JEREMY (completed)

 JEREMY : Maengi ralte

"enge i ngaihtuah veng veng" ti ri ka hriat chuan min be tu enin ka hawichhuaka, ka naupanlai atanga ka kawm ngeih leh ka boss ni tel thin,tuna tlangval sang tha zet ni ta,a pi hnar a chhun vanga mizo hnar ni awm lo khawpa sang vah nei,hmeltha tih chi tur ni lo, hmeichhia chauh ni lo,a mipat pui te pawn pa an tih thin, tun thleng a ka thiantha ber nita zel chu ka bulah a lo ding runa, eng nge a ngaihtuah hriatthiam har zet hian min lo en reng.

Mizorama mimal sumdawnna lian leh changtlung tak maiah kan thawk dun meka,thawk dun mah ila  kan dinhmun  adanglam thung,keichu an hnathawk zinga pakhat ve mai ka nih laiin ,ani hi chu an  fapa mal leh a pa-in hna a achawlhsan hun a kan boss tur a ni ve thung.. Kan dinhmun hi inthlau viau mah se kan naupanlai ang reng khan kan la inkawmin kan inkar a tha a, kan inthian thatna vawnhim kawngah hian kei ai mahin a ni hi a pawimawh zawk bawk.

A mitmeia zawhna min zawh leh takah chuan rang fe hian,"kan naupanlaia kan thil tih thin ka ngaihtuah” Ka ti a. .”A  va han ho mai mai,khatianga en ngai en chunga thil i ngaihtuah vak vak thin vang khan alawm pasal pawh i hmuh loh" nui vur vur chungin a ti a,hepa hi chu a duh naah a fel thiamin a duh loh na lamah pawh asual thiam ve viau zel bawka. Engvangin nge hmeichhe ho hian an duh viau zel tiin ka ngaihtuah fo a,an sum neih lutuk vang hi anih ka ring ber."i la haw dawn lo mi a?" ati leh hmuk a,tawngkam no lo chi a ni bawka,awki dam taka min biak a nei khat viau.

“Haw dawn e, ka lo kal nghal.. Min thlah dawn em?” Tichungin ka bag la ka a,min chhang lo va a kal nghal chu ka um ve a, bawp a nei sei bawka,a kal chak viau.

Amah hi nelawm lutuk lo mah se a mizia ka hre chiang tawkin ka hre ve a,ka ngaina em em a ni ber. A nuna harsatna a neih ve chang leh a hlimna te  ka hriatsak vek tih theih a ni a, ani pawn  ka thuruk zawng zawng ti ila  thil pakhat tih chauh lo chu a hre vek bawk. An neihin a tlin bakah amah hi hmeichhe duh chi a lo ni ve bawk nen a lerh em em a,tumah a duh rei tak tak lo aniang chu,rei a kawp hmain a then zung zung maia. A awmdan vangin ka hau nasa thei hle nachungin amah duh tu an lo awm ve zel si nen lerh kual hi a sim thei lo chu a ni e..

Nitin hun angai rengin ka hmang chho zela,”Tunlai chu jeremy hi azia athlak mange” ti a ka ngaihtuah lai takin ka thawhpui Sangtei’n min rawn kheuh a,hnathawk paha lo inngaihtuah ngur ngur ka nih avangin ka phu zawk mai. Nui chunga amah ka enrual chuan ani chu kawngka lam hawiin a bu nghal zeuh a,ka hawiphei nghal thuai. Ka tum loh taka Jeremy leh zaithiam larthar chhe lo zet mai Angela te lo lut lai chu ka va hmu ta a,maktak maiin ka rilru a na deuh zawk mai. Rang fe hian ka hawisawn tak nangin ka mitsirin An rawn phei dun zel chu ka hmu reng, ka  dawhkan bulah tak  a dinpui zui, “May,heihi Angela ania,ka thian thar anih hi.. Zaithiam bakah chhe lo tel ang kha,nangpon i ngaina ngawt ang"a ti nghal duaha. Ka hming hi Marilyn ni mah se ani hi chuan MAY tiin min ko thin a,nidang ang lo taka a thian thar min hmelhriattir ruala a hriat lai a fak hi mak ka ti viau nangin nui chungin ka kut pharchhuak in kan inchibai ta thuai. Min kalsan hnuah ka hna thawh zawm leh mai ka tum nangin ka ti hleithei lo. Ngaihzawng thlak kual sek thin mah se a ngaihzawng te hi a lak serious loh thin vangin tumah ka nat phah ngai lo. Tun tum erawh ka hmuh rual khan ka na ru tlat.

Zan ah ka chauh deuh vangin zanriah ei kham veleh room lamah ka mu a,inkhawm loh zan pawhin thlai in hlazir leh committee bakah hnatlang tih vel neuh neuh kan neih thin vangin zan awl hi ka nei meuh lo a,zanin chu hunawl ka nei bawk a mu hma teh ang tiin khum ka pan vat mai.,mahse rei pawh ka mut hmaa ka room kawngka rawn kik ri ah chuan ka harh leh thuaia,peihlo zet chung a kawngka ka va  hawng chu Jeremy a lo ni a,  nuisang chung hian min lo en a,a mood a that hmel rem rem khawp maia,mak deuhin mut la chhuak,ti deuh bur si kha amah ka hmuh rualin ka harh nghal kawl maia,keihi ka dik lo ta tlat,nidang zawng zawng pawn ka hmu reng renga, ka hmuh vanga ka lawm teh hurh pawh ka hre ngai si lo,tuna ka lawm ta riau hi nuam lo ka ti leh hnuhnawh a,ka lai deuh hu maiin ka hria.

"enge?"chhungrila ka phur ve ngawtna thupin ka ti bak hlak.

"ka lo lut duh" a ti ve tawp.”ti khan sawi mai rawh.. lo luh kher..” ka tih laiin,

Kawngka a rawn nem a,ka sawi engahmah ngai lo tih hriat tak hian a lo lut zui a,huat en ah pawh ka en bik chuang lo.  Hrtiang hi chu a chet fo dan a ni miau atin ni,naupanlai atanga inkawm kan nih avangin ka chhungte pawh hian an en hrang lova,fapa ang mai a an en niin,ka room a kan inkawm thinpoh hi an sawisel ngai lo..side table a a thu zui nghal  chu bak hlakin “tah khan thu ziah suh,i lian ropui si,achhiat tep toh kha” ka tizui hlak hlak a,ngaipoimawh lo zet hian "anih chuan i bula muchungin kan inkawm mai dawn mi" a ti duh lek. “I beisei thlawn nih chu, i sawitur chu sawi vat la kal teh,ka mut a chhuak teh  ania” ka ti leh hmaka,chik zet a min en in chungin “nang hi i damlo tak tak tihna mi? Rilru i ti nuam lo riau,tunlai chu thih thut thut a tam ania” a ti  leh a,ka damthu leh ka chauh deuh thu ka sawi chuan a thaw huai tih ka hmu thei.

'I ngaihdan hriat ka duh a,Angela-i kha enge i hmuh dan? Nidang ang lo takin tun tum chu ka  serious ve tak tak dawn tlat” thutak deuh mai hian a ti a..”Ka hre thiam rih lo,tuna ka hmuh theih chinah chuan ahmeltha a, azaithiam a,azeibawk.. in inhmeh ka ti viau,mahse serious viau tur chuan  ila hrechiang lo deuh lo maw?” Tha takin ka ti a. Ka ngaihdan tlang takin sawi mah ila ka sawilai reng khan tawng harsa ka ti a,ka hmel danglam deuh chu a lo hmu vat chu niin,min ngaihtuah hmel zeta min en chung hian'i chau tak tak anih kha,muhil la,naktukah hna ilo kalpeih chuan kan pathumin lunch kan nei ho anga,awm ho chuan a mizia pawh tlem a zawng i hre thei ang. Tah chuan i  hmuh dan tak tak min hrilh dawnnia,mangtha le” tiin min chhuahsan zui ta a.. Room kawngkhar ka kalh hnuah khumah ka thu hnawk mai,ka tawt up up a,ka mittui a rawn ta zawih zawih chu hruk hul pawh ka tum peih lo,tunah chuan ka inhrechiang ta e,ngaihzawng a neih kual vanga hau hau thin ni mah ila tun tuma Angela-i vanga  ka rilru nuamlo leh na hi chu nidang ang a ni tawh lo. Ani hi thian ang ringawt ni loin ka lo en reng tawh a lo ni. Mahse,a laka ka rilru put dan hi  ka tilang ngai tur a ni lo,keimah ngeiin vawi tamtak ngaihzawng nei kual mai mai lova hmeichhe tha tak kawp nghet a,nupui neitur in ka hril thin anih kha. Nulat tlangval na lam hawia a laka rilru ka pu ta hi a hre  tur  a ni lo,lo hria pawh ni tehreng se a ngaipawimawh lo emaw min hlatsan nan a hmang emaw a ni anga,ka thian hi ka la hnaih zel duh anih chuan engmah ka tilang tur a ni lo.

Thla nga lai an in zui ve hnu-ah inneih an tum ta nge nge a,kha thla nga kal ta kha ka nuna ka hun tawn hrehawm ber niin ka hre hial mai,nitin deuhthaw office ah Angela-i  a lo kal a,Jeremy  poh ahlim em em tih ka hria. Zaithiam lar leh sumdawnf hausa tak fapa,nakina engkim la rochuntu tur in kawp anni bawk a, lar vet vet  tak an ni. Jeremy thian tha ber ka nih angin Angela-in ka hnena tangin JEREMY thil  ngainat zawng leh rawng duhzawng,eitur ngainat te hriat tumin zawhna min zawt awl lova,tha takin hrilh vek thin mah ila rilru na tak chunga ka thlir vawng vawng hun kha a tam lutuk. Jeremy pawn min la ngaihsak hle nachungin ahma ang kha chu a ni  ta lo. Ka  tan hun a nei tlem tial tiala, tunah chuan kan inhmuh pawn office-ah a ni ta mai,kan in a lo kal khat tial tiala,phone pawn min be ta mang lo. Hmeichhe tha tak leh a duh tak a tawng hi lawmpuitur ka nih laiin ka thei si lo anih hi maw..

Jeremy te inneih hun tur pawh karleh mai a ni ta,tlaikhat chu ka office bang keimah chauha ka kal hnak hnak laiin ka hming a min ko ri ka hria a, ka’n hawiphei chu Jeremy a lo ni a,'lo kal rawh,lo len ka tum a' Motor atanga rawn dak chunga a tih  chuan lawmtakin ka thu lut ve nghal thuai. Ka thu lut chiah chu zu rim-in ka hnar a verg zak mai,rum deuh a melh pah hian 'engatinge chhun chhunah  zu i in a?,inneih pawh karleh mai a ni tawha,accident te i hlau lo mi? Tul lo lutuk mai” ka ti nghal mawlh mawlh a,min rawn en chu min melh dan a mak deuh viau, a thaw deuh huaia” Accident maw? Hlau nang lo,bung rem rum mah ila pawi ka ti lo,mahse i tel ve dawn loh chuan ka duh chuang lo”  a ti duah. A awmdan nidang a an loh em avangin ka hlauthawng thut mai. Tlan ta mai lo chuan a dakchhuak vang vang a,”kal tawh la” ka  tichu harh thut nimaiawm hian athu ngil zawt a,muangchangin a tlan zui ta a,min rawn melh leh chuan a hmaa amitmeng danglam ka hmuh kha a lo bo leh tawh.

“Nang hi 'engtik nge pasal i neih ve ang,i tar mai dawn ania' a tih chuan “ka hre lo,ka nei tep” ka ti ve ngawt peka,engtin emaw tak a  rilru tihnat sak ka duh thut a,mahae  ngaizawng ka neih vanga a rilru na tura ka dah chu ka nuih a za leh lawi.. 'Tunlai i buai zual viau in ka ringa,hnaah min chhawr rim bawk nen ka  pui tha hman bik bawk si lo che u ania. Naktukah hun i neih hlauh chuan mi tu emaw ka hmuh tir ang che' ka tih takah chuan mak tih  hmelzet hian min rawn en a,”Mi ti emaw chu i bialpa tihna mi? Hey, Hmeli.. nang hi ngaizawhng ilo nei reng tihna maw?” a ti deuh chiama. Aw ki dam dapin “'um,nei e” ka ti leh a. .”engatinge min hrilh ve loh a? Mi hriat hnu a hre tur la ni em ni?' a ti leh hlur mai.

“Oooo,hrilh  tur che pawn kan inhmu ngai hleinem” thiamchan tun ranin ka ti ve thung a, Motor a tihdin zui takah chuan kan in kan lo thleng der chu niin, tlan reilo ka inti ru viau.. Inchhunga lut tura ka sawm chuan a lo  lut duh tlat lo,”ka  rimtui lo em mai” a ti deuh tlata, ka tilui duh lem lo.

A tuk a lo ni a,inhmu tura hun a neih thu min rawn hrilh a. Ka bialpa hmasa ber, min lo kawp tu leh rilru na em em a ka then tak,min khawngaih luat vanga Jeremy -an ahnek vung bur hnu ngei mai, “kan kawp leh tawh” ti a ka hmelhriat tir zet chu a hmelhmuh anuam lo ngang maia,mahse pawi ka ti miah lo thung....

An innei hma chu kan in hmu leh ta lo.. Milar leh mi hausa innei an ni bawka, an innei ropuiin lawmpuitu pawh an tam em em mai..Ni reilote chauh kan inzui hnuah  ka ngaizawng kha ka ban fel leh ta thuai,ka hna thar zawm turin JEREMY te inneih hnu lawkah Hyderabad-ah ka kal zuita bawk.Kan inbe ngai ta reng reng lo. Min be lo na na na chu biak ka tum bik lo a ni ber awm e, An induh hleuh hleuh bawka, an hlim hle in ka ringa, hun a lo kal ve tak zelah chuan ka ngaihtuahna an luah tlem ve ta tial tial,ka hna thar nuam ka ti chho a,nuam ti takin ka thawk bawk. Chutihrualin,nitin ngaihtuah ziah lo mah ila amah ka hriatrengna erawh chuan min kalsan hlen tak tak thei lova. Innngaihtuah fuh lo fe tum pawh ka la nei zauh zauh.

Kun 2 zet rim taka ka thawh hnu-ah chawlh ka nei ve thei ta hrama,ka chhuk atangin ka la haw leh miah lo bawka ka hawchak tawh viau mai. Ka haw hma zan atangin ka helhhawlh nasa maia, naktuk ah chuan ka dam anga,  kan in ah ngei ka awmtawh dawn tih ngaihtuahin ka phi sek a ni ber...ka vanneih hlauh chuan naktukah la la pawh Jeremy te nupa ka hmu mail maithei.....

JEREMY 2

Tunah chuan keimahni in ah ngei ka awm ta e,kum 2 tal tawp mahni a khawsa ka ni bawk a,ka khua har ve thin,hetia chhungkua a han awm leh tak chu a nuam a chhungkaw neih hlut zia ka hre chiang leh zual.

Ka haw tuk-ah ka pa in chhungkaw chaw eikhawm a rawt a,eirawngbawlin kan buai ve laih laih a,eirawngbawl hi nuam ka ti bawk a,ka buai char char pawh pawi ka ti lem lo...Ka buai viau nangin ka rilru in zawn ka nei a,mahse ka haw hnuah tuman a chanchin an sawi loh avangin vawiin pawh hian a lo kal ka ring lem chuang lo. Tunhma kha chuan kan chhungkaw thil tihkhawm apiang in Jeremy hi a tel ve deuh zel a,vawiin a ahmel hmuh loh tak ah chuan adanglam deuh  hu mai hian ka hria..

Eirawngbawl na lama kan buai zawh hnu,chawhnu lamah ka inbuala, ka inbual zo room atanga ka chhuak chu ka phut zawkna tur ka hmu ta. Min hnungchhawn zawnga ka nu leh mipa sang zet mai, naute kum 1 mi awm vel pawma ding chu he kum 2 zet liam tawh ah pawh hian a hmel hmu lo pawhin ka la hai lo a,nasa takin ka lungphu ala rang chu nih hi....min hnungchhawn mah se a nau pawm erawh a dar atanga a rawn dah ker avangin ka hmu chiang ngang thung.

Room ah ka let leh vat a,dressing table vuanin kan thaw ham ham phawt a,ava mak em!!!! hetiang kum tawhah pawh heti khawp a min la tidanglamthei anih si chuan ka hmachhawn ngam dawn em ni? Ti a ka ngaihtuah laia ka room kawngka kik thawm ah chuan ka vir zawk mai, ka in control thuai a,pangngai tak in"tunge ?,lo lut rawh" ka ti nghala,kawngka rawn inhawngin ka mipa hmangaih em em, theihnghil ka tum luat avanga ka tlanbosan tak ngei mai chu a rawn lut ta a,hmai chhan a han inhmuh takah chuan tlem in alo lang upa ta deuh a,a hang deuh bawk tih ka hre thei maia,mahse amaha mi hip riauna awm leh a hmel pa hrak thin kha tunhma aiin tunah hian a langsar ta zawk mah in ka hria..

" i lo haw pawh min hril lo a"a rawn ti luta,a awmdanah chuan min hmuh vanga danglamna nei hmel a pu ve lem lo..

" Ka phone ka thlaka,i number ka nei tawh hleinem,in nu te an tha maw" ka tih zawm zat a,ani lah chuan duhdah fe hian "tha ang,ka hre bik lo" a ti a. A number ka neih tawh loh thu ka sawi pawh kha engah teh vak a ngai zui lo tih ka hria. An nu chungchang Min han chhan danah khan awmhrang ang maiin a tawnga,an inthen thu an sawi pawh ka hre si lo. Ka chhungte tumah a chanchin ka zawt ngai lo va,engmah ka chhuk hnu khan hriat ka nei zui lo. Angela-i lah pasal a neih hnuah zai a chawlhsan nghal daih a,zaithiam lar anih angin a zai tawh loh ber chuan mi thar tha tak tak an lo chhuak zel si a,a larna a chuai zui titih avangin a chanchin hriat tur a tam lo. Hriat tur a tam loh nak laiin hriat hlau reng renga khawsa ka nih avangin an hming lanna hlek ka en kan zar zar a ni ber. A lo  boral zawk emni?chuvang emni hlimlo riau a ka hriat?..Ni lo,boral se engtin nge ka hriat loh tehlul ang? Hre duh lo eltiang mah ila ka chhungten min hrilh dawn tho tho.

"kan inthen tawh" a tih takah chuan makti zet hian kan en a,ani lah chuan chik zet hian minlo en ve thung,rang zet in ka hawi let lehnghal a,,"engati nge in inthen ngawt a?” Tichungin tul lo tak hian dressing table a thil awm ka rem tha a.

“nakinah kan sawi zawk dawnnia,ka sawi awm zia chu i  bula ka awm i phal dawn chuan nidangah ka hrilh ang che, i phal loh chuan i hre lo mai aniang chu" a ti zui leha...Tun hma ang tho khan ala ngeiom reng chu a nih hi maw.. Thil hriat duh ka neih changa min hrilh dawn reng rengin awlsam takin min hrilh ngai meuh lo..ka bu ta nghat a.."chhuak ila,ka thilsiam ho kha enfel ala ngai deuh a" ka tih chuan min rawn zui ve mai bawk..

Kan chaw leh chawhmeh ho a tui leh tui loh pawh ka hre ta nek lo,ka puar leh puar lo pawh ka hre chuang lo. Ka thiltih paha common room lam ka hawi apiangin  mit thim raih mai in chik zet a minlo enthin vang khan ka zam em em tlat a ni.An  haw tur chu kan chhungkua in kan thlah a,chaw rawn ei ho an han haw rual tak duak-ah chuan a reh nghal huai mai. Muhil maithei loin thil ka ngaihtuah vak vaka,thil hrang hrang ngaihtuah mah ila engtin nge khati khopa induh si an inthen leh mai theih tihah bawk ka kual lut zel a ni ber.

JEREMY 3

Thil hriatthiam chiah loh ka nei ta tlat,ka va hmuh laia a naute pawm kha tu fa nge Nita ang? Kumkhat vel bawr ni a ka rin vang khan ama fa ni turah ka ngaia. A hnu khan ka hmu leh tawh miah lo tih tunah ka hrechhuak leh lawi. Kum hnih lai engmah a chanchin ka lo hre duh lo kha pawi ka ti leh hnuhnawh a,ka thian dangte pawn kan inbiak changin sawi tum mah se thildang ka sawi hnan thuai zel a avangin sawi na chance an nei ngai lo va. Aizawla awm ve ve chu ni ila ka duh emaw duh lo emaw ka hre ngei ngei dawn. Mahse  phái a awmbo leh an chanchin hriat theihna tur reng reng hel zar zar ka nih avangin ka hre lo hi a mak lem lo. Mahse,tunah ka hriat loh lutuk avangin ka tumloh tawp in ka buai phah ta zek zawk chu amia,ka chawlh hmang hi rei pawh ka awm hmain ka tifuh lo dawn niin ka hre ta tlat.

Ka lukham sira ka dah,ka phone a nghawr dat a, msg lo awmin a number ka save loh atangin a ni a, ka phone ka thlak vang ni loin a number ka delete zawk a ni a.Mahse ka thinlung a ka delete ve siloh avangin Jeremy number a ni tih ka hai chuang lo..

“May,ka ngai thei khawp mai che,hman ang khan inkawmngeih leh teh ang" tih hi a lo ni a,rang lutuk in reply nghal  tumin ka type nghala,mahse ka delete leh ta zawk,ka reply nghal chawng chawng chuan ama tana inhawng reng angah min ngai anga, tun hma ang khan min kal pah leh vel mai mai ka hlau a ni ber.

Ka reply ta lawk lo,ka muhil tawh maw tise ka tih vang a ni a,ka maimitchhing vang vang a,a rawn vibrate leh chiah tihah ka hawng leh vat a,Jeremy bawk.." I muhil lo tih ka hre Chiang lutuk,reply vat rawh,ka rawn call che I duhlo chuan?” a rawn tih leh takah chuan  ka reply ta nge nge a,"A tlai tawh, ka mut a chhuak llutuk,zingah kan in be dawn Nia" tih ka thawn a.

"OK,sweetheart.. Min hau miah suh"a rawn ti lehnghal zat,a fiamthu tih ka hre reng  chungin  ka nuisak tho.

Zingah ka nu Jeremy te chanchin zawh ka tum thut thut a,mahse aman min hrilh atum thoa,ka nu chuan an chanchin pawh hria se a hriatchian ka ring chuang lo va, aman min hrilh hun lo nghah tha ka ti a,ka zawt buai ta lo.

Chhunah bazarah ka teikual a,chawhnu lam-ah Mc ah ka ni te dawr lamah lut chho a,eng eng emaw kan sawi luama,ka niin “ Jeremy te chanchin kha i hre ve em? An nu kha a rilru  a na lutuk an tih kha” a tih chuan ka beng a verh nghal Zak mai,aman min hrilh dawn tih lam ka ngaihtuah hman tawh lo” eng chanchin nge” ka ti nghal thuai a,engahmah hmain alerh San leh mai mai anih ka ring nghal bur bawk.

 "Angela-i nu sawidan chuan Jeremya’n a hmangaih lo a,midang theihnghilh theiloh a lo nei renga,amah hmangaih lo tu nena a Chen dun reng chu harsa a ti lutuka,inhauh buaina pawh nei loin an intha then tawp a ti a" a ti leh charh charha, mak ka ti lutuk ringawt mai,a bialnu hlui te tumah a lak thutak ka hre silo,nge,midang min hrilh Kim loh alo neizawk?!!!!!

Ka ni thildang sawia a titi zawm mawlh mawlh laiin  ka phone a rawn ri a,kan en chu Jeremy lo ni a,

“May,khonge I awm?"a rawn ti nghala "Mc ah ka ni te dawr ah" ka tih veleh,”Ka lo kal nghal,minlo nghak rawh,hruaina tur che ka nei ania"a rawn ti a,chhan let hmanloh in a off nghal hmak,.hei pawh hman atang tawhin a LA ngai reng,a duh a sawi zawh veleh ka hnial ngei ngei na tur thil anih chuan a off nghal hmiah zel,ngeiawm thei lutuk..

Rei vak lo ka nghah hnu-ah  a rawn luta,ka ni te  dawr nghaktu nula chuan a en duh ngang mai,ka dem lemlo,chhelo miau hek le..Ka ni nen an in biak luam hnuah kan chhuak a,khonge kan kal dawn zawh ka tum lai tak chuan kan lampan a Zohminga,Jeremy thianpa lo kal phei chu ka hmu a, arawn nui phei vur vur bawk. Jeremy ka en chiah chu an mitmenga an in signal chu ka hmu hman vuai a ,Jeremy cuan min rawn en chungin  “Zohminga te nupa pawh an tel ve dawn",a ti a,angaihna ka hre lo tawlh tawlh mai.

Bo ru angreng tak hian  ka zui ve ta zel tho a,a awmdan chu mak ka tih rualin ka ngaih a tha lo tel bawk. Rilru nuam vak lo e ti loin thil tha lo a ti dawn lo tih ka hriat avangin motor ah chuan ka lut hreh lem lo.

Kan tlanchhuah hnuah ka haw hma zana ka thil ngaihtuah ka hre chhuaka, kum 2 lai inbe pawp lo kan nih avang khan ka vanneih chuan ka haw hnuah an nupain ka hmu maithei tiin ka ngaihtuah a, tunah ni rei pawh Aizawl ka awm hmain kan inkawm leh ta der mai chu ania.

Kan kalna tur ka zawh chuan anui mai maia,a sawi dawn chuang lo tih ka hriat takah chuan ka zawt zui ta lo. Kulikaen kan pel a,Saikhamakawn leh Melthum kan pelh chhoh leh hnuah thui vaklo kan kal leha, Ding lam peng lo awmah  kan peng a,kawngpui atanga hla lutuk lo kan thlen chuan kan ding ta a,zik mar ar ar pah in " zohminga te kan nghak dawn em ni? " ka ti a,a ngawih vang vang hnuah muangchangin a rawn hawi a,thu tak zet leh Chiang taka min en Chung in,zawi  fiah taksi hian "aih,nghak lo,ka RU dawn che,ka nupui ni tur in" a ti ta daih.

JERMY 4

A fiamthu tih ka hai hauh lo chungin a ruka ka lo duh leh beisei,ka beisei ngam loh anih avangin hetiang a sawi thut mai hi a lawmawm ve hrim hrim. A hmel ka en chuan ka rin ang ngeiin a thutak hmel deuh kha ka hmu leh tawh lo,nichin lawka thutak hmel taka ka hmuh pawh kha amah ka duh leh lutuk hian ka hmu sual mai mai anih ka ring nghala...Ani lah chu a rawn nui ta huk huk maia,"i va han hlau em em ve,i theinghilh tawh mi a? Englaimahin hmeichhia ka vau ngailo tih i hriat thin kha" a ti zuia,ka nui ve hak hak..

"Enge kan tih dawn a?" ka ti a, "Angela-i nen kan inthen chhan kha i hre duh sia,tuma dip dal loh a hrilh che ka duh a,tuma dipdall oh tihah khan mi awm ve miah lohna hmun fal deuh kher ka duh,min hau leh nasa dawn lutuka, miin min hau lai an hmuh ka duh lo..ka in la pa ve laklawh si,hmeichhe tereuhte in min hau tih an hriat chuan miin min nuih ang” fiamthu titak hian a ti ta duah.Rum angreng tak hian ka en a, ani lah chu a nui suk suk duh lek. Min hrechiang lutuk hi a buaithlak lam chu a ni e." sawi  mai mai tehl"ka ti hmaka, "um" ti mah se angawi zui leh vang vang a.

Thaw deuh hian chiang zet lutuk mah mahin  min rawn en a"May,nangchuan i hmangaih tak neih tum ang che,keichu ka dawihzep luat vang in ka hmangaih tih ka haider lui a,midang ka neih chuan ka theinghil mai ang ka lo ti thin a,mahse a lo teuh lo lutuk..Hmangaih loh nena chendun chu hremhmun a ni ringawt" ka rin loh tak hian a ti ta a, beiawng hmel zet hian a thaw deuh huai a,chhungril taka a hrehawm tawrhna ka hriatsak avangin ka khawngaih nghal em em maia,chuti tak mai a a rilru ti na tu hmeichhia chu engamah hma in kanlo ngei nghal em em tawp ringawt bawk.

"Angela-i khan midang i hmangaih tih a hria em?” ka ti ban chata, ‘um"a ti hul viau."Engatinge chu hmeichhe hnenah chuan i hrilh mai loh le aw..Dawih deuha awm i inhmeh lo ka ti" ka tih takah chuan a hmel chu thinrimna in a rawn thlak a,bung zet hian" midang hmangaih a nei alawm mawle"a ti hrawk. Sawi leh mai tur hre loin ka ngawi renga, ka ngaihtuah naah Angela-i a lo langa, ka khawngaih ta viau. A pasal a hmangaih em em in midang a lo hmangaih tih hriatchhuah chu a hrehawm dawn lutuk. Jeremy ka en a, ka khawngaih rualin ka ngei bawk. Hmeichhe laka a nghal zia ngaihtuahin a duhtak a nei bik chuang lo chu ania. Hei tak hi HMANGAIHNA mak danglam chhan chu a ni ta ve ang. KAn mi hmangaih te  hi  kan duh duh a thlak theih a ni  si lo lai tak hi a hlutna chu a ni bawk si.. Hmeichhe vannei chu tutak ni ang maw? Mahse ani pawh chuan midang a hmangaih ve tho a, keiin JEremy hi duhthusam ti ngawt mah ila chu hmeichhe tan chuan duhthusam mipa dang an awm ve tihna mai a ni.  

“Amah chu i hriatchian zual deuh deuh angai anih chu.Engtikah emaw chuan a la hmangaih em em ang che’ ka  ti teh ngawt ...."Anih leh Angela-i chu tunah khawnge a awm ?atan chuan a fair dawn lo hle mai” ka ti zuia. "Hmangaih miah loh nena chendun kha hrehawm ti mah ila anihna takah chuan ka nei tawha, keimah zawkin then ka tum ngai lo. Mahse inhauhbuaina pawh awm loin a haw a, a haw takah chuan koh ka tum tawh lo. Koh ka tum lo tih a hriat hnuah hrehawm a ti leh si aniang chu, min lo call zantin maia, ka tihsual anihna chen a awm ve tho  bawk nen tha tak in ka be zel tho a. ,inhmuh aduh pawn ka hman phawt chuan ka hnial ngai lo.,Mahse, koh ka tum tawh lo tih leh  ka hmangaih lo tih a inhre chiang em mai a,ko leh tura min ngenna pawh min ngen khat tial tiala,min rawn vau ta vel thin zawk a...kha tak kha ka  ngaithei miah lo,ka ngaihsak zui duh tawh lo a,min rawn call pawhin ka pick-up ngai lo,msg pawh ka reply ngai lo "ati ta duah.

"i sual ve ngawt mai"ka ti chiah chu ka hmui a rawn khawiha,”min hauh ka ring sa naa min hau suh.. thleng tur a thleng vek tawha,pathlawi nih hi hrehawm ka ti lo ania” nui chunga a tih takah chuan ngei tak hian ka melh ram rama.”Nuam i tih vang ngawtin thil dik i ti tihna a ni chuang lo ania, a thuhrimin i nupui neih dawn a ka pasal nei lo min hmuhsit nen,i he ti leh mai mai a”ka ti zui ta hlak hlak a..Nui chung hian "A hunlai te kha chuan nuihsawh che kha a nuam ve alawm..”a ti duh lek.

“I chhe em maia,anih leh i leng tar zui dawn tihna mi a?” Ka ti leh khar khar. 

“Min duh lo tu hmeichhe mawl zet hi ka nghak ang chu ka ti,min duh loh leh ka pathlawi tlang mai ang. Chuan, ka hmeichhe hmangaih hi tunge anih Angela-i  khan a hrechiang em em a,a mizia ka en hian engtin emaw tak a ti duh dawn tih ka hriat avangin venghim tlat ka duh dawn bawk a,ka damchhunga ven ngai pawh nise ka ning lo ang" thutak em em hian a ti ta a,a hmel thim raih mai,tum ruh tih hriat zet a insehruh chu ka thlir van g vang ringawt..Hringnun hi mi hausa leh hausa lo tan pawh hian fair loh chang a va tam  tak em...Ka hmangaih em em hian a hmeichhe hmangaih,amah duh lo tu a veng dawna,keiin rilru na takin ka lo ngaithla ve thung chu ania.

Kan titi thlak a hun tawh tih hriain “haw tawh ila” ka ti a, a bu nghut. Motor a start hmain min rawn en leh a,"May, ka ngai tak tak che ania aw,i kal leh hma in in ngaihtuah nawn hram teh,kan hna-ah lo let leh turin ka duh che,hlawh chu i duh zat sawi tawp mai la,i tel lo chuan ngai kan awh zo tlat lo, nawm pawh  anuam tawh lo"a tih chuan ka nui ta hak hak,ani lah chu angaihna hriat loh hmel zet hian awm a..

“Kei aia hna thiam zawk hlir in an hual vel che a,ka tel lo pawn in tha dawn lutuk.. in tha zawk mah mah ang”la nui reng chungin ka ti a, “Tuna thawktu te an tha lo ka ti lo,i ai an awh zo lo ka ti mai ania.. Nangmah ngei awm leh thei la ka duh” thutak em em hian a ti leh a. 

“ka pasal tur i zawn dawn leh dawn loh te pawh aniang chu" fiamthu hian ka ti a. "I duh phawt chuwn zawng dawn tehreng mai,mahse ring deuh deuh a i nuih leh vak vak chuan mipa an tlanbo leh vek ang,tunah phei chuan i tar tawh a,fimkhur angai viau ang"a ti ve a,a nui zui huk huk bawk. Nichina kan boruak up tak kha boin kan inkawm dan pawh a nuam leh ta.Hmana Jeremy leh Marilyn,inngai tak leh inhau reng lawi si,inkawmngeih em em te kha kan ni leh ta....kan haw kawngah pawh kawng  tluanin kan nui char char ni ta ber in ka hria.

Hun a kala,Tunah chuan Jeremy pawh kan in hrik diktak a ni leh ta,kan chhungkua kan inrawnkhawm a,ka chhungten kal tawh lo tura min duhna ka pawm a. Phai lama ka thawhna ten ka rin phak bakin min lo ui a,hlawh tam zawk nen min thlem ve hial mai,mahse ka rilru ka siam fel tawha thlak leh ka tum tawh lo.. Hetah ka awm ang. Jeremy hian midang hmangaih nei mah se  ka pawiti tawh lo. A hmangaih hmeichhia anghah chhung a thian tha ber ni chunga a  bula ka awm thei tur hi nuam ka ti a,min hmangaih ve kher ka beisei lo,hman atanga vawiin thlengin min duat em em tho a,hei lek pawh hi ka thlahlela, ka hlim em em zawk.

Nitin office kal turin min rawn lam a,min thlah leh thlap thin bawk,ka tan chuan in nghahna tlak mipa ka rin ngam awmchhun ala ni leh ta zel anih hi..

Office banah ka nite dawrah ka thil chah lam turin ka kal dawn a, a ruala ka haw hman dawn loh thu leh kalna tur ka neih thu la hrilh chuan  nghak turin min lo ti  a,mahse meeting pawimawh an neih dawn avangin keimah in ka kal ta zawk. Ka  ni te dawr ka thlen hma in hmeichhe aw hian ka hminga min ko ri ka hria a,ka hawi let chu Angela-i a lo ni reng mai,tunhma aiin tlemin alo cher deuh tawh a,mhse a nalh zualzawk,amahah engmah sawiselna tur a awm lo ni hialin ka hria..Engvanga kan mimawlpa hian han hmangaih lo thei nge maw anih le tiin ka lo ngaihtuah leh hman zauh pek.

“May,i dam maw?” min tih chuan  mak ka lo ti ru ngang mai,voikhatmah MAY tiin min la ko ngai lo,"um dam alawm" mak ka tihna chu thup in zangvah in ka chhang a"i dam zawk em?” Ka ti zuia. ..."Dam alawm” a tih chuan a awki ah danglam engmah awm lo mah se a mit  meng chu nidang ang lo takin a thip ram mai,a pasal nen an inthen dan fuh tawk lo nen,keilah a pasal thian tha takzet ka lo ni si a,min lawm vak lo nimaiah ka ngai.

"Aizawlah hian i thawhna ngaiah i thawk leh ni awm in ka lo hria a"a ti leh a,” Aw,nia,hmundanga awm chu a lunglenthlak duh em mai"ka ti tha ve mai. "Chuti chu nuam inva ti awm ve"a ti leh khaiha, a zawhna chu angaihna ka hre lo tawp mai..A zawhna awmzia zawhfiah ka tum lai takin ka kawngah tu emawin min rawn kuah thut maia,ka phu zawk thei, tu nge anih ka en tur chiah  chu Jeremy aw hian “nia,keini 2 hi chuan nuam tih loh tak tak  pawh kan nei lo" a ti dam thlup.

JEREMY 5

Jeremy a ni tih ka hriat takah chuan amah en kher lo mah ila ka thlamuang nghal huai huai mai.Angela-i meng phar deuh awk ka hmu hmana,mahse a insiam rem leh thuai a, ahma ang bawk khan a meng thip leh ram tawh mai. Jeremy chuan pangngai tak hian "Hey,Angela,i dam maw?" a tih chuan Angela chuan ahmui tihsawi zauh pah hian "dam alawm,i Marilyn-i alo haw meuh chuan Aizawl kawtthlerah hian hmuh tur i tam leh tawh khawp mai" a ti deuh salh. A tawng dan chuan min khei zak nangin Jeremy tawng hun ka nghaka,”I sawi dikin ka ringa,ani hi chu ka duat em a, tawhsual a tawh palh hlauin ka zui kual du du zel mai ang chu" a ti ta duah..An han inchhan dan vel chu hrethiam chiah lo hian ka en tawn zak zaka,ka awm ve tih pawh hre lo ang mai hian an inmelh no lo dun ngang mai...Ka kawnga a kuahna ka phelh mai dawn a,ahma aia nghet mah hian min kuaha,”May,kan kal tawh dawn mi? tih tur kan la ngah em kha” a tih takah chuan ka lawm ru ngang mai,anni nupa boruak tang at mai kara khawsak hi ka tlin dawn hauh lo mai.

Angela-i kan kal pelh hnuah "min thlah tawh la,tunah chuan an awm tawh loh kha.." ka ti zauh,thuawih zet chuan min thlah ve mai bawk,"Ngatinge nangmah in i lo kal daih a?,minlo nghak rawh ka tih che kha i hre lo mi?” Lawm chiah lo aw hian a ti a.”Hria e, meeting in neih kha mawle,a thuhrimin ka kal na piangah min zui chuan tuman min duh nang,ka bialpa emaw anti ang che,a buaithlak ang" fiamthu titak hian ka ti a, "Zui kual zel i duh loh te chuan a hmain sawi ta che” a ti hmuka. A  aw ri chu a chang riau in ka hria a,ka en thuai, hriatthiam har zeta min lo en reng avangin ka hawisawn leh thuai..." Ngatinge Angela -i khan i Marilyn-i  a tih kher a?”Angela-i tawngkam hre chhuakin ka ti nghala. Ngaihsam  zet hian"ka hre bik nang,ka naute i ni tih a hre ve aniang" a ti liam puat a,ka ni te dawr kan thleng a ni nghal mai bawk nen, engmah ka zawt zui ta lo.

Ka ni-in “coffee in phawt ru” atih tlat avang chuan kan thu khawmuang a,nidang ang lo takin Jeremy a ngawi ngul mai a,ka ni in a bia anih lo phei chuan atawng lo reng reng,annu kha a ngaituah zui anih ka ring. An pahnih inbiakna kha ka ngaihtuah let hian mak ka ti a. Lo inthen tawh pawh nise ka awm lai chuan polite chhuaha “i dam maw?” Intih kha a tawk viau laia keimah awm lo ang maia ka chungchang an sawi kha awm lo ka ti viau.

Kan haw kawngah chuan nidang ang bawkin ka titi mawlh  mawlh a,a chang chang a min chhang zeuh zeuh tih loh chu engmah a sawi ve lo,mahse thilmak vak a ni lo,a tifuh viau anih lo chuan a tawng duh lutuk lo ve hrim hrim.

Zanah a lo leng lova,zantin deuhthaw rawn leng lut anih avangin a lo kal ta lo chu a reh ruaiin ka hria a. A tuk-ah office kal tura ka insiam mawlh mawlh laiin ka phone a rawn ri  a,ka en vat. Jeremy a mi tih ka hriat chuan ka pick-up veleh "ka hman tep" ka ti nghala. "Tukin zing chu ka lo lam hman dawn lo che a,nangmah in lo kal maila,a pawi viau em?"ka rin loh tak hian a rawn ti a.."aih,pawi lo e,mahse i damlo em ni?”rilru nuam lo tak hian ka ti a,a damthu leh tihtur pawimawh aneih thu asawi hnuah engmah ka sawi ve leh hma chuan a dah ta hmak..Nidangah pawh hetianga phone dah hmak hi ching viau mah se tukin chu a mood a fuh lo viau niin ka hriaa, an chhungkaw lamah harsatna an tawk anih ka ring ta ngawt.

Nilengin ka hmu lo a,min rawn be hek lo,tlaiah chuan phone kan tum ren rawn a,mahse ka pasal pawh a ni lo va,ka bialpa pawh a ni chuang lo bawka,min rawn be lo na na chu thil pawimawh dang a awm lo bawk nen  ka biak tul in ka hre leh lo. Zanah pawh ala reh chhunzawm ta zel mai.

Hun a kala,Jeremy mize  danglam na pawh thla khat zet a ni  ta,kan inhmu zeuh zeuh a,hna a thawk rim hle anih ka ring,office-ah pawh a hun tam zawk roomah hun a hmanga,haw rual chang kan nei zeuh zeuh.

Tlai khat chu Zohminga te naute enpuiah min sawm ve mial a,phur zet in ka zuia,kan thlen rual rualin “chaw ei turin kan lo ring che u” anti leh zel. Chaw ei em chu ka duh loh viau laiin Jeremy’n ka nu te a phone a,anni lahin an lo  phal ve mai bawk si nen han duh loh tlat theih pawh a ni ta chiah lo,ka chhungte hian a bulah hi chuan min ngaihtuah ngai lo,ka nuta ang maia an en vang a ni ber.

Chaw kan ei kham hnuah rei thu tawh loin kan hawsana,hmundanga kal kawi zuai angaih thu leh pawi ka tih leh tih loh min zawh chuan pawi ka ti lo tiin ka chhang sam et.

"Naute i pawm vel kha i hmunawm reuh lutuk" a tih chuan “i over anih chu a,zei lo min tih em kha” ka ti hlak.”Fa nei ve tawh la,pasal neila chhungkaw hlim tak din ula anuam ngawt ang" a ti leh ringawt, a tawngdan lah chu min bia pawh a ang lo a,keima tan a duhthusam a sawi ni ber in ka hria.. Ka  zawh chak em em zawt turin ka inti huaisen luia,"nangpawh nupui neih leh hi ngaihtuah la,i la upa lo em mai.,Nge i hmeichhe nghah chu i nghak reng dawn  tak tak tihna mi?” Ka ti a."..."um,nghak dawn e" rawn hawi pah hian "engatinge chu chu min zawh a?" a ti zuia. “ka hre duh mai mai mawle,tunlai chu i mizia i thlak bawksia,in in duh tawn tawh anih ka ring a"ka tih cuan a nui  suk a,"he hmeichhia tluka hriat thiam theih loh mihring hi ka nei lo ang. A chang chuan min duh niin ka hria a,a chang chuan a hmangaih em em kha a la ngai thin tih ahmelah ka hmu thei leh bawk a,amak ngawt mai" a ti ta hlawl. Mak ti em em hian "ehe,mipa dang a hmangaih pawh chu i hriatpui amaw?" Ka ti hluai,  mak ka tihna  ka thup thei lo,a mitko hmul  san uk  pah hian “um,kha mihring tenawm tak vanga atap lai pawh ka hmu tawh,midang reng reng a hmangaih leh theih a rinloh thu pawh min hril alawm"..a la ti tak deuh deuh.

"Ek-a,Chuan chutiang hmeichhia chu ila nghak amaw?"lawm lo tak hian ka ti a.. “aw,nghak tlat chu anih hi.. Ka hrilh tawh che kha, ka neih thei tak loh leh vawikhat nupui ka nei tawh a,ka duhtawk tawh mai ang chu" a ti leh phei chu ka ngaihdan a ni tawh lo..”Nang hi i i mawl deuh anilo maw?” ka ti ta ngawt.. A hui huk a.

“Hmangaih naah chuan kan mawl deuh te pawh alo ngai anih dawn hi" a ti duh lek. “anih chuan i thian tha ber ka nih vang tal pawn a hming min hril teh,keiman theih tawp ka chhuah sak ang che" ka ti leh chu za deuh mai hian a nui ta huh huk a,,"enge i nuih a? Nuihzatthlak ka sawi em ni?”ka ti vin thak. Ka thutak tehreng nen min nuih khanglan chu tiin ka insehruha...,

"Enteh,min hau suh aw,tunah hian khawiah mah kal kualna tur ka nei,he thil hi sawipui che ka duh vangin chance ka zawng mai mai anih kha" a la ti ta zel. "engatinge dawtsawi hi i chin viau le?,tha tak pawn sawila ka zui dawn tho che sia"ka ti nang nang.

"tak tak maw?,min zui reng suh i ti leh lo ang maw?" A ti deuh khera,ka tawngkam hrechhuakin ka melh ram ram.

“Ka hmeichhe duh chu i hmu duh tak tak maw?"nui tawh lo hian a ti a.."aw lutuk tlat"ka ti thuai."A tha e,naktukah kan office-ah a lo kal ang. Ka hnaa min pui turin ka sawma,ka P.A a ni dawn,hna a rawn zawm ang" a ti chiah chu ka bing mup mup thei…”tak tak maw?” ka ti thei hram..

“aw,i hriat chian tak anih dawn avangin min haw lo hram ang che,i lakah ka zep vang pawn min ngaidam dawnnia" thutak tih hriat lutuka a tih leh chuan ka bu ta nghat.

Tunah zet chuan engkim atawp ta,ka chhe ta vek mai...

JEREMY 6

Kan in thleng min thlah a,atlai tawh deuh vangin alo leng lut ta lo,room ah ka lut tlang nghal a,ka khumah ka bawk thlawp a,dan rual loh in ka mittui a dir zung zung mai,tunah chuan ka hmangaih leh ka thian tha ber hi a voi 2 nan leh a tawp nan ka chan hlen dawn ta tih ka ngaihtuah na chuan min chhun sawk sawk niber in ka hria,midang tana mittui seng ka ni lo bawka ka zak lo,ka hmangaih ber thlahnan a tap ka ni miau a,pawi ka ti hek lo..

Muhil thei loin ka let ka leta,khawvar dawnah ka rilru ka siamfel thei ta. Naupang ka ni tawh lova,upa uchuak lah ka ni hek lo. Naktuk atang in nun bul ka tan tha anga,engtiklai pawha min duh zia tilang hreh hauh lo tu Rinsanga  pawh tha takin ka chhang tawh anga, inneih a duh anih pawhin ka nei nghal rum rum mai ang chu.

A tuka ka hna kal tur erawh chu ka huphurh thar leh ta hle thung,mahse engah nge thil tisualtu ang maia ka tlanchhiat tehlul ang tiin ka insehruh a..Uluk takin ka incheia, Jeremy pawh nghak lo in ka scooty in ka kal ta a,office ka thlen chuan a lo la kal loh avangin helhhawlh zet hian ka thu ran mai a,kawngka lam ka ensek mai bawk..Rinai taka a lo kal har takah chuan toilet ah ka lut a,toilet atanga ka chhuak chiah chu Jeremy leh hmeichhe pakhat nalh zet mai rawn lut chiah chu ka hmu nghal chat,hmeichha chu a samin a hmai a hliah deuh  avangin ka hmu chiang theilo a,mahse a pian ah chuan ka hmuh hnu a ang khawp in ka hria,ka lo en ran a,a sam hui kianga a rawn hawi chuan ka hriat hnu chu alo ni ngei mai,vawitam tak Jeremy an a cousin ni a min hmelhriat tir tawh hnu Zothanpuii ngei a ni a.. Ka hriat mi anih thu asawi kha ka hrechhuak nghal uai uai maia.. Mak tihna leh tenna inkawpin ka tawt up up thei. Engtin nge mahni cousin chu unau hmangaih na piahlama a hmangaih theih ka hre thiam lo.

An 2 a min rawn hmuh chuan min rawn nuiha,nizan lama ka intih paukhauh ve na te kha chu chhe hneh tak hi a ni ringawt mai,Jeremy-an hnathawktu thar anih thu leh a hming sawia midang ho a hmelhriattir chuan midang ho chuan an chibai sap sap ,keipawh muangchangin ka kal phei chhat chhat a,an bul ka thlen chuan minlo en duna,ka kut phar chhuah pah chuan "min la hria em? Marilyn-i  kha ka nia,nang chu Zothani i ni tih ka la hre reng,a reitoh deuh nangin ka la hai hauh lo che ania" ka ti duah,ka aw khur dar dar chu an hriat loh hram ka beisei hle bawk,nuisang hian min en a," Hre tehreng mai,i dam maw?,min thawhpui duh em ang chu ti raw?" Hlim tak hian a ti a, a  aw ri zangkhai vah mai chu ngaihthlak a nuam ngang mai. “Ka chak zawng tak ania” harsa taka nui lui chungin ka ti thei hram, kan inbiak chhungin vawikhatmah Jeremy lam ka hawi miah lo,thinrim lo turin min ngen lawk mah se ka ngei hluah hluah a,ka ten lutuk na vang ringawt pawh hian ka ka ngaidam thei hian ka ring thlawt lo bawk,a thil zep ruk hi thil namai a ni lo.

Nilengin mumal nei miah lo in hna ka thawk a,ka riltam lo a,ka chau hek lo,ka hna thawh tur ang ang ka  thawk mawp mawp mai a,khawl ka ang ber in ka hria,.tlai ban a hun chuan an 2 in midang mitmei veng hauh loin hawrual turin an rawn chhuak a,ka lam an la rawn pan zui tih ka mitsirin ka hmu kar…”May, ila haw dawnlo mi?haw tawh ila” Jeremy-an a rawn ti a,”scooty ka keng a,bakah ka thianpa nghah ka ngaia,min lo nghak lo mai ru" ka ti vat,engmah sawi buai lo chuan “anih leh aw” tih leh kal an rualzui nghal chu a ni mai.. Ngei em emin ka en zuia,ka bula tui bottle awm in vawm pawp ka chak lutuk tlat.Diktak chuan tu ka thianpa mah ka nghak reng reng lo. Rinsanga call ka tum deuh thut a mah se mahni a haw a,thleng vat a hahdam deuh a awm ka duh ta zawk. Vawiin nileng hian ka insangmar nasa lutuk a,ka na thum in ka hria,ka hna khawih lai ka zawh chuan haw turin ka insiama,hna laklawh ka neih vanga ban hun pangngai aia tlai hret ka ni a,hmanhmawh angreng fein scooty awmna lam ka pan ta hlawk hlawk..

Ka tlanchhuak fel chiah chu motor dangin min rawn su bur maia, eng Motorin nge min su tih lam pawh ka rilru a a awm hmain athim zui nghal mup mai..

JEREMY 7(LAST EPISODE)

Kan men chhuah ruala ka hmuh hmasak ber chu inchung var vek nimaiin ka hria,kan hawikual dawn a,ka lu ka chet thei ta hauh lo,engatinge tihian ka awm tih ka ngaihtuah vang vang a,eee.....ka office bang scooty a ka tlan chhuak kha Motor-in min su tih ka hre chhuaka,ka awmdanah hian ka na viau anih hmela,damdawiinah ka awm a ni ngei ang. 

Inleh ka tum chuan ka chesawn hleithei chuang lo,tawng ka tum a chu pawh ka thei chuang lo,nasa zawk in tawng tumin ka bei leh a,zawite hian "nu" ka ti thei hram,a ri  chang chang niber in ka hria,mahse a aia ring chuan ka thei chuang lo. Ka tawng kha a zawi lutuk a an hrelo nge,ka thi a kuang chhungah ka awm zawk tihte ka ngaihtuah  rum rum mai.

Che thei lo Beidawng leh chau bawk si a ka awm laiin  ka nu  ka hmai bulah arawn kun hniam a,ka harh tih a hriat vang nge a hmelah chuan lawm tih hriat ngawih ngawih hian min en a,"Bawihte,ilo harh ta maw? ka va han lawm tehlul em" ati nghal mawlh mwlh mai a,ka pa pawh a lo lang ve nghal a,ani pawh alawm tih a hriat mai. An awmdanah ka lo na zek anih hmel e..reivaklo hnu ah ka unaute anlo lang tak tak a,an lawm hmel em em vek mai,ka chhungten min hmangaih zia a thar in ka hmu leh ta nih hi,enge ka eiduh tih leh na ka neih leh neih loh min zawt sek bawk a,hlim tak hian an titi laih laih bawk a,mahse ka la kimlo riau,tiang khawp a ka na a ka harh leh anih si chuan engatinge tunah Jeremy hi alo lan miah loh?,a duh tak a hmuh meuh chuan min hre ta lo a ni ngei ang...a sual hle mai.

Ka nu-in ka chetsual dan min lo hmutute sawi min hrilh a,khatia min rawn su bur kha ka leng lawp a,scooty phei chu a chhe nasa hle a lo ni a. Jeremy te haw tawh,thil theihnghilh neih vanga lo let leh in min rawn su lai kha an lo hmu hmana. Thisen ka hlih hnem bawk  ka thi emaw anti hial a lo ni.Ni 5 zet engmah hre lo in ka lo mu tawh reng bawka,ka harh hnu a an hlim zia kha ka ngaihtuah a,hlimawm tak pawh an ni e.

“ i thianpa pawh a fel khawp mai”a tih chuan “tu ka thianpa maw?Rinsanga maw?” ka ti sap a, "aw,ani pawh a fel lutuk,mahse ka sawi zawk tak chu Jeremy zawk ania"ati leh maia. Ka rilru hria ni awm tak hian" voiin chu office ka va tlawh ve lawk anga,thil danglam a awm anih chuan minlo hril vat ru ati a" a ti zui leh a,"anih chu" ka ti halh ringawt.Rei vaklo hnu chuan ka khawsik a awm leh tak avangin min jection leh a,ka muhil leh ta siai siai mai..

Kar 3 lai ka awm hnu ah chuan ka ziawm ve ta khawp mai a,midang rinchhan chuan ka kal ve thei sawih sawih tawh a,pangngai taka kal tur erawh chuan kum khat lai ka nghah pawh angai mahna. Ka thiante ho an fel em em veka. Jeremy pawh alo kal zing viau,diktak chuan ka  duh aiin alo kal zing mah mah zawk. Amah ka duhna engmah la bo ta lo chu ka rilru a nem leh der tawh,ka chhungte lah chuan ka rilru hre hauh loin an be tha em em mai si.

Keimahah ka awm chang chuan ka  ngaihtuahna ka kawm chiam chiam thin a,ka dam tak tak thei lo mai ang tih hlauin thlansa phunga inngaihtuah chang te ka nei fo.

“I ngaihtuahawm rih lo bawka,bazarah mamawh ka zuk lam lawk ange,i mamawh tur ka chhawp vek che a,i inthiar tawh bawka, chet lo tum lo la,ilo muhil siai siai dawn nia” ka nu-in min ti a.,tunah chuan cabin ah ka awmtawh bawk a,a nuam angreng phian.

Ka nu chhuah hnu lawk chuan ka ni fanu alo thleng ve leh a,kan titi luam a,Jeremy fel a tihzia a sawi siam siam a,min awh thu a sawi laiin”ka awhawm loh tehlul nen,thian nih mai mai a ho e,ka rilru a tina hnem tawh em mai tih ka lo ngaihtuah daih thung. “I nu lo let hma chu ka lo awm ang” a tih avangin “A tihzia hlauh chu,mahse ka mut a chhuak lutuk, ka  muhil dawn ania,nangpawh muhil ve daih la" ka ti a,”muhil rawh. Ka inkhel dawn” min tihsan mai.

Ka muhil ka harh chuan a lo reh thiap maia,ka nu lo let hmain ka cousin kha a haw nge ka nu a lo let tawha,pawn lamah a chhuak leh lawk zawk pawh ka hre lo.Reivak loah kawngka rawn inhawngin ka rinloh lutuk in Zothani a lo luta,ka phu ru zawk a,ani lah chu ala nui var var lehnghal.

"i harh tawh maw?,enge i an," a ti nghal sawt sawta. Tawng loin ka bu nghat ringawt a, khum bula chair rawn pawhhnaih pah hian “"ti ti pui che ka duh vangin ka lo kal a,i peih angem?" a ti leh a,ka peih thu ka hrilh ve tak nangin ka rilru tak chuan ka peih lo.Jeremy bak a sawi ka ring lo va,nat ati zual mai mai dawn. Mahse engmah ka sawichhuak lo thung.

Min en vang vang hnuah a thaw haka."min ngaidam rawh aw,dawt kan hrilh che a,keihi a bialnu ka ni reng reng lo a,i hriat ang khan a cousin ka ni e" ka rin loh tak hian a ti dam thlapa,lo tawng tuma ka ban kan vai chu min khap thuai a,"min sawi zawh  tir rawh, khongaihin" a tih chuan ka ngawi ta a,a duh duh chu han sawi teh se ka ti rilru a. In cousin nichunga inngaizawng,ka ten ruk em em hian eng nge sawi tur a neih tehreng ni..

“Jeremy hian hmeichhia a hmangaih em em kha tudang nilo in nangmah ngei hi i ni asin,in tleirawl tirh a bialpa i neih hmasak ber atang khan a hre chhuak a,mahse khapa kha i duh em em mai si a,i laka a rilru put dan asawi ngam ta lo a,ahnu-ah ani pawn hmeichhe tamtak a kawp a,mahse nangmah chauhlo chu tumah duh aneih loh vangin a kawp lawr vel mai mai a ni,ala thu tak ngai hek lo.Nangin ngaihzawng en in i en lova, i hnaih duh loh a hlauh em avangin a inthup nasa a. Angela an tawn takah khan tlemin ani kha chu a ngaina ta deuh,nangmah a theinghilh theih che ringin nupui atan a nei a,mahse awmzia a awm chuang lo tih a hrechhuak leh thuai tho. An inthen hnuah nang kha ilo haw leh ta bawk si a,a duh em em che a,zui reng che a duh bawk a,mahse mipa i ngaihsak lo a,i hmangaih hmasak ber kha ila duh niin a hre bawk si,tih ngaihna a hre tawh lo a,tiang zawng hian i rilru en kan tum ta mai a ni. I ngaihdan chuan kan tenawm viau anga,mahse kan hlawhtling in ka hria" a ti ta duah mai..Khap fawk fawk chungin " enge hlawhtling i tih chu a awmzia?" ka ti ban chat,a thilsawi kha mak ti em em mah ila awih tur a ni em ka hre rih lo.

A nui saka, “hmeichhia ve tho ka nia,office a kan inhmuh khan i rilru tur ka hre mai a ni,nilenga i awmdan kha ka enthla reng che a,in 2 khan tul lo ah hun in khawhral mai mai tih ka hria a,amah pawh ka hril nghe nghe.Khami zan khan in in ah lo kal a, engkim hril che a tum a,mahse tumloh deuhin in awm ta sia,i accident laia a mangang zia chu hmu la i khawngaih ngawt ang" a ti zui leh a.

A va mak em!!!! Thaw halh chungin a hmel thutak ran mai ka en a,a sawi zawng zawng hi  ka awih dawn nge dawn lo?,kha hmeichhe mawl kha ka lo ni reng a maw? ka mumang animai lo maw? zawhna hlir a ni ber e. Thildang a sawi zawm leh siam siam a. Ka biak that duhlo vang a rilru na lutuk-in zu alo in chiam thu te,nikhawhrelo a ka awm lai a,damdawiin a kalsan duh loh thu leh ,a beidawng lutuk office ah ama room a mittui tla chung a atawngtai te...aaaaaa..asawi teuh mai,ka na pawh ka hre tawh meuh lo,tunah hi chuan  amah hmuh vat ka chak ber.

Zothani phone chu a rawn ri a,chhang chungin min en a,anui var var bawk. Phone dah hla te tein zawi te hian  "tunah lo kal a duh a,i phal em" a ti sa sa..."lutuk".... hmui phunin ka ti ve thuai.

Reilote-ah room kawngka a rawn inhawng a,ka mipa hmangaih em em chu a rawn lut ta,a va han tha chiang tak,tun tum chu zak hauhlo in alo lut chu ka lo en a,amah zawk chu alai ve deuhin ka hria..thut pawh a thut hma in Zothani chuan "tihtur ka nei ,ka hmanhmawh" tih leh chhuah a rual nghal a.a nghal hrep mai.

Muangchang ruih hian khumah chuan a rawn thu a,a ngawi ngul mai," engmah i sawi dawn na nge?" ka ti teh ngawta.. min chhang loin a rawn tawlh hnai thut a,min rawn kuaha,zawi fiah tak hian" thi suh aw,khatiang  khan i awm leh anih chuan ka dam zo tawh lo ang" a ti a..  Engkim hre tawh ka ni bawka ka chimawm chak thut,"engvangin maw i dam zawh loh ang?” Ka ti luia.

Min thlahdul hret pah chuan "ka hmangaih che vangin mawle  Mawli" a ti nghut.

“Anih leh mimawl i hmangaih amaw?”ka ti leh zel.. Min en vang vang chungin “um,nasa tak leh ka theihna zawng zawng in"a ti nghet charh.."keipawh ka hmangaih che" lai angreng taka ka tih chuan min rawn fawp ta vawng vawng a,hetiang reng reng hian in kiss hi a nuam tih ka lo hre ngai lo.

Hriatchhuah  thut ka neih rualin ka inla hrang a,"engatinge ahma khan min hrilh mai loh?” Ka ti nghat..

 "nangpawn engmah i sawi hleinem” a ti ve thung."keite chu hmeichhia ka nia,nangte chu mipa,mipa ah pawh pa em em i nih kha"ka ti leh zat zat.

"May,i lakah hi chuan ka pa zo thinlo alawm,mahse damchhuak lo la chuan kha motor khalh tu kha ka that chiang ngawt ang" a ti bung hmuk,a tho thut a,room kawngka a va kalh a,"hey,ka nu emaw mi dang pawh an lo lut duh ang” ka ti vat. Nui suk chung hian "zanah i nu a lo  kal tawh dawn, ka be lawk vek" a ti awlsam et mai.

khumah a rawn mu ve a,khum a te si,ani a lian si” hey, tho teh, i lian si,khum hi a chhia ang,bakah ka tla mai ang"ka ti chul maia..

"i tla lo ang, hlau suh,"tichungin min rawn pawm bet leh a,duhthawh zet hian min fawp zui leh ta a,keipawn ka thiam tawkin ka chhang bawk a, ka kawr chhung ah zen in ka hnute a rawn hmet a,dam lo mah ni ila engmah ka ngaihtuah thei lo. Ani hi ka thlahlel em em tlat a ni,ani pawh a awmdan a dik bik lo.. 

Ka  kekawr kawng a a zen lut tur chiah chu ka harh zawk mai,a kut ka man bet vat a,ani lah chu a thaw hawk mai,tisa chakna a khat hian min melh sawr sawr a,a va han sexy chiang tak..."duhtawk ang aw,hetiang chu a tha lo,puitling kan ni tawh a,mihring chu kan bum thei a,mahse Pathian kan bum thei lo ania" ka ti sap..”anih chuan min nei vat rawh"a ti hluka"um,tehreng mai,engtiknge niang?"nui chungin ka ti a."tunah" a tih veleh ka sik a,nui chung hian "ka ti tak tak,ka insum thei loh ka hlau ania,ka piangthar tha vaklo tih i hriat kha,tunah pawh damlo ka sual lo chauh chu ania" nui deuh chung hian a ti a..”Aw le, ka hria e,mahse nghak hram hram la,ka dam tep tawh alawm" a beng khawihsak chungin ka ti a.

'A tha alawm, kum tamtak  ka nghak tawh a,tuna reilote nghah leh chu ka thei mai ang chu"a ti a.."Ka lawm e,ka hmangaih che,JEREMY NGURNUNSANG"zak hauh loin ka ti a"keipawh,ka hmangaih che,MARILYN ZORINSANG" a ti ve bawk.

A tawp ta.