Jonathan-3(last)

 Then -3na(Last)

Then -3(last)

Rang takin toilet-ah ka luta,Jonathan ka call nghala. A phone ala switch off tlat zui. 

Mizoram chhungah hian ruangchhar hi a khat tawka a awm reng avangin mi tupawh mai hian “a va pawi ve” kan ti liam mai zela, tunah pawh hian ka thawhpuite zingah han ngaihven zui em em pawh an awm lo. Kei erawh chu ka tang teuh reng a,ban hun ni thuai thuai se,Jonathan hmu tura an in lam pan nghal mai ka duh. Thil thleng ka zawh chian ngei ngei angai,a lo inhnamhnawih anih chuan ka man tir ngei pawh a tul ang.

Office ban a hun meuh chuan ka thaw huai thei. Nidang anga muangchanga haw tura insiam pawh ka ti hleithei lo. “I van hmanhmawh em em, Nancy dawr-ah kal ang tih ka lo tum asin le” a tih chuan “vawiin chu in lamah tihtur ka nei a, ka hmanhmawh angreng lutuk.Naktuk tlaiah kal zawk ila” ka ti thuai. “Um, ka hmai hi langsar si loin a bawl nasa lutuka,a thip sep sep reng bawk nen in entir zawk tur nge ni?” a ti leh niah niah. A hmai vun a no em em maia,a bawl loh leh a phuhlip chiam a,a thil hman a lah vawikhat lekah a ngeih loh dawn chuan a kang thawt thawt zel bawk. Kei, hetiang lama harsatna nei ve ngai lo ta chuan a hrehawmna ka hriatthiampui vak lo.

Ka tlanchhuah hmain Jona ka call leha,a la switch off ta fo. An in a va kal ngawt turin kan innel tawk lo hle tih hre mah ila a turtu a na ngang mai si a, innel leh nel loh tih lam ka ngaihtuah thui peih lo.

Kawta pangpar tui lo pe mek,tleirawl hnenah Jona awm leh awm loh ka zawh laiin inchhung atangin nu pakhat a rawn chhuaka, “eng nge ni ta?” a rawn ti a.

“Jona rawn hmuh ka tum a” ka tih chuan chik tak hian min en a. Ka inthuam danah mi a nileng lo tan chuan eng hnathawk nge ka nih hai rual a ni lo. 

“In-ah a awm lo va. Eng thilah nge hmuh i duh?” aw dam angreng tak hian a ti a. “A thiannu ka nia,Rawn hmuh tum chhan hran pawh ka nei chuang lo. Ka phone tlang theih loh vang a nia”  ka ti leh ringawt.

“A nih tak chu, a lo haw hunah ka lo hrilh dawn nia, engtin nge i hming ka lo sawi ang?” polite tak hian a ti leh a. Ka hming ka hrilha,leng lut turin min sawm mah se ka hnial thung. 

Ka haw pahin nidanga addict ho thutna thin lamah ka tlan kuala, tumah an lo awm lo. Tlan tlang mai ka tum zet nangin ka awmna thlang lawka thlanmual lamah ka tlan thla leh ta zawk. An awm thin em ka hre lo naa an lo awm tak hlauhin ti ka ni ber. 

Zawl zau nuam tak lo awmin scooty ka daha, thlanmual tak pan thlakna step lam ka pan pheia. Thui pawh ka kal hmain ka awmna thlang lawka mipa rual thukhawm ka zuk hmu a. Ka pan thla nghal thuai.

Lo thukhawm zinga Zela ka hmuh chuan lawm ru tak hian “Zela, vawiin lamah Jona i hmu mial em? Jona lian zawk kha” ka ti nghala. Jona hming ka sawi ruala an hmel danglam ka hmuh hmaih lo.

Min chhang loin Zela a rawn tho chhuak taih taih. Tlema min kalfal pui deuh hnuah “Midang pawn an hre vek tho naa han sawi lung lung a nuam lo deuh a. Vawiinah kan thianpa ruang an chhara,nizan lama Jona nen inzui annih avangin Jona hi police in an la a” midang hriat hlau niawm tak hian a ti se se. Ka tirilah min mana,ka khur ru leh dar dar tawh.

“A nih tak chu,a va zia lo ve mawle” ka awm nuam lo thup ru tak chungin ka ti a. 

“Nia,an inzui tih hmutu an lo awm bawk sia. A tih a nih chu ka ring chuang lo.. Mahse,tinge nangin i rawn zawn daiha? “ a ti ha. 

“Thildangah biak duhna ka nei a. Chuvang mawle” ka tih chuan min en chik angreng viau.

“A nih tak chu,vawiin thil thleng vanga rawn zawng emaw i nih ka tia. Hman deuha a awmna rawn zawt tu an tih kha nangmah tho i ni tiraw?” a ti leh ta chat. Dawta chhan kher tul ka tih loh vangin ka nih thu ka hrilh tha ve mai.

“Jona buaipuitu ukil i ni em?” a tih leh chuan ka lu ka thinga. “ i ni emaw ka tia. Ani hi chu chhungte a nei thaa, engpawh tisual se a tang ve thei hleinem..’ nui deuh chung hian a ti ta a. “ chuti maw?” ka ti ha..”ka ti mai mai a nih kha, ama tihsual vang niloin midang tihsual vangin a tang thin zawk a, tuna mi pawh hi ama tih a ni lovang. Chutiang tur chi a ni lo” a ti leh ta tlat lawi.

“A nih chu, keipawn a tih a nih ka ring lo. Engpawhnise ka kalsan phawt ang che u. I lo hmuh hlauh chuan ka be duh tih ilo hrilh mai dawn nia aw” ka tih hnuah ka kalsan ta a, step tawp atanga ka zuk hawi thlak leh chuan an vaiin min lo en zui thap tih ka zuk hmu a. Ka hawi thlak veleh an hawi sawn nghal dial.

Ka haw hnu lawkah ka u a rawn haw a, ruangchhar chungchang a rawn sawi a. Ka nu in engmah a lo la hriat ve loh avangin a zawt chiang nghala. “Nizan dar 10 vel bawra thi a nih an ringa. Amah kha hmanni a boral YMA ho nena thawm nei laih Lalthana te nen khan inzui thin annia. Rinhlelh thilthu-ah nizana a kawm tih an hriat chian pakhat, Drug addict ve tho chu Police lamin an la a” a tih lai mekin “ khawi PS in nge la?” ka lo ti vat. Vaivakawn a nih thu a sawi chuan ka thaw deuh huai.

Zanriah eikham veleh Opi ka biaa, “i haw tawh nge i la buai?” ka ti nghal a.”haw tawh e, eng nge ni ta?” a rawn ti thuai. “Ka be duh che a, ka lo kal ang. Phone a sawi chi a ni lo va” ka tih rual rualin “ Lo kal rawh,nizan lam thil pawh kha i sawifiah angai hrim hrim” a rawn ti awlsam then. Nizan khan amah chhuanlamah ka hmang tih msg-in ka hrilh ringawta, chhun lamah ka hrilhfiah ang ti rilru mah ila ruangchhar ka hre chho leh nen khan phone a thil sawipui ringawt ka duh leh ta lo.

“Nu, Opi te inah ka kal lawk dawn ania, ka rei lovang” ka helmet lak pahin ka ti a.”NIzanah lah tlai deuhah i kal tawha, eng nge tunah kal leh ngai? Zan zan-ah lehnghal” a ti nang nang. “ thil pawimawh a awm tihna nimai lawm” ka tihliam sana, ka pa pawh a thu ve reng naa engmah min zawt lo. Nula naupang tawh lo leh ngaihtuah ngai chi ka ni lo tih a hre ve bawka, zana chhuah angaih chang pawhin min ngaihtuah ngai lem lo.

An in ka thlen -in an pa a lo awm a, kan inbe hlut. Ruihsual chang nei ni mah se a ruih lem loh chuan pa kawm nuam tak a ni lawi.

“Kuhva kan lei lawk teh ang” tiin a chhuaka, a chhuah veleh Opi’n min rawn thut hnaiha..”Han sawi teh, eng nge buaina i neih? Zorina kaihhnawih a ni lo tih ka chiang ania” inti fing lutuk mah mah hian a ti a. 

“Hey, i miman te anga min melh zam tum lo mai teh” ka ti hmak..Za taka nui chungin “englaimaha min hlau ngai lo hi nula senior i nih hnu phei hi chuan ka melhzam dawn lo che tih ka chiang lutuk” uar farhan hian a ti a. Ka melh ram ram. An pa lo let leh hma ngeia lo sawi zawh hman tumin nizan lama thil thleng ka sawi zawm nghal mawlh mawlh. Ka sawi chhung zawng uluk takin a ngaithlaa, engmah min zawh emaw lo sawi ve tumna a nei lo.

“A hmasa bera ka hriat duh chu Jona nen eng nge inzawmna inneih?” a ti ta khauh. 

“Engmah inzawmna kan nei lo. Ka phone lo chhartu tih bak chu inzawmna kan nei lo” ka ti thuai. “A nih chuan engvanga zanrei tawhah zuk hruai ngawt nge i nih? A lakah feelings i neih chu ka ring si lo” a ti leh a. Misual an man an dawp hi ka inchan deuh ber.

“Ngaihzawng ang lam hawi chuan a teuh lo mai. Ngaihtuah pawh ka ngaihtuah lo hrim hrim. Nau enin ka en a nih ka ring” ka ti halh. Min en ran rana,”ka ring che..i ngaizawng lovang. Mahse i awmdan hi ka hre thiam lo. Nangmah kha i ang lo” a ti ve hlawl mai.

“Aaaa, chulam chu dah tha ang. Engtin nge ka tih ang tih lam a ni. Nizan lama thilthleng ka hrilh tawh che a, hmalak dan tur ngaihtuah mai teh. Mahse ka hming lang lo se” ka ti teh ngawt. Min chhan hmain ka phone a rawn ri a, min rawn call tu ka en chu ka mengphawk vak. Opi ka en tir ve nghal a. “pick-up rawh. A remchuan loudspeaker-ah khan dah la” a ti zui zat.

“Hello..’ zangkhai vah hian ka ti a. Ka mood nen a inmil lo thlawt.

“U Tete, min lo call i tum alaw? Phone ka on chiaha, min lo call i tumna msg ka hmu a” a rawn ti nghal a. Nidang ang bawkin a cool leh raih tho.

“um,nia..lo biak che ka tum a” ka ti ringawt.

“Kan thianpa ruang an chhara, zan hmasa khan kan lo inzui ve bawk si avangin thu zawhfiah turin min rawn la a. Mahse hei ka haw leh tawh” a rawn ti leh duah. Opi hnen atangin ka hre vek tawh tho naa hre tawh angin ka awm duh lo. 

“Um, tlaiah khan in inah ka lo kala, i nu emawni khan min lo hrilh a..kha vang khan ania ka biak duh che. Ka sawi awmzia i hriat ka ring” ka ti tlang nghal pawp. Opi ka en a, a tha tihnan a lo bu nghauh nghauh.

“Engmah ka ti lo. Zan tir lamah kan inzuia, abak chu engmah ka hre lo” a rawn ti thuai.” A nih chuan engatinge zanah khan khatiang thil kha a thlen si? Hriatchian ka duh a nia” ka tum aia khauh mah hian ka ti chang fak.

“Ka tlukna ka tih kha” ani leh ni lo ang taka rang vat hian a rawn ti ta tlat.

“Thil thleng kha min hrilh chiang tawk lo. Min hrilh duh i neih chuan min hrilh la ka duh che..a nih loh chuan…” abak sawi zawm duh loin ka ngawi ta daih.

“A nih loh chuan eng nge?” a rawn ti zuai raih. Chhang loin Opi ka en a. A hmelah angaihna hre lo hmel a pu ve tho.

“Naktukah hun i neih chuan inhmu ang, engkim ka hrilh ang che”amah zawkin a rawn ti leh a.”a tha alawm, office ban hunah pawh a pawi lo ang chu maw? Hna ka ngah riaua” tha takin ka ti a. Pawi a tih loh thu a rawn sawi ve mai bawk.

“A sawi tur ngaihthlaksak phawt la,ama sawi ang tak khan thildang vanga ani kha buai pawh a lo ni thei a” Opi’n min ti a. 

“Ka ring che a nia aw. I hna kaihhnawih ni mah se beng min lo chhut ngawng sak rih la ka duh” ka ti ve thung. “Tehreng mai. Bakah Jonathana pa-in ukil a ruai leh daih tawh ang. Case buaipuitu ten amah be leh duh mah se ukil nen a nih tawh ka ring. A pa hian a veng him hneh lutuk” a ti leh mawlh mawlha. Zela nen kan inbiak naa a chhungten an hum zel anga a sawi kha ka hre chhuak zawk mai. 

In ka thlen hnu lawkah ka mu nghala,Zorina ka call a, karthar hi palai lo kal hun a ni leh tawh. Kan pahnih in inneih ni tur duh kan nei ve a. Kan anniversary hi ni 30 anih avangin ni 30 ni thei se tiin a hma fe atangin kan lo tum dan a ni tawh.

“Ka lo phei zuai dawna, zan hnih ka riak anga” a rawn ti a. “A that chu” ka ti liam mai.

“Hey,i dam lo em ni? I va nguai ve?” a rawn ti ta chat. 

“Dam e,vawiin lam hna a tam deuha,ka chau a nih hi” ka ti teh ngawt. “Indim teh,inneih hma hma te hian i lo kulcho ange”a rawn tifiama. “Kulcho deuh hnap maithei “ ka ti ve mai bawk.

“I boss hi biak angai dawn a ni. A chhawr rim leh lutuk che” a rawn tih leh chuan “ i over em maia” ka ti nghal hlak.

Ka muthilh mai pawh ka rin loh laiin mumang bo thak khawpin ka mu a. Zingah lah ruah a lo sur avangin exer la tura kalchhuah theih a ni lo lehzela. Dar 7 pelh hnuah ka tho chhuak ta chauh. 

Chawei laiin ka u leh ka pain ruang chhar chungchang an sawi duna,nidangah pawh ruangchhar awm fo mah se an ngaihven tehhurh ngai lo. Tun tum erawh kan veng bul lawk ami a nih bakah mi kut tuar ni a alan vanga buaipui deuh anni in ka hria.

“A thianpa addict ve tho thu zawhfiah atan an laa, rei pawh kawl loin an chhuah lehnghal aniang. An rinhlelh ber kha a pa hi thil a tithei viau an tia. Nidangah pawh man tawk fo mah se tang hleithei lo ang chi an ti lehzela” ka u in a tih chuan tu nge a sawi ka hriatchian em avangin ka ngawi ngal mai. 

“Chung te chu kawl rih awm alawm mawle,darkar 24 em pawh kawl loh te chu a” ka pain a ti charh charh. “Nia, chutiang awm tak chu mawle. En mai chuan misual hmel pawh pu lo,mize cool deuh chi ania. An venga an awmna la rei lo mah se keini veng lam thleng pawn YMA hruaitu lam chuan kan hre vek tawh tho. Insual hrat lutuk,thiante chhan tina deuh mai ania” a ti lehzela. Ka rin aiin a hre chiang tlat. Hman zana Jona’n a en dan kha ka hrechhuaka,a hriat ka ring kha ka ringsual lo tih a chiang. 

“Addict lehnghal te chu tha a neih awm loh loh nen” ka nu in a lo ti a. “Mifing sual ania, a dose a hre bawk si, a taksa pawn a tuar dan a nep aniang” ka u in a ti leh mai. 

Vanneihthlak deuhin Zaii office a lo kal lo. Lo kal se chuan banah Dr.Nancy hmu tura kalpui ngei angai dawn a,Jona nen inhmuh kan lo tum bawk si.. A lo kal loh avangin hnaah buai phah deuh mah ila ka thaw deuh huai.

Office ka chhuahsan hmain msg in ka hmuhna hmun tur ka zawta. “In-ah lo kal mai la,ka khua a sik a” a rawn ti a. An in em a kalchilh chu ka hreh viau nangin thil thleng hriat thuai thuai ka duh tlat avangin ka kal angai tihna a ni mai. “I chhungte mitmei ven a va na duh awm ve” ka va ti let ta tho.

“Ka nu chauh a awm. Engmah a sawisel ngai lo” a rawn ti awlsam leh mai.

Ka nu hnenah ka tlai hret dawn tih ka hrilh hnuah Office atangin khawiahmah kalpeng loin Jona te in lam ka pan nghal vang vang. 

Ka thlen chuan a sawi ang ngeiin a nu leh nimin lama ka hmuh tleirawl te kha an lo awm a. Midang tumah ka hmu lo. 

“Lo thu rawh,ka han ko ange” a tih chuan thla ngam lo angreng tak hian kanglang takin ka lo thu a. Reiloteah an rawn inzui thlaa, “i lo va thleng hma ve. Lo kal rawh,veranda-ah thu ang” a rawn ti a. Veranda-ah kan inzui chhuaka, “nu.. Thingpui min lo pe” a ti zui nghal bawk.

An verandaa thutna an dahah kan thu a, “i khua ala sik em?” ka ti a. A lu a thing mai. Inthup a tum viau nain ruih a nei tih a mitmengah ka hrethiam tho. Rui chhia erawh a ni lo. 

“I hmanhmawh em?” a ti a. “Aw,zanah tih tur ka nei a” ka ti tha ve mai. “A nih chuan i hriat duh apiang min zawt la” a ti leha. “Zawh tur che pawh ka hre mai lo. Thilthleng kha min hrilh tawp zawk rawh”ka ti ve thung.

“Zan tir lamah damdawi la turin amah nen khan kan kala,abak chu kan inhmu miah lo. Damdawi kan lak hnuah ka haw a, mahse kan thian dangten min rawn call leh avangin dar 10 velah ka chhuak leha. Company pengah min lo nghaka, Rv ah kan thil tur hmanhmawha lak kan ngai tih an sawi vang ania kan kal. Kan kalna tur kan zuk thlen khan damdawi zuar thin pakhat,kar hmasaa ka insualpui pain min hmuh duh vang lek a lo nia. Kan inhnial fe hnuah min khawih rawn hmain ka tlanchhiaa, kawngthlangah ka tla thlaa. Zan a ni bawk nen min zawng zui lo a. Kawngpuiah ka chuangchhuak anih chuan min lo la chan ka ringa. Chuvang ania nangmah ka rawn biak tak che” mar angreng tak hian a ti a. Amah ka hriat hnua a vawi khat nan dawt min hrilh tih ka hria. 

“I tlaknaah chuan em ni i ban i tihnat?” amah en reng chungin ka ti a. “Um,ni e.. hei en la” tih pahin a ban min entira, tlem a lo pem hlek chauh. Nizana a kawra thisen kai kha hetiang tiat lek pem atanga chhuak anih ka ring lo hulhual. 

“A nih tak chu.. Abak engmah a awm lo tak tak maw?” ka tih leh chuan a tho thata. “Min ring lo anih chuan engatinge i lo kal buai duh?” a ti ta fak. 

“Ka ring lo che ka ti em ni?” ka ti ve thung. “I sawi lo,i hmelah a lang reng” a ti leh hmuk. 

“Miss,i thiannu Police officer a ni tih ka hria. I bialpa pawh Magistrate a ni tih thlengin ka hria. I thiannu chuan tunah hian a lo tir che em ka hre lo. A lo tir che a nih chuan ka sawi kha i hrilh dawn nia, a bak engmah inpuanna tur ka nei lo” a ti zui leh ta hmak hmak. 

“I ngaihdan a dik lo. Tuman min tir hauh lo bawka. Diktak chuan ka rawn hruaina hmun che leh ruang an chharna hmun te bakah thisen i kai avang te khan i inhnamhnawih ka hlau a. Ka hmuhtirh phat che atang khan nau angin ka lo en che pawh a ni ang.Chuvanga ring em em che ka nih pawh ka inring. Tunah pawh hian i tih a ni lo ngei tih hriat ka duh vanga rawn bia che ka nih hi” ka ti ve ta hmiah. 

“Keipawn min ring tak tak  emaw ka lo tia sin.Mahse, tunah hian midang te ang bawkin i tan chuan Addict pakhat ve mai ka lo ni tih ka hria” zawi deuh hlek hian a ti a.

 “Ring lo che ila nizan khan ka rawn hruai lovang che. Tunah pawh ring lo tak tak che ni ila ka hriat kha ka sawi ang chu” ka ti ve zel. Ka beisei ang inbiakna a thleng ta lo hi ka tawp deuh up up thei. 

“I sawi lovang, a chhan chu zanah khan nangman min rawn hruai tih i sawi angai dawna. I hming alan i duh lovang.Bakah min hum i duhna kha min rinhlelhna aiin a lian zawk” inringtawk tak hian a ti leh ta tlat. 

“I tisual ngei a nih chuan hum duh chhan tur che ka nei lo.Ka hming a lan pawh duh loh chhan tur a awm lo. Min ngen angin ka rawn hruai che a ni maia. Buaina ka nei lo” ka ti ve tlat thung. 

“A nih leh i bialpa in khatiang hunah khan min rawn hruai vang vang tih hria se engtin nge a ngaih ang? I client pawh ka ni lo va. I thian te zingah ka tel bawk lo va” a ti leh ta khauh. 

“Lo buai suh,ani nen nangmah vanga buaina chhan tur kan nei lo.. chuan thudik min hrilh lo tih ka hria a,thudik min hrilh lo zel a nih chuan nangmah khingtu lamah ka tan angai dawn tih i hriat kha” ka ti tlang ta pawp. Hmel danglam miah lo hian a nui a.

“I ti dawn lo. A chhan chu engmah inpuanna tur ka nei lo. A dang sawi tur pawh ka nei chuang lo bawka. I duh duh i ti thei reng. Mahse,fel tuma ka rilru ka lo siamna erawh awmze nei lo a ni leh ta a nih hi” cool raih hian a ti  a. A mitah tak ka en renga, a mitmeng-ah zamna reng reng a lang lo. 

“I rilru i thlak leh a nih pawhin ka thiam loh a ni lo. Thudik tak min hrilh tura i rilru i siamfel nan tunkar ka nghak ang che. Abak chu ka thil hriat ang ang kha Police lam ka hrilh ang” tichungin ka tho a. 

“Tumah ringtu ka nei tawh lo emaw ka tih laiin ka nunah i lo langa. I awmdan vangin ka lo lawm ve a,min ring ve tu ka nei tiin nangmah vangin fel ka lo tum mek asin. Mahse, nangpawn min lo ring miah lo tih ka hriat takah chuan tu rin mah hlawh ngai lo hi rin hlawh lo tura nun zel ka thlang ni rawhse” a ti leh a. Ka chhang tawh lo. 

Ni a liama,Zorina a rawn phei a. Hna thila lo phei a ni bawka,chhun lamah chuan kan inhmu hman lo. Zanah erawh a lo kal thung. Jonathana nena kan chungchang hrilh ka duh em em rualin eng emaw hian min mawlha,ka hrilh lo ta zel rih.  

Jonathana’n eng emaw tal a rawn sawi ringin ka ngaichang deuh renga. Ni 3  lai a liam hnuah pawh a la reh ta veng veng. Opi nen kan inbe deuh renga, Jonathana chungchang erawh kan sawi nawn leh tawh lo. Ka mizia a hre chiang em em a,chuvangin Jonathana nen kan inbiakna pawh engmah min zawt lo tih ka hria. 

Naktuk hi thawhtan ni a ni a, Jona hnena ka hun pek kha vawiin hi a tawp ni a tawh. Min rawn be dawn lo tih pawh ka hre chiang tawk viau tawh. Opi hnenah thil thlen zui zel dan zawh tuma call ka tum lai takin amah zawkin min rawn call a.

“Lo call che ka lo tum lai takin ilo call a” nui chungin ka ti a. “I lo hre tawh mi?” a ti tehngawt.

“Eng chu maw ka hriat ang?” ka ti ha. 

“Ooo,tualthattu an man tawh tih kha mawle. Nichin lawk khan an mana,i rawn phone ve nghal zat bawk nen i hre tawh aniang chu ka lo tia. I nau duat kha hum i tum nasa bawk si” nui chungin a rawn ti a. Mak tih lutuk vangin ka thaw a tawp lo chauh. 

“Tu nge a nih a?” harsa tak hian ka ti thei hram. “Addict tho mawle..Mithi kha addict a ni tih chu i hre ngei turah ka ngai che a..A inpuandan chuan an inhnial buai vanga vit a ni awm e…” tiin tualthattu hming leh veng a rawn sawi nghal mawlh mawlha. Mak ka tihzia sawi ngaihna a awm lo zawk.

Muhil thei loin ka let ka leta, misual man tawh ngei mah se ka riluah Jonathana tih a nih rinna ka la nei tho tho. A thil min hrilh kha dawt a ni tih hi ka pawmdan ala ni reng. Mahse, a thattu ber a inpuang vek tawh lawi si. Thil chi hrang hrang ka ngaihtuah kuala, Jona te in ka zuk kal tum ka ngaihtuah let takah chuan a sawi anga a nu rinna hlawh lo chu niin ka hre ta miah lo. A nu khan tha takin min lo lawma, a fapa nen an inbiak danah lah khan an inpawh em em niin ka hmu bawk. Fapa sual, inchhungah pawh lawm hlawh lo ni tak tak se a nu bulah khatiang khan a khawsak ka ring eih lo. Zela leh OPi sawi hmangah khan thil engkimah a pa in a hum zel nia ngaih theih turin an sawi ve ve bawk. A fapa ring lo tu pa in eng vangin nge a fapa thil tihsualah ukil a rawih sak kher ang tih thlengin ka ngaihtuah kai ta zel. 

JOna nen kan inhmuhtirh atanga thil thleng zwng zawng ka ngaihtuah let ta char char.  Zingkara kan intawh tuktin lai ni lo, a hranpaa hmaichhana kan inhmuh tum a tam lo. Ka ring em em thei mai hi a hma atangin mak ka ti tawha, engvanga ring nge ka nih tun thleng pawn ka la inhrechhuak zo lo. Mak takin ani lah khan ka chanchin a lo hre viau mai a, ka bialpa leh ka bestfriend thlengin a hriaa, an hnathawh nen lam a hre vek te kha mak ka ti leh hnuhnawha. Mahse,ka awmdanah amah ka ring tih hrethiamin min hriatchian tumin ka chanchin a lo ngaihven pawh a ni ve thei tho. A lakah ngaihzawng rilru ka pu lo ang bawkin ani pawhin chutiang zawngin min en lo tih ka hria. Kumah lah nise kum 7 vel laiin kei aiin a naupang zawk bawk.

Ka harh rualin ka phone ah darzat en tumin ka phone ka lakanga. Ka rin loh takin Jona msg a lo awm a. Hawng kher loin noti atangin ka en a. “ Miss, chhanna ka pek tawh che kha aw” tih te mai hi a lo ni a. A rawn sawi tum ka hai lo.Whatsapp-ah lutin a msg open loin ka delete nghal hmak. Mak takin amah ka rin ve ngawt na aia nasain amah ka rin lohna hi a let tamtakin a nasa tawh zawk.

Zan lam ka mu tha lo bawk nen lu na deuh lukin hna kal turin ka chhuaka, office lamah lah hna kan ngah em em zui. Pu mood fuh loh ni a lo ni bawk nen, ka pik tun a ni ber.

“Bawihi, ka pa tun lawk khan a tlu thut maia, stroke niin kan hriaa, keipawh ka lo phei mek” in ka thlen hnu lawkah Zorina’n a rawn ti a. “Ehe, a va zia lo ve. Khawi damdawiinah nge?” ka ti nghal thuai. Ka nuin min rawn en chuan ka lu ka thing ringawt. Damdawiin hming a rawn sawi a, “ aw le..ka lo va kal nghal dawn nia. Driver i nei em?” ka ti leh rih. A neih thu a sawi chuan ka thaw deuh huai. 

Kan inbiak zawh veleh ka nu hnenah ka hrilh ve nghala. “Awhaw, i u a lo la haw si lo va, chaw ei ila, i pa te nen kan va kal dawn nia” a ti nghal sawk sawk. Inneih mai tuma palai pawh rawn tir tawh anni a, chuvangin ka nu te tan lo ngaihven ve pawh thil zahthlak leh tihawm loh pawh a ni tawh lo.

Chawei kham veleh ka nu leh ka pa te nen damdawiin lamah kan kal nghala, Zorina te chhungkaw haw an lo awm thup mai. Chhungkaw hung tak leh colony a awm anni bawka, thinsen inzawm theuh theuhah pawh an chhungkua anga colony-a awm ho hi chu an inzawmna a tha tlangpui niin ka hria.

Zorina Patea’n min lo ngaihven thuaia. ICU lama an dah thu leh amah ala harh loh thu a sawia. Ka pa nen an inbiak laiin ka lo thu ngawi kar. 

“Naktuk zan hi Palai lo kal leh hun kha ni mah se kan heti ta nuai mai si a, kan tawlh hlek angai dawn niin ka hria. U Ziri pawh engmah ka la sawipui lo naa kan tawlh hret ka ring” a tih chuan ka pain a hriatthiam thu a sawi thuai.

Dar 10 velah kan haw sana, kan hawsan lai pawhin a la harh ta chuang lo. Zorina te kan haw hmain an rawn thleng hmana, an tlan chak thawkhat tih a hriat. Unau zinga upa ber leh nu leh pa innghahna tlak khawpa mipa puitling a ni a. A nu pawh hmuh theih khawpin Zorina lo thlen hnuah a thlamuang tih a hriat theih hial.

Ni hnih a liam leh hnuah pawh Zorina pa a la harhchhuak thei chuang lo fo. Palai lo kal hun pawh inbiak that leh atan kan dah ta bawk.Zorina nen kan inbe renga, amah a awm loh chuan a nu a mangan thin avangin damdawiin lamah a awm deuh chawta, mahse a pa erawh buaipui theih a ni chuang lo.

“Tete, kan va inhmu khat ve” Zorina nen Damdawiin bul cafe a kan thut dun laiin u Sanglura’n min rawn ti a. U Sanglura hi advocate tha leh lar tak niin Zorina nen an inkawmngeih viau. Mahse kei nen erawh kan inhre tha em em lem lo. Inhmuh changa inbe ve zeuh zeuh chauh kan ni.

“NIa tiraw..kan buai tlang aniang” ka ti ve thuai.Zorina pa kan tura lo kal ve a lo ni a. Kan thil ei tur la nghak mek kan nih avangin a eitur a chah ve nghala. Zorina pa chungchang kan sawi zuai bak chu hna lam thil vek kan sawi ta thung.

Zingah hlim takin Zorina’n a pa a harh tawh tih a rawn sawia, ka lo lawm ve em em mai. “Naktuk lamah ka phei mai dawn mawni ka tia, vawiin chu ka ngaichang anga” a rawn ti leha. “ nia, i theih chuan ngaihchan chu a tha alawm. Tlaiah damdawiinah ila awm dawn chuan ka lo tlawh kawi ang che” ka ti ve bawk.

Ka tum ang ngeiin tlaiah Damdawiinah ka kal kual leha, pawnah kan thu dun a. A hah bawka, a lang pawr ve fap thei.

“Thil zawh che ka duh,diktakin min chhang la ka duh bawka” a tih chuan a hmelah engmah a ngaihtuahna a lang lo.

“Eng thil maw? I serious bawk si” nui deuh chungin ka ti a. Za lo tak hian a nui ve suk.

“Hmanni ruang an chhar kha, atira tualthattu thianpa thu zawhfiah tura an lak nen khan mak deuhin sawi zawm i ni a. Ani kha i eng nge?” ka rin loh em em mai hian a ti ta.

“Ka hmelhriat ania” ka ti ban chat. “ i phone tihbo a lo chhar sak hnu che khan in inhre zui zel tih ka lo hre miah lo va. A nih leh ruang an chhar hma zan khan zan laiah amah nen khan inchhuak dun em?” a ti leh ta zel mai. Ka ip ru chawih thei. Entin nge ani hian khang thil kha a lo hriat theih? Kei leh Opi bakah amah Jona chauhin kan hria niin ka hre si. Tu nge midangin lo hre ve ang?

“Chhuak dun lo. Heng hi khawi atanga i hriat nge?” ka ti zui zat. 

“Ka hriatna a pawimawh lo. Ka hriat duh chu ani nen khan eng inzawmna nge inneih?” a ti leh a. Atir atang khan a aw ki ala ngai pat.

“Inzawmna engmah kan nei lo. Ka phone min lo chharsak khan lawmman engmah ala duh lo tih ka hrilh che kha. Lawmthu sawi nan ani hnenah khan min mamawhna a neih chuan min pan turin ka chaha, chu zawng chu a nimai” ka ti leh thuai.

“A rawn pan che tihna mi?” a ti leh a. “A cousin YMA in an sawisa hlum ni a a hriat tum khan ka tanpuina a rawn ngena, mahse amah bawkin hma kan lak hmain a rawn bawhzui ta lo” ka ti a. Kan inngaihzawn hnua kan inbiak dan ngai reng reng loin tunah hian kan inbiaa, zawhna leh chhanna hun kan hmang a ni ber. 

“A nih chu, a tlai mai dawn. Kal tawh rawh, keipawh hi haw a inbual te ka duh’ dinchhuah pahin a ti a. Ka dingchhuak ve nghal thuai.

In ka thlen veleh Opi ka be nghala, Zorina hnenah Jonathana nena kan chungchang a hrilh em tih ka zawta,a hrilh loh thu a rawn sawi a. Ka ringhlel lo. Jona khan ka bialpa pawh a hria tih chu ka hre ngeia. Mahse ani nen kan inbe ngai pawh a ni tawh lo va. Chumai bakah ani khan engvang mahin khatiang thu kha Zorina hrilhchhan tur a nei lo. Ka rin lohna a hriat tak vanga Zorina nen kan inkar tihchhiat tum pawh nise Zorina hnathawh a hre chiang em em si a. Amah leh amah a intal awk duh hauh lovang.U Sanglura ka rilruah a lo lang zawka, ani kha ka hriat loh lamah Jona tan a lo ding fo a ni thei mai angem? A nih chuan JOna khan engkim a lo hrilh anga, ani khan a thianpa a nih angin Zorina a lo hrilh pawh a ni thei..Engmah kan inkarah awm lo mah se Zorina hrilhtu hian engtin nge a hrilh ka hre si lo. Ka tum loh tawpin ka talbuai dawn niin ka hre ta.

Jona number vawi tamtak ka thaichhuah hnuah pawh ka la be ta chuang lo. Diktak chuan ani nena inhnimhnaih leh hi ka duh lo a ni deuh ber. Mahse, Zorina’n min ngaih dik loh ka hlau bawk si. Jona call loin Zorina zawk ka calla, a pick-up mai loh avangin ka rilru a nuam lo nghal a, ka call nawn leh pawhin a pick-up thei lo. Ka rilru nawm loh dan chu pui tak a ni tawh. 

“Tebawih,Zorina a lo kal ania” ka nuin ka room pawn atanga rawn tih chuan ka mu lai ka tho nghal hluai.

Sitting room a ka va chhuah chuan ka pa nen an lo inbe meka. Palai chungchang an sawi niin ka hriaa,chokaah ka kal tlanga,an titi hre phak tho siin ngaihsak awm lo takin ka beng ka dawh harh tho. 

“Tebawih,thingpui rawn lum teh” ka pain a rawn tih chuan ka chhuang nghala, thingpui chawia sitting room a ka phei chuan Zorina pa hmasawn dan an lo sawi dun mek. 

Thingpui no sil tura choka lama ka phei Zorina’n min rawn zuia,no kal sil zawhah pawh sitting room lamah kan phei tawh lo.

“I lo kal dawn tih ka hre lo va. Engmah i sawi bawk si lo. Ka call i pick-up ta si lo kha ka ngaih a tha lo hmana” ka tih chuan “i pa rawn biak ka duh a,ka lo thleng tep tawh tho bawk nen ka pick-up ta lo anih kha”a ti a. 

“‘Eng chungchang nge?” Ka tih chuan ka rin ang ngeiin palai lo kal leh dan tur tihvel an lo sawi duna. A hmaa an sawi tawh angin a pa awmdan enthlak rih phawt tih vel tho a ni. Tlaia kan thilsawi dun vanga buai nghal ka inring kha a lo dik chiah lo chu a ni.

“Eng nge min rawn biak i tum chhan?” a ti ve thunga.

“Thil hrilh tur che ka nei a. I thinrim maithei a” ka tih chuan  nui a. “ Ka thin i tihrim viau tum chu vawikhat chiah ka la hriaa, inneih dawn tepah thinrim na tur ka nei leh dawn a ni maw?” A tih chuan ka ner khum vak.

“I rin ang a ni lo maithei ania” ka ti leh te te. A mitmeiin sawi turin min ti a. Min en zui loin a phone a khawih a. 

“Ih,tlaia kan inbiakna kha sawi zui ka duh a.. Zanah inchhuak dun em tih lai tak kha” ka tih chuan min rawn en a. “Han sawi la” tha tak bawkin a ti leh mai.

Ka mulai min rawn tihharh dan leh kan inbiak dan ka sawi phawta,amah eng emaw taka rinna ka neih tlat dan te ka sawi tel bawka. A tuka ruangchhar a awm hnu a an in a hmuh tuma ka kal thu leh Opi ka biak thu te,a hnu zela Jona thudik sawi tir tura ka zuk hmuh leh thu thlengin ka sawi fai ta vek. Ka sawi laiin Zorina hmel ka en pah reng. Engmah danglamna a nei lo. Kan innngaizawn mai bakah ka inkawmngeih tela,alakah hian zep ka nei khat viau. Hmeichhe thunawi mai mai tih loh chu hna thil thlengin a puihna ka dil fo a, chhungkuaa harsatna kan neih pawhin ka hrilh deuh zel bawk. Hetiang khawpa amaha innghat tawh si hian Jona chungchang ka hrilh miah loh hi keipawn ka inhrethiam bik lo va. Ka sawi tak vekah chuan ka thawl huai in ka hria.

Ngawi renga min en vang vang hnuah ka kut a rawn vuana, nghet takin a hum zuia. 

“Kha zawng kha em ni?” dam thlup in a ti a. Ka bu nghat..A hmel landanah thinrim awm pawhin a lang lo. 

“I thinrim lo mi?” ka ti ta ngawt. “Eng berah khan nge ka thinrim anga?” a tih chuan ka thaw halh. Ka hnar hmawrah a rawn fawp zauha, sitting roomah ka nu leh ka pa an awm si, rum lutukin ka melha. A nui duh lek. 

“Engah khan nge ka thinrim dawn ka tih chu?”a ti leh a. “Ka sawi vek tawh kha” ka ti hlak..

“Eee,kha kha maw? Aih,ka thinrim dawn lo aniang. Ka awmdan hi en la,thinrim hmel ka pu em ni?” nui deuh chungin a ti leh mai. 

“Aaaa,i thinrim ka ringa, tlaiah pawh chaw tlemte chiah ka ei a” ka tih chuan ka kut a vuan nghet sauha.

“Ka hre sa vek tawh alawm. A tirah chuan engmah i sawi loh vangin ka lawm chiah lo va. Sawipui phawt che a that ringin tlaiah khan ka sawipui che a. Tunah hian engmah min hrilh lo in sawi zui lo la chuan ka sawizui bik lovang. Mahse ka rilru-ah zawhna a awm reng dawn. Engkim i sawia, ka thinrim lo zawk” nghet cherh chawrh hian a ti a. Ka thaw halh. 

“Khapa nen kan inkarah khan inngaihzawnna a awm i ring em?”ka ti leh a. 

“Amah kha chuan a ngaizawng che,nangin i ngaizawng lova. A game-ah erawh a hruai lut hman che” a ti ta daih. Phawk deuh hra hian ka en a.

“Min ngaizawng awm lo e. Hmuh pawh kan inhmu ngai mang lo va, kan inbe khat bawk si. Lawk,Eng game nge i sawi chu?” ka ti he haw.

“Ka sawi lo zawk ange. Nangmah i indem ka duh lo” a ti leh ta zel. 

“Aaa,enge ka indem ngawt ang?” ka ti ve zel tho.

“Jona nen inchungchang hi tu min hrilh nge anih i rin?” a ti leh daih.

“Opi leh amah Jona bakah kei chiahin thil thleng kan hria niin ka hria a. Opi anih ka ringa. Mahse Jona pa kha thil tithei deuh an tih takah khan ukil pawh a fapa tan tha deuh deuh a ruai ang tih ngaihdan ka nei a. Niminah u Sanglura te nen kan inhmu a, vawiin tlaiah i sawichhuak ta sia. U Sanglura leh Jona te kha an inhria anih ka ringa.u Sanglura ka ringhlel deuh. Jona pain a fapa hum turin a ruai anih ka ring” ka ti deuh duah.

“Thluak hi chu i nei mawle.. mahse, tun tum chu i dik lo” a ti a. “Tu nge?” ka ti ve thung.

“Jonathan” a ti ringawt. “Mawh,tu nge hrilh che? Mak ka ti em mai” ka ti leha. “Ka sawi kha,amah Jonathan-a ngeiin Sunday zan khan min rawn hrilh “ a tih chuan ka thaw a tawp chawt mai..

“Ni lo…” ka ti sap ringawt..

“Hahdam rawh, ani kha nang aiin ka hre chiang zawk maithei. Mifing sual a ni a, a game-ah i lut ka tih kha. Chuvangin hnaih leh tawh ngai lo la ka duh” a tih leh chuan mak ti em em in ka en reng. 

“Amah ka hriat dan min zawt suh. Ka sawi dawn lo. . Tunah chuan ani lam theihnghilh-in hmalam pan la, amah atang khan inzir ang che. Mi tumah hi an pawnlam landanah teh ngai suh. Jona pawh addict satliah,misual tal hiar satliah angin i ngaia. Mahse,Rintlak anga i ngaih tlatna kha a game khelh chu a ni maithei ania” a tih leh chuan ka thaw hak ringawt. 

Karkhat a liam leh chiah atangin Jona hnen atangin phone call ka dawng ta tluk tluk a ni ber. Vawikhatmah ka pick-up ngai lo thung. Msg-in ngaihdam min rawn dil awl lo a. Ka reply ngai chuang lo. Ka nunah hian tel vena neih tir ka tum tawh lo bur a ni ber. Amah ka hriat atanga kum khat pawh a tlin hma hian ka nunah thil tha lam aiin a chhe lam vek a thlen tira. Ka hlau chu ka ti hauh lo nangin amah ka ngaihtuah chhuah zawng pawhin rapna ka nei tlat tawha. An ruang chhar pawh kha ka thinlung hian amah thah ngei a ni tih a pawm thlap bawk. 

Vawiin hi Dec ni 30 niin kan inneih ni a ni a. Tunah chuan Zorina pa pawh a tha chho ve zel tawha. Kal leh tur erawh chuan beisei chi a ni tawh lo thung. November thla thleng khan Jona hnen atangin call leh msg ka la dawng renga. Min rawn biakna apiang ka block zat zat a. Zorina hnenah engtia tihtur nge tiin ka zawta. “A awm ve lo angin ngai rawh, hahdam deuhin awm la..Phone call ni lo,nangmah rawn tibuai zawnga a che anih chuan min hrilh dawn nia. Keiman ka chingfel mai ang” a ti a. Min rawn phone buai fo mah se amah tak chu ka hmu ngai lem lo, vawiin Dec ni 30 a lo thlen meuh hi chuan min rawn biak buai lohna thla a tling thuak tawh. 

Ka hmai min cheisak mawlh mawlh laiin “Au Tete, hei i thil tur” tih pahin box te fel ren rawn, nalh thlapa intuam hi ka cousin in min rawn pe a. Inneih present tur emaw ka tih laiin card lo awm tel ka keu chuan “tunah hawng rawh” tih hi a lo inziaka. 

Box ka hawn hmain ka thinga, eng thawm mah a awm lo. Tim deuh taka ka hawn chuan  rangkachak sin te te a inphiar, ban bun a lo awm reng mai. Mak ti takin ka lachhuaka, ka khai kan chuan hawrawp pahnih hi a lo inkhai tel a.. T leh J a lo ni a. Ka tho nghal hluai. 

Ka bula box min pe tu lo ding hnenah “tu nge box hi pe che?” ka ti nghala.

“A hmel ka hmu lo. Bike in a lo kala, full face a khum.. amah chu cher lam, tlema sang..”a tih lai mekin hmanhmawh takin room atangin ka tlanchhuaka, kawngpui lam en tura balcony a ka chhuah chuan kan inkawt a Bike dum lo ding ka zuk hmu a. A khalhtu a rawn hawi chho a, a full face hmalam a pawhthlak loh atangin a mit ka zuk hmu a..Ani pawn min rawn hmu ve bawk. 

Chak lutuka a tlanchhuak zui nghal chu a tlan liam thlengin ka en zui a.. “Jona.. hlim takin awm la,mi tha tak ni ang che” tiin ka phun sep sep a.

A tawp ta.