Naruto -7

 Then -7na

Khawvar thlengin chhin khat mah ka chhing ta lo. U Sangzela thutthlengah a riaka, mahni chauha mut nan chuan khum a zau ngang mai. Mu chungin thil thleng engkim mai kha tlaivarin ka ngaihtuah a ni ber, amak tih bak chu sawi ngaihna a awm lo a ni tawp mai. Ka fa ka chana, chutah duh reng vanga paih min la ti duha. Mahni naupai lai, chu pawh nupa kara mi lehnghal chu tu nge ti tla duh tehlul ang ni? 

U Sangzela tho thawm ka hriat veleh ka maimitchhing nghal hmak. Midang chenpui lo ang maiin thawm a dim eih lo bawk. Mahse, harh lo ang maiin ka awm dan ngaiin ka awm reng tho. A chhuah hnuah muthilh ka tum veleh a, ka taksa a chau bawk nen muthilh bawrh bawrh ka chak a, mangchhia ka neih leh hlauhna avangin muthilh erawh ka hreh ru em em lawi. 

Ka beisei loh takin ka lo muhil a, mangchhia pawh nei miah loin ka muhil a, ka harh leh chuan dar 11 a lo ri tawh. Ka taksa chau tawngkhawng vangin ka mutui viau anih ka ring. Inhnuaiah ka chhuk thlaa, kan nula pakhatin min lo be thuaia, chhungkaw zing ami tumah ka hmu lo. Chaw tlem ka ei lui a, ka ei zawhah roomah ka chho leh a, kan room chhung a zau viau nangin ka leng hlawl lo ni berin ka hria. Ka ipik em em a, eng nge ka tih ang ka hrethiam hek lo. 

Ka thut ngaia ka thut deuh vang vang hnuah ka insiama, ka thawmhnaw tam vak lo leh ka mamawh zualpui ka pack nghal mawlh mawlh. Inhnuaiah ka chhukthla a, kan nula pakhat hnenah kan in lamah riak turin ka phei dawn tih ka hrilh a, ka nu te lo hrilh tur pawhin ka chah hran chuang lo. 

Gate a ka chhuah chuan ka pa kid rinawm, u Rama Motor nen a lo awm vang tawh. Ka thu lut nghala. Kan in lam pana kan tlanna kawng tluangin ka tawng eih lo. 

U Chhari'n min lo ngaihven nghal thuaia. Ka nulat laia ka room thin  kha tuman an luah loh avangin ka lut nghala. Riak turin ka kal dawn tih u Chhari ka hrilh lawk vek tawh avangin khum pawh mut mai theihin a lo siam fel vek tawh. 

"Ka chau deuh a, ka muhil dawn ania aw. Tumah lo luhtir loh mai rawh" ka tih chuan eng emaw sawi tum niawm tak hian a ang zuau a, mahse ka hmelah zawhna zawh chi ka ni lo tih a hria a ni chek ang. Engmah a sawi leh ta lo. 

U Chhari chhuah hnuah ka u ka call a, rei pawh a ring hmain a pick thuaia, "Kan inah ka haw" ka ti nghal tawp. Ka thilsawi a hriat rualin a thaw deuh huai ri ka hre theia. 

"Ti nge? I riak phei dawn nge? ' dam thlap hian a rawn ti a. " Aih, ka haw ka tih chu" ka ti leh hmak. 

"Eng nge a awmzia? In inhau em ni? " Hlauthawng aw hian a rawn ti a. "Sawia fiah chi a ni lo. Ka muhil dawn. Ka dah ania" ka ti a, min rawn chhan let hun pawh nghak chuang loin ka off nghal a, ka phone switch off law law ka tum laiin Rempuia msg a rawn thlenga. "Rawn tlawh che ka tum a, a rem em? 'a rawn ti a. " Ka pa te inah lamah ka awm phei lawk dawna. Ka insiam meka, ka pa te inah Dar 3 velah lo kal la" tiin ka reply a. "Ok.. " a rawn ti ve nghal zat. 

Ngil atin chunglam melhin ka mu a. Engmah sawi lo a ka haw ngawt hi thil nindan tur a ni lo tih ka hria. Mahse, kan nupa boruak chhe lutuk hi tumah u Sangzela chhungte hrilh ka chak lo. Ka thusawi awih viau angin an lang pawh a ni theia, mahse an fapa leh an unaupa, pawnlama angel hi kei ai fein an hmangaih tih ka hre ve kar. 

Ka lo muhil leh a, ka harh leh chuan tho mai loin ka phone ka on te te a, dar 2 a lo pel vang tawh. Ka ril a tam deuh avangin ka tho chhuaka, u Chhari hnenah ei tur a awm leh awm loh ka zawt a, "Awm e a. Eng nge i ei duh ang? " a lo ti nghal sawt sawt. 

Thil ka ei zawh hnu lawkah Rempuia a lo thleng a, nidang ang bawkin hmuh a nuam lehpek viau. A pian a nalh bawka engpawh ha se a inhmeh viau vek mai. "I zia deuh tawh em? " Min en vang vang pahin a ti a. 

"Um, ka zia… mahse ka muhil tha thei lo lutuk" tha takin ka ti a. "Anih chuan kan inkhel tlaivar zak zak anga nimai lawm tiraw.. In pa a rawn riak phei ve dawn nge? " a tihzawm zata. 

"Aih, phei lo vang. Hnaah a buai a, chuvang ania helamah ka awm" ka tih chuan pangngai taka sawi ni mah ila ka hrawkah min hnawhtu awm ang mai ka ni. 

“Chuti anih leh a tha hlei hlei anih chu.Ka kal hmain dam vat la ka ti, Dine out naah lo kal ve hram thei la” a ti leh supa.”Engtikah nge i kal dawn?” ka ti thuaia. A kal hun tur a sawi chuan “ Ka dam hman mai ang. Diktak chuan na em em ka nei lo a,mahse ka muhil thei lo hian minti chau em a ni” ka ti leh niah niah.”Damdawi hman chi a ni em? Nge ni lem lo?” a ti leh a. Ka lu ka thing ringawt. Mangchhia vanga ka buai thin thu ka hrilh chuan a then suka, “ ka hre thiam che” dam thluam hian a ti a. 

“Ka ring chiah lo, mahni tawn loh lam hi chu kan hretham pawh inti ila kan lo hrethiam tak tak lo thin a” ka ti leh sapa. “ a dik alawm, kan hriatthiam dan a pawnlang thin a. Mahse i awih em ka hre lo nangin ka paltlang ve alawm” thutak zet hian a ti leh a.A sawi awmzia  hrethiam chiah lo hian ka en ha.

“Zanah i muttheih loh chuan kan sawi dawn nia. Tunah chuan ka kal a hun dawn a” nui chungin a ti leh thuai.

Gate thleng ka thlaha, a kal hnu lawkah Nu Sangi a rawn haw a, mak takin min hmuh vanga makti hmel a pu lo.”I zia deuh em? Thei lam ei tam la a that ka ringa, ka rawn lei haw paha” a rawn ti nghal mawlh mawlha. “Nimin khan helamah haw tir hle hle mai tur che ania. Vawiinah a rawn phei tir leh tho si che a” nui chungin a ti zui leha. “ Engtin maw i tih? “Ka ti nghat.”Oooooo, in pa mawle..Nimin a helama awm rih tura ka tih che khan a phal lo tlata, vawiinah lem min rawn call a. A buai vanga helama i awm rih a duh zawk thu a rawn sawi leh tho sia” a tih leh chuan min hmuh vanga mak ti hmel a pu lo kha a awmzia ka hre thiam nghal kuar. Chhungkaw zinga tu emaw ber an haw-in kan in lamah ka riak phei tih kan nula khan a lo sawi ngei anga, ka nu anih phei chuan u Sangzela a va be ngei ang. Achhan pawh kan in lama ka riahphei tur thu engmah sawi lawk a awm tlat lo.Ka awm loh thu ka nuin a fapa a va hrilh rualin phutzawk pawh awm loin mar atin dawt a lo sawi nghal zat tih hai rual a ni lo. Tenawm leh lutuk maia.

Ka pa rawn haw rualin ka rin loh lutukin u Sangzela a rawn kal tel ve a, ka luak a tichhuak ut ut thei. Diktak chuan engtin nge tunah ka awm zel dawn ka hre miah lo. Ka haw leh ang nge haw tawh lo vang pawh ka hre hek lo. Ka pa ka sawipui phawt hnuah ka awmdan tur chu ala chiang mahna le.

“Inthlanna lama kan buai zualpui hi han reh se karkhat vel lek chu chawlh lak ka ngaiin ka hria, kan nupain zin chhuak ila,hun thawl deuh pawh kan mamawhin ka hria. A peih chen chen helamah awm phawt se” ka pa leh nu Sangi hnenah a ti a. Ka pa engkim hrilh vek tum ka ni bawka a duh duhin rak vel mai mai tehse ka ti mai.

‘Ni e, inthlanna lam hi a pawimawh sia, inthlan zawh lamah chuan hun thawl a awm thei ang chu” ka pain a lo ti ve charh charha, engmah ka sawi ve peih buai lo.

Zanah nu Sangi damlo kan turin Rama nen an chhuaka, an chhuah hnu lawkah ka pa biak tumin an roomah ka lut a, phone a lo hmang meka, khuma thu chungin an room chhung ka thlek kual dan dana, ka nu awmlohna atangin la rei miah lo mah se thil a danglam deuh vek tawh thung. An tih danglam avangin sawisel ka tum huah lo va, mahse ka rilru erawh a na vang vang tho.

“Enge ni?” nem vak lo hian a ti a.A awki bung angreng tak chu ka tan thil thar a ni lo, diktak chuan Pasal ka neih hma pawh khan pafa inpawh han tihtur kan ni ngai lova, pa tawngduh leh titi thiam tak ni siin inchhungah erawh a nelawm lo thei viau thin bawk.

“Ka haw tawh lo mai dawn mawni ka ti, kan nupa kar a fel lo lutuk” ka ti deuh tawnga, thutthlengah a thu te te a. “Ka hria alawm,i nau chhiatna khan i rilru lam a khawih atin nih kha,i peih chen chen awm la,  duh hunah i la haw ang chu” ka beisei loh lutukin a ti ta daih.

“Mahse pa..chutiang lam a ni hleinem “ka ti leh hman chauha,” naktukah i nu nen rilru lam Doctor va hmu ula a tha ang. Nge in lamah kan ko zawk dawn ni? Midangin thil an lo hriat thawi hian a buaithlak thin a” a lo ti leh a. Ka sawi hma hauhin u Sangzela’n a lo titipui vek tawh tih hairual a ni leh ta lo. Ka thinrim zia chu sawi mai hian a fiah zo lo ang tihtur a ni. 

“Chutiang doctor ka mamawh lo lutuk, ka awmdan engkim hi ka hre chiang vek, rilru buaina ka nei lo hrim hrim. Engtin nge a lo hrilh che ka hrethiam alawm, dawtsawi heh lutuk” ka ti ta nghek.Tha taka sawi thei ka ni tawh lo.

“Chuti anih leh a tha anih chu, hahdam takin han awm phawt la, i inpeih zan hunah ila haw ang chu” a ti leh ta fo. Engmah ka sawi a awih dawn chuang lo tih ka manthiam ta vek. 

“Haw leh ka duh tawh reng reng lo,haw leh tur pawhin hetah ka lo phei lo, hetah hian ka awm duh zawk. A mizia hi hetianga inhmuh ang hi a ni lo teh ania” thinrim khur hlawk hlawkin ka ti leh ta tho. Lungawi lo tihhriat tak hian min rawn en a, “ I mizia ka hria che alawm, nang hi chu buaina siamtu i ni reng zel. Keima tihdik loh tawh a ni a, ka thunun tawk lo bawk che a, mahse tunah chuan pasal i nei tawha, i pasalin tha a tih angin a enkawl che a, chutah chuan sawi tur ka nei ve tawh lo. Mi pangngai khawsakin khawsa la i nun a nuam mai ang. Chu chu hre reng rawh, heta awm hlen tih lam kha chu ngaihtuah pawh ngaihtuah reng reng suh.Athuhrimah Sangzela anga mitha hi i damchhungin i hmu leh tawh lovang. Ani anga dawhthei tu che pawh hi i nu bak kha an awm lo, ani lah a awm tawh bawk lo va” thutawp sawi tihhriat tak hian a ti duaha. Atir lamah kha chuan tha takin min biaa, mahse tunah chuan a awki a hriamin min ngaithei lo hmel a pu ta bawk.

Mu chungin ka inngaihtuaha, helaiah hian min hrethiam tu an awm anga, kan nupa kar buaina zawng zawng sawiin min hrethiam takin kan inthenna tur pawh an buaipui ang chu ka lo tia, a teuh ta lo nasa lutuk hi u Sangzela nena kan awmdun lai ai pawhin ka thaw a pik ta mah mah zawk. Ka pa ka ngei em em a, engtin nge a fanu ngeiin ka sawi aia a makpa thusawi a lo pawm fel hmak theih ka hre thiam eih lo. A makpa chuan engthu pawh lo hrilh se a fanu ka nih angin ka thusawi a ngaithla tur a ni a, mahse a ti ta miah si lo. Ka fel loh thin zia a sawi ta nghek zawk chu ania. U Sangzela’n ka pain pasal nei tura min duh zia leh keimahni inah ngei hian lawm ka hlawh loh zia a sawi kha ka hre chhuak uar uar a, ka pa rilru a lo hriatchian zia ka hmuthiam ta veka, min lo tiduhdah em em pawh hi a lo mak miah lo. Ka nu ka ngai vawng vawnga, la damse ani chuan ka thlavang hauhin u Sangzela pawh a khak ngam anga, ka sawi dik leh dik loh pawh a fiah ngei bawk ang. 

Ka phone a rawn rik chuan ka en thuaia, NARUTO tih ka zuk hmuh rualin zana inkhelh puia min sawm kha ka hre chhuaka, ka chak lo teh nain ka rilru lapeng thei thil ka tih angai tih ka hriaa, ka pick ta hram.

“Um, Naru..” hello pawh ti lo hian ka ti a. “ I la muhil em lo maw?” a rawn ti zang vuha. “ muhil lo ve, i lut tawh mi?” ka ti nghal ngawt a. “ aih, ka rawn be hmasa phawt che, i khelh peih loh chuan luh pawh ka tum chuang lo a” a rawn tih chuan ka thaw hak mai. Ka thian dangte nen hian reitak lo inkawm tawh kan ni a, ani hi chu kum tam ka la kawm lo. Mahse, min hrethiam bertu leh ka thian dangte ai pawha thuk zawka ka pawh theih mihring a ni tlat thung.

“Lut ila” ka tih chuan, “ok..” a ti leh thuai. Phone ka off a, mahse a rawn call leh a, “ call boost mai ila pawi iti em? Zanin chu ka net a chiang lo riau a” a rawn ti leh a, “ok,a pawi hleinem” ka ti ve mai.

Kan thian dangte online an lo awm rih lo va, midang khelhpui loin duo-in kan khel a, khel dun thang kan ni bawka, kan game a inman tawh ngang maia, khelh pawh kan khel chhe lo viau. 

“Thomas-a a rawn lut anih hi” a tih lai takin Thomas-an reservation a rawn thawna, ka lo accept nghal vat.” ka accepted chiah” ka tih chuan a nui a, “ call hi kan dah mai dawn mi niang?” ka tih chuan min hnial lo.

Thomas-a a rawn luh ve takah chuan kan game pawh a dang ta deuha, Rempuia nena kan khelh laia khel tha viau si kha ka khel fuh thei ta der lo. Vawi hnih kan khelhho hnuah ka out san ta ngawt.

Melo-i msg a lo awm ka hawng nghala,” i zia deuh em? “ a rawn ti a lo ni a. “Ka tha e” tih chauh ka thawn leta, han sawi zawm leh tur pawh ka hre chuang lo.

“I awm lo chu i bengchheng viau pawh nisi lo hian a reh tawpa, mahse Mama a buai sia, i riakphei kha chu tha ka ti tho bawk si” a rawn ti leh duaha, “ i u kha misual leh tenawm anih kha” tih mai ka chak zek zek. Mahse a taka chet ngawt hian thil tha engmah a thlen dawn lo tih ka hria, chuta karah ka pa inchhungah hian lawm ka hlawh reng reng bawk si lo.

‘Ka riak rei lovang, amah kha chuan i duh chen chen atia, mahse naktuka lo haw mai ka duh” tha takin ka ti a. “Ooo,Mama khan a zin haw pahin rawn lam nghal che a tum a ni lawm ni? A zin chhung zawng riah a phal te chuan riak reng rawh, u Dpi kha chu a phalsak ngai miah lo ania aw” a rawn ti leh duah. A zin dawn tih ka hre eih lo. Min hrilh lo va, a lo kal pawh khan a sawi bawk lo. A haw hnuah pawh min rawn be zui lo hrim hrim. 

Reply mai dan tur hre loin ka awm ren rawn hnuah “ Nia,a remchang tho mai" ka ti ve ta ngawt. 

"Ka birthday lawm naah kan kal vek ang chu ka tia sin le.. A pawi e, ka ngei zawk che u.. Mama lah hi i tel loin khawiahmah a kal peih bawk si lo" a rawn ti leh duaha. "Um, a zia lo tak tak a ni. Ka rilru a hnual ve lutuk riha, engtihmah ka peih lo" Ka tih leh chuan, "ka hre thiam che alawm. Engpawhnise, I lo haw hunah thil ka hrilh ang che. Muttui phawt" a rawn ti leh a, ka mangtha ve bawk. 

Phone pawh khawih tawh chuang loin ka mu a, ka tawt lutuk awm ngaihna hre lo ka tho leh hluai thin bawka, awmdan tur ka hre lo a ni ber mai. Ka u biak ka duh rualin hmaichhana biak tha ka tih avangin phone chuan ka be nawn duh ta lo. Faki ka ngaihtuah chhuaka, ani hi ka cousin anih mai bakah kan inneihnaa ka dinpui a ni a, harsatna ka nei anih chuan ani hi ka tihbuai tur niawm tak a ni a. Mahse, cousin kan nihna mai bak chu inkawmngeih tak kan ni lo va, thil zawng zawng share tur chi niin ka hre thei lo. Thian atana hmeichhia aia mipa kawm tam zawk nih avangin hmeichhia thil zawng zawnga rinngam tur thian ka nei eih lo va. Pasal ka neih hnu leh nupa kara neuh neuh kan neih atang chiah hian thian hmeichhia, engkim ka share ngam tur ka nei lo hi pawi ka ti ve tana, ka u awm tho mah se a nau ka nih angin thil tha tura angaih lamah min nawr lui fo a, a bulah u Sangzela sualna zawng zawng sawi a harsa thin. Ka thian mipa te ho hi fel leh rintlak em em mah se ka share ngam chuang tlat lo va. Ka share dawn anih pawhin Rempuia bak sawipui tura duh ka nei chuang lo. Midang an rintlak lo tihna phei chu a ni hauh lo. 

Ka phone nghawr dat vangin ka phone ka en thuaia. "I muhil tawh mi? " Narutoa'n a rawn ti a. "Aih" ka ti let thuai. "I muthilh theih i ring em? " a rawn tih leh chuan tlang takin ka theih ka rin loh thu ka hrilh a. Msg rawn reply tawh loin min rawn call ta zawk. 

"Titi mai mai ila, chuan i duh leh i harsatna te min share anga" a rawn ti a. A aw pa leh nghet cherh chawrh, dam thlup lawi si hian min ti hahdam thin tih ka pha lo. 

"Sawi tan dan tur ka hre lo" ka tih chuan a thaw deuh huai ri ka hre thei a. "Min hrilh duh loh chuan ka nawrlui lo che ania. Mahse, hahdam turin ka duh che a, ka paltlang tawh thil paltlang ve tho inih vangin ngaihven loh che harsa ka ti bawka. Inbiak hi i duh loh chuan sawi hreh suh" a rawn ti leh a. 

"Duh lo chuang lo e, ka muhil thei chuang lo va, titipui tur an awm chuan a tha zawk alawm" Tha takin ka ti leh mai. "Um, thil ka zawt che anga, chhan chi loh anih chuan sawi la.. Ka hmuh dan che hian i hlim lo, I nau chhiat vang ni loin.. A dik em? " a ti leh supa. "Aw, dik' ka ti ro halh. 

"I pasal a fela, eng nge buaina ni ta ber? " a rawn tih leh chuan duh aiin ka kalthui dawn niin ka hria. 

"Ka ipik a ni tawp mai, midang vang pawh a ni chuang lo" ka ti zuai raiha. "Ok, ka hre thiam che.. Ka la hrilh ngai miah lo che a, mak pawh iti viau maithei, Dpi kha ka cousin anih kha" a rawn tih chuan ka phawk nghal hra maia. 

"Chuti maw? " ka ti nghal thuai."um, ni e.. Ka nu lam a ka second cousin ania. Ka nu ka tih khan ka nu tak tak aw" a rawn ti zui leha, a awki zuai deuh ruih chu ka hriat hmaih hauh lo. Nu tak tak a nei hran tih ka hriat vawi khatna a ni a, Dpi a cousin a lo ni phei chu mak ti tak ka ni. U Sangzela nen an inhria tih ka hria a, mahse u Sangzela'n a thawi pawhin a sawi eih lo. 

"Khawvel hi a va zim tak" ka ti ta ngawt. Hriat nuam tak hian a nuia. "Khawvel mai pawh ni loin Aizawl hi a zim em atin ni. Mahse, Dpi nena kan in cousin tih hi chu hria an tam vak lo vang. Ka nu boral hnu hian ka nu chhungte lam ka pawh ta meuh lo va" a rawn ti lehzela. A mimal chanchin ka hre ve nial nuala. A pa hi college lar taka principal kalchhuak tawh niin a nu hian an dawr lian leh hlun tak mai a enkawla, nau hmeichhe pathum neiin amah hi mipa awmchhun leh unau zinga upa ber a ni bawk. Chhana cousin a ni a, a chungchang pawh hi Chhana hnen atanga hria kan ni a, mahse a nu hi a nuhrawn anih thu vawikhatmah a la sawi ngai lo. 

"Ka nu boral chhan hi keimah vang a ni a" Sawi harsa tih hmel tak hian a rawn ti a. "A van pawi tak" ka lo ti sep ringawt. "Um, nia.. Ka thih ai a thi a ni ber ang chu. Naupangte ka nih lai niin mangchhia ka thanlenpui a ni ber" ati leh a. Ka lo ip chawih mai. Nau ka chhiat atangin mangchhia ka nei tan ve chauha, zan tam pawh anih hmain ka mangang em em a, mangchhia han thanlenpui tawp mai hrehawm dan tur ka hrethiam vek. 

"A van hrehawm dawn tak, tunah khan a reh tawh em? " ka ti leh sapa. " Reh fel ni lo mah se ka buai ta vak lo" Nui chungin a rawn ti a. Engtin nge a nunna thil thleng hrehawm tak nui chunga a sawi theih ka hre lo. 

"Dpi ka cousin a ni tih ka hrilh che kha ka hrilh ringawt lo che ania aw.. " thutak zet hian a rawn ti leh daiha. Hun reilote chhung khan keima buaina lam theihnghilh vekin amah ka ngaihtuah tih ka hre chhuak ta chauh. 

"Ti nge min hrilh a? ' ka ngaihtuahna tilang loin ka ti dam thlapa. " Pakhatnaah chuan i hlim lo tih ka hria a, Dpi pawh khan inneihna kha a hlimpui lo tih ka hria.. Rilru lama chiang lo ang maia treat inih ve loh nan ven him che ka duh, ka cousin ka venhim zawh loh tawhna ang kha tihsual nawn ka duh tawh lo" Inringtawk tak hian a rawn ti a. Ka sawi hauh lo chungin kan nupa kara thil fel lo awm hi a rinhriat vek tih ka man thiam ta kuar. 

"Naru… " ka ti sep ringawt. A dang sawi tur ka hre lo. 

"Ka thian i ni a, mahse ka buaipui dan che hi thian bak a ni tih ka inhai bik lo. Venhim che ka duh"  Fiah takin a rawn ti dam leh thlup. Ka hmui ka pet fan fana, ka nun hrehawm lutuk hrethiam tu ka nei ta chuan ka tah a tichhuak a, mahse tah ngawt ka duh der lo. 

'Engmah buaina ka nei hleinem" Luhlul chhuahin ka ti a, ka rinai takin ka sawi mar tha phian bawk. "Min ring rawh, ka cousin laka ka tih tak loh zawng zawng kha tih ka duh" Luhlul takin a rawn ti ve thung. "I cousin khan buaina a neih avangin keiin ka nei ve tihna a ni hleinem" ka ti leh talha. "Ok… a tha alawm. Mahse, I sawi vang ngawtin ka hlatsan dawn chuang lo che ania" a rawn ti leh hmiah. 

"Ka dah phawt ang aw, a tlai tawh em mai' Ka ti ta daih. A rawn tawng hmain ka mangtha nghal vata, ka off zui hmak bawk. 

Ka phone nghawr dat datah chuan msg a rawn lut tih ka hriaa, mahse ka en duh rih lo. " Dpi khan inneihna kha a hlimpui lo" Tihlai kha ka bengah a ri nawn tluk tluka, u Sangzela hmel ka mitthlaah a lo langa, vawilehkhatah thil ka ngaihtuah chhuak nghal thut a, Dpi kha a that a ni maithei.. Keipawh khan nau ka chhiat satliah ni loin amah vautu sawi ang ngei khan min tihtlaksak zawk a ni thei bawk. Aw LALPA.. Engatinge hetiang mihring rapthlak em em hi ka pasal atan min pek ka ti vawng vawng mai. 

Reife hnuah ka phone ka en a, ka rin ang ngeiin Naruto msg a lo awm a. " Ka nawrlui che anih chuan sorry aw.. Chuan, min hlau lo la ka duh che, thian aia thuk zawk feelings ka nei dawn anih chuan ka feelings ka control thei ang. I tana him lo turin englaimahin ka che ngai lovang.I vantirhkoh ka lo ni ang. Chu chu ka duh ber"

Ka chhiar zuah rualin ka thaw deuh kawka, ka muttui a rawn hnam sawk bawk. Nupui pasal neih hnu a midang ngaihzawn ching tluka huat ka nei kher lo vang. Mahse, u Sangzela mize mak leh hlauhawm lutuk hrin chhuah chu a nupuiin midangah himna ka zawn angai ta si hi a ni a. Tunah chuan kan pahnih inkarah inngaihzawnna lam a awm lo ve ve. Mahse, hun a kal anga, Zorempuia ang bawk hian keipawh hian thian baka ka ngaina zui dawn anih chuan ka incontrol thei ang tih ka chiang. Mahse, ka vantirhkoh anih duh phawt chuan ka hnar phal ngai lo vang tih pawh ka chiang tel tho bawk. Achhan chu keimah ringawt chuan u Sangzela hi bei chi ka ni lo. Khawiah pawh min tlankhalh zar zar dawn tih ka hai eih si lo. 

Kar a liam leh chuan u Sangzela'n min rawn lama, hnial buai loin ka zui haw ve mai. An bula ka awm chhungin nu Sangi nen buaina kan nei lo. Mahse, ka pa erawh ka ngei em avangin ka be ngai mang lo. Ka awm chhunga ka hriatchian em em chu ka pa aiin Nu Sangi a lal zawk a, ka nu-in zah taka engkim ka pa thu anga a kaltir thin nen kha chuan danglam tak a ni. Mahse, nu Sangi a a lo va, ka pa rawn vek anga lang siin thiam takin thil a tikuala, chutihrualin kei hian pasal then tak tak tum ila khawiahmah ka tan hmun a awm lo tih ka manthiam vek tawh. 

Motor atangin pawn lam ka thlir vang vanga.Ka hmalam hun tur ka ngaihtuah a, kawng khat bak thlan tur ka nei lo. Ni e, Politician nupui ka ni a, ka pasal hian politics a khelh ang maia ka nun hi khelh kual a tum anih chuan keipawn politician nupui diktak anga nun hi ka tum tur a ni ka ti ve hmiah mai. 

Ka nuin min lo be sawk sawka, "I hmel pawh hmuh a nuam ta deuh alawm. Chaw in ei tawh nge la ei lo? " a lo ti a. Kan ei tawh tih u Sangzela'n a hrilh a, "Mama, naktuk zingah in lamah kan va phei lawk dawn em ni? Hun i nei angem?" ka pain a lo ti ve a. Melo-in min rawn hmuh chuan a rawn phul nghal hlut bawk. 

Roomah kan inzui chho a, ka thawmhnaw ho ka phawrh a, ani erawh inbual turin a lut ve thung. A zin bag chhuata a dan chu ka en vang vang hnuah ka hawng a, a thawmhnaw bal suk ngai ho ka enfel saka, a thawmhnaw bal ho a hranin a lo pack hrang thlapa, pa chefel tak anihna lai tak hi amahah chuan thil tha ve awmchhun nimaiin ka hria.

Melo-i roomah a rawn lut a, "khawnge Mama kha? " a rawn ti nghala. Bathroom lamah ka thle zauh. Ka bulah a rawn thu a, ka haw huna thil min hrilh a tum thu a sawi kha ka hrechhuak zawk. 

"Eng nge min hrilh tur chu? ' Ka ti nghal zat. A thle deuh ha a, " Rinzuala nen kan inthen" a ti hul hak. Phawk hra hian ka en a. "Chuti law? Ti nge a? " ka ti hluai. "Ka peih tawh thlawt lo.. A puitling lo leh lutuk" a ti hlaka. Rinzuala hi a lo leng fo va,ka lo hmuh ve mai mai dan atangin Melo-i sawi hi a dik ngei ka ring. 

"A van zia lo te han ti ngawt ila, nangmah zawkin i then anih hmel bawk si" nui deuh chungin ka ti a. "Um, ka then alawm. Ka rilru chu a na ve reng. Mahse, inneih sawi hlek apianga chhuanlam a nei hi ka tithei thin lo" a ti leh hlak hlaka. Melo-i hi kum 32  a ni tawha, tunlaiah mi hi an innei hma lutuk tawh lo nangin kum 32 vela ngaihzawng ten inneih an la duh loh fo chuan hmeichhe tan chuan inzui reng a harsa ve talh ang. 

"Eng nge a chhuanlam ber a? ' ka ti leh sa sa a. " A hmain hna a neih loh vang a ni phawt a, hna a neih hnuah insak a chhuanlam leha, ka la hre thiam. Tunah a nau lehkhazirna chungchang a sawi leh a, awi ka hne tawh" Thinrim tak hian a ti tan tana. Rinzuala hian Melo-i duh em em siin neih atan a duh lo anih ka ring ta thut. Mahse, sawichhuah chi a ni lo tih ka hre ve kar. 

Thildang kan sawi leh hmain u Sangzela a rawn inbual zo a, Melo-in an zinna chungchang vel a sawipui ta daih. 

Thla a liam leh meuh chuan kan inthar lamah kan insawn fel tawha, Atea pawn nupui a nei fel tawh bawk. Mangchhia vangin ka buai tlem tial tiala, ka buai loh chhan pawimawh em em chu muthilh ka tum hian Rempuia'n min rawn call a, inbe chuang loin rei tak tak on call-in a daha, an office a thil thleng mak tak tak te sawiin a titi a, chu chuan min awi mu thin. Ka muhil nghet tih a hriat hnuah a off chauh thin a, mahse chin than a ka neih zui zel hlauin tunah chuan mut dawnah min lo call ngai tawh lo. 

U Sangzela nen kan inhau ngai lo va, a tul tawpah lo chuan kan pahnihna kan awmin kan inbe ngai lo. Mahse, midang awm lai chuan kan inbe pangngai vek a, midangin an sawi zeuh tura awm kan duh lo ve ve. Keipawn hetianga nun hi ngaiah ka nei ve tan tawha, a hrehawm tihna em em pawh ka nei ta lo. Mahse, mak tih em em ka nei a, mipa ni si, sex mamawhna nei miah lo ang maia a awm hi ka hre thiam phak lo. Nau ka chhiat hnu atang khan vawikhatmah nupa nun kan la hmang leh miah lo va. Pawi tihna ka nei hauh lo chungin mak erawh ka ti thlawt. Achang hi chuan ka u hnenah hetiang hi nupa awmdan a ni reng em tih zawh ka chak thina, mahse nupa karah pawh thuruk ril ber ni a ka hriat avangin ka zawt leh duh lo thin. 

Dawr a ka awm laiin Rempuia'n min rawn call a, ani pawh hi Lawngtlai lamah a phei fel tawh a, nitin ka that leh that loh min rawn zawt ngei ngei a, ka ngaina em em a. Ka ngainat dan hi nulat tlangval lam hawi ni loin, unaupa ang maiin ka en niin ka hre thin. 

"Hello.. " Zangkhai vah hian ka ti a. "I aw hriat a va nuam ve a. Khawnge i awm a? " a rawn ti dut dut. "Dawrah ka awm mek, I va awl awm ve a? "  ka ti nghal zata. "Awl chiah, ka lo haw phei dawn a" a rawn tih chuan ka khek raih mai. 

"Engtikah nge? ' Ka ti nghal chula. " Kartharah ka lo phei ang. Bike ka la dawn a" a rawn tihzawm leha. "Eng bike nge? Ka khalh ve dawn ania aw" Engahmah hmain ka ti ngawt peka, hriat nuam tak hian a nuia. "Helamah ka keng phei dawn hleinem, I duh leh lo kawl la" a rawn ti dam thlupa, a aw a min duatna lang chu ka hriathmaih hauh lo. 

"Naaa, Bike khalh ta vut vut ila miin engtin nge min sawi i rin? Pawnlam landan atanga midang mizia sawi thin kan nih hi aw" ka ti leh zat zat. A nui huk a, " Nang nge nge thil i sawi thiam thin e. Ka dah phawt ang aw. Inleng ka nei dawn a" a rawn ti a. Phone ka off hnu thlengin ka la nuisang mai. 

Kan nupa-in u Sangzela thiante in a chawei tur kan nih avangin dar 3 velah dawr atangin ka haw a. Ka inbual zuai hnuah ka insiam zuia, tun hnaiah ka taksa tihfit tumin ka bei nasa em em a, kan nupa bak chu kan nula te pahnih leh Driver te nen kan chenga, mitmei han ven vak tur an awm lo bawk nen, eng emaw takin ka free viau a, ka duh duh ka ti a ni ber. 

Nidanga chaweikhawm kan kalna thin ang bawkin Ram hruaihna a thawhpui mi langsar pui pui an lo awm leh teuh maia. A thianpa pawh hi Minister ve bawk niin an nupa inneih anniversary lawmna a ni nghe nghe a. Ka pa leh nu Sangi pawh an rawn tel ve bawk. Ka pa hi huat loh ka tum teh nain ka la ti hleithei lo chu a ni ber mai. 

"I awmdan hi a mawi lo thin ka ti, khatia mi zinga han nuih chiam kha a tul lo viau ania" In kan thlen hnu, ka inthlak laiin a ti ta chat. 

"Nuih vang maia awmdan mawi lo anihna a awm pawh ka hre lo ve" Ngawi duh loin duhdah angreng tak hian ka ti a. "Nuih ringawt chu mawi lo hran nang, mahse nanga nui te chu over hek che" a ti bul hmuk. Ka kawr khumah ka theh thlaa. A mitah tak ka en a. " Ka nuih dan kha i ngaikawi anih kha, tuman i ngaihdan ang khan an ngai ve lovang. I inti hah peih mai mai" Ka ti ta hmak. 

"I awmdan ka sawisel che hian min hnial lo hian zawm ve mai teh" a ti leh chu " Min sawiselna hi siamthat tur awm chu ka siamtha. Bike ka khalh i duh lo va, ka khalh lo mai. Band-ah tel suh i tia, ka tel lo leh mai. Abak min sawisel na hi chu awmze nei lo insawiselna ania. Siamthat tur a awm lo" ka ti ve ta hmak hmak. Engmah a sawi tak loh avangin ka thawmhnaw khai that tumin ka kalsawna, mahse ka rin loh lutukin hnung lam atangin ka kawngah min rawn kuaha, ka darah a rawn fawpa, ka ip chawih mai. 

"Inbual ila.. " a ti supa. Hetiang tawngkam dam leh duatna hi ka dawn lohna chin pawh ka hre tawh lo. Mahse, ka dawn tak avanga keimaha danglam erawh engmah a awm chuang lo. 

"Lo va inbual rawh" Min kuahna phelhsak pahin ka ti a. Ani leh ni lo ang takin ka sawi angin  a awm ve mai bawk. A awmdan inthlak danglam thut chu mak ka ti ngang mai. 

Mak ka tihna tizual turin mut hnuah pawh a che zui ta zel. Ka rilru-ah hliam dam thei lo a tam lutuk tawha, phurna pakhatmah ka nei lo. A che vel chu puih pawh tum lo in ka awm ngaiin ka awm mawl tawpa, ka la hriat ngai reng reng loh thil thleng zuiin thil anih dan pangngaia thleng tur aia uchuak hret vekin a thleng zui ta bawk. 

Zinga ka harh chuan a lo tho leh daih tawha, zan lama thil thleng ngaihtuahin ka mu deuh vang vanga, a chet dan kha mi pangngai chet dan tur niin ka hre chiah lo va, mahse hetiang lamah hian ka dai chin a tawi em a, ka hre lo mai mai zawk anih ka ring leh ta deuh. 

Thil thleng vang a kan nupa kar danglam dawrh tura ka ngai anih chuan ka tisual chiang viau ang. Engmah danglam a awm chuang lo va, roomah phei chuan min be leh ta meuh chuang lo va, mut naah pawh min khawih tumna nei awmin a awm zui hek lo. Mi mak hi chu a ni ve chiang thlawt. 

Karthar a lo thlenga, Rempuia  rawn haw a. Bike a lakchhuah niah Aruata nen min rawn tlawh nghala, Dawr kawtah thui lo te ka khalh kual saka, hun rei tak hnu a bike han khalh leh chu mumang te a ang rum rum maiin ka hria. Kan in a zanriah ei turin ka sawm a, phur zetin an rawn kal ve mai bawk. 

U Sangzela engmah ka hrilh lawk lo va, a rawn hawin a hmuh chuan a hmelah engmah lawmlohna a tilang lo. Rempuia hnenah a awmna hrehawm a tih leh tih loh te a zawt luam a, Aruata nen pawh Aruata hna khawih mek a bill tang chungchang an dun bawk. 

"I awmdan hi eng at so na nge ni ngai? " an haw hnua room a kan awm hnuah a ti ta chat. Kan inhauh ngeih ka rin sa avangin a tawngdan ngeiawm tak chu mak ka ti eih lo. 

"Eng atso na mah anih ka hre hleinem, chaw ei turin ka sawm a, an rawn ei anih kha" ka ti liam puat. 

"I duh chuan i sawm thei, ka sawisel lo che. Mahse, min hrilh hmasa tur i ni lo em ni? " a ti leh a. Tun tum chu a tanna a dik thlap. "Nih chu ni e, ka hrilh theihnghilh che anih kha" ka ti leh mai. Bathroom a luh ka tum chu ka hmaah tak a rawn dinga, "nang hi ruih i nei em? " a ti bung vut. Thle deuh ha chungin ka nui a. 

"Nei ta ila engtin nge min tih ang? " Ka ti nghat. Zanin chu chhaih thinrim ka chak zek zek. Engmah sawi lo in min en renga, a tawng tak lohah chuan hel tumin a sir lamah ka kal a, mahse ka pen tan chiah chu ka banrekah manin min phih let nawk. 

"I awmdan hi ka duh lo, zirtirna pek i ngai anih hi" a ti zui a. Min pawt dawr dawra, thutthlengah min nem thu chawrha, min nem thut rual deuhthawin ka tho ve nghal at thung.Min rawn ban leh chiah chu a kut ka lo mana, mahse ka man nghet hman lo. Min nem thlu leh pawpa, a khupin min rawn nawr beta. Hnai takah min rawn en a, "Hmana ka sawi kha ka sawi nawn leh ang. I thiante tumah ka duh lo. Abik takin Rempuia, I Naruto phei hi chu ka duh lo lehzual. I kawm lui zel anih phei chuan a hna hian a tuar thuai ang. Lawngtlaiah ka dahphei tawha, a lo la hla tawk lo zawk nge ni? " Thinrim sehchilh rawp rawpin a ti a. Chutia a pawisawi hlek lo tu chunga kut a lek vel chu huatna hian ka khat vek. 

Thawhchhuah tuma a tho kang deuh chiah chu a kutah ka man thut a, ka theihtawpin a banah ka seh nghal chat bawk. 

Rum nghut chungin min namsawn a tuma, mahse ka thlah duh lo. Vawilehkhatah min nem pawp a, ka dulah a rawn hnek zui a, ka hit chhuai maia, ka thlah lo thei tawh lo. 

A ding chhuaka, a ban ka sehna a en a, a lu thing nawk nawk chungin min rawn thut bet leha, na lutukin ka malah a chum leh pawp pawp a, ka insehruh nasa teh nangin ka rumchhuak kawk tho. 

Note : In comment ka reply ngai lo che u a, mahse ka chhiar vek zel ania aw. Ka mit a chak tawk lo lutuka, story ziah nen ka tlin thin lo😙