Jonathan-2

 Then -2na

 Then - 2na

Ka haw kawng tluanin ka rilruah Jonathan-a bak a awm lo. Ruihhlo ngai a ni a, Chutihrualin ruk a ru emaw damdawi a vawrh anih ngawt loh chuan a ruih vang ngawta man thu a awm lo. Chumai bakah gym a thilbo chungchangah khan man a tawk ve niin ka hre bawka. Engtikah nge Jail atangin a lo chhuah reng reng ni? 

“Chaw kan la ei dawn lo mi? Zanah committee ka nei a nia” ka nu hnenah ka ti a. “I u a lo la haw lo va, kan eisan mai dawn nge ni?” a tih chuan “Office an la bang lo maw”? ka ti he haw. 

“Bang tawh ang chu, Vengthlang-ah insualbuai an awm e an tia. An rawn ko anih kha” a ti leh mai. “Phone ula,a lo la haw dawn loh chuan ei san a pawi nang. Nang pawh i inkhawm dawn a ni lawmni?” Ka nu hnenah ka pain a lo ti ve a.

Ka nu-in ka u a biak chuan a lo la haw hman dawn loh thu a sawi avangin chhung inkhawm kan hmansana, committee  tura ka chhuah dawn thlengin a la rawn haw lo. 

Kan committe-naah pawh ka rilruah JOnathana kha a awm ta deuh reng. Amah kha ka lo hmuh fo tawh leh sual thei lo tur ang deuha ngaih tlatna ka nei nge pawh ka hre lo. Ka lainat em em ringawt maia, nidangah pawh vawi tamtak misual an man ka hmu tawh thina, ka khawngaiha ka ngaihven zui viau ngai pawh ka hre lo. 

Kan committe rei deuh avangin ka haw hnuah pawh  Zorina call in ka be ta lo va. Ka kalna a hriat tho avangin ani pawn min rawn call bik lo. Ka haw hnuah msg-in kan ban chiah thu leh ka mut nghal tur thu ka hrilha. Min reply tawh loh danah a mu tawh anih ka ringa, zing a ka harh pawhin msg a lo la en lo.

Zan lama ruah a sur vak avangin a vawt deuh vur a, tunah pawh khua a nuam lo ngang mai. Ka kal lo mai dawn mawni aw ka ti zet nain ka tho ta sa sa, ruah a sur em rih lo bawka tiin ka insiam sawk sawka, phur fahran loin ka kalchhuaka, thui pawh ka kal hmain ruah a rawn sur tan chu a ni leh mai. In lama let leh dawnin kawng chanve dawn ka kal tawh lawi si,hmanhmawh taka tlanin mi veranda hul laia din tumin ka lawnkaia, drug addict ka hriatchian tak pahnih an lo thu dun ran. 

“Zela, in va tho hma awm ve” ka tih chuan a phu zuk mai. Nidangah inhmu fo mah ila kan inbe vak ngai lo. Amah hi vengthlang lama awm niin keini aiin a nau zawka, ka nau te nen sanday school-ah an pawl a inang thin.A tleirawl chhuahhlim atanga awm tha duh vak lo ni mah se sual lutuk han tihtur a ni ngai lo. A nu leh pa inthen hnu, a nu in pasal dang a neih hnuah a tal ho chho a, damdawi a khawihna erawh rei ala ni lo thung. A pianthar chang chuan nasa taka hlim chi a ni a, rei phei chu a daih ngai chuang lo. Exer ka lak tirh lam khan henglai velah hian ka hmu zeuh zeuha,a kun tlat thin avangin ka be ngai lo. 

“Nia, nang pawh” ban angeng tak hian a ti a. “ ruah a sur dawn tih hria ila lo mu mai mai ila tha tur ania. Biak-in lamah kan va inhmu khat ve, rawn inkhawm leh tawh la..” ka tihzawm zat. Za lo taka nui chungin “ um, ka rawn ti veleh tep tawh ang” a ti a. Min en danah min be chak lo ni a ka hriat avangin be zui zel loin ka phone ka khawihsan ta zawk. 

Ruah sur a ziaawm veleh hmanhmawh takin gym lamah ka tlan thlaa, awm an lo la awm mumal lo. Darkar chanve dawna nidang aia ka tlai avangin awm pawh ka awm rei ta hek lo.

“Ka pheikhawk chah hi ka duh aiin a lo lian hreta, i lei chhawng duh em?” ka thiannu-in a rawn tih chuan a thlalak min rawn thawn turin ka ti a. A rawn thawn nghal thuai. Ka mamawh tak anih avangin la return lo turin ka hrilha,tlaiah haw paha ka en tur thu ka hrilh tel bawk. Diktak chuan pheikhawk vang pawh ni chuang loin Jonathan-a an man chhan kha hriat ka duh a, ka haw hma deuh chuan tlawh kawi ka tum sa hrim hrim. Chhuanlam tur remchang tak a awm ta erawh ka lawm viau. 

Nimin lam nena letling thawkin kan pu mood a tha leh ta thung. A ninawm lam lek lek zawk. Thil ho mai mai sawiin a nui huau huau renga, a thinrim thei lo emaw tih mai turin kan thil tihsual thlengin a nuihpui vek. Zaii’n over a tihzia a sawi kha ka hrechhuaka, a sawi thiam ka ti lutuka, msg-in thudun reng e ti loin a tawngkam ngai chiah kha ka va thawna, msg a chhiar rual rualin min rawn en a, a nui khur char char mai.

Ban veleh Vaivakawn police station lam bawk ka pan ding nghala, mahse ka thian-i a lo awm pek lo. “ lo nghak rawh, puanthan an en lawk anih kha. A rei lovang” a thawhpuinu-in a lo ti a. “Ti nge a duty lai laia chutiang mai mai titura a chhuah a? Kalphung thar a ni tawh lehnghala. Transfer leh thuai angai anih chu” ka tih chuan a thawhpuite an nui dar dar mai.

Reipawh ka thut hmain a rawn let a, “ka rin aiin i lo thleng hma..Hunawl-ah puanthan ka lo zuk en zuai zuaia, nang i lei tawh mi?” min ti nghal a. “Lei nang, lei pawh ka lo tum vak lo. Neihsa ha ila a tawk mai alawm” ka ti awlsam then. “khawnge pheikhawk chu?” ka ti nghal zat. 

A rawn phawrhchhuah chuan ka bun chhina, ka bun tawk chiah a lo ni a. Lei tuma online lama ka enkual vel lai tak anih avangin tihzia ka ti ngang mai.

“Enteh, nimin tlaia an rawn man zingah khan ka hriat zawng pakhat a tel a” midang hriat loh turin ka ti sa sa. 

“A tu ber kha nge? I haw dawna an rawn hruai zingah khan em ni?” a tih chuan  anih thu sawiin “ a hming chu Jonathana ania..’ ka ti a. An veng hming ka sawi nghal bawk. 

“Eeee, kha kha maw..A chhuak leh tawh. Damdawi vawrh tu an man laiin an bulah a lo awm ve a, chuvangin an rawn la tel anih kha” a ti sam et. “amah pawh khan a vawrh ve thin lo maw?” hriatchian tum ru tak hian ka ti leh a. 

“Vawrh pawh ka hre lo. Amah kha mize mak deuh mai ania. Helaia ka awm hnu hian man a tawk ve zeuh zeuh a. A thiamthu hi a sawi duh ngai miah lo maia. Nimin pawh khan damdawi vawrhtu ber khan chiang takin sawi lo se chuan ani pawh kha a talbuai ve ang. Ka zuar ve lo tih pawh tum loin a ngawi reng ringawt maia. A rui poh leh a cool emaw tihmai tur hi ania. Insual buai vang te pawhin kan man fo a. Thiamthu han sawi pawh hi a nei ngai lo” a ti ta duah. A mizia tura ka lo rin nen a inhmeh ka ti viau mai.

“Engtin nge i hriat a? In hna kaihhnawih-ah em ni?” a ti leh he haw. Aw ti a chhan mai ka tum nain anih loh thu leh hmelhriat satliah anih thu ka sawi ta zawk.

“Han awm tha duh nise nu leh pa a nei fel si. Amah lah badminton thiam lutuk mai, hma hun eng lutuk ania..Ruihhlo bawiha tan hi chu a pawi ngawt mai” a ti leh siam siama.  Ka rin aiin a hrechiang ta tlat.

“I va hrechiang leh lawi si ve” nui chungin ka ti a. “ Um, nia.. A naupan deuh laiin kan veng thenawm lawkah an awm reng thin alawm. Amah tak hi chu phai lamah a awm reng thin avangin ka lo hre vak lo zawka” a ti leh ta zel. A chanchin zawh belh la chak viau mah ila mak a tih ka hlauh avangin ka zawt zui duh ta lem lo.

Hun a liam ve zela, Pathian zara dam chuan hun hi a kal zung zung mai hian a hriat thin. Hnaah buaina tawk ka hmu ve reng bawk nen ni a liam zung zung-in ka hriaa, ka hna lah nuam ka tih chi tak a lo ni lehzel bawk si. 

August thla kan chuangkaia, kum 31 ka tlin ni tur pawh a hnai ve ta..

“Kumin chu i birthday ka hmanpui hman loh che ka hlau angreng” Zorina’n a ti a. “Aaa, hmanpui kher ka ngai hleinem,ka upa tawh dawn si. Han lawm vel pawh ka duh tawh teuh lo mai” ka tih chuan a nui huk huka. 

“Upa i intih chuan fa neih kan la tum dawn tih kha han ngaihtuah tel ran mai la. Palai pawh thla tharah chuan rawn kaltir ka tum tawh dawna. Inhnialna tur chawk chhuak miah lo la a tha a ni mai” a rawn tih chuan ka rilruah inneih tih lam reng reng ka lo ngaihtuah leh tawh lo tih ka hrechhuak zawk mai.

“Inneih hi a chakawm loh e tiraw” ban deuh tak hian ka ti a. “Tikhan ngaihtuah lo la, i rilru a insual leh anga, i ngaihtuah buai leh vak dawn ania” zaidam angreng tak hian a rawn ti a, “ngaihtuah loh a har alawm. Ka upa tawh si, i nu te pawn min hrawn peih lo ngawt ang. Ka sual zia hlir sawi ang che, fel deuh ang te khan min lo ngai ange, ka thinchhe lutuk tih thlengin hrilh rawh. Nakinah an rin ang ka lo nih loh chuan a buaithlak” ka ti leh chu a nui ta hawk hawk. Inneih kan sawi apiangin he thil hi ka sawi ve ziaha, thinrim-ah pawh a la tawh lo. A nuih a za ziah zawk.

“Tete,enteh.. He thil hi” tih pahin Zaii’n ka hmaah tak a phone a rawn daha, “eng nge?” ti chunga thil inziak ka zuk chhiar chu ka mur uai thei. 

“Ehe,a va zia lo ve a. Engtika thleng nge?” ka ti vat. “Ka hre bik lo. Minute 5 vel chu an post atangin a liam tawh anih hi” tichungin a kalsawna. 

“YMA Duty ho kutthlakna tuar loin a boral an tih kha mi insawi?” U Rotea’n a rawn tih chuan Zaii’n anih thu a lo sawi thuai. 

Ka phone lain facebook-ah ka lut nghala. A lo lang nghal kuau. Comment pawh a lo tam em em tawh. Mithi hming ka hmuh rualin ka rilruah Jonathana a lo lang nghal zat. 

Sawisak hlum ngei ni a post siam na hnuai chiahah Side B lam post a lo awm a. Ka chhiar nghal thuai thuai.

“Boral ta Lalthansanga hi Drug addict ni a sawi a ni a. Vengchhung tana hnawksak ve tak thin, rukruk avanga vawi tam man lo tawk tawh niin tuna vanduaina a tawh hma lawk pawh hian rukruk avang bawkin Jail a tanga. Jail atanga a lo chhuah atangin karhnih vel chauh ala liam niin an sawi. 

Nizan lamah rukruk leh insual buai naa a tel avangin YMA hruaitu lam hian an zilh a. Engmah a sawi that duh loh avangin ben te pawh an beng nual niin an sawia. Chutihrualin insawisa hlum anga thuthang awm hi chu thuthang belhchian dawn lo anih hmel” tiin a inziak kuau maia. An veng hming leh amah Lalthana lo ni ve chiah bawk nen Jona cousin Lalthana bak anih ka ring thei lo. 

“Engatinge kut hi an thlak ringawt zel le? Kutthlak theihna dan an nei tawp si lo” Zaii’n a ti hlak hlak. 

“Kutthlak theihna chu an nei hauh lo ang. Mahse hetiang khawtlang tana mi hnawksak lutuk ni si, police lam kuta hlan annih hian rei an tang thei tak tak bawk si lo va. Buaina an siam zin viau phei chuan khawtlang hruaitu tan chuan hlap er zawk zawk chu an chakawm ve lo thei lo. An han ngeng viau zui phei hi chu buaithlak tak mai ania” u Rotea’n a ti ve thung. 

Office ban hun dawn hnaih a ni tawh bawk nen hna lam pawhin rilru a luah thei tawh lo. Kan ngaihdan sawiin kan ri laih laih reng a. A khat tawkin comment ka en a. A damlaia a sual thin zia hre hauh lo va Lalthana tan zawnga na tak taka comment an tam viau. YMA lam demna a ri luih luih a ni ber. An sawi tam berah chuan “eng anga sual pawh ni se vuakhlum theihna dan an nei lo” tih a ni deuh fur. 

In ka thlen veleh ka u a haw tawh em tih ka zawt nghala.” A inbual anih kha. Vawiin lam thuthang nen a vin hlur mai” ka nuin a ti a. Ka u hi kan unau zinga ka nu duat bik a ni a. Kan vaiin min duat theuh nain ka u hi chu ka nu lakah thil tisual thei lo ang mai a ni thin.

“Eng nge a vin phah ve vak ringawt a? Diktaka sawi chuan mi kutthlak theihna dan an nei lo chiang ve em mai” ka ti nghat nghat.

“Eng maw i sawi? “ ka u in a rawn tih chuan ka thusawi kha a rawn hre hman tih ka hria. 

“YMA duty ho hian mi kutthlak ngawt theihna dan innei lo ka ti. A mawl mawl bakin kut an thlak lovang” ka ti deuh kher. 

“A mawl mawl tih angai em ni? Eng emaw chang chuan kutthlak ngai ngawih ngawih an awm ve ania. Zan khat chu sawi loh, darkar khat lek pawh khawtlang tana tha thawh pei lo hlei hlei hi a phunchiar inni duh lehnghala” lungawi lo tih hriat tak hian a ti a. 

“Ka phun lo bawk e. Dan ka sawi mai anih kha. YMA hruaitu zawng zawng pawh ka sawisel bawk lo va, i lo inngaihbel ngawt danah nangpawn kutthlak i ching a nih chiah kha” kalsawn pahin ka ti a. 

“Ka thlak ngai hauh lo ve. A  thuhrimin kut an lo thlak pawhin a tul vang liau liau aniang. Tuman mi fel awm hle hle kut an thlak ngai lo. Khawtlanga mi hnawksak chang lo mi chhungkaw buaina thlenga chinfel sak chang nei kan ni a. Nuam kan tih vanga YMA a inhmang emaw min ti aniang e. Nuam tih zawngah chuan nuam lo tak a ni.  Mi huat hlawhna te a nia sin. Chuvangin YMA ang zawnga sawisel tum miah suh. I thih huna lumen tu tur che chu YMA ho tho annia, vanduaina dang pawh tawk la YMA ho tho in an pui ang che. An thil tih that sawi duh mang si lo, thil  pakhat leka an hmingchhiat avangin sawisel tawh reng reng suh” min ti ta hrep.  A tawng dan chuan ka thin a ti rim ta lutuk. 

“Anih leh YMA chuan chung zawng zawng an tih vang chuan mi an vawhlum thei i tihna mi? Keipawh YMA member ka ni a, kan veng mithi lumen ngaiah hian kal loh ka nei mang mang lo. Hruaitu te angin thildangah ka hah ve lo tihmai chauh a ni. Hah taka Khawtlang tana inthawh vang ngawtin mi kutthlak chiam chiam kha eng dan nge?” ka ti leh hmak hmak. 

“A kawi zawnga lak i tum anih kha. Tuman an vawhlum lovang. Nizana an zilh pawh kha zawhna a chhan that duh loh vangin an beng ve deuh an ti lek asin. Duty ho awmna atanga a chhuah hnuah midang kut a tuar pawh a ni thei. Khati khawpa sual chu midang hmelma a nei pawh aniang chu.  A engapawh chu nise khatiang mi hnawksak lutuk kha chu damrei lo se  a tha zawk” ka rin loh tak hian a ti ta hmuk. Nidangah pawh inhau a inhnial reng thin kan ni a. Tun tuma kan inhnial dan erawh a danglam ta.

“Ngawi tawh rawh u, mi vanduaina tawh lai laia engah nge khati taka nangni in lo inhauh a?” Aw ki nghet cherh chawrh hian ka pa in a rawn ti ta a. Ka chhungrilah la thinrim et et mah ila englaimaha ka pa in ngawi tura min tih hnua chhang ngai lo kan nih avangin tawng ka tum lo.  

“YMA hi pawl ropui a ni a, mi chi hrang hrang awmkhawmna anih avangin lo che na fal pawh an awm ve ang. Chet sual palh chang a awm thei vek. Chu chu thil nih phung pawh a ni. Lo pawngpaw dem chiam tur a ni lo. Nangpawh Valpui, misual a ni emaw ni lo emaw mi tu pawh khatiang khan sawi tawh ngai reng reng suh. Mi rilru chhe zia anih kha” a ti leh charh charh. 

Zanah pawh ka thinrim a la reh hleithei lo. Lalthana vanga thinrim pawh ka ni chiah chuang lo. Kan duty hah lutuk tih vang mai maia misual an man te kutthlak chiam zel hi ka ngaihdan a ni lo lutuka, chu zawk chuan ka thin a tirim ber. 

“FIR te chu theh lut ve bawk mah se eng ruai a ni lovang. Hahdam deuh khan awm tum la”Zorina’n min ti a. Ka tawt lutuk a bulah ka ang ngheka, ka thawl deuh huai tawh. 

“Khawvel hi a fair lo ka ti. Misual pawn dikna an nei ve tho si” ka ti halh. 

“Um,a dik alawm. Eee.. naktukah i thil tur ka chah a lo thleng dawna, office lamah nge in-ah ka rawn dah tir ang?” a rawn ti leh daih. “Eng nge i chah a?” ka ti he haw. “I earphone chhe lutuk kha ka hne riaua. Earpods ka chahsak che” tha takin a rawn ti leh mai. A sawi zawh rualin ka nui haka,”min surprised ve thin la,tihian i sawi tlang vek zel. I romantic lo thei e” la nui reng chungin ka ti a. “Surprise i duh loh kha” nui  chungin a ti ve thung. Kum naupang tawh lo tak pahnih inngaizawng kan ni a, inngaizawng hlim lah kan ni hek lo.  Kan hun pawimawhah pawh a ruka thil in leisak tihvel ai chuan mamawh inzawh tawp hi kan chindan a ni tawh zawk.

Ni a liama, ka u nen kan inhnial chiamna chhan Lalthana thihna pawh kar a liam leh meuh chuan tuman kan sawi peih leh tawh lo. Hei hi chu nidangah pawh a nih dan ziah a ni a, amak lem lo. Thil thleng eng emaw a awm chuan kan ri hluaia, tawngkam duhtui lo tak tak ten kan inbei chiam mai zela, mahse rei erawh kan sawi zui peih ngai lem lo.

Ka piancham a lo thlenga, pu in ka piancham puala kan team ho zawng zawng min treat dawn avangin office banah kan chaweina hmun tur lamah kan kal ta dial. Darkar khat zen zawn kan awm hnuah haw turin kan chhuak leh ta chauh.

In lam pana ka tlan pahin Zorina nen kan inbe paha, earpod kha ka piancham thilpek atana min pek emaw ka tih laiin ka mamawh tak,running shoe vawiinah min leisak leh ta tho.

“In ka thleng e, ka intihfel hnuah ka lo be leh dawn che nia” tiin phone ka daha. Kawi fe a ka u in  bike lo dah avangin ka phun nghal hlak hlak. Scooty ka dahfel hnuah in a chho ta mai loin kan inthlang dawrah ka chhukthla leha, ka thil mamawh ka lei fel hnuah ka chhuak lehnghala. Kan in lam pana ka chho leh tur chiah chu “u Tete” tih ri ka hriat avangin min kotu hmuh tumin ka hawi nghal thuai.

Kawngsira motor inhung phen atanga lo chhuak chu tu nge a nih hriat tumin chik takin ka en a. Hmuh ka inrin loh ber zinga mi ni hial tur Jonathan ka hmuh chuan ka thaw ru halh. Police station a ka hmuh kha ka hmuh hnuhnun ber a ni a, thla khat aia tam fe chu ka hmu tawh lo. Thla hnih aia tam pawh a ni zawk mah maithei. 

“Ka be duh che a, ka lo nghak ve tawp che” ka chhan mai loh vang ni ngei tur hian a ti leh a. A inthlahrun hmel viau.

“Oo, lo kal rawh. Inah lo chho la” ka ti ta thuai.”Aih, helaiah hian inbe zawk ang” rang tak hian a ti ta tlat. Hnial ka tum zet naa thil pawimawh takah lo chuan min be duh dawn lo tih ngaihtuahna ka neih avangin “aw le..’ ka ti ta zawk.

Kan in hi a hnuai ber kawng-an Garrage atana kan hman loh zawng dawr atan miin an luaha. Motor part dawr niin zanah an inhawng ngai lo.Garrage sir deuh tlema thim laiah kan ding dun a. “Eng nge min biak duh chhan?”a ngawih leh tak reng siah chuan ka ti a. Min en ngam lo niawm tak hian hnuai lam bih ngar chungin a dinga. Chhun lamah ruah sur mah se khua a lum uap deuh churha,chutichungin sweatshirt leh kekawr tlawn hain mawza a bun ap tho.

“Advocate i ni tih ka hriaa, khawngaihin min pui thei angem?” a tih chuan amah ka hmuh tirh ang mai khan ka thaw halh. Anni ang tan hi chuan dam lam thiam hi kan pawimawh lehzual em em tih ka hai lo. Mahse a mizia niawm ka ngaihtuahin tanpui tura min ngen erawh mak ka ti viau.

“Engthilah nge puih i ngaih?” tha takin ka ti a. 

“Hman ni deuh khan ka bestfriend a thi a. I lo hre ve maithei, amah chu Lalthansanga ania, YMA duty ho-in kut an thlak vanga thi an tih kha” a tih chuan ka ip deuh chawih.

“Um, ka lo hre ve e. .i bestfriend a lo ni maw?” ka tum aia ban deuh chat hian ka ti a. An in cousin tih chu hre ve tawh mah ila a bestfriend a ni tih reng reng ka lo hre lo.

“Ka cousin anih bakah ka bestfriend ania..A boral danah khan thil thleng tamtak a awm a. Chu mi vang chu ania min pui thei angem ka tih?” a tih leh chuan “FIR kha in hnukkir leh niin ka lo hriaa” ka ti thuai. A khuh kharha,” a dik alawm..YMA han khin kha an ngam lo aniang. Hneh pawh an hneh kher lovang..Mahse keimah hian buaipui ka duh, amah kha a lo sual viau anih pawhin a dikna chanvo hailan sak ka duh” sehchilh lek lek hian a ti ta duah. A aw a khur lek lek. 

“Enteh, i tawrhna ka hrethiam lutuk che. Mahse tha taka thil kal tawh ang ania, a hranpaa lo tih thar leh chu a rem chiah lo in ka hria..I chhungte nen lo inrawn leh phawt ula a tha angem?” ka tih chuan a thaw hak.

“Anni te chuan ngawih an thlanga, chuvang alawm FIR pawh an hnuhkir leh,khami zana thil thleng kha engkim ka hre ve veka. An vaia khin pawh ka tum lo. Kutthlak nasa ber tu ka hriaa.Amah kha mantir ka duh” a ti leh ta zel.

“Um, engpawhnise naktuk lamah office-ah lo kal la, kan inbe tha dawn mi niang? Pu nei ka nia, keima thu a case lo buaipui ve ngawt thei ka ni lo va. Ka sawi i hre thiam tiraw?” ka tih chuan min chhang mai loin a ngawi deuh reng. Kan in Gate inhawng ri ka hriat chuan ka hawiphei thuaia, ka u a ni tih ka hmuh chuan Jona lam ka hawi leh maia.  Ani erawh chuan ka u lam a la en reng.

“Nia, ka lo be leh dawn che nia. Khawngaihin ka lo sawipui che tih tuman an hriat ka duh lo a, min zep sak thei angem?” ka u tlanchhuah hnuah a ti ta chauh. Sawi lang chiah lo mah se ka u kha a mi hriat zawng a ni tih rindan ka nei thiam maia, a ngainat zawng a ni dawn lo tih pawh ka chiang reng.

“Tehreng mai, kan hnaah hian thuruk zep hi chu sawi ngai lo va chiang sa alawm” inringtawk takin ka ti a. “I phone number min pe thei angem?” ka rin loh taka a tih leh chuan sawi nawi loin ka pe ve ta mai tho.

Zorina nen kan inbiak laiin Jonathana thilsawi kha hrilh ka tum uk uk a, mahse ani addict thu leh hla mai mai kha lo chawtak khukpui nghal hluai chi ni a ka hriat leh loh avangin engmah ka hrilh leh ta lo. Tukin lam ruah a sur nasat em avangin ka gym lo va. Tlaiah lah ni se kan dine out avangin ka kal leh thei lo bawk si. Naktuk zing chu ruah pawh sur se ka kal tho tho ang ti rilru chungin muthilh thuai tumin ka maimitchhinga,mahse ka muhil ta mai lo. Ka mitthlaah Jonathan kha a cham reng maia. Lalthana chungchang a sawi laia a aw khur lek lek te kha ka ngaihtuah let hian ka khawngaih leh hnuhnawh a. A landan engkim mai khan khawngaih thla a la hliah hliah a ni ber. 

Ka hmuhtirh atanga vawiin thlengin misual tak ni tur hian ka la ring thei miah lo niin ka hria. A landan engkimah drug addict a ni tih hairual a ni tawh lo va. Khawlaiah mai ni lo, police station a police in an man vanga a awm lai thlengin ka hmu tawh. A chanchin sawitu te reng rengin insual hrat, rukruk hrat ti hlirin an sawi bawka. Chuti chung chunga kei hre chiang ve hlei loin misual a ni lo ang ti a ka ngaihtuah tlat mai hi ka inhre thiam thei meuh lo chu a ni. 

A sawi danah khan engkim hre chiang a inti a,chuti anih chuan khami zan khan YMA ho zilhna kha Lalthana chauhin dawng loin ani pawh zilh tawk a lo ni ve reng anih ka ring. Chuti ni lo se a khawih tu kha hriat ngawt thu a awm lo. An chanchin a tlangthan tirh khan mak ka ti em em a. Lalthana chhungten FIR an lalet tih ka hriat phei kha chuan awm ka tihpui rualin ka lo thinrim ve teuh thei. Jonathana sawi ang ngei khan misual vak raw lai mai mai pawh nise a dikna chanvo a hmuh ngei ka lo duhpui em em. Mahse,khawtlang khing anni thawthanga, FIR kha lakir lo ta se, an veng-ah an la awmzui zel dawn bawk si chuan an tan a nuam zawk zawk lo khawp ang. Chuvangin tlawm zawka tan pawh a tul a ni ta ve ang. An vengah awmzui dawn lo tehreng pawh ni se khawi vengah pawh YMA awmna veng leh khua anih chhung chuan an tan a harsa vek tho tho ang. 

Office ka thlen atangin inring rengin ka awm a ni ber. Kawngkhar lama thawm a awm apiangin tu nge lo lut hriat tumin ka hawi phawk hra zela. Chawhnu chanve thlenga a lo lan tak lohah chuan ka thawhpuite pawh engmah ka hrilh duh rih lo hi ka lawm ta viau. Ka rin ang chiah khan ani Addict ve mai khan a ruih loh hnuah a ngaihtuah chiang anga,thil tak tak tih a ngam leh si lo tihna a nimai. Lawk… nizana kan inbiak lai khan a rui pawhin ka hre lo chu anih kha. 

Kartawp a thlen thlengin engmah Jonathan-a hnen atangin ka hre zawm leh tawh lo. Min rawn biak zan kha thawhleh zan a ni a. Thawm engmah nei loin a reh leh ta daih. Min hrilh zana ka lo muthilh theih loh phah hial kha ho ka ti ta viau.

“Khawiah nge i kal a? I phone a rik sek kha..” dawr atang ka haw chho chiah ka nuin min lo ti nghal a. Ka inkhawm ban hnuah dawrah thil lei tura kal zuai tumin ka chhuk a, dawr neitu nu nen kan titi tui tak avangin ka haw leh ta lawk lo.

“U Thari dawra kal chuan a lo titi suam suam zela, let leh mai a har thin lutuk” ka phone en pahin ka ti a. “ Thari zunah hian i pa ho ho hian in uai alawm mawle a. I kal dawn pawhin phone ken tur che alawm” a ti leha. “ keini chauh kan ni em mawni le? Nangpawh i thut ve fo tho kha” ka pain nui chungin a lo ti a. Ka nu lah chuan uar deuh mai hian a thut khat zia a sawi ve thung.

Zorina ka call back pahin roomah ka lut a. A pick -up veleh dawra phone keng lo va ka kal thu ka hrilha. “ phone keng lo va kal chhuah te chu i tih loh dan pawh a ni chuang hleinem” nui chungin a rawn ti a. Ka nui ve ringawt. Thursday zanah palai lo kal se te ka lo tia, chhungkaw prog pawimawh innei dawn em?” a rawn tih chuan ka nuihzatna a tawp nghal hmak. Amah ka neih duh loh vang ni loin pasal neih ka hrehna vang zawkin ka awm a nuam lo nghulh thei. 

“Engmah tihtur kan neih pawh ka hre lo” ka tih chuan “a that chu. A hma lamin lo hrilh la, ka pa ka sawipui tawha. Thursday zan kha remchang an ti deuh aniang”a rawn ti leh thuai. 

Kan inbiak zawh veleh Opi ka biaa, Zorina’n palai rawn tirh a tum thu ka hrilh chuan hlim takin a khek nghal raih mai.

“Phur viau lo mai teh,ka peih lo teh mai ania” ka ti hlak hlak.

“Peih lo mah la neih i ngai alawm mawle. Tunah i neih loh chuan i hreh tual tual dawna,tunah pawh i hreh tawh chu anih kha” a rawn ti leh zat zat.

“Pasal nei tawh ho hi nuam ti viau ni thin ula chu neih pawh ka chak ang. In awhawm lo ve em a ni” ka tih chuan a nui hak. “ a ni ve tho mai. Kei phei chuan ka hrehawmna zawng zawng ka share che a,achang leh ka rawn tap thul. I peih lo pawh ka hre thiam che. Mahse,a hrehawm reng bik lo ania. Anihna takah chuan a hlimawm lai a tam zawk daih. A hrehawm lam hi kan sawi uar thina, chuvangin a hrehawm viau emaw iti mai mai mai anih kha.  Hausa emaw rethei tan pawh Mahni in te chu a nuam vek a. Nang lah mahni inchawm thei chi i ni bawk si a. Mahse tun ang khan a nuam reng dawn chuang lo va, nawmna leh nawm lohna a awm vek dawn. Pasal neih pawh khatiang tho kha a ni mai” a rawn ti leh duah. 

“Ninawm,i sermon nasa thei si” ka tih leh pawhin a hmaa thui zawk mahin pasal neih thatna ala rawn sawi belh nghek.

Opi nen kan inbiak zawh hnuah miss call pakhat lo awm ka en a,number ka save loh niin vawikhat chauh a lo call a. A pawimawh chuan a lo call leh mai ang tiin ka call back ta lem lo. 

Ka hmai ka phih zawha ka mut hnuah phone ka khawih leha. Noti atangin msg pakhat ka hawn loh a awm tih ka hmuh chuan ka hawng thuai.

“U Tete,keimah Jona ka nia. Call i pick-up thei si lo va, hun i neih hunah min lo hrilh thei angem?” tih hi a lo inziak kiau mai. Thil pawimawh a awm a nih ringin msg ka reply nghal thuai. 

Reife hnuah pawh min rawn call loh ávangin msg a en leh en loh ka check a,a lo en vek tawh. A pawimawh viau turah ngaiin ka reply hmanhmawh viau kha ania, a pawimawh leh lutuk lo a nih hmel. Ka ngaihtuah vang vanga,he nau hi a mak khawp mai. Min rawn biakna ka lo ngaihven tha viau zela. A hmasa zawkah pawh engmah thawm nei loin a reh zui daiha,a mizia nen a inhmeh tawk,Addict mai mai thutaka lak tlak a ni lo ti reng chung siin a thil rawn sawi tur ka hre chak hle tho bawka. Ka piana hnu lama ka mi hriat tawha ka rilru min thlak tir awlsam ber a ni hial awm e. 

Ka thawh veleh khua a tha em tih en in parda ka pawt kau nghala. Chhum a lo zing chuk mai. Tlai lama kal mai tumin ka mu leh ta daih.Ka nu in min rawn kaihthawh meuh chuan dar 8 a lo ri tep tawh.

“Naktukah i nau a lo haw dawna,kohhran thil pawimawhah synod office lam a dawr dawn a” ka nu in archaw tur chaw thing hmet mawlh mawlh pahin a ti a. Pro pastor ni a a awmna tura a awm dawn khan kan vaiin kan han kala,ka nu in karhnih lai a han awmpui zuia. A hnuah ka pa nen Good Friday leh Easter sunday an han hmanpui leh tih loh chu tuman kan tlawh leh tawh lo. Unau zinga naupang ber leh hriselna pan angreng tak a nih avang hian tute pawn kan ngaihtuah theuh a,mahse tlangval puitling a ni tawha. Kan ngaihtuah tih avanga han awmpui sek erawh a tul kan ti lem lo.

“Engtik thleng nge a awm dawna?” Tuilum thlitchhuah pahin ka ti a.

“Zirtawpah a haw leh dawn tiin ka hria. Pathianni te hmun danga hman a rem tawh si lo va. Chhungkua a awm khawmna hun pawh a awm thei tawh lo anih hi” a ti duah.

“Khawnge ka pa?” a thilsawi lam ngaihven zui loin ka ti a.

“Thari dawrah bak khawnge maw a awm ang ni? Ee,ni leh lo. I u Mama te inah a kal leh si” nui hak hak chungin a ti a.

“Thursday zanah palai an lo leng dawn ania, lo hrilh mai rawh” kalsawn pahin ka ti a.”enga? Palai i tia mi?” a ti rang vat.

“Ooo,Palai.. Zorina’n nizanah chhungkaw prog kan neih leh neih loh min rawn zawta,chutiang engmah a awm lo ni lawmni?” ka ti nghal duah.

“Awm pawh ka hre nang. I nau lo haw lai a ni dawn a,an lo len hun chu a fuh khawp chu” a tih leh chuan ka melh vaka.

“Eng nge ka nau awm ve kher angaihna? Duh leh ka pu te pahnih ko ula,ka unaupa te zawng zawng lo thut tlar put kher angai lo” ka ti ta hmarh hmarh.

“An thu tlar put dawn ka ti reng reng emawni? In unau in tlem tehreng nen,i tawngkam kher kher hi a” a ti nghat nghat.

“Ti awm takin ka nau lo haw tur a tihzia i ti kher anih kha”ka ti leh hlar mai.

“I thinchhe em maia,insum zir rawh. Pasalte inchhungah phei chuan tuna i awm ang hian awm tum reng reng suh. Phunchiar hlik hlek si” min ti leh hlak hlak. 

Nilengin ka rilruah palai lo kal tur ringawt a awm a,ka helhhawlh nge ka huphurh lutuk zawk ka hre hrang lo.Ka awm a nuam thei thlawt lo.

Ka nau lo haw zan anih avangin ka pa in ka u te pahnih an chhungkua ve ve in chawei turin a lo sawma,mipa naupang pathum leh hmeichhe naupang pahnih awmin an bengchheng dan namai lo tak a ni. Ka pa in Thursday zanah inleng kan nei dawn tih chawei laiin a sawi a,min fiam nghal laih laih. 

“Ka nu hian a hau reng chung che hian a ngai ngawt ang che”kan upa ber nupuiin a ti a.”min ngaih ka ring,hauh tur nei dawn hek lo. Nangni lah a hauh phakah in awm tawh der bawk si lo” ka ti let nghal zat.

“Eee,pasal nei rawhse. Inngaih tih mai mai te chu a ho em mai” ka nuin a ti ve tlat. 

“Valpui,hmanni thil thleng vel kha eng nge thudik ni ta ber?” ka u min chhangtu in a tih chuan ka beng a verh nghal zak.

“Engmah thudik ber pawh sawi tur a awm chuang lo. Mithi chhungte lam sawi pawh kha a dikna lai a awm tho ang. Duty zingah khan kut ram deuh an lo awm ve bawk aniang. Mahse han thih phah em tur chuan a khawih lo an tia. An inrem tawhin ka hria” ka u in a tih chuan Jona ka hre chhuak nghal zawk.

“Ben ringawt chuan thihna thlen awm lo tak chu ania. Chutihrualin an khawihna vanga boral pawh a ni kher lo ve thei tho ania. Anni lamin kut an lo thlak kher kha chhuanlam atan hman a rem em anih kha” u Mama zawkin a ti ve leha. 

“Nia,an vanduai tlang anih ber kha” u Valpuia’n a ti charh charh. “Nangpawh i fimkhur ve zel a tul dawn ania. Mi kutthlak mai mai te hi chin loh a tha, Tete, kutthlak theihna dan a awm lo an tih hi a dik em?” mi dang tawng hmain a ti leh a. 

“Dik e” ka ti tawi tak. A hmain ka u nen kan inhnial phah tawh avangin sawi thui ka duh lo.

An ngaihdan an sawi zui laih laiha,a hmaa kan inhnialna ang chiah khan an ngaihdan a phir ve tho. Engmah sawi ve duh loin ka vahte nen ka room lamah ka awm ta daih.

“Hello..” Jona aw in a rawn tih chuan ka call ta kher kher ka inchhir leh nghal a. Mahse ka call ta sa sa,ka call chhan ka sawi ngei angai.

“I buai lai a ni em?” ka ti te te. 

“Aih,eng nge ni ta?” a rawn ti leh thuai. A tawng danah a rui lo chuan ka hriaa, mahse a aw atang ringawta ngaihdan siam tur chuan kan la inhrechiang tawk lo.

“I cousin chungchang kha engmah i rawn sawi leh ta si lo va” ka ti a. “Um nia,sawi ta lo” a ti tawi tak. A tawng danah sawi zui a duh vak lo a ang. 

“Kut thlak tu kha i hriatchian viau chuan amah chauh kha kan khing thei tho ania. Mahse tul i tih loh chuan angai chuang lo va. A hma khan ka sawi phurpui vak si lo che a. Chuvanga ngawi leh i nih ka ring deuh a” ka ti leh duah. A thaw deuh huai ri ka hre thei.

“Khin chu ka duh alawm. Mahse ka dinhmun atang hi chuan engmah tih theih ka nei dawn lo. Chuvangin ngawih ka thlang ta mai a nih kha. Nangpawn  i hria ang, drugs addict,khawtlang chu sawi loh nu leh pa leh unau te pawn an rin zawh loh khawpa misual ka nia, tih theih ka nei hleinem.Mahse,min lo ngaihven sak tih ka hriaa,ka lawm tho tho e” zuai raih hian a rawn ti a. 

“Sum lamah i buai anih chuan…” ka tih lai mekin “u Tête,Min hrethiam la, ka thianten min nghaka. Ka kal angai” a rawn ti leha. 

“Ok.. anih phawt” ka ti ta thuai. 

Hun a kala,kan lo tum lawk ang ngeiin Zorina pawn palai a rawn tir a,inngaizawng rei tawh,chhungte pawhin an hriatpui vek kan ni bawka. Lo leng leh tura an inthlahna pawh kalphung pangngai zawm ang lek anni. 

Ka phone nghawr dar dar-in min ti harh a,mit siai deuh chunga min lo call tu ka en chuan ka pick-up nghal vat.

“Hello” pawh ka tih hmain “u Tête,khawngaihin min tanpui rawh” Jonathana aw hian a rawn ti a.

“Maw? Eng nge i sawi awmzia?” ka ti he haw. Dar zat ka en a, zing lam dar 1 a ri lek lek tawh. 

“Lei tlahniam thlanga petrol pump bulah khan ka awm. I lo kal thei angem?” a rawn ti leh ringawt. Tun ang dar zatah engtin nge ka kalchhuah theih ang? 

“Eng nge i buaina? Police ka rawn tir dawn em?” ka ti leh a. 

“Ni lo. Police lam chu sawi pawh sawi suh, nangmah chauh ka ringngam che. Buaina ka tawk tih chauh ka sawi rih ang” a rawn ti leh ta tlat. 

“Aw le,ka lo kal ang” ti a ka chhan chuan keimah leh keimah pawh ka inhrethiam rih lo. 

Ka room atangin ka nu ka phone a,ka thiannu Opi buaipui angaih thu ka hrilha,Opi hi a pasal in kutthlak a chinga,amah police officer mah ni se mi hriat lem loha hetianga buaipui chang hi ka nei zauh zauha, chu chu ka nu pawhin a hre ve bawk. Chuvang taka chhuanlam atan pawh hmang ka ni reng bawk. Kal pahin msg-in chhuanlamah ka hmang tih ka hrilh mai ang.

“Ruah a sur em? Nangmah a kal nan chuan a va zan thil ve. I u hruai la” a rawn ti nghala. “Aih,midang tel chi a ni lo. Min ngaihtuah suh” ka ti tlat. A rem  ti chiah lo tih hre mah ila ka kalsan lui ta tho. 

Hmanhmawh takin a sawi hmun lam panin ka tlan thlaa, zan reh tawh lutuk a mahni chauha han tlan chu a nuam hauh lo. Hlauh phei chu ka hlau hran lem lo. 

Petrol pump ka thlen thlak veleh ka phone a, vawi khat chauh a ring hman tihin a pick-up ta thuai. A thlang deuha tlan thla tura min tih chuan ka tlan thlaa, thui pawh ka tlan hmain kawng sirah a lo dinga. Min hmuh veleh min rawn pana, scooty head light engah chuan thisen a kai tih ka hmuh hmaih hauh lo. 

“Eng nge thil awmzia?” ka ti nghala. “Nakinah ka hrilh ang che. Tunah chuan helai atang hian kalsawn phawt ang” a ti ta tlat. Midang awm an awm leh awm loh ka en kual a, tumah ka hmu lo. Scooty-ah a rawn chuanga, Kan kalna tur ka zawh chuan an in a thlah turin min ngen a. Ka kal vangin lawmthu min hrilh pah niah niah bawk. 

An in awmna a lo fal viau tak taka. An thenawm hnai ber te nen pawh kilometer chanve vel laiin an inhlat ang. An in erawh pawnlam atang ngawt pawhin a nuam thawkhat ang tih a chiang thung. 

“Ka lawm e aw. I lo kal ngei ka ring a,i lo kal ta ngei bawka. I rintlak tih ka hria alawm” nui chungin a ti a. A nui hmel ka hmuh vawi khatna a nih em loh pawhin a nui lai ka hmu khat khawp mai. 

“I taksaah hliam i nei em? Thisen i kai bawk si a” ka ti ve thung. 

“Aih,ka ban hi tlem a pem deuh tihmai chauh ania. Ka tlukna anih hi.Kal tawh rawh, ka lawm lutuk” a tih zawm zat.

“In-ah i haw tak tak em ka en phawt che anga,ka kal ang” ka tih chuan a mengphawk deuh a. 

“Ti nge? Ka haw lo ngai hleinem” a ti nghal thuai.

“Anih chuan Gate kha hawng la,ka lo en ang che” ka ti ve tlat. 

“Min hruai tura ka ngen chhan che min zawt leh dawn lo em ni?” Min en ran chungin a ti leh ta daih.

“A hmain kha zat ka zawt che a,min hrilh lo va. I thian tha pawh ni lo min rawn biak chawt danah khan buaina liantham tak i tawk anih chu ka ring. I buaina tawh min hrilh hun ka nghak thei che” ka ti duah.

“Um.. nia,ka la hrilh ngei ang che, mahse,tinge engmah pawh a chhan hre si lo va ilo kal ngam? Drug addict ve mai thusawi ringin i lo kal tawp a,mak ka ti tho mai” a ti leh a..

“A dik e,lo kal tur ka ni em tih ka ngaihtuah ngei alawm. Ka sawi ang khan buaina i tawk ngeiin ka ringa, chubakah Drug addict ni reng ringawt lovin nangman i inrinna aia nasa khan mi tha tak i ni leh thei tih ka ring che a. Chuvangin i sawi na hmunah khan ka lo kala,i nunah ringngam tu i nei tih i hriat ka duh vangin ” ka ti hmiah. 

“Ka lawm e.. Zanin atangin i rinna hi tichhe lo turin ka bei dawn” a ti ve nghat.

Gate hawnga an compound chhung a luh hnuah a ban a rawn vai zauha. Kan in lam panin ka tlan zui ve ta a. Kawng tluanin keimah leh keimah zawhna ka inzawta,”engvangin nge ani kha ka zuk hruai kher? A buaina engmah sawi duh si lo kha engvanga zuk hruai ngawt nge ka nih? A damdawi rui leng kual mai mai,ke a haw peih lo ka zuk hruai lek a ni angem? Engatinge hetiang hi ka nih tak?ka insawi ang khan ani kha ka ring tak tak em? .., engmah ka hre thiam teh nuai lo ve. 

“Ruang an chhar anih hi. Thlalak an rawn dah tel bawka, Te.. i hriat zawng a ni em?” Tih pahin Zaiin phone min rawn entira. 

Mipa la upat hmel vak loh ka hmuh chuan hmuh tawhna ka nei tih ka hria. Ka hmuh na ka hriat mai loh avangin ka en deuh vang vang. 

“Pu Ruatkima petrol pump thlang lawkah khan an chhar a. Chem te a vihna hnuhma a awm an ti bawka” Zaiin a tih lai mekin ka hmuh tawhna ka lo hre chhuak ve chiah.

Ka phone min pekkir tuma Bike ri bengchheng tak rawn khalhtu,Jonathana rawn ko tu ngei kha a ni. Ruangchharna hmun leh nizana Jona ka zuk hruaina hmun te ka ngaihtuah chhuak nghala, amah khan thisen a kai bawk anih kha..

Thilthleng tur rindan nei nghalin ka khur ru nghal dar dar mai..