Zarzokimi - 8

 Chapter - 8

Ka nu te inah zanriah ei turin kan chhungin kan kal a, dik lohna awm lanchhuahtir ka duh hauh lo. Kan inneih duh lo em em tu ka nu hian a duh loh chhan kha ka la hrechiang em em a. Duh lo eng ang mah se kan inneih tak tho si avangin a duh lo thei tawh lo va. Tihlan pawh a tilang zui lo. Kum 7 lai kan han inneih ve takah leh hmeichhe dangah sawisep tur a awm loh em avangin ka nu pawhin a ringngam ve tawh niin ka hre thina, a pa ang tura angai ngawt kha a ngai sual tih a inhre tawh ngei ang ti tein ka ngaihtuah phah fo reng a ni. Mahse, vawiin erawh thil a danglam ta a. Ngaihzawng a nei e chu ka ti hauh lo nangin hmeichhe dang, tunhma lama kan la hriat ngai hleih loh a be vel kha ka ngaithei bau lo. 

Engmah ti lang lo ta chu an vaiin hlim takin min lo dawngsawnga, zan inkhawm pawh kan ngaihsak hlawm lo, naktuk lamah Rinawma'n min thlah phei dawn avangin ka nu Hriati ten an hruaiphei a. A beng tha vak lo bawk nen amaha in a awm tir chi a ni lo. Lo kal ve a duh deuh that that nangin a dawnah tak tak chuan a zuam leh ta chiah lo. 

Ka nuin ka chawhmeh ken phei tur, ka ta tur leh ka ni te ta tur a lo siam teuh maia. Zinga chhuak tur kan nih avangin kan hawn nghala. La inngai tak chungin kan inthlaha, Zan dar 9 velah kan hawsan a. In a kan han awm ta chu ka nu awm bawk si lo nen ka ipik a, Bawihtea ka tihfai hnuah kan thil ken tur ka siamfela. Thangzeli leh Rinpuia hla zir bang an rawn peng kawia. A tuka kal mai tur ka nih avangin min rawn ngaipawimawh hram hram a. Chhunah pawh an lo leng tawh bawk. 

"Tukin vang khan i lungawi lo niin ka hria" mut hnuah a ti ta nge nge. Sawi tur ngaihtuahin ka ngawi reng. "Ka thil download kha nizanah ka buaipui nasa tawh a, net pack zo vekin ka dl a, zing net that laiin ka download bawk nen ka thin a rim thut anih kha" amah bawkin a ti leh mawlh mawlha. "Game mai mai vanga min khak kha ka duh lo a. Hmeichhe kawmngeih i nei nual tih ka hria. Thik enah pawh ka en lo. Mahse tukin a i biak kha chu nidanga i kawm thin ang a ni lo tih ka manthiam ve a. Ka duh lo khawp mai. Ka sawi tlang law law ang. Nupa tamtak pawh Game khelhna atanga an hmeichhe tawn emaw mipa tawn te avangin buaina an lo nei tawh thina. Khatiang buaina changkang lo lutuk kha intihbuai tir ka duh ve lo ania" ka ti ta hmiah hmiah. 

"Chu ngaihzawng nei turah min lo ngai alaw? " a ti bung deuh hmuk a. "Ka ngai che ni mai loin i lo nei reng tawh zawk maithei. Thil tamtak nupa karah chuan a thleng a, kan inngaidam leh mai thin bawka. Uire na hi chu ka ngaihdam ngai reng reng loh tur thil a ni" ka ti leh sak sak. Ka tawngkam a nem lo bawka a insehruh talh talh maia. Pawi ka ti hauh lo. Ka ngai serious hle tih hriattir ka tum ber a ni tlat. 

"Hmanah kan inngaihzawn hma pawh khan ka hrilh tawh che a. Kan inngaihzawn hnuah pawh ka sawi leh bawka. Ka pa tihsual tuartu ka ni a, a hrehawm zia pawh ka la theihnghilh lo. Chuti chunga nupui nei chunga ngaihzawng nei duh tura min ngai hi ka lawm lo. Tukina ka biak kha chu ka pa Cousin fanu, C-i a ni a. Thalai intlawh tawn prog-ah khan kan inhrechhuaka, game inang kan khelh vangin kan khel ho mai a ni. A remchan veleh lo zin a tum nghe nghe a" a ti ta duah. Ka tum loh tak chhanna ka dawn takah chuan ka hamhaih deuh a, mahse tlawm zawk anga lan ka duh thak lo. 

"A tu pawh chu ni se i thusawiah i din chuan a tawk" ka ti hmak. "Lungawi lohna atana i hman dawn chuan ka be lo thei lutuk. Ngaihzawn chu sawi loh, ka farnu ania. Mahse i rilru nawmna tur anih te chuan ka delete anga nimai lawm" a ti a. A phone lachhuakin a delete ta a. Engmah ka sawi lo. Duh leh delete se, duh loh leh delete lo se. Kha chu a thu thu a ni. 

Zing hma takah kan chhuaka, ruah a tla seng seng a, Hmuifang kan thlen chuan chhum a lo zing chhah em em mai. Fimkhur takin kan tlana. Bawihtea nen Motor kan rui lo hlauh. Rinawma nen boruak pangngai tak neih ka duh a, ka duh loh chin ka hrilh chiang tawh bawka tha takin ka be leh bawrh bawrh tawh. 

Harsatna tawk loin chawhnu dar 2 velah kan thleng a. Ka ni te inah kan lut hmasaa, Bawihtea an lo ngai tawh bawka an la nghal a, ani lahin a Nutei te angai ve bawka. An inlawm thawm a nain an ri chel chul mai. 

U Davida'n min rawn biaa, kan khaw lam atanga kan haw phei chiah thu ka sawi chuan "in pa a lo phei ve chuan naktuk tlaiah chaw rawn ei teh u. Inhmuhkhawm a khat em mai" a rawn ti a. Rinawma nen pawh an inbe ve bawka. Kan khuaa a awm lai khan kan inah an inhmuh tam bakah Sport a tui tak ve ve annih avang khan an titi duhzawng a inang thina. Kan inngaihzawng tih a hriat hnuah pawh a tuamah an inbe chhe zui chuang lo kha ania. U Davida tan khan a hunlai khan a tlawmthlak viau ang tih tun hnaia kan han inhmuh takah hian ka ngaihtuah chhunzawm thiam ta chauh anih hi..

Kan chhungkuain u Davida Quarter-ah chaw kan va ei ta a. A nu lo zinlai a lo ni hlauh maia, arpui tuilai ngei mai min lo talhsaka. Kan khawlam chanchin sawiin kan titi a. Rinawma'n Badminton club te an din ve tawh thu a sawi chuan u Davida'n a hlimpui ngang mai. 

Ni thum min champui hnuah Rinawma'n min hawsana, a cham chhungin vawikhatmah Game a khel  lo va. Phone pawh a khawih mang mang lo. Kan inkhak deuhna kha tumah mahin kan sawichhuak tawh hek lo. Tha taka awm hi ka duhdan ber a ni a, kan awmna hmun a hranga, inah ka nu nen chauh an awm avangin Game a lo khel pawh ka hre thiam em em. A game khel ka haw hrim hrim a ni hek lo. Ka huat ber zawk chu Game in a kentel, thil tangkai si lo zawk kha a ni. 

Kan Dan pangngaiin hun kan chhiarchho leh ta bek bek a. Kan nula kha kan haw chhungin a chhungte hnenah ka awm tira, kan khaw lama a lo zin duh leh duh loh ka zawhin a chak loh thu a sawia. Hruai luih ka tum bik lo. Kan let phei leh tukah a rawn haw ve nghala. Bawihtea nen an inawm leh ta chawt. U Davida nen kan inbe leh zeuh thin tih mai loh chu kan inhmu ngai meuh lo va. A hnaah a buai ve ang bawkin keipawh ka buai ve a. Chu bakah inchhung khat nih loh na leh tun hmaa sawi kai ve tawh kan lo ni a. Kan khaw mi te awm hnai lo mah se inkawmngeih zui lutuk erawh tha ka ti lo. 

"Bawihtea hi nizan atangin a khawsik a reh hleithei miah lo va. Damdawiinah ka han kalpui mai dawn mawni" tiin ka ni hnenah ka sawia. "Chuvang em ni nichin khan a tah ve ngei a? A tah khat nen engtizia nge ni ka lo ti mai maia. Mama kan kaitho anga, han kal rawh u. Khawsik chu hrehawm deuh ania" Pa Buanga zawkin a lo ti a. Ka niin Mama a va kaitho a, "ka lo zuk siam lawk ang" ka ti a. Inah ka chhuk a, Bawihtea thawmhnaw ka thlak sawk sawka. Kan nula hnenah eirawng lo bawl zawm mai tur in ka ti a. Hmanhmawh takin inchungah ka chhohpuia. "Au Zar, ka lo kal ve ang" Matetei'n a lo ti a. Mama pawh amah ang lo taka thawhphan nei loin Motor bulah a lo ding vung tawh. 

"A zunkawng pawh a ni thei a, a zun te test ila" Doctor-in a lo ti a. Damdawi an pek hnu reiloteah a khawsik a ziaawma. Ka thawveng huai hman nangin ka thawveng rei lo, reiloteah a luak vaka, kawtha lo in a zut zui ta bawka. Ka thlan a sa phat phat mai. Zingah khan Rinawma hrilh ka tum zet nangin a khawsik satliah tura ka ngaih leh avangin engmah ka hrilh ta lo va. Ral atang chuan inngaihtuah a nat em vang a ni tel bawk. 

"Mate, Bawihtea hi lo en lawk rawh aw. Kan pa ka va be lawk ang" Matetei hnenah ka ti a. Pawnah ka chhuaka, Mama pawh haw loin pawnah a lo la awm a. Min hmuh ve leh min rawn pana, "A zia deuh tawh em? " a lo ti a. "A muhil deuh chiaha, kan pa kan be lawk anga, Doctor hian min admit a tum hmel sia, kan thil mamawh tur vel min va laksak leh dawn nia" ka ti duah. 

Rinawma ka call tlang thei miah lo maia. Dawr a la kal loh takin tiin ka nu ka va phone a, "Nu, Lalroma a awm em? Ka phone tlang thei lo va" rilru hmanhmawh tak hian ka ti a. 

"Awm nang, zingah khan a chhuak daih tawh alawm. A pa te lam chhungkaw ho inhmuhkhawm naah a kal dawna" a rawn ti a. "Maw? Engmah pawh min hrilh lem si lo va. Bawihtea hi nizan atangin a khawsik a reh thei lo va, damdawiin kan kala. Min admit dawna. Chu chu rawn hrilh ka tum mawle" ka ti leh sawk sawka. "Chuti law? Tunah engtin maw a awm a? " a rawn ti ve a. A awmdan tlangpui ka sawi zawr zawra, ngaihtuahawm a ni lo ka ti ve ngial nangin ka rilru a hah tet tet a, Rinawma awm ve se ka ti em em zawk. 

Matetei leh Mama kan thil mamawh la turin inah an phei a, rei thang loin an rawn let leh thuaia. Ka ni a rawn kal tel ve bawk. Bawihtea mu zawi nan reng mai chuan min ti thlaphang ru em em maia, Pathian zarah a dam lo ngai mang lo va.A senlai pawhin tlang hrileng a la ve zeuh zeuh tih loh chu damlohna a nei ngai lo. Tun tum a na hi tlang hrileng satliah mai mai a niin ka hre lo va. A khawisik lah a sang bawk.

Nilengin ka niin min awmpuia, zanah Pakhat bakin riahpui theih anih loh avangin keimahin ka riahpui angai dawn a. Huphurh tak ka ni. Ka chhel ve viau emaw ka intih laiin ka lo la chhel tawk lo hle tih ka inhrechiang ta..Mahni hi chuan kan tuar thei maia, Fate anni tawh chuan dan dang tak a ni. 

Dar 8 vel bawrah Rinawma'n min rawn call a, ka thin a rim nghal tet tet. Chhungkaw inhmuhkhawm naa tel kha thil tha lo leh dik lo chu a ni hauh lo va, engmah min hrilh lo lai kha ka haw ber. Bawihtea dam lohna vanga call ni lo phei ila a kal tih ka hre dawn lo tawp tihna ni a. Msg chuan inbe nitin mah ila call kher hi kan hmang tam lo. 

"In ka thleng chiah a, Bawihtea chu eng nge a an a? " a rawn ti nghal mawlh mawlha. "A muhil rih" tih chauh ka sawi. "Signal ka nei lo va. Ka kalna tur hrilh a ka rawn msg na che lah chu a lo tlang emaw ka tih laiin a lo tlang lo lehnghal a. Naktuk-ah ka lo phei ang" a rawn ti leh a. "I tihdan dan le" ka ti leh ringawt. Mak deuhin a msg tlang loh thu a sawi kha ka awih miah lo. Kan inkhak hnu atang khan kan chengdun zui ta rih lo nen thil ringlelhawm awm ka hre ta rih lo va. Tunah hian engvanga a thusawi awihsak lo nge ka nih pawh ka inhrethiam bik lo. 

Kan nufa-in kan tlaivar titiha, a chang leh pawnah te kan inawi leh rih a. A fel ve em a, tah phei chu a tap tehvak lo. Khawvar dawn lamah a muhil a, khuma muttir ka tum ve leh khumah hling a awm ta emaw tih mai turin a harh nghal kawk maia. Thu mu chungin kan inpuaa, a muthilh leh hnuah keipawh ka muhil ve ta hlauha. Midang thawm avangin harh leh thuai mah ila zan hmasa lam kan mut mumal loh avangin reilote tal muthilh pawhin minti zangkhai hawk thei. 

Zingah Matetei leh ka ni an lo phei leha, " Chemte, muthilh tum la, Kan lo awm rih ang. Mama chaw rawn dah thleng kan awm dawn tho" ka niin a ti a. "Reilote ka chhing seka, ka zia viau ania" ka ti thuai. Kan bul chiaha a fapa awmpui ve tu nu pakhat chuan, "Eee, an awm chhung khan hnialbuai loin muhil hmiah rawh. Nizan pawh i mut mang loh kha" min lo ti a. Thawm dang a tam bawk nen ka muhil thei in ka ring 

lo. 

Engmah a ei thei lo va, luak tawh lo mah se thil a ei thei lo. A lu na a ti bawka. Chawhma lam chu a zia viaua. Chawhnu lamah erawh a kaih ta thut maia. Doctor leh nurse te nen kan virbuai ta chung mai. Nidangah a kaih ngai loh avangin ka bangbo a, buaipui dan pawh ka thiam ve mang lo. 

Rinawma Damdawiinah a rawn tlang nghala, Bawihtea'n a pa a hmuh chuan a lo ban nghala. Tlem chuan ka thla pawh a muang ve ta deuh. Karkhat lai damdawiin kan awm hnuah kan chhuak thei ta a. Rilru thlamuang lo reng renga awm ka ni a, Damdawiinah muthilh a lo har bawk si nen ka chau em em mai. Rinawma awm reng mah se keiman ka riahpui zela. Chhun lamah Rinawma'n min rawn awmpui ve thin a. A awm lai in ka muhil ve zeuh zeuh. 

Kan chhuah niin school lama ka thawhpuite an rawn leng laih laiha, Bawihtea pawh a Nutei te pahnihin an thutchilh chawt. Naupang ngang a ni a. A la zawi deuh nangin a harh viau peih tho. Eng eng emaw an zawta, an nuihpui an nuihpui mai. 

"Inbual hmasa rawh, kan thil hawn vel chinfel ka duh" ka tih chuan Rinawma inbual tumin Bathroomah a lut a. Damdawiin kan thil ken ho ka phawrhchhuaka, ka chingfel zuia. 

Phone nghawr niawm tak ka hriat chuan ka kekawr ipte ka dapa, ka phone ka lakchhuah chuan ka phone vibrate a ni lo tih ka hre thiam. Lukham bula Rinawma kekawrbul awm ka lak kan chuan a hnuaiah phone a lo daha. A rawn call tu ka hmu hman lo. A phone check sak chakna ka nei thut. A lock ka hawnga, rawn call tu ka en chuan Company number a lo ni a, whatsapp-ah ka lut zui nghal thuaia. A chung berah C-i, Cousin tia a save nen an inbiakna a lo awm a. Ka hawng nghala, thlalak a lo awm nuala. A vaiin hmanni chhungkaw inhmuhkhawm a an thlalak vek a ni a. Midang dang nena an lak te leh an pahniha an lak te pawh a awm a. Nula cher sang lam, pian dik thlap niin a hmel erawh a tha tehvak lo. A landanah kum 25 aia upa tur hmuhin ka hmu lo. Thildang ka enkual leh thuak thuak hnuah han rinhlelh tur a awm loh avangin ka thaw deuh huaia, eng nge maw tha lo tak hmuh ka tum nge pawh ka hre lo. Ka en lai khan ka lo insehruh hle a lo ni. 

Damdawiin atanga kan chhuah hnu ni khat chu min la awmpui a, In lamah dawr leh ka nu rawn kalsan a ni a. Karkhat lai a awm tawh bawk nen haw tawh se ka duh a. Dawrah enkawltu dah tho mah se a neitu awm leh awm loh te a hriat ve thin avangin loh theih loh thilah lo chuan ani pawh a awm reng a. Tun tum erawh natna thil a lo ni bawk nen, dawr lam pawh kan ngaihven hman meuh lo. 

"Kum khat i awm tlin veleh transfer hi dil ila a tha ang. Naupawm lai lehnghal tan chuan a buaithlak em mai" Pa Buanga'n a ti a. "Ni e, buaipui deuh chu angai a ni. In nupa lah in awmdun thei lo va. Thil hmanhmawhthlakah pawh inkohna a hla tham em mai" ka niin a ti ve bawka. 

"Sawrkar hnathawk hi zawng sawnkual theih kan ni miau mai sia, a buaithlak anih hi" ka ti a. "Niang chu. A thuhrimah tlema junior deuh hi an khawih che ngun zual a. Zirtirtu phei chu Sawrkar hian a duat lo ngawt che u hian ka hria. Aaaa, in hlawh hi a tha alawm maw tak le" ka niin a ti leh barh barh. 

Kawngka an rawn kik a, kan nulain a va hawnsak chuan u Davida a rawn lut a. "Tunlai kan buai a zual deuha, in damdawiin awm pawh ka lo hre ve lo va. Nang pawh i lo phei a ni maw? " Rinawma hnenah a tih zawm nghala. 

"Aw, rinai takin a bei ve reuha. Ral atang chuan inngaihtuah a na khawpa. I dam tha maw? " a ti ve hlut. 

Ka niin "tu nge ni? " a lo ti a. "U Davida anih hi. Kan khaw lamah a awm reng thina, supply ho pu anih hi" a hriatthiam awlsam theih nan ka ti a. 

"Ooo, anih chu mawle.. Aaa, hman deuh pawh khan i lo kal tak e. Ka tar ve ta aniang. Ka hmuh fo pawh hi ka hre rei thei lo" a ti bawrh bawrha.  U Davida'n Rinawma hnenah a awm chin tur a zawta, " Naktukah ka hawsan dawn a. Sawlamah dawr te kan lo nei ve laklawh a. Lian viau ni lo mah se mi kuta dah reng hi rilru a nuam lo ve a" a ti a. 

"Chemtei hi nakumah an khaw lamah sawn dil angai a ni. Naupawm tan chuan mahni khua lo chu a buaithlak leh lutuka. Han inthlang ila, I pa pawlte an chak chuan an sawn let maithei ang che" ka niin a ti leh a. 

"Awi, pawl te pawh a nei hleinem. I ti ho thei em mai" ka lo ti thuai. "A nei awm em mai. I pa te zawng atchilh zawng nei ania. Ka hre chiang ve em mai. Thingtlanga unit president te hi thunei deuh annia. Khawpuia block hruaitu aiin thingtlang unit president-in thil an tithei zawk daih" a ti leh mawlh mawlha. 

"I Patea kha a pension tawh em ni? " Tiin Rinawma'n min zawta. "Nikum khan a pension a" ka ti a. "Education dept lamah hian ka thianpa a awm a. A thu viau lo nangin ka lo sawipui ve hrim hrim ange. Naktuk zingah Tlabung kal ka ngai dawn sia, ka va haw ange. Naute chu lo dam tha zel tehse. Nangpawh tluang deuhin kal la' Rinawma en chungin a ti a. Kan nupain kan zui chhuaka, kawngka thleng ka thlah a, Rinawma erawh chuan a Motor hunna thleng a han zui chho thung.

Kan mut hnuah muhil mai lo in kan titi a. 

"Davida kha a lo leng thin em ni? " a tih chuan " Leng thin em em lo ve. Vawikhat chu min rawn tlawh ve a. Abak chu zanin kha a lo kal leh chu a ni mai" ka ti a. 

"I ni sawi hmang khan lo leng fo a ang em a" a ti leh a. "Chutianga a sawi pawh ka hre lo. Chhungkaw inhmuhkhawmna lam chu kal in tha em? " ka ti ta daih. "Tha nimai. Thei lo an awm nuala" a ti a.. 

Rinawma min hawsan hnuah kan nunphung ngai kan zawh chho ve mawp mawp zela. Nitin school ka kala, Bawihtea school a hruai chang te ka nei a. A pang a lum deuh ni a ka hriat chang chuan ka awm a nuam lo nghal teuh zel maia. Tunhmaa hlauhthawn nachang hre vak si lo kha ka hlauthawng em em zel ta mai.

Pathian zarah buaina em em nei loin hun kan hmang chho zela, vawiin hi kumin atana kan school kal tawp ber ni a ni a. Cham khawmuang loin naktukah Aizawlah bazar turin kan tlang phei anga. Aizawl atangin khua kan pan leh dawn a ni. 

Zanah u Davida a rawn lang hlawl maia, "naktukah ka phei dawna. Ka rualin kal mai ula" a ti a. "Sumo ticket ka la vek tawh a. Lo hre hma deuh ila tha tur" ka ti vang vang. 

Matetei a rawn luta, "au Zar, naktuk in kalna tur Sumo neitu pa kha a nu a boral thut a. An kal leh thei dawn lo ania. Sumo dangah ka lo sawn mai ang a ti che u a' a rawn ti a. " Ehe, a van zia lo em em ve. Nichin khan u Davida a haw chiah a, naktukah a ruala phei ve tur in min sawma. Sumo ticket kan cut tawh vangin ka lo hnar a. Ka'n be chhin lawk ang. Sumo dangah chuan min lo sawn rih lo se" ka ti a. 

U Davida ka phone a, sumo neitu ten chhiat an tawk tih ka hrilh chuan " Anih tak chu, ka rualin in phei thei alawm. Driver nen chiah kan ni dawn" a rawn ti awlsam then.  Matetei hnenah sumo dangah sawn ngai loin kan cancel tih hrilh turin ka ti a. Vanduaithlak viau mah se u Davida remchan lai a lo ni hlauh hi a vanneihthlak tho maia. Thil intawng palh fuh tak a ni. 

Rinawma hnenah hrilh tumin ka call a, a reject a, Komiti an nei tih msgin min rawn hrilha. Msg bawka hrilh mai ka tum laiin a dawngsawng dik lo leh ang tih hlauin call theih hun ka nghak leh ta zawka. Mahse, Bawihtea ka mutpui kha ka lo muhil ve daih maia, zinga u Davida'n min lo callin ka harh ta chauh. 

Insiamsa vek kan nih avangin kan inpeih tawh thu ka lo hrilh a. Bawihtea ka kaitho a, damdawi kan ei ve ve a. U Davida te nen kan awmna veng a inhlat a, an lo thlen hmain kan lo inhnawhpuar hman vek. 

Rinawma ka phone a, a la tho lo nge ni phone a pick up thei lo va. Motorah phone ka khawih chuan ka rui thin a. Ka khawih ngam dawn lo tih ka chiang si, ka nu ka phone a. 

"Hello " Ka nu aw ni lo, hmeichhe dang aw hian a rawn ti a. " Tu nge ka biak aw? " ka ti nghal a. "C-i ka nia, u Zar, a nu hi vawkchaw a pe aniang" a rawn ti lang lang. Kan inah a awm tih reng reng ka hre lo. 

"Anih tak chu. Kan pa biak tum ka nia, phone a la thei lo va' tha takin ka ti a. " A la tho lo va, ka kaitho dawn em ni? " a rawn ti leh a. "Ngai lo mai rawh se. A thawh hunah aman min lo call back mai se" ka ti ta a. Inchhunghnai anni tih hre reng mah ila tlangnel taka kan nupa room a luta, ka pasal mu va kaitho turin ka duh hauh lo. 

U Davida te rei vakloah an rawn thlenga. Kan chhuak zui nghal maia. Nidang ang bawkin kan nufa-in kan rui leh ta a. Damdawi ei tho mah ila hetianga tihfuh loh ni hi a awm thin. U Davida'n min buaipui a, a chang leh Bawihtea a pawma. Rinawma'n min rawn call back ta em tih lam pawh ka ngaihven peih lo. A chang leh min dinpuia, kawngsir phul chungah te ka mu leh ren rawn thina. Inthlahrung em em mah ila inthlahrung thei dinhmunah ka ding lo. 

Tlan sawt thlawt hek lo le, thim dawnah ka pi te in kan thleng a, tlan pangngai taka tlanin zinga an chhuah hian dar 4 ah chuan an thleng fel vek hman tawh thina. Ka ruih nasat em avangin kan tlan chak thei lo va, kan ding zeuh zeuh bawk nen kan thleng hma thei lo. 

Zotei'n Bawihtea a rawn buaipui vata, "Inah lo riak thla u la" a ti a. Ka piin a phal lo va. "Ngai lo, a rui nasa nen tikhan awm mai mai rawh se. Han mu vang vang se, a zia deuh hunah chaw i ei dawn nia. Bawihtea kha i hman leh lo la la" a ti a. "A nutei te ho pawn an awm thei lutuk, nau an duh alawm" Pitei'n a lo ti ve thuai thuai. 

Ka mut vang vang hnuah ka harh ta deuha, phone ka en peih veleh ka en a. Rinawma min lo callna a lo awm nual. Phone let loin msgin kan thlen tawh thu ka thawna. Kan ruih nasat vanga phone khawih peih lo ka ni tih ka thawn tel bawk. 

Ka thawhharh peih hnuah ka call ta chauh. "Nizanah ka khuh nasa lutuka, khuh damdawi ka in pawpa. Ka rui aniang, zing dar 10 hma chu ka tho lo reng renga. A hrehawm viau em? " a rawn ti mawlh mawlha. 

"Ruih hi chuan a nuam lo thin khawp mai. Kan nufa hian kan rui zel mai bawk nen" ka ti a. 

"A ni ngawt ang. Ka lo phei mai lo ni ka ti leh hnuhnawha. Eee, Davida rualin elaw in phei? " a rawn ti a. "Aw, engtin nge i hriat a? " ka ti he haw. 

"Phone i lak theih loh vang khan Matetei ka biaa. In sumo kalna tur cancel ngaih thu leh Davida a lo phei dawn tho vanga a ruala in kal thu a lo sawia" a rawn ti mawlh mawlha. "Nia, nizanah khan rawn hrilh che ka tum vang ania ka lo phone che" ka ti ve a. "A remchang hlauh kha a tha mai e. C-i niminah a lo zina, a hmu chak si che u a, naktuka haw leh mai tum a ni nangin in lo haw thlenga awm turin kan lo chelh a" a rawn ti leh mawlh mawlha. 

"Anih tak chu" tih chauh ka sawi. Ka rilru hi a kal dik lo nge pawh ka hre tawh bik lo. He nu hi ka lawm thei tlat lo. 

Zingah Zotei te inah ka chhuk a, ka pi te inthlang chiah a ni a. Zotei te in ka luh thlak hmain midang ka tlawh kual hmasa a. Colony a awm tih takah luh lohna neih bik chi a ni lo. 

"Chengkawl leh kaikuang niminah ka lo lei dim diam alawm. I duh ve bawk sia" a ti a. A chawhmeh chhuan lai en dak dak pahin " I va fel tak, a tui ngawt ang. Mizo kaikuang ngei ni se" ka ti a. "Kaikuang lian pui pui ka lei. Kan khaw lama kan man thin ang kha chu lei tur a vang lutuka, hmuh fuh chuan i u Lawma hian a lei ngei ngei zel alawm.. Awi, in kaikuang rep kan rawhruk nasat theih zia kha" a ti peka. Kan nui dun bawk bawka. 

"I pa sarep pawh a hek ve tho alawm. Tinge maw khang hun lai khan kan vir em em le ka ti. Hmawmsawm kan ei loh lutuk vang kha nge ni? Rap a sakhi sarep te kan han rawh ru ta mai thin kha ania. Mahse, sawhthing leh hmarchahmui tihpawlh hi chu ka la duh reng" Ka ti duaha. "Keipawh ka nia lawm. Mahse kan lo ei nasa lutuk thin khan ka pum a tichhe nasa a, acid lah khan kan ei nasa bawk si. Pum tha nei chi kan ni lo" a ti mawlh mawlha. Zotei faten Bawihtea dawr kal turin an hruaichhuaka. U Lawma zingchhuak a lo la haw lo bawk a. Kan pahniha kan awm takah chuan ka rilru nawm lohna hrilh ka tum ta. 

A tir phat atangin ka hrilh a, rinhlelh tur hmu ka ni lo tih ka sawi nawn ka sawi nawn a. Rinawma rel zawnga tawng phei chu ka duh lo bur. Keimah lam hi ka rilru puthmang a dik lo em ni tih lam ka buaina anih zia ka sawi nawn ngun viau. 

"I dik lo pawh ka ti lo che a, Lalroma pawh a dik lo ka ti chuang lo va. Chutihrualin nupa hian inzawmna mak deuh mai kan nei a. Dik lo hi kan hre chat thei zel ania. An pahnih inkar chu i haw hunah i hre thei maiin ka ringa. Unau an ni a, inhlat tawh viau mah se unau tho anni a. Tenawm taka inzawmna siam tur chi-ah Lalroma hi ka dah lo va. Ngaihzawng a nei duh anih pawhin C- i chu a ni lo tur ah ngai ang. Aaa, a neih loh ring zawk ang. In han awm hran takah hian Lalroma mize zau leh thian kawmthiam lo ni bawk si hi i dawngsawng fuh lo aniang" a ti ta dap dap.

"Nia, keimah hi ka dik lo aniang, ka rilru a zim lutuk aniang ka ti thina. Midang han hrilh chi ni si lo, phone a hrilh ngawt tur chein ka sawifiah zoin ka ring bawk si lo va. Chuvang ania lo kal hram ka duh" ka ti ve a  

"U Davida kha ilo nei daih lo a ni. Nizana ka hmuh phei kha chuan chhe lo ka ti ta lutuka, kan pa pawh ka hrilh alawm. A lo mature tawh lutuka, hmanah kha chuan a la inphut lo va, sang satliah ang khan a awm a. A hmel pawh a la tuai deuha, tunah kha chuan a landan a changtupa ruih mai" Nui vak vak pahin a ti a. 

"I ho mang e aw.. Thawnthu ngaihthlak i hrat a ni khawp ang. Achangtupa te i tih vel ni? " ka ti nang nanga. 

"Awi,ching lutuk e mawle. M&B b sei pui pui, a lai bung tawh zawm chawp chunga chhiar ngar ngar chi nih chuan mizo hoin M&B an ziah te hi a ngaihnawm teh ania aw..Kan chhiar nasat theih zia kha, u Hlutea Library-ah bu khat cheng 5 in kan han hawh ngei a. Lunglenthlak e" uar deuh mai hian a ti a. 

"Nia,lunglenthlak ngawt mai. M&B kan chhiara a changtupa ang zawng ru deuh tlat chunga u Lawma i nei hi chu ka fak ngawt mai che" ka tih chuan a ner a. "In pa pawh enge anih bik le a? " a ti nang nanga. "In pa ai chuan a paliana, a hmelpawh a tha zawk" ka ti a, "awi,a lian zawk ringawt,a hmel tha thlawt lo aw..Chapo viau thei i awm bik lo. U Davida kha chu nei ngat la ka u en ang che ka ring" a ti leh zat zata.Nuam ti em em hian a nui a. 

"I va mak e aw. Sawi sawi suh. Enteh, u Davida hi a khawngaihthlak teh ania. A nupui tur an inneih dawnah a borala" ka tih chuan a nui tawp chawta.. "Awii, ka van khawngaih tak" a ti nghal hluai. 

Aizawlah ni hnih kan cham hnuah kan haw chho ta a. Zan lam atangin damdawi kan ei lawk bawka, kan rui lo hlauh maia. Rui miah lo va Motor chuan hi chu a nuam kan ti viau zel. Christmas bazar tura kal leh Aizawl lama hnathawk leh lehkhazir ho an haw khawm lai a ni chho tawha, tawt takin Sumo-ah kan inbenga. A hma seat pahnih hauh ve ve mah ila Ruatmawia fanu kum 14 mi ka thuttir a, ani hi SAI hostela awm niin sumo ticket a chang lo va. Groupah a rawn sawi a. Ka hmuh veleh kan bulah a chuan theih thu ka hrilh ta vat. A fel reuh viau maia, pa thingtheng chi hi a ni lehnghal a. Bawihtea a pawm al maia, a nin hlaua laksak ka tum pawhin "angai lo, ka pawm duh alawm' a ti zel maia. An Infiam vel na lamah Driver tan an hnawksak hlauin Tukverh bul lamah ka thuttir a. Puitling chuang ho kan titi mam mam hlawm. 

Kan in kawtah sumo a dinga, horn hmeh pah hian " U Rinawm, Home minister a lo haw ania" Driverin a ti lawng lawnga.Rinawma leh hmeichhe pakhat rawn inzui chhuak chu ka hmu a, hmu lo der chungin ka bag ka ban ta daih. 

"Bawihte, I va lian tawh tak. I dam em? " ka nuin a ti mial miala. Bawihtea lah chuan a hmuh khat nen a pi pawm a duh ve mai bawk. 

Kan bungrua an lakthlak sa inchhungah kan keng luta, thenawm nu lo len lai tak a lo ni bawk nen kan ri hlut mai. 

"Zarbawih, I rui lo maw? I nuin i ruih a hlaua, a lo sawi a lo sawi mai che a' thenawmnu-in a ti a. 

" Vawiin chu kan rawn chuang fuh khawp mai. Kan rui lo ve tlat a.. Kha, serthlum hi ei rawh " tih pahin serthlum dahna polythene ka pe a. 

"Ei lo vang, chaw kan la ei si lo" a ti thuai. 'Kimkimi tan tal hawnsak rawh, I duh zat zat kha la la, ka lo hawn teuh alawm" ka tih chuan "Chuti anih leh an unau indaih turin 2 hi ka hawn ange" a ti a. 

"Nu-i, hei hi ka sawi thin ka Patea fanu C-i chu anih hi. A hmu chak si che u a, haw tum tawh kan lo chelh hram hram anih hi" Rinawma'n a tih chuan chhungrila ka mil lohna thup chungin ka chibaia. "I lo la cham thei hlauh chu a tihzia em mai. I lo zin leh lawk awm si lo va" tha takin ka ti ve a. 

"Nia, chawlh anih loh chuan zin a harsa ve lutuka. Mahse a-nu hian Christmas emaw kumthar tal hmang turin min duha. Ka theih leh kumthar lo hman ka tum anga" a ti a. 

"PWD-ah LDC in a awm a. An khua kan han tlawh khan kan han inzawngchhuak nawlh alawm" Rinawma bawkin a lo ti leh a. A chanchin a lo sawisak leh min hrilh hi dik lohna awm hauh lo mah se ka ngei tawk a tling. Thikthuchhe tak pawh ni si lo, ka thikthu a chhe ta em em mai hi keipawn mak ka inti a, rilru lam damlohna ka nei emawni ka ti rum rum tawh. 

Kan haw tuk lawkah C-i a haw a, Ka nu in kumthar hmang turin a chah a, "Kumhlui thlah zanah i papuia an sun ve dawn a, I inkhawm ve ang chu" a ti a. Rinawma pa u hi kumin kimtirah a boral a.."Nia, lo kal leh ka tum ange" a ti a. Keipawn tawngkam thain ka sawm ve bawk. 

Ka haw tuk atangin inchhung tifai in ka buai ta char char. Ka nu kum upa lam tawh leh Rinawma chauh awm anni a. An che fel lo ngang mai. Kan room phei chu bomb a puak emaw tihmai turin a hnawk a, a thawmhnaw a dah zel zul bawk. 

"I va han awm ho em em bawk ve mawle" tlaia a lo hawin ka lo ti hlak hlaka. "Eng nge ka awm hohna? " a ti deuh hu a. "Room i thehhnawk nasa si, a zualpui bak khawih pawh ka la khawih lo. Ka nu tan inchhung tihfai sen a ni lo va, puih te pawh lo pui ve ta che" ka ti leh hlaih hlaih. 

"I ngaipawimawh a, fai lo i ti mai mai anih kha. A fai lo lai ka hmu ve hleinem" a ti duh lek. 

Ka nu te in lamah Bawihtea'n chaw a ei phei a, zanriah kan eikham hnu deuh feah lo dah turin ka nu ka chaha. Inbual hmasak loh chuan min bawhbuai leh dawna, Rinawma lah hla zir turin a chhuak daih bawk si. Ka nu hi ke tha lo anih avangin thlasik lai chuan a theih chinah awl vek angaia. Tihbuai loh hram hram ka duh thin. 

Ka inbual sawk sawka, ka inbual zawhah ka sam ka chhem ro leh sawk sawk. 

"I la che dawn em ni? Niminah ilo thleng chauha, I chau dawn em mai" Ka nuin min ti a. "Che tawh dawn lo e. Bawihtea lo haw hma Rinawma thawmhnaw bawm kan chingfel lawk ange" ka  ti a. Roomah ka luhsana, ring deuh tak hian Korean film mizo tawnga lehlin a en a. Hmuhnawm a ti thei em em maia, Bawihtea'n TV a en ve duh chang chuan remote an inchuhbuai fo mai. 

Rinawma thawmhnaw dahna tihfel tumin a thawmhnaw inhnawh tut mai ka lachhuaka, a chhawng hnuai bera awm ho ka lakchhuah chuan ka rin loh lutukin zu um ka haichhuak ta nawlh mai..