Naruto - 13

 Then -13na

"Zanah hei hi pu Hlua'n a rawn lam ang" a tih chuan ka thawveng nghal hawk thei. Min kah ka ring pawh a ni chuang lo va, mahse Pistol a kawl tih pawh ka hriat loh lai leh kan inkhak fek fek lai taka a va lachhuak thut khan minti mangang lo thei lo. 

A chhuah veleh khumah ka thu hnawka, thihna kotlang atanga chhanchhuah hlimhlawl ka inchan ber. Ka pasal mize mak danglam tak, chhunglam leh pawn lam hran hlak, politics a khelhna kawnga daltu apiang a dik leh dik lo pawh pawisa lo va thianfaitu hi a rapin ka rap a ni ber tawh. Ama awmna party mi te ngei pawh mil thei lo, hnunglam atanga bei kual reng tu leh an hmai hmaah chuan an tana tha ber anga lang thiam leh lawi si a ni a,dikna duha lar viau siin dikna te chu atan engmah a ni leh miah chuang si lo. A nihna diktak ka hrilh ngam ka u lah chuan a awih der loh avangin ka tan talchhuah ngaihna a awm lo. Ka pa phei chu u Sangzela nen inthen lo duh pawh ni ila min support lo tu langsar ber tur a ni bawk si. Ka khawvel hi a ipik ngawih ngawih a ni tawp mai. 

Inthen ka hlau hauh lo va, ka inenkawl zui thei dawn tih pawh ka hria. Mahse, ka pasal hian min thlah zalen dawn lo tih ka hriat chian em avang hian inthen hi tun thlenga la tum lo mai chauh ka ni. Lo chhuahsan in khawi hmunah pawh awm ila a hmingchhiatna siamsaktu ka nih dawn avangin engpawh tih a huam ngei dawn a. Ka chhungte zawng zawngin fel an tih tlat si avangin tuman ka thusawi an awi dawn lo. Ka zalenna tur chuan a nupui hmasa leh a bialnu kha ama dahthattir ngei a ni tih huai taka sawi turin fiahna ka mamawha, mahse ka dul thang lian mek hian ka duh ang engmah min tihtir tak tak thei rih lo va. Tin, ka pasal anih tlat avangin mualpho tawpkhawka siam hi ka duh chiah lo niin ka inhre tho bawk. 

Melo-i vittu leh rukruk tum vang a jail a lut a ni chungin a thih takah chuan ka pa leh u Sangzela'n an buaipui veka, a ruang an khaw lama phurhna tur motor te nen lam an ngaihtuahsak vek a, reilote chhungin u Sangzela a lar lehnghal hluai mai. Thil tha tak ti ni mah se ama tana hlawkna awm lo tur thil a ti ngai reng reng lo tih ka chiang tawh bawka, a thiltih an fak leh luai luai pawh chu ka engahmah a kal pha lo. Journalists hmelhriat tha tak tak a nei a, anni ho hmang hian a inti lar thiam em em a ni tawp mai. 

"Te, ka pa chanchin an rawn hrilh tawh che em? " ka u-in a rawn tih chuan "eng chanchin maw? " ka ti nghat. " A kal lam problem aniang. Nu Sangi'n min rawn hrilh zo deuh chiaha. Leng phei ila, zanriah ei nghal turin" a rawn ti a. "Ka hman pawh ka va ring lo ve, tihtur ka lo nei a" ka tih lai mekin u Sangzela roomah a rawn lut a, A hmelah chuan sawi duh pawimawh nei a ang viau. "Kan inbe leh dawn nia, ka buai lawk" tih leh off ka ruala. 

"I pa-in a rawn bia che em? " a lo ti nghal a. Tawng loin ka lu ka thinga. Naute thil tur ka lei ho ka thlehfel mek ka tihzawm a. 

"Zanriah ei turin min duh a, thil pawimawh a awm anih hmel" a tih chuan ka thiltihlai ka chawl a. 

"Zanin chu tihtur duansa ka nei a, nangmahin kal mai la, a pawi em? " Tha takin ka ti a. 

"Pawi chu pawi lo, mahse i pain thil pawimawhah min ko a, a fanu zawk i nia, I kal a tha ang" a tih chuan a sawi dik tih ka hai lo. "Vawiin hi meeting ka neih ni tur kha ania. Prog duan lawksa vek a ni bawk si, kan zawh hunah ka lo kal mai ang" ka ti ve tlat. Midang tanpuina kawnga kan thianhoin kan lo tih ve tang tangna kha tunah chuan Mizoram mai ni lo, North East-ah pawh hria an tam tawha, vawiin pawh hian phai lama kan hmalakna lo hre tu Journalist tha leh lar tak te nena inkawmna hun nei tur kan ni a. Ka rai lian tawh hle chungin a bul tantu leh tun thlenga la kalpuitu zinga mi ka nih ve angin ka tel ve ngei ngei a tul tlat. 

"I pa hrilh rawh" a ti nghut. Ka bu nghat nangin biak tumna ka nei chuang lo. 

Uluk takin ka inchei a, ka dul puar luah nen chuan inchei nalh viau erawh har tak a ni. 

Ka beisei loh lutukin Rempuia a lo awm ve a, kan inhmuh hnuhnun ber atang khan thla a tling dawn hial tawha. Biak erawh kan inbe zing viau. 

"I va hmanhmawh ve" Aruata'n min ti a. "Nia, ka pa te in lama kal ka ngai a. Chawei tur kan ni  zawk nangin helam prog hi duanlawksa vek a ni sia" ka ti a, ka phone pakhat zawka Rempuia msg awm ka en a. 

"Naruto… Min thlah peih em? " ka ti nghal zat. 

"Peih loh pawh a awm hleinem, tunah kal nghal i tum nge? " a ti ve vuta. "Aw, kal nghal mai ka duh. Eee, Puia naktuk zanah ka lo leng mai ang aw. Zanin a lo len ve nghal ka duh nen, ka pa hmuh ngei ngei ka ngai sia" ka ti leh zung zung. 

"A pawi lo, midang ho pawh hi naktuk zanah lo kal law law teh u" a ti ve nghal zat. Midang ho pawh chuan pawi an tih loh thu an sawi ve sap sap. " Innu chu ka rawn tahpui chiam dawn nia" Nui chungin ka ti a. "I hnem thei ber ang, I lo paltlang tawh thil a ni bawka" a ti tha ve mai bawk. Nimin piah lawkah Rinpuia nupui Akimi'n an fa hmasaber tur a chhiat a, thla 4 lai ni tawhin a kawchhungah a thi a, a lainatawm takzet. Ka lo paltlang tawh thil anih avangin a rilru tur ka hre thiam em em bawk. 

"Ka rin aiin kan Minister zahawm tak hian a nupui hi a veng tha lo riau mai" kan tlanchhuah hnuah nui huk huk chungin a ti a. 

"Kan rei dawn em ka hre si lo va, innghahtir reng ka duh lo mai mai mawle" Ka ti ve thuai. 

"I fel ve reuh ngawt mai. I kum angah hi chuan han hawi deuh vah nuam ti rual lek ila nia, chutah pasal lar tak i la nei zui bawka" amah nena inhmeh lo tak hian a ti a. "I upa bik vak emawni le a? " ka ti nghat. 

"Nang ai chuan upa ve e.. Tak takin i fel ve alawm" a ti leh hram. 

"In pa enge a an a? " a ti leh daiha. "A hriselna lam maw? " ka tih chuan a nui a. 

"A hrisel tha tih chu news-ah kan hmu chamchi alawm, tunhnai a che tha leh bawk si. Lar laih hi chu a inhmeh ve khawp mai" a ti leh duaha. 

"A thiam zawng tak alawm" ka ti ve nghat. 

"A tha ve alawm. Bakah thusawi a thiam a. Lar tur chu a ni" a ti lehzel.'Engtikah nge i phei leh dawn? " U Sangzela chanchin sawi zawm peih loin ka ti a. 

"Kartharah aniang. Thil pawimawh tih paha lo phei ka nia, ka tihfel veleh nimai" a ti tha ve mai. "Nang hi nupui neih i tum lo mi a? I upa tawh nia" ka ti leh chu a nui suka. 

"A hmanhmawhthlak hleinem" a ti duh lek. "Tun tum chu ru phei ve tawp mai teh a" ka tih chuan a nui huk huka. 

"Ka single leh daih tawh" a ti duh lek. "I va han mak tak, lerh kual mai mai rual i ni tawh lo ania" ka ti hlak hlaka. Ngaipawimawh lo tak hian a nui mai mai duh lek. 

"Melo-i beitu thi ta kha, a thih danah sawi sep a kai em? " kan thilsawi lai nena inpersan em em hian ka ti a. "Kai maithei, ka hre lo le' A ti fan deuh ruih." Mak ka ti, han inawhhlum ngawt mai kha, Melo-i tihtir anih chuan a chhuahna turin a buaipui anga, a chhuak leh thuai awm sia. Khatianga mahni nunna a la kha a awm lo riau asin" ka ti leh duah. 

"A dik alawm" ati tawi leh tuka, sawi zawmzel tumna nei hmel pawh a pu lem lo. 

Ka pa te in ka thlen chuan ka u te nupa bakah u Sangzela leh ka pa thianpa pakhat an lo awm thapa. Ka nu Motor an hralh tih ka hriat tuma ka kal bak kha tun hi ka kal leh na hmasaber a ni bawk. 

"Chaw i ei tawh tak tak maw? " nu Sangi'n min lo ti thuaia. Ka bu nghat a, ka pa thianpa-in min lo fiam chul a, ani hi chu kan naupan lai atanga kan hriat tawh leh kan in a rawn chuangkai zing tak a ni a. Ukil tha leh lar tak niin pa inngaitlawm leh chapo lo tak a ni bawk. 

Dar 10 velah kan haw a, Doctor te sawi danin ka pa kal pahnih hian hna a thawk mang tawh lo va, a rang lama phai kal turin an lo ti a,kartawp anih tawh avangin karthar tirah phai lam pan an tuma, u Jimmy-a leh nu Sangi bakah nu Sangi nau fanu Thani ten an kalpui dawna. A hma kha chuan Thani te unau hi an riakphei thina, tunah chuan an unauin an awm chawt tawha. An fel leh sual pawh ka hre chuang lo nangin an hawiher atangin ka ngaithei lo viau vek. 

"I pa hi a thlaphang deuh niin ka hria, ro chungchang tihfel a duh a" Ka inthlak laiin u Sangzela'n a ti a. 

"Engtikah nge a sawi a? " ka ti a, "Vawiinah phone call in min rawn sawipui a. An kal hmain tihfel a duh anih hmel a. Naktukah amah hetah a lo kal ang" a ti leh a  "A nih chu, a tihfel leh a tha mai alawm" ka ti awlsam leh mai. Ro tamtak a nei a, Rempuia sawi dan takah damchhung daih sum a nei bawka. A fanute pahnih lah pasal neiin kan chhuak tawha, a landanah ngaihtuah ngai kan ni lo ve ve bawk. Ro ngah em em mah se han buai chiamna tur a awm pawh ka hre lo va, lo dahfel sa thlap a mamawhna pawh ka hre hek lo. 

Ni a liama, kar a liam leh a, thla hial a vei leh meuh chuan rinaiin ka pa a tlahniam chak ta. Kan naupanlai atanga zunthlum nei tawh niin ka nu khan a ei leh in thlengin a control tha thei em em a. Mahse,tunah chuan a kum a tam ve tawh bakah a natna a kawl rei ve tawh nen, a kal lam thlengin a lo khawih tawh a lo ni a. Khawih satliah mai pawh ni loin a lo nasa tawh viau mai bawk nen, enkawlna a dawng reng chungin that tak tak a awm thei tawh lo. Ka lama tang ngai lo leh ka thusawi ngaithla duh miah lo tu, hrehawm ka tihna pawn ka thlen theih lohna niin haw ngawih ngawih thin mah ila, natna hrehawm tak tuara a awm chhoh takah hian ka huat ngawih ngawih thinna pawh tlem chuan a zia chho ta. 

Kei pawn nau neih hun ka hnaih ve zela. Ka ke a vung nasa in neuh neuh ka ngah chho ve tana. Bp sang leh zunthlum thlahtu te atanga nei ka nih avangin min enkawl uluk em em a. Tul ka ti lo chungin U Sangzela'n home nurse a ruai a, thil tul takah lo phei chuan ka chhuak meuh tawh lo. 

U Sangzela mize pahnih pawh ngaiah ka nei chho ve titih tawh hial. Inhauh loh hram ka duh thin avangin a awm ang angin ka en liam deuh tawp tawha. Nau neih hun ka hnaih chho ve ta bawk nen, intih hming that tuma a kalna apianga zui ngai thin pawh ka zui ngai ta lo. Ka hmuh chian tak em em chu Politician te nun hi lemchang nun a ni a, achang thiam apiang an langsara, chang thiam vak lo leh thawm nei mang lo va tha ve tawp te chu an nekchhuak zung zunga,chutihrual chuan mizo mipuiin politics kan hmuh dan leh pawm danah thil fuh lo laklawh a awm avangin politics luhchilh tak tak tur chuan tuangchhah angai em em a, mi nazawng tan tlin chi a ni lo. 

"Hei hi ken tur zingah khan a tel tiraw? " bag pakhat kawk chungin Zari'n a ti a, 

"Aw, nih kha. Pakhat kha chu ka lo keng mai ang. Ka mamawh mai tur chii ka dah nuala" ka ti a. Vawiin hi Doctorin nau nei tura riak lut tura mintih ni a ni a. U Sangzela erawh prog pawimawh tak a neih avangin vartianah a chhuak tawh thung.

Melo-in min riahpui a, Zari a awm tho a riahpui ka ngai lo vang ka tih pawhin a duh tlat lo. Zing karah min vei tan tira, zai ka ngaih maitheih thu Doctorin a sawi lawk vek chungin vanneithlak takin chawhnu lamah fapa ka nei ta hlawl mai.Ka nu ka ngai em em a, mahse lawmna hun a ni a, midang tana hrehawm khawpa lo awm ka duh lem lo. 

Zan thum damdawiina kan riah hnuah min chhuahtira, Melo-in min la riahpui ta zela. Zari erawh nau ka neih thleng awm tura inbe lawk annih angin in a kan haw ni atangin a lo kal zawm ta lo. 

Nau rawn en tu an thanhnem in thilpek kan dawng nasa em em maia, u Sangzela'n karkhat a tlin niin chhungkaw zinga sawm bik leh a thian hnai zualte tan zanriah a buatsaih saka, Ka pa pawh a rawn kal ve a, a cher bakah a chak lo em em maia. Ka haw teh nangin tlem chuan lainatna ka nei ve ta. 

"I phone hi a ri renga, ka lo pick dawn em? " ka inbual laiin Melo-in a rawn ti a, "Aw, lo pick rawh" ka ti let nghal lang lang. Melo-i hi nau ka neih hma deuh atang khan kan in lamah a rawn awm tam tana, Matetei nen an inngeih loh em avangin ka nu te tan pawh thil buaithlak a tling titih hial. Mahse, keini kan awm hrang tawh bawka a duh hun hunah riak turin a rawn kal mai thina, Rempuia thil min hrilh te kha ringhlel miah lo mah ila fiahna tun thlenga ka la hmuh si loh avangin alaka rilru put dan tawk thiam har ka ti a. Min kawmngeih tu leh min ngaihsak em em tu niin, ka pa damlohna lam thlenga min ngaihvenpui peih leh a tihtur chin hre em em mai chi a lo ni a. Nau ka neih hnuah phei chuan Bawihpuia min lakchhawk nasain ka hrehawm hlau ber tu a ni lehzela, a sualna sawi tur lah a awm eih bawk si lo nen, Rempuia'n a hre sual mai mai anihte ka ring ta rum rum. 

"Nu Sangi ania, I pa a nuam vak lo va. Ebenezer damdawiin lamah an indah lut a ni awm e" Ka inbual zawh veleh a lo ti nghal a. "Chuti law?Engtin nge a awm a sawi em? " ka ti vat. 

"A nuam vak lo a, a khawsik a sang lutuk a ti" a ti leh maia. Ka phone awmna lam ka pan phei a, chanchin zawh chian tumin nu Sangi ka call nghala, "u Arin, a-ni hi Doctor nen an inbe meka" Thani aw hian a rawn ti a. Ka pa awmdan ka zawh chuan ICU a an dah luh chiah thu a sawi chuan ka rilru a nuam lo nghal run mai. 

Ka u call ka tum lai takin u Sangzela'n a rawn call a, ani pawhin ka pa chungchang bawk a rawn sawi a. Damdawiin a thlen tep thu leh chanchin min rawn hrilh tur thu a sawia. A dah chauh tihin ka u in min rawn call veleh thung.Ka pa damdawiina an dah thu a rawn sawi ve leh bawk. 

Melo-i hnenah ka hrilh ve leh chhawnga, "I kal duh chuan Bawihpuia hi chu ka lo enkawl thei ania. A muhil chauha,a muhil rei leh phian ang" a ti thuai. Hnute tui ka neih miah loh avangin hnute siamchawp a hne a, a buaithlak viau rualin awlsamna lai pawh a awm ve tho bawk. 

"I u a kal tho a, ngaichang phawt ang. Min lo call tu pakhat hi tu nge? I pick hman em? " ka phone en chungin ka ti leh a. " Nu Sangi bak kha tuman an lo call che pawh ka hre lo" a ti a. Number ngai atangin vawi hnih min lo call na a awm a. Nu Sangi number hi pakhat chauh ka save avangin nu Sangi number ni tho ni turah ka ngai. 

Ni tla turin kan Balcony a rawn chhun a, kan awmna lai hi Aizawl tlak lam veng, tlangchhip a awm a ni a. Tlak lam venga awm e ti lo in ni kan dawng tha em em a, mahse tlang a awm tih takah thli a tamin December thla kan chuangkai tawh bawk nen, a vawt var tawh mai. 

Ka phone a rawn rik chuan ka phu zawka, min rawn call tu chu number ka save loh niin rang takin ka pick up vat. 

"Pi Arini i ni em? " Ka rin loh takin hmeichhe aw, tlema tawng awn lam hian a rawn ti a. "Aw, ni e.. Tu nge ka biak? " ka ti thuai 

"Mendy ka nia, thil pawimawhah hmuh che ka duh a, engtikah nge ka hmuh theih ang che? " inthlahrung aw hian a rawn ti a. 

"Engthil nge? Phone-ah hian sawi mai ta che. A rem em? " ka ti leh a. Dinhmun tleu laklawh, tanpui ngai mi thenkhat ten ka number neiin min lo call nawlh nawlh chang a awm fo thina, tuna min rawn be tu pawh hi chutiang turah chuan ka ngai nghal mai bawk. Ka pa dinhmun lo tha lo nen ka thawpik ve tun a, hriat ngai loh nena indawr ka chak loh lai ber a ni hial mai thei. 

"Min hrethiam la, ka sawi maithei tlat lo. Nangmah chauha hmuh che ka duh a, I remchan hun ka lo nghak zawk mai ang che" ka rin loh takin a rawn ti leh ta tlat. 

"Anih chuan englamah nge min hmuh duh tal sawi la, ka hre ngai si lo che a" ka ti ve a. 

"Pi, midang bulah ka rawn bia che tih min lo sawisak lo la ka duh a" Ka zawhna chhang lo va a rawn tih kual leh chuan ka ning tan ta viau. 

"Ka zawhna che min chhang lo" ka ti nghat. A thaw deuh hak ri ka hre thei a. A ri deuh rak raka. 

"Lala kha ka u ania. Ka phirpui a ni bawka" a rawn tih chuan tu nge Lala hriat ka neih ka ngaihtuah nghala. "Pu Sangzela pa hnuaia thawk thin, jail a boral ta kha" Ka ngaihtuahna hria niawm tak hian amah bawkin a rawn ti leh a. Ka beisei loh lutuk a sawi takah chuan ka thu mar awk mai. 

"Chuti maw? Ok.. Phir pui a lo nei tih pawh ka hre miah lo va. Mahse, engatinge keimah berkher min hmuh duh a? " ka ti nghal vata.

"I ta tur thil pawimawh ka kawl a" a tih chuan ka hmui ka pet a. 

"Aizawlah i awm em ni? " ka ti leha. "Niminah ka lo thlenga, ka hmuh vat theih che chuan ka haw leh vat duha" a rawn ti leh zung zung. 

"Aw le, I number ka lo save anga. Ka rawn be thuai ang che. Mahse, ka rawn bia che anih loh chuan khawngaihin min lo be tawh suh aw" ka ti ve nghal zung zung. 

"Aw le, ka lo nghak dawn che nia. Mahse, tuman ka lo bia che tih an hriat ka duh lo tak tak ania aw" hlauthawng aw hian a rawn ti leh a. A awmdanah chuan hlauh a nei tih hai rual a ni lo. 

A number ka save a, Melo-i haw veleh Rempuia ka call nghala. Lala te khaw hming hrilhin  an chhungkaw chanchin min lo enfiahsak turin ka ngen a. Ramri dep, khaw lian lo tak leh lar angreng tak lawi si a awm an ni a. Police station awmna khua anih angin Rempuia tan chhuichhuah harsa lo turah ka ngaia. Ka mamawhna erawh engmah ka hrilh lo. 

Darkar khat vel a liam leh tihin msg pangngaiin Lala te chhungkaw chanchin tlangpui min rawn hrilh thei ta mai renga. Min rawn call tu sawi ang khan phirpui hmeichhia, Mendy tih hmingpu a lo nei ngei.An mahni hi hmar hnam niin, State danga hmar tamna khuaa seilian an ni a. Mizoram a an rawn pemna pawh kum 10 vel chauh a lo la ni a. An chhungkaw zingah chuan hmar tawng an hmang tih thlengin a rawn hre chhuak nghal vek. 

Thim hmain u Chhari a rawn thleng a. Thla kalta khan an khaw lama awm turin a haw tawha, nau ka neih huna min awmpui turin ka han biaa, an chhungkua an inrawnkhawm hnuah a rawn awm theih tur thu min rawn hrilh a, ka pa te in atanga a chhuah dawnah a pa enkawl chhuanlam mah se nu Sangi nen an inmil lutuk loh vang tih kan hre vek tho. 

"Awmpui tur chein sawm rawh kha ka ti ngawt che a, ka pa te in atanga a chhuah dawnah an khaw lama awm a duh thu a sawi ve ngei si a. I lo awmpui leh daih chuan sawi neuh neuh a awm lo ang maw? " ka u-in a ti leh hnuhnawha. 

"A ho lutuk, mihring ve bawk ania, nuam a tihna hmuna awm turin dikna a nei alawm" ka ti ve tlat. 

Kan in hi chhawng thum niin Inchung leh inhnuai ber hi inchhung atanga inkalpawh theih vekin kan siama. A chung ber pawh inchhung atang a kal theihin inchhungah step zau nuam hek hawk tak mai kan daha, kan nupa room chauh inchungah hi chuan awmin Mikhual nei reng reng kan nih avangin inhnuai ber hi chu Driver leh min puitu kan nula te room bakah room awl dang  pathum awmna a ni a. Kan nula te room leh Driver room hi inkalpawh theih loh turin kan siam vek thung.U Sangzela office a awm tel bawkin a office tak hi chu ama hmu duh te a kawmna anih tel avangin inchhung luh kher ngai loin pawn lam atanga kal theih tura siam a ni a, inchhung lam atanga luhna kawngkhar a awm tel tho bawk. Choka leh living room awmna floor-ah hian bed room pahnih a kilah kan dah a, Melo-in pakhat hi a chang chawta, rawn riak reng lo mah se midangin an hman tawm ngai lo. Inhnuai berah room awl awm mah se Melo-i room lo zawkah u Chhari ka awmtir a, ani hi chu ka naupanlai atang a kan bula awm tawh, a fate ang maia min lo buaipui tawh thintu leh ka nu in laizawn ang maia a en a ni a, ka theih ang anga tih zahawm ve ka duh. 

Thingpui in pahin ka pa chanchin ka hrilh a, "a va zia lo tak. I nu khan a control that thin nen, u Sangi hian a control tha peih lo angreng a. I pa lah mahni insum tum vak lo chi a lo ni ve bawka" a ti a. An chengho bawka a sawi dik ngeiin ka ring. 

Intifai tura room lama a kal hnuah chawmhmeh an siam ho ka enpui leh thuak thuaka, Bawihpuia a harh leh harh loh en turin roomah ka chho a, thawm ka dim viau nangin a lo la harh lo. Vanneihthlak takin mut a duh em em a, hnute pe tura kaihthawh chawp angai hial thina, nausen pawm siin ka hahdam phian. 

A puansin a lo leng sawn deuh chu ka sin that tira, a Sam ka huikian saka. A piantirh phat atangin sam a nei tha nghal a, sam tam chi ka ni lo nangin a pa te lamah a kal hlauh mai. 

A la no deuh bawk nen tu nge a an ka hre thiam thin lo va, mahse nau rawn entu ten a pa ang an rawn ti deuh zel mai. 

Dar 8 velah u Sangzela a rawn haw a, ka pa awmdan ka lo zawt thuaia, hmasawnna a awm loh thu a sawi tlang nghal pawp mai. 

"Vawiin chu damdawiin lama kal zuai ka duha, u Chhari a awm tho bawka, Bawihpuia hi ka kalsan mai dawn mawni ka ti"  Office kal tura a insiam laiin ka ti a. 

"A pawi hleinem, mahse Chhari i ringngam dawn em ni? " Rilru nuam chiah lo tih hriat tak hian a ti a. 

"Ring ngam e.. Rei kal pawh ka tum lo va. Khua a vawt bawk nen hruaichhuah ka hreh deuh tlat" ka tih chuan " I rinngam leh a tha mai alawm. Kei hi vawiinah meeting ka nei nual dawna, ka rawn haw hma vak lo maithei ania" a ti zuia. 

A chhuah hnuah u Chhari nen Bawihpuia kan bual duna, u Chhari hi nau khawih vel zei tak mai a ni a. Bawihpuia hi thla tling ve dawn tawh mah se keiman ka la bual miah lo. Ka nu bual turin a lo kal mai zela, zei lo chi ka ni bawk nen, keimah ngawta titur chuan ka ngam rih ngang lo. 

"Rawn haw hma chu ka tum anga, mahse ka chhuah law law chuan Dawr tlawh ka duha, Faki awm tho mah se Mission veng lam bak hi a enkawl hman tak tak tawh lo a' u Chhari hnenah ka ti a. " Hmanhmawh duh suh, ka awm alawm. Bawihpuia lah hi a mu duh roh si a, hnute lah i pek angai bawk si lo" a ti awlsam et. 

Kan Driver nen Damdawiin lam kan pana, kal pahin Mendy ka call a, eng emaw palha Driver hnenah u Sangzela'n a lo zawh takin tiin Mendy ka biak lai pawhin vawikhatmah a hmingin ka ko lo. 

ICU a awm anih avangin tihtheih vak a awm lo va. Pawn lama lo awma, damdawiin lamin chanchin an rawn sawi ngaihchan deuh tawp animaia. Bei a dawng duh angreng viau. 

"Amah chu a harh tho a, tawng pawh a tawng peih a, mahse biak tam an phal lo va. A rilru a fim chiah lo deuh bawka" Tiin nu Sangi'n min hrilha. "A khawsik a la awm em? " ka tih chuan a bu nghat a, "Dialysis hi an tihtheih veleh ti se, a sawtpui beisei phawt mai ila.. " a ti hap. 

"A kal a khawih atangin a la rei loh nen, ka rin ai hian a chhe chaka" ka ti ve a. "I pa chu a insum duh lo thin alawm. Sa te hi ei lo mai ang u tih pawn siam talh a duha, meizial lah a lo zu ru leh thin a"  a ti leh hlak hlaka. Kan thut deuh reng tawh hnuah ka nute-i te ho an lo kal ve a. Nu Sangi a a lo bawka, ka Nutei te ho pawh tha tak takin a lo be bawrh bawrh vek mai. 

Dar khat velah ka kalsana, u Chhari hnenah Bawihpuia fel leh fel loh ka zawta, "A muhil reng mai, rawn ngaihtuah suh. Tunah pawh hnute a hne zo a, a muhil leh mek tawh" a rawn tih chuan haw hmanhmawh chuk ka ngai lo tih ka hre thiam mai. 

Mission veng a ka dawr pakhat zawk kan thlen chuan Driver hnenah thil eina tur ka pe a. Kei erawh chu dawrah ka lut nghala. Kan dawr hi kawngpui an taka awm a ni a, parking a tha bawk nen, kan hawn tirh phat atangin kan hralh chhe lo chho nghal viau a, Dawr hmasa zawk erawh khawpui laili lai taka awm a ni bawka, mission veng lam hi chuan phak lo tak a ni. 

"Mendy-i maw i nih? " Faki bula hmeichhe lo thu hnenah ka ti nghala. Lala nen phir anni ve bawk taka, in ang lo tak anni ringawt. 

"Aw, ni e.. " Rawn dinchhuah pahin a ti a."min lo nghak rei tawh em? Lo kal rawh, Balcony lamah khuan thu ang" ka ti zui zat. 

Inhmatawnin kan thu duna, a hmelah chuan a zam hle tih ka hre theia, an chhungkaw lam chanchin te ka zawt hmasa a, amah hi an khuaa kohhran schoolah zirtirtu niin a nau mipa sipai a awm thu leh a nu leh pa an la dam tihte a sawi nuala. Ka hriat tawhsa vek ni mah se uluk takin ka ngaithlaa, ka hriat dan leh a sawi dan a inang vek bawk. 

"Eng nge ka thil tur i kawl chu le? "ka tih chuan a bag atangin phone pakhat a rawn phawrhchhuaka, ka lamah a rawn nawr phei a. 

" Hei hi ka u phone hman thin ania. I kuta pe tur chein min ti a" a tih chuan phawk tak hian ka en a. 

"Keimah maw? Ti nge a? " ka ti thuai. "Ka hre bik chiah lo. Kar kalta mai khan kan khua ami, ka u thianpa hian min rawn pe a. Ka u in man a tawh hma ni a a lo pek ania. A thianpa chu Aizawla awm tho hi a ni ve a. Mahse, phone hi uluk taka tuam anih avangin a chhung lam chu a en lo tih ka hmuh khan ka hre thiam a. A cover leh phone inkarah khan lehkha them a inzepa, nangma hnena pek tur tih a inziaka. Hei hi ania" tih pahin lehkhathem tereuhte hi a rawn dahchhuak leh a. Ka la thuaia, mahse hmar tawnga inziak anih avangin ka hming bak chu awmzia ka hre thiam lo. 

"A lo haw hnuhnun ber kha jail a tan hma lawk kha ania. Zan khat chauh a rawn riaka, mahse a mizia a danglam lutuka. Chumi tum chuan a chungah eng emaw thleng palh thut thei anih thu a sawia. Ka zawhchian lahin a sawi duh miah lo a" Lungchhe aw deuh hian a ti leha. Ka mizia a nu lo viau chungin mi tap hi hmuh har ka tihzawng tak a ni thin tlat thung. A kutah ka vawnsaka. 

"Thihna hi chu a na em a ni " ka ti ve hap.

"Nia, na tak a ni. Nat lawkna nei lo an nih phei chuan a hrilhhaithlak lutuk" a ti leh niah niah. 

"Kei kher pe tur che a a tih chhan hi mak ka ti deuh a' ka ti leh sapa. " Ka hre bik lo le. A lehkha ziahah hian nangmah pe tur che leh midang hriat loh tura fimkhur tura min tihna a awm a. A fimkhur em avangin keipawh ka hlauthawng a. Mahse, ka beisei aiin ilo fel daih sia. Ka lawm lutuk " a ti leh sap sap. 

"Ka u kha ka hre chiang a, kan naupanlai atangin ruk a ru ngai lo. Khatianga amah chhawrtu te ngei rawk tum leh an fanu thah tuma a bei kha tun thleng hian mak ka la ti tawp thei lo va. Jail hial a thlenga, jail-ah lah tikhan a thi zuia. Min fuih rengtu leh mi huaisen a ni a. Ama nunna ala phei hi chu la awih thei lo. Khawngaih takin ka u thih naah hian enge thleng min zawnchhuah sak hram rawh. Keini tan engmah tihtheih a ni lo va. Khawtlangah lah zahna namen lo kan tawka, hawi ngaihna kan hre lo" lungchhe takin a ti leh duaha. Lala kha kum khat lai ka hre hmana, Mendy nen hian an hmel inang lo mah se an mizia a inang tih ka vawikhat hmuh naah ka hre theia. Rempuia'n Lala chunga thleng zawng zawng kha Melo-i plan vek a tih kha ka hrechhuak vang vang mai. 

"Tihtheih ka nei angem ka hre lo va. Mahse, ka theihtawp ka lo chhuah ang. Eee, I u khan ngaihzawng a nei em? " ka ti leh riha. Min chhang mai loin a melh ngai a melh deuh vang vanga. A thaw leh deuh huaia. 

"Thil mak deuh ka u min hrilh chu, a pu fanu nula senior nen a rukin an inkawpa, induh em em mah se innei thei tur chi anni lo a ti thina. A hmangaih em em a, vawi tamtak an chesual tawh niin a sawi nghe nghe a.. Ni lo, I thinrim nan ka sawi lo ania" mangan hmel tak hian a ti nawk nawk mai. A thilsawi chu mak ka ti lutuka, mak tih tawngkam hian a sawifiah zo lo hial ang. Mahse, mak tih hun a ni lo tih hriain ka inthing harh thuaia, 

"Thinrim lo ve a, midang nun ania. I u sawi chu a thleng lo ka lo tihsak ngawt thei hleinem" tha takin ka ti a, mahse ka sawi lai reng pawhin ka thilsawi chu ka awih lo nimaiin ka inhre thung. 

A duh lo chung a hawna tur pawisa ka pe a. Min mamawhna a neih phawt chuan min call mai turin ka ti a. Mahse, whatsapp a min be lo turin ka ti thung. Thil hriatthiam loh ka neih chuan ka call ang tih ka hrilh bawk. 

In ka thlen chuan u Chhari leh Bawihpuia an lo inpaw muhil a, "I duh leh intifai rawh, khumah ka lo mut anga. Eirawngbawl lam khu ka lo zuk tihpui ve ang" a lo ti thuai thuai. 

"Alu bai la, nghaum pawh ka lo lei lawk thlap. Mahse, u Sangzela'n uih a duh lo tawpa. A lo haw hmaa  a uih kha lo tihreh hman angai ang" ka tih chuan kan nui dun kar kar mai. 

Bathroomah Mendy phone min pek ka keng lut a. Inbual niawm takin shower ka on a. Kei erawh ka thu fel at thung. 

Phone ka on a, a in start vel lai chu nghakhlel leh huphurh bawk siin ka en reng mai. Sim card a awm lo tih ka hre lawk tawh sa a. A in on fel veleh text messages ka hawng nghala. Mahse, ka beisei loh takin engmah a lo awm lo. Gallery ka en leh a, thlalak a lo dah nuala, Melo-i nena an thlalak tuihnai vak lo hmuh ka tum laiin chutiang a awm tlat lo. 

Ka kheuh ka kheuh kual hnuah thilmak ka hmu ta hlawl mai. Mi pahnih inbiakna niin an inbiakna ho screen shot a lo dah teuh mai a lo ni a. A hmasaber ka hawn chuan msg awm ka chhiar nghala. Melo-in a hmangaih thu a lo hrilh kur nguai mai chu niin.. Mendy khan dawt a sawi reng reng lo tih na a lo ni. Mak ti em em in ka en tlawk tlawka, engtin nge hetiang a thlen theih ka ti vawng vawng mai. 

"I inbual zo dawn tawh em? " U Sangzela awin a rawn tih chuan rang tak hian ka phone kenlai bathrobe ip teah ka hnawh lut nghala. Shower ka herh tawp a. 

"Min bia em? " ka ti let lang lang. 

"I zo dawn tawh em? " a rawn ti leh a. Ka zo tep tiin ka au let nghal zat bawk. Meeting pawimawh a neih dawn vangin a lo haw hma dawn lo tih a sawi ngeia. Mahse, engvanga rawn haw hma leh ta thut nge anih ang tih ka ngaihtuaha, Mendy nen kan inhmu tih hre lo hram tehse.

Ka chhuah chuan Bawihpuia a lo pawm a, "ehe, a lo harh reng alaw? " ka ti vat. "I au harh alawm" ani leh ni lo ang tak hian nui chungin a ti a. "Khai aw, a va ho tak. Mahse, a pawi lo. A muhil reng maia, hnute pek a hun dawn tawh ang" ka ti teh ngawt. "I lo haw har dawn maw ka tia? " a tawng leh hmain ka ti a. "Meeting pakhat zawk a zo va. Pakhat hi chu zanriah ei nghal ngai a lo nia. Ka thawmhnaw duh aiin a pana, nangpawh inha thuai thin rawh. A vawh tehreng nen" a ti zui zat. 

Kekawr ka hak hnuah bathrobe ka phelha, ka phone ah a rawn tlachhuak chiah chu phone ka ak tih ka hrechhuak leh chiah. A tla bawl bawk nen u Sangzela a rawn hawi nghala, 

"A chhe duh awm thin mang e.. Bathroomah phone keng… " a tih lai mekin ka phone charge lai a rawn ri ve chiaha. U Sangzela a hawi nghal vuta, min rawn en leh a. 

"Hei hi i phone a ni lawmni? Phone pahnih engtik laiin nge ilo neih a? ' a ti ta chat.