Naruto - 14

 Then -14 na




"Phone pahnih ka nei hleinem,Hei chu U Chhari phone anih hi. Engmah ka save thei lo atia, ka inbualtur chiah kha min pe a. Bathrobe-ah ka ak tih pawh ka lo hre tawh lo" tim lo leh bahlah map lo hian ka ti a. 


Chhuata phone tla chharin ka ak zui a. Ka phone ri mek pick -up turin hmanhmawh takin ka phei zui nghal bawk. Ka awmdanah chuan dawt ka sawi tih a hriat eih lo va, keimah pawn ka confi lutuk hi mak ka inti hial zawk. 



Ka pick tur chiah chu a tawp hmana, nu Sangi anih avangin a pawimawh ringin ka call back nghala, rang tak hian a rawn pick up a. ' Chanchin thar a awm em ni? "ka ti nghal a. " Aih, awm hran lo ve. In pa hi ka call tlang thei lo va" a rawn tih chuan u Sangzela lam ka hawia, min lo en reng tih ka hmuh chuan phone chung chang kha a ringhlel anih ka ring ve tawp. 


"Nu Sangi ania, a be duh che" ka ngaihtuahna nena inmil lo khawpa zangkhai hian ka ti a. 

"Eng nge a? " Ti chungin min rawn pan pheia. Chhang lo in phone ka lo pe ve thung. 



Ka inthlak fela, ka inthlak chhung pawhin u Chhari hrilhfiah thuai thuai duh mah ila phili leh hmanhmawh chung anga lan hlauin nidanga ka chet dan ang thoin ka che a. Ka rilru-ah erawh chuan u Chhari a lo kal thut ang tih ka hlau zek zek. Nidangah chuan kan nupaa kan awm laiin tul tawpah lo chuan roomah midang an lo lut ngai meuh lo va. Tunah pawh hian an lo kal ngawt chu ka ring chuang lo. Mahse, inleng neih thu sawi turin a lo kal mai ka hlau a, u Sangzela'n a lo zawt thut anih chuan ka chhe vek dawn tih hai rual a ni lo. 




"Eng nge a rawn sawi a? " Phone a dah veleh ka lo ti thuai, Bawihpuia diaper thlaksak a ngaih leh ngaih loh ka check sak paha. "I pa bill chung chang vel a rawn sawi anih kha" a tih chuan "Bill a? Tinge nangmah a rawn hrilh daih che a? " hre thiam chiah lo hian ka ti ha. 

"Nihnih atlin veleh pek zel a duha, ka ngaihdan min rawn zawt anih kha" a ti awlsam leh mai. 


A inthlak zui nghal mawlh mawlha, Bawihpuia ka lo buaipui ve thung. A inthlak laia u Chhari lo zuk biak ka duh rualin tih chi a ni der si lo. A kal dawnah Bawihpuia pawm chungin ka zui thlaa, u Chhari choka atanga lo chhuak chiah ka hmuh chuan ka ip chawih thei. Mahse, Tim map lo hian ka en a. "I phone khitah ka la dah aw, ka la en hman lo va. I password pawh ka hre leh tawh lo" ka ti nghal tawng. Ka mitsirin u Sangzela ka en ru kara, u Chhari ka biakna chu ngaihven awmin awm lo mah se a ngaihven kur tih ka hai hauh lo. 


"A pawi lo, a hmanhmawhthlak loh" U Chhari'n a tih chuan ka thawveng hawk maia. Mahse, hniak phawi miah lo va min chhanna erawh chu amah nen a inhmeh lo ka ti ru em em thung.



U Sangzela kal hnuah roomah ka awm a, u Chhari'n rawn luh pah hian "khawnge ka phone chu? " a rawn ti nghal a. "I phone ka kawl hleinem" ka tih chuan a nuia. "I puitling ve tawh viau emaw ka tia, eng nge i tihsual leh tak? " a tih takah chuan ka nui ve hak mai. Naupan tet lai atanga min hre tu leh ka tihsual tamtak min thup mawi sak thintu pakhat a ni a. Ka u nen mize letling thawk neiin ka u a smart em em laiin kei erawh thil thlauh bawl bawl chi, felfai taka che hleithei lo leh a pawi zawnga khawsa reng mai ka lo ni a. Hauh ka tuar nasa thei viau thin reng bawk. U Chhari ngei pawh hian min han kuk fawk chang te a nei fo mai. Ka puitlin chhoh ang zelin ka tihsual a lian chho tial tiala, ka mize pawlawh tak pawh a zual ve zela, naupangchhe hauha hauh chi ka  ni ta lo chho a, zan rei tak taka ka haw chang pawha ka call thin chu u Chhari hi a ni ta zel bawk. Ka nu leh ka pa sum buaia buai an nih avangin Inchhung khawsak a kutah a innghat tam em em a. Ka mizia a hre chiang bawka ka awmdan atangin sawi lo mah ila ka rilru a hre thei nghal mai zel. 



"Thil pawimawhah midang phone ka kawla, a hmu leh sia.A hriat ka duh loh thil a ni bawk si nen i phone angin ka puh che nih kha. I lo hre thiam mai kha ka lawm zia chu a" ka tih chuan a nui hak haka. 

"Ka chebuai tep chu anih kha. Nidangah chuan fimkhur deuh teh, in pa hi a fing nasa mai si a, kan ropui lo dun viau mai ang" la nui reng chungin a ti tha ve mai bawk. 



Bawihpuia muthilh hlanin phone leh laptop nen balcony-ah ka thu a. Phone a ka thil hmuh ho zawng zawng chhiar hmasa loin laptopah ka dah lut pawp pawpa. Rempuia nen thil pawimawh kan inthawn ho pawh ka dah lut vek bawk. Melo-i leh Lala lo Inkawp ruk reng thu Rempuia hrilh ka tum zeta, mahse keimaha tih theih ang ang tih ve ka duh leh si avangin ka hrilh leh ta lo va. Dpi thihna vangin u Sangzela chhui ve reng mah se ka thil hriat -ah hian Dpi chungchang ala tel lo va. Bakah, Rempuia ka ring lo ni loin ka pasal hi mualpho tawpkhawk tur in ka duh lo nge eng thil nge ka hriat si loh, min dal tu ka nei tlat a ni ber. 



"I pa tlemin a hniam deuh a ni awm a, keimahin ka va kal phawt anga, chanchin ka rawn hrilh dawn che nia" Bawihpuia hnute hnek tur ka siam laiin u Sangzela'n a rawn ti a. Ka pa ICU a awm atangin vawiin hi kar khat leh ni khat a ni der tawh. Minute tam pawh a ral hmain a rawn call leha, "In lamah lo va phei la, ro rel fel ngai pawh a awm mai thei" a rawn ti leha, "Tunah enge a awmdan chiah ni a? " hlauthawng takin ka ti ve thung. "Ka la thleng lo. Lo va phei phawt rawh" Bung angreng tak hian a rawn ti leh a, a off zui nghal daih bawk. 



U Chhari ka ko a, Bawihpuia hruaina chi ni a ka hriat loh avangin lo awmpui mai tur in ka ti a, insiam pahin u Sangzela nena kan inbiakna ka hrilh zung zunga, a hmelah hlauthawng hmel a lang chiang ngang mai. 



Ka pa te in lam pana kan tlan laiin ka u ka call a, ani erawh chu Damdawiin lam a lo pan mek thung. Ka va thlen chuan Diktea a lo awm a, phili tak chunga kal ka nih laiin thutthlenga mu chungin game a lo khela, a mutna bulah ashtray inchhawpin meizial bung a hnawh khat thura, tui bottle leh kuhva nen a lo inchhawp hnawk nuai mai. 



Ka thleng fel deuh chauh tihin u Rama a rawn thleng ve nghala, damdawiin lam atanga lo kal a nih angin chanchin ka lo zawt thuaia, min rawn kal hnaih chuan angai te tein meizial rim a nam nghal huk mai. 


"A bp a sang hleithei tlat lo" a tih chuan a harh leh harh loh ka zawt a, "Harh lo. Nimin atang khan a la harh miah loin ka hria" a ti leh thuaia. Nimin lamah ka kal loh avangin chanchin ka zawt a, a biak theih loh tih an sawi miah lo. 


YMA hruaitu te hrilh ve hrim hrim ila kan tih laiin pahnih an rawn thleng a, ICU a awm reng tawh anih avangin nu Sangi chanchin an lo va zawt a lo ni a. Kal thut thei anih avangin engtin nge kan lo insenghawi ang tiin inchhung te kan han enkuala, bang zawng zawng thiah theih loh a siam deuh vek anih avangin han tihvak dan erawh a awm lem lo. 


"Dikte, room lamah lo va inkhel la, living room vel hi a theih ang ang lo tifel fai deuh ila" U Rama'n a ti a. YMA hruaitu te nena kan inbiak chhung khan a awmdan ngaia awmin thil pawimawh kan sawi tih hrehawm pawhin a awm lo. A awmdan chuan ka thlen tirh phat atangin ka thin a tirim et et maia, mahse inleng kan neih zui tak zel avangin engmah sawi loin ka insum thei hram hram thung. 


"Eng nge a? " a head phone la thla pahin a rawn ti hu a. "Damdawiin lam chanchin a tha vak lo tlat mai" u Rama'n tha takin a ti leh a. Engmah sawi tawh loin Diktea a tho a, room lam panin a kal nghal nal nal. A meizial zuk bung awm thur leh tui bottle a dah te a kalsan vek. A khawsak duhdan mak ka ti em em a ni tawp mai. Ka awmthat duh loh lai ber pawh khan hetiang hian ka awm duhdah ngai lo. Ka pa leh nu Sangi awm loh vanga inthlahdah mai mai ni theiin Ka hre lo. Keini pawh kha ka nu leh ka pa an zin fo va, kan awmpuite nen chauha kan awm tum a tam lutuk. Mahse, khatiang hunah pawh khan duhdah lutukin kan khawsa ngai lo va, meizial lek phei chu inchhungah kan zu ngai lo. Meizial heh em em u Rama takngial pawhin inchhungah a zu ngai lo. 




Inleng te chhuah hnuah ka pa te room lam chinfel ngai a awm takin tiin ka luta, nu Sangi damdawiin lamah a awm tam ve bawk nen tihnawktu tur an awm lo bawk a, a fai viau. 


Khuma thu chungin room chhung ka thlek kual dan dana, ka nu sulhnu hmuhtur a awm tawh lo emaw tihmai turin an khawih danglam nasa tawha, ka nu boral tawh hnuah ka pa hi khawhar taka awm turin ka duh lo. Mahse, nupui a nei leh hma em em lai erawh hi chu ka la na nawn fo. Room chhung an khawih danglam nasa pawh ka la na viaua, mahse nu Sangi tan pawh a pasal nupui hmasa sulhnu hmuh reng chu thil nuam lo te pawh a ni theia, an khawih danglam dawnah la na viau mah ila hriatthiamna lai chu ka nei reng tho.



Ka nu thlalak vel engmah ka hmuh loh avangin ka pa office lamah ka lut phei leha, Politics a luhchilh hnuah inleng an nei nasa zuala, a office pawh pawnlam atanga luh awlsam turin kawngkhar an siambelha, thildang erawh khawih danglam an nei lo thung. 


Album kan dahna lamah ka pheia, Album lo intlar dul zinga pakhat la thlaa. Ka nu kha thlalak nuamti tak mai anih avangin kan naupanlai atangin thlalak kan ngah em em a. Kan unaua thil kan inchuh lai te, cycle kawt zawla kan khalh lai leh a pangpar te chenin thla a laksak thina. Tha takin album-ah a daha, a chhiat mai loh nan album a thlak fo thin bawk. Kan naupanlai khan thlalak kan ning em em thina, mahse kan thlalak ho mai mai ni a ka lo hriat te kha lung tilengtu leh ka neih hlu ber thil te zing ami anni ta hial. 



Kan thlalak hrang hrang enkualin ka pa chairah ka thu a, a then ka nuihpui laiin a then chuan ka hnuk an tiulh thung. Thlalak ka en zawh hnuah ka pa chairah bawk ka thu leha, a dawhkan pawhdawh chu a kalh ring chungin ka pawt chhina, a lo kal lo teh mial. A chhunga lehkha lo awm ho chu ka thlek kual thuak thuaka. Ka nem khar leh chu dal tu awm ang mai hian a nghet tlat maia. Ka pawtchhuak leha, a bul atangin uluk zawkin ka nem luta, ka nem chip thei chuang lo. 


Chhuata thuin a kam tu ka en vel ngiala, ka hmu chuang lo. Mahse, ka rin loh tak maiin pawhdawh sir lam bang kilah chuan chahbi rawh luhna tur kua niawm tak ka hmu ta hlawl. A awmdan chu chik taka zawngtu tan lo chuan hmuh har tak tur a ni a. Kei ngei pawh hi vawi tamtak he roomah hian ka lut tawha,helaiah hian hetiang a awm tih ka hre ngai lo. 


Dawhkan pawhdawh a chahbi awm teuh chu ka humchhuaka, ka rawlh lut chhin zela, chahbi sawm lai ka tihchhin hnuah pawh a la inhawng thei ta chuang lo fo. 



Chahbi dang a la awm em tiin a lehkha dah ho zawng zawng ka lachhuaka, engmah a awm lo. Mahse, a chhuata a thil phah kil lam, tlema pawng deuh chuan ka mit a la ta chat. Uluk deuh taka en lo tan chuan pawng a awm tih hmuh harsa tak tur a ni a. A thil phah ka pawt kaua. Chahbi mal khat a lo let bal mai. 



Ka rin ang ngeiin ka herh rik khap rualin a inhawng nghala. Mahse, thir a siam safe lo awmin a inkalh tlat a. Chahbi a hawn na awm tho mah se number a lock chi a ni tel a. A chahbi awm ang ka hmu zo lo. 

Number awm that chu ka en vang vang hnuah ka hmet risk ta pawp. A inhawng lo chiang ngang mai. Eng nge a hman ang ngaihtuah chungin ka en vang vanga. Ka nu thilsawi hre chhuak thutin tihsual hlau takin ka nu birthday ka chhu leh chu a inhawng ta hlauh mai. 



A chhung ka bih nghala. Envelope A4 size pahnih lo awmin, Pa khat zawk chu tha takin a inchara, pakhat  zawk erawh a inhawng sa thung. 

A chhunga thilawm ka lachhuaka, ka rin loh takin ka pa thilneih ho Inziahna a lo ni a. A thilneih ho turu zia ka hmuh rualin Rempuia thusawi ka hrechhuak nghal vang vang. Ka nu damlai atang tawh khan ka nu khan sum a thawkchhuak hnem em em a,ka pa sawrkar hnathawk sang tak niin, eirukna do tlat angin lang mah se engmah tih a hreh loh zia hrechiangtu chu a chhungte tho tho kan ni. Ka nu pawisa neih zawng zawng kha chu ka u nen a inang chiaha pek kan ni a. Ka pa thilneih zingah hian in bak chu ka nu thawh ve a tel tawh kher lo vang. Ka pa thilneih te hi Inthlan dawn khan tihlan vek a ni tawha, mahse khatah khan a neih zat zawng zawng chanve pawh an lo ziak lo. He a thil neih zawng zawng ziahna hi tu emaw in lo hmuin ti leakout vaih se chuan a che chhe chai chai khawp ang. A ram neih ngah zia chu ani ang sawrkar hnathawk sang satliah tana neih ngaihna awm lo khawp a ni a. Mahse, a nei tlat lawi si. Engpawh ni se, Politics a a zuanluh phat atangin a thilneih zat atangin mipui a bum nghal a ni bera, ram han siamtha viau tur chuan a beiseiawm lo hian ka hre khawp. Mahse, a thilneih te ama hminga a dah aiin a unaute hminga a dah a tam zawk fe tih pawh ka hmu vek a, pa fimkhur leh thluak tha eltiang anihna nen chuan a thil tih duhdan a inhmeh viau tho bawk. 



Lehkha pahnih la awm chu ka en leha, pakhat zawkah chuan sumdawnna intawm na a inremsiamna a ni a. Pakhat zawk ka en leh chuan inremsiamna lehkha tho niin stamp paper-ah a inziaka, a tawpa hming awm ka hmuh rualin ka phu zawk mai. Mak ka tih em avangin an inremna chhan tak ka ennawn leh ngata, Mizoram khawchhak lama u Sangzela pa hnathawh mek, kum 10 chhunga zawh hman tur project lian leh sum tam tak awmna ni a ka lo hriat kha u Sangzela pa hming ni loin hnamdang hming a lo ni daih maia, mak takin a hnathawh vel zawng zawng enkawl tura u Sangzela pa hming a awm laiin ka pa leh u Sangzela zawkin thawk tak tak turin inremsiamna an lo nei  daih mai. Englaimahin contract hna an thawh ka la hre lo mai ni loin titi satliah anga ka pa leh u Sangzela pain an sawi bak khilai hna khi an sawi ngai ka hre hek lo. Thil thlen dan buarchuar nuai mah se keimahah hian thil chiang tak a awm a, Rempuia sawi ang ngei khan phailam mi nena inremsiamna neiin ka pain mizoram chhungah kawng a lo sial saka, U Sangzela'n a power a hmangtangkai bawk tih a ni..A sawi lai khan ka thilnrim em em a, mahse a hnuah erawh chuan engmah rinhlelh tur awm si lo vang khan Rempuia'n a hre sual aniang ka ti leh thut thut hmana. A hriatsual loh zia ka mit ngeia ka hmuh takah chuan mak ka tihzia chu pui tak hi a ni ringawt mai. 




Thla ka lak hnuah a awmdan ngaiin ka dah leh thlapa. Vanneihthlak takin an nulain min rawn koh chuan Album bawk ka lo en leh hman tawh. 



Dar 3 velah inah ka haw a, chanchin danglam a awm loh bakah Bawihpuia ka ngaihtuah tawh bawk. In ka thlen chuan a lo muhil meka, Bawihpuia tihharh hlau takin Balcony a thu chungin ka u ka call a. 

"Han tihtheih vak a awm chuang bawk si lo va. In pa pawh a kal leh ta anih kha. In lam chu in singsa fel thei em? " a rawn ti zung zung. 

"Aw, kan tifel animai. Engmah han thiah vel chi a awm lo bawka, a hautak lutuk… " ka ti te te a, Diktea lo awmdan leh a khawsa zia hrim hrim mak ka tihzia ka sawi zawm duah. 

"Nang hi i lo va ang chiam ange.. " A rawn tih chuan " Ka ang chiam lo kha ka inchhir zawk, nunphung a man thlawt lo" ka ti ve hmak. 

"Insum hram hram angai. Ka pa heti hi ania, boruak tha lo dang neih belh kan mamawh lo lutuk tlat. Eng ang pawhin lo khawsa se enliam tawp tum rawh. Ka pa leh nu Sangi an awm bawk si lo va, mitmei ven tur awm lo ta chu a inthlahdah ve aniang" a rawn ti leh duaha. "A hma pawhin ka nu leh ka pa an zin fo va, a awmdan ang hian kan awm lo lutuk" Lungawi lo tak hian ka ti leh hmiah. Buaina siam a duh loh vanga min bengdai mai mai mah nise ka ngawi thei thlawt lo. 

"Um, engpawh nise lo insum hram hram rawh. Hun remchang ka hmuh hunah ka lo khak dawn nia" a rawn tih leh chuan ka rilru a dam ta deuh. 



Eirawngbawl lam enpuia chokaa ka awm laiin Melo-i a rawn kala, "Damdawiinah ka kal ang ka tia, mahse vawiin chu ka buai nileng ta thaka. Eng nge in an? " a rawn ti nghal zung zunga. A hmel tha tak leh hlim sarh mai chu ka en a, a hmel landan phena tualthattu anihna zawk hi ka ngaihtuah chhuak tel lo thei tawh lo. 


"A la ngai reng animai. Zuk kal kher angai hleinem, tih theih a awm chuang lo. Keipawh ka kal lo" ka ngaihtuahna tilang miah lo hian ka ti a. "Pathian zarah a tha leh turah beisei phawt ang. Khawnge Bawihpuia? "a tihzawm zat. 


" A muhil a,ka chhuahsan char chara, ka hawin a lo muhil a, a la harh lo reng reng" ka ti ve a. "A pa ang mai, mut duh lutuk. A upa tual tual anga, harhvang em em anga" Nui hak hak chungin a ti a. "A thawh hma theih zia ngaihtuah chuan mut a duh thin tih chu thil awih har tak a ni" ka ti tha ve mai. Thingpui a duh leh duh loh ka zawta, a duh loh thu sawi pahin "naktuk zanah ka rawn riak phei dawn nia. I kalchhuah angaih pawn Bawihpuia i ngaihtuah awm si" a tih zawma. "U Chhari a awm a, bakah zan lam hi chu a tawpkhawkah lo chuan chhuahsan ka la tum lo" ka tih chuan a hmel a danglam deuha,"Chuti maw? Engtik atangin nge a lo awm a? " a ti ha.  A lo thlen ni ka hrilh ve maia, a hmel danglam deuh pawh kha a pangngai leh tawh. "I pa te bulah a la awm reng emaw ka tia lawm" a ti thuai. Ka mamawh zia sawiin keiman min awmpui tura ka ngen thu ka sawi ve a. "Nang lah han tibuai viau dawn che ila in lamah ka nu i tel loin a awm thei der si lo. A chang chang bak chuan ka pawt buai ngam lo che a, bakah nutling ve pui si nep deuh nih hi ka zak ve a, ka ko thlazen ngam lo che" ka ti zuia. Amah mamawh leh pawimawh anga ka sawi takah chuan a hmel a eng nghal sar maia. Langsar ber nih duhna leh miin amah hi ngaipawimawh se a duh tih ka hriat tlat tawh avanga sawi ka ni a, ka sawisual lo tih ka hre thiam nghal mai bawk. 


"Bawihpuia chu han en ila, a lo harh tawh maithei a" a ti leh daiha. Roomah kan inzui chho a, a lo la harh ta lo cheu. U Chhari'n a muthilh hun a sawi atangin a rei tawh a. Hnute hnek tir ka duh avangin ka tiharh ta ngawt. 


"Ka rawn riakphei ang ka tih chhan chu i pa vang anih rualin inah ka awm peih lo va. Ka period tur intham nen hian tunlai chu ka ti hleithei lo" a ti nghat. 

"Ti nge a? " phur lo angreng tak hian ka ti a. Diktak chuan a tawn tawnin an lawm lohna ka bulah an thlen a, tan lam neih thiang lo leh tawngsual hlau reng rengin ka awm a. Ka ning thin. 


"A buaithlak animai. Tea lah hian a tan hlur mai bawk si. Indan daih mai ka duh, ka ning" a ti leh hlaih hlaiha. "Awi, han indang la, neih loh i nei dawn bawk si lo.. Eee, pasal i nei lo tak. Ration card, gas card thlengin i hmingin an awm ngei bawk anga.. " Nui vak vak chungin ka lo ti a, "ka den teh ang chu aw" nui chungin a ti ve maia. Kan nui dun ta nghek nghek. Diktak chuan indang luah mai a duh thu hi a vawikhat sawina pawh a ni tawh lo va, a lungawi loh chang apianga tihdan anih avangin eng he huah ka ngai tawh lo. 



Chawei tura ka sawm chuan a lo duh ve maia, chaw ei tam lo, hmawmsawm dang erawh duh em em si a ni a. Keini lah mikhual neih thut thut chang nei kan nih avangin mi pahnih vel hi chu kan kep deuh reng bawk. 



"Melo-in naktuk zanah ka rawn riak ang a ti a" u Sangzela hnenah ka ti a. "Eng nge ni leh ta pek? " Bak deuh tuk hian a ve thung.

"Ka hre chiah lo. An intibuai leh nge ni? Amah kha chuan ka hne a ti ringawt a. Ka pa hi a awmdan a chiang bawk si lo nen, a rawn riah chuan ka kalchhuah theih min beisei pui deuh aniang" ka ti duah. 


"Naute hi midang kutah dah lo deuh thin rawh" a tih chuan min khei nghal zak. 

"Thin tihturin tu kutah nge ka daha?" ka ti bak ve hlak mai. 

"I dah thin leh thin loh chu i hria ang chu. Eng nge maw i thinrim ngawt le? " a ti ve thung. "Thin i tia, loh theih loh tawpkhawkah bak ka dah lo. Chu pawh reilote chauh ania" Lungawi lo tak hian ka ti leh a.

"Chuti anih leh a tha animai alawm mawle. Lak nat tur a awm em ni a? " Thinrim awki hian a ti a. "Nang zawk kha enge i thinrim a? Rilru hah nak laia" ka ti bung ve nghat. 


"I rilru a hah lo tawp aniang, I la nui ring thei em mai"  a ti chu a sawi dan a ngeiawm tawpkhawk. "Rilru hah lai pawha ka nui thei hi min lawmpui ta che. Nang anga mi zinga nui thei, nupui bula tum reng ka ni ve hleinem" ka ti ve ta salh. 


"In enfiah i ngai anih chu.I bulah ka nui lo anih chuan insiamthat i ngai animai" min ti let ta daih. Thinrim tak hian ka en a, " Chutiang ka mamawh lo. Ka pa a dam lo va, ka rilru a hah. Engthilahmah insiamthat ka mamawh lo" ka ti leh tawka. 

"Nang chang lo pawh an rilru a hah vek, mahse, i chhungte dangin nang anga rilru te an pu lo. I bulah ka tum reng tih i hriat chuan i bula awm a nuam lo tih na animai" Min ti leh ta nek. A tawngdan leh a hmelah zawng zawng nen min ning hmel a pu tel kher bawk chuan min ti tlawmngai zual ta. 


"Min nin leh tlanbo la ti nia. Min nin let in ka ning zawk che tih hre rawh" ka ti ta piap. 

"Rak vak kher suh, beng ngawng ka ni lo" a ti leh zela. "Ka thu thu" ka ti bung hmak. 

"I thu lo, nupui chu pasal thu thuin awm tur" a ti leh hmiah. "Ooo, a va lawmawm ve. Ih e, hmanlai a ni tawh lo ania. I pawnlam landan ang hian roomah pawh hian lang rawh. Mi zingah i ka zen ngam khawpin i zaidama, he room chhungah ve hi chuan Sakei sual ang mai i ni leh a… " ka tih lai mekin, "Ngawi rawh. I tawng tam lutuk tawh" a ti thawta. A au deuh vak chu hlau ve niawm tak hian Bawihpuia a rawn tap nghal a, rang takin ka pawm nghal vat.  Tihtlei tumin ka awi a, u Sangzela lo kal hnai chu ka mitsirin hmu reng mah ila ka hmu lo der tlat tho. 


"Tawng tam hi sim tum rawh, hmeichhe tawng tam chuan kut an tuar nge nge ania. I duk leh chur mai ang" zawi fiah tak hian a ti a. Kalsawn pahin a nui zuia. Ka thinrim lutuk ka sa vek thei. Ka pa vanga rilru hrehawm taka ka awm lai leh ka rilru no ngawih ngawih hun lai a ni a, min dawhthiam ber tu tur ka pasalin min dimdawina reng reng a nei lo chuan min ti thinrima, ka rilru a na em em bawk. 



Zanah u Sangzela a chhuaka, a kalna tur ka zawt lo. Mahse, u Jimmy-an chhungkaw group a thlalak a rawn post atangin Damdawiinah a kal tih ka hre ve chauh. Biak ka tum lo va, min bia pawh ni se a tul tawpah lo chuan ka chhang peih kherin ka ring lo. 



Khuma awm chungin laptopah thil pawimawh ka en paha. Ka thil hriat ang ang pawh ka pa dam lohna avangin engmah bawhzui loin ka awm a. Rilruin hre reng mah se ka pa ngaihtuah reng renga awm ka nih avangin engmah ka ti tak tak thei thin lo. Rempuia ka tibuai em em a. Amah Aizawlah a awm si loh avangin midang a tirh chhawn leh te angai thina. Chutichung chuan englaimahin a phun nawi ngai lo va, a hman loh thu pawh a sawi ngai hek lo. Hetiang em em a mipa dawhthei hi ka la tawng ngai lo va, ka mimal thilah ani ang em em a tihbuai hi ka la nei ngai lo bawk. 



"Aw, Miss… " a rawn tih chuan ka hnuk a ulh nghal tun thei. "Miss" ti a min koh hmasak ber tum hian ka ngei em em a. Mahse, min koh tak ziahah chuan ngaiah ka nei a,ka hmingin min ko se mak ka ti zawk hial tawh ang. Englaimahin tawngkam vin leh hriat nuam loin min be ngai lo va. A buai em em lai pawhin ka mamawh anih chuan a awm reng bawk. Mipa tawng bawrh bawrh ngai lo leh zahawm khek khawk tak mai a ni a.Kan inbiak apiangin ka titi angaithla thina, thil ho mai mai ka sawi teuh tum pawhin ning awmin a awm ngai hek lo. 


"Thil ka lo thawn che.. Mahse, a tawp thlen hi ka duh em ka inhre rih lo" ka ti a. "I tha em?" a rawn ti nghuta. Ka awki zuai raih mai chu a hai lo tih ka hre thei nghal mai bawk. 


"Aw, ka tha. Ka pa zawk hi tukin atangin a hniam leh deuha"ka ti thuaia. " Chuti maw? A va zia lo tak. Midang i hrilh em? " a, rawn ti zung zung. Tumah ka hrilh lo tih ka sawia, thil thawn ka nei tih ka sawi nawn leh bawk. 


"Ka hmu e.. Hei kher kher chu midangin hmu se a pawi ve dawn anih hi. Mahse, I thu ka hmuh hma chuan engmah ka ti lo vang" Nghet cherh chawrh hian  a rawn ti a. "Ka lawm e aw.. " ka ti sap thung. Ka rinna vawikhatmah a la tichhe ngai lo a, tunah pawh hian ka thu a hmuh hma chuan engmah a ti dawn lo ngei tih ka chiang ngam. 


"Lawmthu sawi angai lo.. I pasal mualpho ruala mualpho tur i ni a. I pasal ni loin nangmah ka ngaihtuah che tih hre reng la. I inpeih lo anih chuan ka damchhungin ka up hlen thei. Mahse, sual hneh turin i huaisen tawh tih ka hria che a. I la inpeih em em ang" Inringtawk tak hian a rawn ti leh a. 


"Naktuk zanah Melo-i a rawn riak dawna" ka ti leh ringawt. Lala thuruk te ka la hrilh ta lo cheu. 


"Fimkhur ang che. Rul bula khawsa i nih kha" a ti leh nghut. "Um, ka ipik e… Helamah awm la, midang ho nena lungkham nei miah lo a awm leh ka chak" Ka ti ta thlawt. A thaw deuh huaia,min chhang dawn emaw ka tih laiin a off a.. A rawn video call zui nghal zat bawk. 


"Eng nge i hriat a? " ka ti hlar mai. 


"Sawi rawh le" a ti ve thung. "Eng maw ka sawi ang? " Hrethiam chiah lo hian ka ti a. 

"Engtin nge kan pu chuan a lo tih leh tak che? Kut i tuar em? " a rawn tih leh chuan enge sawi tir min tum ka hrethiam ta chiah. 


"Naru… . " ka ti nghal hap ringawt. 

"Engtin nge a tih che? " Luhlul tak hian a rawn ti leh a. Nupa kar thu thian mipa bula sawi fo mai chu fuh lo tlata hriat na ka nei a. Mahse, ani hian ka hrilh hma atangin a cousin hnen atangin a mizia a lo hre vek tawh tiin ka inthiam chawp a. 


"Kan inhau" ka ti tawi tak. 

"Ok, ka hria alawm" a ti awlsam leh mai. 


"Ka thiam loh aniang. Ka pa vang hian ka rilru a no ve lutuk a" ka ti leh ringawt. 

"Ka hre thiam che alawm. Mahse chak deuhin awm tum hram hram la, depressed lo hram bawk ang che. I duh hun hunah min rawn bia la, engkim neitu hnenah tawngtaiin ka lo dilsak bawk ang che" a rawn ti a. A tawngkam dam leh min hrethiam ngawih ngawih tih ka hriat na chuan min tahtir ta nge nge. 



Che loin ka mu a, u Sangzela lo haw thawm ka hre reng chungin ka ngaihven lo. Ka tah nasat lutuk avangin ka hnar a ping vek bawk. U Sangzela muthilh hnuah pawh ka la meng renga. Thil tam tak ka ngaihtuah a, ka pasal bula tap tur ka nih laia ka thian pa bulah zawk ka tap kha dik lo niin ka hre tha leh a. Mahse, ka pasal aiin a let tamtakin Naruto bulah hian ka thlamuang zawk tlat si. Rempuia lakah hian rilru tenawm ka pu lo tih chiang takin ka inhriaa, mahse ka tana mi pawimawh hi thlang dawn ngat ila chuan u Sangzela aiin a chungnung hial ang tih ka chiang reng. Pasal nei nisiin pasal lak atanga duatna ka dawng ngai lo va. A duty ti hlawhtling ang lek a thil engkim hi ti nimaiin ka hre thina. Amahah hian makpa leh pasal anih anga chhungril atanga tih tak takna a awm hlawl lo. A nun hi a lem ngawih ngawih mai hian ka hriaa, that chhuaha inngeih hram hram tuma ka awm leh min zuam a, ka mize harhvang tak nena ka lan chang lahin mi puitling lo leh zahpuiawm nih ka hlawh leh bawka. Nupa ni si hian nau ka neih atanga thla a liam leh hial thleng hian sex kan la hmang leh ta reng reng lo va. Nau ka neih hma pawhin kan hmang chuang hek lo. Mipa anih angin a mamawh ang tih ka hre thiam ve a, chak lo chung pawhin inhawng tak in ka awm ve tho bawka.Mahse, min mamawh lo tih zawng hi chhanna ka hmuh chu a ni leh mai. A bulah hian awm Dan thiam theih niin ka hre tawh lo. A hmingchhiatna tur thil kawl ru reng mah ila ka pasal anih tlat avangin ka che hleithei chuang tlat si lo te hian min ti ipik zual ngawih ngawih. 



Thawm dim takin ka tho a, toilet atanga ka let leh chuan u Sangzela phone charge lai a lo eng va a, Damdawiin lam ngaihven reng ka nih avangin ka pan phei nghal thuaia. A phone ka lakanga. A contact list ami ni loin a rawn call a lo ni a. Ka chhungte chu a save vek ka turah ka ngai a. Damdawiin lam atanga rawn call annih ka ring lo. 



Ka dah tur chu msg a rawn lut leh chiaha. Open loin notification a lo lang chu ka en a. Ka chhiar sual emaw tiin ka chhiar nawn leh ngat. 


"Zanin aia nuam kha ka la tawng ngai lo tak tak ania.. Mahse, invenna i hmang lo tlatin ka hria" tih hi a inziak kalha. Thil nuam tak ti a invenna hman ngai leh si chu eng nge anih ka hai hauh lo. … 

Comments

Post a Comment

Popular Posts