Zarzokimi-10(Last)

 Chapter -10

Ngawirengin Rinawma a chhuaka, C-i a be dawn te pawh a ni ta ve ang.Bawihtea khuma ka awmtir hnuah ka thil la tih zawh loh ka tifel sawk sawka. Ka mu ta daih. Bawihtea a u te ho nen an infiam nasa bawka rei meng loin a muhil thuaia, a muthilh veleh Zotei msg ka thawna, chhangchhenu tih takah msg a en lawk lo va. Reife hnuah min rawn reply a.. Ka thil hmuh leh Rinawma nena kan inhnialna ka hrilh ta vek. 

"A van mak dawn ve mawle. A unaunu em chu a ngaihzawn duh ka ring si lo va. Nangpawn ho mai maiah i rinhlelh ka ring bawk si lo" a rawn ti a. 

"Ka dik lo aniang tiin vawi tamtak ka ngaihtuah tawh alawm. Mahse keimah ni loin an mahni zawk hi an dik lo. Kha lehchen hmeichhe thian tamtak a kawma, ka thik ngai lo" ka ti ve bawk. "Ka hre thiam che. A harsat viau ka ring nangin chiang taka i man theih hun nghak zawk teh. Awm a lo awm chuan a lanchhuah hun a awm dawn" a rawn ti leha. Ka ngaihdan chiah a ni. C-i msg ka hmu chung pawha keimah zawk dik lo anga min la puh tlat danah khan fiahna chiang kek kawk ka mamawh tih ka hre thiam. Fiahna chiang tak ka nei anih loh chuan eng ang pawn an inngaizawng tih hre chiang ila a awmdan atang khan a insawifihlim zel anga, keimah zawk dik loah min puh let zel dawn tih pawh ka rinhriat thei tlat. 

Tukthuan ei loin kan chhuaka, ka nu Hriati te in lamah kan dah phei paha, ka nu awm lai chuan engmah boruak tha lo awm ang pawn kan awm lo. Mahse ka nu awm loh veleh atangin Bawihtea ka bia tih lohah chuan min biakna ka chhan bak ka tawng ta reng reng lo. Bawihtea a muhil a, earphone vuahin keipawh ka maimitchhing ve hmiaha. Kan chaweina tur kan thlenin ka harh leh ta chauh. 

Chaweinaah erawh inbiak loh reng theih ni hek lo le, a tulnaah chuan ka be ve zauh zauha. Hetiang taka ka lungawi loh hi a la hre ngai bik kher lo vang. Mahse a awm danah chuan min tih lungawi tumna reng reng a nei lo. 

Dar 3 velah in kan thlenga, Matetei leh a nauin Bawihtea an la hrang nghala, an rikpui chel chul maia. Ka unaute ho ka'n hmuh takah chuan keipawh tlem chuan ka ipik lutuk na a zia ve ta a. Ka ni te chhungkuain Rinawma pawh tha takin an lo welcome a, ani lah a mize phakar a chhuah ka ti maia, a fel leh ber tawh. 

Zan khat a riaka, kan thlen tuk chawhnu lamah a let lehnghala. Min awmpui rih tura ngen ka tum lo bur. A chhuah hnuah vawi khat mah ka phone lo va, amah zawkin in a thlenin msg-in a thlen tawh thu a rawn sawi a. "Ok" tih bakin ka chhang chuang lo. 

Kan nula a rawn haw ve nghala. Keipawn school ka tan ve nghal bawk. School tan hun pangngai a ka zawm loh avangin ka inthlahrung angreng viaua, mahse ka thawhpuite an felin min hre thiam em em a. Ka inthlahrung viau pawh hi thil tul a ni vak lo. 

Nitin kan nunphung pangngaiin hun kan hmang chho zela. Rinawma'n Bawihtea a rawn be ngun em em maia, kei erawh chuan a theih ang angin pumpelh ka tum ngar ngar. Ka rilru hliam a dam thei lo va, ka awm loh takah phei chuan an inbiak nasat tur zia te ngaihtuah vak vakin mut pawh ka muhil tha thei lo va. Chaw lah ka ei hleithei hek lo. Zotei ka biak tam phah a, min ngaihtuah em em bawk. 

"Thiani, I hman em? Ka be lawk duh che a" Thangzeli'n a rawn ti a. "Class ka la meka, ka hman ve leh ka rawn bia ang che" ka ti ve thuai. 

Class ka lak zawh veleh ka phone let nghala. Rei pawh a in ring hma in min rawn chhang nghal vat. "Eng nge ni ta? A pawimawh hmel bawk sia ka lo call back nghal che anih hi" ka ti nghal mawlh mawlha. 

"Um, nia.. Pawimawh ve tho mai. Phone a sawi lo va hmaichhana sawi theih ka chak viau nangin i lo haw hun tur a la hla dawn bawk sia" a rawn ti ve duaha."Nia, exam chawlh lamah daih aniang. Pasal neih i tum tihna mi? "Nui chunga ka tih chuan a nui ve a. " Pasal hi zuar se chuan ka lei duh ang. An zuar lo lai hi ania buaithlak.. Tak takin vawiin chu in pa nen kan inhmu a. Tunlai chu phone hi a hmang nasa viau hian ka hriaa. Fiamthuin nang hi ngaihzawng i nei em ni? Ka tia. Ka tum loh deuh in min chhang a. I thiannu hian thil tul lo pui pui angaihtuaha, min ti mualpho dawn anih hi. Tu nge mahni farnu te ngaizawng duh ang a ti ta chiam a. Ka hawi bo nasa lutuk" a rawn tih takah chuan ka thaw a tawp deuh chawt thei. Engmah Thangzeli ka la hrilh reng reng si lo. 

"Awi, mak ka ti lutuk ringawt. A sawi awmzia ka hre thiam lo ka tih lah khan a thin a rim lek lek maia. Eng nge in awmzia hi? " ka ngawi rei a tih vang nge amah bawkin a rawn ti leh a. "Ngatinge chutichuan a tih ngawt a? " ka ti ban chat. "Ooo, chutak reng chu alawm ka hriat loh. I thiannu va hau rawh, a rilru a dik lo lutuka, a phei atangin biak pawh min be tha duh lo va, a luhlul bawk si te a tia" a rawn ti leh zung zunga. 

"Kan mikhual nu kha i hria em? " ka ti leh ringawt. "C-i maw? " a rawn ti a. "Aw, a farnu chharchawp kha.. Kha nu nena an awmdan khan ka mit a tikhama, ka khaka" ka ti ta hlawl. A thaw deuh hak ka hre theia. 

"A va mak awm ve.. " Ban deuh tak hian a rawn ti a. "Nia, mak deuh asin. Keimah hi ka dik lo aniang te ka intia, mahse keimah lam a ni lo. Sawichhuah hi ka duh loh em avangin i bulah takngial pawh ka sawi lo va, amah leh amah a inti mualpho ta anih chu" ka ti ta hmiah hmiaha. 

"Dik chiah, khatia a ti ringawt kha mak ka tihzia chu a. Engmah ka hre lo te kha ka tider angah angai vela. Ek-a mai mai chu le, a chak lo khawp ang" a ti ta ngal ngal. 

"Hey, engmah sawipui suh. Angai lo ania. Engkimah keimah zawk dik loah min puh vek ang" ka ti nghal thuaia. 

"Awi, ka ning.. Kha nu kha ka ei lo teh mai ania aw. In ti unaupa nei lutukin a kuah chawt maia, rilru kawi chu ka pu ve lo nangin ka lo hmu hne teh mai ania" a rawn ti leh hlawk hlawk. Kan inbiak zawh hnuah school Gate bula Theihai kung upa tak hnuaiah ka ding ren rawna. Thangzeli nen kan inbiakna ka ngaihtuah leta, Rinawma'n amah leh amah a inpuan tak zarah ka rilru buaina min hriatpuitu an pung ta chu ania. Thangzeli khan a sawichhuak dawn lo tih lah ka chiang a. A hriat ve tak law lawah chuan ka thawveng deuh huai thei. 

Tlai khat chu u Davida office bangin min rawn tlawha, helama kan phei leh hnu a kan inhmuhna hmasaber a ni nghe nghe. Bawihtea birthday niin ho lam angreng deuh in lawm loh aiah kan lawmsak ang kan lo ti a. Ka ni te chhungkua nen chawei khawm tum kan ni bawka. U Davida chaw ei ve nghal turin ka sawma, "Parawl hi chu chawei a sawm kan awl teh ania. Min siam kep tak tak anih loh chuan min sawm miah suh" fiamthuin a ti a. "Ka sawm tak tak che alawm. I buai thin em a, I lo kal ve chhunah chuan ei ngei ngei ang che" ka ti ve a. Ka ni te nupain an lo sawm ve ngar ngar bawka. A tang deuh nain kan sawm rawn tak nak nakah chuan a haw ta lo. 

"A-nu, a pain a be duh che" bathroom a ka awm laiin Bawihtea'n a rawn ti a. "Ka laklawh lutuk, ka lo chhuah hunah ka be mai ang" ka ti let lang lang. Ka hmai ka phiha, ka ha ka nawh leh hnuah roomah ka va lut a. Phone min lo pe nghala. "I pa in min la nghak em ni? " ka tih chuan a bu vei nghata, "oooo, ka phone let mai tur" a hriattheih turin ka ti lui khera. Phone loudspeaker-ah ka dah pahin "Hello" ka ti nghala. 

"I inleng pa a haw tawh em? " a rawn ti nghal thawr. "Tu ka inleng maw? " angaihna hre vak lo hian ka ti a. "Hre lo der lo la a tha ang. Matetei status-ah ka hmu vek" a rawn tih takah chuan u Davida a sawina a ni tih ka hre thiam ta chiah. 

"Eee,u Davida ni maw i sawi? Bawihtea birthday lawmna a rawn nang fuh ve anih kha" Awlsam tak hian ka ti a. "A nang fuh satliah nge nangfuh angin a lang? "a rawn ti leh kher a. Ka thin a sa nghal zak. Han vin let tuar ka chak viau nangin ka bulah Bawihtea  a awm avangin ka insum a.. " A rawng nang fuh ve hrim hrim anih kha. Nang anga kawppui te ni lo nena inzawmna nei chi ka ni ve lo" awki ngai pat hian ka ti ta zawk. "Enge kha thil kha i sawi teivet le? Thangzeli i lo hrilh lehnghala. Duati ang mai, i rilru hrisel lo kha in enkawl rawh, mai mai che hian" a rawn ti ta hlur maia. 

"Rawn au vak kher suh, phone hi loudspeaker-ah lo chuan a dah theih loh ania. Bawihtea'n a ngaithla reng lehnghala" ka ti leh fak faka. "Dawtsawi lo mai teh,i phone a chhe lo chiang lutuk" awki nem zawk hian a rawn ti leh hram. "Thangzeli kha engmah ka hrilh lo aw. Nangmah leh nangmah i inti mualpho anih kha, I tihsual zeppui che tum vang ni hauh loin ka sawichhuak lo ania" ka ti leh hmak hmaka. "Engmah ka tisual lo tih hi vawi engzat nge ka sawi dawn le? I rilru a kalsual em mai. Davida khan a fuih khawlo che anih kha. I awmdan hi nangmah kha i ni tawh lo" a rawn ti leh ta a. 

"U Davida'n tel ve na a nei eih lo. Kuminah hian kan vawikhat inhmuhna chauh a la ni. Nangmah kha nangmah i la ni reng em? I thusawiah i la ding em tih lo inzawt la, Pathian hminga i dinna a la ngai reng tih i sawi thei anih phawt chuan rinhlelh loh che ka tum ang" ka ti ve ta sak sak. Kan inneih tirh phat atangin chhungkaw khawsak thuah pawh inthlau ve tak leh eizawnnaah pawh chungnung zawk ka ni ve a. Chuti chung chuan vawikhatmah hi ka pasal zah lo tak hian ka la tawngkhum ngai lo. Zanin erawh chu ka puakkeh ve ta a ni ber a, ka la tihngai loh danin thupe takin ka be ve ta hial chu anih hi. 

Bawihtea muthilh hnuah Thangzeli ka phone a. Engmah pawh ka sawi hmain amah zawkin " in pa nen kan lo inbe zo chiaha" a rawn ti nghala. "Eng nge a rawn sawi a? " ka ti thuai. 

"C-i chungchanga amah nen kan inbiakna kha ka hrilh che em tih min rawn zawta. Awi, I pasal hi ka hriat thin Lalroma kha a ni tawh lo reng reng" a rawn ti nghal mawlh mawlha. "Nia, zanin chu ka la tihngai loh danin ka lo tawngkhum ve a, lak pawh a la na ang. Vawiin hi Bawihtea birthday ania, lawm loh aiah cake ka tihsaka, thenawm naute ho nen an ei a. Zanriah chu ka ni te chhungkaw ho nen ei turin ka ruahmana, u Davida a lo lang hlawla, kan lo sawm ve nghal a. Matetei'n status-ah kan chawei lai vel thlalak a lo hmanga, u Davida a hmu kha a rawn thinrimpuia.. "ka ti ta duah. A tlak karha… 

" U Davida a thik chuan awm ka ti tho. Khati khawp khan a lo ngaizawng ve tawh che a. Khalaiah kha chuan i ngaihthiam deuh pawh a ngai maithei"a rawn ti ta daih. 

"A awm ang lo em maia, u Davida zawk nei duh ila a hma khan ka nei ang chu. Nangpawh hi a" ka ti hlak hlaka. "Ooo, keite chuan ka hre thiam che alawm mawle. In pa rilru tur zawk ania ka sawi. Thik tur a awm tih lam a ni lo" a rawn ti leh tan tan. "I tan em maia" ka ti ve thunga. "Zarzokim, I at viau reng le, ngahnge ka tan zawk loh ang che" Thutak deuh a a rawn tih chuan ka nui a. "Hmeli, min bawl kual vel elaw? " nui chungin a rawn ti ve bawk. 

Ka inngaihtuah vak vak avangin mut pawh ka muhil thei ta lo. Rinhlelh tur pakhat lek pawh a hmu lo chunga min han ringhlel duh te leh a thikthu chhiat zia lang nghal te, amah lam fihlim lo anga ka ngai chung leh msg dukdak lo tak ka hmu chung pawha a la pha hul tlat te hian minti thinrim et et maia, zanah chuan na a zual an tih ang deuhin a turin min tur ut ut a ni ta bera. Chiang taka ka man anih phei chuan ka la ngaihtuah thlen ngai reng reng loh inthen thlengin ka cho ta at maia. Fa te vanga rilru dam si lo va ngaihdam phei chu ka duh dawn lo tiin ka insehruh hle ringawt mai a ni. 

Hmun khata awm bawk si lo chu Rinawma nen kan inkar that lam pan loin a chhe tual tual emaw tihmai tur a ni a. U Davida chang lo, ka thawhpuite zinga mipa zawng zawng a ringhlel fai vek tawh. "Min rinhlelh avangin mipa dang biak that i nei ve nghal tih ka hai lo" rawn tih chang lah a nghah ta. 

Exam kan zo fel dawn hnai tawha, thla khat zet chawlh kan nei dawn bawka. Mahni khaw lama haw tur nisi ka chak lo em em maia. Min rawn hruai tura Rinawma lo kal tum pawh ka aw e vel mai mai. 

"Dawr lam tlangval pahnih an dam loh rual bakah ka nu hi a khua a sik a. Ka rawn hruai lo mai dawn che u mawni. Sumo a lo haw inhreh em? " kan haw hma ni hnih la awmah a rawn ti leh thuta. "Hreh nang" ka ti awlsam et. 

Sumo ticket ka va hauh fel nghal thuaia. Damdawi kan ei anga, kan rui lo chek ang. Sumo hi chu a sang deuh bawka Bawihtea nen pawh chuan nuam ka ti ve bera. Car chung hniam deuh maia chuan hi chu ruih ngei ngei a ni deuh tawp. 

Ri thuai ka hriat rualin ka mengchhuak nghala, chak lutuka ramhnuaiah kan lim thla tih ka hriat rualin manganna in ka khata, nghet takin Bawihtea ka kuaha,lehlamin kawngkhar biang ka kuah bawk, mangang au ri nuai nuai chu Motor a insawh bur rualin a tawp nghal a, khawvel a thim nghal mup bawk. 

Ka harhchhuah leh veleha ka sawi hmasak ber chu khawnge Bawihtea tih a ni a. Ka hmai bul lawka ka nu, keima nu zawk lo kun hniam chu angaihna hre lo takin ka melh reng. "Khawnge Bawihtea? " ka ti leh a. Ka tawng ring hleithei lo. "Ngaihtuah suh, engtin nge i awm? " a ti sawk sawka. Kan accident tih ka hriaa, tunah engtin nge ka nu ka bulah a lo awm nghal ngawt theih ni? Ka mumang zawk nge tih te ka ngaihtuah kual nghal a. Bawihtea hmuh mai tumin ka inbengkang dawna, ka ban ka lekkang hleithei lo. Ka nu in che rih lo tur in min lo ti leh a. "Doctor ka va ko ange" a ti leh sawk sawk. Hmmmm.. Hun reilote chauh a la liam emaw ka tih laiin Damdawiinah ka lo awm hman der anih hmel e. Bawihtea pawh chu khawiah nge maw an dah ve le? Ka pawm beh tlat avang khan hliam na lutuk a tuar em lo tur ah ka ngai ve hmiah. 

Harsa deuh tak hian ka thuchhuaka, ka awmna room awmdanah chuan Cabinah ka awm tih ka hre thiam nghal a. Eng Damdawiin nge anih erawh ka hre mai thei lo. Ka ke an cher khawng bur mai ka zuk hmuh chuan khawilai emaw ber ruh ka sawh tih ka hre thiam nghal thuaia. Ka chet zawngin ka taksa a na them thuma, accident shock hi chu a reia a na tual tual an tih ang deuh mai kha a ni dawn aniang e. 

Ka nu leh Doctor an rawn inzui luta, ka Pitei a lo lut ve leh bawk. Min en kual zung zunga. Damdawi ei tur ka nu a hrilh a, "I khawi lai nge na ber? " a ti a. "Ka hre rih lo, a na ber tura lang ka ke hi a na pawn ka hre lo va. Ka taksa hi chu a sil vek' Ka ti a. Nui vur vur chung hian, " I sawifiah thiam hle maia. Zirtirtu nge nge" a ti a. Za lo tak hian ka nui ve ringawt. Kan accident naah khan ka malpui ruh a lo tliaka, ka kawchhung lam erawh vanneihthlak takin engmah sawhchhiat ka nei lo va. Pem neuh neuh erawh chu ka ngah em em anih hmel. 

Doctor chhuah ve leh ka nu hnenah Bawihtea awmna bawk ka zawt leh a, hliam a tuar em tih leh nunna chan an awm em tihte ka zawt zuia. "Pali an borala" ka nuin a ti ban chata. Pitei khumah a rawn thu a.. 

"Chemte, engkim mai hi kan tana tha turin Pathianin a rel thina, nang chu tihian midangin nunna an chan laiin i damchhuaka, I vannei takzet ania" a ti charh charha, tawng lo in ka nu ka va en a. A mittui lo tla ka hmuh rualin ka lungphu a su dup maia. "Bawihtea a thi em ni? " tih leh tah ka ruala, ka nu a tap chhuak a. Pitei'n tap chungin min kuah ve bawka, ka taksa zawi thut bak chu hriat zui ka nei tawh lo. 

Nimin khan ka fapa neihchhun ka thlah liam lohin vui liam a ni a. Kha Motor accident rapthlak taka boral pali zingah khan sualna awmzia pawh la hre lo ka fapa a tel ve a. A nu zawk erawh ka la dam lawi si. Thih ve ka chak em em laiin mahni nunna la tur pawhin chakna ka nei chuang bawk lo va. Nu laktlak loh ber, fapa neihchhun pawh veng him zo lo ka nihna hian ka damchhungin min umzui tawh dawn a, rilru na reng renga ka indem kumkhua tawh tur hi dam reng chunga hremhmuna chen ang mai a ni ang. 

Karhnih hnuah Damdawiin atangin ka chhuaka, Rinawma'n nasa takin Damdawiin ka awm chhungin min buaipuia, amahah pawh ka innghat leh ta viau. Kan chhiattawh dan in khawchhung a fan hneh em em a. Mi khawngaih lah ka hlawh. Ka muhil thei lo va, mak takin ka tap thei hek lo. Zan laiah te min ko ri niawm tak hriain ka harh leh hlawl thin a. Achang leh a la thi lo ni a hriat chang ka nei bawk. Duh duha che thei niha, a thlana awm reng mai ka duh a. Ka thei der si lo. Tap vak vak lo mah ila keimah hi ka ipik a, ka chiang lo em em mai bawk. 

"Vawiin chu dawr ka han kal ve tawh ange. Ka tlawh lo rei tawh deuh em a, I lo awm thei angem?" min ti a. Tawng lo in ka bu ringawt. "I duh chuan i nu te inah ka dah phei che anga" ti leh mah se ka duh chuang lo. Thla a tling tep tawh nangin thenawm hnai inleng kan la nei renga, khualkhua atanga min rawn ral tawk pawh an la awm reng. A bik takin kan khuaah hi chuan chhiattawh hi a thlamuanthlak ngawih ngawih. 

Thenawmhnai nu pahnih an lo leng luta, ka la che tha thei vak lo chungin ka theih ang angin tiang nen ka tei vel a. Bawihtea toys ho, ama duhdan anga a rem te chu kan awm loh lai khan a pain a ngai ngaiin a lo la dah a. Khawihsawn phal loin ka khawih dan dana, tah theih ka chak em em chungin ka tap thei chuang reng reng si lo. A tawt hian ka tawt tlat a ni ber. 

Thangzeli a lo lang hlawla, "in pain dawrah a kalsan che sia, ka ngaihtuah lutuk che a. Ka inkhar sawk sawka, ka rawn haw thla nghal daih" a rawn ti bawrh bawrha. "I van fel tak, thlanah min va kalpui teh a" ka ti ti nghal thuaia. 

Muangchangin thlanmual lamah kan phei duna, ka rilru min tihzangkhai sak tumin a tawng phei bawrh bawrha, ka ngaihven teh vak lo. Thlanmual a thlan intlar zinga tawp berna, leivung la thar ber bulah kan dinga. "I thu duh em? Helai sirah hian thu la.. Ka lo pui ang che" a ti thuai thuaia. A thlan hunga brick an rem ah chuan ka thu a. Kross a a hming inziak chu ka rilruin ka chhiara. "Vanlalpeka.kum 3 leh thla 2" tih leh a pianni leh thihni a inziak tel kalh. 

Thawklehkhatah tahchhuahna kawchhung atanga rawn thawkin insum ngaihna awm lo khawpa na hian min rawn tur a. Aw rawl chhuah tak meuhin khur zawih zawihin ka tap ta.. Thangzeli'n min kuaha, min tahpui ve bawka. A thlana kross inphun vuan chungin awmchhung na em em in ka tap khur ta tlawk tlawk. 

Chau hnep khawpa ka tah hnuah thlan bul phul chungah van lam en in ka mu vang vang. Van a thiang kuka, chhum hmuh tur reng reng a awm lo. Ka sirah Thangzeli a mu ve a. Zawi te tein accident kan tawh dan ka hriat ang ang ka hrilh a. 

"A pa-in min rawn hruai tum ania. Dawrah a naute an dam loh rual bakah ka nu lo dam tha lo nen sumo a haw mai tur khan min rawn ti leh a. Apa khan min lo hruai ni se Bawihtea hi a thi lo tur ania" tah aw in ka ti a. 

"Engtikah nge a rawn thulh leh a? In haw hma niah em ni? " a ngawih vang vang hnuah a ti a. "Aih, a hma ni hnih velah niin ka hria" ka ti a. "Um, anih tak chu mawle… mahse maw, vanduai dawn hi chuan dan theih a ni lo alawm.Pathian remruat hi kan hre lo em a ni" a ti leh charh charha. 

"Thi ve zawk ila ka ti.. Bawihtea nen kan chuang dun renga, keimah zawk ka damchhuak hi a fair lo" ka ti leh chu min rawn kuaha. "Chutiangin ngai mah ta che. Theih nise Bawihtea thih ai kha i thi ang chu.. Inthiam lo reng reng suh, I thiam loh a awm lo" a ti mial mial. "Pathian hian kan tana tha turin a rel a" a ti leh chu ka ter at mai. 

"Eng nge  Bawihtea thi kha kan tana tha tur anih na? Kum 4 hnuah harsa takin ka nei a. A dang pawh neih leh beiseina ka neih tawh loh laiin min laksaka, engmah a thatna tur ka hre thiam lo" ka ti ta siah siah mai. 

"Ni lo, ka sawi tum dan i man thiam lo anih kha" Inthlahrung takin a ti a. "Aw, man thiam thlawt lo. Ka dinhmunah hian ding la tuna i sawi ang khan sawi ila i pawm angem? Aih, pawm lo vang.. Chuvangin midang zilh tur chuan an mahni ang kha nih angai" ka ti ta bawrh bawrh. "Aw, ni e.. Ni e, ka thiam loh anih kha.. Keipawn ka thei lo vang. Min ngaidam teh" a ti ta thuai thuai. 

School tan hunah pawh ka zawm ta mai lo. Kan chawlh nei hun pangngai kha lusun nat zual lai leh ka taksa nat vanglai a ni a. Thlakhat awmze nei lo leh awmze nei ber lawi si a ni. Ka thawhpuiten min hre thiam em em maia. School ka la kal ve lo pawh min sawisel loin ka inthlahrun hlauin min rawn be liam liam zawk. Tunah hian Aikal ka la meka, thla hnih vel zet chu ka chhawr tawh. Ka lusun rilru na leh ka taksa na vangin C-i lo zin sek pawh mil lohna hun ka nei lo va. An awmdan a danglam em tih vel mai maiin ka rilru a tibuai phak hek lo. Bawihtea ngaiin keimah leh keimah ka inbuaipui tawk em em. 

"Davida'n min rawn biaa, a thianpa khan duh chuan transfer dil ula ka lo buaipui ang a ti a ni awm e. Kan dil mai dawn em ni? " Rinawma'n a ti a. Inngaihtuah buai miah lo hian " Dil angai rih lo" ka ti rang vat mai. Ka chhungte awm ho zawng chuan mak ti hmelpu in min en thap. 

"Engati maw dil i duh loh? I taksa hriselna nen, helama i awm theih tluk a awm dawn em ni? " ka nuin a lo ti a. Ka pa pawhin a lo ti ve bawk. 

"Ka duh rih lo. Bawihtea nen kan pahniha kum khat dawn kan awm dunna ania. Awm rih ka duh" ka ti leh hmiah. "Aw le, I tihdan dan le.. Dawrah Zotea a awm chuan a ngaihtuahawm chuang lo va, thla khat vel chu keipawn ka awmpui thei ang che" Rinawma'n a ti a. Bawihtea boral atangin nasa takin ka lakah that a chhuaha, min ngaihven in min dah pawimawh thiam chho leh em em tawh. Mahse, keimahah hian khi a awm tlat tawha, C-i nen an awmdanin ka rilru luah lian ber tawh lo mah se ka theihnghilh thei lo va, min duatna leh ngaihsakna pawh hian engmah khi a awm hmaa amah ka hmangaihna leh a laka ka thlamuan thinna kha a chawktho zo tawh lo. 

"I la dam that loh tehlul nen, duh ang pawn kal pawh i la kal tha hleithei lo ania. Ai kal i la tho a, thla khat vel tal chu la kal tir la. I thawhpuite pawn an hrethiam em em ang che" ka nuin a ti hlak hlaka. 

"Angai tawh hleinem, ka ti thei chho tawh mai ang. Min ngaihtuah suh" ka tih veleh, "ngaihtuah loh theih i ni em ni? Mai mai che hian, saw leh chena mahni a awm tum tlat reng reng mai. Luhlulna tha lo tak a ni" a ti ta hmawk hmawk.

"Ka nu, aman a inhuam chuan a tha zawk alawm. Che thei lo, buaipui ngai reng pawh a ni tawh lo. A tlin lo ta anih leh aikal pawh lak leh a har chuang hleinem" Maremruati'n a lo ti ve a. Ka nu lungawi lo la phun hlawk hlawk mah se tuman kan ngaihven tawh lo. 

Ka hnathawhna khua kan han lut zet chu khaw tawntirh atangin tahchhuakin min hnawh nghala. Ka ni te in kan thlen a Matetei te unau leh ka niin min lo tah khum takah phei chuan ka tap chhuak ta hawk hawk mai. Pa Buanga meuh pawn a mittui a hru ve kuang kuang maia. Kan khaw lamah kha chuan thla 3 vel lai a vei ve tawh avangin mi hmuh laia han tah leh thinte kha ka inthlahrung a, helai ka thleng zet chu lu ka sun nawn hi a ni hrim mai. 

Kan in-ah zawk kan vaiin zanriah kan ei a. U Davida pawh kan phei tih hriain zanah a rawn leng nghala. A nupui ni mai tur lo sun tawh anih vang nge pawh ka hre lo, ka hmuh rualin ka natna min tawmpui niin ka inhre nghal chat. 

Thla khat tling lo hret Rinawma'n min awmpui hnuah min hawsana, a hmaa ka nula awmpui thin kha Bawihtea awm tawh lo mah se min awmpui turin ka va ngena, a duh chuan puanthui zirna ka tumsak ang ka ti bawka. Amah lah a lawma, a chhungte pawh an lawm. Kan pahniha kan han awm ta rak rak mai chu ka tum ang ngawt chuan ka tuar a chhel zo dawnin ka hre lo hman that that a, Rinawma pawh ngaih chang ka ngah. Kei ang thoin Bawihtea kha a fapa a ni a, a thihna kha a la na hle tih ka hai lo va. Mahse mipa zawk ngang a ni a, min hnemtu zawkah a tang thei zel thina. A haw hnuah pawh nitin min rawn biaa, video call nen ka that leh that loh enfiah duhin a rawn call thin a. Phone ka lo chhan mai loh phei chuan Matetei emaw kan nula zawk a rawn phone thuai thuai zel mai. 

Thla khat zen zawn hna ka kal ve leh ta reng. Pathian zarah harsatna em em ka tawk zui lo va. Inchhung chet velah erawh min puitu nula ka neih avangin engvakmah ka ti ngai lo. 

"C-i helamah an rawn sawn a, a in luah tur Hriati ten an en puia. Heta tanga kal theih tho mah ni se nitin Bus-a chuan phei a peih lo va" ka nuin a rawn ti a. 

"Engtikah nge an rawn sawn a? "ka ti thuai. " Tunkar tir khan Mama khan a sawia, amah tak phei chu a lo la kal lo. Thla leh atangin a rawn awm dawn aniang"a ti leh siam siam. Nitin kan inbe ziaha, engmah Rinawma'n a sawi lo chu mak ka ti deuh viau. 

"C-i kan khaw bulah an rawn transfer a ni maw? " Zana min rawn biakin ka ti a. "Aw, transfer e. Hriati te nupa khan an buaipuia, ka buai bawk nen ka ngaihven hman vak lo" awlsam angreng tak hian a rawn ti a. "Ka nu khan in luah tur an buaipui te kha a tia. Khatah khan awm mai se la buaina a awm em ni? Ka nu a pui thei bawk anga' Ka ti lui leh khera. Hun rei tak ka neih tawh loh nupa kar khi vanga ka natna kha a rawn thawk leh ta et et. 

"Nitin hna kal tura Bus a kal a peih lo aniang. A tumdan tak pawh ka lo la hre chiang lo, ka ni nen an inbiak bak chu ka buaipui ve vak lo ka tih kha" a rawn ti leh a. "Anih tak chu, a ngaih tehreng che nen kha" ka ti leh nghauha. "Nu-i, thil kal tawh kha chu kal liam tir teh" bung deuh hian a rawn ti ta hmuk maia. Keipawn amah ka hlauh vang ni loin sawi luih zel ka tum bik lo. 

U Davida nen kan inbe zeuh zeuh a, achang chuan Bawihtea chung chang ka lo sawipui leh chiam mai thina. Ani lah chuan ning awma awm loin ka sawi ang ang a ngaithla ve mai zel bawka. Ka tan chuan Bawihtea chanchin ka sawipui theih tluka ngainatawm an awm thei rih lo. 

Karkhat chhung district sport kan neih dawn avangin ka thawhpuiten ka duh chuan haw turin min ti a. Lawm takin Rinawma ka va hrilha, "A that chu, ka rawn hruai ang che" a rawn ti thuai. Motor chuan hrim hrim ka hlau em em tawha, Sumo phei chu a rapin ka rap a ni ber. 

"U Davida hi Pu Hmuaka nupui tlawh turin zan khat riak a lo kal a tum a, a rualin ka lo phei mai dawn mi? I buai ve sia, ka kal dawnah thlah leh ka ngai dawn bawk si" ka ti a. A buai vak loh thu a rawn sawi a, "Thenzawlah ka thianhlui pakhat hi a nu a boral a, zan khat lek riak turin min phut viau maia. Ka riak thla anga, a tukah ka rawn tlang phei mai zawk ang" a rawn ti leh a. Aman lo kal a inhuam phawt chuan ka tan chuan midang Motor a chuan ai chuan duhthusam tak a ni zawk. 

Zan khat Thenzawla a riah hnuah zingkarah a rawn phei a, a chauh viau ka rin nen chawhnu lamah kan chhuak lehnghala. A chhan pawh a tuk zanah KTP bial komiti pawimawh tak a awm vang a ni. 

Tluang takin in kan thlenga, ka nu leh C-in min lo nghaka, C-i'n " I lo haw dawn sia ka tia. Ka rawn riakpheia, naktuk bak tunkarah office kalna hun a awm tawh lo bawka" a lo ti sawk sawk. Chaw kan ei tawh avangin kan intifai sawk sawka, kan chau bawka kan mu nghal thuai mai. 

Chawlhni tlaiah Hriati ten chaw an rawn ei phei a. C-i pawh a la awm a, chaw kan ei tlai deuh avangin hmanhmawh takin Rinawma inkhawm turin a chhuaka, Hriati te dar 7 velah an haw a, an rualin C-i a phei ve dawn maw ka tih laiin "I nuam vak si lo va, zanin chu kan la riak ange" a ti thliam mai. 

Ka hritlang in khawsik min siam tel sak avangin Damdawi ka ei a, ka mu ta thuaia. Ka khawsik a reh chho tihah ka muhil zui ta a. Ka harh leh chuan Rinawma a lo la mu lo va, sana pawh en lem loin ka tho chhuaka, kan room kawngkhar ka hawn rualin Rinawma a ding mar zawk mai. 

"Eng nge in tih a? " ka ti chang nghal fak mai. "Eng ti lo e. Hei C-i hi a khua a sik ve a, a damdawi eiin a chhawk tawh em tih en ka lo tum mawle" Rinawma'n a ti nghal zung zunga. "Anih loh kha, khawih satliah loin a chalah i fawh kha" ka ti ta piap mai. Kawngkhar ka hawn zau hma khan eng nge thleng ka hmu hman tlat atin ni. 

"Nu-i, eng nge maw i sawi le? I tawngkam a mawi lo em mai. C-i pawh i ti hrilhhai anga sin" a la ti ngam nia.. "Mi tenawmpa, tawngkam mawi leh mawi lo ka ngaihven lo,in tenawm lutuk' Ka ti leh vak. " U Zar, min hmusual aniang, chutiang a ni lo" C-in a rawn ti ve chu ka pan hnai rawka, mahse Rinawma'n min lo danga. Ka duh lo chung roomah min nawr lut ta nawk nawk mai. 

Khum bulah min dinpuia. Ka dar tawn tawnah a vuana. "Nu-i, inngaihtuah fim teh, engtin nge ka farnu chalah ka fawhsak duh ang. A awm hian a ang lo em mai" a ti a. Min vawnna ka thinthlaksak lawpa, "ka ten che, ka ten lutuk che" ka ti khur hlawk hlawk. 

"A va mak e aw. Engatinge min rin duh loh a? I awmdan hi ka va han hne tawh em em ve" Ring angreng deuh mai hian a ti ve ta a. "Min ning amaw? Engtin nge ka awm a? Nang hi alawm ninawm leh tenawm. I pa ang chiah i lo ni" ka tih laiin ka hmaiah tak a rawn beng thuai mai. Ka pai dawrha. Dressing table tlang ka vuana. Ka theih anga rangin ka dingmar nghal auh. 

"Lalrinawm, min beng amaw? Ka then che, ka then nghal vang vang che" ka ti dam raih mai. "Aih, ni lo.. I dik lo zawk, ka pa anga min ngai khan min ti thinrim atin ni.. " Min rawn pan hnaih pahin a ti a. "Min rawn hnaih suh" ka ti thawt. A ding chuta. Rang takin khuma ka phone awm ka laa, Room atangin ka theih anga chakin ka chhuaka, ka nu leh C-i lo ding ngawi reng chu en pawh en duh loin ka kalpel a. Ka nuin min rawn um mah se ka ngaipawimawh lo. 

Zan lai laia kan in lama ka haw ta mai chu kan chhungkaw tan mangchhia a ni ta ngawt mai. Thil awmzia ka pain min zawta, "ka sawi thei rih lo. Ka lo haw a, ka let leh tawh dawn lo" Tih bak ka sawi lo. Ka nuin min zawt leh mah se ka u in a lo khap a. 

"Nu, I fanu hian kum hei leh chenah a pasal laka lungawi loin zan lai laiah in a rawn denga, a lungawi lohna hriat kha hmanhmawh suh. Chu ai chuan hahdam takin mu se la, khawvar hunah kan ngaihtuah dawn nia" a lo ti thuai mai. 

Chhin khat mah ka chhing lo va, mak takin ka thiante tumah be loin u Davida ka be teh tlat. Diktak chuan ka pasal thiante leh ka thiante hi midang ni loin kan thian intawm te vek kha anni a. Min tan tawk leh Rinawma tan tawk an awm dawn. Ka thusawi aiin Rinawma thusawi an ring ngei dawn bawka. Ka lusunna leh ka thikthuchhiat luat vanga duh duh sawi angin min chhuah ngei bawk anga. Mipa ho chu an intan leh vek dawn tih pawh ka hai lo. 

"I bula awm theih ka chak hle mai, I tuar hi a NASA mah mah chu a ni. Mahse i bula awm lo tur ber ka ni rih anga. A chhan chu i pasal khan chhuanlam a ngah belh mai mai dawn. A hma atang tawhin min khak fek fek a chinga, tawngkam mei nei pawh a hmang fo. Ka ngaihaw duh lo mai mai thin a.. Chutihrualin thil a thleng ta sa sa, ka la sawichhuah ngai loh chu Pu Hmuaka boral zan khan i pasal leh a farnu inti khan thil tih an nei a. Unau kara thleng tur ni lo, nupa kar chauha thleng tur thil a thleng lai ka mit ngeiin ka hmu a. A insiamthat leh mai beiseina leh nupa inthen hi tha ka tih loh em avangin ka hrilh ta lo che a. A hunlai khan lo hrilh che ila tha tur ania"  a rawn ti a… Hmeichhia, a pasal ring em em tu hi hmeichhe dangin ka pasal min tawmpui tih keiin ka rinhlelh laiin midang chuan an mit ngeiin an lo hmu reng a lo ni si a. Ka nu hlauhthawn thil kha a lo thleng ta a, nu malsawmna tel lo va pasal ka neih rah chu ka seng ta anih hi. 

Zing karah Rinawma'n palai atana a rawn tirh te bawk kha an rawn leng a. Ngaihdam dil na leh thiamthu sawina an rawn nei a ni ber. 

"Zari hi a lusunna hian a tibuai ve riaua. Rinawma pawh hian manganpui chang a nei fo a. C-i nena a ringhlel tlat mai te hi an chhungkua hi chuan an buaipui fe tawh a. Anni lah Unau inngai chi tak mai an lo ni si a. Nizana kut an thlak mai pawh kha Zari tawng nasa lutuk, ani tihngaihna hre si lo khan a beng palh ta niawm tak a ni" ka pa thianpa-in a tih ri chu ka pi room atangin insehruh ngar ngarin ka lo ngaithla a. 

"Eee, anih tak chu. Nizan a lo haw hun kha a tlai deuh a, engmah thil thlen dan pawh kan lo la inzawt lo va. Amah pawh hi mi zaidam lo tak mai a ni ve a. Thiam lohna pawh a ngah ang. Lu a sun leh bawk si nen, Chutihrual chuan englaimahin vuivaina a la rawn thlen ngai lo va. Kut a lo tuar tih phei chu insawi a kan hre chauh maia. Aaa, engpawhnise amah pawh ka lo be ve ange. Han awm lungawi phawt se la, inthen hlen chu tha ka ti bik lo ve " tiin ka pain a chhanga. 

Palai te an kal chauh chu ka nu a ang ta bawrh bawrh maia. Nidanga ka nu khap dai tu ber ka u te nupa pawhin khap a hnekin an anpui ve bawk. Ka pain "kutthlak hial ngai chu ani pawh a tawngtam aniang. Hmeichhe kut tuar hi chu an tawng nasat vang a ni chawk ania" a ti charh charha. Ka u ngaihdan a ni lo, "Nang pawhin ka nu kut i thlak ngai lo, hmeichhe kutthlak tawk leka nep ni suh min ti thin a ni lawm ni? I fanu hi ka hre chiang ania. A let leh tawh lovang. Palai te pawh kha lo leng tawh suh u i ti dawn emaw ka tia sin" a ti ngal ngal maia. Hetiang reng renga ka u thinrim hi ka la hmu ngai lo. 

Kar hnih a liam leh meuh chuan pasal then, nuthlawi ka ni ta.. Vawi tamtak min biak tum mah se ka be duh eih lo va. Hliam dam tawh ngai lo nei chunga nupa nih ai chuan nuthlawi nih ka thlang zawk. Kan khuaa mi hausa ber ber ni lo mah ila ani kohhran leh khawtlanga inhmang tak, Kan khuaa Hardware dawr changtlung tak nei tu a ni a, kei ka hna leh kan chhungkua vang a hriat hlawh ve ka lo ni a, kan inthen nain vengchhung mai ni lo, khawchhung khahin a khat a ni ber maia. Ka tana tha zawk anih beiseiin ka hnathawhna khuaah ka u in min dah phei a. Ka nuin min awmpui tum mah se ka duh lo. 

Ka han inthen fel chiah chu ka rin ang ngeiin thiamchan tumin theihtawp takmeuh a chhuah ta a, thikthu chhia leh chenpui harsa, awm leh awm lo pawh sawi lo va thik vek ang in min chhuah phawta, C-i ka thik vanga ama nu mangangin transfer dil tura min tih pawha transfer dil duh lo leh ka pasal nu, ke tha lo leh ri hriatna chiang lo hmusit a puh ka ni zuia. Pasal nu pawh hrawn peih loh vanga hmundanga awm ngar ngar duh nihna te ka nei belh zela. Hna nei zawk ka nih vanga pasal hnuaichhiah ching ka ni bawka. U Davida nen kan inngaihzawn vanga mahni khaw lam aia khaw dang, u Davida awm ve na hmuna awm duh zawk leh min tilui thei lo ang tein min sawi duh nia.. 

Min khawngaih tu tamtak zingah Rinawma thiamthu sawi lem duak duak tamtak an awm a. Chung hoin an sawi an sawi hnuah phei chuan u Davida nen cheng dun ang hialin min chhuah tawh. Mahse, engkim mai hi Pathianin a hria tihah ka innghata, ka thil tawrh mek hi ka fapa thihna ai khan na ka ti lo zawka. Ka tuarchhuak dawn tihah ka chiang em em bawk… 

Zan khat chu Thenzawl khuaa awm, ka cousin pakhat hian min rawn biaa. Thenzawl khua hi ka pa nu te lam chhungkaw tamna hmun a ni a. 

"Au Zar, enteh.. Ka thiannu pakhat in vawiinah a sawi a. Amah chu i chanchin ka share thin ania, thlalak min rawn thawna. U Rinawma thlalak ania, a sawi dan chuan in inthen hma lawk khan Tourist lodge ah nupa angin an thleng duna, zan khat an riaka. Mipa zawk kha Lunglei lamah a zin dawna, hmeichhia zawk kha chu kha chu Serchhipah a chho a atia..I thikthu chhiat vanga a farnu thik anga an sawina che kha la lo hrilh vek tawh sia. A rawn thinrim rapthlak.. Ka va han ten tak, vawikhat mai pawh ni lo, an lo zuk riak dun fo anih chu. Zu an in ve ve bawk a tia" a rawn ti a..

"In lo haw tur rawn hruai tum che u ang insawi, a hnathawkte dam lohna chhuanlama a lo kal leh loh tum khan nikhat chu nilengin dawr an khara, mahse a hnu a ka hriat leh danin C-i dam lo tlawhin Aizawlah langin a kala, I thik laklawh vangin hrilh lo tur che in min ti a. Ka ten em mai" Thangzelin a ti bawka.. 

Vawiin hi ka fapa boral atangin kum hnih leh thla 5na a ni a. Ka pasal nen kan inthen atangin kum hnih a liam tawh bawk. Ka hrehawmna zawng zawng te khan mual min liamsan tawha, nunphung pangngai ka zawh tawha. Chutihlaiin na taka pasal then nisi a thiam taka min beihna vanga misual ber anga ngaih ka nihna kha vawiin hian hliahkhuhin a awm ta. A chhan chu ka Pasal Lalrinawma, mihring a zawnga hming pu zo lo ber leh tenawm taka inzawmna a neihpui C-i te inneih ni a nih vang a ni. Mahse thil mak a la awm cheu.. 

"Zari khan a ringhlel lui tlata,a ti mualpho NASA bawka,kha khan inngainatna tha lo a thlen tir a, C-i vanga inthen an ni lo" ti duh tawk an la awm zel a.. Thil mak dang la awm chu Rinawma'n a khat tawka min rawn phone thin leh nupui a nei dawn chung pawha min hmangaih thu a la rawn sawi thin hi a ni.. 

In ka thleng chu ka in kawngka bulah Pangpar bawr nalh em em mai hi a lo awm a… ka la kanga, ka hnim vanga vanga. A kara card inzep ka hmuh chuan ka en chianga.. 

"Miss Zar.. I tha bera, englaipawhin i tha ber reng fo vang. I tan kan awm reng e" tih a lo inziaka, a hnuaiah chuan min rawn thawn tu.. Kan khaw High School a ka zirlai hlui te hming a lo inziak kalh.. 

Khuh kharh riah ka hawi let thuaia, ka hnung lawkah chuan u Davida Rose par var tamtak, mawi taka tuam keng chungin a lo dinga, min lo nuih a… . 

Ka hming chu ZARZOKIMI a ni a, hun harsa ka tawh lai pawhin mi tha te Zar zoin ka harsatna ka hneh zel dawn a ni. 

A tawp ta…