Zarzokimi -3

 Chapter - 3

Pick-up tumna nei lo in ka phone ka en renga, vawi 5 min lo call na a ni tawh. Tawngkam tha taka ka biak theih dawn rih loh avanga pick-up duh lo ka ni a. Thinrim laia ri hluai chi leh thil thup thiam lo tak chi ka nihna hi ka paih thei lo va, ka thinrim rei lo viau thin lawi bawk. 

"Bawihi, Reubena'n a be duh che ania. I phone ri i hre lo em ni? " Ka room a lo luh pahin ka nu in a rawn ti a. Hmui phunin ka be duh lo ka lo tih chuan "eng a? " a ti hu a. Tawngri ngam si lo leh thinrim takin "ka be duh lo" ka ti nawn leh a. A hre thiam ta a ni chek ang.. "Reu-a, a hman lo laklawh a, nakinah rawn be leh mai ta che" a ti nghal a. 

"Eng nge ni a? " phone a dah hnuin a ti nghala. Inngaizawng rei tawh, chhungte hriatpui vek kan nih mai bakah Reubena hi mi biangbiak thiam tak a ni a. Ka chhungte pawh hian an nelin ka nu phei chu nu tawngduh tihtakah an inkawm nasa thei viau. 

"Engmah, ka be peih rih lo. Eng nge nangmah a rawn call kher che ni? Over lutuk" ka ti hlak hlak. "Ngah nge over i tih a? Vawi 5 vel ka phone tawha, a chhang thei lo tiin a rawn mangang ve anih kha. I ho mai mai em mai, eee… ka phone hi mi ka phone thei lo, a thi aniang. I pa kha bia la, ka phone lo recharge tehse" a ti a. 

"Ka inbual dawn, nakinah animai. Duh leh nangmah khan lo bia la"kalsawn pahin ka ti a. " In phone te hi khawih a hara, ka khawih thiam ve hleinem. A hmai hi inchuk zeuh zeuh ringawt mai hian ka hria" a ti deuh tlat. "A har lo em maia, tikhan a en tawp theiha, ka pa phone nen khawih dan a inang reng. Nangman lo hrilh mai rawh, inbual zawhah Thangzeli te inah kal lawk ka ngai lehnghala' ka ti a. 

Kan in hi kawngpui bul te a awm niin kan naupanlai chuan kawng hnaih deuh tak, kawtzawl nei tho siin kan sa thin a. Tunah erawh chuan kan tawlh hreta,  A chhawng niin a hnuai zawk hi lei zawl lek lek niin a chung hi Assam type, chung sang takin kan zawma. Ka u nen room kan nei a. Bathroom pawh kan intawm turin pakhat kan dah tel a. Inhnuaiah ka nu te leh ka pi room bakah room ruak, mikhual neih changa an riahna tur bakah bungraw dahkhawmna room awmin kan inhmun a rem bawka, a nuam ve viau. 

Ka inbual zo inhnuaia ka chhuk thla chu ka nuin " I phoneah khan i pa number ka hmu lo. Nangmah khan han be teh, I pi biak ka ngai ania"a lo ti chunga. "Engtin nge maw i hmuh loh theih le? ka phone hmang mai rawh. Ka pa chu nakinah ka hrilh mai ang" ka tih chuan ka pa number a hmu loh thu bawk a sawia. Ka pa phone number hmetchhuakin ka entira. "Hmuh ngaihna a awm lo tawp anih hi. Kan pa tiin alawm ka zawn" a tih chuan ka melh ram ram a. "Eng nge kan pa ka tih ve ngawt ang? " ka ti hmak a. Nui vak vak chungin ka pi a call paha, "Hello, Thiana… khai aw, ka nu.. Awi, Zarzokomi vang vek a ni" a ti nuaia.A nui vak vak chu nuihza leh thinrim inkawpin ka en reng ringawt. 

"Chemte, vawk saw an ngek reng mai, chaw va pe mai teh. A hun dawn tawh tho" ka piin chokaa lo luh pahin a rawn ti a. Ka nuin phone a ka pi la be reng chungin "pe lo vang, keiman ka lo pe ang. Ani vawkchaw pe zawng a in te a hawlhfai lo thina. Ka duh lo" a rawn ti a. 

Thangzeli te in atanga ka haw chuan ka pi chauh a lo awm a, "Insuk seng a hun tawh ania. Inchungah inzar thina, ni lo se keipawn ka seng mai tur ania. Kailawnah ka kal thei thin lo" a lo ti a. Inchung chhohna step hi kailawn tiin a sawi mai zel. Ka nu awmna ka zawh chuan, "Vawkchaw a pe anih kha, nichin atanga ka sawi tawh kha a ti lawk lo va, sawi hian a ti mai thin lo. Hna hi a zai lo tak tak ania" a ti leh a. Ka nu hi chebuai chi leh che rang lutuk lo a ni a. Ka pi erawh a that lai atanga engmah tih tur khek thiam lo leh nu taima em em mai a ni a. A tar chak lo chho a, engmah a tih vak theih tawh loh hnu hian a hmanhmawh zualin thil tihtur a sawi hi tih vat loh chuan a sawi nawn a sawi nawn zel a, ka nu lah nu che buai chi tihtakah an inhnial reng maia. Ka pi hian mo ang pawha en loin fanu en in a en a. Ka naupanlai thian ni lo, Tun hnu a thian ka chharthar lehte zingah ka pi hi ka nu hringtu zawk emaw ti an awm nawk pawh hi a mak lem lo. An inngai em em a, an inhnial reng lawi bawk. 

Insuk zar ka senga, ka thlehfel laiin ka piin thingpui a duh avangin min ko a, Gas hi a khawih ngam loh avangin thingpui hi inmaitheih turin kan dahlum sak reng thina. In kan sak that hnu hian inchhungah meichhemna kan dah tawh lo va. Vawkchaw chhumna leh vawkchaw leh ar chaw vel dah that nan in dang kan inhnung maiah lian vak lo in kan nei a. Tah chuan sa pawh kan rep mai zela. A la that deuh lai kha chuan vawkchaw chhum inah mei lum ai ten a kal a kal thina, thingpui te pawh a lo chhuang a. Kumin chho erawh chu a peih ta lo. 

"Lum sa a awm tawh lo, dah nghal teh. In intichangkang vei lutuk hian meikhu a rimchhia te inti mai maia, meikhu ur loh inchhungte chu a rim a chhia asin. Kan hun lai zawng zawngin vut in bel kan nawt faia, nangni ve sitil wool te inti vel a, thir te hi kan ei kan ei tel tawh ang. Vai nun inzir hi a tha lo" a ti barh barha. 

"Vut a bel nawh a peihawm loh em maia. Fai pawh a fai lovang'ka ti zauh chu a tang nasa ta mai. " Chingal te hi bai siam nan a tui tehlul nen Soda intia, a tui pawh a tui tawp loh hi. Mizo thingpuife aia tui pawh a awm lo. Vai thingpuife hi a tuina reng reng pawh a awm lo. Intodelh loh vang mai mai, kha leh chenah aieng pawh kan dengchawp a, kan siam vek a. Vai aieng eng em em, rim pawh nei mang lo in duh te hi amak em mai. Thangthar nun ning Thasiama kha lo nung leh se chuan vawi 30 a thi nawn ang' a ti hlaih hlaih a. 

"Vai aieng lo pawh a eng alawm" Tiin ka chhaih zuia. Hetia han fiam vel hi nuam ka tih vangin ka tilui thina. A tang nasa ve thei ngang mai. 

Zan inkhawm banah Rinawma leh Ruatmawia an lo leng nghala. Ruatmawia hian nupui nei tawhin fa pahnih an nei tawha. A nupui hi kan thian zinga mi tho, Mawii a ni a. An chhungkua an induhloh tawn avangin buaina an tawk nasa em em a, an inruk tum pawh hi nuihzatthlak leh manganthlak tak niin thui tak sawi tur a awm. 

Football chungchang sawi pahin Tv ah inkhel, live ni lo kan en paha. Chelsea fans ruh tak ka nih laiin Rinawma Manchester fans a ni a. Ruatmawia Liverpool fans a ni thung. "Chelsea fans hi chu kum 2000 hnu lama inkhel tuipui ve tan chauh anni tlangpuia, ka ngaisang vak lo. An club rawn hausak thut vang mai maia hetia lo thachhuak hi annia" Ruatmawia'n a ti zuah zuaha. 

"Kum 2000 hma lamah te chuan kan rualpui zingah inkhel en nachang hria pawh kan awm mang loh kha a. World cup leh Euro bak kan hre lo. Nangpawn i hre lo" ka ti leh kha kha a. A hriat zia thu uar takin a sawi zui chiama. "World Cup te chu ram leh ram ania, a pui bik alawm. Rinawm, Zarzokimi Brazil tan lutuk kha thutthleng atangin a tlak kha i la hria em? Tukkhum sawh zawngin a tla a, a pawnfen kha a la inhlim vek zuia" Nui vak vak chungin a ti leh a. "I va han ninawm zeh zuah tak, a hunlai a awm ve alawm mawle" ka ti leh hlak hlaka. High school a kan headmaster-in Brazil an champion vanga nikhat school chawlh min pek te sawichhuakin naupanlai thil eng eng emaw kan sawi zui a. 

"Pu Ruata khan tinge Champion a tih ve mai loh le? Champeon a ti ve ziaha, High school zirtirtu ve lai si. Aaa, ani kha chu a tawngperthei bawk si. A class a a hma bera thut chuan lehkhabu leh keimahni kan huh phung zel chu nih kha" a tih leh chuan kan nui dar dar a. 

Thingpui lum tura min nawr fe hnuah ka lumsak ta hrama, "I u hi a leng tlang em ni? Naktuk a office ang tiraw? " Rinawma'n a ti a. "Office awm tak. Vawiin pawh kha keini chu kan chawl a, Bank ho chu an chawl ve lo asin. Tihtur i nei em ni? " ka ti ve a. A ATM card buaipui angai tih a sawi chuan Ruatmawia'n " Kan khuaah hian bank pakhat tal chu awm ve awm asin anih le. Khaw lian ve riangruang, Bank dawr tura khawdang pan ngai zel hi ka ning riau. Dah tur kan nei khat em zawka, a tihzia letlinga" a ti nung nunga. 

"Nia, tinge kan la neih miah loh le? "ka tih chuan ka nu-in " Oooo, engah nge kan neih ang? Duh an thlang alawm. Kan khaw ho at zia mai chu, Bank lo dah nge khawchhunga kawng siamthat in duh min bialtu khan a ti a. Kawngsiam that an thlang alawm. An kawng siam ve lah chu inchi chanvel lek ania. Naupang pawn an kheuh khawk thei ang. Tunah te chuan engmah a nih leh tawh loh hi" a lo ti a. Ka nui hak mai. Ka nu hi thil awm ang deuh si, mak deuh deuh hre chi a ni a. Ka u in mi zingah phei chuan tawng fimkhur turin a ti fo mai. 

Zan dang ang bawkin inkawmin nui bawk bawk mah ila ka rilruah thildang a awm tak tak thei lo. Reubena leh a hmeichhe kalpui kha ka ngaihtuah renga. An thlalak ka thawn vanga tlaiah pawh khan min lo phone a ni tih ka hria. A insawifiah leh nasa dawna ka hriat vanga be peih thlawt lo ka ni a. Kan khua leh an khua hi a inhnaih avangin minute tam kal a ni lo va, chutichunga tun thlenga a lo kal lo hi mak ka tih bakah thinrimnain ka khata, ka tlawmngai em em bawk. 

An haw hnuah ka mu nghala, Reubena reh ta hmak chu thinrim takin Rinawma hnenah ka sawia. Msg maia sawi duhtawk loin ka phone a, Tlaia min lo biak a tum laia ka biak duh loh thu leh ka nu a rawn biak thute ka hrilh ta veka,ka rilru na leh thinrim bawk si ka tap lek lek a ni ber. 

"Be hmasa la, a sawi Dan a zirin i then in i then lo mai dawn nia. Khatianga buai buai kha a tha lo" a ti a. " Biak hmasak ka tum lo. Dawt a lo sawi emaw a pha anga, ka lungawi leh mai ang tih ka hlau " ka tih chuan a nui a. " Lungawi lo la animai alawm mawle" a ti a. "Min nuih miah suh, nangpawn Ramkeli i then dawn khan har i tih ve tho kha, tun thlenga ngaihzawng pawh nei thei lo i nia" ka ti hlak hlaka, "ani kha sawi chhuak ve ziah suh u" a ti deuh hmuka. Ramkeli hi a hming tak chu Rampuii a ni a, Rinawma nen hian an inngaizawng rei ve viaua,an inngaihzawn laiin Ramkeli hian a lo kawp tih a hre chhuaka, a duh teh nangin a then ta a. A rilru natzia sawi em em lo mah se a hriatpuitu te chu a thian te kan ni. 

"Enteh, Lalrom, nau a pai maithei kha inti maw ka tia. A ti tla nge a pai leh lo? " ka ti thuta. "I mak…  Thil hi min zawt thut thut zel suh" a ti hlur mai. Ka nui vak vaka, ani pawh za lo tak chuan a nui ve ta tho. 

Ni tam a liam hmain ka tliah hnawp na tur thilin min deng ta thut mai. Min biak a rawn tuma ka biak duh loh hnuah khan vawikhatmah min rawn biak a tum tawh lo va. Keipawn ka be bik hek lo. Mumal taka inthenna awm lo mah se kan inthen angah ka ngai ve tawp a. Hun tam pawh a liam leh hmaa sawn a thlak thu ka hre zet chu ka tliak hnawp a ni ber. Inthen anga ka inngaih lai pawh khan ka rilru chhungril tak atangin ka lo la then phal lo hle a ni ang. Tha leh tur chuang awm lo thil a thleng zet chu mumal ka nei hleithei lo.

An venga ka thiannu pakhat, zirtirtu ka training pui thinin min rawn hrilh a," Amah Reu-an min rawn hmu a, a be ngam thlawt lo che a. Hrilh tur chein min tia, awiii.. Thiannu, ka khawngaih lutuk che " a rawn ti a. "Tak tak a ni em? " tih bak sawi tur leh zawhbelh tur pawh ka hre lo. Ka chawmawlh vek mai hian ka hria a, ka mumang a ni em tiin ka insik a, mumang a ni lo chiang em em si. 

Tap chungin Zotei ka biaa, Zotei leh ka Cousin u Lawma te kha an innei a. Aizawla ka pi te inbul lawkah an khawsa a. Thil engkim la inhrilh vek thin mah ila nu leh nula chu Inkawm tak tak a lo har a, awmna a inang lo lehzen nen kan inkawm lutuk thei tawh lo. Mahse, hun harsa leh thil lawmawm ka nuna lo thleng ka hrilh hmasak ber thin chu amah tho tho hi a la ni. 

"Reubena chu biak ka lo tum dawn em ni? " dam diai hian a rawn ti a. "Eng nge i sawi chuan ang? Ka rilru natzia hrilh te i tum ange? " ka ti hap. "Hrilh dawn nang, ka be duh mai mai mawle. Rem i tih loh chuan ka be lo mai ang" a ti tha leh maia. "Bia la eng nge i sawi ang? Engtin nge sawn i thlak theih tiin zawh i tum tihna mi? Angai miah lo ania" Sehchilh rap rap in ka ti a. 

Kan inbiak zawh hnuah ka tap ka tapa, reife hnuah ka inngaihtuah harh kawka. Reubena ka call nghala,a ring ral thaka. Ka call nawn lehnghal a, a pick-up dawn lo aniang ka tih hnuah a pick-up ta hram. 

"Hello" a rawn tih rual rualin, " Engtin nge i tih theih? "ka ti ve nghala. 

" Min ngaidam teh, sawi tur pawh ka hre mai lo" a rawn tih chuan ka tek chhawk a ni ber. 

"Mi tenawm pa" tih zawng sawiin phone ka off nghala. Block tumin ka tin ran rana, ka block loh pawhin kan inbiak nawn leh ka ring tawh lo va, block kher tul ka ti leh lo. 

Ka rilru na ka talbuai zui ngang mai. Rilru pek tawhna lama pe tlut chi tih takah Reubena nen pawh hian kan inneih ka ring ve hmiah thin a. Chesual lo mah ila pasal ngaihin ka lo ngai hman deuh tawh nen, kan lo inzui rei bawk si a tuar tak ka ni ringawt mai. Achang chuan insawifiah tura min rawn biak te ka ring thina, achang leh ngaihdam min dil te ka ring thul. Engmah sawi lo va a reh hmak mai chuan ka beidawn a tizuala, hman atangin min lo kawp reng tawh aniang tiin ka ngaihtuah chang lah a tam.Ka thianten min buaipui em em a, a bik takin kawppui la nei lo Rinawma leh Thangzeli'n min buaipui nasa a. Mahse, zirna avanga awmbo rei ve tak ka nih avangin Thangzeli hian Mawii pasal neih hnuah thian dang a lo kawm chho veleh a, kan tleirawl lai ang em  em kha chuan a zawng zawnga inkawm a har ta deuha. Chuvang takin ani aiin Rinawma nen kan inkawm nasa zawk mah. 

Ka chhungte tan pawh hriat loh theih a ni ta lo va. Ka nuin vawikhat min zawh bak chu tuman an sawichhuak lo va. Reubena lam hawi an sawi lo tawp a ni ber. An hriat tak law lawah chuan ka thawveng deuh huai zawk. Khawkhat kan lo ni lo pawh ka lawm ta viaua, khaw khat ni lo na na na chu inhmuh fuh a hlauhawm lem lo a. A zia viau. 

Nitin school kal ka thulh chuang lo va. Nunphung pangngaia nun hram hram tum mah ila harsa ka ti ve ngang maia, ka rilru a nat mai bakah ka zak tel bawk nen, midang bula awm hrehawm ka tiin ka tawt up up zela, eng emaw chang chuan Reubena nena kan chanchin sawi vak chak chang te ka nei a. A ngaithla peih apiang share chiam duh chang te ka nei thul. Mahse,ka tana harsa hi midang tan engmah a ni lo thei a, ninawm mai mai pawh a ni thei tiin sawi lohah ka tlak leh mai thina. Rinawma bulah erawh chuan tah hlawp hlawp chang ka ngah ngang mai thung. 

Kan school hi ka lo kal ve tawhna kha a ni a, kan kal ve hunlai nen khan a danglam nasa tawh em em a. School building pawh an sa tha vek tawh. Min zirtir thintu te zinga hmeichhe pakhat chauh thawk a awm tawha, pension a an chhuah tawh bakah a chhuak lo pawh hmun dangah te an lo sawn tawh bawk. Ka hna nuam tih ber mai a ni bawka ka tlin khan ka lawm ngang maia. Ka pain Doctor zir tura min duh em em laiin ka pu boral na khan min ti hnuala, entrance exam ka paltlang zo lo va, Private a zir lam kha ngaihven nachang kan hriat loh bakah keiman ka tuipui lo ve hrim hrim bawk nen coaching class kal tura min tih pawhin ka ngaihven zui lo va. College kalin tihian ka duh ber hna ka chelh chho ta a. Keimahni khuaah ngei ka awm thei lehzel te hi vannei tak ka ni. 

School banah inchhung thil mamawh ka nu min chah la turin ka kal kawia. Ka lut deuh chiah tihin Rinawma school bang a rawn lut ve a. Ani hi an chhungkaw harsatna avang khan college a kalzawm thei lo va. Vanneihthlak deuh maiin kan khuaa kohhran school ah zirtirtu atan an la ve hlauh maia. Thawk pahin IGNOU ah a zir zawm theih avangin BA a zo thei a, Tunah hian zirtirtu senior pawl ni ve der tawhin hna dang hi ngaihven ve reng mah se a la tling lo tluang zel rih a. Thingtlangah chuan khawpui lam aiin khawsak te a lo awlsam zawk in mamawh a lo tlem bawka, ani pawh a hlawh tam chiam lo mah se a nau in hna a thawk ve thei tawh bawka, hman anga harsa berh lutuk kha anni tawh bik lo. 

"Thingpui in lawk ila, kan haw dawn nia. Min lo nghak law law rawh" ka ti a. Ka pain "in ril a tam lawm ni? Pa Tawna dawrah Paratha va la u la" Min lo ti ve a. Pa Tawna hi ka thiannu nutei pasal niin kan naupanlai atangin thingpui dawr an siam tawha, kan khaw Thingpui dawrah chuan a upa ber tawh. Kan naupanlai chuan Tea stall kan ti deuh kher thina. Tunlaia restaurant kan tih nen hian a inang tho awm e.. 

Kan dawr nen inhlat lo te a ni a, paratha ka va lam chuan a tlai lam deuh tawh nangin an lo la nei a. "Zari, I tar mai dawn, pasal nei tawh rawh, I thiante pawn fa an nei lian tawh lutuk" min lo ti fiam hlut a. "Neih tur ka hmu zo lo anih hi, min zawnpui ta che" ka ti let ve maia. "Khaia, zawnpui i ngai emawni le? Kan khaw bul lawkah inchhawng sang pui pui i rochun dawn tih ka hre ve vek ania" Nui huah huah chungin a ti leh a, ka nui ve tak nangin ka awm a ti nuam lo nghulh thei. 

"Naktuk chu chawlh a ni tho bawka, KTP hnatlan naah rawn thawk ve la"  Rinawma'n min ti a. 

"Ka hre lo le, ka u pawh a thawk duh zawk maithei a. Ka u a thawh duh chuan kei aiin inchhawr tangkai zawk ang" nui chungin ka ti a. "Nia, mipa chu an tangkai zawk ang. Kan hna tur a rum em mai" a tih chuan eng nge an thawh ber dawn ka zawt a. " Vengsang a JE thar, rui chhe thei deuh kha i hria em? Khapa leilet tur kha kan lai dawn a" a ti a. "JCB in a lai thei mai lo mi? Mihring tha ai chuan a thawk chak zawk awm hle sia" ka ti a. "A leilet turah motor a lut thei hleinem,lut thei pawh nise chutin JCB koh mai tur a awm nang, thingtlangah kan awm hi hre ta che..Nakumah bial KTP conference kan thlen dawn avang hian sum thawhchhuah hnem kan ngaia, inhlawhna tur lo awm hi a lawmawm zawk" a ti leh mawlh mawlha. Keini unau hi chu zirna avangin kan awmbo rei a, ka u hi chu nikum lama kan khuaa awm tawh a ni bawka Kohhran leh khawtlangah a inhmanga, kei ve hi chu thla tam la awm lo ka ni a, inkhawm ka thulh lem lo tih bak chu thalaiah pawh ka la active over lo. 

"Ka thawk thei angem pawh ka hre lo. School chawlh hi chuan inah tihtur a tam ve thei lutuka, ka thawh dawn leh ka lo hrilh leh ang che" ka ti a. "Um, eisiam turin i tangkai ang" a ti ve a. 

Zanriah kan ei laiin ka u hnenah a hnatlan dawn leh dawn loh ka zawta. "Naktuk chu ka hman loh hmel riau, kan thawhpui zing ami pa a boral a, naktuk hian an vui dawna, kal ve an rawt a. Nangmah lo hnatlang mai la, I hman loh ve tho leh ni khat hlawhfa rate ve ve pe mai ila" a ti duaha.

"In hna kal loh ni tur tiin vawkin sak that ka lo rilruk a. Kawmchhakpa ka be fel asin" Ka nuin a lo ti thuai. 

"I sak tir thei tho ang chu. Mami hnatlang ve rawh se, in awmbo chhungin in thianten helai kohhran thalai an theihtawp chhuahin an lo khaidinga, in awm ve ta bawka. In tel tam a tha, Mami phei chu a tawmim lutuka, hetiang tur a ni ngai lo" Ka pain a ti ve charh charha. 

Zanah Rinawma hnenah ka hnatlang ve dawn tih msg-in ka hrilh a, Thangzeli erawh chu hritlang khawsik a kai avangin a hnatlang thei dawn lo va. "kan kal rual dawn nia. Peng thleng two wheeler a lut thei a. Ka bike ka keng dawn alawm' A rawn ti a. Thil dang sawiin kan inbe zui luama, Reubena nen kan inthen hnuah zan mut ka harsat hle tih a hria a, ngaihzawng nei bik lo ta chuan min kawm hlim tumin a hun awl zawng zawng min biak nan a hmang a ni ber a. Thian hlutna a hre chiang em em ka ti lo thei lo. 

Zingah eirawngbawl pahin ka insu a, ka nu hian washing machine-ah thawmhnaw tha suk a phal loh avangin kut in a then ka su a. Nula naupanglo ka ni ve tawh chungin ka thiltih hi a duhthu a sam lo thin aniang, a sawisel peih thei ngang maia. Keilah lehkhazir tlut tlut bak engvakmah ti hman lo leh ngaihven lo chi ka nih thin avang kha aniang, a tlaw chi ka lo ni ve chhap nen, a buaithlak thei viau. 

"Chemte, kumdamah perek phawina a awm ang, rawn la teh" Bai ka chawh laiin ka nuin a rawn ti a. Perek phawina thirtiang kawm vawkin lama ka va pek chuan, "Dal tlakah khan anthur rep thlak ang che. Burah ka dah kha" a lo ti a. 

Insuk ka zar fel vek hnuah ka u a hmanhmawh avangin chawei ka siam nghala. Ka pi in "Dal chu a kha deuhin ka hria, ka ka a tui lo emawni le? 'a ti bal bala. Ka u nen hian tlak kan ngaina lo va, hawp enah pawh kan en ngai lo. 

" I thil ei a tui lo aniang. Artui ka kansak dawn che mi? " ka ti thuai. "Angai lo. A hmui teh vet zel hi ka ning. Bawnghnute min han pe zawk teh" a ti a. Bawnghnute la tura ka tho chiah tihah ka nu chawei turin a rawn thu ve a. Ka pi bawnghnute ka chhawpsak hnuah chaw ka ei zawm leh maia. Ka nu tawngtai zoin chaw bar hmaa dal a hawp chuan rang takin a chhakchhuak lehnghal vek. 

"A kha lutuk, engatinge a? " a ti nghal hlura, "I chhuang urh em ni? ' tih pahin a dahna bowl a chawia, a hnima. " A urh bawk si lo. Eng nge a awmzia? " min en chungin a ti a. 

"Ka hre bik nang, tinge a khak ngawt a? " thleng nena thawh pahin ka ti liam mai. "A kha ka tia, ka thil ei tui lo ka dik lo aniang ka lo tia" ka piin a lo ti ve a. 

"Khawi ami nge anthur rep i thlak a? Nang hi khatual zawk kha i thlak aniang ka ti. I nuai sawm vek mai bawk si" A ti leh hmuar hmuara. 

"Nge khatual ka thlak bik ngawt ang a?  Ka hre hrang ve reng" ka ti hlar mai. 

"Awih loh loh tur anih chu, khatual i thlak chiang khawp ang. Paih vek la, a dang kha lo  phit rawh, I pain tlak tel lo in chaw a ei thei reng reng hleinem" A ti leh hlawk hlawka. Ka nuih a za bawk si, ka inthiam chiah lo bawk nen rang takin ka phit ta sawk sawka. Ka nu a phun zui a, "I hman tlak lo thin em mai, hei hi ania in naupanlai atanga inchhung chet inti lo pawina chu" a tih chuan ka piin " Chung vang a ni nang, tihsual chang a awm ve animai, nangpawn vawksaah chini thlum duak khawpin i thlak ve tho kha. Naupanlai tih vel mai mai, I sawi let thui em mai" a lo ti a, kan naupanlaia ka pi leh pu thil min tihtir duh loh vanga fel lo ka nihzia uar takin ka nuin a sawi a, ka piin a ni lo tiin a tang ve bawka. A tisual tu ber chu ka leh awl ta lel maia, hman atanga vawiin thlengin ka pi mitah hi chuan thil tisual thei lo tunu rangkachak ka la ni ta renga, keimah vanga ka nu nena an inhauh pawh a la bang chuang hek lo. 

Hnatlang turin inchhung thil ka tihfel vek hnuah hmanhmawh takin ka chhuaka,inngahkhawmna tur hmun ka thlen chuan an lo kal zo duak tawh. Rinawma leh mipa dang 3 bak an lo awm tawh lo. 

"U Zari chu i lo hnatlang ve dawn ni maw? I va ti tha ve" pakhatin min lo ti a,"Hmanni a ni bawka, ka rawn chhuak ve anih hi. Ka tangkai viau dawn lo ania" tiin ka intlawhkhalh sa a. An nuih a za ngang mai. 

Rinawma'n min phura, kan naupanlaia thlawhna hlaua kan tahna hmun kan tlan tlang lai chuan ka mitthlaah Zotei nen kan awmdan kha a lo lang iar iar a, khang hunlai kha chuan Japan hlo hmun kha a ni thina, tunah chuan ram neitu ten Khanghu huan atan an lo siam vek tawha, ka kal lohna a rei deuh tawh bawka, kawng pawh an lo lai zau deuh ta tih ka hre ve chiah. 

Two wheeler tlan theihna chin thleng kan tlana, kawng a khuar nasa bawk nen ka hlau ru viau. Rinawma a inrahkhalh pha chiang em a, kan tlu lo nimaiin ka hria. "Ta tang hian kein kan kal angai a, hla lutuk chu a ni lo" Bike pahnih lo awmna bul kan thlen chuan a ti a. Minute 20 vel chhuk zawng hlira kan kal thlak hnuah kan thleng thla hlawl mai. Ka hnatlan ve an ring lo bawk aniang, mak an lo ti hlawm a. Hruaitu ten min lo be sawk sawka, OB tam zawk hi kan naupanlaia kan rualpui te kha an ni a. Member hmeichhe zingah chuan ka rualpui an awm meuh tawh lo. Khawpui lamah nula la upa vak lo awma ka awm laiin kan khuaah chuan ka lang senior lerh lawrh khawp mai. 

Hna kan tana, mipa hoin an laia, hmeichhe hoin buarain kan zawna, hmun dangah kan va dah zela. Kan va dah kha lo vaw bel pawl an awm bawka, kan hlimtlangin kei pawn nuam ka ti ta viau mai. Inah chuan awm ila thil ngai leh ngai ngaihtuahin ka ipik leh hle dawn tih ka chiang reng. 

"Zari leh Tesangi khan chawhmeh lo siam sela. Zoram, nang zuk tihpui rawh. Mei an chhem thei lo mai thei ania" kan Leader-in a ti lung lunga. Kan eisiam tur kengin hmun zawl leh daihlim lai kan pan thla a. Thui kan kal hmain min rawn ko leh a, "Zoram, Pu Lallawma thlamah khuan zuk ti law law zawk ru, thlam bulah tui hman mai tur a awm bawka, chawi vel kha a buaithlak mai mai. Zari, thlamah Khan Kohhran lei tihrualna a awm a. Lo dahchho leh lawk mai ta che" a ti zui a. 

Kan hnatlanna thlang deuh a awm Pu Lallawma leilet kan pan thla a, Zorama'n mei a chhem laiin Tesangi'n belin tui a lo va chawia. Keiin Lei tihrualna ka zawng ve bawk. 

"Zoram, lei tihrualna khawl chu ka hmu lo reng reng. Engtin nge a awm? " ka hmuh tak lohah chuan ka ti a. 

"Thlam hnuaiah khuan a awm aniang, kan hnatlan hmasak pawh khan kan hmang a. Hawn a buaithlak sia kan tia, kan hnutchhiah ngei chu anih kha. Zuk en chhin la, I hmu mai ang" min tih chuan thlam hnuai en tumin ka kala, Tesangi nen an nui rah rah maia, a chhan hre loin ka nui ve ngawt. Thlam hnuaiah ka kun lut kat kata, thingzai tlem leh bawngtuthlawh leh suahdur a lo awm a. Abak engmah a awm lo. 

"Ka hmu lo reng reng. Engtin nge a awm le? Ara lianpui ang hian emni a awm? Dozar ang zawk in nge? " ka han ti a, "Ka sawifiah thiam lo,awm se chuan i hre nghal ang. Pu Lallawma hian a lo pu haw daih nge ni dawn ni? U Zama kha han hrilh mai rawh. An lo nghah palh tak chein" a ti a. Phone mai ka tum a, signal a lo awm lo va. An hnathawhnaah ka han chho a. Ka hmu lo tih ka han sawi chuan an lo nui thu hlawm maia. "I at viau reng mai le, an bum che anih kha. Kohhran lei tihrualna a awm ngai emawni le? " Rinawma'n min lo ti hluk hluka. "A awm ngai leh ngai loh pawh ka hre hleinem, hria ila ka zawng nang" Nui chungin ka ti ve ta ngawta. Midang lah an nui tlawrh tlawrh mai bawk. "Kum 10 vel a liam hnuah pawh bum ila nuam reng anih hi. Pawl sawm kan nih laia kan zirtirtuin YMA sarepna lian a zawntir vak che kha ka hre chhuak rum rum mai" Zama'n nui thu chungin a ti a.

Chaw kan fak zawhah thawk lehnghal loin kan thu chawl hlawma. Rinawma nen kan titi a, nidang ang bawkin Reubena chung chang bawk kan sawi kai leh a, ka rinhlelh tirhte atanga sawi tanin inneih mai ka inrin tawh laia hetiang a thleng ka hriatthiam loh zia ka sawi a, Ka sawi ngun tawh em avangin Rinawma tan thil thar a ni tawh lo va, mahse la hre ngai lo ang maiin uluk takin a ngaithla a, ka mittui a parawl leh ta teuh mai.

"Senior thak khawpin ka zui ve a. A fair lo em alawm" ka tih chuan a nui huka. "Nui lo mai teh, a nuihzahtthlak loh" ka ti hlar. Ka kutah a rawn vuana, "Zarzokim, I chak thin em kha. Kan thianho hmeichhe zinga chhel ber leh mipa rilru ang maia zau neitu i ni thin tih hre reng la. Tunah hian i la na anih pawhin i tha leh dawn. Reubena pawh ngeiawm viau mah se ila ngaihtuah loh hun ala thleng mai ang" Tiin min fuih a. "Kum 7 chhung chu a rei ve em a, dam leh nan kum tam ka mamawh mai thei a ni. Kan naupanlai kha la ni se, Lalroenga'n a hnek mai thei a ni. Nang leh Rinpuia chu intlanchhia ang" ka tih chuan min ner khum a. 

"Englaiin nge ka tlanchhiatsan tawh che han sawi teh. Hman atanga vawiin thlengin kan thianho zingah pawh min hrethiam bertu leh ka dinhmun hrehawm lutuk lai pawha min fuihtu i nia, ka theih chinah hi chuan i hmaah ka ding zel ang" inringtawk takin a ti a. 

"Ka fuih ngai che pawh ka hre lo e a" ka ti ban chat. "Tawngkam te chuan min fuih si nang, chutiang tur pawhin i thiam hleinem. Ngawi rengin min thlawp a, chu chu nimai. Ka sawi duah thiam lo" a ti leh a. "Thangzeli i hope deuh lai kha chuan min ngei em kha a" nui hak hak chungin ka ti a. "Tu nge ngei lo ang che? Lehkhathawn ka kentir ve em em che a. I lo chhiar ru vek, I la tibo zui a. I ngeiawm ve alawm" a ti nung nunga. Ka nuih a za em em mai. Rinawma bulah hi chuan mood ngai reng pawh ka nei thei meuh thin lo. Minute tam pawh liam hmain mittui parawl teuhin ka awm a, tunah chuan ka nuihna lamah ka mittui a tla ve ta thung.

"I nupui neih hun tur ka huphurh ngawt mai, Thangzeli lah hian thian dang a lo kawm ngeih tawh a, awmbo rei chuan titi a rual mawh ropui si. Awm lo la chuan ka buai ngawt ang' Thutak zawkin ka ti a. 

"Ka nei mai lo vang. Tlangval senior chu min hlau nge min ten ni, tleirawl ho hi han bia ila min hlau deuh te hian ka hria. Nula ho lah hi ngaihzawn en in ka en hlawm bawk si lo. Anni pawhin min en kher lo vang. Nangte hi chuan tunah i ngaihtuah hah mai mai anih kha, nakin lawkah tlangval hausa pui puiin an rawn rim khup khup mai ang che. Supply office a an pu thar pawh khi Tlangval senior ania. Kar hmasa a volleyball court a ilo kal khan min zawt chik teh mai ania. I rilru a na rih em a, ka sawi duh lo mai mai alawm. I phone number te min dil a, ka la pe lo" a ti ta duah mai. 

"Pe reng reng suh, Tuna ka awmdanah hian ka biak peih loh dan tur chu i hre vek" ka ti nghal hmaka. 

"Awww, pe ila a tha ang chu. Rilru tihthawven nan i bia anga, Zotei rilru nat laia duh duh a bia ang deuh khan i biak peih loh hunah i bihruk san ve anga" a ti a. "Awi, kha thil kha..a va han thing tak,mahse keichu rilru nat laia inhnem nana midang biak vel ka peih lo. An lo thutak phei chuan an lainatawm mai mai, inleng neih phei hi chu tun thlengin ka la peih lo, duh dan dana awm theih loh tur inleng neih chu a ninawm" ka ti duaha. "Englaiin nge maw inleng neih i peih reng reng ni? I Aizawl awm lo haw, tlangval lo rim tum che eng nge inlo tih dawn? i tih ang mai khan ilo ti leh anga" nui chung bawkin a ti leha.

"Aaaa,sawi teuh lo teh. Inleng neih leh ngaihzawng neih ka peih lo animai. Ka rilru hrechiang bertu i nih kha" ka ti hlara, "Nia,nia..hre tak ka ni. Zarzokimi hian a peih lo anih chuan a peih lo tihna animai" Nui huk huk chungin a ti ve ta a. Kan inhrechiang em a ni. 

Thim dawnah in kan thlenga, ka thleng fel chauh tihin ka pi bathroomah a tlu a, inbual pawh ka inbual hmain Damdawiin lamah kan tlan leh ta rum rum. A khelruh a sawhpelh aniang tiin an lo admit a, ka la inbual bawk si lo. Ka u nen kan haw leh a, riak turin keimah ka phei leh anga, ka nu a haw thung ang. 

Na a tih avangin kan mu mang lo va, khaw var hnuah test theih ang ang kan test a, khawpui anga private a test zung zung theih a ni lo lai hi a buaithlak bera. Kan test theih ang ang kan test hnuah a khel ruh a sawh khi tih kan hre ta a. Aizawl lama kal a tha angem tih ka zawh chuan mut tam a mamawh thu leh chu chu a dam hma theih Dan tur a ni a, Aizawl lama kalpui kher angai lo vang tiin min hrilh a. Kan thaw deuh huai mai. 

Damdawi lei tura ka chhuak chuan Damdawiin kan awm tirh phat atanga ka hlauh em em ka tawng ta. Pen kawina hun awm bawk si lo, ka lungphu a rang a, ka thlan a sa phat phat mai bawka. Min rawn hmuh ve hman si avangin pen bo lah chu tlawmah ka la ngang mai bawk. 

"Zari, I pi chu enge a an a? " kan inhnaih chilh takah chuan a ti a. Engtin nge a hriat tih zawhna ka rilruah a awm zauh nangin a bialnu thar kha Doctor a ni tih ka hrechhual lehnghal a. Kan awm hnuah ka hmuh awm ka la hre lo thung. 

"A zia zel e" tiin tha takin ka chhanga, "A lawmawm, nangmah i dam tha maw? " a tih leh chuan "Aw, tha alawm. Nangni zawk? " ka ti veleh mai. Amah chauh zawt loin midang zawh tel nan nangni zawk tiin ka zawta, a duh leh a chhungte ka zawtah ngai se, duh leh a bialnu leh a fa piangtur ka zawt telah ngai mai tehse.

"Ka tha e" tiin min chhanga. "I pi chu rawn kan ve ka duh viau a.. " a tih lai mekin ka phone a rawn ri a, Rinawma a ni tih ka hmuh chuan thaw ru deuh huai chungin, "Hello.. Lalrom" ka ti nghala. Reubena buk khum nghat pahin ka kalsan a, min en zui em ka hre lo nangin ka hnung a za ar ar a, ka pen pawh ka lai hu mai. 

"Damdawiinah em ni i awm? " a rawn ti a, "Damdawi leiin ka chhuak lawka,I lo call ka lawm zia chu. Kan intawk laklawh lutuk a" ka ti nghal sa sa a. "Tu nen maw in intawh? Eee, Reu-a maw?" Hrechhuak niawm takin a rawn ti leh lawia. "Ni e, lo call lo la chu ka pi kan tura lo kal  tum mawle a. A zak lo lutuk" ka ti hmarh hmarha. 

"Lo kal suh ti la nimai alawm" a rawn ti awlsam et. "Ka kalsan daih tawh, I lo phone ka lawm zia chu, kalsanna remchang min siamsaka" ka ti leh mawlh mawlh.

Ni 4 kan awm hnuah kan chhuak thei ta a, ka pi erawh a la che hleithei lo va, mut dam tawp bak tih theih vak a awm lo a, amah lahin Damdawiin awm a ning bawk nen, kan chhuak tur pawh a lawm ngang mai. 

"Mama, I pa Thanghrima kha phone la, kan chhuak tih hrilh rawh. A lo kal nitin a, a lo kal thlawn ange" ka pa hnenah ka piin a ti a. Pu Thanghrima hi ka pu unaupa niin Damdawiin chhak lawkah an awm a. Ka pi Damdawiin awm atangin lo kal loh ni a nei lo va. Thei eng eng emaw a rawn kensak a, achang leh thingpui a rawn keng thin bawk. 

Lehkha pawimawh tihfel ngai ho tifel turin ka kala, Ka tum loh deuh maiin ka luhna tur roomah tak Reubena leh a bialnu an lo thu duna, let leh mai ka tum thut thut nangin lehkha hi ka tifel anih loh chuan kan chhuak thei dawn si lo. Hreh tak chungin ka pen lut a, Reubena bialnuin Reubena a be lai leh min rawn en dun chu ka hmu lo der hmiah. 

Lehkha kan chinfel chhung rei lo mah se chatuan tluk zeta rei nimaiin ka hriaa, ka tiril a khur a, ka thlan a sa phat phat reng maia. Hmuh loh pawh tum ila kan awmna room a zau lo em a, hmuh loh luih tlat theih anni lo. Anni pawhin nuam an ti bik lo nge ni ka awm chhungin an tawng mang lo. 

Mak deuh maiin Damdawiin kan chhuah atangin ka zangkhai ta viau tlat, Reubena leh a bialnu ka hmuh khan sawi ngaihna awm lo khawpin ka naa, mahse tlanchhiatsan mai lo va engkim ka paltlang khan min ti tuarchhelin hnehtu zawk ni angah ka inngai a ni chek ang. Na ti em em chung siin ka hahdam ta tlat. An mahni ka palzam thei tih ka hriat vang a nih rualin ka thiannu vang pawh a ni tel a. 

"Vawiinah Reubena nen in inhmu ni maw? Reu-an min rawn biaa. Hrehawm a tihzia a rawn sawi chiama. Chuan maw, amak lutuk. Sawn a thlak hnu hian Reubena hian zu a in nasa tawp a. An innei dawn tih thawm chu awm tho mah se an hlim lo lutuk asin. Amah hi chu a luhlul ve em a engmah a sawi vak ngai lo a. A hmeichhia zawk thiannu khan ka nau a lo hrilh leh Dan chuan Reubena hian fa vang chauhin min nei a, min hmangaih lo a lo tia. I rilru na em em mah se hei hi i hriat chuan i hahdam deuh ka ring" a rawn ti a. A ring dik chiang khawp mai. 

Ka naa, mahse ka hahdam. Reubena hrehawm tihna vang a hahdam ka ni lo, keimah min hmuh vanga amahah nghawng ka lo la nei kha hlim phah nan ka hmanga, atan engmah ni lo ka ni bik lo tih ka hriat khan ka induhtawkna chhe tawh kha ngai ka awh chho leh a, kha lehchen inngaizawng, inneih thlenga lo sawi dun tawh ni si a hmeichhe dang lo mutpui thei tu kha ka tan a tha lo va, chunglamin min chhanhim ni a ka ngaih tak vang a hahdam ta huai ka ni bawk. An inneih ni tur ka hriat niah pawh ngui deuh mah ila ka rin aiin ka tuar thei a, an inneih ni a lo thlen pawhin talbuai loin ka paltlang thei ta. 

"Naktuk chu Lui kal ila, midang pawh an hman ania" Rinawma'n a rawn ti dut duta. "Eng nge kan tih anga? " ka lo ti ve thunga. "Luiah chuan eng nge an tih thin a? Sangha kan man loh leh chengkawl kan khawrh ang" a rawn ti leh a. "Thangzeli a kal ve hman em ni?" Tiin ka zawt let a, "Hman e, Roenga leh Rinpuia pawh an kal dawn. Ruatmawia pawh hian hman a inring, a la chiang chiah lo nangin" a rawn ti leh mawlh mawlha. "A chakawm reng, mahse ka hman dawn em ka hre lo. Ka nu hi a vawk te an dam lo va, a buai ve lutuka. Ka pa dawrah awm angai bawk si" ka ti duaha,Ka pi hi awmpui chawt ngai anih tawh avangin ka nu hi Dawrah a kal ve ngai tawh lo va. Ka chawlh ni pawhin a ran te buaipui nan leh huan a kal zawk zawk nan hun a hmang a ni ber tawha. Kan fu huan zau tak thin kha kan tirem vek a, tunah chuan dragon fruit leh nimbu hmun atan kan hmanga, a hmun samfai turin ka ni pakhat zawk fanu te nupa kutah ka nuin a dah mai zela. Anni hian hlawhfa te pawh an hruai maia. Ka nu hian a ring tawp a ni ber. 

Ka nu hnena lui kal tura min sawm thu ka hrilh chuan ka rin ang ngeiin " In chawlh hi chuan i pi awmpui chawt la ka duh asin mawle,a thawh kan leh theih atangin inthiar pawh khumah a ti leh duh tawh lo va. A kal tha thei bawk si lo nen, ven reng angai a" A ti ta hlak hlak. 

"Min sawm ngawrh ve bawk sia, midang an hman vek bawk si, naktuk chu ka kal ve hram mai ang" ka ti ve thung. A phun hlak hlak nangin kal lo tur chuan min ti lem lo. 

Phur takin lui kal turin kan chhuak ta a. Sadawt peng thleng motor a luh theih avangin peng thleng kan inphur a, abak chu kein kal angaia. Thianho kim chiah lo mah ila kan hlim dar dar khawp mai. 

"Khawmhma a beh tha tawh anih saw. Kan la dawn mi? " Roenga'n sunhlu zawl kan thlen thlak chuan a ti a. Khawmhma awmna lam a kawk a, "awi, a tui dawn lutuk. La ang u" Ka ti vat. 

"Lo kal rawh, ka kuai anga, I lo thliak dawn nia" Min tih chuan phur tak hian ka zui pheia. Midang ho an lo thu chawla. 

"Tah khan lo awm rawh, ka lawn anga, ka rawn thut hniam zawk ang" a tih chuan awm tura min tih na ka pan vata. Khawmhma kung lian vak loah a lawn ve nghal bawka. Khawmhma kung hi a ram avangin a tliak hma em em a, fimkhur a ngai viau. Roenga pawh fimkhur turin ka au a. "Helai zar ami hi a beh tha ber, lo kuai rawh" a ti a. "A zar a lian si lo a, fimkhur rawh" dak chho paha ka tih chuan, "A tliak awm lo em mai, a tliak awl lai tur ka hria… " a ti hman chiah chu a ri thawta, ramhuai a hmu emaw tihmai turin a mengphar awrha, kei lah tlanchhe hman tawh hek lo, khawmhma beh tha lutuk tak mai, bawr luk mai chuan min rawn khuh hlupa, Roenga rawn tla thla ve zui bawk nen, mau hmun lo ni bawk si chu kan ri ta rum rum mai…