Naruto -9

 Then -9na

"Engtin maw i tih a? " mak ti aw hian a ti lawi rut. Ka din ngaiin ka ding ngil at a. "Nau ka pai a, thla hnih hmel a hmu tan tawh. Tun tum hi chu pai tlang ka duh tawh a, khawngaih takin engmah ti tawh suh" Inringtawk takin ka ti leh a.

"Ni lo, eng maw? I rai a, chu pawh thla hnih hmel a hmu tan tawh a, engatinge engmah ka hriat loh? " a ti buh deuh nuai a. "I hriat chuan eng nge i tih leh dawn ka hre sa vek, kan pahnih hian kan duh emaw duh lo emaw nupa kan ni tawh tho tho a, naute hi pai tlang ka duh" ka ti leh khawl mai. 

"I titla leh anih loh chuan i paitlang ang chu" a ti nghut. "Ni lo ve, ka ti tla reng reng lo. Chutianga misual ka ni lo" ka ti tawk. "Keipawh chutiang khawpa sual ka ni bik lo" a ti hul huka. Ka thaw haka.. 

"I duh emaw duh lo emaw a thleng vek tawh a, buaina nei lo thei ang bera awm hram hram ka duh. Ka theih ang angin ka hlat che anga, nangpawn min hlat la, inti buai lo tawn ang" ka ti leh chu a dar a ti chhing a. "Min ngai sual leh lutuk anih kha" a ti bak hluk. "Ka ngaihdan che aiin ka hmuhdan che hian thil nihdan a tichiang zawk" ka ti leh nghat. 

Chhuata cd bawm ruak let reng chu ka rap hrual leh a, chhar pawh chhar duh tawh loin room atangin ka chhuak ta nal nal. Awlsam takin Pipe tawn nan an hman thu sawi mah se, ka chhungril hian a awih therte lo. A zin hian tu nge a zinpui dawn ka zawt ve fo a, a tlangpuiin sawrkar lama mi pawimawh anni fur zela. Hmeichhe hming hi chu sawirik a ni ngai meuh lo. Mahse, kha Cd kha a boxer hnung ipte atanga lachhuak ka ni a, pipe tawn nan hmang se engvang mahin a boxer ipte-ah a ak lo vang. Uirena hi ka huaa, englaimahin ka pawmthiam thei ngai lo va, tuna u Sangzela ka rinhlelhna pawh hi a dik ngei ka rin avangin ani nena nupa nun hman leh hi ka thei angem ka hre rih lo le. 

Dawr a ka awm laiin ka nuin min rawn call a, "Arin,vawiin chu thil lawm tur kan nei a. Chaw rawn ei phei ru aw. Mama hi ka be hleithei lo va. A zin lai a ni em? " a rawn ti lang lang a. "Zin lo ve. Signal a nei tha lo satliah mai mai aniang. Eng nge kan lawm dawn a? " Phurna tak tak nei miah si lo hian phur hmel takin ka ti a. "Ka sawi duh rih lo. Tak takin, kan lo ring ang che u aw. Bawngsa ka lei teuha, ka lo chhum hluah dawn nia" a rawn ti leh a. Ka mo tirh lam kha chuan inhre pawh sa vek ni mah ila inthlahrunna a bo chuang lo. Bawngsa chhum ka duh zia pawh hi kum dawn kan inneih hnuah an hre ta chauha, ka pa hriselna avangin an ei ngai meuh lo zuia. Mahse, ka duh tih ka nuin a hriat hnuah kha chuan kan ei ta fo thung.

U Sangzela msg ka thawna, ka nu-in chawei turin min ti tih zawng ka va hrilh a, a seen nghal nangin a rawn reply lem lo. Ka nu te in lama ka phei hmain ka haw leh phawt a, khua a lum uap churh avangin ka thlan ban chuapa, hmanhmawh lo taka ka intleuh hnuah insiam mai loin Rempuia ka be leh a, nau ka pai tih a hmain ka hrilh tawha, "Eheu!!! A va han lawmawm em" a ti hluai a, min lawmpui tak tak tih hai rual a ni lo. 

"Eng nge i an a? Naute a tha em? " a rawn tih chuan ka nui a. "I over em maia. Thla thum pawh ala tlin mumal loh hi" Nui hak hak chungin ka ti a. "Oooo, a that leh that loh ka hre ve chak animai lawm. In pa a lo haw tawh em? " a rawn ti leh a, a lo la haw lo va, ka nu te in lamah chaw kan ei phei dawn tih ka sawia. Thil ho mai mai kan sawi leh hnuah ka daha, ka kawr hak tur ka lakchhuah chu ha mai loin darthlalang hmaah ka dinga, ka tai puar ve deuh chu ka khawiha. Ka rilruin ka tawngtai pah bawk. 

U Sangzela'n engmah a rawn sawi loh avangin keimahin ka nu te in lam ka pana, Melo-i a lo haw tawh a, ka nu te nen kan pathumin verandaah kan thu ho a. "Eng maw kan lawm tur? "ka tih chuan ka nuin " Naktuk tuk leh hi i pa piancham ania, amah ber a zin dawn avangin vawiinah kan sawn anih hi. Chuan Matetei a ruak lo bawka" hlim takin a ti a, "ehe.. Chuti law? A va lawmawm, mahse ka pa birthday kan lawm tel dawn tih i sawi lo va, engmah ka lei miah lo asin" ka tih chuan, "a ho mai mai, engmah leisak angai lo. Christmas-ah a duh ber i present tawh kha, leisak lehna khua a la tlai lo. In lo leng khat bawk si a, hetia lawm tur neih paha awm khawm hi alawm ka chak" hlim takin a ti leh zung zunga. Melo-i ka en a, a hmelah Chuan nuam tih lohna ka hmu thei a, Atea nupui rai thu ka nuin a sawi khan a hlim nasa mai si, kei lah naupai ka harsat nak laiin ka lo chhiat ve leh bawk nen, Melo-i zawk hi ka lakah a lo inthlahrung anih ka ring ve tawp. 

Sangtei te chhungkua an lo thlen ve takah chuan a fate an nung tha vat vat bawka, kan ri ta chel chul a ni ber. Sangtei hi a zaidam em em a, a fate harh lutuk pawh hi a hau ngai mang mang lo va, an pa erawh a zaidam lo ngang mai thung.Atea'n " Mami pasal leh au Me-i hi innei se chuan an inthen hma teh ang chu" a ti fiamthu thin a, Melo-i hi chu viak tha leh daihzai tak, mize zang vah leh che zung zung chi, awki pawh ri ve thak mai a ni a. Sangtei pasal nen han innei tak tak ta se an innei rei viau kher lo ang. Mahse, nupa tur hi Pathian hian a lo ruat thiam khawpa, pakhat a zaidam viau chuan pakhat a thinchhe deuh a, an inmil phian zel zawk. Kan nupa ka ngaihtuah a, kan inmil lo em em reng ringawt mai hi ka hre thiam lo. Pathian ruat chu kan ni ve tho awm si ka ti vang vang mai. 

Dar 7 velah u Sangzela a rawn thleng a. Hminga nen paper bag-in thil an rawn khai bawr luk luk a. Ka nuin eng thil nge a lo zawh chuan chawhmeh siamsa thenkhat anih thu a sawi mai. Kan han awmkhawm chu ka nuin nuam a ti em em maia, a ri chel chul a ni ber. Matetei erawh a mona a la rei lo deuh bawk a titi ve bawrh bawrh mah se inthlahrung hmel ka hmu thei tho. 

Ka bulah u Sangzela a rawn thu a, ka nu hnenah eng nge kan lawm ber tur a zawh chuan min chhan ang tho khan ka nuin a chhang a, "keini pawh lawm tur kan neih ve tho vang ania thil ka rawn ken teuh ni.. Arini hi a hlauhthawn tawh em avangin kan la sawi chhuak lo a. Tunah hian thla thum hmel kan hmu ve lek lek tawh ania" u Sangzela'n a tih chuan an nui tha hlawm maia, an hmelah chuan an lawm tih hairual a ni lo. 

Chawei khamah Melo-i roomah Melo-in ka ke zungpui tin lut min khawih saka. 

"Enge Rinzuala lam te? " ka tih chuan, a tlak karha. "Tun tum chu ka ti tak tak ka tih kha, ka nihpui tawh dawn lo" a ti hmak hmaka. "Ok.. Mahse, I upa ve zel sia. I hnawk tihna lam ni loin pasal neih hi a tha ka ti" a rilru tihnatsak hlau tak hian ka ti leh a. A thaw deuh huaia, "a dik alawm. Ka ngaihtuah nasa thei lutuk. Pathian zarah sum lamah chuan buai viau lo mah ila nakinah chuan hnawksak hi ka la ni ve mai dawn a. Aaa, rei deuh lo inzui pawh hi a ni ber lo ve a" a ti deuh duah. "A la insiamtha leh mai ang" ka ti ve ngawta. Then nak pah hian, "ka ring lo. A nu fapa ania. A nu thu thu animai" a ti leh hlak. 

"Rai hi i haw vak lo anih hi tiraw? " a ti leh daiha. "Um, ka vannei lutuk. A hmasa zawkah pawh khan han buai em em ka nei lo va, tun tum pawh hi ka buai lo viau mai" ka ti ve mai. 

"Nia, a tihzia e.. Matetei hi chuan a haw reuh lutuka, amah pawh a cher deuh kiam hi maw. Chutah a no chi a lo ni ve bawk si" a ti leh a. "A haw chi tan chuan a hrehawm ve ngawt ang. Keichu ka rai khan ka tlangnel tawh em zawka, ani hi chu ala mo thar ve nen, a hrehawm ngawt ang" ka tih chuan a bu nghat nghata, "hei vang te hi ania pasal neih ka peih loh ni. Pawi lo, in fa te pakhat tal ka chang mai ang" a ti leh chu kan nui dun hawk hawk mai. 

U Sangzela'n min rawn koh takah chuan kan inzui chhuaka, dar 10 a lo hnai thuak tawh. "Naktukah i hman chuan dawrah lo kal la, I ke kha kan khawih zawm leh dawn nia" Melo-in atih chuan ka bu nghat. 

A inbual zawhah ka intifaia, kan dan pangngai ang bawkin kan inbe leh mang tawh lo. Hrehawm tihna em em pawh ka nei tawh chuang lo va. Inbiak loh hi chu ngaiah ka nei ve tawha, Inhau lo leh intibuai lo a kan awm hian a hahdamthlak ka ti tawh mah zawk. 

Ka hmaia thil ka hnawih lai mekin a phone a rawn ri a, ka ngaihven sak lem lo. A rawn rik nawn leh takah chuan ka va en a. Hming lo lang chu ka hriatfo hnu niin ka hria a, a pawimawh ringin ka pick up nghal ta thuai. 

"Hello… I va pick thei lo ve" Tlangnel taka rawn titu chu ka hriat fo hnu niin, mizo Zaithiam langsar tak leh kan band nena inmil lo tak band member zing a mi a ni bawk. 

"Champui, hei a phone a kalsan lawka" ka tih chuan a thaw haka. "Awi, Arin, nangmah zawk maw? I dam em? " zangkhai vah hian a rawn ti a. Tuina inang kan ni a, inkawmngeih ni lo mah ila kan inbe ve fo. "Aw, ka tha e. I tha zawk maw? " ka ti ve thuai. A that thu a rawn sawi leh zung zunga. U Sangzela a rawn lut ve chiah a, "lawk aw. Hei amah a lo kal a, phone kan pe ange" Tih pahin u Sangzela phone ka pe a. An inbe zui nghal mawlh mawlha, an inbiak danah chuan hna chungchang an sawi tih ka hria a, sawrkar hna a thawk tih ka hre tho chungin eng deptah nge tih leh eng tak nge anih ka hre lem lo thunga, bakah ka pick up tirh a a rawn tawngdanah khan an innel tawk hle tih a hriattheih a, tun hmain an inhria tih ka hre ngai bawk si lo nen tlem chuan mak ka ti deuh. 

Ni hnih a liam leh hnuah u Sangzela khawthlang lamah zan khat riakin a kal a, Faki dawr khar hnuah a rawn kal kawia, "chaw ei ve nghal la? 'ka tih chuan, " Ei dawn chiang e. Ka rawn riak dawn alawm"a ti awlsam et a. "Eee, a that chu. U Sangzela a zin bawk nen a remchan hlauh chu" ka tih chuan a nui a, "chuvang alawm ka rawn riah dawn. Kan minister sap hian i bo mai a hlau ve tawk alawm. Pawn lamah vengtu an awm reng chungin a la duhtawk lo ania" Nui pawt pawt chungin a ti a. Ka nui ve hak tho nangin kan nuih chhan erawh a inang lo viau ang le. 

Chaw ei kham hnuah kan roomah kan awm duna, dawr lama bungraw chah leh kan stock ho kan en dun a. Mission veng leh Champhaiah branch thar hawn belh ka duh thu leh inbiakna kal mek dan ka hrilha,phur sarh hian min sawipuia. Ka tum anga ka awm thei anih chuan Mission veng lam Branch a kuta dah law law ka duh tih ka sawia, ani lah chu ka rin ai takin a lo phur bawk. 

"Tunlai hi i hmeltha zual e, I vun hi a glow bawk si. Eng nge i hman? " Kan titi lai nena inpersan angreng tak hian a ti a. "Ka hman ngai reng ka hmang. Chutia ka danglam vak pawh ka hre hleinem" ka tih chuan a ner zauha. "I glow.. Chu chu nitawp mai. In unau hi chu in vun a nalh ve thlawt a, chuta karah i glow zuala" a tih leh chuan, "Ka rai hi ka ngeih aniang" ka ti chhuak thut a, phawk zet hian min en a. "I rai maw? " a ti ha. Ka bu nghata, "awi… Ka va han lawm tak. Ka lawmpui tawp che. Chuvang aniang maw in pain a ngaihtuah em em che ni? " a ti leh mawlh mawlha,a langah nui sang mah ila chhungrilah erawh min ngaihtuah tak tak loh zia ka hre chiang em maia. Lawmna tak tak ka nei chuang lo. 

"In pa te chu Champuii te nen an zin ho leh a ni maw? " a rawn tih chuan ka en deuh ha a. "Tu Champuii? " ka ti thuai. A sawifiah chuan ka lo rindan sa reng anih avangin mak pawh ka ti lem lo. "Eng ber nge a thawh a? Kan inhriat dan hi a pawnlang reuh lutuk a, ka chiang miah lo" ka ti leh chuan a thawhna hmun bak a lo hre chiang bik lo. Champuii'n IG lama thlalak a dah ho min entir a, u Sangzela bakah Sawrkar mi pawimawh tak pahnih ka hmu tel a. Nidangah ka lo la en ngai miah lo a, ka enkual takah chuan an zin naah an lo inzui fo tih ka hmu ve ta chauh. 

Mu tura ka inthlak fel zo chiah tihin u Sangzela'n min rawn call a, an thleng tawh tih sawi pawhin ka that leh that loh bakah Faki lo kal leh kal loh min rawn zawt nghal duah. A zawhna tha takin ka chhan bakah Faki a awm ve avangin a mawiah a chauh leh chauh loh ka zawt ve bawk. 

Mu chungin Champuii bawk ka en kual leh a, an zaina hrang hrang a post tam viau a. Minister zin prog hrang hrang a zuina a dah tel zingah u Sangzela a lang tam viau bawk. Dik lo engmah a awm lo chungin mak takin dik lo awm tlatin ka hria a, a rawn call tum bawk kha ka ngaihtuah let leh a, Rempuia nen an inhmuh tum khan an inhre sa reng chungin polite takin Rempuia khan "Sir" tiin a ko a. Sawrkar hnathawk dang dang, nihna sang leh zahawm pui pui te pawh hian zah takin "Sir" tih leh "Pu Sangzel" tiin an ko vek thin. Mahse, Champuii kha chuan tlangnel takin phone a pick har thuin a rawn tan nghal tawp maia. Kha kha thil mak tak niin ka hria. Thil ka hriatchhuah thut rualin an zin a thlalak post ho ka en nawn leh a, ka rin ang ngeiin an zinchhuah hnuhnun ber tumah khan a lo kal ve ngei a, amah chiah hmeichhia a awm bawk. 

Ka muthilh theih lawk loh avangin ka inkhel a, Rinpuia a lo online ve tehmiala. Kan pahnihin kan khel dun a, a tawng danah a nawi tih ka hai lo. A khel fuh hleithei lo va, a tawngkam lah a duhtui lo em em bawk. 

"Ka out dawn, I ninawm em mai. I bula khelh ka peih lo"ka tih chuan a lungawi lo nasa mai. 

" Out lo vang. I ninawm lutuk, kan khelh dun khat tehreng nen" a rawn ti hlur mai. 

"I nawi ve em a, ka ning che alawm. Ka minus nasa thei bawk si. A thuhrimah innu a awm loh hlekin enge i ruih chiam zel a? " ka ti leh hlak hlaka. "I bengchheng, kan nu a awm lo va min hau tur a awm lo va ka lawm nen, min lo phunkhum sek suh" a ti leh nuah nuah. 

Ka peih tawh lo teh nangin out a phal tlat loh avangin kan khel dun leh a, kan start chauh tihin Rempuia'n reservation a rawn thawna. "Out ang, Naruto a lo lut, khel ho law law ang" tih leh out a rual nghal a, minus leh hlauin ka out ve rang ngang mai bawk. 

Kan pathumin kan start tha leh a, Rinpuia'n Rempuia zahmawh angreng tak hian a be bual buala, "Eee,Akimi a awm lo a ni maw? " Nui chungin a ti ve chat. Akimi  a awm chuan a rui khat viaua, a awm loh erawh chuan nawi ve thei tak a ni ringawt. I in nasa lutuk ka tih lahin engahmah min ngai der si lo. "Zu te chu in tur a siam alawm. Inbual nan te hman tum teh, a chi teuh lo" a ti ve tlat zel. 

"Bawiha.. Lily nen an va inang ve a" Rinpuia'n a ti leh a, "Tu chu maw Lily nen inang? " ka ti thuai. "Kan Police Lal hian Lawngtlai lamah nupui a zawng dawn emaw ka tih laiin helamah bawk alawm a lo hun leh si.. I hre na nge? " nuam ti em em hian a ti leh zuah zuaha. "Hey, a lo ngai thutak ange.. Ka thian satliah mai mai anih kha" Rempuia'n a ti thuaia. "Eheu, Tu nge chu chu? Ka hre chiang chak hle maia" ka ti ve vat. " Chhe lo deuh animai. Kan thianho zingah Minister nupui leh Police officer kan nei tawha, Nurse pakhat bakah Doctor kan nei tel dawn anih hmel" a ti leh huau huau. "Yes a va nuam dawn tak.. Naru, engatinge engmah ka hriat ve loh a? " Ka tih chuan a rawn pha nghal zat. "Chutiang engmah a awm lo. Ehe, Bawiha.. Kap ta che, ka tlu ania" a tih zawm zat. Kan titi nasa lutuka kan game khelh lam reng reng kan hre chang tawh lo. 

Vawi hnih vel kan khelhho leh hnuah ka out sana, Rempuia'n  u Sangzela pawn lo hmu se a pawi lo chin tur sawiin whatsappah min rawn biaa. A bialnu ni a Rinpuia'n a sawi kha min rawn hrilhfiaha, la inngaizawng chiah lo mah se an inzui dan thian ngawt aia a u deuh thu a rawn sawi chuan ka nui a, mipa ka nuna ka tawh tawh zinga fel leh rintlak ka tih ber a ni a, hmeichhe tha tak, amah ang bawka midang hrethiam thei leh zahpuiawm lo a tawn ngei ka duhsak thin a, chutiang chu kan sawi lai mek hi anih ngei ka ring bawk. Zing ka thawh a ka phone pakhat zawk ka en chuan Rempuia msg a lo awm vang a. "Ka nunah hmeichhe dang ka lalut anih pawh in vantirhkoh ka nihna hi chu angai reng ania aw" tih a lo inziak kalha. Ka nui a, a sawi ang hian a ti ngei ngei dawn tih ka hriaa,keipawhin inzawmna mak tak kan neih hi engtikahmah a chhiat ka phal ngai lo vang. 

Hun a kal zela, tunah chuan ka nau pai pawh thla 4  pum ve tawhin ka dul pawh a puar lian ve tan tawh a. U Sangzela nen pawh inhauh leh intihbuai awm chuang tawh loin kan cheng dun ve mawp mawp a. Room khata cheng dun reng leh nitin zantin inhmu ta chu kan inbe tam ve leh tan tawh bawk. Mahse thil thleng tawh zawng zawngte avang khan chhungril tak atanga pawh hi ka harsat tawha, tha taka kan titi dun lai taka ka hriatchhuah chang phei chuan ka be tui lo zui ngei ngei. Thil pawi tak thleng leh mai tur anga ngaihna ka neih pawh a bo tak tak thei lo va, inhauh angaih loh hram nan that kan chhuah ve ve ni mai hian ka hre thin. 

Dawr kal hmain ka inbual a, u Sangzela a chhuak tawh thung. Ka inbual zo room a ka lut chiah tihin ka phone a ri ve chiaha. Ka dahna ka pan phei a, min rawn call tu ka hmuh chuan rang takin ka pick up vat. 

"Hello.. Nute" ka ti nghal zat. "Mate, I dam em? " Ka nu te unau zinga naupang berin min rawn ti vau vaua. "Aw, ka dam e.. In tha tlang zawk em? " ka ti ve thuai. An that thu a rawn sawia, " Inah i awm dawn em? Nge chhuah i tum? "a rawn ti 

leh a, dawr thar tur an siam fel mek en tuma ka chhuah dawn thu ka sawi chuan dawr thar ka nei belh dawn tih a lo hre pek lova. Ka hrilhfiah leh te te hnuah " Eee, ka hre leh si. Niminah pawh Kimi'n min hrilh tak alawm" a rawn ti leh lawia. Kan nui dun bawk bawk mai. 

"Min rawn tlawh peih angem? Nge office banah ka rawn tlawh zawk ang che? " a rawn ti leh a, "I remchan chuan min lo tlawh zawk la. Tlai lamah chuan Dawrpuiah ka awm dawn a. Kimi te thil chah pawh in lo lam angai tho a" ka tih chuan office ban paha lo kal kual a tum ta zawk. 

Hmanhmawh lo takin ka insiama, in ka chhuahsan chuan dar 11 a hnai thuak tawh. Tunlai chu u Sangzela hian Hminga hruai loin Driver pakhat zawk hlir a hruaia, Hminga hi chu keiman ka chang deuh chawt a ni ber. Mission veng lamah kan kal hmasa a, a siamhna thawktu te hi ka thian hnai tak pakhat hnuaia mi te anni a. An hnathawh dan ka hmuh chinah pawh ka mit an tlung viau. 

Faki nen dawrah kan awm duna, dawra min thlah zawh hian kal lehna mai tur mai tur ka neih dawn loh chuan Hminga hi chu a duh dan dana awm turin ka ti tawp zela,bialnu te nena chhuah vah nuamti rual lek ala ni bawka, a lawm thei vur vur viau. Customer an awm neuh neuh renga, keimah ka awm hi chuan customer te lo biak vel hi nuam ka tih em avangin ka lo be ve chul thina. Thenkhat thla min lakpui duh tlat ka tawng leh nawlh nawlh zel bawk. 

Dar thum velah Faki a haw a, a haw hnu lawkah ka Nutei a rawn thleng ve a, a monu Kimi thil rawn order ho ka pack tir sa vek tawh chu ka pe nghal a. An naute mamawh tur thil eng eng emaw ka pe tel bawk. 

"Thingpui i duh em? " ka ti a, "a hang i neih chuan duh e, I neih loh chuan ka duh lo mai ang"a ti a. A tawngkam chuan ka nu min hriatchhuah tir zawk mai. " A hang chu awm nang, theitui vawt lam i duh chuan a awma" ka ti leh a. A duh thu a sawi a, fridge ami ka va laksaka, ka let leh chuan Kimi te thil ka pek tur ho a lo en kual vel mek. 

Thil chi hrang hrang sawiin kan ti ti luama, ani hi chu nu tawngduh leh nelawm tak a ni bawka, a bulah hi chuan thla a ngam siah zel a ni ber. 

"Enteh, tunlai chu office-ah hian sawi neuh neuh a awm a" a phone a bag a khung pahin zawi angreng takin a ti a. 

"Eng lam nge a? " Ka tih chuan min rawn en a. "Kan office a nula pakhat, zaithiam a ni nghe nghe a. Ani leh in pa hi sawi sep an kai riau ania" ka beisei loh taka a tih takah chuan ka thu ngil auh a. "Chutiang sawi a awm amaw? Tu nge chu nu chu? " ka ti a, ka sawi zawh rualin ka nutei leh Champuii thawhna hmun a inang tih ka hrechhuak nghal zat. 

"Champuii ania, nangni ho hi chu in inhre them a, I hre nghe nghe ang. Hmelchhe lo deuh kha ania. Engdanga sawi sep kai pawh chu anni lo va, inpa dept chan hnuaia awm kan nih ang hian a zin dawn hian a hruai deuh zel maia. Chu chu sawi an kai ta a ni ber" a ti leh sa sa a. "Anih tak chu, amah ka lo sawipui dawn nia. Champuii te nen chuan kan inhre tha veka, biak pawh kan inbe fo va, chutianga rinhlelhawm a ni lo chek ang" ka ti a. A thaw deuh huaia, "ni e.. Lo sawi ve hrim hrim la, ani ang hi chu sawi an kai awlsam si a, nang lah ilo eng emaw lar ve phian mai bawk si a" a ti leh chuan ka sawipui ngei ang tih ka hrilh a, a bu nghat nghat mai. 

A lo haw laiin kan nula nen chawhmeh kan lo siam dun meka, nulat laia engmah ngaihven lo leh tingai lo ka nih avangin thiam ka nei tlem ngang maia. Pasal ka neih hnuah pawh titu tur an lo awm zel bawka. Mahse, inhrang kan han chan tak hnuah hian titu tur awm tho mah se nu ber ka nih ve tak avangin thiam ve vek ka duh a. Ka u puihna leh YouTube zarah ka thiam ve ta nual. 

Room-ah ka zui lut a, kan nupa kar a buai em em lai pawhin a lo haw laia roomah ka awm lo anih chuan ka zui lut ve ziaha, eng ka va ti pawh  chu a ni ngai chuang lo va. Tih thanah ka nei a ni ber. 

"Naktuk hi Maruata te fapa birthday ania. Aijal club-ah lawmna hun an nei dawn a. Kan kal angai ang" a lo ti nghala. Maruata hi kan inneih a a best niin sumdawng hlawhtling tak a ni a, a nupui erawh high school zirtirtu a ni thung.

"Um, I kal ve hman dawn em?" Tha takin ka ti let ve a. "Dar 4 hma chuan ka hman dawn lo hmela, I lo va kal hmasa mai dawn nia. Office atangin ka rawn kal mai ang" a ti leha. Ka nutei thilsawi kha tun hi sawi hun tak niin ka hria. 

"Present tur vel chu dawr atangin ka keng mai ang. Chuan, vawiinah ka Nutei a lo lenga, nangmah leh Champuii midangin an sawi deuh thu che min rawn hrilha" Pehhel loin ka ti tlang nghal pawp. A hma atanga lo ringhlel deuh tlat tawh ka nih vang nge ka thin a rim riau bawk. 

"Engtia sawiin maw? " Min en chuang lo hian a ti a. 

"I zinnaah i hruai nasa viau aniang" ka ti leh nghat a. "Amah chauh ni loin Bma pawh ka hruai thin thu a sawi tel lo em ni? " engmahmah ngai lo tak hian a ti a. "Sawi tel lo. Ka nutei ania, a u fanu pasalin hmeichhe dang nena sawi sep a kai kha a duh lo va, min hrilh tihna animai" ka ti deuh duah. 

"Anih chuan ka mualpho inlo hlau tihna ni maw? " ngai ho hmel tak bawk hian a ti leh a. "Chutiang deuh chu anih hmel. Kei chuan pawi pawh ka ti lo va, mahse i tana mualpho pawi zia i hriat kha. Nupui ka nih angin ka tih tur ka timai ania"awki sang chuang lo hian ka ti leh a. 

" A that chu. I nutei chu lo hrilh la, hna leh mimal thil ka dahhrang vek, ani kha amah chauha hruai ka ni lo va, a hna khawih ang chiah khawih ve tu Bma pawh ka hruai tel ziah tih an hriat kha" Confi lutuk mah mah hian a ti leh a. Tawng tawh loin ka bu nghat a, thildang sawi tumna nei hmel a pu zui lo bawka, choka lam ka pan san ta daih. 

Chawei khamah kan veng chhung a Badminton tournament awm tur chungchang sawipui turin vengchhung mi thenkhat an lo leng a, an inkawmnaah tel ve chiah lo mah ila lo awm bo daih chi anih loh avangin sitting room dangah ka lo thu a. Kan nula thingpui siam ka enpui pah bawk. 

Rinai takin an inkawm rei a, ama tumsak tur thil a awm nual avangin pawisa cheque-in a pe nghal a. Hun a neih chuan kan veng hall-ah badminton a khelh ve thin avangin lo leng ho pawh ani chuan an hmingin a ko thei deuh vek. 

Zan dang ang lo takin mutnaah min hnaih takin a rawn mu a. Ka lo ip chawih peka, pasal te nena inmut hnaih deuh vanga han ip chawih mai chu zia lo ka ti angreng viau. 

"Champuii nen khan min ringhlel em? " Dam angreng tak hian a ti a. A thilsawi lah chu ka beisei loh lam ala ni zui.

"Ringhlel maithei" Ka ti nghauh. "Engmah rinhlelh tur a awm lo. A hna vanga hruai mai ka ni tak tak" a ti leh a. Engvanga insawifiah kher nge anih ka hre lo. "A tha alawm" ka ti tawi tak ringawt. 

"Eng ber chu nge tha a? " a tih chuan ka en zawk a. "I mualpho loh khan a tha ka ti mai. Mahse, thian satliah chu in ang chiah lo" ka ti lehzel.

"Chuti maw? " fan deuh tak hian a ti a. "Aw, I phone ka lo pick tum khan a rawn biak dan che mak ka ti viau tawha. I kekawr a CD ka chhar tum khan i hruai tih ka hre bawka" Engmah zep nei loin ka ti leh hmiah hmiah mai. 

"Ka mutpui lo, cd pawh kha pipe tawn nan kan hmang ka tih kha. I duh chuan i zawtfiah thei vek.. " a lo ti leh thuaia, chuti taka insawifiah a tum ta mai chu mak ka tih rualin ka rinhlelhna tizual tu pakhat a ni zawk tlat bawk. 

"A tha alawm" ka ti ringawt. Muthilh tumin ka maimitchhinga, ka rin loh lutuka min rawn kuah takah chuan ka insangmar nghal vak bawk. 

Chawhnu dar 2 pelh hretah Aijal club lam panin ka chhuaka, Motora chuang chungin Zan lama thil thleng ka ngaihtuah let a, nupa inpawh lo tawpkhawk kara thleng tur chuan thil awihawm loh lutuk hi a ni ringawt. Mahse, a thleng miau tho si. Ka maimitchhing vang vanga, ka hmangaih thei ngai pawha ka rin loh ka pasal hi ka lo hmangaih ru reng nge ni a, buaina nei lo va nitin kan awm dun atang hian ka lo duh tak tak tan tawh zawk pawh ka hre thiam lo. Mahse, ka hriatchian em em chu Pasal chu pasal a ni a, nupui pawh nupui ka lo ni tih te mai hi a ni. 

Kan kalna hmun tura min dah hnuah u Sangzel hruai turin  let leh a, vawiin chu kan Driver pakha zawk a nawmsam loh avangin Hminga a buai zar zar viau. Dawrah pawh scooty a ka kal mai theih thu ka sawi chungin u Sangzela'n a phal tlat lo. 

Maruata nupui nen kan titi luama, ka nau neih hun tur leh harsatna ka neih leh neih loh min zawt a, ka that thu ka sawi chuan a nui var var a, " I tha tih i hmelah alang alawm. I hmeltha lutuk ringawt" Titak hmelpu hian a ti a, fakna dawn hi chu a hrehawm lo viau zel chu a ni. 

Melo-in min rawn ko a, ka bula thutna awlah a rawn thu ve nghala. "Khawnge Mama? " a ti nghal zat. "A rawn tlai dawn a. Midang lo kal tur an awm em? " ka ve nghala, " Aih, ka nu hi tunlai chu a kawng na a sawi reng mai. Ka pa chu a kal ring lo phawt mai la, Area te nupa lah annu check-up hun a nia" a ti siam siama. 

Ka rin loh lutuk a Champuii ka hmuh takah chuan ka thaw deuh hapa, ka hawina lam a hawi ve nghal thuaia. "Ti nge a? Tu nge i va hmuh a? "a ti deuh ha a. Lu thing nak chungin " Tumah hmu hran lo ve" ka ti awlsam mai. Mahse, tur deuh tak hian Champuii a melh rana. "I hria tiraw? ' zawi angreng tak hian a ti sap. 

" Eng maw i sawi? " a sawi awmzia hre lo hian ka ti a. " Saw nu leh Mama chungchang mawle. I hria tih ka hre mai" a ti ram leh hmaka, ka insehruh vaka, muangchangin ka inthlahdul leh a. 

"Eng nge hriat tur awm a? " hre lo der chungin ka ti a. "I awmdanah khan ka hre vek. Mama pawh thil dik  lo a awm em tiin ka zawt alawm. Mahse, engmah a awm lo a tia. A lo nui mai maia" a ti leh sa sa a. "Um, anih chu. Chutiang engmah ka hre hleinem" ka ti leh tlat. "Ok, I hre lo tak tak maithei tho. Hetiang thil hi chu mi hian a hre tur tak hrilh loin an sawi sep sep thin ve bawka. I hre lo pawh a awm tho. Keipawh ka thiannu-in min hrilh a, chuvang a hre mai mai alawm ka nih. Engmah chu an inkarah a awm ka ring chuang lo ta. Mahse,a thleng ve thei tho bawka. Thil thleng a awm vaih chuan ka turu lo khawp ang" Nui hak hak pahin a ti leh a, ka nui ve tak nangin ka nuih a za hauh lo. Diktak chuan Melo-i pawn a lo hre ve reng mai hi mak ka ti a, ka rin aiin miin an lo hre zau tawh zawk maithei.

U Sangzela dar 5 rik hma deuhin a lo thleng ve hman tawka, a nawlpui chuan chaw an ei kham titih tawha. Kei leh Melo-i erawh chuan a lo kal dawn avangin kan lo la nghak thung.Mak takin a lo thlen laiin Champuii ala awm reng a, mahse an inbe miah lo. Inbe bawrh bawrh se mak ka ti lo zawk ngei anga, mahse an inbe tlat si lo. 

Melo-i thlah pahin ka nu te kan tlawh nghal a. Melo-i hnenah ka nu-in thingpui hang lumsak turin a ti a. Ka duh leh duh loh min zawh chuan u Sangzela zawkin a lo chhang a. "In lo mai rawh se. Thingpui in Doctorin a khap sak riha, amah hi chuan a hnar thei miah lo ania" a lo ti a. Mak ti tak hian ka en a. "Ngati… " ka ti hman tawk tihin u Sangzela bawkin, "Bawihi… I tan a tha lo tih i hriat kha" Khauh angreng tak hian a ti leh a. A awmdan mak tak chu ka hre thiam eih lo. Englaimahin Doctorin thingpui in min khapsak hauh lo. 

Ka nu nen a kawngna chungchang kan sawi mawlh mawlh laiin Melo-in a u hnenah a room a bathroom kawngkhar lockna siamsak turin a rawn au a. Ka rin aia a rawn let har takah chuan koh tumin Melo-i room ka pana, thawm nei lem lo hian kawngsa lo inhawng sa deuh chu ka nem hawn belha. Mahse ka pen luh hmain Melo-in zawi deuh sapa ka hming a lam chu ka hriat avangin kawngka bulah ka ding chata, a sawi zawm leh tur ka nghak a. 

"Mama,ka ti tak tak ania aw. Arini hian engkim a hre thiam tan ania. Keichu nakinah pawh alamah ka tang tlat dawn. Engmah ani hian tihsual a nei lo va, I politics khelh vanga ani leh Naute in an tuar leh dawn anih chuan engmah ka zep tawh dawn lo" zawi sap hian a ti a, a awmzia hre lo mah ila thil tha lam an sawi lo ang tih ka chiang nghal tawp mai. 

Note : Sorry u.. Ka fb lam chiang lo vangin nizanah ka rawn post thei lo va, a zia lo khawp maii.. Min ngaidam teh u😊