n a rawn reporta, an thlen chin thlengin a rawn sawi zel bawka. Nula lu zo veh vawh leh hmeltha tak, nun hmang nuam em em ni a kan hriat theuh a boral thut mai chu kan vaiin min thawng em em tih hai rual a ni lo. Kan band kan kal vung vanglai kha anni pawh an vanglai tak a ni ve tho a. Inmil lo viau thin mah ila tuina inang vek kan nih avangin kan tilang ngai lo va. Thihna meuh a thlen leh takah phei chuan, kan inmil loh rukna lam kan thian zinga tuman kan sawi lang tawh lo. 

Kan thianho-in vuina hun hmang tur in kan kal a, u Sangzela te erawh chu a staff thenkhat nen an rawn kal thung. Vui zawh hnuah inbiakna hun kan nei ta tawka. Ka thiante ho chu a ngaithei lo tih engmah tilang miah lo hian a be hlawma. Ka thiante ho lahin an lakah eng rilru nge a put hre hek lo, tha takin an be ve bawrh bawrh hlawm bawk.

Champuii an vuiliam ni atangin ni hnih a liam leh tawha. Ka in entir a hun avangin Doctor ka pan a,engmah that lohna ka nei lem lo va. Fimkhur thuah a khat tawka incheck -up reng ka duh avang hian ka kal ngun angreng viau. Ka Doctor pan hi mimal taka ka hmelhriat tha tak a ni bawka, ka chhiat leh ka hlauh zia engkim ka hrilh ngama, ka inentir ngun lutuk pawh hi min hre thiam viau. 

Mu chunga phone ka khawih laiin msg a rawn thlenga, hawng chuang loin notifications alang chu ka pawtthlaa. Mahse, thil inziak ka hmuh rualin ka tho nghal hluaia, msg ka open nghal zat bawk. 

"Champuii thihna kha thil thleng pangngai a ni lo. Chhui chiang rawh, I pasalin a mualpho lohna tura a tih anih kha. I pasal hrilh loin chhui ang che, I hrilh anih chuan i pasal leh Champuii awmdun lai thlalak leh video tamtak ka nei a. Ka tlangzarh nghal ang. I pasal chauh ni loin i pa pawhin a tuar ang. Ngawi rengin chhui la, Champuii dikna haichhuak ang che " tiin a inziak kalh. 

Kut khur hlawk hlawk chungin msg min rawn thawn tu chu tu nge anih hriat tumin ka call nghala. Mahse, not reachable a inti tlat, ka call nawn leh naah phei chuan switch off a inti zuia. Msg-in tu nge anih ka zawt ta tho. 

Vawi tamtak msg ka chhiar nawna, ka thaw a pik a, ka bing mup mup a ni ber. U Sangzela hrilh tur a ni em tih ka ngaihtuah nasa em em a, hrilh ka duhna leh duh lohna a inzat reng. Msg min lo thawntu hi min hrechiang tak tu a lo ni thei a, u Sangzela ka hrilh tih a hriat hlauh chuan a thil neih a sawi ho a nei tak tak anih chuan zan khat thilthu-ah kan chhe vek anga, hawi ngaihna kan hre dawn lo. Mahse, engtin nge keiin ka chhui ang? Champuii thih zanah pawh ka bulah a awm renga, a awmdanah engmah rinhlelhna tur a awm bawk si lo. Envanga hetianga chiang taka rawn sawi nge anih ang ka ngaihtuah thiam lo. Ka pasal thiltihsual min rawn hrilh mai pawh ni loin min rawn vau pahin min nawrchep nghal vek bawk. 

"I mit meng a va sen ve. I muhil tha lo mi? " zingah u Sangzela'n min ti a. "Um, mu tha vak lo" ka tih chuan na ka neih leh neih loh min zawta, ka chala a rawn khawih chuan ka msg dawn ka hre chhuaka, tualthattu tih ka ngaihtuah zauh maia, inveng hman loin ka thlesawn nghal thuai bawk. 

"Na ka nei lo, muhil tha lo satliah ang mai mai kha.. Ih, ka phone leh i phone ila thlunzawm em? " ka ti zawi sap. A thle zauha. 

"No.. I phone nen ni loin i whatsApp chauh. Chu pawh tun hnaiah chuan ka check ngai tawh lo" zangkhai angreng tak hian a ti a. "Tunhnai" ka ti nawn ve sap ringawt. 

"Um, nupui fel tak, hmeichhe nun dan tur a ka lo duh ang thlapa nung ka nei chho tan mek tawha, rinngam ka duh a"nui chungin a ti leh maia. Ka ang ziau chu min rawn fawp zauha. 

" Ka inbual anga, ka insiam nghal mai ang. Vawiin chu kal hma ka ngaia. I peih chuan eitur min lo va enfel sak la, nizana an thilsiam kha a al leh lutuk a" a ti zui leh a. 

U Sangzela kal chhuah hnuah Rempuia biak tumin phone pakhat zawk nen Balcony-ah ka awm a. Msg-in a buai leh buai loh ka zawta, min reply loin a rawn call nghal zat. 

"I tha em? " a rawn ti zang vuha. "Um, tha e.. I phone-ah khan msg pangngaiin thil ka rawn thawn che a, lo en teh" ka ti te te a. A ri deuh raka. "khai aw" a ti sup ri ka hre theia. "Tu rawn thawn che nge? " a rawn ti a. Ka hriat loh thu leh ka call tlang thei lo tih ka hrilh a, a number ka thawn leh a. "Ok, ka lo enfiah tir ang. Eng nge a rawn sawi hi a awmzia? Champuii leh inpa an inngaizawng tih hi a dik tak tak tihna mi? " Nghet cherh chawrh hian a rawn ti a. A awki khauh leh nghet charh mai chu thian inbiakna ni loin, an misual man dawpchhuahna tur niawm tak a ni bawk. 

"Eng nge i sawi awmzia? " Ka ti ban chata. "I hre lo nge i hre lo der chu ka hre lo va. Mahse, inpa leh Champuii khan sawi an kai a. Mi zawng zawng hriat erawh chu a ni lo. I chungchang ngaihven reng ka nih vanga hria ve mai chauh ka ni. Khatianga msg rawn thawntu che khan eng chen chiah nge a hriat ang tih ka ngaihtuah" a ti leh a. "Ka hre lo, ka hre lo tak tak. U Sangzela nen hian tun hnaiah buaina engmah kan nei lo va, neih  chu sawi loh kan inkawmngeih lutuk zawk. Msg pawh hi hrilh ka duha, mahse min vauna kha an ti anih chuan kan mualpho nasa dawn lutuk si" Mangang ru em em in ka ti hapa. A thaw deuh huai ri ka hre theia. 

"Diktakin ka sawi ang, keichuan i pasal leh i pa kha ka care ve lo ania. I himna ka ngaipawimawh bera, a dawtah chuan midang an awm ve thei ang. I pasal hian a lo ti takzet em tih chu ka kutah dah la, hahdam deuhin lo awm tum phawt rawh" a rawn ti dam leh thlupa. "Engtin nge ka hahdam theih i rin a? I timak e a" ka ti hlak. "Hey, mi chak i nih kha, hlauh nei anga i lang hi i inhmeh lo ania. Ka damchhung chuan tuman an khawihna tawh dawn lo che. An khawih che chuan a let an tuar zel ang. I pasal pawh tiamin.. " awki sang chuang miah lo, nghet churh hian a rawn ti leh duaha. Ka maimitchhinga, amah vanga ka thlamuan zia hi ka haider thei lo. 

Kan dah hmain Melo-i thilsawi ka hriat ruk ka hrilh leh a, u Sangzela'n engmah a hriatpui loh thu a sawi tih ka hrilh chuan zawitein a nuia. 

"I pasal hmel ka hmuh apiang hian Dpi'n mangang lutuka min rawn call kha ka hre chhuak thin, mahse Dpi kha chhul lam fel lohna nei anih tlat avangin a sawi kha ka lo awihsak lo va. In pa lah sawiselna tur awm lo khawpa perfect ni khan kan hre bawk si.. Ok, khalam chu duhtawk ang. Hahdam deuhin lo awm la, a mize tenawm tel lo va a nupui a hmangaih theih ngei nan che ka la nawr bet ang. Chumi hun thlen hma chuan lo nghak tang tang la, lo ti thinrim suh " a rawn ti leh duah.A dah hmain Phone number ka chhutir hmasak zawk tum kha a hre vek tih hrilhin fimkhur turin ka chah leh hram bawk. 

Zan lam ka mut mumal loh em avangin dawrah pawh ka kal chhuak peih ta lo va. Mission veng lam dawr pawh hma a sawn ve zel a, ka tum anga ka awm theih chuan thla khat vel a liam hnu a hawn mai theih tur a ni a, ka rit chho ve zel tawh dawn bawk nen,Faki awm tho mah se u Chhari ka mamawh tih ka chiang zual ta viau. 

Muthilh pawh inring loin ka mu a, mahse ka lo muhil zui mai chu niin, ka harh leh chuan chawhnu dar 2  lo ri der tawh. Chhun mut hi chu lu a na duh bawk nen, lu na deuh luk chungin ka tho chhuaka. Ka inphihfai hnuah room atangin ka chhuaka, ka chhuak phei deuh chiah tihin Melo-i a rawn thleng hlawla, a la rawn inkeng bawr phian zui bawk. 

"Tehhlawl che chuan, in buai lo mi? " ka lo ti thuaia. "Buai ve tho e. Mahse, midangin an tithei veka. Bakah, I pasalin i dam tha lo a tia. Ka rawn kan dawn che" zang vah hian a ti zung zung. 

"Khaia, dam tha e. Nizan ka muhil thei lo va, chuvanga chhuak lo mai mai alawm ka nih"ka tih chuan a nui kawr kawra, " Pasal inti pa deuh, nupui te muthilh theih loh hleka mangang leh  chung zel si i nei tih hre ta che" a ti duh lek. 

Ka ei duh chi a rawn keng teuha, kan vaiin kan ei ho a, kan nula te pahnih pawh hian Melo-i hi chu an ngaina viau a, a lo kal apiang hian a rawn ri chul zel bawk nen, an ngaina pawh a awm viau. 

"Ka lipstick duh deuh hi laklawh lutukin ka hmang zo a,ear bud ten ka hawlha" Tih pahin min entir a. A number ka en sak chuan amah Melo-i min present hi hman lohin a thar la la nei tih ka hre chhuaka. 

"Min present kha ka la hmang miah lo asin, min pek pakhat zawk kha ka hmang regu tawp thunga. I duh leh ka pe ang che" ka ti a, ner nang chung hian, "hmmm, ka pe ve em em che a, a chi nang" a ti thuai. "A ho lutuk, I mamawm em hi. Kei chu a uk zawk kha ka duh a, ka hmang char char a, a uk zawk khan min rul la" ka tih leh chuan a mamawh bawka, min hnial ta lo. 

Lipstick la tura room a ka lut chu min rawn zui lut ve a. Ka make-up dahna ho a en kuala. Make-up  aia skin care uar leh uluk zawk ka ni bawka, serum leh toner ka nei nual. Sun block ka hman lai nghei ka hlauh avangin ka stock teuh a, perfume lawm tih takah ka nei nual bawk. 

"Enteh, Champuii thi kha amak e tiraw?? "  A ti deuh thuta. 'Nia, mak ka ti tawp" ka ti tha ve mai. 

"Mama nena chanchin nei zeuh anih vang khan ka ngei riaua. Mahse, a thi tih hriat takah kha chuan ka khawngaih leh lawia. Ih maw, thil hriat ruk ka nei a, mahse Mama hrilh loh i intiam chauhin ka hrilh ang che"  Thutak zet hian a ti zawi sap. Ka msg dawn ka hrechhuak nghal zata, ka lungphu a rang nghal zaih zaih bawk. 

"Sawi la, ka hrilh lo vang" Ka theihtawpa pangngaiin ka ti a. Min rawn hnaih zual sauha, 

"Eng lo ania. Inawkhlum ang khan hmu mah se Mama hi a thihnaah khan a inrawlh an ti asin.. Ka awih lo lutuk a, mahse la hlauthawng a, mut pawh ka muhil tha thei lo" ati leh sapa. Inveng hman loin ka thaw hawk mai… . 

Note : Sunday zan ka chawl thin e aw u..