Zarzokimi-9

 Chapter - 9

Bawihtea thawm ka hriat veleh hmanhmawh lutukin thawmhnaw ka hnawh lut nawk nawka, ka u fanu nen room-ah an rawn lut zui nghala. "Ni, Bawihtea hi lo riahtir i phal em? a rawn ti lang langa. " Eee, a riak tlang zo lo vang. Zan laiah te lo haw a ngen mai ang. Kum 10 a tlin hunah le" ka lo ti a. Bawihtea'n min lo dil ve a, khauh deuh taka ka rem tih loh thu ka sawi takah chuan ngen pawh a ngen zui lo. 

Bawihtea ka tifai leh riha. Ka tihfai hnuah phone nen khumah ka awmtira, keiin a pa thawmhnaw bawm ka tifel zui a. Ka zo tep tihah a rawn haw a, lo chhuahchhal nghal chiam ka chak hle nangin Bawihtea ala meng si a, ka insum hram hram. 

"Ooo, khang te chu naktukah ti ta mai la. Thawmhnaw kha an tlanbo dawn pawh a ni lo va" a rawn ti nghal mawlh mawlh a. 

"Tha deuha thlepin a hran vekin ka dah sia, a bal leh bal lo nen i hnawh tut ringawt mai. I che tawp em mai" ka ti hmawk hmawk. 

"Kha kha lawm ka nin, I che renga. Phunna tur i hmu zel bawk a. Phun ai chuan ti lo mai la" khuma mut ve pahin a ti a. "Ka phun ve bawk ang chu.. I che fel lo lulai em alawm mawle. Nakum lamah chuan a khat tawkin intifai vel tur la tawh ila a tha ang. Inhlawh duh an awm em em ang"  ka ti hlak hlaka. Min chhang tawh loin Bawihtea nen an infiama. Keipawh ka phun zui lo. 

An pafaa an muthilh hnuah pawh ka muhil thei ta reng reng lo. Bawihtea a men rei em avangin han zawhna hun a awm der bawk si lo. A thawmhnaw bawmah ngei ka hmu a, midang ta a ni dawn lo tih lah a chiang si. Englaimaha zu a in ngai ka hriat loh hian ka awm loh hnuah a lo in thin tihna chu a ni dawn sia. Ka insehruh a, engtin nge ka tih ang ka hre thiam lo. Zeppui ka duh vang ni miah loin midang bula sawi ngawt harsa em em tur anih zia ka hre chiang em em a. Mi thenkhat an fate leh pasalte sualna zeppui ti a kan lo sawisel bawrh bawrhte rilru lo hah dan tur zia ataka ka chunga a tlak ve meuh chuan an dinhmun ka hre thiam ta. Zeppui duh vang ni loin "ka pasal hian rawngbawltu ni chungin a rukin zu a in thin" tiin ka tlangau ngawt thei dawn lo va. Biak-in ah tawngtai thupuiah ka thawh ngawt thei bawk lo. Lo thawh tehreng pawh ni ila "ka rin aiin a fing lo, a ruka chinfel mai awm" min ti ang.. Khumah hahdam taka mu siin ka hah em em chu a ni ber e. 

Zing thawh veleh Bawihtea'n a pi te in a len a ngen nghala, tul ka ti vak lo chungin ka nuin a va kalpui ta tho. "Duh leh ka rawn hawsan mai ang. Naupang chuan thil atchilh hunlai an nei alawm, nakin lawkah chuan lengah pawh sawm sawm mah se a leng peih lo vang" a ti awlsam mai. 

Eirawng ka bawl laiin Rinawma a rawn tho a. Thingpui ka siamsaka, a phone en reng chunga a thu chu ka zawt ta phawng. 

"Nizanah i thawmhnaw bawmah zu bur ka hmu a, engatinge? " ka ti a. Han zawh chiam dan pawh ka hre lo. "Tu ta nge? " Ti dawn ila ama ta bak a ni thei hek lo. 

"Zu bur a?? Eee, Zorama ta anih kha. Hman zanah buaina a siama, a kenlai ka chhuhsak anih kha" a tih chuan ka thaw deuh huaia. Zorama hi a pa fa hnuhnung a ni a. An sual em em a, a nau Zongaiha ai pawhin Zorama hi a sualin insual a hrat zawk. 

"Dahthat angai emawni le? Ngaihdan tha lo pui pui ka nei lek lek ania" ka  tih chuan min rawn en a. 

"I mak mang e ka ti. Achang leh ngaihzawng neiah min puha, achang leh zu in ah min chhuah lek leka, nang hi i chiang lo a ni lo maw? " a ti ta hlur mai. Chuti vaka a thinrim chu ka beisei loh dan deuh mai anih avangin han sawi mai tur ka hre lo. 

"I awmdan hi a mak ka ti tak tak ania. C-i lah kha i lawm lo em em ringawt maia" a ti leh ta a. 

"Enge ka lawm lohna? Ngawt ngawt che hian. Ka rilru lo pui min puttir tum lo teh" ka ti ve nghal hmak. 

"Chuti anih leh a tha anih chu. Reilote kan awm hranga, min ringhlel ang zawnga khasak i ching chho ringawt a, a inhriatchian loh thlak em mai. Pasalte tih mualphona hi a ho teh ania. Duati ang maiin mi hnenah te ngaihzawng nei angin min lo chhuah ange. I mawng i hlim tihna animai" a ti leh hmuk hmuka. "Min va han ngai mawl bawk ve mawle" tih bak ka sawi lo. 

"Ka ngai mawl che a ni lo. Inven i ngaihna lai tur ka hrilh che anih kha. Thil ngaikawi zel suh" a ti leh ta a."Nangmah zawk anih kha ngaikawi? Mipa ve si" ka tih laiin a tho thuta. Thingpui pawh in ta loin pawnah a chhuak ta daih. 

Ka nu lo haw hnuah pawh a lo lut leh ta miah lo va. "Chaw kan ei hnai tawh em? Mama hi a la tho lo nge? " a rawn ti luta. 

"Pawnah khan a awm lo mi? A chhuak kha a lo luh leh pawh ka hre lo' Tha takin ka ti a. " Awm pawh ka hre lo… Motor pawh a awm hleinem, dawrah a chho aniang. A tlanchhuak thawm i hre na nge?" min rawn ti bawrh bawrha. A tlanchhuak thawm reng reng ka hre lo. 

Hreh deuh takin ka phone a, ka rin loh tak chuan a la ve mai. "Chaw kan ei dawn asin, khawnge i awm? " ka ti a. "Dawrah.Nakinah ka rawn ei mai ang, kan buai deuh a. Ka rawn ei hman loh tak leh dawr thil eitur a tam" a rawn ti ve a. A dawr enkawltupa-in a ko ri ka hria a. Be zui tawh lo in ka off ta daih.

Ka nu hnenah kan inbiakna ka hrilh a,"anih chuan ei san ang. Vawiin chu i nu nen khawhar in lama len te kan tum a" a ti a. 

Chaweikham hnuah ka nu khawhar in a kal tur in a chhuaka, nimin lama suk tur ka dahkhawm hnur mai ka su tan ve bawk. Insuk pahin kan room ka tifel a, Rinawma thawmhnaw bawm ka la tihfel zawh loh ka tifel hmasa a. Insuk ka thuai tir vek hnuah ka tleuh leh a. Ka zar fel chuan chawhnu a ni tawh. Rinawma a lo haw ta miah lo va. An buai viau vang leh kan inkhak vanga lo haw peih lo niah ka ngaia. Ngaihven hurh ka tum lem lo. 

Thingpui ka in zawhah ka nu room ka tifel leha. Ama tawkah nu che fel pangngai tak a ni a. Chutihrualin ka nu pawh hian buaithlakna lai a nei ve a. Thil changkang, kan phak ve tawka tha pawh tihsak dawn ila a roomah bik hi chuan a duh zawng bik te tih angai thin. Nipui laiin kan in hi Tlakdenga awm a ni sia, fan vuah ve ang pawh ti ila a duh lo. "Ka lu a ti na' a ti tlat zela. Thawmhnaw dahna  tur fix in kan siamtir vek chungin thul a khum bulah a hung lui tlata. Hmanlai thil ngang a ni a, a ngaihlu ve bawka. Thir thingrem hlui un pui pui a hung lui tlat bawka. Buaithlak ve thin tak chu a ni. A roomah Bathroom inthiarna inkawp dahsak kan tum pawhin a duh lo a. Rinawma'n a tihluih tira. Chutichung chuan mikhual neih buai lai tak te hian common bathroom hman a lo chuh ve tlat chang a awm thin. 

Tlaiah Rinawma a rawn haw chauha, zing lama a thinrimna kha hre awm pawhin a awm leh tawh lo. Ka nu hnenah " Nu, ka pa thlan hi keimahni hian kan siam mai dawn mawni ka tia. Vawiin khan u Thai chanchin an sawia. Ngaihzawng nei ang lek lekin an sawi maia. Lungphun lam pawh a ngaihven vak lo niawm tak ania..A rei tawh bawk si" a ti a. "Nia,a rei ve tawh bawk alawm. Ngaihzawng pawh nei se a awm tawh lutuk. I ni khan i papuia lung tur tunlaia an uar ang kha lei an tum tiin ka va hre ve. Be chiang la" a ti a.Ka rin aiin lungphun lam an sawi hma. 

"Papuia lung phun an tum amaw? An va hmanhmawh ve" Rinawma pawn a ti ve a. "Vawiinah khawhar inah i ni nen kan thu duna, I puin a damlaia phun a duh aniang" a ti leh maia. Rinawma pa te lam hi chhungkaw hung pangngai tak anni a. Rinawma pain sazu meidawha a chhuahsan hnu khan Rinawma zawk hian tumah a pawh duh ta lo va. Chhungkaw hung tak e ti loin sawn an awm nawk maia. Rinawma papuia pawh hian nupui pahnih lai nei tawhin, a pahnihna zawk pawh hi fa pahnih an neih hnuah a then leh a. A boral ni thleng khan nupa ni si loa kawp ngheh a nei tluan parh.

A nu te lam zawk erawh an mahni buaipuitu te anni bawka tun thlengin an la inti thain duhsak pawh a duhsak. A pa te lam hi haw tlatin ngaihven duh ngai lo mah se kum te a lo tam ve zel hnu hi chuan an inbe tha ta viaua. A pa fa neih leh te pawh unau anga en duh ngai lo thin khan tunah chuan tanpui pawh a tanpui ta fo va. Zorama phei chuan ei tur te a rawn lam fo. Ka nu tan hian hmuh hrehawm annih ka hlau avangin ka lo tim deuh thin nangin amah ka nu ber hian tha takin a lo dawngsawng thei tlat thin. 

"Ka ni biak kher pawh ngai ka ti lo. U Thai zawk bia ila, phun a tum loh chuan Christmas hmain ka phun mai ang. Granite order mai a harsa lo va, mistiri in ni khatah a tung fel hman vek ang. Lungphunna prog tih vel pawh hman an duh leh nakinah an in lamah la hmang rawhse" a ti leh zung zung. Min rawn lem lo bawka engmah ka sawi ve lem lo. 

Christmas a hnai chho tawh bawk nen zantin zan awl nei lo in a chhuak a. Hla zir an tih loh leh Fatu ho komiti an neia. YMA lam leh Sport lam lo ni bawk nen, chhun lamah dawrah a kal nileng thak thak zel bawk si. Zanah nise a lo haw chuan kan lo muhil hman tawh thin a. Bawihtea pawn a pa awmna min zawt fo ta mai. 

"A pa, ngatinge? " a pa Tv bula thu en ran ran pahin a ti a. "Eng maw? " a pain tih chuan "Aw Lalpa tihnaah i kal dawn lo em ni? " a ti heu mai. Zantin a chhuah dawn hian "Aw Lalpa tihnaah ka kal dawn" a ti thina. Zanin a in a a awm ve a hmuh hian a mak a ti ve ni ngei tur a ni. 

"Inah i awm khat ve bawk a, a awm tho e" nui chungin ka ti a. "Ka ning teh ania. Kumtharah chuan KTP leader ka ni thei tawh dawn lo bawka, a hahdamthlak huai tawh ang chu" a ti a. "I vawihnih tawh maw? "ka ti he haw a. " Um,thlan nawn theih loh ka ni ve tawh. Ob a min la duh anih leh post dang a ni mai..over pawh ka hlat ta vak lo ve" a ti duaha. "Awi,a la hla ve tho alawm..A thuhrimah Over pawh ni la Pavalai lamin an tibuai tho ang che" ka ti ve a. "Tibuai tho maithei. Indaih loh hi a na ve bawka" tha tak chuan a ti ve mai bawk. 

A tum ang ngeiin Christmas hmain a pa lung an unauin an tung fela. U Thai lah chuan min rawn phone a, lawmthu a rawn sawi chiam maia. Hetianga lawmthu inhrilh vak mai hi ka zak deuh thina, lo chhan let dan tur a vang ka ti mai. 

Christmas a lo thlenga, hlim takin kan hmang a. Hmun khata han awmdun takah chuan kan nupa inkar langtham lo va khi deuh tlat pawh a fel leh ta thluam maia. Nupa hi chu kan thin han rimin han intihtauh khum ve bawk tak mah ila, kan inthlem lungawi veleh mai zela. Inngaihzawn laia "ka be awm bik lo" tia inbe lo va rei tak awm ang kha a lo ni thei tawh lo.Nupa danglamna leh makna tak pawh a ni awm e. 

"Naktukah C-i a lo kal dawn anih chu" zanriah kan ei laiin Rinawma'n a ti a. "Ngati leh si nge? A thulh emaw tia" ka ti vat. 

"A thulh zet nangin hun a nei leh si aniang. Papuia sun zan kha rawn tel hram a duh a" Rinawma'n a ti leh a. Ka nu nen an inbe zui mawlh mawlha, ka khamsan ta daih. 

"C-i lo kal thei tur chu a lo kal hma atangin ilo duh lo nghal tihna law? " room a lo luh pahin min rawn ti a. "Eng nge ka duh loh ngawt anga? " tih pahin ka hmaiah cream ka tat mawlh mawlha. 

"I awmdanah a lang reng alawm" a ti leh a. "I ngaihbel anih chu. Ka pawi a sawi hleinem, eng nge ka duh loh ngawt ang? " la ti leh maia. 

"I duh loh chhan chu kei aiin i hrechiang zawk ang chu. Keiin engtin nge ka hriat ang? " a ti leh zela. "I hriat loh chuan engmah a awm lo tih na nimai" ka ti deuh hmak. 

"I thin a rim leh ringawt alaw? Farnu nei ngai loin farnu ka nei thara, ka lawm tehreng nen" a ti leh bul bula. Ka thinin a tuar leh ta lo. 

"Oooo, a tha reng alawm mawle. Eng nge sawi teuh ngaia? Duh leh nakumah pawh hetah rawn awm nghe nghe se la. Ka nu pawh a chhawk zangkhai ang chu" ka ti ta nek mai. Tawng loin min en renga. A nui ta ringawt. 

"Zarzokimi,nu lo ve tak thin kha ka nupui a ni ta tih ka lo theihnghilh hman tep alawm mawle. I mize hlui lo lang chu lung a ti leng hle maia" a ti ta daih. Ka tum loh deuh dana min lo dawnsawn takah chuan han an zui chiam rem tawh hek lo. "I hmelchhia nih chu a. Insiam la, kal vat rawh. I tlai ange" ka ti ta ngawt. Min rawn kuaha. 

"I fel ve ngawt mai, I pasal che ho ve tak thin pawh hi miin mi pangngaia an hmuh theih nan i thawkrim si. I zarah mi neih ang kan nei ve chho thei te hi ka lawm ania" a ti a. Induat hliau hliau na hun nei khat tak kan ni bawka, ka lai deuh hu pek. 

Tlaiah C-i a lo thlenga. A rawn ri nghal bawrh bawrh mai. "Ka pa lo kal ve a tum deuh a, mahse khawvawt hian a ti thatchhe veka" a ti zat zata. "Lo kal ve se tha tur. Hmana ka hmuh bak kha ka hmu leh ta reng reng lo va" ka nuin a ti ve charh charh. 

"Anu, miin an be duh che" Phone min rawn pek pahin a ti a. Min lo call tu ka en chu u Davida a lo ni a. "Hello, tehhlawl che chuan.. " ka ti nghal thuai. "In khaw lam ka rawn pan dawn meka. I pi te in ka la tlanpel lo deuha. Min chah duh te i nei em? " a rawn ti dut duta. 

"Ehe, eng nge i rawn tih dawn? " ka ti vat. "Pu Hmuaka kha vawiinah Aizawl atangin an rawn phurchho a, an nu khan a chahthlak hma ngeiin rawn hmu teh min rawn ti deuh tlata"a rawn ti a. Pu Hmuaka hi hmanah Aizawl ka kal tumin U Davida motorah kan chuanthlak pui tawha. Kan khaw pa langsar tak thin leh an awmna veng kohhran upa min a ni a. An in leh Suppy Quarter kha a inhnaih bawka, U Davida kan khuaa a awm lai khan a chen tamna ber a ni. 

"Eng na nge a? Vengkar a hla bawk nen engmah pawh ka lo hre ve hleinem" ka ti leh thuai. Cancer anih thu leh Doctor te an beidawn vanga lo haw tir annih thu a sawia. A thin a lo ni kher nen ni tam daih tur a ni tawh lo tih te a rawn sawi luam. 

"Min chah duh chu i nei em? "a rawn ti leh a. " Neih pawh ka hre lo.. Tluang deuh khan lo kal la, I cham chhungin chaw i rawn ei dawn nia" ka ti ve a. Ei ngei a intiam ve bawk. 

Kan inbe zo chu Rinawma'n tu nge ka biak min lo zawt a. "U Davida nih kha. Pu Hmuaka a rawn tlawh dawn a. Pu Hmuaka hi a tha vak lo niawm tak ania" ka ti mawlh mawlha. 

"Eee, c-i.. I u Zari bialpa hlui a lo kal dawn anih chu" a ti kher. "Chuti maw? Ka van hmu chak ve" ani lah chuan phur fe hian a lo ti a. Rinawma melh ram ram chungin "ka bialpa hlui a ni lo bawk e a. Amah reu reuin a hria ange" ka ti bul hmaka. "Anih reng kha, tunah pawh a lo kal tur a la rawn hrilh vang vang duh che ania" a ti leh zela. "Ooo, thil ka chah duh takin a ti anih kha.. I ninawm mang e a" ka ti hlak hlaka. A nui mai mai duh lek. 

High school kan kal laia pawlsawm zir rual thin ho chaweikhawm an rawt avangin chawei khawm naa kal turin chawhnu lamah Bawihtea nen kan chhuaka, C- i a awm tho bawka, ka nu kalsan pawh ka hreh vak lo. Khawvawt vangin tunhnai te hi a che tha hleithei lo va, ka chhuahsan ngam thin lo. 

Reitak inhmu tawh lo te kan ni nawk bawka kan hlim tlang ngang mai. High school kan kal laia kan thil tih thin thing tak takte kan sawichhuaka, kan nui tlawrh tlawrh mai. 

"Zari leh Sir Thanga kha an inhmeh ve thei ngawt mai. Study camp lai te khan chhangthawp a chang lian thei bik lutuk kha ka la hre reng mai. Zari, zahmawh sawiin i nui ve duh tawh em? " Kima'n min ti a. "Ka sawi hrat ber tawh zawk ang chu mawle" ka ti chu an nui ham hama. "Tinge khang hunlai khan i nuih ve duh ngai miah lo va. Nula thianghlim ang hrim khan i awm vel a" min ti leh zuah zuaha. "Ka inno em a, ka nuih a za pha lo alawm" ka tih takah chuan min ei lo ngang mai. 

Dar 8 velah Kima'n hmeichhe ho min thlah kuala, kan kawt kan thlen chuan u Davida Motor a lo awm a. Kima te ho leng lut tura ka sawm chuan "nidangah nimai rawhse. Kan la inthlahkual dawn si" an ti a. An tlanliam hnuah inchhungah ka lut a, ka nu leh C-i leh u Davida an lo thu a. Bawihtea ka pawm lut chu min lo en a.

"I lo leng alaw? Engtikah nge ilo thlen chhoh a? " ka ti nghal a. "Nizanah ka rawn thlenga. Vawiinah ka rawn leng thla ang ka ti nangin hun ka nei leh lo va" a lo ti ve thuai. "Ka va mut lawk ang. A tal hah deuha,Motorah a rawn muthlu a" ka ti a. Bawihtea mut turin roomah ka luhsana. Inthlak chuang loin ka chhuak leh a, u Davida hnenah a awm chin tur te ka zawta, Pu Hmuaka awmdan a zir anih thu leh kumthar erawh Aizawla hman ngei a beisei thu a sawi a. "Rinai takin a nupui fanau ten min lo ngaipawimawha, ka awm lai khan ka inpui ber anga ka neih  leh duh duha ka talna a ni bawka, keipawn ka thisen zawmpui sun tur ang deuh mai hian ka inngai ve tho mai" a ti a. Ka nu leh C-i ka hmelhriattir leh hnuhnawha. 

"In pa lo awm se tha tur ania. Hmuh a khat vei nen, naktuk tlai chu harsatna dang a awm loh chuan Badminton khel turin ka lo nghak dawn ania" a ti a. "Aw le, ka lo hrilh ang. A khelhpui chak viau ang che" ka ti ve bawk. Thingpuite kan in hnuah rei awm tawh loin a haw a tuma, ka nuin naktuk tlaia zanriah ei turin a lo sawm a. "In in a chaw vawi khat tal ei chu ka tum nangin ka inthlahrung leh riau mai. Mahni insawm te pawh ka ang lek lek maia" nui chunga a tih chuan ka nuin "Mama nen inkhelh dun intum tho phei chuan a remchang lehzel alawm. Kan lo ring dawn che ania aw" a ti ve tlat. 

Ka harh in Rinawma a lo la mu lo va, ka phone a sana ka en chuan dar 12 a ri lek lek tawh. A lo la haw lo nge mut hnuah a tho leh ka hre lo va. Ka inbengkan chuan kan room kawngka khar phui loh atanga pawn lam eng lo lut chu ka va hmu a. Inkhel en tur a awm anih ka ring a. Kan chawhmeh a al deuh bawka mut hma atang khan ka tuihal a reh hleithei lo. 

Kan room kawngkhar ka hawn chuan sitting room Tv awmna zawka C-i lo muhil ka va hmu a, Rinawma choka lam atangin tui bottle kengin a lo phei ve chiah thung.

"Ka Tv en a ring deuh em ni? Tinge i rawn thawh a? " a lo ti nghala. 

"Aih, ring lo.. Ka tui a hal lutuka, I lo la haw lo emaw ka ti bawka" Choka lam pan pahin ka ti a. "Haw daih tawh e. Inkhel ka en leh mawle. A tawp tep. C-i lah hi a pawlte inkhel ti ve si a muthlu leh mai mai a" a ti nuah nuaha. C-i a kaitho thawm ka hre zuia. Tui ka in hnuah ka mutsan leh maia. Ni eng emaw zat keimaha rinhlelhna awm bo tawh kha thawklehkhatah rinhlelhna ka nei leh ta thut maia. Ka tho leh tham thama, mahse khum atanga ka chhuk hmain Tv a off tih ka hriat takah chuan ka mu leh nghal vata. Reiloteah ani pawh Roomah a rawn lut zui ve mai bawk. 

Zingah Bawihtea nen ka nu te inah kan kala, Bawihtea leh a u te ho inkawm laiin ka pi roomah ka va luta. "Pi, eng nge i an? " ka ti lut a.. "Engmah ka an pawh ka hre lo. Ka na thum ringawt mai. Min han kaitho teh" a lo ti nghala. Room hi chhuahsan tawh mang lo mah se a beng leh mit a la tha a, Bible pawh nitin a la chhiar thin. 

"Nizan chu ka mumangah i pu ka lo hmu nasa khawpa, ka lo zui zel laiin i pa hian min lo ko a, chuti ni lo se ka zui hlen mai awm asin" a ti leh niah niaha. "Awi, I ti ho em maia. I tel loin kan awm thei nang" ka ti vat. 

"In thei awm em mai. Ka hnawk tawh zawk anih hi, mahni pawh ka inbuaipui hleithei tawh si lo va. A buaithlak em mai" a ti leh a. "I birthday present turin eng nge i duh ber? Ka leisak ang che" ka ti ta daih. 

"Engmah perezen ka ngai lo. Mamawh pawh ka nei lo" a ti a. "I pa khan a Nutei te kha a be ta em va zawt teh. An lo kal thei dawn em? " a tih chuan "bia ang.. Ka pi Nutei chu a upa ve tawh sia, a lo kal peih dawn mawni le? " ka ti a. "Ooo, va zawt hle hle mai la. Ngahnge maw i nu ang maia min hnial thin le? " a tih chuan ka nuih a za ngang mai. 

Kumthar hlim January thlaah ka pain ka pi Piancham vawi 90 na lawmsak a tum a. Kan chhungte ho pawh a chah kim hlawm viau a. Lo kal ngei pawh an tum hlawm. "I pa hi hau ve teh, Maremruati tan pawh hian a ninawm zozai ang. Tun hma zawnga pa tawngtam lo deuh thin kha a phunchiar leh lutuka" Ka nuin a ti hlak hlaka. "Nangman hau mai la, ka hauh te chu angai ho awm em maia" ka tihsana. 

"Hau mai rawh, kei aiin a ngaipawimawh daih zawk che. A fanu chuam alawm i nih.. I sawi apiang pek che tumin a buaia, a makpa pawh a siam lian ut ut duh alawm" a ti leh hlawih hlawiha.

"Awi, I timak em maia. Mi te reu reuin an hria ange" ka ti hlar mai. "An hre sa reng alawm. Mi zawng zawngin Zari aneih vang a dingchhuak an ti luai luai alawm. Ka sawi kher angai hleinem" a ti leh tlata. "Mi pawn lo ti se i sawi nen khan a rik dan a inang hleinem mawle. A thuhrimah keimah vanga hetianga awm pawh a ni tak tak hleinem. Aman a tum em a, a hlawhtling anih hi. Mi hi an mak em maia, an thil han sawi duhdan reng mai a dik lo" ka ti hmak hmaka. 

Kan in lam pana ka kal laiin ka nu thilsawi ka ngaihtuah leta, Rinawma dawr siamna atana ka loan puk kha a tlem hauh lo. Anihna takah chuan a dawr a len fe hnuah pawh loan min rulhpui lo va. Kum hnih kalta khan ka rulh bang zawng a vawmhlum ta a. Miin keimah vanga dawr nei theia, hlawhtling chho ve ta anga an sawi pawh dik lohna a awm bik lo va, chutihrualin nupa kan ni a, engkim intawm kan nih angin ka zara dawr nei thei tih ang zawnga sawi ka duh lo va, ngaihtuah pawh ka duh hek lo.

"Nizanah u Davida a lo lenga. Vawiin tlaiah Badminton khel dun ang a ti che ania. Ka nuin zanriah ei tur in a sawm bawka" Thingpui a in laiin ka ti a. "Ka hman ang ka ring. A number min lo pe teh, ka lo bia ang" tha takin a ti ve maia. A number ka thawna.. "U Zari x chu a chhe lo fua fua khawp mai. Officer a ni zui bawk sia, ka kherh nghek mai dawn mawni" C-in nui awr awr pahin a lo ti ve a. 

"I nasa em maia" Rinawma'n a ti deuh hmuka. C-i a nui vak vak nangin ka nuih a za ve miah lo. Kei hi ka dik lo leh tan tih ka chiang ta viau. 

Nilengin rilru nuam lo runin ka awm a. Zotei biak ka tum that that nangin ka be leh duh ta rih lo va. Thangzeli phei chu engmah ka hrilh lo. Nu leh nula chu Inkawm a lo har tawha, ani pawh a vahte buaiin a buaia, Za dawr a siam ve bawk nen, buai ve thei tak a ni. Zotei pawh be tehreng ta ila engmah rinhlelh tur hmuh ka nei bawk si lo nen sawi dan tur ka hre lo a ni bera. Bakah, mahni pasal leh a unaunu han rinhlelh tlat hi zahah ka la deuh bawk. 

An inkhelh zawhah Rinawma rualin u Davida a rawn chhuk ve nghala. 

"Duh ai chuan court kha a tawt hret anih kha. Hall sak that hunah chuan court puitling ngeia siam theih a ni anga, a nuam dawn khawp mai" U Davida'n a ti a. "Nia, Hall sak laia buaipuitu te khan hmathlir an nei tha viau nangin a lo te hreta. Adang awm hek lo le, kan khel ve reng tho ania" Rinawma'n a ti ve bawka. Ka nuin "in hahdam deuh tawh chuan chhung inkhawmna nei ila, kan ei mai dawn nia" a lo ti a. 

Nu leh nupui han nih a, rinrawl tak tak nih ve bawk takah chuan rinai takin eisiam ka lo tuichilh daih maia. Tuichilh na na na chuan siam pawh ka siam thiam ve pangngai ta viau reng a. "In eirawngbawltu chu a thiam hle maia, Mizo chaw siamna bik hotel changkang si, mizo rilrem zawng tak ni bawk si siam se la chuan ka tlawh zing ngawt ang" U Davida'n a ti fiamthu hluta, "A zaidam lutuk lo nangin nupui hi ka nei tha teh ania" Rinawma'n a ti ve hluta. Keilah ka uan a chhuaka, " Min bum thlu chiang ve em a ni " ka lo ti ve a. Kan nui dar dar mai. 

Dar 7 velah u Davida an rawn phone a. Pu Hmuaka chahthlak thu an rawn hrilh thut mai. 

"Ka'n insiam lawk ange. Min lo nghak rawh, kan chho dun dawn nia" Rinawma'n a ti a. "Mama, ka lo kal ve dawn mi? " C-in a lo ti vat. "Ka tlaivar nghal daih dawn asin. Khua a vawt bawk si, lo kal ve lo mai rawh" Rinawma'n ti mah se C-in "inah engmah tihtur a awm chuang lo va. Ka lo kal ve ang. Ka lo zin laiin mithi inah ka tlaivar ve tawh tih ve reng reng atan pawh a tha" a ti leh ta tlat.

Bawihtea muthilh hnuah pawh ka muhil ve thei ta reng reng lo. Rinawma'n msg min rawn thawna. "Kawngka lo kalh lo mai rawh. C-i hi i u rualin emaw Rinpuia rualin ka rawn thawn thla ang. Mi an thanhnema, tlaivar ve kher angai lo vang" a rawn ti a. Ka u leh Rinpuia te nen an awm ho ni a ka rin takah chuan ka hah hluah hluah pawh a zia ta duak. 

Rinawma rawn mu in thawm a dim viau nangin ka harh ta tho a. Khua a var tawh emaw ka tih kha a lo la var lo. "A vawt lutuka, ka tlaivar peih ta ngang lo. Ka hnar a ping bawk si" min rawn kuah pahin a ti a. 

"Zu i in elaw? " ka ti ve thung.

"A awm ang lo em maia. I tho a zawk emawni? " nui chung hian a ti a. "Zu rim i nam tlatin ka hria" ka ti leh chu min kuahna phelhin a kil lamah a tawlhpheia. 

"I duh duh sawi lo khan muhil teh" a ti hmuka. Lehlam hawiin a mu zui nghal hmak bawk. 

Ka muhil ta reng reng lo. Khawvar veleh ka tho a, Bawihtea a la thawh mai ka ring lo bawka exer la tur in ka chhuak ta daih. Kan veng chhung ni tho si, mel chanve vela kan veng nen inhlat a awm a. Kan inkar awlah hian in a awm lo va, phei vek niin kawng pawh a nuam a. Thlasik lai erawh chuan ni a hmuh har avangin a vawt thei em em maia, Damphei tiin mi zawng zawngin kan sawi thin. 

Dampheiah muangchangin ka kal phei hnak hnaka. A thlang lama tuikhur kawng kawi ngiai lang chu ka thlir leh thina. Naupanlaia tui kan chawina thin niin bel ngei mai kan han chhipchhuana, kawngchho ulh bawk si nen kawngpui kan chhuah ve leh kan chawla,kan tuichawi a tam loh thin nen kan han inphai leh a. Tlai lamah phei chuan feh hawin min insak tum a a bawk thin nen, a fawk buak tum leh chhipchhuan fuh loh chang phei chuan in kan thlen tlem thei em em maia. Tuikhur chung neia an siam hnuah phei chuan tuikhur chhak atanga a chung vawm hi tih ngei ngei tur ah kan ngai hlawm. 

"Zar, tui chawi ila. No-ah chaw lo keng bawk la aw, tuikhur kawngah kan ei dawn nia" Zotei'n a ti ngei zela. Kan tuichawi te kha puitlingin vawi hnih an chawi chhungin vawikhat bak kan chawi hman ngai lo. 

In a ka let leh in Bawihtea leh ka nu an lo tho tawha. "Khawiah nge i kal? " Bawihtea'n min lo ti nghal vat. Ka kalna ka hrilh a, thingpui an in tawh em tih ka zawh chuan ka nuin an thawh chauh thuin min chhanga. Thingpui ka chhuang nghala. Eirawngbawl zui tumin geyser ka on bawk. 

"Kumin chu a vawt ngei mai. Ruh a na tlawk tlawk mai chu anih hi maw" Ka nuin pawn lam en chungin a ti chat chata. "Nia, a vawt ngawt mai. Kum dangah tui lum ka hman ngai loh nen kumin chu inbual nan tuilum ka ti ve sek tawh" ka ti ve a. Thingpui ka siamsaka, Bawihtea'n Tv en paha in a duh avangin Tv roomah Thingpui leh a hmeh chhawpsakin ka kalsana. Ka nu nen chokaah dawhkan kilin kan in duna. "Vawiin chu nangmah i han kal mai dawn em ni? Duh leh i ral nghal mai anga" a tih chuan "a pawi hleinem. Ka han kal anga, ka ral nghal dawn nia. Vengkar hla nen kal nawn leh a buaithlak mai mai" ka ti ve a. 

Chawei dawn thlengin Rinawma leh C-i an la tho lo va, kaihthawh pawh ka tum lo. Ka nu leh Bawihtea nen kan pathumin chaw kan ei a. Kan eikhamah ka nu ka phone a, mithi in lama kal a tum leh tum loh ka zawh chuan "I pa nen kan kal ang. I kal ve dawn em ni? " a rawn ti a. "Aw, keimah ka kal ang. In rualin ka lo kal ve ang aw. Nizanah Rinawma a tlaivara. A hritlang deuh bawk nen ka kaitho duh lo va" ka ti nghal mawlh mawlh. 

Ka insiam laiin Rinawma a rawn tho a. Choka lama C-i tawngri ka hre thei a. 

"Ka nu ten min nghak tawha, C-i a awm tho bawka, chaw chu lo ei dun mai ru. Midang chuan kan ei tawh. Bawihtea pawh ka nu te inah ka dah phei mai ang. Hetah a pi a bawhbuai lutuk ang" ka ti nghal a. Min chhang lo in Bathroomah a luta, a lo chhuah leh hma ngei a kal tumin ka insiam sawk sawka, ka kalsan ta nal nal. 

Vui zawh hnuah u Davida nen kan inhmu a.. Zan lamah an tlaivar bawk nen a hmel a pawr ve fap mai. "Naktuk chawhnu lamah ka haw ang" a ti a. A haw hmaa kan inhmuh leh ka rin tawh loh avangin ka mangtha a. 

Ka pa te ruala haw tawh loin Thangzeli dawrah te ka chawl thlaa, customer a lo nei a, kal leh mai ka tum chuan a phal tlat lo. 

"La kal lo vang, len chhuah i harsat ropui si. Keilah phuar ang hlauh ka ni bawka. Inhmuha titi dun pawh a chakawm alawm' a ti deuh tlat. 

Dar 3 dawnah ka hawsan ta a. Ka pa te dawra ka luh hma in kan dawrah ka luta, Rinawma leh C-in insi lek leka phone an lo en dun ka va hmu hmasa ber. 

"U Zar, I haw tawh dawn mi? " Dawra thawk, Zotea'n a lo ti thuaia. Rinawma leh C-i phawk taka lo hawi leh an inthuthlat san nghal chu ka hmuh hmaih hauh lo. 

"Aw, haw dawn.. Ka rawn lut kawi zawk mai mai mawle" ka ti let a. Rinawma'n " I pa te kha an haw tawhin ka va hre ve. Ka zuk thlah dawn che nia. Thingpui i in duh em? " Rawn kal hnaih pahin a ti a. Ka bula a rawn din chuan min si ang tih hlau deuh mai hian ka tawlhsawn a. 

"Duh lo ve. Thangzeli dawrah thil ka rawn ei tawh a. Ka zuk haw ange. Ken haw tur te a awm em? " Chhungril tawt up up in ka ti zangkhai vah lawi. 

"Awm lo vang. C-i,chahbi khatah khan a awm em? Rawn vawmphei teh" a ti zuia. 

"Min thlah lo mai rawh. Chhuah takah chuan penkawi duhna ka la nei a' ka ti thuai. Ka pen kawina tur min zawh lai takin Siampuii lo kal thla mek ka va hmu thuta, ani hi middle school ka kal laia ka kawm thin niin Aizawl lamah hna vangin a awm a. Kan inhmu ngai meuh lo. 

"Saw, Siampuii te inah sawn mawle. Ka nghak tih a theihnghilh leh tawh aniang. Ka va um ange" ka ti sawk sawka. A tawng leh pawh nghak loin ka chhuak ta daih. 

Siampuii ka um phak thuaia. Rinawma bulah khan chhuanlam atana hmang mai ka ni a, min han hmu chu a ri nghal hlut maia. An in a lutkawi turin min sawm a. Keipawn ka hnial lo. 

A u fate a nuin a lo awm khawma, an lo ri laih laih maia. An in hi kan naupanlai ami tho kha la niin tlem an extend tih loh chu ala ngai veka. Kan khuaah chuan in upa pawl tak niin ka ring. Tukverh bulah kan thu duna, "kan theihai lawh ruk ber kha a thi tawh em? " ka ti a. "Thi nang, tun thlengin a la rah tha thei rap mai. Awi, kha ni zet kha chu tiraw? Pu thanga vanga kan hah zia kha" Nui vak vak chungin a ti a. "Tuikawra i tlak dan mak deuh kha ka la mitthla thei vek.. I va han chhe tak" ka ti ve bawka. Kan nui dun ta vak vak. 

Kumhlui thlah zan a lo thleng ta a. Rinawma Pa u hi sun tur zingah a tel ve avangin Rinawma nau te chhungkua an rawn inkhawm phei a. Ka nu leh Naupang ho inah kan daha, keini nupa leh Hriat-i te nupa nen C-i te ho chhungkaw thutna tur an lo siamah kan thu thapa. Chhungkaw hung angreng tak kan ni bawka, kan thahnem viau. Prog a chhawng angreng bawka inkhawm pawh kan inkhawm rei angreng. 

Kumdang ang bawkin kan veng thlalai rual an rawn pungkhawma, hetiang hian kumhlui thlah zanah chuan kan inah hian thalai rual an rawn lengkhawm thin a. Eitur pawh kan siam hnem thei viau. Hmeichhia an tel nawk thin avangin tihtur tul apiangah min pui thina, an thahnem thei viau nangin rui buai chi an awm ngai lo va. Chetna turah min pui thin bawk nen an buaipuiawm vak lo. 

Hlim takin ri dar dar mah ila ka chhungrilah ka pik ru tlat renga. Mithi lumen zana Rinawma zu rim rawn nam ni a ka hriat kha ka hresual niin ka la ngai ve lo va. Sawichhuak nawn tawh lo mah ila ka pai ta reng. Zu a in ni a ka hriat vang a ka tawt em em laiin C-i nen an awmdan lah ka mit a kham ngawih ngawih mai bawk. Uchuak tak leh rinhlelh kai ngawih ngawih tura awm chu anni hauh lo va. Mahse, eng emaw changa fiamthu anga lang si a C-in han bawh deuh uaih uaih tum te a nei thina. Rinawma lahin "I va han a tak" tih bakin a khak ngai bawk si lo. 

Rilru ipik tun chungin kumthar vuakvet pawh ka hmang liam ve ta a. C-i pawh a haw tawh a. Rinawma awmdan C-i awm leh awm lohah engmah danglam a awm hran lo va. Mahse, Game erawh a khel leh nasa viau tawh. Ka pi piancham lawmna hun kan hman avangin school tan hunah pawh ka phei nghal mai thei lo va. Chhungkaw inhmuhkhawm na ni pahfawma ka pain a tih anih avangin kan chhungten an ngaipawimawha, kal pawh an rawn kal tha.. Nidang ang bawkin Rinawma pawh a che tha leh viaua. Kan chhungte ho fak a hlawh lehpek. 

Naktuk hi ka hnathawhna lama kan phei hun tur a ni tawha. Ka nu te inah chaw kan ei a. Kan haw veleh ka thil pack ho hmaih palh ka neih takin tiin ka en fel a. Khuma Bawihtea thil vel ka dah ho ka rem that mawlh mawlh laiin Rinawma phone khuma a kalsan a rawn eng a. En tumna pawh nei loin ka thiltihlai ka tihsan leh maia. A ri zawka, a tawp lehnghala. Chutiang chuan vawi 3 ngawt a awm takah chuan tu nge anih hriat tumin ka en ta a. A lock ka hawn dawna, a lo thlak daih chu niin. Notifications bar a whatsapp msg awm chu a en theih tho takin tiin ka pawtthlaa.. 

"Mam, ka ngai lutuk che. Mut pawh ka muhil tha thei lo" tih hi C-in a rawn thawn chu niin.. Ka lungphu a rang nghal zawih zawih maia. Lo miss call sektu pawh amah C-i bawk a lo ni lehzel. 

Thinrim leh rilru na bawk siin ka khur titiha. "Ka phone ka kalsan em? " Tih paha Rinawma lo lut chu amah en loin khum mawng lamah phone ka thehpheia. 

"Awm ti ve mai la, chhuatah a tla tlang mai tur asin" a phone lak pahin a ti a. 

"Duh leh chhe vek ang hmiang" tih mai ka chak viau nangin ka insum a.. 

"C-i khan a ngai hle che anih hmel. A rawn miss call zing khawp mai" ka ti chang fak.

"Chuti law? Eng nge maw rawn sawi a tum le? " a phone en chungin a ti a. "Angai che aniang chu" ka ti leh hmaka. "Eng nge a? I va thinrim ve" a ti hu. Ka tho that a. Min rawn hnaih rualin "min si suh. Ka ten che" ka ti chang bawng mai. 

"Eng a? Enge min ten ngawt a? " a ti a, ka kalsawn tur ka banrekah a rawn mana. Na takin ka thingthla sawk. 

"Min si miah suh" ka ti hrawk. "Enge maw i hriat le? Enge dik lo? " a ti ta hmuk. 

"I phone a msg kha en la i zawhna chhanna i hmu ang. Ka ten hluah hluah che ania" ka ti tlang ta pawp. A phone a en a.. 

"Eng chu nge ka tenawmna ni a? C-in min ngaih thu a sawi vang hian maw? " awki ngeiawm deuh mai hian a ti a. Ka chhang buai peih lo. 

"I mak ngawt mai, I rilru hi a dik hlawl lo anih hi. Pasal leh a farnu han rinhlelh mai te chu a.. Eng hi nge maw i ngaihtuah le? I rilru a tenawm em maia" amah bawkin a ti leh a. Chhan ka tum lai takin Bawihtea a rawn luh tak avangin ka ngawi ta reng.